#أبي_لم_يكن_إنساناً
البارت التاسع والثلاثون
للكاتبة لبنى الموسوي
بعدني احاول استوعب ليش سوة بيها كل هذا
ما اسمع إلا صوت الأقسام انسحب
درت وجهي همام رافع السلاح وموجهة على الاء تخبلت رفعت إيدي على أذني وغمضت عيني ع السريع لأن عرفت شراح يصير بلحظتها
رددت ويا نفسي الأستغفار ماكو ما ضربها الحمد لله
فتحت عيني ما اشوف إلا أمها ركضت على همام تبوس بـ إيدة شگد ما احچي ما اگدر اوصف صعوبة هالموقف
گبل سحب إيدة منها الورى ظهرة
تناشغ وتتوسل بي اروحلك فدوة وليدي لا تكتلها اترك أبوها يتصرف وياها
لو شما چانت مسوية بس ابوس رجلك لا تنهي حياتها بـ إيدك اذا الية والعمك لسة اكو خاطر بداخلك
الحجية.. شسوت يمة غير تفهمنا مو كافي خطف بتول ومرضي لا توگف گلبي واحچي شبيها مرتك
خديجة.. احچي همام الاء الها علاقة بـ الصار ويا بتول
ما گدر يجاوبهم احسة ممسيطر على اعصابة
ظل يروح ويجي وهمَ يتوسلون بي
صارت عيوني على بتول كسرت گلبي واگفة تخض مثل السعفة ودموعها تجري بدون صوت ركضت حضنتها
مسحت على راسها احاول اهديها
دموعها بللت إيدي توني اريد اگعدها وانصدم بـ صوت همام ترس المكان
ويا ما درت وجهي ركض على الاء ووگعلها دفرات وين ميوجعك ما خلة بيها عظم سالم من العصبية
ظلت تتلوى بـ مكانها وهنَّ يتوسلن بي حتى يرحمها
بالگوة گدرن يسحبنة منها
دفعهن حيل وطلع الموبايل من جيبة أتصل على أبوها
همام.. الووو السلام عليكم عمي
أبو الاء.. هلا وليدي وعليكم السلام
توني چنت ناوي اخابرك مخلد گال لگيتوا بتول بس ما حچة التفاصيل تركها عليك خير المجرمين نعرفهم
- كل شي راح احچيلك عمي
بس من تجي لـ بيتنا وحاول تستعجل بلا زحمـة عليك
- ظل بالي يمعود احچي منو ورى هالسالفة بس لا ذولة جماعة الـ ×××××
- لا مو همَ والموضوع مو مال تلفون استعجلي شويـة
- خوش لعد مسافة الطريق واكون يمك
سديت الخط وگعدت ع التخم ضغطي صعد راسي راح ينفجر من الوجع
فجأة طلع صوتها صاحت همام لو اني تخبلت
گمت اركض نزلت بيها ضرب لحد ما انتهت بـ رجلي كل هذا وگلبي ما برد بس لو ما أمها دتوگف بعيني
أم الاء.. عمة فدوة اروحلك كافي راح تموت جوة رجلك
همام.. لعد لتخليها تتنفس هالـ **** الـ **** لأن اني حالياً ما اشوف گدامي غيرها بت ابليس
بتول صارت تبچي بصوت عالي سحبت راسها الحضني
- اششش كافي لتخافين اني يمچ
حچيتها اصبر بيها بس بالحقيقة والله خايفة أكثر منها
رجع همام بـ خطواتـة گعد على طرف الطبلـة
من التعب گوة يسحب النفس الصدرة
ركضت أم الاء گومت بتها من الگاع تسحل بيها سحل لحد ما گعدتها ع الدرج ورجعت راسها للحايط
اباوع عليها متناشف من الدم شكلها صار حيل يخوف
گعدت يمها تمسح وجها بالعباية
أما هيَّ صنم وگاعد مترفع حتى عينها مثل أفلام الرعب
لحظة هدوء عمت المكان ماكو شي ينسمع ساعتها غير انفاسنا المضطربة
التفتت على خديجة انتبهت علينا عافت الكل واجتني تركض هاي ليش ما اخذتيها الـ غرفتها ولچ
- عمة والله خايفة هو اني اريد واحد ياخذني من يمكم
- امشي يمة بتول تعبتي من الوگفة
- فرك وجهة همام وصاح بصوت اقرب للهمس خديجة انتِ اخذيها متگدر تتحرك ولتعوفوها وحدها ابد
- لا خوية اكيد مو وحدها طيبة راح تظل يمها
- اي اظل
حچيتها ورفعت إيد بتول على ظهري سندتها للغرفة ما عولت بس اخلص من هالمنظر الگدامي من يمي متت
نومناها ع السرير لعابة منين منجيبها تجي
مسحت خديجة على راسها وباستها تبچي اختنگت شنو معقولة مسويلها شي !!!
التفتت علية تمسح بدموعها
- رايحـة اشوف المشكلة شلون تفض خلي عينچ عليها
- روحي عمة ليظل بالچ بس حبابة حاولي تهدين عمو
گالت ان شاء الله وطلعت
تمشيت الـ بتول گعدت فوگ راسها وبستها
گبل دارت وجها ورفعت إيدها على عيونها غمضت ادري مو حابة تحچي وحقها والله بس شلون راح اموت واعرف شمسوين بيها هالولد الحرام
همام.. گاعد على اعصابي منتظر أبوها يجي اندگ الجرس گمت فتحتها هذا مخلد شجابك يول
- خو ما كتلتها ولك
- لا لـزمت اعصابي على أخير لحظة بس بعدها الشغلة براسي احس ما ارتاح اذا ما اسويها صدگ
- لا أخيك
متسوة والله تدمر حياتك وأهلك ومستقبلك بسبب الاء
- يعني بعد كل شي سمعتة وشفتة تريدني اسكت !!!
- لا طبعاً لتسكت
بس اكو هواي طرق غير القتل تاخذ حقك منها بيها مثل الضرب الحبس القانون قابل اعلمك يا همام
- يا ضرب يمعود
تريد ادخلك للصالة تشوف شسويت بيها
البطران يگولي ضرب غير موتتها ورغم هذا ناري مبردت
- همام الزم اعصابك وراك عائلة لتبلي روحك وتبليهم
زين أتصل بـ عمك
خلي يجي مثل ما ورطك يطلعك من هالورطة ونرتاح
- اي انطيتة خبر هذا وينة بالطريق
- كلش زين لتطب جوة انتظرة يجي هيچ احسن وأأمن
- بعدة يحچي صارت سيارة أبوها بوجهي هذا اجة
- ركن السيارة ونزل سلم هاي يمعودين شصاير وياكم والله ألف فكرة وفكرة خطرت على بالي
- بس خل اسويلك طريق ونحچي جوة السالفة طويلة
دخلت جوة گلتلهن يلبسن وطلعت
صحت تفضلوا ما قبل مخلد گال انتظرك بالحديقة من تخلصون تعالي
ما ضغطت علي اخذت أبو الاء ودخلنا
بس شاف بنتة انصدم
التفت علية مستغرب هاي شنو همام شبيها شسوت بعد
- تفضل استريح
وراح احچيلكم الموضوع من بدايتة للنهاية
حتى اطلع من حقك وحقها ونخلي حد الـ هالمهزلة بعد
من نظراتـة حسيت شك بـ عملة بنتـة
گعد وشرحتلهم القصة كلها احچي وإيدة على راسة ما نطق بـ كلمة أول ما كملت صاحت ااااخ ربي ااااااخ
خديجة.. لحظة لحظة همام
الاء وسلام سوة وهمَ ورى كل هالمصايب ولك شلووون
أم الاء.. صخام الصخمچ الاء
ريت بطني صارت عاگر ولا شالتچ يا بت الشوارع
سودتي وجهنا من كووون الله يسود وجهچ دنيا وأخرة
بعدها تحچي وتلوم عليها
طفر أبوها نزع الحزام وسحبها من الدرج للگاع ظليت بـ مكاني ما اهتميت يضرب بيها وأمها تتوسل
أخر شي وبعد ما انتهت بـ إيدة
رفع سلاحة وسحب الأقسام اليوم اريد اغسل عار هاي البلا شرف ونرتاح من مصايبها تشاهدي ووولچ
أم الاء.. لا فدوة اروحلك ابراهيم
الله يخليك ويطول بعمرك لا تكتلها ابوس راسك ابوس إيدك ابوس حتى رجلك بس عوفها فدوة عوووفها
الحجية.. عوفها ي أبو الاء
دمها لا راح يريحك ولا يريح وليدي بالعكس
لو كتلتوها يجي يوم تندمون خلوها هيچ تعيش بالذل حتى تلاگي جزاء عملتها بالدنيا قبل الأخرة
أم الاء.. اسمع من الحجية الله يوفقك
شتسوون بيها سوو بس لا الكتل حرااام والله حرااااام
أبو الاء.. همام سابقاً اني وعدتك ووعد الحر دين
وهاي الاء گدامك وجوة رجليك
شتريد تسوي بيها براحتك حتى اذا ردت اخليها تخيس بالسجن ما عندي مانع لأن السوتة ابد مينغفر
همام.. لا عمي لا مستحيل توصل لهنا
لجل عينك ولجل كرامتك وسمعتك بين الناس اني راح اعفي عنها بس مقابل هالشي رايد منك شغلتين
- اطلب وطلباتك تتحول أوامر وشتحچي حقك يابة
- الأمر لله سبحانه وتعالى
بس الاء بعد مالها گعدة بـ بيتي تاخذها هسة وما اريد اشوف خلقتها طول ما اني عايش طبعاً هاي اولاً
أما ثانياً والأهم
سوايتها هاي ميصير تتفوت الها عمي
واني ادري كلش زين ما راح تقصر وياها وترجع تربيها من جديد لأن وللأسف بنتك يحتاجلها إعادة تربية
- لا وعيونك وتعرف انتَ شگد غالي علية
مراح افوت الها هالعملة واظل احاسبها عليها الأخر يوم بـ عمري ولحد مينزلوني بـ گبري
- خديجةةةة
- نعم خوية يمك اني گول
- اصعدي جمعيلي كل غراض الاء حتى تاخذهن وياها
أبو الاء.. لا وليدي كل شي متاخذ من هالبيت
تطلع منا بطرگ ثوبها
متستاهل الدرهم وكل حقوقها سقطت عن رگبتك حتى الغايب اعتبرة هدية مني لـ بتول شخصياً
هذا ابسط تعويض ممكن اقدمة الها
ولو فلوس الدنيا كلها متعوض لوعة گلبك وگلبها
بـس تأكد يا همام راح اخليها تعيش العمر وهيَّ تتمنى لو كاتليها بـ هاللحظة ولا العذاب الدتشوفة
ولأخليها باليوم الواحد تندم ألف مرة ومرة على كل شي سوتة بيك وبيها
- واني ادريك گد وعدك عمي
- بس جيبولي فد حجاب تذبة على راسها قبل لا نطلع
- خديجة جيبيلها حجاب ع السريع
- صار عيني
حچتها وركضت جابـت الـ حجاب انطتـة الأمها تلبسها
أبو الاء.. سامحني وليدي
سامحني على كل شي بدر منها بحقك وحق عائلتك
الله يشهد چنت شاريك بماي عيني وما حبيت اخسرك واخسر نسبك الطيب بس حاچيني شسوي
المفروض اعتذر من نفسي قبل لا اعتذر منك
اني صوچي والله صوچي
مچان لازم اتمسك بيك بعد كل سوايات الاء وهاي هيَّ النتيجة حطيتك وحطيت نفسي بـ هالموقف القذر
باوعتلة وسكتت ماكو كلام ينحچي بمثل هاللحظات
التفت على أمها وصاح
اخذي بنتچ وطلعن گدام ع السرررريع
گومتها بالگوة تسحل بيها من گد الضرب صارت جنازة
أما أبوها ولا حاول يساعدها
بالعكس هيَّ ودتمشي دفرها وگعها على وجها
انتظرتهم يگوموها ورحت وصلتهم للباب دارجع للبيت صار مخلد بوجهي حتى نسيت دينتظر بالحديقة
- لك هاي شمسوي بيها زين ما ماتت بـ إيدك
- حط روحك بمكاني وفهمني شلون راح تتصرف وياها
- لا عمي لا
الله لا يحط أحد بـ مكانك ويساعدك على هاي المصيبة
- متفوت جوة شنو راح تظل گاعد هنا
- والله ما اريد ازعجكم بس بنفس الوقت ما اگدر اخلي واروح وانتَ بـ هالحالة
- امشي يمعود ازعاج شنو قابل انتَ غريب تفضل يلا
- زاد فضلك
دخلنا للبيت نار وشابة بية كل شي سويتة ما برد گلبي
لگيت خديجة گاعدة بالزاوية تبچي
بس شافتني أمي ظلت تسأل بصدمة شلون وليش لأن ممتوقعة هم سلام وهم الاء الشغلة متدخل العقل
- على شنو تنصدمين يمة
من يومنا نعرف هالاثنين شنو من ملة نگسة
بس الما چنت اتصورة يطلع هوَ **** وهيَّ **** وبت *****
مخلد.. كافي ي خوي راحت بعد ماكو داعي لـ هالكلام
ونسيبك واحد عار السجن يلوگ الأمثالة
بس حچاها ارتفع صوت خديجة بالبچي تخبلت بمكاني
- على شنووووو دتبچينننننن
مصدومة موووو ؟!!
ليش دتنصدمين مو هذا هوَ سلام العاندتيني ورجعتيلة
گتلچ عوووفي
گتلچ هذا واحد دايح وسربوت فتحي عيونچ وشوفي حقيقتة عدل ماكو ولا كأني احچي ركبتي راسچ ورجعتيلة وهاچ هاي تالي النتيجةةةةةة
شكو شي صار گدامي كسرتة بلا وعي فلشت الصالة
صار گدامي مخلد قيد حركتي
الله عليك كافي همام ارحم أمك مدتشوف شصار بيها بعدين البنية شنو ذنبها اذا رجلها واحد عار وبلا شرف
- لكككك لااااا الذنب كلة منها
لكككككككك ألف مرة نبهتها ألف مرة گعدت وحچيت
خوية بعد عيني تاج راسي عوفي والتفتي النفسچ
إنسان الله غاسل حظة وجهة وگفة لا عبادة لا صلاةةة نسوان مكسرات شرب دياحة المن باقية وياااا
بس ولك ما فاد ولا يفيددددد
عمرها كلة عاشتة بالثوووووووول علمود منوووو علمود سلام الـ**** الـ ***** الكلب أبن سطعش كلب
- بس عاد شجاك يا أخي
احترمني مو واگف بيناتكم من اولي سوي التريد تسوي
- مخلد عقلي راح يوگف شفت شصار شفتتتت
لككك بتول خلصت ليلة كاملة يمهم
خنازير بلا عقل الله يعلم شمسوين بيها اخ ربي رحمتك راح انجلط من التفكير
بس حچيتها صارت خديجة تناشغ بصوت عالي
التفتت صرخت عليها كاااااااافي
بطلي بچي وفوتي البتول حاولي تعرفين شصار وياها حتى اگدر اتصرف قبل لتروح من إيدنا الطفلة
طيبة.. گاعدة يم بتول ودموعي تنزل
محتارة بينها هيَّ الـ شكلها ميطمن بحيث احس النفس گوة يصعد وينزل بصدرها
وبين الوضع الـ برة بعد ما انخبصت الصالة بـ هوستهم لأن خايفة كلش لا همام يسويها صدگ ويبتلي
اجواء ما اتمنى الأحد يعيش مثلها
انعادت علية نفس مأسات رزاق وحياتي الصعبة ويا
سمعت همام يصيح
رفعت إيدي حجبت الصوت عن أذني شوية وصار هدوء انفتحت الباب رفعت راسي هاي خديجة
من گد ما باچية ما ظالة عيون بـ وجها
گمت الها ع السريع عمة شصار مسحت على راسي مو هسة طيبة بعدين
عافتني وتقربت الـ بتول
مررت اطراف أصابعها على عيونها فتحت
صفنت بوجه خديجة سندتها عدلت گعدتها ها بشريني شلون صرتي هسة
ما ردت عليها اكتفت بس بسحب النفس العميق
- احچي بتول
احچي يمة شسوو وياچ هالأنذال ميصير تظلين ساكتة
بس حچتها بچت بصوت مسموع واخيراً طلع الها حس
- لتبچين حبيبتي
انتَ هنا بيناتنا يعني محد يگدر يأذيچ أما همَ فـ وگعوا بـ إيد عمچ وراح يحاسبهم واحد ورى الثاني
يلا احچيلي
لتظلين ساكتة گلبي نار عليچ ريحيني ولو بكلمة وحدة
- انهارت بالبچي اكثر تقربت من خديجة عوفيها فدوة متشوفين شصاير بحالها مو وكت هالحچي
- لازم تحچي طيبة لازم نعرف شصاير وياها
همام واگف برة على اعصابة
الصار مو سهل لا عليها ولا علينا ولازم نعرف حتى نگدر نساعدها تدرين بالمجتمع ميرحم حتى الشريفة
- شلون يعني ما فهمت
- يعني اذا لا سامح الله طلعوا معتدين عليها اخلي همام يتحرك ويسويلها تقرير تگدر تحمي نفسها بي
- لا اسم الله الله ليگولها
احچي بتول فدوة شسوولچ هالحقراء الله لا يوفقهم
- احچي بنيتي وبردي گلبي شسوو وياچ ولد الحرام خو ما اعتدوا عليچ
هي حچتها لو بتول مدري شصارلها
طفرت من السرير رفعت راسها ليفوگ وصرخت بصوت طالع من اعماق گلبها اااااااااااااااخ ولك يااااابة وينك تعال شوف بنتك شصااااار بيهااااا
هي صرخة وهي وگعة تكومت من طولها على السرير
ركضنا عليها اني وخديجة ماكو ولا نفس
التفتت علية صيحي الهمام ولچ بنيتي راح تموووووت
طلعت حتى حجاب ماكو على راسي
لگيتهم صافنين ع الغرفة يعني سمعوا الصوت صرخت عمو الحگ بتول وگعت
بس حچيتها ركض هو ومخلد دفعوني وطبوا
باوعت الـ همام نصى عليها
راد يشيلها ما گدر ابتعد للميز وگعد بالگاع إيدة ع راسه
منظرة وهو بـ هالحالة هزني من الداخل هز
صاح مخلد جيبولي حجابها لبستها خديجة ع السريع شالها بـ حضنة وطلع يركض
ظلينا بس اني وهمام بالغرفة بقت عيوني علي حايرة شلون اتصرف
تقربت منة ودموعي تجري گوة اشوف گدامي
وصلت يمة امسح بـ وجهي
منزل راسة وشابك إيد بـ إيد ركزت زين إيدة مبللة !!!
موقف صعب ينشرح بكل كلمات الدنيا
قاسي حيل
دمعة الرجال مو سهلة ابد ومستحيل تنزل من عينة اذا ما انكسر من جوة مثل مصار ويا همام بالضبط
گعدت گبالة وخليت إيدي فوگ إيدة عصرتها حيل
وهنا چانت الصدمة
بلا أي مقدمات شمر نفسة بحضني يبچي بصوت عالي
لحظة صمت ما گدرت اعبر عنها غير بس بالدموع
حضنتة حيل وبچيت ويا
دقايق فرغ بيها گلبة من كل ضيق وهم
رفع نفسه من حضني ودار ظهرة علية يمسح بـ وجهة
حقه ما الومه اكيد يستصعب يبچي گدامي
بس يظل بشر والبشر الة طاقة تحمل حتى الجبل ينهد اذا واجه كل هالخراب العاش بي همام بـ هاليومين والمصيبة الطعنة اجتة من كل اتجاه
وگف على حيلة
گح ومسح وجهة مرة ثانية وراها طلع من الغرفة
رحت ورى وصلنا للصالة تلگتنا الحجية يمة انتَ بخير
- الحمد لله يوم ليظل بالچ
حچاها وصعد يمكن يبدل لأن ظل بالفانيلا الداخلية
شوية ونزل فعلاً مغير ملابسة سألتة الحجية وين گال اروح للمستشفى مو مال اعوفهم وحدهم
- وليدي صارلهم هواي
خابر بلكي ديرجعون أو يجوز الشغلة ممستاهلة اخاف تروح وتتعب نفسك وتطلع روحتك مالها داعي
- صح كلام بيبي
حباب اتصل احنة هم بالنا يمهم منگدر نصبر لرجعتهم
همام.. طلعت موبايلي اتصلت على مخلد بسرعة جاوب
ها وينكم
- راح نجي والحمد لله شغلة بسيطة لتخاف
- عشر دقايق واصير يمكم
- لا يمعود متسوة هسة راح نطلع بس يخلص هالمغذي
- يعني شگد
- نص ساعة ان شاء الله ونصير يمكم لتخاف بـ أمانتي
- متقصر خوية رحم الله والديك تعبناك ويانة
- لا شنو هالحچي لتزعلني منك أهل احنة وهذا واجب
طيبة.. سد الخط من مخلد
طمنا وشمر الموبايل ع الميز يفرك راسه حيل من الوجع
- شبيك عمو ضغطك صعد
- يمكن روحي جيبيلي حباية براستيول بلكي ارتاح
- بس انتَ مماكل شي من الصبح ميصير هيچ
- طيبة راسي راح ينفجر تحركي بسرعة ولا تناقشيني
- اي رايحة بس لتصير عصبي
حچيتها ورحت للمطبخ يعني ظلت ع البراستيول اشو حتى حب ضغط ديبلع ع الريگ انطي والله كريم
رجعت لگيتة گاعد على نفس الوضعية
مديتلة الشريط تفضل
أخذة مني بلع حباية دياخذ الماي انتبهت الإيدة ترجف بحيث حتى الگلاص يخض بالگوة سيطر يلزمة
ردت احاچي تراجعت
توني درت وجهي للحجية فزيت على صوت الكسر
باوعت شامر الگلاص بنص الصالة يربي شلون تالي ما راح يهدأ اليوم اذا ما رجعت بتول واگفة على رجلها
- يمة شجاك دگول يا الله
كل شي ينحل ترى لوعة گلبك مو أكثر من لوعتنا بـس هاي مثل متشوف مسلمين امرنا لرب العالمين وراضين بحكمه
استغفر ربك وخلي ايمانك بي چبير حشى لله أن يظلم عبده لو يخلي حاير وانتَ مؤمن وتعرف هالشي
ما رد عليها
گام يفتر بالصالة رايح جاي ميعرف شيسوي
تقربت منة ادري مو راسك يوجعك اگعد ليش دتفتر
نتر بية بدون ميباوعلي اسكتي طيبةةةة تركتة ورحت للمطبخ الحچي ويا ميفيد حالياً
جبت المكناسة لميت الكزاز من الگاع
ورتبت الصالة مفلشها ما بيها كتر صاحي حتى المسجل كاسرة
قريب الساعة سمعنا الباب انفتح
گمت اركض اريد اتلگا بتول وگفني صوت همام عاط ها وووين فوتي لبسي حجابچ مو الرجال وياهن
مدري شلون نسيت ليش ظل عقل بـ راسي افكر بي
لبست الحجاب وطلعت بتول واگفة
غمضت عيني احمد ربي واشكره على رجعتها بالسلامة
همام.. ها عمو بشريني شلون صرتي
بتول.. تعبانة اريد أنام
همام.. تعالي حبيبتي اني بـ نفسي اخذچ للغرفة سلامتچ من التعب
سحبها الـ حضنة وراحوا للغرفة ماكو ثواني وطلع
اكيد تعبانة فـ ما حب يضغط عليها
تقرب من خديجة سأل بصوت ناصي ها شصار احچي
- خطية اعصابها انهارت وضغطها نزل كلش
انطوها علاج ومهدئات
بعدين حچيت للدكتورة الوضع بيني وبينها فـ گامت ع السريع فحصتها حتى تشوف معتدين عليها لا
- اااااييي
گبل گام مخلد اني رايح همام
داگعد خوية قابل انتَ غريب مو بعينك شفت كل شي
خديجة.. المهم الحمد لله والشكر
بشرتني بعدها بنية ممعتدين عليها بس حالتها النفسية تعبانة لأن حسب ما شافت متعرضين الها بالتحرش
همام.. شي اهون من شي
رفعت راسي احمد ربي من رحم بحال هالبنية وما كسر بيها ويا هالمجتمع الـ ميميز بين الزين والشين ويتعامل بس بالظواهر
مخلد.. يلا همام رايح اني خليكم بـ راحتكم
همام.. ادري شبيك شلغمت ع الروحة عندي هواي حچي وياك اصبر شوية
مخلد.. أخيك اجلة البعدين ما بية هسة يلا مع السلامة
همام.. عرفت وجعـة وين
بس شيفيد بعد اذا هيَّ انكسرت قبل كسرتة
ما ادري ورى كل شي صار وياهم
راح يظل متمسك بيها لو هالشي يصير عائق بطريقهم
طيبة.. بس راح مخلد صعد همام الـ غرفتة
ماكو ثواني
وانهرج البيت طاب وطيب صعدت اركض لگيتة مفلش الغرفة باوعتلة بخزرة شلون اليوم مو كافي
- فوتي رتبي الغرفة ما اريد اشوف شي الها هنا بسرعة
- اي تمام هسة اسويها بس اهدأ
شلون ضغطك ينزل وانتَ حاط راسك براس الغراض ما ظل شي بالبيت صاحي ليش هالعصبية مچنت هيچ
- رايح الـ غرفتچ كمليها وصيحيلي
بس طلع بديت اعزل بالغراض ظهري انكسر من التعب
ساعتين اشتغل بيها الى أن فرغت تماماً
نزلتهن على شكل وجبات بالمخزن ورحت للصالة ماكو احد بس الحجية گاعدة
ظليت يمها نتصفن وحدة بـ وجه الثانية
أخر شي گلت خل اگوم اسوي العشى من الصبح مماكلين لگمة
- توني رايحة للمطبخ طلعت خديجة ها وين
- اسويلكم العشى
- لتتعبين نفسچ ليش هوَ منو اليشتهي ياكل بعد الصار
حچتها وراحت للحجية اخذتها للمغاسل
كلش انقهرت
مشيت الغرفة بتول فتحت الباب بـ هدوء نايمة همزين سديتها وصعدت الغرفتي لگيت همام يصلي
- تقبل الله
- منا ومنكم كملتي الغرفة لو بعدچ
- اي وحتى الغراض نزلتهن بالمخزن والفرش هم بدلتة
- عاشت إيدچ
يلا اني اروح انام هناك لتگعدوني للصبح إلا اذا صار شي
- ليش تنام هناك ؟!!
- الاء و ولت شعندي بعد هنا اخذي راحتچ بالغرفة عمي
باوعتلة ضايجة لا يا ضايجة إلا شوية ابچي
حچيت ويا نفسي راحتي وياك همام بس للأسف مگاعد تحس بية
چان ديسبح بس كمل كف السجادة وگام يطلع صحتة
- لحظة متريد عشى
- لا ما اشتهي ولتنسين تگعديني للدوام وقتي الساعـة اذا تردين لأن ما اتصور احس على هالتعب
- شنو الجديد شو دومك متحس عاد لتتحجج بالتعب
- باوعلي وابتسم تصبحين على خير
فرحت لأن گدرت اضحكة شوية بس شيصبرني وهوَ مو يمي اليوم يربي شلون تعودت علي بالغرفة
صفنت ويا نفسي شبيچ طيبة مو ألف مرة حذرتچ من هالحب ليش مُصرة تأذين روحچ
نزلت جوة نفس الكأبة والهدوء لحد ما راحوا ينامون
لـ 12 رجعت صعدت
ردت اطب الـ غرفتي صارت عيوني على غرفة همام ما ادري ليش رجلي اخذتني الها حطيت أذني ع الباب
ماكو صوت يعني نايم
ردت افتح الباب تراجعت شنو السالفة يمعودة بلا گعد وشافچ بالغرفة شيگول عليچ دكافي الخاطر الله
رجعت الغرفتي فتحت الباب ردت ادخل اكو شي منعني
روحي يمعودة شكو بيها بس شوفي
بدون أي تفكير دخلت علي چان رايح بسابع نومة ادري بي تعبان
تقربت منة گمبصت بمستوى الچرباية صفنت بـ وجهة
چان نايم ع الجهة اليمين وإيدة يم راسه
قربت إيدي اتلمس اطراف شعره وگلبي احسة يدگ مو بصدري لا براسي من جمال الشعور العشتة لحظتها
- يا ربي شلون حبيتة كل هالحب ؟!!
مو چنت اشوفة مثل عمو حامد شلون لعد هيچ تعلقت بي وتغيرت مشاعري اتجاها فجأة
شلون تعلقت بي لـ هالدرجة بحيث ما اتحمل ينام بغير المكان الأنام بي اني
دنگت علي بست إيدة بـ هدوء وما ادري ليش سويتها
تلمست خدة ثواني متجردة من كل خوف
ما احس إلا نزعت من رجلي وتمددت يمة صار وجهي گبال وجهة عدل
تقربت منة أكثر لحد ما اختلطت انفاسة بـ انفاسي
رفعت إيدي شبكتها بكف إيدة وابتسمت
ااااخ لو بس تدري شگد احبك واموت على كل خصلـة بيك سواء حلوة أو لا ولو كلك على بعضك حلو
عود ليش الخوف وياك حلو هالشكل
اي حالياً اني خايفة بس والله شعور يجنن مثل المغامرة التجي للإنسان مرة بحياتة ويكون غبي اذا فوتها
بقيت احاچي وعيوني تتأمل كل تفاصيل وجهة
ما ادري شلون غفيت
فزيت الصبح على صوت المنبه سحبت إيدي اتمطى ما احس إلا طخيت بي گمزت من مكاني مخروعة
عززززة هاي اني شسوي هنااااا ؟!!!
طيح الله حظچ طيبة شلون تغفين للصبح يمة بلا گعد وشافچ بـ هالحالة شراح يكون جوابچ ثولةةةة
بعدني احچي ويا روحي والمنبه يلعلع فتح عيونة
مو فتحهن عبالك فتح علية باب الحمام
طفرت ليورة اجيت اوگع إلا شوية باوعلي مستغرب ها طيبة شدتسوين هنا !!!
- هاي شگعدك انتَ
- شگلتي ؟!!
- هاااااا لا گلت جاية اگعدك انتَ يعني شداسوي قابل
- اي گعدت
- راح اجهزلك ملابس طب اسبح بين ما اسويلك ريوگ
حچيتها وركضت من گدامة همزين عبرت علي
شبع نوم اكيد يفز غير تطفين المنبه يا يمة ثولچ راااااح يجلطني
وگفت اسويلة الريوگ توني كملت طب يگلب بموبايلة
- رحتي الـ بتول اليوم
- لا
- روحي شوفيها بسرعة اخاف گاعدة ظلي يمها لتجين
طلعت الغرفتها فتحت الباب شنو هاي بعدها نايمة ؟!!
رجعت الـ همام لسة نايمة بس شلون باچر أمتحانة
- هي اخذلها اجازة بس انتِ اذا تگدرين أمتحني احسن
- اي امتحن شعندي مأجلتة حتى معدلي عالي
- خوش
- شصار شنو علاقة الاء بـ خطف بتول مراح تحچيلي
- اسألي خديجة هي تسولفلچ
- وليش مو انتَ
- لا تلحين مو دتشوفيني تعبان وكت هالسوالف يعني
- حچاها وگام وين شو كل شي ما أكلت
- الحمد لله
- من البارحة مماكل شي شنو السالفة تريد توگع علينا
ما رد بس سلم وطلع ع السريع
ظليت انتظر خديجة بس گعدت سألتها على الاء وشما اگول انصدمت هم قليل ع الشي الحسيتة ساعتها
- دقيقة عمة شنو يعني الاء وسلام بيناتهم علاقة ؟!!
- اي شايفة بلا رجلي ومرت أخوية منو يصدگ
- يا ربي ما داستوعب شنو هالبشر وليش سوو كل هذا
زين الاء مو مشكلتها وياية
ليش تأذي بتول خطية شنو ذنبها تعيش هالشي بسببي
- انتِ شعليچ لتحملين نفسچ ذنب الصار
الاء مچانت مشكلتها وياچ شخصياً الاء چانت مشكلتها ويا شكو واحد بهذا البيت وأولكم اني
- شلون يعني ؟!!
- يعني رادت تنتقم مني بـ رجلي
ومن همام بـ شرفة وبنت أخو المربيها على إيدة
ومن بتول بـ خطفها
ومنچ لمن تخلي همام يتصور انتِ ورى هالسالفة علمود يطردچ من البيت وهيچ ترتاح من الكل
ظليت صافنة بوجها حتى الكلام ضاع مني
الله يساعد همام شلون تحمل
فعلاً هالرجال واعي وعقلة چبير غيرة واحد مستحيل يتجاوز الموضوع بدون مينجر ورى انفعالاته
مرت أيام من اصعب الأيام بـ حياتي
ظل همام فترة طويلة مو على طبيعتة مو ذاك القديم لا يگعد ويانة لا ياكل مثل العالم والناس حتى بالبيت منشوفة إلا وقت النوم
فترة واني محرومة من شوفتة لأن اجت العطلة
يدخل البيت بأخر الليل
لو الحگ اشوفة بحجة تريد عشى زايدة ناقصة
لو يطب لغرفتة وما الحگ علي وبعد ذاك اليوم مستحيل اعيدها وادخل الغرفتة لا اتفشل گدامة
خديجة ظلت يمنة لأن سلام دخل للسجن
فترة بسيطة وهمام خلا يطلگها
وهوَ هم طلگ الاء وهيچ انتهت المشاكل بعد ما طلعوا هالاثنين من حياتنا بس للأسف الأثار التركوها بينة ما تجاوزناها بسهولة اخذت منا وقت طويل يلا گدرنا نتخطاها
اني نجحت للخامس بس بتول دخلت بـ ازمة نفسية
وعاندت متمتحن حتى دور ثاني
رغم مچان عدها غير مادة وحدة حاولنا وياها ما قبلت بالأخير همام گال لتضغطون عليها الدراسة مو أهم من صحتها وراحة بالها
فترة وعرضها همام على طبيب نفسي
شوية بدت تتخطى أزمتها وسولفت الصار وياها بذيچ الفترة الخديجة
گالت أكثر من مرة واحد بيهم راد يعتدي علية
بس اسمع الثاني يمنعـة ويگول المعلم وصانا ألف مرة منتقرب منها
فـ چانوا يكتفون بـ أبشع انواع التحرش ولمن تقاومهم يتفننون بتعذبيها مثل مچان واضح على جسمها
بدت السنة الجديدة
وطلعت روحنا يلا قنعنا بتول تكمل دراستها
الحمد لله داومت بس مچانت تدرس ابد حتى درجاتها نزلت
تعمدت اسوي مثلها وما اجاوب
في سبيل لا انعفي واخليها وحدها خصوصاً اثنينا صرنا بصف واحد
بعد فترة من الدوام
وتحديداً قبل الامتحانات النهائية بشهر
تحسنت حالة بتول ورجعت لوضعها الطبيعي بعد معاناة ومحاولات لا تعد ولا تحصى مني ومن خديجة وهمام وجلسات علاجية عند الطبيب النفسي طول الأشهر الراحت
اليوم طالعين من الدوام دننتظر همام بـ باب المدرسة
- حچت بتول بنبرة حزن شفتي شسوة
- منو
- مخلد اكو غيرة
- باوعتلها وسكتت هاي أول مرة تجيب سيرتة من يوم الحادث يمكن لأن تعالجت وصارت احسن
- بالچذب ما راوني شكلة لا هنا ولا بالبيت
بس شوفي راح يصير سنة العام مثل هالوقت انخطفت وهاي امتحانات أخير السنة اجت
كلامها صح
اني هم انتبهت الـ مخلد اختفى
اكيد تأثر بالشي الصار مع هذا حاولت اضيع الموضوع حتى لتتحسس ما ناقصها خطية
- لا حبيبتي شنو السالفة
ترى قبل هم ما چنا نشوفة إلا بالصدف يعني طبيعي
- لا طيبة مو طبيعي لتضحكين على روحچ
مخلد سحب نفسه لان ما تحمل الصار وبعد ما يتشرف بـ وحده مثلي ولا حتى يفكر مجرد تفكير أنو يرتبط بيها
- باوعتلها ونزلت راسي
- شنو يعني هسة اني صرت مو خوش تلوثت خلاص
- بتول شبيچ ليش دتحچين هالشكل
ليش شصار حتى تتلوثين انتِ اشرف من الشرف نفسه وألف واحد يتمناچ مو إلا مخلد خل يولي انسي مثل ما نساچ
- ليش الشغلة بـ إيدي حتى انسى
حقچ متدرين شگد احبة ومستحيل تعرفين لو اشرحلچ منا لألف سنة
بعدها تحچي شفت سيارة مخلد من بعيد اجيت انجلط
- يا ولچ بتووووول
- هاا
- دوري وجهچ باوعي منو وراچ
- التفتت بس شافتة گدامها لزمت إيدي حيل ضحكت
- لتوگعين ولچ
- سدي حلگچ وظلي لازمتني ما اتحمل اشوفة گدامي
- خليچ قوية لتبينين الة انتِ مهتمة تسمعين
هزت بـ راسها ودارت وجها ع الشارع
نزل مبتسم نفس النظرات القديمة شفتها بـ عيونة شنو يعني بعدة يحبها لو تعمد يكون طبيعي علمودها
مخلد.. ها شلونهن الحلوات
طيبة.. الحمد لله عاش من شافك وين ما بينت بعد
مخلد.. ملتهي بالشغل والله مديصير مجال أمر عليكم
- ها يعني بس هذا السبب
- رفع حاجبة بـ استغراب شلون يعني ما فهمت قصدچ
- گرصتني بتول على كيف گبل گتلة لا مو عبالي مسافر
- لا وين اسافر
اي بتول شلونچ شو ما سمعت صوتچ من اجيت لسة
- الحمد لله
- هاي شنو وين راح لسانچ مشتاقة التغريداتچ احچي عمي حتى لو تمسحين بية الگاع قابل
بس حچاها ابتسمت بـ هدوء
الحمد لله من گدر يضحكها شوية عندي احساس بعدة يحبها بس وين چان ليش هسة يلا بين
صعدنا ويا بالسيارة هدوووء بس النفس ينسمع
عيوني تراقب مخلد
منتظرة منة ولو نص حركة اتأكد مشاعرة بعدها اتجاه بتول مثل قبل وما أثر الحادث علي
ماكو دقيقتين وسحب القرص من المرايا
شغل اغنية احمد شاكر ما احمل الفرگة ورفـع الصـوت كلش معناها يريد يسمع بتول
التفتت عليها عيونها تلمع والرجفة واضحة بـ جسمها
لزمت إيدها حتى اقويها
حسيت على مخلد سحب الكلينس مسح وجهة ولبس المناظر يربي شديصير ويا هالاثنين !!!!
بتول.. مخلد عفية نزل الجامة بسرعة
- خو ما بيچ شي
- لا ما بية بس نفسي لعبت من العطر مالت سيارتك
گبل نزلها طلعت راسها تشتم هوى بـ لهفة عرفت العطر حجة رادت ينزلها لأن اختنگت من الموقف
ظل يراقب بيها وكل شوية يسألها شلون صرتي لحد ما وصلنا للبيت
بس نزلنا راحت بتول الغرفتها تركض
خديجة گاعدة بالصالة انتبهت عليها شبيها بتول شكو صار شي
- مخلد وصلنا
- هاي شنو شعجب بين الافندي
- لا عمة والله مو مثل متتصورين بس الله اليعلم شنو چان شاغلة
- ليش صار شي سولفي بسرعة
- لا ما صار بس هو ظل مثل ما هوَ ما حسيتة متغير
عدت الأيام وچانت هاي المرة الأخيرة الـ تشوف بتول بيها مخلد لان خلص دوامنا وعطلنا بعد
الحمد لله نجحنا للسادس
وبالعطلة همام خلالنا مدرسين خصوصين لـ كل المواد
عرفنا من خديجة اغلب الفلوس تداينهن علمودنا
حاولنا هواي بلكي نقنعة يلغي بعضهن بس چان يرفض ويگول فدوة الكم المهم اريد المعدل العالي
بلشنا بالدروس وهوَ تكفل يودينا ويجيبنا رغم انشغالة
وهيچ مرت الأشهر ورجع الدوام
اصعب سنة مرت علينا فصلنا عن العالم الخارجي تماماً يا دوب بس ناكل ونصلي ونرجع للدرسة
أما شغل البيت كلة على خديجة خطية
مچانت تقبل نمد إيدنا بشي تگول هاي السنة مستقبلكم لاحگين ع الشغل المهم ترفعون راسنا وتفرحونا
سنة كاملة دفنت روحي بالكتب
نسيت كل شي حتى مشاعري لـ همام دفنتها مؤقتاً بين ما اكمل السادس واحقق حلمي وحلم عمو حامد بية
طول هالفترة همام عودنا يجي تالي الليل
يطب علينا لغرفة بتول وبـ إيدة علاگه نساتل وچبوسة ومن هالسوالف النحبها
يطشرهن ع الكتب ويگول اكلوا زين حتى تدرسون زين
لسة اتذكر فد مرة فات الوقت والعلاگة ماكو
صعدتلة بتول حتى تشوف ليش مجاب ومن گلها نسيت سحبت فلوس من محفظتة وگلتلة حتى بعد لا تنسى واجت قسمتهن بيني وبينها اللوتية
اجة وقت الأمتحانات وعشنا أيام ما بيها غير الأرهاق والتعب وساعتها متعدي إلا بالخوف والقلق
أمتحنا والحمد لله گدرنا نجاوب وما ضاع تعبنا وتعب همام بينا وراها صرنا نحسب الأيام للنتيجة
اجة موعد التسليم
گالوا النتائج راح تنعلن ع النت الظهر
ليلتها ما نمنا للصبح اني وبتول ولزمنا البيت جلفنا جلف من الوحدة بالليل للستة الصبح يلا خلصنا
طلعت روحنا يلا صار الظهر
صبينا الأكل وظلينا نتفرج عليهم منشتهي ناكل شويـة وانتبه همام علينا شكو صافنات متاكلن شبيچن
خديجة.. خليهن راح يموتن من الخوف دشوف وجوههن
همام.. ادري ليش تخافن مو مجاوبت عدل
خديجة.. يا ميخافن
لازمات البيت جلف من الوحدة للصبح شتحچي انتَ
همام.. هههههههه صدگ تحچن عمي
گولن يا الله مو راح تموتن قبل لا تستلمن النتيجة تالي اخليها الكم ع الگبر واكتب شهيدات الشهادة
طيبة.. لتضحك ترى البينا مكفينا مو وكت الشقى والله
بتول.. خليهم عيني يضحكون گالوها ميحس بالألم غير صاحبه
همام.. هههه بلا شنو نوع الألم الدتحسين بي ست بتول
عافتة وگامت ضايجة صايرة طگة ونص متتحمل شقى
صارت ساعة الأعلان وگلبي وگف
اجيت لگيت همام گاعد بالصالة واللابتوب بـ حضنة هاا بشر اكو شي راح اموت والله استعجل شوية
- ههههههه ادري قابل اني وزير التربية شلون استعجل
- يلا عاد فضني لتضحك
- اااي هذا الرابط نزل بس خلي اطلع مدرستكم......
يتبع
لتنسووون ⭐⭐⭐⭐⭐⭐
كل الحب ❤🥀