أبي لم يكن إنسانًا

البارت 35

#أبي_لم_يكن_إنساناً
البارت الخامس والثلاثون
للكاتبة لبنى الموسوي

- سد الخط وكتب العنوان باوعتلة بتعب هذا منو بعد
- صالح ديجيك بالطريق

- مخلد والله تعبت
بس اريد أنام شوية حتى ما ظلي حيل اجامل واستقبل

- دتحمل يمعود
هذا حدهم منو يجي بعد عود وراها جرها نومة للصبح

- اليسمعك يصدگ والله
ليش هو الألم يخليني أنام مو شفت بعينك شصار بية البارحة

- الله يساعدك خويي
بس وغلاتك عندي ينلزمون وساعتها مراح ارحمهم ابد

- رحم الله والديك
گدها أبو الخوالد الله يحفظك لشبابك ويچفيك شرهم

- اجمعين ان شاء الله
ها هذا الجرس اندگ يمكن صالح اجة خل اگوم اشوفة

حچاها وگام للباب الخلفية
شوية ورجع ويا صالح الحمد لله على سلامتك سيدي متشوف شر ان شاء الله والله خوفتنا عليك

- الله يسلمك ويحفظك حبيبي
تقرب خلة فواكه يم راسي هاي شنو صالح ليش مكلف روحك جيتك كافية

- ماكو شي من واجبك مقامك غالي عند الكل سيدي
- يعزك الله ويعليك
- منو ذولة ما عرفتوهم جماعتنا كلمن يحچي شكل ما فهمت السالفة منهم بس عرفت محاولة أغتيال

- تفضل استريح وهسة احچيلك
بس حچيتها گعد على گد ما سألوني شلون وليش مليت من يمي

سولفت الصار لحد يوم الحادث والباقي على مخلد
ديحچي اندگت الباب
راح اخذ الضيافة قدمها الصالح وراها رجع كمل كلامة

- والله هالشي متوقع جداً بعملنا سيدي
يعني هذا العراق اليشتغل بي بشرف وضمير يأما ينقتل يأما يتهجر

- وهنا يجي واجبنا
لازم نوگف بوجههم ونحارب فسادهم
لأن لو انـي استسملت وانـتَ وغيرك استسلمتوا معناها نقرا على هذا البلد السلام

- صح والله سيدي
وان شاء الله نكون گدها ونگدر نوصل الهم وناخذ حق كل شخص اذوا سواء حضرتك أو باقي ضحاياهم

- ان شاء الله حبيبي

طيبة.. بالتسعة ونص گاعدة بالمطبخ وهلكانة تعب
خليت راسي ع الميز وغمضت
سمعت الجرس اندگ يبووو هم خطار شوكت يخلصون حتى عمو خطية تلگوا تعب هسة

خديجة.. هاي بعد
العندة علاقات هواي مجاملاتة بالمناسبات تصير هواي

بتول.. والله ما بية بعد اجهز التقديم رجلي توجعننني

طيبة.. ام حلگ كلنا تعبانين مو بس انتِ
خبصتينا خبص كلة لأن ممتعلمة على الشغل الـ ياخذچ يومين ويرجعچ علينا

بتول.. ليش يرجعني المساعدة حلوة
يغسل المواعين اجهز العشى وهيچ نعيش قابل شبيها

خديجة.. ههههههههه گومي ولچ فشلة من العالم جهزي

- صدگ بمناسبة الفشلة
رجلچ الشفية وين غير المفروض هو رجال البيت بعد عمو همام شنو مختفي والرجال الغريب يخدمنا

- والله هالشغلات تجي من ذات الإنسان
ما اجي اني اجبرة تعال اوگف ويا أخوية اذا ميسويها عن طيب خاطر فـ بلاها

- اموت واعرف على شنو تحبي ييع لعبت نفسي والله

- سلامتچ يلا گومي جهزي الضيافة ليصيح مخلد ولچ

- ما بية والله تعبت حتى ظهري گام يوجعني

طيبة.. امري لله
اني راح اجهز بس انتِ التاخذي لأن استحي من مخلد

بتول.. اني بايعة ومخلصة
عادي شكو بيها اودي ومناك درب الفلتة الفراشي عدل

طيبة.. هههههه عابت
يلا اگوم اجهز وبلكي هذا أخر ضيف خطية هو هم تعب

همام.. گعد بالنص تقريباً يسولف
أكثر شي هو ومخلد اني ما بية فجأة گام استأذن منك سيدي

- وين مو بعدك کاعد
- ما اريد اتعبك أكثر بس اجيت اطمأن عليك واتحمدلك بالسلامة

- حبيبي الله يسلمك ويبعد عنك وعن أهلك كل مكروه

- رحم الله والديك يلا اودعناكم وما عندك غير العافية
- الله وياك اجمعين ان شاء الله

بس طلع رجعت نفسي ع المخدة وغمضت من التعب
وصلة مخلد ورجع ها شنو نمت
جاوبتة واني مغمض تعبان حيل مخلد الدويات سطرتني

- الله يساعدك بس شلون أخاف بعد يجوك عالم
- گلهم نايم ما بية بعد مخلد الساعة راح تصير 11 لعد شوكت أنام غير المفروض يقدرون

- هو هم هيچ
انتِ سوي موبايلك صامت ونام
واذا اتصلوا علية اعتذر منهم نيابة عنك يدرونك تعبان

- هزيت راسي بدون ما اجاوب

- همام اروح اني وباچر ان شاء الله من الدوام اجي لهنا گبل واذا لا سامح الله بالليل تعبت
بس اتصل بلغني
حتى لو بوقت متأخر عادي لا تسويها رسميات اترجاك

- ليش متبات هنا قابل غربة انتَ مو گلت بيتي بيتك

- اكيد بيتي ميحتاجلها كلام
بس لازم اروح دتشوف حالي لا سبح لا ملابس
مو عبالك بس انتَ التعبان خليني ساكت ما اريد أذلك

- ههههههههه الله يساعدك حبيبي
حقك علية كلش تعبتك وياية هاليومين نردها بالأفراح ان شاء الله

- اني عادي اتشاقى انتَ ممنوع هالكلام لتعيدة بعد
يلا مع السلامة اشوفك باچر واتصل اذا احتاجيتني ما اوصيك بعد

- اكيد اتصل ليش منو الي غيرك الله وياك صديقي

طيبة.. ظلينا مخبوصين الى ان سلم مخلد وراح
دخلت خديجة اطمأنت على همام
شافتة نايم اتصلت على رجلها ربع ساعة واجة اخذها

كملنا هوسة الخطار اني وبتول وودينا الحجية الغرفتها
راحت هيَّ تنام واني فرشت أسناني
رجعت للصالة عين ع الدرج وعين ع الأستقبال حايرة اصعد لو لا

ردت اروح اشوفة تراجعت اكيد نايم هسة
صعدت الغرفتي طفيت الضوة وتمددت ع الچرباية
باوعت المكانة مخنوگة لو صايرلة شي شـ چان سويتي طيبة ؟!!

كلش اكره فكرة انو أي شخص يساعدني يدفع حياتـة ثمن الـ هالمساعدة وهو هذا المخوفني من خسارة همام

شگد چنت تعبانة بس ولا اخذت عيني النوم
خوف على تفكير على قلق
ساعة واني اتگلب أخر شي نزلت اخاف گاعد ويحتاج مساعدة لازم اظل يمة حتى لو من بعيد

فتحت باب الأستقبال بـ هدوء
چان نايم بس يون من التعب تمشيت صرت يم راسـة باوعت علي بقهر سودة علية دتتوجع مووو

گمبصت يمة ومررت إيدي على شعرة
ما اعرف شنو المفروض اسوي حتى اخفف هالوجع عنة
بچيت بـ قلة حيلة
رفعت إيدي اكتم بيها صوتي ما اسمعة إلا ديگول كافي عاد هواي بچيتي من البارحة لليوم اني بخير

نزيت من كلامة وبسرعة گمت على حيلي مرتبكة
- شبيچ نزيتي اسم الله
- ها لا مو عبالي نمت ما ادري بيك گاعد اسفة ازعجتك
- هوَ چنت نايم بس فزيت قبل شوية

- دتتوجع عمو مو صح
- شوية
- لا مو شوية هواي بس انتم الرياجيل تكابرون اعرف

- ليظل بالچ الصبح اصير احسن
- هسة حاچيني ما عندك علاج يخفف الألم شوية بلكي تنام علي

- اي ذاك گدامچ
حچاها وأشر ع الميز رحت سريع جبتة الة وصبيت ماي

التفتت لگيتة ديحاول يعدل گعدتة
خليت الحباية بـ إيدة بلعها ورجع نفسة راد ينام مگدر من الوجع حتى وجهة انگلب انقهرت علي كلش

- عمو اساعدك
- لا شكراً اگدر بس خلي يروح الألم شوية
- لتعاند مو زين تضغط على جرحك
- مد إيدة لزمتها وحضنت راسة من ورة نزلتة بـ هدوء

- بعدة منايم صاح بصوت عالي ها شنو بس لا أذيتك
- لا شوية ظهري لزمني ما بية شي

- شلون اعوفك هسة والله بالي راح يظل يمك
- لا راح أنام اصلاً بس خلي العلاج يمي اخاف احتاجة

- تريد اظل يمك عادي والله
- دروحي الـ غرفتچ ارتاحي ما بية شي كافي تفكرين

- براحتك عمو
يلا تصبح على ألف خير وان شاء الله تگدر تنام بلا ألم

- وانتِ من أهل الخير سدي الباب وراچ بلا زحمة عليچ

طلعت من يمة سديتها وظليت واگفة بـ مكاني
مو مال أصعد الـ غرفتي
بلا مثل قبل شوية احتاج مساعدة ميصير يظل وحدة خليني هنا احسن ضروري أنام يعني

ظليت رايحة جاية بالصالة وعيوني ع الساعة متمشي
للفجر تعبت كلش
سحبت الكرسي من يم الميز وخليتة بباب الاستقبال عود ردت اگعد ما حسيت إلا واني بـ سابع نومة

فزيت على صوت خديجة تگعدني
فتحت عيني اجيت اوگع من الكرسي نسيت اني نايمة هنا

- بطة شنو الـ منومچ هنا مو رگبتچ تگوم توجعچ بعدين

- ها عمة صباح الخير
- صباح النور احچي شعندچ هنا بس لا همام تخربط

- لا والله ما بي شي
كل الموضوع بالليل نزلت انطيتة علاج ومن شفتة هيچ متأذي ما گدرت أصعد بعد ليروح يحتاج مساعدة واحنة مو يمة بس ما ادري شلون غفيت

- بس حچيتها باستني مبتسمة يمة بعد گلبي گلبچ على هالحنية الشايلتها بطة

- ههههههههه فدوة عمة لتخجليني

عفتها وكمت للمغاسل جسمي كلة متكسر من الكرسي
وهذا لا شيء يم رگبتي
اريد احركها ما اگدر متشجنة كلش غسلت بالگوة اجت خديجة جايبة الحجية لزمت الكرسي عنها

- انتِ روحي اطمأني على عمو وخلي بيبي علية
- لا صعب متگدرين اني اوديها وانتِ شوفي گعد لو لا

ما عارضت بس مشكلتي خجلانة من موقف البارحة
فتحت الأستقبال علي بعدة نايم
توني اريد أدخل فز من صوت الباب باوعتلة مبتسمة ها عمو بشرني شلون صرت اليوم ان شاء الله احسن

- احسن الحمد لله
- راد يگوم تقدمت بـ اتجاها ها وين خليك نايم
- اريد أغسل اذا خديجة موجودة صيحيلها تساعدنـي

- خو اني اساعدك هيَّ خطية مشغولة ويا بيبي
- متگدرين طيبة روحي انطيها خبر
- رحت بلغتها ورجعت لگيتة يفرك بكتفة والوجه مگلوب

- هاي ليش دتعذب نفسك اتركة متشوف گاعد يأذيك

- ههههههه اعذب نفسي شنو
إيدي خدرانة لازم افركها حتى يمشي الدم بيها حتى لو اتوجع

- باوعت علي وسكتت رجع يفكر بيها دخلت خديجة
- ها خوية اليوم احسن ان شاء الله
- الحمد لله
- يستاهل الحمد ألف مرة

- حچتها والتفتت علية تضحك همام لو تدري بـ طيبـة شنو سوت البارحة

- قاطعتها بسرعة لتفضحني
عمة يلا نودي للمغاسل مو وكت السوالف چان ينتظرچ

- شسوت خديجة گولي

- ههههههه عود عبالها تسكتني حتى ما اگولك الليل كلة خلصتة نايمة ع الكرسي يم باب الاستقبال علمودك

- شنو هالحچي طيبة مو گتلچ اصعدي نامي بـ غرفتچ

- باوعتلة بـ نظرة خجل ونزلت راسي منة
- ادري شلون تسوين هالشكل مو بعدين تتأذين يا عمو

- باوعتلي خديجة وغمزيت يلا كل شي للغالي يهووون

- عمة كافي عااااد امشي ناخذة للمغاسل شبيچ اليوم

هزت راسها تضحك وراحت تگوم همام
ساعدتها ودينا للمغاسل ورجع للأستقبال تريگ وتركنـا يرتاح وحدة

التهيت بـ شغل البيت ويا خديجة وبتول لحد الظهر
گاعدين نتغدة اندگت الباب
راحت بتول تفتحها شوية ورجعت لبسن الحجاب اجة صديق عمو

گمت لبست شوية ودخل سلم على الحجية وعلينا
راحتلة خديجة تفضل خوية ويانة على الواهس الأكل بعدة حار

- رحم الله والديچ بس اذا همام مماكل عود أتغدة ويا
- توة دياكل تفضل وهسة أصبلك

مر أسبوعين ع الحادث والخطار ظل رايح جاي
همام بدا يتحسن الحمد لله
أما مخلد ابد ما تركة خطية چان يوميا يجي بعد الدوام ميروح إلا تالي الليل بـ هالموقف فعلاً ثبت هو أخ مو مجرد صديق

الاء كل هالفترة منعزلة عنة تماماً مجرد تنزل تاخذ الأكل وتصعد حتى متضوجنا بكلامها مثل قبل
أما همام نهائيلً مچان يسأل عليها او يحاسبها معتبرها هي والماكو سوة وأي شي تريد يدزة الها بـ إيد خديجة

بـ الأسبوع الثالث يلا ارتاحينا من هوسة الخطار شوية
مخلد همَ خفف جياتة بـ هالأيام
صار ميبين غير بس بالليل وقت الخطار وأول ميروحون يستأذن

اليوم واگفة احضر بـ العشى ويا بتول دخلت الاء
تعجبت من سألت شمسويات أكل لأن الها فترة طويلة متتدخل بينا نهائياً

بتول.. عيني هذا العشى دنسوي النا مو لحضرت جنابچ الكسيف فـ اذا جوعانة سوي الروحچ
محد گال احنة خدامات الچ تتسممين وتصعدين عوزچ بعد بس إيدچ نغسلها

الاء.. هه حچي يفيدچ ترضين مترضين أكل يعني أكل

طيبة.. تقدمت عليها بـ عصبية لزمت إيدها حيل
بتول اتركيها مو وكت المشاكل متشوفين الوضع الأحنة بي الرجال بيا حال يعني ناقصة خبالكم

بتول.. لا حبيبتي داشوف
بس الظاهر الاء متشوف الوضع الـ هيَّ بي
عبالها مثل قبل سلطانة زمانها متدري هيَّ وهذا الحايط حالياً موجود بس للواجهة

الاء.. ليش عيني شبي وضعي
شو گاعدة معززة مكرمة بـ غرفتي وانتن تخدمن بية

بتول.. وانتِ فرحانة بگعدتچ وحدچ مثل الچلبة !!!
لا وفوگاها تدري محد طايقها بـ هالبيت
والله اني لو منچ احافظ على الباقي من كرامتي واروح لبيت أهلي طبعاً هاي اذا ظلت كرامة أو اذا چان عندچ من الأساس لأن حسب ما شفت كرامة نووو

الاء.. اسمعي حبيبتي لتشوفيني صار فترة ساكتة عنكم ومعتزله الكل فـ عبالچ تقبلت الواقع ورضيت بي
لا حياتي غلطانة ولذاك الصوووب

لسة بعدكم متعرفون الاء منو
انتِ وهاي الواگفة يمچ بالذات راح اندمكم ندم عمركم وارجع الحضن رجلي معززة مكرمة غصباً عليكم وگولي الاء گالت ونفذت بس اصبري يا حلوة

بتول.. شتقصدين يعني ؟!!

الاء.. ياااا هاي شبيچ
مو توني داگولچ اصبري لتستعجلين على رزقچ
راح تعرفين كل شي عن قريب بس يا حرااام شگد راح تنذلن وتتندمن على محاربتي بالأخص انتِ بتول

بتول.. يلا ولچ امردچ برجلي لا عبالچ خايفة منچ الحية تظل حية رغم سمها بس تنداس بالقندرا

باوعت علينا تضحك وطلعت من المطبخ
التفتت على بتول خايفة ولچ هاي شتقصد ترى كلامها يخوف كلش

- يمعودة خليها تولي شتسوي قابل
صارلها سنين بهذا البيت تهدد وترجع ليورة وحتى من ذبت تهمة براسچ انكشفت بكل ثول لأن هاي بوخة ما بيها غير الحچي ونفش الريش

- وهي لأن سابقاً سوتها وأذتني فـ خايفة هسة الاء مو شوية مسمومة گول وفعل

بتول.. متگدر وداعتچ تدرين ليش اني راح اجاوبچ
اولاً أي غلطة منها تنهي وجودها بـ هالبيت
ثانياً وبعد كذبة حملها منو يصدگها بـ شرفچ متشوفين حتى أهلها تخلوا عنها وين تنطي وجها ساعتها

- ما ادري بس الله يستر منها ويبعد عنا شرها ومكرها
- امين يلا خلينا نكمل العشى جعت

اشتغل وبالي كلة يم كلامها مجربتها قبل حقي أخاف
ربع ساعة وكملنا كل شي
صحت همام اجتمعنا على الميز ناكل چان انصدم بـ الاء نزلت وگعدت ع السفرة ويانا لأول مرة بعد عملتها

بعدها دتسحب الخبزة دفع همام إيدها وصاح گومي منا
باوعتلة فاتحة عيونها ويامن ديتحچي ؟!!

- وياچ قابل ويامن يعني
گومي بسرعة من خلقتي اخذي أكلچ وروحي بعيد عني

- ليش اني شسويتلك حتى الأكل ممنوع بـ هالبيت

- بس حچتها رگع الماعون الفارغ بالگاع تفلش
كل شي بـ هالبيت ممنوع لتنسين كلامي وكلام أبوچ
وهسة يلا گومي احسن متجبريني اتصرف وياچ تصرف انزع بي ثوبي واطلع من أخلاقي

باوعت علينا بـ قهر وگامت تركض صعدت الغرفتها
الحجية.. يا يمة على كيفك حرام تكسر گلبها ع النعمة

بتول.. بيبي فدوة خليچ ساكتة انتِ كل شي متدرين

همام.. گومي بتول
جيبلي ماعون اريد أكل واولي أنام دخت من الهوسة

طيبة.. خليچ گاعدة اني اروح اجيب الة

رحت اركض صبيت الة بالماعون وخليتة گبالة
انتبهت علي ما أكل شي
ترجيتة يجبر نفسة علمود العلاج مقبل گال شبعت بس سوولي چاي بسرعة وگام من السفرة للمغاسل

اني هم ما اشتهيت اكمل بعد
گمت خليت الماي ع النار وطلعت الم المواعين لگيتة يم الحجية بالصالة

بعدة ما شارب الچاي اتصلوا بي جماعتة يردون يجوا
أتصل على مخلد وراح للأستقبال
بالنص ساعة البيت انترس تقريبا بالسبع نفرات وتأخروا كلش فوگ الـ 11 ونص يلا طلعوا من يمة

چنا بغرفة بتول اجة گال اخذوا راحتكم راح الخطار
راد نساعدة بالحجية مقبلت اني
اخذت بتول ورحنا وديناها للمغاسل بعدين الغرفتها
طلعنا من يمها همام گاعد بالصالة التفتت بتول علية ها طيبة محتاجة شي تعبت كلش اريد اروح أنام

- لا سلامتچ
- وانتَ عمو محتاج شي
- لا حبيبتي روحي نامي نوم العافية ان شاء الله
- الله يعافيك يلا تصبحون على خير وعساني لا گعدت على هالتعب

همام.. ههههههه اسم الله عمي شنو هالحچي

باستة تضحك وراحت الـ غرفتها
رحت فرشت أسناني ورجعت همام يفرك براسة يلا گوم نام مبين تعبت

همام.. اي گمت بس اليوم اصعد فوگ لو تنزعجين

طيبة.. يااا عمو بالعكس ليش انزعج
فرحت كلش لأن صرت زين وين يوميا يظل بالي يمك لحد ما انام

ابتسم وصعد قبلي طفيت الضويات ورحت ورى
لگيتة دينام بالگاع لا عمو فوگ ع الچرباية متعبت من نومة الگاع طول هالفترة

- لا تعودت مريحة اصلاً هسة يلا عرفت ليش تحبيها
- الله يخليك لتعاند والله هيچ ما ارتاح ع الأقل أسبوع أسبوعين بس تصير زين

- كافي دوختيني
- لعد نام فوگ واوعدك متسمعلي نفس بالغرفة حباب
- هاي نمت يلا بس اسكتي لتحچين

- ههههههه اي هسة اگدر انام بـ راحة وما انق بـ راسك
- الطيبة الزايدة مو زين بطليها تأذيچ
- شوف منو اليحچي دگول الـ روحك بالأول اصلاً اني تعلمت منكم

- هههههه يلا طفي الضوة اريد أنام تعبت
- اي تتدلل

طفيت الضوة ورجعت نمت بالگاع
انطاني ظهرة لأن جهتي مضروب بيها دقائق وغفى ما ادري ليش فرحت برجعتة للغرفة ظليت اباوع علي لحد منمت

الصبح فزيت على صوت المنبه گمت طفيتة متفاجئة
عود ليش موقتة شو دوام وماكو ؟!!
باوعت علي هسة شلون اگعدة لو لا والله حيرة
اخاف اتركة نايم ويضوج لأن اكيد عندة شي وإلا ليش يوقت المنبه

- تقربت منة ندست زندة حيل عمووو گوم المنبه دگ
- فتح عينة يفرك بوجهة ورجع غمض اي طيبة گعدت

- دفهمني ليش موقتة حتى ما ردت اگعدك إلا شوية
- عندي دوام
- شنوووووووووو
- ها شبيچ قابل گتلچ عندي عملية إنتحارية

- لا بس صدمتني
دوام شنو وانتَ بـ هالحالة همَ مو انطوك شهر إجازة

- اي قطعتها من البارحة
ضروري اداوم الشغل هناك تجمع علية ما الحگ بعد

- عمو صدگ چذب وكتك هسة ما شفت شصار بيك

- لتخافين ديحققون ويا جماعتهم
يعني ميگدرون يعيدون هالسالفة لأن تنكشف خططهم

- بس عمو...
- كافي طيبـة امشي جهزي الملابس اريد اسبح وأطلع

حچاها وراح للحمام يغسل
جهزت ملابسة خليتهن ع الچرباية ونزلت اسويلة ريوگ

كملت انتظرتة شوية وطب للمطبخ
سحب الكرسي گعد حط اللگمة بحلگة رفع راسة علية ها شنو تظلين صافنة بـ وجهي اگعدي أكلي

- لا ما اشتهي بالعافية
- روحي كملي نومتچ لعد قبل لتجي خديجة
- لا شبعت نوم هسة بس تطلع اصعد الـ غرفتي انظفها وانزل ع البيت

بس حچيتها دنگ ياكل فجأة باوعلي چنت صافنة علي
- هههههههههه شلون يعني مراح تخليني اتريگ اليوم
- ليش عمو أكل بالعافية قابل لازمتك

- ما اعرف أكل وواحد صافن بـ وجهي اگعدي أكلي يلا
- لتداوم حباب بس اليوم ع الأقل
- طيبة وتالي وياچ يعني راح تعرضيلي مثل ذاك اليوم

- لا خلص سكتت ما اعرضلك
شيريد يصير قابل يخافون يعيدوها حتى ليتورطون

- عفية عليچ
حچاها وگام غسل سحب السلاح والسويچ وسلم يطلع

- دير بالك على نفسك عفية ويا ريت تتصل على جهاز بيبي من توصل علمود تطمنا عليك

- صار تتدللين ست طيبة اكو بعد أوامر ثانية لو اتوكل
- لا الله وياك ويحفظك النا ان شاء الله

ابتسم بـ وجهي وطلع
ظليت اقرا ورى المعوذات وبديت بـ شغل البيت شوية الهي روحي بين ميتصل واطمأن علي

همام.. وصلت للدوام مرتاح نفسياً لأن هوَ هذا مكاني
تلگاني علي من الباب يضحك سيدي شنووو هالمفاجأة الحلوة والله نور المقر بـ رجعتك

- ههههههه حبيبي منور بيكم
- لويش داومت چان ظليت بالبيت شكلك لسة تعبان
- لا كافي بعد ضجت محتاج ارجع الـ شغلي
- والشغل محتاجلك والله

ضربت على كتفة ودخلت للمكتب هسة يلا روحي ردت
غيرت ملابسي والتفتت للميز
من السجلات ماكو مجال بي لعد لو ظال أكثر شـ چان صار همزين قطعت إجازتي هو الشغل علية أول وتالي

- بعدني ما گاعد دخل مخلد يصيح شجابك ها حاچيني

- هاي شبيك فززتني ثول
دسلم على الأقل عبالك داخل علية أقتحام صدگ چذب

- اترك السلام وجاوبني شجابك لهنا انتَ مو مجاز

- اختنگت من البيت يمعود
ممتعلم اترك الشغل كل هالفترة كافي لازم ارجع الحياتي الطبيعية

- همام گاعد تخاطر بـ حياتك ترى
انتَ تدري بـ هالانذال ما انلزموا لحد الأن شنووو بايع روحك راح تخبلني

- الله الحافظ
- انتَ ظل الله الحافظ والله كريم ولمن يسووها توگع براس مخلد المسكين

- ها من هسة راح نبديها منة الله ليعوزني عليك
- ههههههه اجيت احچي حچاية بس تذكرت احنة وين

دنحچي دگ جهازي مخلد انخطف لونة
باوعت هاي طيبة اني شلون نسيت اخابرها صاح هااا منو

- هههههههههه شبيك يمعود شوف وجهك شصار بي
- همام منو لتضوجني
- أهلي يمعود شجاك معقدها
- هااا يلا رايح اني واذا احتاجيتني دز خبر بـ إيد علي

طيبة.. كملت شغلي انتظرت اتصال من همام ماكو
شنو بس لا صار شي
رحت الغرفة الحجية لگيتها گاعدة ها بيبي صباح الخير

- صباح النور بنيتي
- راح اخذ جهازچ بس اتصل بـ عمو همام واجي اخذچ للمغاسل ما اطول ثواني وارجع

- ليش هو وين همام ؟!!
- راح للدوام
- عزة بـ عيني ليش خليتي يروح مو كافي الصار ويانة

- شسويلة بيبي عاند كلش
بعديت ترى والله حقة يعني الى متى يظل حابس روحة بالبيت أول وتالي لازم يرجع الشغلة والدوامة

- واني شنو اليفيدني لو رجعوا وكتلوا وليدي
- اسم الله علي الله موجود وراح يحفظة النا والشبابة

- يلا اتصلي علي گدامي ما ارتاح اذا ما اسمع صوتة
- صار تتدللين
حچيتها ودگيت علي ما رد لطمت على صدرها ها ولچ شو ما جاوب شوفي گتلچ گلبي ممرتاح والله

- على كيفچ بيبي اكيد عندة شغل هسة يتصل اصبري
بعدني احچي دگ الجهاز ها شوفي هاي اتصل
جاوبتة بـ لهفة هااي وينك عمو لا اتصلت ولا ترد علينا

- اسف والله انشغلت ونسيت اتصل ليظل بالچ بالدوام
- اي الحمد لله دير بالك على نفسك حباب وبيبي تسلم عليك

- الله يسلمچ ويسلمها يلا محتاجين شي عندي شغل
- لا سلامتك الله وياك

سديت الخط فرحانة داطلع الحجية من الغرفة دخلت خديجة ي أهل الدار وينكمممم

- هاي عمة بغرفة بيبي احنة
- ها خير ان شاء الله شعدكم مجتمعين هنا
- چنا نتصل بـ عمو همام لأن اليوم داوم وظل بالنا يمة

- ادري ليش داوم
شنو الـ هالدرجة بايع روحه هالرجال والله راح يخبلني

- داوم بعد ميفيد الحچي
تعالي نودي بيبي للمغاسل خطية صارلها هواي تنتظر

ما حجت شي اخذناها تغسل ورحت سويت الريوگ
خلصنا بلشت خديجة بالغدة وبتول طبت تنظف الغرف حسيت اكو شي مو طبيعي صاير وياها

- عمة صاير وياچ شي شو گاعد احسچ مو على بعضچ

- اسكتي طيبة گلبي صاير جمر من القهر
بس الله اليعلم بحالي
حالياً صايرة مثل بلاع الموس لا اني گادرة احچي ولا گادرة ابلعة واجرع الألم واظل ساكتة

- هم سلام
- ليش اكو غيرة علتي بـ هالدنيا الما اگدر اشفى منها

- يبووو مو گلتي صاير زين وياچ

- اي گلت
وفعلاً صار زين بحيث شالني على كفوف الراحة شيل

بس فجأة اكتشفتة يحب
ومو أي حب لا معمي على عيونة وداعتچ يمشي ويغني من الفرح

- شنو الجديد عمة
شو دوم اسمع منچ هالكلام واعرف بي عنده علاقات على عدد شعر راسة على شنو ضايجة بعد

- هالمرة غير طيبة
هالمرة حب حب مو مجرد علاقات عابرة وونسة مثل قبل

- ياااااا زين انتِ شلون عرفتي

- أول شي انتبهت علي لأن چان زين وياية وفجأة شو صار ميطيقني ولا يطيق يسمع صوتي

بعدين گعدت ويا اريد اعرف شنو السالفة
گال انـي احـب وحدة بت بيت وفترة واتزوجها تردين تظلين على ذمتي اشيلچ فوگ راسي وتظلين ببتچ معززة مثل ما انتِ

متردين اطلگچ وروحي لحال سبيلچ
بس يشهد علية ربي اني احبچ وما اريد اخسرچ لذلك اترجاچ لتعوفيني

- عزة عزة عزة
والله عمة صدمتيني هذا يحچي من كل عقله
يعني فوگ عيوبة الـ تارستة هالدور يريد يتزوج عليچ

- ما ادري والله
وانتِ شسويتي تعاركتي ويا لو شنو

- لا لزمت اعصابي وحاولت اعرف منين وشلون
گال وحدة وياية بالدوام
فترة واعرفچ عليها اذا تحبين لأن هي كلش حابة تتعرف عليچ

- اي وشنو ردة فعلچ احچي لتسكتين
- ما حچيت ويا بعد من حادث همام ولليوم لأن ماكو شي ينگال

- وشمنتظرة عمة بس لا تردين تبقين ويا
- لا طبعاً ما ابقى
بـس اگول بلكي نزوة وتعدي مثلها مثل غيرها أما اذا سواها وصدگ راد يخطب اعوفة من نفس اللحظة

- وانتِ شتحسين راح يتزوجها لو نزوة وتعدي
- والله شكلة يتزوجها لأن حتى يومة ينگلب بناءاً على كلامة وياها اذا متصالحين او متزاعلين

- دخلي يتزوج واخلصي منة اوووع شنو من ملة هذا
بس حچيتها حطت إيدها على وجها وبچت
عمة لتبچين ميستاهل وربچ موجود اذا ميطلع بي كل دمعة نزلت من عينچ ما اكون اني طيبة

- مرات الوم نفسي وغبائي
ومرات اگول لا مو غباء هاي المودة الزرعها رب العالمين بكل زوجة مؤمنة وانتزعت من سلام لأن بعيد عن ربة

- اكيد هاي فطرة خلقها رب العالمين بالمرأة
لأن لو ما هالحب أقل اهتمام من غيرة يجرفها وتخون أما اذا حبت فراح توفي الة لو بي كل عيوب الدنيا مثلچ يعني واكيد هم تربيتها تلعب دور

- صح كلامچ بطة
والله وكبرتي وصرتي تحچين كلام يتوزن بالذهب

- هههههه العمر يمشي قابل اظل صغيرة اكيد لازم أكبر

حچيت هيچ وصفنت بلا شعور نزلت دمعتي
- ليش تبچين

- تذكرت رحمة هم كبرت هسة مثلي
شتگولين عمة شلونها مرتاحة لو عايشة بـ جحيم رزاق مثل ما عشت بي اني قبلها

- لا حبيبتي ان شاء الله مرتاحة
انتِ مو تگولين عمتچ نهاية وياها وعمچ وولد عمومتچ اكيد ميسمحون الأبوچ يأذيها صح لو مو صح

بس ذكرتهم گبالي.... صرت اناشغ من البچي
- اشتاقيتلهم كلش
اشتاقيت لعيون رحمة ولأسمي بـ لسانها
اشتاقيت لعمة نهاية والدلالها الية والخوفها علية
اشتاقيت لبيبي والريحة حضنها التشبه ريحة عمو حامد وجدو الله يرحمهم

- تعالي بحضني يمة
اني أختچ واني عمتچ واني كل شي تريدين
وان شاء الله ربي يريح گلبچ ويجمعچ بيهم بأقرب وقت

- عمة شتگولين ليش نسوني
معقولة صالح نساني وبعد ميذكرني ولا اجي على بالة
هو مو وعدني يحميني طول حياتة شو مصدگ تزوجت وين راح وعدة لعد

- لا حبيبتي اكيد ما نسوچ شنو هالحچي
اكو شي مهم بعدهم عنچ لأن حسب مسولفتيلي چانوا يحبوچ كلش
زين شنو رأيچ لو تحچين ويا همام بلكي يروح يسألچ عليهم ويعرف اخبارهم حتى ترتاحين

- بس أبوية من اجة لهنا گال سافرنا للبصرة ؟!!

- ميخالف شخسرانة قابل
گوليلة يسأل بلكي احد مـن المنطقة يعرف وين صفى بيهم الدهر ويطمن گلبچ على أختچ وعليهم

- يا ريت عمة يا ريت
صدگي بعد ما بية اتحمل افراگهم كل شي ما اريد بس اعرف همَ بخير لو لا حتى لو ما اشوفهم

- الله يطمن گلبچ ويريح بالچ بجاه رسول الله وكتابه
- شكراً عمة اني هم زودت الهم عليچ خاف عايزة انتِ

- لا حبيبتي شنو هالحچي
انتِ مثل بنيتي الله يشهد واحبچ مثل حبي لـ بتولة

گمت حضنتها وبست راسها حيل
- واني احبچ مثل حبي العمة نهاية وتعرفين شگد أحبها

بعدنا على هالحالة دخلت بتول للمطبخ
- ها خير شنو هالحب النزل عليكم فجأه خلولنا شوية

خديجة.. ههههه تعالي لحضني بعد گلبي فدوة لغيرتچ

بس حچتها ركضت الحضن عمتها
ابتسمت على سوالفها احسها بنية نقية وگلبها مثل گلب الأطفال وبنفس الوقت مسكينة مثلي مشافت شي من حياتها

همام.. خلصت دوامي گمت اريد اطلع دخل علية مخلد
ها شعندك هنا

- راح تطلع
- اي ليش ان شاء الله هم تريد تجي وياية حارس
- طبعا اجي
- يمعود لتسوي هالسوالف لخاطر ربك والقرأن اضوج

- وضوجتهم عمي
رضيت ولا ما رضيت جاي وياك يعني جاي لتحاوووول

- ادري شوكت الله يخلصني منك صايرلي مثل ظلي
- هههههه متخلص لازگ على گلبك واحتمال على گبرك

- ههههههههه خلف الله عليك
- يلا يمعود فضني خل نطلع اليوم تعبت فوگ متتصور

أخذت السلاح وموبايلي من الميز وطلعت
- علي روح جيب السجلات من القائد خليهن ع المكتب واقفل الباب واتوكل
درت وجهي على مخلد چان يصير رزاق بـ وجهي طالع من المقر شنو السالفة لك هذا شجابة لهناااا......

يتبع

لتنسووون ⭐⭐⭐⭐⭐⭐
كل الحب ❤🥀