اسعد الله اوقاتكم بكل خير احبتي ❤
/// البارت التاسع والثمـانون /////
#بيوت_بلا_جدران
#شمس_السعدي
----------------------------------------------
بت اخاف ان افرح !!
وكأننا لانستطيع توديع الحزن الا لأستقبال آخر ..
وان هذا الفرح الذي نشعر به هو فاصل زمني بين هذا الحزن وذاك ..
وان الحياة لئيمة جدا .. تستخسر علينا تلك الفرحة
وتشعرك بمنية السعادة التي تهديها لك بصورة مؤقتة ..
رحمة..
اجانة التبليغ استغربنا ..
كنا مجهزين اوراق ماسة كلها ونريد نروح نقدملها ..
سألته ..
" علي مسوي شي ؟؟ ليش هالتبليغ ؟"
رد ..
" شبيج رحمة شمسوي قابل اني مال مشاكل شو اروح بطريقي واجي بطريقي "
سألت عمتي ..
" ماسألت هذا ابو التبليغ خاف متوهم ولويش دزولك تبليغ شمسوي غير تفهم منه جا گبل اخذتها .."
رد ..
" يمة لا اسمي مكتوب هذا وبعدين المبلغ شعليه هم يسلموه التبليغات وهاهي .. "
خابرنا اخوتي اجو وبيومها درع هم هنا موجود ..
قروها استغربوا..
رد اركان ..
" لا تروح علي .. اذا تگول ماكو شي معناتها كيدية .. خلينا نفهم يله "
رد علي ..
" شنفهم غير اني افتهم منو وليش بلغ عليه "
رد درع ..
" يابة احنه نروح ونسأل ونگلك عود نعرف ليش يله خو ماتشمر روحك للنار هيج "
رديت ..
" اي علي لاتروح خلي اخواني يرحون يسألون يله "
رد رضوان ..
" اني اخذ اركان ونمشي نشوف شني السالفه ونرجع "
راحوا اركان ورضوان لان رضوان جان ضابط ويعرف بهالشغلات ..
بقينا منتظرين وگلبنا نار مانعرف شني السالفة ..
اجو الظهر تلگيناهم كلنا ..
جانوا يتلعثمون بالكلام ومتوترين ..
ضاج علي ..
" ماتحجون شني السالفة شبيكم ؟"
رد رضوان ..
" امشينا للاستقبال نسولف "
سألته ..
" وليش مو هنا ؟"
رد علي ..
" اي صدگ ليش مو هنا شكو شبيكم ماتحجون "
ردت اركان ..
" تعرف وحدة اسمها حنان "
صفن بوجهي واني هم مستغربين الاسم ..
هز راسه علي ..
" اي وياي بالدوام ليش شبيها ؟"
رد رضوان ..
" هي الاشتكت عليك "
انصدمت ..
" ليش" سأل علي
رد رضوان..
" ماردنا رحمة تسمع بهالحجي .. بس… ."
قاطعه علي ..
" احجي شبيك شبيها لطام "
رد رضوان ..
" مبلغة عليك ضاحك عليها ومقشمرها "
استغربت ..
" شنو ضاحك عليها ماافتهمت "
رد اركان ..
" تگول مواعدها بالزواج وتالي معتدي عليها ومقشمرها وشارد "
احس النار شبت بيه وعيوني مااشوف بيهن ..
عاين عليه علي مستغرب ..
" جذابة والله مااعرفها ولا واصللها واصلا غير الدوام مااشوفها بأي مكان "
رد رضوان ..
" المشكلة مخليه شهود وكلها شاهدة انت جنت تروح البيتها "
اني سمعت هيج مااعرف شبيه طحت بساع ..
فتحت عيني كلهم داير مدايري وعلي يغسل بوجهي
عمتي تحجي عليه ..
" ولك هي هاي ترباتي الك .. بالحرام تريد تفضحنا "
صاح بيها ..
" يمة شبيج يعني هيج اني بنظرج "
همست ..
" منا الجهال اسكتوا كافي .. رضوان اخذني الغرفتي "
رد اركان ..
" لو ترحين ويانا للبيت هناك ترتاحين "
رد علي ..
" انت شبيك شني تاخذها "
لزمني علي سحبت ايدي منه ..
اخذني الغرفتي رضوان..
اجه وراي علي ..
" شتردين تسوين اذا عندج نية ترحين الاهلج مااخليج شلون تصدگين بهالحجي "
عاينت عليه ..
" مااروح المكان .. هذا بيتي وبيت جهالي مااطلع لاتخاف "
رد رضوان ..
" علي هسا عوفها ترتاح وبعدين احجو "
سحبه وطلعه ..
گعدت على جربايتي ابجي مثل الطفل .. كلشي اتحمل الا الخيانة خلي اموت ولا يخوني .. بس اني اعرفه علي يخاف كلش من الحرام وحتى لو حجيها صح جان تزوجها مستحيل ياخذها بالحرام ..
اجت عمتي دخلت ..
" لا تخربين بيتج صيري عاقلة "
رديت ..
" وشني شايفتني عمة ملخت نفسي شو ساكته وگاعدة منو مثلي تسمع هالحجي وتسكت واني محذرته كم مرة وهو يستهزأ .. گلتله نهايتة حنان مو حلوة وراح تبتلي بس ماصدگني هذا الخايفة منه "
بقت تحجي واني ساكته لين عافتني وگامت ..
گمت سويت غدا اخوتي بعدهم بالاستقبال يحجون
صحت ماسة فرشت السفرة وشالت الماعين ..
گلتلها صيحي ابوج وخوالج وبيبيتج خل يتغدون ..
صاحتهم ورجعت للغرفة ..
اجتني ماسة ..
" بابا وخوالي يگولون خل تجي تتغدا "
رديت ..
" ومنو اله خلگ ياكل.. گليلهم ماتريد ماتشتهي "
اتقربت يمي ..
" ماما شبيج ؟"
رديت ..
" مابية شي ماما بس مالي خلگ "
ردت ..
" ماما اني كبرت حصير 19 سنة وانتو لسا تعاملوني كـطفلة .. ترى وربي افهم كلشي .. الوحيدة التعاملني وكأنه كبيرة من طفولتي هي جدتي مرمر "
رديت ..
" بالعكس امي انت مو بس بنتي وصديقتي هم وتعرفين هالشي بس اكو اشياء متنحجي او خاصة بعدين تفهمين شقصد .. "
ردت ..
" اذا الشغلة تخص بابا لان سمعت مقتطفات من غير قصد من وگعتي والتهينا بيج .. بابا مايغلط ومستحيل يسوي شي خطأ "
رديت ..
" صح بابا مايخطأ وعاقل بس ماما حرام تگولين هيج لان كلنا بشر مو معصومين ومانخطأ مرات نسوي شغلات من غير قصد تعتبر خطأ.. هالحجي مااقصد بي بابا بس احجيلج بصورة عامة "
ردت ..
" صح كلامج ماما بس اقصد انه بابا يحبج ومستحيل يسوي شي يضوج .. اني من كثر حب بابا الج صرت اتمنى بالمستقبل ربي يقسملي احد مثله "
رديت ..
" ان شاء الله يعمري .. يااا وج هيج كبرتي بساع وصرتي بالجامعة ويخطبوج وتتزوجين وترحين عني "
ضحكت ..
" يااا ماما شو ضجت لاعفية بطلت خلوني يمكم هنا لتنطوني الاحد "
رديت ..
" هو اصلا ابوج يگول ماانطيها هي وحدة عندي ويردون ياخذوها "
ردت ..
" يمة اروح فدوة البابا كافي عليه حبه شلي بدوخت الراس .. هاي صديقتي خطية تزوجت بعطلة نصف السنة مال سادس الابن عمها .. لو تشوفيها ماما ماصارلها اشهر وتبجي ميخلوها تفتح كتاب وتدرس نص الدروس اجلتها وتالي هسا رسبت خطية "
رديت ..
" شوفي ماما حياة الناس مو مقياس الحياتنا ومستقبلنا .. صح اهلها غلطوا لمن زوجوها وهي بعدهي ممكملة سادس .. بس مو معناتها كل التزوجوا ممرتاحين .. الزواج حلو لو عرفنا نختار الشخص الصح .. الشخص الي يحترم ويهتم قبل ليحب .. لان الحب ايضا مو مقياس الزواج ونجاحه .. اكو يحبون بس بمرور الوقت يتغيرون وميحترمون زوجاتهم ..
فأي زواج مابي احترام واهتمام وان كان اكو حب ماينجح .. لان الزواج مشاركة بكلشي .. فلازم نختار الاختيار الصحيح حتى مانندم .."
هزت راسها خجلانة ..
كملت كلامي ..
" هالموضوع ردت افتحه وقت ماتداومين بالجامعة بس مادام هسا انفتح راح انصحج نصيحة ام البنتها او من صديقة الصديقتها .. انت ياامي راح تدخلين جامعة وتشوفين اشكال هناك .. بنات وولد وعلاقات وطلعات وهالسوالف كلها ..
مااگلج ابتعدي عن الكل ولا تختلطين ببنات ولاتحجين بس اگلج حكمي عقلج قبل كلشي.. فكري بالخطوة التخطيها.. مو كل اليضحك بوجهج تصدگيه ..خلي مسافه بينج وبين اي شخص بحيث مايتعداه ويتجاوز هالمسافة ووتتندمين لان عرفتيه .. كلامي بصورة عامة احجيه..
اني حبيت ابوج واني مراهقة مااعرف شنو الحب وشنو الصح والخطأ بس حبيته لان شفت بي الانسان الممكن اسند راسي عليه واني مطمأنة الانسان اليگدر يفهمني من غير مااحجي .. ربينا سوة اعرفه ويعرفني اكثر من اي احد ثاني يعرفنا ..
فأنتي ياامي خليج حذرة ولاتضمين شي عنا .. ان كنت تستحين تحجين وياي او وي ابوج .. عندج عمتج بيبيتج انت تحبيهن وهم يعرفن شلون ينصحنج بس هم شي لاتتصرفين بيوم تصرف يخليج تتندمين ..
ردت ..
" ماما اشو خوفتيني راح اتراجع عن الدوام "
ضحكت ..
" بالعكس مااخوفج انصحج ..لان اني عندي ثقة كبيرة بيج واعرفج تربات مرمر وترباتي وتربات علي ..
بي كل ام تنصح بنتها وقبلج جدتج نصحتني ياما "
اندگت الباب دخل علي ..
" بابا جا وديتج تصيحين امج لو تگعدين تسولفين كملنا غدا وانتو ماكو .. سوي جاي الخوالج راح يطلعون"
طلعت ماسة اجه يمي ..
" راح يبقى رضوان ودمعة يمكم هنا واني راح اروح يمهم .. الولد يگلولي ابتعد عن البيت بين مانشوف شيخ عشيرتها منو ونروحله نحجي وياه "
اتنهدت ..
" اگوم احضرلك ملابسك "
لزم ايدي ..
" شو ماحجيتي شي "
رديت ..
" شحجي مثلا "
گام جاب القران راد يحلف سحبته منه ..
" دير بالك تحلف بالقران سواء كنت صادق او لا .. القران ماينحلف بي الا اذا جانت شغلة بيها حياة وموت"
رد ..
" وتصديقج الي هي الحياة والموت بالنسبة الي "
رديت ..
" ومنو گلك اني مجذبتك "
ابتسم ..
" يعني مصدگتني .. مصدگة اني مااسوي هيج "
رديت ..
" لو عندي شك واحد بالمية كان مابقيت وياك ولا دقيقة .. بس ضجت لان ياما حذرتك وانت مااخذت السالفه بجدية .. لين تمادت وسوت السوته .. حذرتك لو ماحذرتك ؟"
رد ..
" اي والله حذرتيني وگلبج جان حاس واني السبب لان مااخذت بحدسج رغم اعرفه ومجربه .. بس مااتوقعت اكو وحدة تشوه صورتها هيج "
رديت ..
"رادت توصلك بكل طريقه بس ماگدرت اتبعت هيج اسلوب علمود تنجبر تتزوجها والا تنسجن "
ردت ..
" لو اعرف اخيس بالسجن مااتزوجها اتي اتزوج هيج وحدة سوتها وياي ويمكن اكو گبلي براضتهم وبغير رضاتهم ماخذيها .. الا اگلج عرضت روحها عليه وفوگاها بفلوس . "
فتحت عيني مستغربة ..
" شلون يعني "
رد ..
" من اخر مخابرة رحت رزلتها وگلتلها اذا خابرتي بعد افضحج .. گالت افضحني مايهمني مادام عجبتني اخذك اخذك وماارتاح الا تاخذني "
هزيت ايدي وردت اطلع من غرفتها
گالت ..
" شتريد وشتطلب انطيك .. كم ورقة تريد مقابل ليلة وحدة تشبع رغبتي ولهفتي بيك "
عاد هنا تخبلت غلطت عليها وگلتلها رخيصة ولو مااحنه بدائرة جان حتى ضربتها لان ماشايف هيج رخص بحياتي ..
ماعرفت شرد .. احس نار تغلي بيه لو يمي هاي حنان جان ملختها تملخ ..
من حرگة گلبي تخبلت عليه ..
" انت السبب "
رد ..
" اني ؟ شبيج والله حتى سلام بطلت اسلم عليها "
رديت ..
" اي انت السبب لانك من البداية ماخليتلها حد لمن تمادت .. ومن تطلع عبالك عربس تلبس وتكشخ وحلو طبعا تلزگ بيك "
ضحك ..
" غير انتي تطلعيني حلو وتكويلي ملابسي عبالك مسطرة يعني انت السبب مو اني حبيبتي "
رديت متنرفزة ..
" بعد مااكويهن بطلت "
سحبني اله وحضني ..
دفعته ..
" اتحمل كلشي الا اهانة كرامتي .. مااتحمل نظرات اي احد الي .. او احساسهم بالشفقة وكأني الزوجة المخدوعة فعلا .. تحل هالموضوع بساع وتخلصنا من هاي المصيبة ساعتها يله تحضني مثل الاول "
اتنهد ..
" الله يحي البطن الحملتج والربتج .. وحدة غيرج صدگت وعافت رجلها وهو بأمس الحاجة الها "
رديت ..
" لان رجلي مايشبه اي رجال .. يخاف الله ببيته ومرته وجهاله .. ولان اعرف عيونك ماتشوف غيري ابد "
اتقرب لزم وجهي بأثنين ايديه وباس راسي ..
حضرتله ملابسه اخذهن وراح وي اخوتي البيت اهلي
بعد ماوصى جهاله وباسهم وانطاهم مصروفهم .. وانطى العمتي مصرف البيت خاف نحتاج شي ..
طلعوا نظفت البيت اني وماسة ..
وعمتي تحوم فوگ راسي خايفه عليه لاينسجن ..
رديت ..
" عمة لاتخافين ماينسجن رضوان راح يخابر خوالي يجون ويشوفون اهلها وين ويحجون وياهم "
وفعلا خابر رضوان الخوالي اجو ثاني يوم كلهم ..
بدأوا يدورون عمامها واهلها وعشيرتها من وين ..
والتبليغات مستمرة علينا ..
واخر شي انطوا بأمر القاء قبض عليه وين مايلگوه
جابته هذا الامر بساع وخلال ايام معدودة ..
التهينا بقضية علي ونسينا تقديم ماسة ..
خابرت الرضوان يشوفلي احد ياخذها لهناك بس يقدمون خاف ينسد التقديم ..
شوية ورجعلي خبر ..
" گال ميراد وفيصل ياخذوها يقدمولها ميراد يفهم بهاي السوالف وفيصل ياخذهم بسيارته "
رديت ..
" خلي اشوف علي انطينياه "
اجه علي حجيت وياه ...
ماقبل تروح وياهم وحدها گال تمشين وياهم انتي
رديت ..
" شلون امشي واعوف الجهال وعمتي وحدهم "
رد ..
" غير دمعة يمهم .. شبيج رحمة اني ماامن على بنتي غير وياي ووياج "
حجيت وي ماسة گالت مااروح وحدي استحي الا ترحين وياي ..
ثاني يوم گعدنا من الفجر بدلنا ورحنا ..
اجوا فيصل وميراد اخذونا ..
الطريق طويل نمت بالسيارة لحد ماگعدنا ..
گالوا وصلنا ..
رحنا لجامعه بالاول ..
قدمنا الها هم اني بقيت گاعدة والولد يفترون بيها
للظهر يلة كملنا ..
اخذونا زرنا مسجد الكوفة وصلينا وبعدها رحنا للامام علي عليه السلام زرناه .. بعدين تغدينا بالمطعم ..
افترينا شوية بالنجف .. اخذت ملابس الماسة مناك للدوام عجبني ..
اشتريت دهينة والعاب للجهال ورجعنا ..
وصلنا العصر تعبانين .
سبحت وتمددت شوية ..
عفت ماسة تراوي ملابسها العمتها ..
ماسة ..
طلعنا من الصبح للكوفة ..
جنت متوتر حيل اول مرة اشوف جامعه وخاصه هالجامعة بعيدة عن اهلي شلون راح اعوفهم ماادري احس فرحتي ضاعت بسبب التفكير ..
وخاصة من شفت ميراد گبالي من الصبح جان كاشخ وحلو ويبتسم ..
" هااا مهندستنا صباح الخير "
رديت ..
" صباح النور "
صعدت سلمت على خالو ..
" شلونك خالو صباح الخير "
رد متعصب
" فيصل فيصل گليلي لاتكولين خالو كم مرة اگلج ترى لو مااني وامج راضعين سوة جان هسا احنه ولد عم افتهمتي "
ضحكت ..
" اعرف فصولي بس اريد اغيضك احبك من اگلك خالو وتتعصب "
رد ..
" دحجيها مرة ثانية وشوفي شلون اموتج "
ضحك ميراد ..
" اليشوفك يگول صغير وهي كبرتك .. دشوف هاي شيبة طالعتلك "
باوع بالمراية ..
" لا عليك الله وينها .. "
ضل يباوع النفسه وضايج ..
وميراد يضحك عليه ..
رد خالو فيصل ..
" ولك انت ذاك اليوم طلعت من البيضة تضحك عليه "
رد ميراد ..
" يابيضة همزين الفرق بينك وبيني عشر سنوات"
رد خالو فيصل ..
" 11 سنة لاتصغر بروحك "
ضحكت عليهم شلون يتداهرون ..
صعدت امي سلمت سكتوا لان ميراد يستحي من ماما وخالو فيصل استغل هالفرصة وضل ناصب على ميراد بالطريق ..
ماما نامت سكتوا..
بقيت صافنه من الشباك انتبهت على المراية الجانبية
جان ميراد يباوعلي بتأمل ..
دنگت بساع وتوترت ..
نظراته ماعرفت افسرها وخجلتني ..
وصلنا للجامعة ..
بدينا نقدم وكل شوية يردون شغله واحنه نفتر ..
طبعا اني بس افتر وياهم ميراد هو التكفل بيها كلها ووياه خالو فيصل ..
كعدت شوية ارتاح دخل ميراد وطلع ..
سألته ..
" كملتوا "
رد ..
" ان شاء الله مابقى شي "
تذكرت الكلادة النطاها الي ..
طلعتها من الجنطة..
سأل ..
" شنو هاي ؟"
رديت ..
" گلادتك .. شكرا الك ولو تأخرت عندي بس من البسها احس براحة الهيج خليتها لمن تكمل امتحاناتي واستلم النتيجة "
رد ..
" وليش رجعتيها "
رديت ..
" هي مالتك اصلا مااحتاجها بعد مشكور "
رد ..
" هذا الحجر نادر وخاصة الاصلي اسمه عباس اباد علاج الكلشي لهذا من تلبسيه تحسين براحة نفسية اكو تقليد طبعا بس هذا مال جدتي ام ابوي قديم حيل وعزيز عليه وماانطيه الا للاعزاز "
حمرت خدودي من الخجل ..
" خلص اذا من جدتك اخذه مايصير تنطيه الاحد هيج شغلات نادرة متتعوض وخاصه اذا من ريحة اعزاز عندنا "
رد ..
" اني ماشايفهة اصلا اخذته من ابوي .. بس هالفترة انت تحتاجيه اكثر مني .. يابة خليه عندج منا لمن اريده اگلج انطينياه كافي "
ضحكت ..
" ادري بيك ماراح تگول "
ابتسم ..
" لا اگول لاعبالج استحي كلشي عندي مباح "
رديت ..
" شكلك يشبه ابوك بس شخصيتك متشبهة حسب كلام جدتي عنه "
ضحك ..
" اي صح اشبه بشخصيتي عمي سيروان اكثر شي هم هو يحب الشقى والضحك .. تدرين ابوي حاجيلي عن جدتج وحبهم "
استغربت ..
" معقولة ؟"
رد ..
" وليش مستغربة اني وابوي اصدقاء كلش .. ولان يريدني اعرف كلشي عن العراق وديالى جان يحجيلي كلشي ويوصفلي جدتج شلون كانت .. لدرجة امي تسمعني وتضل تضرب بالماعين من غيرتها علمود يسكت "
ضحكت ..
" حقها ترى "
رد ..
" جنت مثلج اگول بس من حسيت بنفس الشعور عذرت ابوي .. وابوي مو بس حبها لا بقت حسرة بداخله لان ما صارت اله "
سألته ..
" يعني انت هم مثل ابوك ؟"
رد ..
" تگدرين تگولين بديت احس شنو الحب بس لسا ماجربته خايف لايصير مصيري مثل ابوي ؟"
جانت عيونه تحجي مو بس السانه ماعرفت شيقصد بالضبط ..
طلع خالو فيصل صاحنا دخلنا ..
لحد ماكملنا .. صار الظهر ..
رحنا صلينا وزرنا ووتغدينا بعدها افترينا .. اخذت ملابس ..
عجبتني عبايات اسلامية اخذت اثنين ..
كلش حلوات عجبني صح غاليات بس يسون ماما مشايله فلوس هواي عجبتني احذية وجنط گلتلها بعدين ناخذ لان ماعندها وسالفة بابا شاغلتنا هالفترة ..
رجعنا للبيت راويت الملابس العمتي وجدتي حورية گامت تحجي عليه تگلي ابوج وين وانت وين حايرة تتبذهين وتلبسين ..
حسستني بالذنب صدگ ..
عمتي تأشرلي ما اهتم..
رحت خابرت بابا باركلي وصار يدعيلي ..
رحمة ..
رجعت من اهلي شفت علي وحجيتله عن تقديم ماسة وسولفتله شنو اشتريتلها .. ضاج لان ماماخذة فلوس هو كلشي ولا ماسة تحتاج شي ..
گلتله تنحل هالسالفه وناخذها نشتريلها براء اقترحت نجي البغداد هم نغيرلها جو قبل الدوام وهم نشتريلها مناك ..
خابرته هي عافني وراحلها هي الوحيدة التگدر تاخذ علي مني ..
يمكن لو ابوها الحقيقي موجود ماكان سوالها هيج لا واكيد ميسويلها هيج .. هي بيبيتها متذكرها اصلا ولاعمها ماعدا فرج زين وكت مانجحت انطاها فلوس
رجعت للبيت ..
التهينا بالعشا لليل اجاني حسون ..
" ماما وحدة تريدج على التلفون "
رحت شلته گلت
الو ..
ردت ..
عرفتها من صوتها .
سألتها. .
" شرايدة ؟"
ردت ..
" توقعت الگيج عايفته ورايحة الاهلج اول مرة اشوف مرة ماعندها كرامة مثلج "
رديت ..
" واني اول مرة اشوف وحدة رخيصه مثلج "
ضحكت ..
" حجي يفيدج .. ماتگدرين تعترفين انه رجلج خاين ضل وراي الحد ماقشمرني واجاني للبيت .. طردته حاولت ماكو .. استغلني وحدي بالبيت واخذني بالقوة ووعدني يتزوجني واني صدگته وسلمته نفسي لان حبيته وسكتت بس ماتوقعت يطلع نذل وخاين .. "
ضحكت ..
" اذا هيج مثل متگولين… اكو شي بجسمه علامة واضحة حيل شنو ؟ "
ردت ..
" اگلج اعتدى عليه شعرفني شني بجسمه وهو مانزع ملابسه لان جان بس يريد ياخذني بالقوة "
رديت ..
" هاااا اي صح بهيج حقج .. ع العموم اذا الج حق تاخذيه ولو ثبتي فعلا انه علي معتدي عليج اني اصير وياج عليه "
سألت مستغربة ..
" تحجين صدگ ؟ يعني تعوفيه ؟"
رديت ..
" مستحيل ابقى وياه اذا طلع خاين فعلا "
ردت ..
" جا خليه يسلم نفسه مو خاتل وخايف وذيج الساعه اني اثبتلج "
سديته بوجهه ورغم النار البيه گدرت اتمالك اعصابي
سألتني عمتي ..
" هاي شرايدة منج ؟"
رديت ..
" منو عرفتيها ؟'
ردت ..
" اي مبين من حجيج وياها "
رديت ..
" تريد تتأكد عفته لو لا "
ردت ..
" اكلج يعني هي رايدته وهيج سوت ؟"
رديت ..
" شنو قصدج مافهمت "
ردت ..
" قصدي اذا هيج تريده خليه يتزوجها علمود ماينسجن وعود فترة ويطلگها "
ضحكت ..
" تحجين صدگ عمة ؟ لو ينسجن العمر كله وانتظره ولا يتزوجها شنو هي ويتزوجها تعرفيها شنو ؟"
ردت بعصبية..
" شني ماشني المهم عندي ابني .. اني الحبلت بي وربيته وكبرته مو انتي يعني مااريد ابني يبعد عني مرة ثانية وينسجن مثل گبل اريده يمي وبحضني .. "
رديت ..
" ومنو گالج ينسجن عمه .. علي بريئ وراح تبين جذبتها "
عفتها ودخلت ..
بقيت اتگلب من الحرگة .. ماگدرت اگول العلي خابرت واضوجه ..
فرج گدر يوصل العمامها وطلب يقابلهم ..
قرروا همة خوالي يرحون الهم ..
من راحوا گالوله احنه مانعرفها ولاتعرفنا من ابوها استشهد واخذتها امها وراحت الغير محافظة بعد ماعرفنا شني عنها ولا علينا بيها ..
رجعوا ضايجين اذا عمامها مايعترفون منها المن نروح بعد ..
علي ضاج وقرر يسلم نفسه ..
منعوه ماقبل ..
" كافي شني اني شارد علمود مرة .. بيها حظ خل تثبت اني معتدي عليها "
شگد حاولوا اهلي وياه وعمتي ماقبل ..
رديت عليهم ..
" احسن قرار ياخذه خلي نشوف لوين توصل "
ببالي تحديها الي وجنها واثقة من الاثبات العندها ..
ثاني يوم رايح ومسلم روحه .. ماخذ صديقه محامي ووياه بنفس المحكمة ورايح ..
سجنوه على ذمة التحقيق ..
واحنه گلوبنا نار عليه ..
عمتي تلوم بيه وتگلي انت الخلتيه يسلم نفسه ماتحبيه جذب لان خانج تردين تنتقمين منه ..
ماحجيت وياها ..
ودمعه گامت تحجي عليها ماقبلت ..
اتصلت مرة ثانية ..
ردت عليها دمعة من عرفتها صارت تغلط عليها وتدعي
اخذته منها ..
" شتردين انت ؟"
ردت ..
" باجر المحكمة اذا ترديني اتنازل خليه يتزوجني وبشروطي ووعد مااخليه يعوفج ويعوف اولاده ليلة الج وليلة الي .. مو احسن مما ينسجن ويضل سنين بعيد عنج من غير مستقبله اليضيع "
طبگت التلفون بوجهها مااتحملت تفاهتها ..
حجيت الدمعة حجيها تخبلت ..
" ولج شنو هاي فد مرة رخيصة عوذة شنو من بشر "
ردت عمتي والظاهر سامعتنا ..
" خليه يتزوج .. مو گالت تطلعه .. خل ياخذها هو اصلا علي مايعوفج بس خليه ياخذها علمود تطلعه "
سألتها ..
" لو انت وعمو علي الله يرحمة عايش ورجلج وتحبيه ترضين تتنازلين عنه الوحدة رخيصة ؟ "
سكتت ماحجت ..
كملت..
" صدگي لو هو رايدها فعلا جان خليته الها وطلعت من حياته بس هاي وحدة ملعبه شلون ترضين ابنج ياخذ وحدة مثل هاي لو تعرفين علي شيحجيلي عنها ماجان حجيتي هيج "
سكتت ماحجت عفت دمعة تحجي وياها ومشيت ..
الليل كله مانمت افكر بحكمته ..
جنت منتظرة اي خبر ..
من الفجر گعدت صليت ودعيت اله ..
شفت عمتي هم تصلي وتدعيله ..
خابرت امي وصيتها تدعيله بصلاتها ..
صار الصبح سويت ريوگ الرضوان اكل شوية وطلع ..
گلتله انطوني خبر من تخلص المحكمة مو تخلوني هيج ..
للضهر خابرني رضوان ..
" گرت عينج يبعد اخوج طلع برائة بس نكمل اوراقه ونطلعه "
فرحت ..
ركضت بشرت عمة حضنتني وتبجي ودمعة هم ..
ماسة صارت تگمز من الفرح ..
ركضت للمطبخ ..
سويت الاكل اليحبه ورحت سبحت وبدلت وانتظرته
شافتني دمعه ضحكت..
" يمة الحب يمة اليشوفج البارحة مايشوفج اليوم شني هاي ولاعرفتج .. كحلة وحمرة "
ضحكت ..
" نزول عليج كافي ولج منا ماسه فشله "
اجت امي خطية مخابريها ومبشريها باركتلي وجايبة جكليت تطش عليه ناذرة..
طلعت عمتي من الغرفه هم مبدلة ومعدله ومتعطرة
ضحكت دمعه ..
" يمه اليشوفج يگول رجلج الطالع ترى هو رجل رحمة وتبدله وتعدل انت شكو "
ردت ..
" يااا جا غير امه شني اطلعله بوساختي لو دشداشتي القديمة ذيج .. "
ضحكت ..
مرات اعرف سبب حجي عمتي الي .. جانت عمتي تغار على علي مني .. وكأنه تريده بس الها ماتريد احد يشاركها بي ..
اندگت الباب كلها ركضت للباب واولهم جهالة ..
بقيت واگفة واعاين ..
دخلوا اخوتي وهو التهى بالجهال يبوس بيهم وحاضن ماسة ..
طشت امي عليه الجكليت ..
تلگته عمتي ودمعة حضنهن وعينه عليه مبتسم ..
نظراته بيهن لهفة وشوق .. بس بنفس الوقت منتظر ردة فعل مني تحسسه بالامان ..
اتقربت اله ..
حضنته حيل .. وهمست ..
" نور بيتك حبيبي "
اخذ نفس قوي وحسيته ارتاح ..
ضحكوا اخوتي..
" يابة استحوا منا شبيكم جنكم مراهقين ومتحاضنين"
رد فيصل ..
" والله اني من يمي استحيت ولاعبالك احد واگف يمهم"
رد خالو مهران ..
" الحب مابي عيب .. ابد خالو لتخلون العمر يأثر على حبكم ولهفتكم وتصرفاتكم .. الحب مايعرف عمر .. شيبوا سوة وخلو حبكم يكبر وياكم بترافه ابد لتخلوه ينقرض ويختفي تحت مسمى كبرنا وعيب ماكو عيب بالعشگ مادامه حلال "
رد ميراد ..
" اخذوا دروس من ابوي يعجبكم مدرسة حب بحالها عنده "
ضحكنا كلنا ..
دخلنا فرشنا السفرة والتمينا كلنا .. الفرحة رجعت البيتنا
گعدنا نتغدا سألتهم ..
" شلون طلعوك برائة "
رد علي ..
" جايبه صاحبتها وكم شاهد مااعرفهم بحجة شايفينا سوة وشايفيني داخللها للبيت .. بس الله يريد يوگعها شلون ..
گالت .. عندة علامة بجسمه من نزع واعتدى عليه شفتها ..
نزعت قميصي وراويتهم جسمي كله مابي علامه هي تسودنت وبقت تحلف ..
وقبل بساع گايله اعتدى عليه فجأة ومن غير ماينزع تناقضت اقوالها من غير الشهود الوياي بالمحكمة طلعوا خوش اوادم كلها شهدت ضدها الصالحي والقاضي طلع يعرفني رزلها وبهذل احوالها وغرمها غرامة عاليه علمود ماتكررها بعد ..
ابتسمت من عرفت لعبتي مشت عليها ..
جنت واثقة علي مايسويها وحجايتي الها من گلتلها عنده علامه جنت متعمدة بيها ..
هي تحدتني لان توقعت راح تربح مجرد مايشوفون العلامة…
من حجيت العلي بالغرفة ..
استغرب وضحك ..
" انت شنو .. يوم عن يوم اشكر الله الهداج الي .. بشنو اشكرج… على وگفتج وياي ومساندتج الي وماعفتيني ورحتي وضليتي ببيتي منتظرتني .. لو على دهائج الخلصني منها .. واخوانج هم وگفتهم وياي ماانساها ماقصروا وجنهم اخوتي من صدگ اني عمامي اخوه ابوي سمعوا ومااجوني رغم خابرت عمتي وهي مخابرتهم .. "
رديت ..
" لاتگول هيج حبيبي .. اني مامجبورة هذا واجبي لان انت رجلي وحبيبي وابو بيتي واعرف مستحيل تسوي هيج شي وسبق وان گلتلك الضوجني لان مااخذت بكلامي وانقلت بساع والا اني مصدگتك من البداية ..
واما اخواني فهم اخوانك ومامجبورين هم .. وانت وگفت وياهم كلهم وكت شدتهم وماقصرت عنهم .. فتحت بيتك وشغلك وعرضت حياتك للخطر كم مرة علمودهم فأبد لاتخلي رسميات بينكم وتصرفوا هيج مثل الاخوة ..
خليكم سند البعض .. انت ورضوان ودرع وفيصل وحتى اركان "
رد ..
" وهسا بعد ما ظهرت الحقيقة استحق الحضنه "
ابتسمت وحضنته وعشنا ليلة حلوة بعيدا عن كل الضوضاء المرينا بي ..
للعصر خابرت امي گالت عشاكم يمنا ..
بدلنا ورحنا كلنا ..
ساعدت البنات بالعشا ..
واحنه گاعدين مجموعين ..
حجة اركان ..
" مادام كلنا گاعدين .. وانحلت شغلة علي لان ردت اگلكم من زمان وصارت شغله علي واجلتها "
امي عافت الاكل وعينها عليه وملامحها تغيرت وجن گلبها حسها ..
سأل رضوان ..
" خير گول شصاير بس لا رجعوا هددوك "
هز راسه ..
" اليهدد يعرف مكاني وجن متابعني .. قبل كم يوم طلعت فاطمة من الصبح ولگت نفس الورقة والكتابة والطلقه وجابتهن الي خايفه ووصيتها ماتحجي ابد "
ردت امي ..
" يمه اسم الله اگول دومها ضايجة واسألها تگلي مابيه شي .. ماتضل هنا تمشي وي خوالك لديالى هناك محد يعرف مكانك "
كلها ايدت كلام امي واولهم رضوان ..
رد اركان ..
" اني المبقيني هنا امي وانتو لان لگيتكم بعد عمر . بس شفت انه مامقسوملي اعيش حياتي هنا .. واني اصلا ماگدرت اتأقلم بحياتي هنا .. والعراق صرت احسه يخنگني يوم عن يوم يخليني اكره وجودي بي .. اريد استقر وارتاح بعيد عن هنا .. لان حياتي هنا اما تنتهي بالموت على ايديهم .. او اعيش عمري مامرتاح .. "
سألني خالي ..
" والغربة عبالك راح ترتاح "
رديت ..
" احجي بدون زعل ؟؟ اني اصلا عايش بغربة لسا ماتعودت على حياتي ولا راح اتعود .. لاتزعلون مني احب امي واريدكم بس بداخلي شي يبعدني عنكم ..
اني رتبت اموري كلها وراح اطلع حتى البيت عرضته للبيع هو والاثاث البي .. "
ضحك درع ..
" توني بديت اثق بيك واگول اخوي بس انت مصر تخليني مااثق .. مو جديدة عليك "
رد اركان ..
" وانت شنو فرقك عني مو بحجة شغلك رحت البغداد وعفتنا .. اصلا انت جابر نفسك علمود تعيش بمكان غير الحياة الجنت عايشها .. الوحيد اليگدر يتأقلم هو رضوان لان عايش هنا ومتعود "
رد درع ..
" توهم نفسك اني مو مثلك ولك اني صح اداوم ببغداد بس اجازف بالطريق واجي كل اسبوع علمود انام بحضنها وبس اسوي نقلي انقل ومااعوفها ابد بس انت راح تعوفها نهائي "
صاروا يتناگرون ..
صاح بيهم رضوان ..
" كافي راعوا وجودها بينا شوفوها شلون تعاين عليكم وتبجي هي ماصدگت رجعتوا الحضنها تردون تعوفوها ؟ .. حرام انتو ولد مرمر الضحت وبجت وعمت عيونها عليكم "
رديت ..
" وليش تحجي .. خلي اليروح يروح مرمر ماتجبر واحد يصير ابنها بالگوة .. الابن هو اليضحي علمود ماتنزل دمعة امه مو العكس.. من صغرنا واني وياها بس والحد مااموت مااعوفها گمت حضنتها "
گام رضوان حضنها هم ..
" واني للموت مااعوفج موتي بحضنج انت "
ردت ..
" اسم الله يومي قبل يومك "
گام درع ..
" واني هم مااعوفج وراح اسوي كلشي واجي يمج صح مااتأقلمت وردت اروح اعيش ببغداد بس من بعدت عنج صرت اشتاقلج وافز بالليل ملهوف عليج وانتظر الخميس شوكت يجي علمود اجي لهنا وادحك بيج واشبع منج "
حضنتنا وتبجي ..
عاينت على اركان ..
اتقرب منها وقرفص گدامها ..
" جنت استعر منج لان يگلولج فصلية ومااريدج تصيرين امي .. بس من انغدرت من اهلي محد حسسني بالامان غيرج محد احتواني غيرج .. بحضنج عرفت شنو ريحة الام .. وريحتج ماانساها ابد .. بس العراق بي ذكريات توجعني حيل مااتحملها .. خليني اتغرب واتعذب واضوگ المر بلكي هالشي ينسيني وارجعلج بيوم من الايام بأرادتي وگلبي مرتاح ومطمأن وانام بحضنج واني ابنج مو ابن بثينة ومنهل وتربيتهم .. "
ردت ..
" اهم شي عندي ترتاحون واذا هالشي يريحك روح اطلع .. بس لاتگطع عني بمخابرتك خليني اسمع صوتك واخبارك .. بس اوعدني ترجعلي بيوم وماتخليني بحسرتك "
هز راسه وباس ايديها وراسها ..
قرر يطلع وحده بالاول وبعدين يسحب نورا ..
سألته امي ..
" وفاطمة ؟"
عاينت فاطمة بحزن ..
رد ..
" ما اريد اظلمها وياي اذا تريد ترجع الاهلها خليها ترجع واعدادها وغايبها كله يوصلها مثل مااتفقنا "
#يتبع
( شمس السعدي )