في ضريح العشق حمامة،،،
البارت الحادي عشر،،،
وئام الشيخلي،،،
اسعد الله أوقاتكم حبايب قلبي ❤️
،،،،،،،،،،،،،،،،
اجعل في أيّامك مجموعة من الصور الجميلة لهذا الإنسان الذي سكن قلبك يوماً .. ملامحه وبريق عينيه الحزين .. ابتسامته في لحظة صفاء، ووحشته في لحظه ضيق .. والأمل الذي كبر بينكما يوماً وترعرع حتّى وإن كان قد ذبل ومات.
،،،،،،،،،،،،،،،،،،،،،،،،
مرات من نسمع كلام عن شخص نرسم صوره بداخلنه عنه من خلال هذا الكلام لكن من نشوفه بالواقع كلشي يتغير..
انصدمت من اتكلم الرجال وسأل عن محمد ياله عرفت هذا ابو محمد..
تكطعت قهر ياربي شصاير بحاله..
من سألني عن بيت محمد علي أبو ياس..
بهتت رغم رديت اي عمو تفضل وفكري يودي و َيجيب ضل بالي على محمد لايكون بي شي..
ركزت كلش ياله تذكرت هذا ابو محمد ماعرفته بالبدايه......
أني شفته مره وحده بس بيوم العقد.. ورغم قبلها اجو على اهلي مشيه أكثر من مره بس ماشفتة ولاشافني.. ...
بس جان رجال قوي وبحيله واذكره شكد فرحان بيومها.. ويكول فرحتي ماانطيها لأحد احس ملكت كل العراق.. وبيومها قرر يصير العرس محمد واخو بيوم واحد.. وبعد ماسلم عليه وباس راسي وباركلي.. ...
رجع على ام محمد باس رأسها وكالها وهاي اني وفيت بوعدي الكم.. والرادها صارت الة.......
خالتي ترد ماقصرت الله لايحرمنا منك..
يربي شلون قهر الله لايوفق الفرقكم..
باوعتله بقهر.. عمو محتاج شي.. عيونه حمر مغرغره دمع.....
خله ايده على رأس أنس وكال هذا ياس لو اخو.. رديته لا هذا أنس وسحبت اوس وميس كتله سوا صارو.. وهو يصلي على النبي وآله عليهم الصلاه والسلام.....
كتله وهاي إيناس وتومها راح وي خالتي لبيت ليلى.. يااللهي جر حسره تكسر باب الگلب.....
وقربت مسك وكتله هاي اختهم الصغيره.....
دنك عليهم بوسهم..
واني كلت الهم هذا جدو وهم ضلو صافنين اول مره يشوفونه.....
بقا ساكت واحس الكلام يجرح بزردومه..
ملامحمه تعبانه دماراته باينه ....
سألني شلونكم............. رديت بخير انت شلونك....
كال توقعت ماتعرفيني.. ولاتستقبليني..
ليلى كالت لاتعب روحك لامحمد ولاامي ليلى تقبل تستقبلك.....
وإني ادري ام محمد راحت على ليلى وطايره روحي اريد اشوف ضنا محمد.. ودموعه نزلت واني سبقته بالبجي واحس شهكه صارت بصدري.....
كال صار سنين مشتاڪ الهم اجيت مرات ومرات والحمدلله الله كتبلي شوفتهم وراد يمشي.....
صحت لحضه عمو اجيبلك ماي.. وهو بس رفع ايده بمعنى مايريد ومشا.. وإني دخلت اركض للبيت وجبت ماي ورجعت هو ماشي بيتين عن بيتنا كلت أنس صيح جدو.. ومن صاح التفت اله.....
ونطيت لانس الماي لحد ماوصله نص الماي اتبده ثنا ركبه وشرب الماي ولزم وجه أنس باثنين ايديه ويتمعن بي بوسه ولزم ايده وجهه على جهه بيتنا وراح..
من دخلت للبيت لزمتني نوبه بكاء وانهيار.....
ياربي اني شسويت والله مبين تعبان ومكسور معقوله يكون راضي على تصرف ابنه مستحيييل هالشي مستحيل..
حتى لو نفرض راضي أو ماله سلطه كلمن اخذ جزاته.......
زين واني شلون بيه..... ومحمد موصي من يوم زواجي...... وكال عن ابوه صفحه بحياتهم انطوت.......
وشروحو الي بوقتها بشكل مختصر عن المشكله......
وافتهمت هو جايب شيوخ وجاي لخوال محمد يترجاهم.. حتى يرجعون محمد وأمه وهو راضي بكل شرط وطلب يطلبونه......
وخوال محمد طلبو من ابو محمد يطلك وينهي كلشي لان هم متفقين وياه إذا تاذت اختهم ينتهي كلشي وهالمره وصلت حدها.....
دماغي تشوش وصرت اربط الأحداث الي ماافهم منها إلا مختصر.....
وافكر بمحمد شكد عصبي ومايتفاهم.
سبحان الخالقه.. شكد حنين وكلبه طيب.. ومن يتعصب لا ابد مو هو شخص ثاني.......
وعصيبتة بأشياء مالي ذنب بيها يكلب عاليها واطيها ولازم اسكت وانتظر يهدأ..
وذاك الوكت يحس بالي سواه.. وعود يتذكر يسجل موقف الي على تحملي كلامه و َعصبيته....
ـ
بس هالمرة غيير.. هالمرة يعتبر منبهني وخاصه بالفتره الي بقينا يم اهلي ومحمد بالجبهة....
وهو جاي و سائل عنه يم الجوارين واجه ابن بيت هادي..
وعلى الوصف خالتي أكدت هو......
ومن كالت لمحمد من رجع بعد انتهاء الحرب.. كان كلامهم.. هسه اتذكر هسه اتندم هسه حس بنفسه خسرنا........
نسا من ردت اخذ ليلى وهي تصرخ وراي ضاربيها كدامه منتهيه... ومنعني اخذها..
و كتله تحلم تشوفنا بعد ليوم القيامه لو تخليني اخذها ..
رد علية يكلي هي مو اختك حتى تأخذها اخوانها مايقبلون.....
وينه من احتاجيته يوكف وياي بكلمه ويأيد كلامي ويكول غدروني اخوي وخاله وبمساعدته هو... نسا يعني معقوله......
بسببب هالموقف انخلق مني انسان ثاني محطم مكسور عصبي...
كلمه منه جانت تكفي....
لسه جروح كلبي تنزف من غدرهم.....
للموت ماانسا الصار بيه ياريتني ميت ميت ولااااااا
مها ماڪمل ڪلامه ـ. وصار يفح من العصبيه ـ
ام محمد..... شوكت ضربو ليلى وردت تجيبها...
محمد... ترا متعصب وحجيت... اقصد من رادت تعيش ويانا وماقبلووو... لاتساليني بعد دخيل ربج والموضوع سدووو ابوي مات ماااات وخلص..
مها... بيومها حسيت هواي أشياء ضامها محمد حتى عن خالتي ومن حاولت تفهم منه تعصب أكثر....
هاي غير الغموض المحاوطه صار من. انتهت الحرب. لليوم متاڪده اڪو مشڪلة ويڪول صديقي عنده مشڪلةـ
وغير هالمره قبل لايلتحق بيوم ايده بالڪوه يحرڪها سياره ضاربه السياره مالت. خاله وهمه بيها وڪال لاتڪولين
لامي. وهو اني بالڪوه عرفت منه لان صخن وايده بها زراك.
واني هسه ضليت بحيره من أمري..
و خابرت لأهلي ردت ابوي جاوبني سامي كال بيج شي احجي رديته بس محتاجه أبويه......
مااعرف شكد مر من الوقت وابويه اجاني ملهوف وخايف عليه..
شبيج يبعد عيون ابوج......
سولفت إله كلشي بس گلبي متگطع قهر احجي وأبجي على حاله وكسرته وحزنة ومبين شكد مهموم ومهضوم لان محروم من ريحه احفاده.....
و منضره مايروح من عيني ونضرته الهم
تحسه يريد يملي نضره من شوفتهم..
صح مره وحده شفته بس صورته أبالي مو ست سنوات تحسه كبران لااااا... عشرين سنه وقليل.....
اباوع لأبوي بس يهز راسه من احجي ويسمع لكلامي بااصغاء......
احجي بقهر احس تشنجت اضم جفوف ايدي وافتحهن واكرر هالشي......
وابوي كام لحيله وراح جاب الي ماي شربني.. وصب شوي بجفوف ايده واني مركزه بي وبايده الي صار واضح بيها تجاعيد الزمن وتعب السنين.. والي كل مسامه بيها أغلى من روحي..
غسل وجهي ويقرأ (ألم نشرح لك صدرك....)......
وسألني شناويه بنيتي.. حتى اساعدج بي.
رديت مااكول الهم احجي اني وهو مركز بيه..
سألني بكل هدوء ليش هذا قرار؟؟؟ .
فهمته وكتله هو متيقن منهم مايقبلون افتح الة الباب وكال ليلى كالت مستحيل يقبلون..
وتدري منبهين عليه..
فاكيد مراح يكول شفتهم ولايوصل الموضوع لمحمد....
حسيت ابوي كلش مامقتنع بكلامي ولا دخل عقلة..
باوعلي بنضره وابتسم بوجهي..
وادري راح يقنعني بكلامه و َحكمته.
و مستند بكلامه لحديث الرسول صلى الله عليه وآله وسلم..
لو أقوال الائمه عليهم السلام..
وخاصه أقوال الإمام علي عليه السلام.. بكل موضوع واستشهد النا بأقواله..
لو مواقف الصالحين..
سألني مقتنعه برايج..
كتله ماادري.....
ابو نجم.... محمد عصبي وبنفس الوقت هو طيب گلب وغيور وكل الصفات الحلوه بي.. بس عصبيته وتهوره زايده عن حدها...... وهو حقه مر بصرف صعب....
والله جل وعلا ماخلق كل الناس بنفس الصفات..
ويجوز الصفه المانحبها بشخص بيها خير النا بغير أمور( وعسى أن تكرهو شيئاً ويجعل الله فيه خيرا كثيرا).....
لنفرض اوافقج على رايج..
انتي راح تكونين مرتاحه من يصير كلام ابينكم وهو يباوع لعيونج وانتي تعرفي شكد لماح(فطن وذكي)......
زين انتي راح تحسين بنفسج مرتاحه وانتي ضامه عنه.....
َشي آخر.. محمد من وگع بشده سوا المستحيل گدام عمامي. حتى يثبت الهم والنا كلنا هو رجال وگد كلمته.......
وأخذ مره لازم تصون بيته وتحفظه بغيبته وحظوره..
ليش اني ماادري انتي ماتتحملين من يتعصب.. بس ادري بالمقابل انتي شنو بالنسبه الة واطمأن......
وبوكت الي هو بأمس الحاجه لايد تنمد اله وتساعده.. هو ثبت نفسه للكل وركض اليل والنهار لخاطر انتي ترتاحين وماتعانين.....
. يصير بالمقابل تضمين عنه وتدرين هو يجن جنونه من هذا الشي......
قبل لايلتحق مثل اليعاتب انتي ماكايله اله من رجلج انرضت وتعورت بيوم جيه عباس . وشلون سكرج هابط بيومها......
ومن كتله انت اجيت ورا هالشي بأسبوع وانت تعبان مارادت تغثك.. يردني بس هسه انغثيت أكثر......
محمد بي هواي من ياسر يعيش بكد ترابه..
اخذي روحه بس لاتخالفين أمره.....
مها.. يعني اني هسه ماحفظته بغيبته..
ابو نجم....... لابنيتي صله الرحم معلقه بعرش الرحمن..
بس بقرارج من ناويه تضمين علي....
مها.. تدري شنو راح يسوي.. والله هي أشياء مالي ذنب بيها من يتعصب لحد مايهدئ كلبي يصير بي خفقان..
ابو نجم.. سلامه كلبج بنيتي....
مها.. فدوه لعينك ابد مااقتنع بغير حل فدوه والله مابيه حيل عصبيته وكلبي يوجعني....
سكت ولزم لحيته البيضه المليانه وقار.. وزفر واستغفر..
ابو نجم... بس اذكرج بالغلام الي تابت على ايده عصابه من قطاع الطرق...
لان حفظ عهد قطعه وي أمه على أن مايكذب....
شنو العهد بنيتي... اذكرج لو نسيتي...
مها... النجاه في الصدق...
ابو نجم.... أي النجاه في الصدق.... بيها أسرار عظيمه...
مها.. يعني اخبره بالموضوع.. زين ورده فعله وهو منبه .. اكيد يكولي شي بيني وبين أبويه..
ابو نجم.. يحلها العينه ماتنام.. وخلي ابالج النجاه في الصدق وعلميها لاولادج.
اطمانيت اشوي.. سألته. وخالتي.
ابو نجم.. اني باقي يمج لحد ماترجع وان شاء الله خير.....
وكفت حتى اسويله جاي هسه ياله تذكرت..
ماقبل كال اريد اقلل جاي اسعد يكول وقايه خير من العلاج.....
مها.... اسعد لو يصير طبيب أعشاب احسن دوم ينطي بدائل عن العلاج أكول اله راسي يوجعني يكلي شربي ماي هواي واتركي التفكير.......
.أمي بهيه تكوله مفاصلي توجعني يكولها مو كلت اخذي كل يوم قبل العشا ربع كوب سمسم وي كوب زبادي..
ابو نجم.. وليدي بعد هو ادرى بعلمه.....
ابو نجم.... وهسه كلشي مااريد سولفيلي مشتاك لسوالفج...
حجينا بأمور وكلامه كان نصايح وحكم.. يقويني ويشجعني بيها......
.تعيني على أيامي لان فعلا احس مسؤوليتي جبيره ومن اقارن وي إلى بعمري.....
وكمل كلامه عن فاطمه الزهراء البتول عليها السلام وهي بنت سيد البشر صلى الله عليه وآله وسلم..
وزوجه الإمام علي عليه السلام.
من بأحد الغزوات جابو سبايا (جواري) وطلبت من الرسول صلى الله عليه وآله وسلم.. جاريه تساعدها بأعمال البيت وكانت ايدها الشريفه تشققت من الطحن بالرحا..، فقال: والله لا أعطيك جارية : أدلك على ما هو أفضل من خادم: تسبحين الله عند النوم ثلاثا وثلاثين، وتحمدين الله عند النوم ثلاثا وثلاثين، وتكبيرينه عند النوم أربعا وثلاثين، فهذا خير لك من خادم، فقالت فاطمة: فعملت بهذا فما وجدت تعبًا بعد ذلك......
شكد جنت محتاجه هالكلام انمليت راحة واطمئنان... لأن احس نفسي تعبت وخاصه من يلتحق محمد اليوم يصير بسنه وكلشي يختلف عليه.. ومسؤوليتي تكثر.. اكو ايام من يتمرضون أطفالي الدنيا تطلع من عيني.. واستغفر الله اكول لو مامتزوجه جان هسه أهم شي عندي دراستي وماكو هم أكبر ومسؤوليه......
. وإني بعدني كاعده وذكرت بيوم عقدت وصارت كعده بسيطه أبيت اهلي.. وهم طايرين من الفرح وجارات امي علكن الجو بالهلاهل والهوسات تكابلن هنه وأم محمد.. وعمه محمد ..ابد ماانسا ذاك اليوم. اليشوف جارات امي يكول العقد لضناهن..
وجان مكمل بيته بالنجف باقي بس أثاث البيت.
وكالو بس يكمل معامله مالت الزواج لان ضابط والمعامله تطول من ٥اشهر إلى ٦اشهر.. وبعض الحالات مايوافقون عليها يضطر يفسخ.. آنخطـبت نهايه شهر السابع...
بيومها باليل اكل كلبي التفكير شلون افارك أبويه..شلون مااحسبها مااتحمل.. رغم من شفتهم وفرحتهم بيه وكلام محمد وياي ولهفته عليه صدك فرحت..
بس للصبح رحت لأبوي وكتله بطلت مااتزوج....
ودايم من يتعصب محمد واضوج يكلي عادي ضوجي شوي.. شفت أهل اهلي ياله صرتي الي.. نذرت نذور وسهرت ليالي.. وبس مجرد التفكير ماتصيرين الي.. لو اضوجج عشر سنين ماتعادلها....
هاي غير عذابي بالخطوبه اجي من ضيم العسڪريه والحرب وانتي حتى بالكوه تجين تسلمين مره وحده ڪلتي احبڪ وبالتلفون بعد ماساعه احجي وياج ...
وبستج مره وحده وردتي تخربين .
مايدري اني بيوم اليجي اصخن من ڪثر مااستحي من اهلي ...
رجعت لواقعي...وكمت غسلت وجهي واتعوذت من الشيطان الرجيم.. ...
وتمشيت الهم بالحديقة.. وشلون محوطين يمه وهو فرحان بيهم..
وشكد يحب خلفه البنات يكول الرسول صلى الله عليه وآله وسلم يكول..
" لا تَكْرَهوا البَناتِ ، فإنَّهنَّ المُؤْنِساتُ الغالياتُ " ...
كعدنا ننتظر خالتي غوربت الدنيا وهي مااجت..
كعدنا بالحديقة ننتظر... واجت خالتي هي وإلياس وجايبه وياها لجين.. تكول نكزت تبجي.. واتاخرنا بسببها ردناها بس ترجع ماكو.. نطيتها فلوس قنعت مافاد انوب فحمت من البجي.....
وهي فدوه لعينها ركضت على انوسه مامصدكه. وانوسه تكولها هلا هلا بعد لاترحين عليهم صيري اختي....
خالتي فرشت عبايتها وكعدت تكول عذبتني لجين وانوب ضل بالي يمج..
جبت الها ماي تشرب..
وكابلتها سألتها على ليلى.
ردت.. تحت رحمه الله.. على العلاج والله كريم....
وخالتي تحجي وي ابوي على البناء وتستشيرة تريد تبيع عدها ذهب ودايم ينطيها محمد مصرف خاص الها.. يكول خاف بنفسج شي مصرفج عندج.. واني قبلها كلت الها على الفلوس العندي وبالكوه اقتنعت..
وابوي شجع الفكره وادري هو يلح على محمد يبني ويريد يساعدنا بس محمد مستحيل يقبل..
عاد اتفقت وياه نبني الاستقبال بس والغرفه ومجمع درج بعدين..
ماقبل كالها كل يوم عمال ومتبهذلين..
فهمته فلوسنه ماتكفي.. كالها اني اكملهن واعتبرو دين.....
وكال مشتري القطعه البصفهم.. ويريد يسوي نصها بستان ونص للولد.. وكال احتمال أرشد هم ياخذ قريب منهم بس ماله نيه يرجع نهائي يجي زيارات ويرجع......
واني متوتره اريد افتح الموضوع وابالع بريجي والكلام صعب يطلع مني..
بالكوه دبرت وكلت الها.....
ضلت ماتعرف شتكول واحس بحيرتها..
أني من كثر ماحايره بامري بجيت.. وخطيه تخبلت كالت انتي شذنبج..
ماعليج اني أكله الجهال ملگوفين فتحو الباب قبلها وهي مالحكت عليهم..
حايره بامري وهي وابوي تناقشو..
و فهمته ماكو طريق رجعه..
بس كلامها يمكن تهداني أو تطيب خاطري لان التوتر واضح عليه..
ومن كالها جم مره جاي لاخوتج وجايب ناس ويريد رضاكم..
ردته.. اخوتي هم مايرضون نرد عليهم.. ويكولون كلمن بدربه.. وحتى دعوه طلاك رفعو بس هو معند وصارت الضروف وما تبعو وراها.....
.
كال أن شالله خير..
ترخص ابوي وطلع..
واني التهيت وي أطفالي ولجين شلت همها اخاف تشد علينا بالليل تريد امها لو ابوها.. تبين لحد ماكامت تغفي اتصلو وخالتي حجت وياهم ورادوها تحجي ماقبلت نيمتها وفرشت الي قريب منها خفت عليها تصحا باليل وتبجي .....
مددت بفراشي وعيوني عبالك راشه بيهن ملح النوم جافاهن.. وخالتي نفس حالتي.....
اكول معقول ماتحن علي وهو مبين كلش متاذي عليهم..
وهي هم كلش حنينه من يوم تزوجت لليوم عاملتني مثل بنتها وأكثر.. ودايم تكول الله حرمني من بنتي وعوضني بيج.......
الكلام عن ابو محمد من ينذكر بينها وبين محمد ماينذكر كدامي بس بينهم لذلك ماأحب اتصنت على شي يخصهم..
ومرات من اسأل محمد ينطيني جواب مختصر بمعنى لاتسالين..
أريد الفجر يطلع الليل صار شطوله عليه
من محمد موجود ماانحس بالوقت الا وأذن الفجر..
وهسه اريد الوقت يمشي ماكو..
ياترا هم يشتاقلي مثل مااني مشتاقه الة..
كعدت مسك ورضعتها وفتحت مهادها وخليتها تلعب اباوع الها واتذكر شكد يوصيني عليها ويخاف عليها .. وإني مكابلتها واسبح تسابيح واستغفار إلى أن اذن الفجر حسيت خالتي مثلي مانامت..
سألتها يمه مانمتي..
ردت لاوالله ياامي..
توضينا وصلينا وكعدنا كل وحده لازمه مصحف وتقرأ قرآن..
من كملت دعت لمحمد تقهر واحسها مهضومه ومتيقنه منها تعز ابو محمد لان وضعها اليوم أكبر دليل. ولكمة ماخلت بحلكها ولاني الي نفس. ودايم اسمعها تتحسب على الفرقهم......
جبرت روحي انام بالكوه.. سمعت منبه الساعة.طفيته اتعجبت خالتي نايمه كل يوم هيج هي كاعده.. طفيته وبقيت بمكاني.. من سمعت الهورن مالت الخط لبست حجابي وعبايه خالتي فوك ملابسي وطلعت كلت الهم مااروح.. وخلود وريتا نزلن من السياره يسألني ضاجن علمودي.....
كالن بيج شي.. اتعذرت بلجين واخاف عليها..
ردت خلود كالت اكلج هي خالتج يوميه كلهم يمها هي على النفر الزايد ماتكدرله..
صعدت ولوحت بيدها.. رفعت ايدي الها ودخلت نمت.......
صحيت على صوتها فتحت عيوني بتعب.. كالت يمه ماضل وكت عليج هسه الخط راح......
رديت ادري من اجه طلعت عليهم وخبرتهم مااداوم اليوم.. مارضت عليه وكالت تفوتج دروس..
قنعتها ماعندي شي......
و اباوع الها كلش مايعجبني وضعها الله يعينها مو سهل الموضوع عشره عمره بينهم.......
دك التلفون ورحت رديت ابو لجين سألني عليها وكال جاي اخذها....
رجعت كلت الها بابا راح يجي ياخذج أشو هي لزمت بأيد إيناس قوي تكلها مو كلتي اختي بعد مااروح.. وميس تردها لاتروحين ماعندهم اخت.....
نص ساعه واجه ابوها.بس سمعت صوته ركضت لغرفتي وبناتي وياها.....
خالتي رادته يدخل كعدو بالهول لحد ماقدمت ماي وخليت الجاي احميه.
خالتي لحت علي متريك هو رد مالي نفس والله بس جاي إذا مو زحمه..
حضرت جاي وكيك....
ورجعت على المطبخ لميت المواعين..
وأجاني اوس كال عمو يريد لجونه يروح....
رحت الغرفه وايناس وميس ساندات ضهرهن لباب الكنتور.. عرفت لجونه بالكنتور.. شلون خطط بالله.....
ومحمد يكلي ابليس يتعلم منج.. ليش مايتعلم من بناتك......
وخالتي تصيح ياله يمه ابوج يكول عنده دوام ضهري وبعد مايلحك....
ولا هي تقبل تطلع من الكنتور ولابناتي يقبلن تطلع.....
بالكوه فتحته خفت تختنك وهي متربعه وكاعده ولايمها.....
ونكزت تبجي تكول مااروح..
وابوها يقنع يحاول ماكو قافله.. كال امها تبجي عليها.....
خابرها من يمنا وكالها ماتقبل.. ردته عوفها كم يوم.. اتفاجأ كالها كم يوم مو باليل خبصتيني.كالت خطيه لان ما وياها أطفال لاانوب يصير بيها توحد گول لأمي إذا بجت يخابرونه.....
رد مااتوقع تبجي علينا..
وخالتي قنعته تدير بالها عليها وخطيه تلعب وي البنات.. وهي بعدها تبجي ولازمه ايد انوسه وتكول مااروح..
من راد يطلع ابوها وصاها تصير عاقله وماتطلع بالشارع..
ومن طلع هي ماصدكت سكتت من البجي وتلوح بايدها تكله بيباي ..
قررت خالتي تبيع الذهب بقت قطعتين حجل وكردان... وعلى أساس تروح العصر هي وأم حسام... لأن كلش، تعرف بالذهب.. وهم تاخذ ملابس الجين...
خابرت ام حسام.. وكالت العصر ان شالله أشو منو يجيبني عليكم ونروح اني وخالتج.. ولو دايخه لان نسلم درجات واسئله ودوخته المدرسه حتى اليوم ماداومت اكملهن . رديتها خير ان شاء الله......
أخذت لجونه سبحتها ولبستها من ميوسه هالمره ماحجت ام عطوب صارن صديقات هنه بينهم شهرين تقريبا..
واجتنا مائده جارتنا تريد اخيط الجهاز مالت اختها زاهده ملابس بيت وشراشف للتخت....
وضليت متردده لان احس بعدني مبتدئة.. والفتره الراحت كنت اخيط بس شراشف لان بسيطه والبردات بس اخلي بيها حلقات وفيونكات. وكل عقلي بملابس الأطفال اتعلمت اخيط لبناتي وشوي شوي اتقنته....
رديتها اخاف مايعجبها..
ردت بالعكس.. حتى عيالها سألو على البردات وشراشف القنفات كلش حلوه..
قنعتني اخيط الها من كلشي قطعه وتشوفه إذا اقتنعت اخيط باقي الجهاز.
.
من طلعت خالتي كالت على كلبي راح تخيطين اني من اشوف تسهرين على الجهال انقهر عليج ولو اني بعمرج هم عندي محمد بعمر إلياس.. بس جيل عن جيل يختلف..
رديت ميخالف يمه قوي جرئتي خلي اتعلم هم تفيدنا مصرف وهم تفيد لبيتي وأطفالي.....
واني هم اشبع قهر من اشوف محمد عيونه رايحه بسجلات الحسابات من ينزل.. وهاي غير الحسابات الجديده الماخذها بمحلات الشورجه.....
لوما البناء والضروف الصارت راتب محمد خير من الله..
ردت الله كريم الله يعوضكم وان يوفقكم دنيا وآخره....
للضهر اتصلت ريتا گالت بالي يمج وبعدني بملابس الدوام واتصلت. عليج نزل جدول امتحانات ودرجات السعي كلها بلوحه الإعلانات ودرجاتنا ثلاثتنه زينه.. حجينا شوي واتشكرت منها.....
وللعصر اجتني خلود وامها فدوه لعينها.. والله حمدت ربي وشكرته من شفتهن..
ياربي شلون نعم حلوه رب العالمين منعم عليه.....
ام حسين تعرف كلشي عن أهل محمد لان أقاربها نفس منطقتهم..
من عمتي سولفت الها انقهرت وكالت والله ما يستاهل حجي علي هيج يصير بحاله حسبي الله ونعم الوكيل على الفرقكم......
واني وخلود سحلتها وياي للمطبخ نحضر ضيافه ونسولف. سولفنا كل المواضيع..عن البيت و فكرتي بالخياطه........
. شجعتني وكالت اليوم وحده من بنات الرابع مسولفه الهم من متطلبات العملي وي بحث التخرج خياطه ستره نسائية.. وهواي بنات مامدبريها.. بس شهلاء يمكن ماخذه امتياز بيها.....
رديتها حلو والله وشهلاء داخله القسم برغبه ماشاءالله كل سنه من الأوائل.....
وبعدين قلبنه الموضوع عن ابوها وابو أمير......
وهم كالت ابوها قافل على زوج خالتها وهو يريده يعتذر منه.....
وهذا المسكين كان أسير حرب ورجع الهم من مرض لمرض.. الله يشفي ويعافي و يكول لو يموت مااعتذر....
صاير بينهم موقف مره وابو أمير متجاوز على ابو حسين.....
انقهرت والله الحروب دمرت عوائل وبس الله يعلم شنو بعد مضموم النا....
حجيت بقهر كلت هسه الحرب وانتهت مااعرف شنو الفائده من العساكر دوامهم بغير محافظات.....
وهي ردت يااااااا هسه عرفت شبيج واني سحلت امي واجيتكم..
كفختها وين راح بالج.. بس والله تعبت تدرين والله أطفالي مرات باليوم يسألون علي مرتين وينه لو شوكت يجي من السوك ابالهم هاي الأسابيع كلها بالسوك....
خلود... والله حقج اتشاقه وياج..
بس مو انتي كايله لو ملازم لو مو لازم..
لطمت خدي ولج شوكت كلت.. والله ياريت كاتب بمدرسه حتى مو معلم.. اصلا اكره شي بحياتي هو هذا المجال.....
.
مو ذاك أرشد اتخرجو سويه محاسب بشركه يشتغل باختصاصه..ومستمر يكمل دراسات هناك....
وحتى هو ضايج منها كلش بس ماافصح عن رأيه الا من صارت مسك......
ضحكت كالت والله حقه..
سألتني ام حسين....
ليش عيونج غايره ورموشج مفتوله.. رديتها ماادري والله..
انطتني من جيبها جكليت كالت مزورته الائمه عليهم السلام .. ناخيه الله وبحق شهيد كربلاء وجاهه عد رب العالمين يبرد كلبج يايمه..
رديتها امين يارب العالمين..
اجت ام حسام وهيام جايبهم سامي حتى ياخذون خالتي تبيع الذهب للصايغ.
ولحيت على خلود وامها يبقَن.. بس ام حسين كالت والله مابيه حيل لخاطر عيونج اجيت اليوم.....
طلعو للسوك واني رجعت للبيت اكمل الشغل.. وخليت أطفالي ولجين كبالي بالحديقة يلعبون بالمكعبات. وكعدت أقرا صارلي واهس لان درجاتي الحمدلله زينه وطبعا هواي الاستاذات مساعداتني باليوم.....
.. قريت محاضرات متفرقه من كل ماده.ومن كملت ولميتهن وصرت اخليهن بدرج واقفل عليهن بعد ماصار دفتر المحاضرات ضحية....
رجعت خالتي بايعة الذهب وكالت سعرة زين.. وجايبه ملابس وألعاب الجين ولاطفالي..وفدوه لجين فرحانه بيهن تكول الله....
ثاني دوامت بالجامعه عندي نقص محاضرات حتى استنسخ.. وخلود وريتا وياي جابو الي المحاضرات حتى استنسخ عليهن.....
من كملنا من الاستنساخ كعدنا بالكافتريا.
وريتا كالت اريد اخذ رايكم بفكرتي عاجبني اتعلم تزين عرايس كلش احب هالشي بس يحتاج دوره اطور نفسي.
شنو رايكم..
تناقشنا بالفكره َشجعناها.....
وبعدها تناقشنا على موضوع الخياطة وكلت الها اريد اجي على خالتج تعلمني أكثر حتى ابلش اخيط بس استحي.. ردت ريتا بالعكس والرب هي دايم تكول مها ذكيه وبسرعه تتعلم ومن كلت الها على فكرتج المستقبليه مالت التصميم
كالت راح تبدع بيها اكيد.....
مها...... اي والله فكره تصميم ازياء وكوشات أعراس ومناسبات كلش مخليته أبالي.......
على الأقل ماصرت اعلاميه اصير مصممة ازياء وديكورات.....
ريتا.... اي والرب خالتي كالت كلش ترهم الها وشنو تحتاج اني اساعدها.. وفشلتني كالت احسن من أفكارج انتي وخلود سلبيات كلشي ماطلع منكم.. دايم اترزل منها تكولي اثبتي نفسج بمجالات الحياه مو بس الدراسه البنت لازم تثبت نفسها وتبدع بأكثر من مجال....
ردت خلود.. اني حاليا مجال إبداعي هو اخلص من توتو وأمه وبعدها.. مشاريعي كلها حاضره ومتوقفه على توقيعي..
وصدك نسيت ذاك اليوم اتفرج تلفزيون وشفت من خلص المسلسل مكتوب قام بتصميم الأزياء ألمها عبدلله العلي....
. بس كلت تشابه أسماء.. لو عيوني نضرهن تعب وصرت على گولة العجايز مااوجد دربي....
ولا تجوز من سوالفها والحلو تحجيهن بهدوء ولاتحسين هي تحجي من باب التحشيش.....
اتفقنا العصر انروح لكرستين وهي كالت اني هم اجي اتعلم..
كملت كل نواقص المحاضرات ورجعنا للبيت.. حجيت الخالتي على روحتي لبيت كرستين حتى اتعلم أكثر..
كالت انتي هسه دراستج والبيت واطفالج والصغيره ترضع ودايم متشنجه.. انوب تكسرين ضهرج على المكينه والخياط..
رديتها اني احب اتعلم..
ردت
على راحتج.....
رحنا على كرستين.....
و فهمتها مااريد اكلفها واستحي اجي وتعلمني..
ردت بالعكس اني احب أحد يتعلم مني ويثبت نفسه.. حتى احس بثمره تعبي.. لأن الطالبات مايسون واهس كل همهم يخلص الدرس.. وحتى الاداره مابقت لي واهس. ردت منهم نسوي معرض بأعمال يدويه بسيطه.. بالأشياء الزايده عن الحاجه.......
ماقبلت المديره وتكول حصار والناس مالاكيه تاكل.....
تزعليني منج إذا عدتي الكلام واتعذرتي.....
اصلا اني مااعرف شلون اقضي وقتي من ارجع من الدوام أنجيلا تروح العياده ويوسف للحلاقه واني امل من طول الوقت لو اقره جريده لو اطرز أو اعيد تصميم ملابس قديمه .
وبديت اسألها على الفصالات..
وهي علمتني هواي أمور وخاصه ملابس مناسبات....
هي محضره ميز طعام وعلي صحون فاكهه ومعجنات...
كرستين . ياله كومن ناكل حتى بعدها اعلمج شلون نغلف هاي الطاوله بقماش إذا عدنا مناسبه.....
ومن كملنا شالت الصحون وجابت مثل الحجاب مربع لونه ابيض، واطرافه كلها ورود صغار لون احمر خلته على الطاوله ومن الأطراف الاربعه قرصته بورد هي مسويته من قماش تول ساده احمر....
ومن نفس القماش غلفت علبه الجكليت.. وكارتون الكلينكس.. وجابت الكلوبات القديمه الي ماتشتغل فتحت القاعده وثبتت ورود صغار بفلين وخلته بالكلوبات وخلت بالقاعدة فيونكه..
طلع الميز كلش حلو......
كالت هذا التول الأحمر بدله ريتا من جانت صغيره.. سويت الها اعاده تدوير.....
وبعد بدله امها مالت العرس شلون محتفظه بيها واني ناويه عليها نيه بعدين اكول الكم.....
وشوي شرحت على تنسيق الألوان..
سألتها راح ندرس هالشي بالرابع..
ردت لاحبي هاي المعلومات من الكتب ومجلات اجنبيه..
وشرحت طريقه البتيفور هي مسويته وشكرلمه.. وحلاوه الراشي..
طلعنا الدنيا مغرب...
وصلنا البيت وبعدنا بالباب وصوت التليفون يرن.. إلياس راح يركض رد طلعت عمته تسال عن لجونه توقعتها حنت على امها وهم تكول ماأجي..
حجيت وياها سألتني ماتبجي ولامضوجتكم..
رديتها ابد والله ورده..
ردت وانتي دوام واطفالج..
رديت ...
يمعوده خالتي موجوده وحالها حال أطفالي.. وصتني عليها هواي.. .....
ثاني كعدت من وكت عدنا فتره مراجعه قبل الامتحانات.. طلعت للحوش غسلته ورشيت الأشجار شكد احب تغسلها واستنشق عطرها.. احس بروحي تنملي طاقه ايجابيه.. .....
كملت ودخلت للمطبخ وسويت لمسك عصير جزر هاي من ضمن نصايح كرستين البارحه كالت كلش مفيد الها بي فيتامين A.
شربت ونيمتها.. وكابلت المكينه خيطت النفنوف الفصلته الي كرستين.. من كملته كلش حلو طلع بس ياترا راح يعجبها لولا.. هي عدها شوي عوق بقدمها إثر حادث داهستها سياره من هي طفله.. وهسه تشتغل كاتبه بالمنظمه.. واتقدم الها واحد من أقاربهم من بعيد.. ومائده تكول امي هواي اشترطت عليهم واحنا ماصدكنا تجيها قسمه..بس ابوي ماقبل على سوالف امي تلح هواي .
صارلي واهس اكمل ثوب البيت مالتها.. كعدت فصلته وخيطته......
من كملت راويته لخالتي.. كالت كلش حلو عاشت ايدج بس لاتدزين عليهن هسه.. اخاف يصبنج بالعين.....
واتصلت عليه ريتا كالت ضايجه قريت شوي ومالي واهس.. احتمال أمر عليج..
رديت ياريت والله.....
للعصر مر عليه أبويه جايب مشمش وخوخ من البستان ومخضر وطماطه لونها أحمر كلشي وشكلها يشهي..
ردت يبقى كال مستعجل سألني عن وضعي.....
كلت الحمدلله على كلامك لازمه التسبيح والدعاء.. كال جيبي مسك مشتاك الها ولاخوانها........
اجو يركضون يصيحون جدو ولجين وياهم هم تكول جدو..
أبويه اتفاجأ كال عبالي راحت..
شالها وباسها يعيون جدج....
وأخذ مسك من أيدي تضحك اله..
وصاني على لجين هواي هواي..
و يكولي حطيها بعينج اليمنى..
رديت اكيد بدون ماتوصي وهي كلش محبوبه وامها تستاهل ماي العين.....
من طلع اتذكرت ذاك اليوم من محمد ماقبل اكل اجبان يكلي ماتشبع..
ويومها كليت طماطه..
عزلت المسواك..
وخالتي راحت تخبز واني طخ بعقلي اكلي باذنجان واحمس طماطه.. وعندي قوري قديم فافون خليت بي ماي وهيل ووديته لخالتي على الجمر.....
.
ورجعت خليت طبك (مصنوع من سعف النخل) خليته على المجمده واكلي واصف الصحون بالطبك.. عندي عجين خبز عروك وهم ركضت لخالتي حتى تخبز بتنور الطين.....
احجي وي نفسي اذا تشوفني خلود تكول مفجوعه لو عبالها اتنسى.....
واني من الصبح على كوب حليب مانفسي رادت.. ومحتفله بالإنجاز مالتي.. كون يعجبهن الخياط ومااتفشل..
وبيه واهس كل شوي اغسل ايدي وامسحها بطرف تشيرتي.. رغم الخاولي على كتفي..
رحت على خالتي اشيل وياها الخبز والجاي من ورا البيت......
ومن رجعت اشوف ريتا وياها كرستين.. إلياس فتح الهم الباب. وإني بجامه الأتراك وحده صاعده وحده نازله.. وشايله طبك الخبز على راسي يبووووووو الفشله......
وهن ضحكن.. وإني وجهي يطلع منه نار كثر مااستحيت.. وزين خالتي تهلي وتمرحب بيهن اني لساني انبلع.....
ريتا كالت والرب اموت على ريحه الخبز مالت خاله لو مو استحي يوميه اجيكم اخذ منكم.. وخالتي تردها والله ياريت انوب كل مااخبز ادزلج....
.
سلمت عليهم..
وركضت للمطبخ ذبيت طبك الخبز ورحت بدلت الأتراك صاير خريطه كثر ماامسح بي.....
.
بدلت نفنوف شوي جوه الركبه جوزي وبي طوبات بيجي....
وخالتي صاحت جيبي العصرونيه خلي ناكل سوا.. وإني استحي وفشلانه.....
اجتني ريتا كالت بالعكس منضر وريحه تفتح النفس......
روحي انتي يم خالتي كرستين ودزي خالتي ام محمد واطفالج ناكل بالمطبخ ولاتكولين بقو الي اكل.. لأن تعرفين بيه احب الاكل وي ألمه الچبيره وهوسه أطفال.....
أخذت استكاين الجاي وريتا شايله القوري والشكردان.....
كرستين كاعده وأطفالي يمها..
وخالتي كالت الها ابو مها جايب مخصر تازه من البستان شلون عصرونيه تلوك لحلج الحلو..
وهي ضحكت وعرفت اني استحي أقدمها.....
كرستين... اي ياريت ناكل ليش لا..
واني وريتا تكابلنا شلنا الطبگ.
من شافتني أشرت لأطفالي.. كالت شوفي مها نكعد كلنا ناكل....
اذا تحسبين الف حساب من اجي بعد مااجيكم..
گعدنا كلنا وصدك لمه حلوه .
الحلو بكرستين التواضع.. وإني مامرتاحه اكول أطفال بعدهم مايعرفون ياكلون عدل.. رغم اني وياهم وياهم كلشي معلمتهم.....
كالت عاشت ايدكم والله طعم ونكهه وريحه تجنن أكلت من كل كلبي..
و الجاي بعد أطيب رغم ماأحب الجاي.....
كلمنا وشافت الملابس أشرت بيدها اوكي..
كالت بدايه موفقه استمري.....
اذا عجبهم اخذي باقي الجهاز كملي.. بس نظمي وقتج. وراح اتعبين بالبدايه.....
علمتني شغلات ورسمت على ورق كصات. مالت ياخه.
ونضمت المكينه..
كالت دزي الهم خلي انشوف رأيهم إذا عجبهم وجابو باقي الجهاز اساعد اني..
انحرجت منها..
كتلها تعب عليج..
كرستين... اعرف بيج شكد منحرجه. اني عاجبني تتعلمين والرب من اشوف لهفتج افرح.. انتي راح تصيرين مثل المثل يكول صبي الأستاذ استاذ ونص....
. بدايتج حلوه اني اشجعج واساعدج..
من دزيت الملابس كلش، عاجبهن.. وجابوا اقمشه العروس وبردات وشراشف لعيالها حتى اخيطهن...
مرت الايام وبصعوبه رتبت وضعي بين الخياطه والامتحانات واتفقت وياهم شهر ياله اسلمهم كالو عادي....
بس كل مااكمل قطعه خياط يجبولي اقمشه... يمڪن راح اخيط ملابس العشيره مالتهم ــ
وهواي استفاديت من مجله كرستين بس قديمه..
و بيوم اني يم اهلي وخابر أرشد وحجينا وياهم وصيت عمتي عنيده كلت الها اتعلم عليها.. ردت بعيني..
ومن قرب نزول محمد شلت كل الملابس وضميتهن..
والمكينه ذبيت عليها شرشف.. هو ينزل كم يوم ومشلوع كلبه.. وانوب اني التهي بالخياط.
و بيوم اول امتحان آخر السنه رجعت من الامتحان الحمدلله مجاوبه.. وصلت من وكت دكيت الباب وهو فتحه ماصدكت والله فرحت.....
اريد احجي كلمه ضيعت الكلام حضنته مثل طفله مفاركه ابوها.....
وهو يكول صار ساعه بالباب كل شوي اكول هسه تجي....
مها.... لو ادري جان نطيت الدفتر بلا جواب......
محمد .. ليش غاليتي صايره كسلانه..
صدك مشتاقه لشوفته.. من القهر كتله ماتكولي شوكت تتسرح من العسكريه البارحه بيت ابو لطيف جابو جكليت ابوهم متسرح....
محمد.. عوفي التسريح شلون نظل واكفين يم الباب إلى أن اتسرح..
مشينا للبيت ويكلي واني عبالي انتي فرحانه وتحبين السلك العسكري وتردين اصير لواء ..
رديت ابد ابد ابد....
صدك خوش مفاجئة هاي ثاني مره تنزل قبل الموعد بيوم..
كال غير لو بيدي انزل ثاني يوم من الالتحاق.. صدك جاوبتي.؟؟
رديت اي الحمدلله..
من ينزل محمد وضع البيت كله يتغير خالتي الوجه يضحك.. أطفالي تلكوني يكولون بابا اجه.....
اي غير هو بصفي واكف واتلكاني...
اندكت الباب راح هو فتحها واتاخر مارجع.....
سبحت وطلعت للمطبخ اساعد خالتي بالغدا.. كالت روحي يم محمد ماعندي شي خلصت شلون كبه حامض سويت..
رديت.. عاشت ايدج....
دخل اوس كال اجه عمو..
باوعت من شباك المطبخ شفت إلياس واني اكول محمد اتاخر بالباب...
رجع علينا للمطبخ سأل الغدا حاضر بالكوه بقيته يريد يروح يكابل الحيطان..
خالتي رد كملت هسه انصب الغدا.
أني واكفه على السنك اشطف المواعين احضرهن ....
تقرب محمد وكال ترا والله ميت قهر علي وبالكوه بقيته...
ويستحي ماياكل يم احد.. حتى مايدرون بي من ينزل مجاز... يستحي يمر عليهم.... (يقصد اهل ريتا وخالتها)
.
فهمت قصده عباله ضجت لان التهى بصديقه.....
رديت بصدمه وعيوني مفتوحه ترا اني مو هيج.. وبالعكس افتخر من اشوف مواقفك الحلوه.. وترا عقلي أكبر من هاي الأفكار.....
محمد... لعد اني ليش اختاريتج غير عقلج جبير ومو بس يوزن بلد لا يوزن العراق ودول الجوار.. وهمس يم اذني مشتاقلج بكد رحمه الله....
صبينا الهم..
واحنا كعدنا بالمطبخ.. صدك طيبه مسويتها وشربت لبن عيوني صارن مثل توم وجيري اشوف الواحد خمسه..
غسلت المواعين.. وسحبت أطفالي نيمتم....
خالتي نطتهم الجاي واجت نامت يمنا..
العصر كالو نروح نشوف ليلى.. ونودي لجونه أهلها يردوها....
محمد كال انقهرت عليها من تلكوني يصيحون بابا وهي وياهم مثل الببغاء تكول بابا.....
أخذنا
رحنا كلنا نشوفها فرحت من شافتنا بس حالتها تعبانه.. وتكول تعبت وحركته قليله كلش حتى كاطعه نفسي منه......
الحمدلله على كل حال اريد بس الله يسهل وارتاح..
مابقينا ساعه وحده وترخصنا لان محمد تعبان واني عندي امتحانات.....
من طلعنا وهم لجين صرخت ورانا تريد وي البنات.. ابوها شالها ويحاول وياها..
محمد رجع عليها يقنعها غير مره ناخذها.. مافاد
ابوها كال ياله نروح للسوك اشتري الها اخت....
مشينا ومن اتذكر شهكتها اموت قهر عليها.....
محمد ڪال ڪطعت ڪلبي لجين غلاتها من غلاه امها ومن اشوفج تعتنين بيها افرح ــ
مها ...تدلل لجين وامها وخالها.
حتى من وصلنا البيت احس مكانها خالي وصوتها الة وحشه.. وايناس تكول ماما خطيه لجونه راحت على امها....
رديت فدوه للحنينه طالعه على امها..
ومحمد يرد بسمارج اعوج.....
كتله ترا صدك مااتشاقه.. هسه اني اشكد احب الكليه واذا احسها تاذيكم والله اتركها.....
وانت مدمرنا كلنا بدوامك....
سكتت مااريد اكمل واكول والله أطفاله يوميه يسألون علي وهم من يلتحق يضل يذكر الكلام وينقهر بس هالمره صدك قافله واتمنى اكو حل ويترك العسكريه......
اتحسر.. وكال الله كريم ان شاء الله تنحل....
.
يستقر الوضع واحاول بكل طريقه يكون دوامي قريب عليكم.. مو ذاك الشهر الي دااومت بالتاجي جانت احسن لان يوميه انزل....
رديت اي أهون..
سحب ايدي كال نسيتيني جبت الج هديه من سوك الدوز (طوز خورماتو)
مشيت وياه وجان جايب قميص كلش حلو ابيض وبي فيكات كلش عجبني اتشكرت منه....
كتله بعد باجر عندي امتحان والبسه أن شالله.. سألت على السعر لان مبين غالي ـ ڪال هديه مايصير اڪول السعر .
حسيت عنده كلام متردد يكوله سألته شبيك.....
محمد.... والله بس مشتاك الكم هواي..
انوب هاي الصغيره الي اخذتلي روحي انوب شكد حلوه صايره....
مها. من صارت حلوه بس جانت تصرخ هواي ماحسيت بيها الا هدأت..
سألت جبت لخالتي شي..
رد اي قطعه قماش حلوه عجبتها.
وترا هي هم سألتني من نطيتها كالت جبت لمها شي..
أخذت ملابسه اغسلهن وهو طلع يم خالتي بالحديقة انتبهت الكلام عن ابو بس اسمع بعض الكلام ويروح عني باقي كلامهم .
خرطت العافيه.. نشرت الملابس على الحبل ودخلت المطبخ.. وهو صاح مهاا
غسلت وطلعت بس عيني على خالتي مو علي..
جان بيده دنبوس اكو سن من ثيل الحديقه داخل باصبع قدمه وبالدنبوس يسحبه.....
أشرت لخالتي.. هزت رأسها ماكو شي..
سألته ها محمد.. اشرلي اكعد بصفه..
وخالتي كالت اكوم اتوضا قبل لاياذن..
أطفالي كلهم بالمرجوحه ومسك كباله على المندر مالتهه وبيدها خرخاشه
كعدت واني ابلع بريجي..
سألني شفتي أبويه؟؟؟
اختنكت هزيت راسي بأي..
وبدأ يسألني عرفتي؟؟ وشلونه؟ وشنو راد وعلى شنو سأل؟؟
اذكرت كلام أبويه وحجيت اله كلشي مانقصت ولازيدت حرف.. وبجيت..
مسح دموعي وشال مسك وصاح على أطفال يدخلون للبيت..
خله يمسك يم خالتي...
واخذني يمسح على راسي ويهدني توقعت راح يحجي بالموضوع وافهم رده فعله على كلام ابو ووضعه التعبان..
بس هو اكتفى كال انسي الموضوع وخلي للأيام........
اڪتفيت من اذيتهم ....
بعدها جروح ڪلبي تنزف من غدرهم ــ
اني مو اول بشر يموتون اله ناس وهمه ؏ قيد الحياه...
يتبع _____
لاتنسو التصويت 💛
وئام الشيخلي💞