مساء الگاردينـا عليكم احبتي ❤
/// البارت ثلاث وتسعـــون /////
#بيوت_بلا_جدران
#شمس_السعدي
----------------------------------------------
امس بالليل جنت محاضن وياه
ابويه .. الرسمت اشفاهه ابتسامات
ومن دك الصبح آذان الكعود
كلبه يقيم حي اعلى المعاناة
بسته وچن اشم بيه ريحه اوداع
ودرب الموت خضر بيه علامات
اتانيه وونيني يسأل الروح
ابويه وين مو وكت العصر فات؟؟
ولن تابوت يحضن والدي يكول..
صبراً يايتيم .. التنطره .. مات ..
------------------------------------------
اتقربت اله اتلمس نبضه وابجي ..
دخلت مرت ابوي شافتني ابجي هزت براسها تتسائل ..
شهگت بسرعة ..
" ابوي عافني وراح "
هي بسرعة صرخت وضلت تلطم ..
هزت البيت بصوتها ..
لزمت ايديه تبوس بيهن وتبجي ..
" المن تركتني ورحت غربتني واجيت لهنا علمودك تالي تمشي وتعوفني ليش ليش مو گتلي اني ابوج واهلج شلون تعوفني "
دخلن اخواتي يتباجن ..
ويتصارخن من شافن امهن وحبوبتي وياهن تصيح ..
الغرفة صارت هوسة ..
سحبتهن منه نامن عليه كلهن ..
" مو هيج مو زين لا تصيحن اطلعن عنه "
دخلوا عمي ومرته وموسى ..
" شبي ابوك مات "
هزيت راسي دخلوا يشوفوه ..
اجت زينب مخترعة وترجف من الصياح ..
رحت الها ..
" زينب ابوي مات "
حضنتني وتبجي ..
وصيتها تدخل للغرفة تبقى يم الجهال وماتطلع ابد لايخترعون ..
طلعتهن كلهن من الغرفة وهن يصيحن ويبجن مايرضن
عمتي زهرة گامت تصيح عليه ..
" شني تعمنعنا مو من حگك نريد نودعه "
همست بصوت مخنوگ ..
" اذا ماتسكتين ابتلي بيج الصار كله من تحت راسج ابوي راح بسببج "
گامت تصيح..
"شلي غرض هذا اخوي ولك اخوي هذا شلون اذيه ريت الصار بي بيك ان شاء الله لان انت البعدته عنا وحرمتنا منه "
صحت بيها ..
" العني الشيطان وولي من وجهي .. حبوبة اخذيها منا مخلي احترام الوضع ابوي .. منا لمن يصير الصبح التعبت الحجرة ماتلوم الا روحها "
رجعت الابوي شفت عمي گاعد يمه ويبجي ..
وموسى واگف مخلي ايدي على وجها ..
عاين عليه ابوه ..
" موسى خبر الجامع وخبر اهلنا كلهم وحضر التابوت "
عافوني وگاموا ..
اتقربت منه بقينا بس اني وياه وحيدنا ..
طلعتله دشداشة جديدة توه مخيطها ..
بدلتله ومسحت جسمه المرض خلاه حتى مايگدر يسبح
جان نايم والله مااحسه ميت ..
وجهة الدم يجري بي ..
بست راسه وودعته ..
جنت احس اجفانه ماترضى تنسد كلما اسدهن ينفتحن
همست اله ..
" يابة اذا عينك على اخواتي فهن برگبتي لاتخاف امانتك امانتي .. بس روح مرتاح "
بقيت اقرأ يم راسه للصبح..
محد دخل بس مرت ابوي جانت متوضية وجاية وقرآنها بيدها. .
اشرتلي ماتحجي ابد ..
هزيت راسي الها ..
گعدت يم رجليه تقره ..
همست ..
" رايح اخابر الولد وابدل علمود ناخذه "
مشيت خابرت لأخوتي ..
محتاجهم بهذا وضعي .. احس روحي وحيد وضايع
احس نفسي توني تيتمت ..
خابرت دگ دگ ..
طلعتلي دمعة ..
استغربت من سمعت صوتي ..
سألتها ..
" وين رضوان بساع صيحيه "
ثواني ورد عليه ..
" هاي فيصل شكو خير "
خنگتني العبرة ..
" رضوان ابوي مات واني وحدي محتاجكم "
رد ..
" لا حول ولا قوة الا بالله.. مايستاهل ابو گلب الطيب"
گام يبجي مااتحمل ..
بقينا اثنينا نبجي بدون حجي ..
سداه واني رحت بدلت ..
سمعت صوت الجامع وهو ينادي ..
" انتقل الى رحمة الله فجر هذا اليوم الشيخ فرج ال مرداس "
اخذت نفس ..
" شبساع صاحوا اسمك يابه .. والله بعدني ماشبعت منك "
بمجرد ماانسمع الخبر بدت النسوان نجي والعالم تلتم ..
طلعناه گبل الهوسة للمستشفى والناس ورانا كلها ..
خلال هالفترة الابوي صار بيها شيخ .. السلف كلها تمدح بي صغير جبير يحبه ماخلاله وجه مكروه .. غير نظرة الناس البيت الشيخة ربحة وظلمهم ..
سبب الوفاة ماعرفوها طلبوا تشريح ..
ماقبلت بس گال بدون تشريح الجثة تبقى هنا يمنا ومانطلعله شهادة وفاة ..
جدي عناد رغم مريض وكبر جان موجود
" بوية لاتعذب ابوك اكثر من هيج خليهم يشرحون "
وافقت غصب عني من غير حجي عمي عليه گدام العالم ولو ماالعيب جان طردتهم من المستشفى بس الوضع مو مال مشاكل وتخرب فاتحة ابوي ..
مااعرف شوكت وشلون التفتت شفت علي ورضوان ودرع مگبلين عليه ..
اول ماشفتهم تلگيتهم ..
نزلت دموعهم قبل لا انطق كلمة وحدة .. من شفتهم حسيت بقوة اخوتي اجوني ..
حضنتهم وابجي وهم يواسوني ..
رد علي ..
" صير قوي هسا الحمل عليك ولازم تكون گدها "
رديت ..
" بعد ابوي ياحمل اشيله "
رد رضوان ..
" انت ابن فرج لاتگول هيج خلي العالم كلها تعرف فرج مامات ولا اسمه راح ينسي "
سلموا على الناس وال عناد كلهم .
بقينا منتظرين لحد مايكملون وينطونا شهادة والوفاة وناخذة ..
رحمة ..
گاعدة من الصبح مثل عادتي علمود اسوي ريوگ العمتي وعلي يطلع للدوام ..
دگ التلفون ..
استغربت ..
" خير ان شاء الله "
رديت جان رضوان ..
" وين علي صحيه بساع "
سألته ..
" شبيك فهمني امي بيها شي "
رد ..
" فرج مات "
من سمعت مااتحملت صرخت ..
" طلع علي يركض "
شكو ؟ ووجهة اصفر
بجيت .. فرج مات
فرك وجهة ..
انا لله وانا اليه راجعون .. من شفته اخر مرة گلت مايعيش ..
رد رضوان ..
" گليله بساع حتى نمشي فيصل وحدة خطية وما عنده احد "
اسمع صوت فاطمة وصياحها وبجيها كسرت گلبي ..
عمتي من سمعت الخبر گعدت بالگاع ..
" حطاب اليوم راح يجي ابنك الجبير تلگاه .. اجاك الزين المعدل او الجلمة الطيبة .. "
بقت تون وتبجي ..
بدلنا بسرعة واخذت الجهال وياي يم اهلي اعوفهم ..
عمتي ويانا تروح..
دخلت البيت اهلي فاطمة ملخة روحها وتبجي ونورا حاضنتها وتبجي تخاف عليها ..
وامي من جهة تبجي على فيصل وشايله همه ..
اخذوا الولد اجازة من دوامهم .. وعلي خابر جيرانه عنده سيارة جبيرة ..
رحنا كلنا بقت بس براء والولد يمها.. درع گالها لليل اجي اني ..
مشينا كلنا للسلف والطريق سواه خطوتين من ورى ملحة الولد عليه استعجل واستعجل ..
طول الطريق مابطلت بجي فاطمة ..
" بوية اروحلك فدوة لاتعوفني منو النا بعد بوية بيمن نزامط بعد ونحجي "
كسرت گلبنا طول الطريق مابطلنا بجي ..
نورا رادت تجي ماخليناها خفنا عليها صياح ولطم تتسودن ..
نزلوا الولد يم المستشفى وگالوا للسايق ياخذنا للبيت
حجت فاطمة ..
" اروحلكم فدوة جيبوه للبيت اودعنه "
رد علي ..
" ان شاء الله هو لازم يجيبوه للبيت يسووله عراضه "
رحنا للبيت جان هوسة ماكو مرة بالسلف ماجايه من غير الزلم التارسة الشارع تنظفه وترتبه تريد تنصب جوادر..
اول مادخلت عمتي صرخت ووراها فاطمة ركضت الامها گابلتها وتلطم وتبجي ..
واخواتها حضننها يبجن ..
دور اجن بناته من منيرة هم ماتن بجي وگابلن امهن ..
سلمت على مرته وبناته وعلى عمتي سمرة ..
دور گعدت يم منيرة اواسيها ..
همست بصوت مبحوح ..
" شفتي حظ اختج يرحمة .. سنين واني منتظرته يجي ويأست تالي بعدين رجلي ووياه مرة جايبها الي وكسرني وبعد مارجعلي وعدل بيني وبيها وانسندت بي واستقويت هسا عافني وراح ..
بناتي ومو يمي وهو وراح بعد شنهي ظلتي وحدي ..
رديت ..
" خليج قوية منيرة تحملتي كلشي وراح تتحملين "
اتنهدت ..
" منو الي بعد فهميني .. رحيم ؟؟ هذا الاجته الفرصه وتاليته يطردنا من الحوش كله ويخليه اله والهدوة يمكن حتى رحمة يشمرها "
رديت ..
" مو وكته هالحجي گومي توضي واقريله قران وادعيله ربي يصبرج ان شاء الله "
اعاين على زهرة تلطم وتبجي وتصيح ..
" اخوي ابو طول الحلو .. الشيخ المعدل من رحت فدوة الاسمك .. الگبر موش الك .. عمت عين الگاع الراح تطمك "
تذكرت مرة فيصل وهو يگلي ..
" ابوي سالفته مو سالفة مرض اني شاك بي عمل عبن ابوي عمره كله ماشكه من معدته ليش بسرعه هيج گام الياكله يذبه "
استغفرت ربي ولعنت الشيطان.. اذا جانت هي او لا ربي يجازي كلمن كان السبب بموته ..
فيصل ..
اتأخروا بالتشريح للظهر ..
لگوا معدته ممرودة مرد شكو بي متسمم .. ورادوا يسووها سين وجيم لو ماجدي عناد وعلي يتدخلون وگالوله من زمان هو هيج حالته وعنده تقارير طبيب وسونارات ..
سوينا اوراقه وطلعنا رجعنا للبيت مايقبلون ينزلوه راح يفرروه وناخذه ..
جدي عناد گال نسوان هواي ويمردنه لو يضلن يصيحن ويفززنه ..
سمعنا اصواتهن تعالت ..
جنت لاف راسي بعگال ابوي وصاعد بسيارة الجنازة وابجي ..
" من عمت عيني عليك يابة لسا مامصدگ هاي جنازتك"
بدأت الناس تهوس وتضرب بالتفگ بقينا شوية وطلعنا
مابقينا ..
اتجهنا للنجف ..
منو جان يتوقع اروح بهالطريق علمود ادفن ابوي ..
جنت ضايع وتايه النص الليل هو صحى ويحجي وياه وگالي عطشان وشربته ماي تالي صبحت عايفني ..
غسلته بيدي بالمغيسل جسمه مخيط كله خفت اليغسله يأذيه ..
رحنا بعدها زورناه الامام ودفناه جانت دفنته جبيرة حيل السلف كله انگلب علينا
الولد اخوتي ماقصروا جان جتفهم وي جتفي شلنا ابوي ودفناه بيدنا ..
واخوه وولد اخوه متكترين على جهة ..
كملنا دفن قريناله قران .. بقيت يمه ماهان عليه اعوفه
سحبني علي ..
الوادم جايه الك مو لحد گوم اخذ عزا ابوك وودع العالم فرج يريدك قوي مو ضعيف .. اني وياك الابو مايتعوض واني اكثر واحد حاس بيك عبن كبرت وهذا كبري واتحسر على ابوي ..
بس هسا انت بمكان ابوك ..
رديت ..
" مااريد اصير بمكانه كلشي مااريد بس اريده يرجعلي يمي يبقى مايعوفني .."
اجه رضوان صاح بيه ..
" انت شيخ ال مرداس بعده گوم وبطل بجي "
عاينت عليه مستغرب ..
" مااريد اصير شيخ ولا اريد هالشيخة انت اولى بيها يخوي "
رد ..
" لو تضل بس الشيخة مااخذها لان حالف ماارجع للسلف بعد .. "
رد علي ..
" مو وكت هالحجي امشونا الوادم من الصبح لسا على لحم بطنها وصار العصر "
مشينا اخذناهم المطعم على الطريق تغدوا كلهم ورجعنا
للسلف .. الماي ماگدرنا نشربه اني والولد .
وعمي وولده يضربون باجة بوسط العالم ..
وصلنا السلف بالليل تعبانين طبيت تلگنا النسوان بالصياح والبجي..
اخذت ملابس ودخلت سبحت ..
ورحت صليت وصليت الوحشة اله ..
دخلت المكانه جان فارغ وشايلين الفراش ومخلين شمعه بمكانه ومرت ابوي گاعدة بمكانه تقراله قران
طلعت نسوان هواي بس جنت ادور امي ..
سألت فاطمة ..
" امي فاطمة وين ؟"
ردت ..
" دخلت ترتاح بذيج الغرفة "
اشرتلي مشيت..
دگيت الباب فتحتها رحمة .. شافتني شهگت وحضنتني وتبجي واني ابجي ..
عاينت عليها عيونها تبجي وياي ..
عفت رحمة وشمرت روحي بحضنها وابجي مثل الطفل
وهي تمسح براسي وتواسي بيه ..
احس روحي هسا يله ارتاحت بحضنتها الي ..
مسحت دموعي ووصتني ..
" فرج من راح راح مطمأن لان عنده ولد رجال يشيل اسمه ومسؤوليته من بعده اريدك تكون گدها وگدود ماتخلي احد يضحك عليك لو يحجي عليك "
بقيت يمها افرغ همي واحجيلها اخر لحظاته ..
وهي تگلي راح يم الارحم منا كلنا .. لاتخاف عليه ربك يحبه وخذاه يمه يرتاح من المرض والصار بي ..
طلعت من الغرفة صارت گبالي عمتي سمرة وصوتها العالي ..
تتأمر على اخواتي يغسلن الماعين وينظفن وهن بعز كسرتهن وحزنهن ..
اتقربت الهن ..
" عوفن كلشي وامشن ارتاحن "
ردت ..
" ومنو يگوم بفاتحة ابوهن الناس الغربة "
رديت ..
" اي احد حتى لو انت بس هن معزايات بأبوهن مااخليهن يشتغلن "
ردت ..
" اني المعزاية اكثر عبن اني اخته "
رديت ..
" مبين "
ردت ..
" شتقصد ؟"
رديت ..
" عوفي قصدي ومن باجر شوفيلج كم وحدة من السلف تعاونكم بس اخواتي محد يكسرهن وهن يتيمات "
دخلت الزينب ولدها يبجون وحايره بيهم ..
" شبيهم " سألت
ردت ..
" خافوا اليوم من الصراخ مال النسوان "
رديت ..
" باجر اخذيهم وروحي الاهلج على ماتخلص الفاتحة "
ردت ..
" يمة اسم الله واعوفنك وحدك "
رديت ..
" شعليه قابل بس الجهال مااريدهم يخترعون وانت حامل وذني مايسكتن يشغلنج "
ردت ..
" مالك شغل بيه اني زينه وعلى جهالي اخلي امي تاخذهم وياها باجر بس ارتاح "
سمعت صوت برة ..
طلعت شفتي حبوبتي حاضنه عمي وتبجي وموسى دخل لحجرته وعافوا العالم برة ..
مشت للمضيف يمهم جانت شبه فاضة العالم بس ال عناد موجودين ..
شافوني اشرولي ..
" مادام عمك ماهو تعال نريد نحجي وياك "
رديت ..
" اذا على سالفة الشيخة مو وكتها وتراب ابوي لسة ناگع "
رد جدي عناد ..
" خير البر عاجله .. عمك حاك خشمه وشفت وكت ابوك مريض شسوة .. جنا ساكتين الخاطر وضع ابوك وگلنا يصير زين ويرجع بس هسا الوضع اختلف .. وانت بمكان ابوك "
رديت ..
" ليش اني رضوان اولى مني واني بعدني صغير للشيخة "
رد جدي ..
" رضوان مايرضا ومايريدها .. ودرع هم شايله ايده لان مايرضون يگعدون بالسلف .. وبما انه الشيخة صارت من جدك الابوك معناها هسا الك ..وان جان اعله العمر فجدك مرداس اصغر منك… "
جنت رافض هيج مسؤولية بس الحاحهم وحجيهم وضغط علي ورضوان ودرع عليه خلاني اسكت ..
اتفقوا باجر بالعراضة ينصبوني ..
مامقتنع بالسالفة دوم بس خلوني امام الامر الواقع
راحوا ال عناد وفضت العالم بقوا بس اهل المحافظات شيوخ جايين من بعيد ..
طلعنا برة اني والولد .
جنت اتوسل برضوان يقبل وهو رافض ..
يگلي ..
" كلنا بظهرك ومانعوفك وسندك بس مااگدر اصير شيخ لان من صغري كارهة كثر ماالشيخة خلتها ببالي وبعد الشفته حلفت مااعيش بهذا البيت والسلف كله .. "
رد علي ..
" باجر تلبس ملابس ابوك وتطلع بوسط العالم واحنه داير مدايرك عون وسند الك "
رد درع ..
" يول الشيخة ماتلوگ الا الك انت السلف كلو يحبك احنه منو يعرفنا هين اما انت اسمك سابقك .. بالاول والاخير انت ابن الشيخ فرج واحق بالشيخة من اي احد .. وانت حجيت انو ابوك امنك مو بس على بيتو واهلو حتى على السلف معناتها لازم تنفذ وصيتو "
ردو علي ورضوان..
" حجي درع صحيح ابوك وصاك تصير شيخ من بعده وگدام ال عناد كلهم وهم بظهرك وكلنا وياك لاتخاف "
رديت ..
" افه عليكم اني اخاف ؟؟ مااخاف بس من الخلقني اني بس مااريد المشاكل تجيني "
رجعت للبيت ردت انام شوية قبل الصبح باجر هوسة وعالم تجي من جميع المحافظات ..
شفت زينب نايمة من التعب خطية والجهال بصفها
مديت فراش بالگاع ونمت ..
حلمت بأبوي يگعدني .. يگلي گوم اگعد بمكاني بالمضيف لاتخلي احد يگعد بي غيرك .. اذا تريدني ارتاح شيل اسمي ونهجي وطبعي من بعدي ..
فزيت الفجر طر وهوسة ..
گعدت توضيت وصليت ..
طلعت وصيت الجايجي مال المضيف يشغل منقلته ..
ووصيتهم يحضرون الريوگ علمود العالم تتريك من الصبح لاتجي الوادم ..
بدت الگصاصيب تذبح الذبايح من الصبح علمود الطبابيخ تطبخ ..
لمن تطمنت الشغل كله ماشي فتت للبيت ..
شفت عمي طلع لابس عباته وعگاله ووياه موسى
عاين عليه ..
" شفت الگصاصيب بدوا لو بعدهم "
رديت ..
" كلشي جاهز "
هز راسه ..
" هم روحك صار الصبح العالم بدأت تجي "
سكتت مارديت عليه ..
طلعوا والنسوان بدت تهوش وتشتغل ..
صارت گبالي مرت ابوي طلعت من غرفتها اشرتلي
رحت وراها ..
اتفاجأت بزينب بالغرفة شايله هدوم ابوي وواگفه
حجت مرت ابوي ..
" ابوك اجاني البارحة وگالي گومي حضري هدومي يلبسهن فيصل ويطلع للعالم ياخذ عزاي .."
دمعت عيني بالوكت الاجاني اجاها ..
عاينت الزينب دمعت عينها ..
" الشيخة ماتلوگ الغيرك يابو غزوان .. البس هدوم عمي واطلع للناس واخذ عزاه "
عافتنا مرت ابوي وطلعت ..
نزعت وبدت زينب تلبسني ..
بقيت اعاين الروحي بالمراية .. فتحت صندوگ صغير
طلعت محابس ابوي وسبحة منه .. لبستهن ولزمت سبحته…
همست ..
" ربي يحفظك ويحرسك من كل عين يازين الشيوخ كلها "
سحبتها الي وبست راسها ..
اخذت نفس وهمست ..
" بوية وصيتك ونهجك برگبتي .. الله يقويني واكون گدها "
وصيت زينب تلم غراض ابوي كلهن وتاخذهن الحجرتنا"
طلعت وهي وراي ..
صارت عيني بعين امي ابتسمت وهزت راسها ..
رحت الها ..
بست ايديها ..
" ادعيلي يمه "
ردت ..
" محروس بالله يابعد امك الله يبعد ولد الحرام عنك ويحفظك "
النسوان الگاعده كلها تصلي على النبي ..
اخواتي حضنني ويبجن وصيتهن مايبجن مادام اني موجود حذاهن ..
طلعن حبوبتي وعمتي على الصوت ..
شافني شهگن ..
ردت عمتي ..
" توازي عمك يفرج .. منهو نصبك ووزاك تروح تلبس هدوم ابوك .. عمك بحياة ابوك تنصب موش بكيفك "
سكتت عنها ماردت اضيج خلگي بحجيها..
فتحت الباب وطلعت جانوا الولد گبالي ..
شافوني ابتسموا ..
واجوا الي سلموا عليه ..
" عشت شيخ فيصل "
الناس من سمعت حجيهم وشافتني صارت كلها تهوس وترمي ..
سكتهم جدي عناد وهو يمشي بالگوة وولده سانديه
" اسمعوا كلكم حاضركم يعلم غايبكم .. الشيخ فرج مات بس صيته واسمه باقي.. ومن اليوم ابنه الشيخ فيصل ابو غزوان بمجانه "
كلها صاحت والنعم من الشيخ فيصل ..
بدت الهوسات والعراضة ..
جاب جدي عناد سيف الجدي مرداس من زمان عنده منطيهيا هدية ..
سلمه الي وگال .. هالسيف اعتبره من الشيخ مرداس الك ..
جنت احس بقوة وفخر واني اشوف الناس شلون فرحانه الي ومساندتني واولهم اخوتي ..
اما عمي تسودن وضاج وموسى اجه راد يتعارك وياي ولزموه ..
رد عمي ..
" اني تنصبت گبل لايموت اخوي وكلكم شاهدين وهسا مامن حق احد ياخذ الشيخة مني "
رد جدي عناد ..
" محد نصبك انت النصبت روحك واستغليت مرض اخوك احنه جان شيخنا فرج لحد مادفناه البارحة واليوم ابنه بمكانه.. شتگولون عمامنا وشيوخنا .."
كلها ردت ..
" حجيك صحيح وعدل شيخنا گبل فرج وهسا ابنه "
عمي بساعتها نزع عگاله ودخل للبيت ضايج ..
ماردته ينكسر هيج گدام السلف بس هو الجابها الروحه لو ساكت احسن ..
بدت العراضات وحدة ورى الثانية .. والذبايح اجت من كل كتر من غير الهدايا المااعرف منين علمود تنصيبي جان جدي عناد اله كلمته بالعشيرة واكبر سند وداعم الي ..
گعدوني على كرسي ابوي وصاروا سروات يباركولي ..
لمحته بين الوفود واگف يبتسملي ويهز راسه من بعيد وجنه راضي عني ..
اخواني من الجهتين واگفين وياي صدگ سند وعزوة الي ..
سبع ايام الناس مابطلت تجي من كل صوب اجت والهدايا ترست الحوش ..
هالشي ضوج عمي وصار يتعارك وياي بكل لحظة ويگلي لاتصدگ تدوملك ..
ماجنت مهتم التهديداته ..
بس بعد ماكملت الفاتحة وهدأ البيت وحسيت بوحشة اخواني صرت احسب حساب الهم ..
جدي عناد يعرف طينتهم خله ولده واحفاده دوم وياي بالمضيف ماعافوني ابد ..
وطبعا توجيهاته مستمرة وعرفني على العالم ..
گالي ..
" ابوك خوش شيخ وهواي يغير من نهج ربحة .. بس عيبه مايطلع ولا يجامل .. انت اذا تريد تكسب العالم الصفك والشيوخ وتخليلك صيت واسم ..
اطلع .. سافر للمحافظات ..
شوف هاي الشيوخ الاجت كلها .. لازم شيصير عندهم تمشي ومايحتاج اعلمك ..
العالم كلها مساندتني الا اهل بيتي جنت متخوف منهم وخايف انغدر منهم بأي لحظة ..
صرت اوصي زينب تطبخ بيدها وتحرس الاكل لمن نصبه وناكل ماتخلي واحد يوصله واللبن كرهته من يوم العرفت ابوي مشرب بي ..
هدوء عمتي زهرة ماعاجبني ..
وعداء عمي زاد لدرجة صار يتدخل بأمور البيت ويتحكم ويتعارك وي نسوان ابوي ويصيح على اخواتي
ماجنت ادري بهالحجي لان ملتهي بالمضيف الولد وهو يسوي هيج علمود يشتت تفكيري بين المضيف والبيت
الولد رضوان وعلي دائما يجون يمي يخلصون النهار وكت العطل .. وخاصة الجمعة صارت عندهم عادة يجون كل جمعه يمي هم وكل عمامي بالسلف ساندوني كلهم والهم فضل بدعمي هذا الشي الخبل عمي اكثر
رجعت تعبان للبيت بالليل جابت زينب ماي وملح وطشت غسلت رجلي واگف عليهن طول النهار.
جنت مقرر اطلع تقاعد من المدرسة واتفرغ للمضيف بس همزين جانت عطلة ..
اندگت الباب
جانت مرت ابوي ..
اشرتلها تدخل ..
" تعاي ام فاطمة ادخلي "
دخلت ..
" اسمع فيصل انت مثل ابني واحبك مثل بناتي الله شاهد .. بس اني بعد فرج مالي گعده هنا وقررت اخذ بناتي وارجع الايران "
استغربت ..
" ليش تاخذيهن وترحين صاير شي .. بعدين ابوي امن اخواتي وامنج عندي شلون اخليجن ترحن طبعا مااقبل"
ردت ..
" الجنت اتحمل علموده راح وعافني بعد ماعندي طاقة اتحمل "
سألتها ..
" منهو المضيگ خلگج احجي "
ماقبلت تحجي ..
اشرت الزينب .. اعرفها ماتضم عليه ..
حجتلي سوالف عمي وشلون يعامل اخواتي ..
تسودنت ..
طلعت من الغرفة وصحت ..
" عمي عمي "
طلع ويحجي بثگل
" شتريد تصيح "
رديت..
" اولا اني ماصيحت وثانيا مااسمح الاي احد يمس اخواتي ونسوان ابوي مادام اني عايش .. "
ضحك ..
" ايباااه والله وصرت شيخ وقشمروك بكم هوسة وصدگت روحك "
رديت ..
" انت هاي الكاتلك الشيخة بس الشيخة مو اني اختاريتها الناس هي الاختارتني ولو يردون جان اختاروك "
صاح ..
" انت الاخذتها مني لمن لبست هدوم ابوك وطلعت وقشمرت ال عناد وخليتهم بصفك "
رديت ..
" الزلمة المعدل هو اليكسب الناس بالحجي الحلو والسمعة الطيبة وانت الشردت العالم منك وماخليت واحد يسندك .. "
رد ..
" شني قصدك اني مامعدل .. ادبسز مامحترم "
رديت ..
" راح افوتها الك جيف عمي واكبر مني رغم اني هسا شيخك وشيخكم كلكم .. والزوم تحترموني . وان جان اعله الشيخة وروح ابوي ماجنت رايدها لو ماابوي يوصي ماكو داعي ابررلك بس علمود تعرف "
رد ..
" انت شيخ هالقشامر الرادتك موش علينا .. بيتي وامي واهلي اني شيخهم وابقى شيخهم "
رديت ..
" هذا الشي يخصك بس مال تظلم اخواتي واهلي مااسمحلك "
ردت عمتي ..
" تأدب شلون هيج تحجي وي عمك لو موسى هنا كسر ظهرك "
رديت ..
" انت لاتتدخلين .. ولا موسى ولا عشرة مثله يكسرون ظهري .. لاتخليني اردج الرجلج الطردج واخليج تتوسلين يرجعج "
ضحكت ..
" ايبااااه خوفتني گاعدة بحصتي من ورث ابوي موش بكيفك تطردني لاتندگ بيه يفيصل اني زهرة "
رديت ..
" وشتسوين ؟؟ تخليلي باللبن مثل ماخليتي الابوي وكتلتيه "
توترت ..
" حباية بحلگك اني اسوي هيج الاخوي شمالي "
كلها صفنت مامصدگين الحجيته ..
سألتها حبوبتي ..
" صدگ هالحجي ولج "
ردت ..
" تصدگين بهذا يمه يريد يخرب بينا تبربات الفصلية نسيتي بقوا يوزون براسه لين دمر حياتنا.. "
رد عمي ..
" اسمع فيصل الظاهر احنه مانتراهم سوة وبنفس الحوش الاحسن نبيع البيت وكل واحد ياخذ حصته ونفضها "
رديت..
" البيت ماينباع لان من جيل الجيل .. واني ماعندي حاليا انطيكم حصص .. تردون اخذوا الجهة الخلفية واعزلوها عن البيت وابنوا بيها واگعدوا "
ضحكت عمتي زهرة ..
" اي وانت تاخذ البيت طول بعرض الك مووو لا عيني مايصرفلنا هالحجي .. حصة عيد وحصة رحيم ومشتري وحصة امي وحصة حمدية مرت رحيم "
رديت. .
" والله انت الصايرة الناهي الامر .. بس هااا لاتنسون حصة ماسة بنت عيد "
ردت ..
" وهاي شني وننطيها حصة وهي اصلا ماحاسبه عيد ابوها "
رديت ..
" اذا تردون الحگ هذا الحگ .. انتظروني فترة ويصير خير "
ردت حمدية ..
" اني حصتي من ابوي خليها وياك فيصل "
صفن عمي مستغرب ..
" شني هالحجي ولج تكسرين حجايتي "
ردت ..
" لو صارت بجيبك مااحصلها وهاي حصة بناتي .. ابني انت اخذته بصفك ومايعترف بيه اصلا وهالحصة من حق بناتي الانت مامعترف بيهن وملتهي بولدك وبناتك من هدوة وولدها من عيد وهاملهن .."
تعصب ..
" دسويها وشوفي اذا مااطلگج "
ردت ..
" طلگني ماعاد يهمني ما انت من اخذت هدوة نسيتني وشمرتني .. اني ابقى هنا يم اختي اذا يرضى فيصل "
رديت ..
" البيت مفتوح للكل لان هو بيت الشيخ مرداس قبل مايكون بيتي وبيتكم "
رد عمي ..
" من اليوم انت طالگ طالگ طالگ وورقتج تجيج محرمة عليه اليوم الدين .. "
دمعت عيونها وكتمت قهرها بگلبها ..
حسيت المسؤولية يوم عن يوم تكبر اكثر .. ولازم ادبر فلوس وانطيهم حصصهم من البيت لان مااگدر التلاعب بالگيعان ولااگدر ابيع شي..
فتحت قاصة ابوي جان بيها مبلغ بس مايكفي وزهرة اعرفها راح تضغط عليه لازم اخلص منها بأي شكل ..
وفعلا كل يوم تذكرني بالحصص وتتوخصر الي ..
بيوم الجمعة اجو الولد وحجيتلهم كلشي ..
اقترح عليه رضوان يبيع الگيعان السجلهن اركان بسمهم ومن يصير عندي ارجعهن الهم ..
بس ماقبلت لان هذا الشي الوحيد الطلع الهم بعد ماانحرموا من الورث .. ولو مااركان مارجعلهم شي رغم نص هالورث من حقهم واولهم البيت ..
مااگدر اتصرف بالفلوس لان معناتها افلس وهاالفلوس هي صرفيات العشيرة والمضيف مااگدر اجازف بيهن ..
اضطريت اطلع مساح يشوف حصصهم شگد لان ابوي اشترى حصة حبوبتي بثينة ومهجة وجدي منهل وكت مارادوا حصصهم من البيت ..
يعني الحصة الاكبر الي والاخواتي ..
بعد ماحدد حصصهم انطيتهم الجهة الخلفية وقسمناها بحايط عالي ..
والمخزن الجانت بي امي مرمر ورحمة بنيناه مطبخ بمكان المطبخ القديم ووياه مساحة اخذنا .
بنيته مؤقت بين ما اعيد تصميم البيت لان بقالنا مساحة 400 تقريبا بعد مااخذو هم 200 متر ..
شالوا غراضهم وطلعوا بزعل .. ونص اثاث البيت اخذوه ماخلو شي مااخذوه والمطبخ القديم بقالهم كله بأثاثة ..
ماجان هامني اثاث البيت بكثر ماهمني راحة بيتي وعائلتي ..
بقت حمدية وبناتها يمنا بس موسى راح وي ابوه ..
دخلت البيت جان هادي .. من بعد كل هالسنين ومن جيل الجيل جانت ماكو غرفة فارغة بهالبيت وهسا نص الغرف فرغن وصار موحش ..
بس مرات من يجون الولد وامي وعلي ورحمة يملون البيت وتصير بي حركة وهوسة ..
وهاي جانت اولى خطوة اخطيها وارتاح بيها بس بقت يمهم راح يتركونا بحالنا لو يستمر خبثهم وحقدهم علينا ؟؟
#يتبع
( شمس السعدي )