أبي لم يكن إنسانًا

البارت 25

#أبي_لم_يكن_إنساناً
البارت الخامس والعشرون
للكاتبة لبنى الموسوي

هـمْ يجـونـا ؟!!
الـفارگـونـا وضـيعـونـا هـمْ يـمـرون بـ دربـنـا
لـو نـسونـا
هـمْ نمـر بـ بالهـم وغيابنـا يعصـر گلبهـم وي دمعهـم
لـو مثـل طـي الصحـف همَّ طـونـا
ومن سجـلات العـمـر بجـرت قـلـم منهـم محونـا
انـي ادري الدنـيا ديـرة
بـس صغـيرة
وشمـا حـرت بـين الدرابيـن الأخيـرة
التقـي بـ فـد يـوم بيهـم
لأن يمهـم ودعـت غالـي اعلى گلبـي
صعـبة أعيـش الـظـال مـن عمـري بـلا نـظـرة عيـونـة...

همام.. دخلت الـ غرفتي الاء نايمة ما حست علية
اخذت الملابس ورحت للحمام
طلعت واگف دامشط گدام المرايا البغرفة طيبة انفتحت الباب ودخلت الاء متخوصرة تباوعلي وتعلچ

- ها يا عريس حمام العافية عليك
- الله يعافيچ

- اي حبيبي هسة ما گتلي عجبتك الـ **** مالتك لا

- الاءءءءء للمرة المليون احذرچ تتجاوزين عليها
بعدين فهميني
شنو هاي قذارة اللسان العندچ اني ادري الزلم هيچ لأن متعودين على لغة حوار الشارع
بس النسوان واگفة من يتلفظن بـ هالفاظ لأن اليميزهن عن غيرهن جمال الأدب اذا تعرفي طبعاً

- لا والله ما اعرفة
وگول بلا شتسوي اذا تجاوزت عليها تضربني مثلاً ؟!!
يلا الله وإيدك
سويها علمود تصيرلي حجـة الزمها عليك گدام بابا هم متزوج على بنتة وهم إيدك والضرب

- استغفر الله رب العالمين واتووووب اليه
يابة انتِ شنو الخاطر ربچ !!
حيوان بلا احساس ولا كرامة أول مرة اشوف بشر عايش ع الضرب وميرتاح إلا ينهان على الطالعة والنازلة وأرجع واگول لتهددين لأن مو همام اليتهدد

- كافي همام كافي
جربتها وشبعت بيها اتركها عاد والله بعد ما اتحمل أكثر

- كلام الشوارع جوزي عنة ترى وصلت حدها
شنو جربتها شنو شبعت بيها
هاي مرتي تفهمين شنو يعني مرتي ما اسمحلچ تحچين وكأني مصاحبها لأن اليمسها يمسني قبلها

- واني شنو جاوبني مرتك لو لا
- ما ادري اسألي نفسچ
- هسة شنو الى متى نظل هيچ لازم نشوف حل مليت

- الحل عندچ وانتِ متردين تنفذي
هن كلمتين
اي موافقة ساعتها تنتهي كل هالمشاكل وراح ترتاحين وتريحيني وياچ بس اتركي عنچ العناد

- هه يعني اگول موافقة اتطلگ منك مو

- تعرفين الاء ميحتاج الها سؤال
اني وياچ لا تفاهمنا ولا راح نتفاهم بـ يوم من الأيام
على شنو بعد نستمر
خلي كلمن يروح الحال سبيلة أحسن ما نظـل عايشين سوة و واحدنا يكره الثاني ترى العمر مرة ما ينعاش مرتين

- خو طلگها الها ليش اني

- شمسوية واطلگها
رافعة صوتها علية متجاوزة على أهلي هاملتني وهاملة نفسها ومكانها وبيتها معيرتني بحسبها ونسبها

أريد اعرف شسوت حتى تستحق أنفصل عنها
وعلمود منو ؟!!
علمود إنسانة ما شفت وياها الراحة حتى بـ أحلى يوم بحياتي وخلصتها علية بس نق بـ نق

اقسم الچ بـ تراب أبوية الما لحگت أشبع منة
ما اريد أأذيچ الاء
بس انتِ شارية الأذية النفسچ لمن متمسكة بية وانتِ تعرفين اني لا طايقچ ولا طايق العيشة وياچ

ما ادري شلون تفكرين
هسة اني مرة تگولي ما اريدك واظل متمسك بيها ؟!!
ماكو شي أهم من كرامة الإنسان
فـ حافظي على كرامتچ يبت الناس ووافقي ع الأنفصال

- اي وهيچ تطلع انتَ الخوش واني الكخة بنظر بابا

- ابد اني الأطلب الأنفصال
وراح اگول الصوچ بية ما گدرت اتفاهم ويا بنتك
انتِ بس وافقي
لا مثل المرات السابقة كلما نوگف گدام أبوچ وافتح ويا موضوع الطلاگ ترفضين وتگولين أريدة

أريدة يعني ما أريد انفصل عنة بوية
وشلون بـ هالحالة
تدرين بـ أبوچ شلون متمسك بـ هالزواج واليخلي يتمسك أكثر تمسكچ بية وتعرفين هالشي

كلما احچي ويا يگول هي تريدك وراضية بالمشاكل
أما اني مو مهم
مرتاح لا المهم هو يحبني ويريد نسبي حتى لو يشوف العلاقة بيناتنا واصلة الجهنم الحمرة

گدامة بابا اني ما أريد انفصل عنة واتحمل كل شي
ورى الدنيا تحترگ
صياح وغلط وعيشة تزهگ الحيوان شلون يعني ليش توصلوني للمحاكم واني ما رايد هالشي

- طلگها هيٌَ اني ما أريد اتطلگ وحقي زوجتك الأولى

- ليش متردين حب بية مثلاً
ولتگولين أي
ما اتذكر شفـت منچ حب ولا سمعت منچ كلمـة حلوة

- شنو تريد تضحك العالم علية
بت العقيد أبراهيم
تطلگت بعد زواجها بـ أشهر غير أصير علچ بحلگ بنات عمامي ونسوانهم الحقيرات
هن من غير شي هسة متشمتـات لأن نزلت عليـة ضرة

- اي هيچ گولي لا همام يهمچ ولا بيتچ وحياتچ
انتِ بس مهتمة للمظاهر گدام العالم وشگال فلان وشنو حچة علان عسى ما عايشة بجهنم كلش عادي

- لا اكيد مهتمة بس حچيت بشكل عام
- واضح يابة
- همااااااااام كافي عاد طلگها تدري مراح اسكت عنكم

- لتصيحييييين صوتچ ما أريدة يرتفع گدامي
كافي مليت منچ
مليت من مشاكلنا المتخلص
مليت من نكدچ ومن العيشة وياچ مليت والله ملييييت

- شو يرتفع ويرتفع ويرتفع وأريد اشوف شتسوي
حچتها وسحبت المسدس من الميز وجهتة على راسي

- شبيچ انتِ تخبلتتتتتتتي
- اااااي تخبلت واذا متطلگها اكتلك واكتلها وراك همام

- بعدي المسدس من وجهي والعني الشيطان

- مااااااا أبعدددددة
لو تعوف هاي الـ **** وتخليها تولي منا لو اني الأخلي الطلقة براسك وأريحك مني ومنها للأبد

- الاء حبيبتي انطيني المسدس الشيطان شاطر
- بس لا شيء يم شطارتي
- لا اله إلا الله شلون تالي وياچ اليوم رااااااح تخبليني

- شنو عبالك داتشاقى وياك
والله أنوم طلقة بـ راسك اذا متخلصني من هالـ****

- جيبي المسدس الاء
- أول جاوبني راح تنفذ وتطلگها لو تظل راكب راسك

باوعت عليها الظاهر هاي ميفيد وياها الكلام
التفتت على الباب
خديجة اطلعي منااا لتدخلون خل نحل السالفة بيناتنا

گبل دارت وجها للباب
ركضت سحبت السلاح من إيدها لو هي تخبلت بالزايد

- شنو عبالك لو أخذت المسدس من إيدي راح تخلص
لا حبيبي غلطان وهوااااي هم
ما اعوفك اليوم اذا متريح گلبي وتنهي المهزلة البديت بيها البارحة تسمعني لو لااااااااااا

باوعتلها وسكتت أريدها تهدأ شوية بس بالعكس
ظلت تصيح جاوب لتبقى ساكت
أخر شي شالت الطبلة ورگعتها بالمرايا اني واگف يمها كلش تطشر الكزار علية دمر الجهة اليمين من إيدي

- ااااااخ ولچ هااااااي شسويتي حيوااااااانة

- ها توجعت يلا حس بية
شوف هالوجع لا شيء يم وجع گلبي وانتِ تأذيني هيچ

- لزمت إيدي متألم
والله وكت عشنا وشفنا الاء تحچي بجرح الگلب وهيَّ ما خلت واحد بالبيت يسلم من سمها

- همام لتعاند أوعدك اتغير بس طلگها

- شبعت وعود الاء
من خطبتچ ولليوم أوعدك وأوعدك ما شفت شي تغير

- لا هالمرة راح يتغير جرب وشوف المهم اترك طيبة

- ما اطلگ وباچر رايح الأبوچ ان شاء الله
لازم يلگا حل الـ هالوضع
هم سليطة لسان وصلفة وهم مخبلة لو ما ستر الله چان سويتيها وضربتيني بالسلاح عيشة هاي عيشة

- والله شتريد تسوي سوي
اذا سألني اگولة ما اريد اتطلگ وكل شي ديصير بسببة وعود روح تواجه ويا بالمحاكم انتَ الخسران

- تصدگين ما عندي جواب الچ !!!!
- مو الاء التنكسر مثل ما كسرتني راح أكسرك همااااام

- يلا دوخري خلي اولي وعاشت إيدچ ع السويتي معدلة

- ظل مستهزأ بس راح يجي يوم وتتندم صدگني
- الله يشافيچ ان شاء الله

حچيتها ودخلت للحمام المسدس بـ إيدي
نظفت الجرح وطلعت الغرفتي أبدل
شلون راح تخلص ما ادري تطخ بـ بالي اسويها محاكم وطز بالدنيا وما بيها لأن صبر ما ظل عندي بعد

طيبة.. گمت بستها وباوعت البتول يلا ندرس
بعدنا ممتحركين
سمعنا همـام يصيح بصوت عالي شويـة وصارت ضربة قوية من قوتها فزينا عبالك عبوة وانفجرت

ظلينا وحدة تباوع ع الثانية
رادت خديجة تصعد ما قبلت الحجية خليچ يمة رجال ومرة يحلون مشاكلهم بيناتهم لتتدخلين

- يمة بس خل اشوف شصار اخاف الاء سوتها وانتحرت

- لا انتحرت شنو متسويها جبانة
تلگيها تعاركت ويا أخوچ وشالت شي رگعتة كـ تهديد ما عرفتوها يعني هم اذا تدخلنا وحچينا نطلع مو خوش

- لعد شلون والله بالي ظل يم همام
- هسة ينزل اصبري

ظلت رايحة راجعة گبال الدرج
تباوع ليفوگ وتفرك بـ إيدها شوية ونزل همام المسدس بـ إيده وملابسة شوية بيها دم

خديجة.. عزة العزاني ان شاء الله
هاي شبيها إيدك خوية وليش شايل السلاح فدوة جاوب

- ماكو شي خديجة حادث بسيط لتخافين
بس تعالي عقميها الي غسلت والدم مديوگف أريد اطلع ما ظل وقت عندي

- اي اي تتدلل خوية هسة بس اجيب الديتول واجيك
- عاشت إيدچ

حچتها وراحت تركض
جابت القطن والديتول يلا خوية انزع قميصك خليني اعقم إيدك بين ما تسولفلي شصار وياك

گبل فتح دگم القميص
درت وجهي عنة يااا هذا شلون ينزع گدامنا شگد عيب

صح ما شفت شصاير بـ إيدة
بس سمعت الحجية شهگت وسألتة يا يمة شنو هااااي إيدك بس لا الاء سوتها نعرفها مخبلة

- لا يمة المرة شعليها هو حادث وصار لتكبرون السالفة

خديجة.. خوية بشنو انجرحت
إيدك رايحة والدم مديوگف خاف يحتاج خياط لتسكت

- شو خليني اشوفها
لا يمعودة كل شي ما بيها واني صدگتچ
ترى الكزاز مال المرايا أنكسر وضرب بـ إيدي مو طلقة

- لتعاند روح للدكتور همام
- خديجة اشتغلي وانتِ ساكتة ما ظل وقت عطلتيني

- اي لتصيح يمعود
هاي خلصت بس روح اغسل إيدك قبل لتلبس القميص

حسيت على گام التفتت على خديجة خايفة
- عمة ليش المسدس بـ إيدة
اخاف مضروب بي وميحچي لأن هواي دم بهذا الگطن

بتول.. يمعودة لو مضروب طلقة تلگي واگف گدامچ !!!

خديجة.. صح كلام بتول
مجرد جرح بس عميق شوية ومتأكدة الاء ورى السالفة

بتول.. اكو غيرها يعني ما سمعتي صياحة نزل للصالـة

ديحچون طلع من الحمام يدگم بقميصة
- عمو شلون صرت
اترك الغرفة بعدين سويها خاف جرحك يلتهب أو يأذيك راجع دكتور مثل مگالت عمة أحسن

- باوعلي وضحك يعني شلون أخلص من خديجة الدور انتِ يلا مع السلامة رايح اني

خديجة.. اويلي من عنادك اووويلي

ما رد عليها
وصل للممر راد يطلع رجع بـ خطواتة يباوع على بتول

همام.. همزين ما نسيت
اصعدي الغرفة طيبة تلگين القمصلة ع الچرباية جيبيها بعد شوية يبرد الجو واني لابس خفيف

بتول.. اي عمو تتدلل
حچتها وصعدت للغرفة قريب الدقيقة يلا نزلت انطتة القمصلة اخذها وطلع چان تباوعلنا بتول

- عززززة لو تعرفون شنو شفت فوگ

- خير ولچ احچي
- الغرفة صايرة طشار من الكزاز بالگوة جبت قمصلتـة

الحجية.. يايمة راح يروح وليدي مني
اگص إيدي اذا متطلع الاء ضاربتة بس ميقبل يحچيلنا

خديجة.. ههههههه لا يمة مو الـ هالدرجة
تلگيها صارت عصبية وكسرت المرايا فـ صارت بي قابل مو رجال حتى تضربة ويسكت الها

- ادري شنو من مرة هاي
شو اشكال شفنا من الزلم ما سوينا سوايتها صدگ چذب

- المهم هو بخير يمة اتركي عنچ هالسوالف لأن تتعبين

طيبة.. يلا بتول اني رايحة ادرس تجين وياية لو لا
بتول.. اااي يمعودة طبعاً اجي يا دوب الحگ أمتحاني

- يلا لعد امشي فضيني راح يصير المغرب

حجيتها ورحت قبلها للغرفة ثواني واجت وراية
ظلينا نقرا بالساعتين انفتحت الباب ودخل همام بنات عود لحد تطلع للصالة العمال ديشتغلون فوگ

بتول.. اي عمو اصلاً دندرس شعدنا طالعين

همام.. المهم صار عدكم علم لأن احتمال يتأخرون لليل

طيبة.. شلون صارت إيدك بعدها توجعك

همام.. ما بيها شي متشوفين واگف گدامچ مثل الحصان

- ههههه دومك ان شاء الله عمو بس عفية لتتعب نفسك

- ان شاء الله
يلا بعد ما اوصيكم ما أريد المح وحدة منكم برة
إلا اني اجي وابلغكم راحوا
ترى راح يظلون صاعدين نازلين وكلهم شباب افتهمتن

بتول.. عمو والله افتهمنا بس روح وراية أمتحااااااااان

طيبة.. هههههههههه يااااا مو هيچ عيب بتول شجاچ

ما حچة شي هز راسة وطلع يضحك
راح والروحة روحة
للعشرة بالليل احنة محبوسين ظلينا بـ موقف لا يحسد عليه جوع عطش إحتياج للحمام وكل شي

نريدهم يرحون ماكو
صوتهم واضح هارجين البيت بالحركة وخو همام نسانا ولا فكر يجي ويشوف خاف محتاجين شي

بتول.. ااااااخ ولچ اريد أروح للمغاسل
بعد ما اتحمل وحتى صلاة ما صلينا شلون سالفة هاي

طيبة.. اسكتي حالي مو أحسن من حالچ
حتى بطني گامت تقرقر من الجوع شنو ناوين يباتون اليوم

دنحچي انفتحت الباب ودخلت خديجة اااي اجة الفرج
- يلا اطلعن راحوا العمال

بتول.. شدعي على عمو همام
شسوة بينة اليوم راح ولا كأن حابسنا هنا ااابد ميخاف الله هالرجال

همام.. سمعتچ ولچ

بتول.. همزين سمعت ما بية حيل أعيد الحچي مرتين

خديجة.. هههههههههه
أم لسان دفوتي ساعديني نسوي العشى متنا من الجوع

بتول.. شووووو عمة يا عشى هذا
مو راح اسويها على روحي وخري من گدامي خلي أروح للمغاسل بسرعة

دفعتها وطلعت ركض ظلت خديجة تضحك على حالها
- عمي والله هالبتول مصيبة

طيبة.. هههههههه حقها عمة
ترى حتى اني مثل وضعها بس شوية أهون
صدگ ليش هالگد تأخروا شچانوا يسوون طول هالفترة

خديجة.. تدرين بالعمال وسوالفهم بطة
أول ما اجو سويت الهم چاي وكيك ظلوا قريب النص ساعة ياكلون ويسولفون
بعدين فتحوا الأخشاب نزلوهن جوة واجة الصباغ صبغ الغرفة والحمام وهسة يلا خصلوا

- ياااااا لعد وبيبي وين ظلت وديتيها للمغاسل لو لا

- وديتها ليظل بالچ حبيبتي
همام سوالنا طريق وحتى صلاة صلت بس انتم نساكم

- هههههه يلا عادي المهم بيبي خطية
عفية خلينا نسوي عشى من الجوع نفسي گامت تلعب

- تتدللين چنچ على عشى بس روحي للحمام بـ الأول
- اي والله ضروري وصلت حدها عندي
- هههههههههه

طلعت أركض رحت للحمام ورجعت خديجة بالصالة
دتنطي للحجية علاجها وهمام يصلي
نزلت بـ هالأثناء الاء من غرفتها مدري ليش لابسة كعب وتطگطگ بالگاع ظلينا صافنين بوجها

همام.. الله أكبررررررررررر
باوعت علي يا هذا شبي رجع صاح سمع الله لمن حمده الله أكبرررررر

طيبة.. شبي عمو شيريد ليش ديصيح

خديجة.. يمكن من الاء
متشوفيها لابسة الكعب وتفتر الواحد ينشده بـ الصلاة

التفتت علي ديسلم بس رفع راسة عاط بيها
- متگولين الواحد تعبان يصلي
گاعدة طگ وطگ ادري اكو كعب ينلبس بالبيت حتى ما اعرف شحچيت بصلاتي

الاء.. أي ليش لا عيني
ترى سوالفك حفظتها تريد تتغدة بية قبل لا اتعشى بيك

همام.. لا شكراً ما أشتهيچ

- همام شو سويتها صدگ غيرت الغرفة وصبغتها همات

- لعد ربها وحد
غير توها عروس يعني تريد غرفة جديدة وأثاث جديد

- أنطيها غرفتي واني أخذ هاي الغرفة
أريدها لأن أكبر من غرفتنا بهواي وبيها حمام وشباك هم

- هااااي الغرفة غرفتها وتظل غرفتها تسمعيني لو لااااا

گام كـف السجادة وگعد ع التخم راحت گعدت بصفـة
- همام
- ها خير شعندچ

- وين راح تنام اليوم
- يمچ بس شويـة صيري أدميـة وجوزي عن المشاكـل

- لعد انطيني هاي الغرفة حباب لو اظل أزن فوگ راسك

- كااااااااافي لخاطر ربچ ارحميني
تعبان مالي خلگ نقتچ يعني ما شبعتي من عركة الظهر لو تردين تموتيني هالمرة صدگ

خديجة.. الاء گومي وياية خلي نسوي عشى مو أحسن

الاء.. دروحي بابا والله بطرانة اني بيا حال
وألف مرة گتلچ من نحچي اني ورجلي لتحشري خشمچ ويانة هي حشرية

همام.. هااااي عليمن ولچ
ركضت خديجة لزمت إيدة اتركها همام ترى تعلمنا على اسلوبها بعد محد يزعل من كلامها لتضوج نفسك على شي ميسوة

الاء.. اي عيني تمسكني بعد تمسكني
سوي روحچ انتِ الخوش وطلعيني اني المو زينة حتى يأذيني أكثر وأكثر

خديجة.. هسه اني شحچيت قابل
شو انتِ كل شي ميرضيچ والله حيرتينا ما طلعت هاي

الاء.. ولا تحچين شي بس سدي حلگچ مو كافي نايمة على گلبي وعايفة بيتچ ورجلچ

همام.. هاي شلون بيها هاي
لچ بيتها بيتهاااااا انتِ شنو وجاية تحاسبيها ما عاجبچ روحي البيت أخوچ بلكي زوجتة تعاملچ بالمثل

الاء.. وانتَ شدعوة هالگد تدافع الها ترى محچيت شي

همام.. لا اله إلا الله
هاي شلون بشر يربي شسويت بـ حياتي وبليتني بيها

حچاها وگام للميز سحب سويچ السيارة
- وين خوية من كل عقلك تعال لتهتم اني ما أزعل منها

ما جاوبها شي اخذ الموبايل من التخم ولبس القمصلة وطلع رگع الباب ورى حيل ضجت علي كلش

خديجة.. هااا الاء ارتاحيتي هسة من هججتي الرجال

الاء.. عسى بالموت كون روحة بلاااا رجعة ان شاء الله

حچتها وصعدت فوگ ظليت صافنة وراها
اذا هيچ تكرهة لدرجة تدعي علي بـ الموت ليش باقية ويا بعد خو تنفصل أحسن !!!

خديجة.. الله أكبر على راسها شنو من ملة هاي خبلتني

بتول.. عمة دعوفيها تولي
امشي نسوي العشى والله مو وضعية متت من الجوع

تعشينا ولملمنا المطبخ وهمام ماكو
نتصل بي ميرد
ظل بالهم يمة وين راح حتى ما عندة مكان يبات بي

خديجة.. اوووووف
لو بس يبطل من هالعادة يطلع وميرد چان ارتاح گلبي

الحجية.. شلون خديجة گلبي صار نار علي
الدنيا كلش مو أمان وهو ضايج وين يعني راح بهالليل

بتول.. بيبي لتخافين شبيچ
قابل هو طفل اكيد يدبر روحة المهم خل يرتاح شوية من الاء ومشاكلها والله من يمي تعبت هو شلون

ظلينا ننتظرة لـ 12 وهو ماكو
الكل راح نام بس اني ما غمضت عيني افكر وينة
ليكون صاير ويا شي مو زين لا سامح الله
لأن حسب مگالت خديجة ممسويها وبايت برة من قبل

عبرت الوحدة وحتى ما اتصل بيهم
يأست من جيتة ظليت اتگلب بـ فراشي لحد ما غفيت

همام.. طلعت من البيت للمقر
دخلت المكتبي قفلت الباب من جوة وسويت الموبايل صامت كل شي ما أريد بس أنام شوية

فزيت الصبح على صوت الـ شرطي ديگعدني
- سيدي تسمعني خو ما بيك شي

- عدلت روحي افرك بعيوني علي !! انتَ شجابك لهنا من الصبحيات

علي.. هههههه سيدي شنو السالفة اني شجابني لو انت

- باوعت علي وفركت راسي اي والله صدگ نمت هنا

- خو ما بيك شي قلقتني عليك سيدي

- لا ما بية
بس جيبلي چاي لأن راسي كلش يوجعني ووراية شغل

- أمرك سيدي وراح اجيبلك ويا لفة تفتح بيها ريگك
- رحم الله والديك

بس حچيتها طلع
گمت غسلت ولبست الزي باوعت للموبايل طافي شحن الظاهر خلصوا الليل يتصلون علية واني نايم

خليتة ع الشحن وفتحتة دخل علي جايب الريوگ
أكلت وبلشت بالشغل أي علي شعدنا اليوم ناوشني يلا

- سيدي قبل أربع أيام جابوا خمس متهمين
أثنين سرقة وأثنين سطو مسلح
وواحد أربعة أرهاب بس مو وحدة مشتركين ويا أربعة لكن ما گدروا يلزموهم وانهزموا للأسف

- الله يبشرك بالخير
يعني السالفة اليوم دسمة كلش واني عقلي مو براسي

- ههههههه الله يساعدك سيدي
بس اليوم لازم تبدي تحقيق عدنا فرز تحب أدخل واحد منهم عليك لو تكمل الملفات وتخليهم ع العشرة

- لا علي بالأول خليني أرفع ملفات المتهمين مال ذاك الأسبوع وبعدين التفت الذولة أجلهم شوية

- مثل متحب تحتاج مني شي بعد لو أروح للقيادة
- لا الله وياك

سلم وطلع من يمي
عود ردت أتصل بخديجة بس اخذني الشغل ما حسيت إلا وموبايلي يدگ هي دتتصل

- ها خيتي ردت أتصل أول ما گعدت بس گلت نايمين

- صدگ تحچي همام
شوكت تبطل من هالعادة والله أمي گلبها راد يوگف من خوفها عليك أدري تضوج من مرتك احنة شكو

- على كيفچ يمعودة سويت الموبايل صامت وغفيت

- اي شكو عليك
انتَ نام رغد وخلينا هنا نلوب عليك من القلق متقصر

- اعتذر خيتي مو قصدي
- المهم هسة شوكت تجي على البنات مو دينتظرنك
- اووووو هاي اني شلون نسيتهن راحن من بالي والله

- شنو يعني مراح تجي عليهن ؟!!
- لا وين أگدر هسة اني بالدوام والشغل واصل الراسي

- يا لعد شلون لو مخليلهن خط مو أحسن من هالبهذلة

- بتول يمچ اذا موجودة خليني احاچيها
- اي هاي دتتريگ... تعالي بتول عمچ يريد يحچي وياچ

بتول.. ها عمو هاي وين صرت

همام.. بتول ما اگدر اوديكم اليوم اذا ما عدكم أمتحان لتداومين انتِ وطيبة

- يا عمو شدتحچي دخيلك
اني عندي أمتحان وهمات عدنا شرح كلش مهم شلون نفتهم اذا يفوت علينا

- ولا يهمچ اذا ع الأمتحان سهلة ومحلولة
اني عود بـ نهاية الدوام أروح لمدرستچ واخذلچ أجازة

واذا على الشرح وين رحت اني
والله اشرح حتى أحسن من مدرستكم ومجبرتي مو صح

- ههههههه اي والنعم واني اشهد الك
- اعذريني عمي والله دايخ ما ادري شلون نسيتكم هيچ

- مو مشكلة عمو فدوة الك
يلا دير بالك على نفسك ومو تنسى الأجازة ترى أديح

- هههههههه
لا ما انساها راح انبه الموبايل علمودچ ولا يهمچ بتولة

- شكراً اريد ربي يخلصك من همك الفوگ گول امييين
- ههههههههههه امين يا رب العالمين

سلمت وسديت الخط
باوعت للملفات مسطور هسة شلون الحگ كل هالشغل

طيبة.. گعدت الصبح بدلت ورحت للمطبخ
داسوي بالريوگ وافكر همام رجع لو لا دخلت بتول هااا شنو عمو موجود بغرفة لو مشفتي

- لا مشفتة
خفت لا أصعد ادگ الباب عليهم تنگلـب الاء زومبـي

- هههههههه ضحكتيني من الصبح واني ضايجة
لا اتركي لتصعدين
عود هسة تگعد عمة ونسألها مالنا خلگ لـ الاء يمعودة

كملنا الريوگ وهو ماكو
سألنا عمة گالت سيارتة ماكو أتصلت علي اعتذر يجينا

ظلت بتول تلوب بـ قلق على أمتحانها
- يمعودة شبيچ مو گال ياخذلچ أجازة على شنو خايفة

- ولچ هاي المدرسة نحسة كلش خاف متقبل تأجلة

- لا وليش متقبل والله حلوة هاي
بعدين خل نفرض ما قبلت تتصورين عمو همام يسكت

- لا طبعاً
- بعد شكو شيلي هالخوف من راسچ وامشي نشتغل

حچيتها ورحت بدلت ملابسي
داغسل بالحمامات ما احس إلا اجتنـي ضربة من ورى وگعتني على وجهي بنص الماي درت وجهي الاء

- هاي شبيچ على شنو دتضربين شمسويتلچ قابل ؟!!

- ولچ **** بطول زري وتاخذين رجلي
اليوم اكلچ بسنوني
من وراچ بعد لا يطيقني ولا يطيق البيت الله يعلم وين نام البارحة ويم يا ****

- عيب تحچين علي هالشكل ترى هو مو هيچ

بس حچيتها سحلتني من شعري بالگاع
مردتني بـ إيدها
ما خلت شي يعتب عليها عض تمليخ خرمشة أخر شي سطرتني بقدح الحمام على راسي حيل

على صوت صياحنا أجت خديجة تركض
- يا يا ياا هاي ليش دتضربيها صدگ چذب حرام عليچ

سحبتني من إيدها اناشغ من البچي
ظلت ترزل بيها اجت بتول هاي شبيها طيبة بس لا الاء ضربتها

خديجة.. انتِ معليچ اطلعي من السالفة اني اتصرف

بتول.. لاااااااا هاي أي تصرف غير الضرب ميفيد وياها

حچتها وهجمت على الاء
-اليوم اعلمچ شلون تمدين إيدچ النگسة عليها حقيررة

وگفت خديجة بيناتهن
- عيب عيب اذا هي ما عدها أخلاق صيري انتِ أحسن منها هالتصرفات مو صحيحة بتول

- مظلت أخلاق وياها عمة تطلع الواحد حتى من دينة
- كافي عاد گتلچ اني أحل الموضوع

- شتحلين الله يخليچ
هاي أبوها ما گدر عليها تردين انتِ تربيها لتحاولين

الاء.. هاي بعينچ أدب سزززز
اني اعلمچ انتِ وهاي الصلفة الگاعد تدافعين عنها اذا ما خليتكم تبچون دم ما اطلع اني الاء اصبرولي

بتول.. يمة يمة يمة گمت أرجف
اااوي عفية عمة لزمني راح أوگع من طولي من الخوف

الاء.. ههههههه الچ يوم حبيبتي لتستعجلين على رزقچ

بتول.. گومي طيبة گومي
وبعد لتجين لـ هالمنطقة وحدچ لان أكو كلاب مسعورة ناسين أهلها يربطوها عن العالم

خلتها تصيح وراها واخذتني للصالة
الحجية.. هاي شبيها وياچ

طيبة.. والله ما ادري بيبي
داغسل بالحمامات ما شفتها إلا هجمت علية وضربتني بلا سبب

الحجية.. هاي شلون طلابة وياها
تخبلت فدور
هججت الرجال وما ارتاحت أجت حتى تكمل علينا

الاء.. اني هججتة مووو
ظلي دافعي عنة مشفتي شلون تزوج علية واني عروس

الحجية.. أول لو أخر وحدة تزوج عليها رجلها
بعدين يمة المرة من عدنا اذا خوش
وتمشي ويا رجلها بما يرضي الله مستحيل يباوع على غيرها إلا اذا چان ناقص وأبني مو من هالنوع

الاء.. واني شمسويتلة حتى يتزوج
مو حلوة لو مو نظيفة لو مو بت عالم وناس مثل البعض الأبو عار والأم ميتة لو مصادقة علي وما ادري

الحجية.. لا يمة حشاچ منهن كلهن
بس لسانچ طويل ومتعرفين شلون تسايسين أمورچ بالكلمة الطيبة وگلبچ أسود لا تحبين الناس ولا تحببين الناس بيچ

- أبنچ ميسوي واهس الوحدة تحبة وتكلمة بـ أحترام

- زين ما سألتي نفسچ ليش هو هيچ لو بس بيچ تذبين الصوچ علي وانتِ كلچ اغلاط

- لأن هو اعوج ومو رجال
اصلاً شنو اترجى منة اذا انتم أهلة قابل يطلع بي حظ

- هاي مال مو رجال مرجوعها عليچ
بس احنة شبينا يمة علنا بيچ قصرنا وياچ شو أذيتيني وما أذيناچ بكلمة حتى ما نجي صوبچ

- لا ابد كل شي ما بيكم
بس بتكم تريد تتطلگ ورجلها يوميا مصادق عليها
وانتم ملفين وحدة ******
يوميا متزوجـة رجـال شكل بالأول گمعت أبنـچ الچبير وهسة جاية تريد تگمع الثاني وتخلصنا ان شاء الله

- يمة خافي الله
ترى الحچي على اعراض العالم يجرح أكثر من السچين

- ما حچيت إلا الحق
تحچون علية تگولون لسانچ طويل لعد خديجة شنو اذا أدمية ليش رجلها يدور **** عليها هاااا

- وانتِ تقارنين سلام بوليدي
بس هو الحظ دوم عكس يبلي الزين بالشين مع الأسف لو منطيچ واحد مثل سلام چان قدرتي نعمتچ

- دطيري يمعودة نعمة مصدگة روحها
اني لو ما العالم اظل يمكم
والله ألف واحد يتمناني هه توصلون الحسبي لو نسبي

خديجة.. شوفي ولچ
صارلي ساعة منچبة وساكتة اگول ما اريد مشاكل بس مال تتجاوزين على أمي لا لهنا والزمي حدچ

- هههههه روحي حلي مشاكلچ حبيبتي وعوفينا عائلة بيناتنا أحسن ما صارلچ خمس أشهر نايمة على گلبنا

خديجة.. شلون يعني نايمة على گلبچ ؟!!
شو شغل البيت كلة علية والأكل اغلب الأحيان يوصل الغرفتچ بس صوچي والله

هزت إيدها تضحك وصعدت الغرفتها
الكل انجرح بسببها مو بس اني
عفتهم ورحت الغرفة بتول ظليت ابچي تعبت كلش ما ادري شوكت أموت حتى اخلص من هالحياة

همام.. گاعد اشتغل باوعت الساعة بالتسعة ونص
اتصلت بـ أبو الاء
نهاية المكالمة رد هلا وليدي عاش من سمع هالصوت

- تعيش أيامك عمي شلونك ان شاء الله بخير
- اسأل عنك حبيبي
- رحم الله والديك عمي محتاج اشوفك شوكت تگدر

- خير ان شاء الله ؟!!
- نتشاوف ونحچي السالفة طويلة
- براحتك تعال بالليل للبيت تعشى يمنا ونسولف شگلت

- لا اليوم عندي شغل خليها على باچر
- باچر باچر ولا يهمك
- سلم على الولد وعمتـي اشوفكم بخير ان شاء الله
- يوصل وانتَ سلملنا

سديت الخط ودگيت الجرس على علي
- نعم سيدي
- يلا حضر المتهمين بس أول شي أبو السطو المسلح

بس حچيتها غادر
أقل العشر دقايق دگ الباب ودخل
المتهم ويا اشرتلة طلع وسد الباب ورى أسمك الثلاثي وسكنك

- ناصر محمد مسعود - بغداد
- أي ناصر احچيلي شلون أرتكبت الجريمة

- والله سيدي بريء
- لتحلف
- مو اني بريء سيدي وما أرتكبت هيچ جريمة

- افتهمك بس لتحلف تسمعني لو لا
- حاضر سيدي

- يلا سولف شصار بالحرف الواحد حتى نشوفك بريء لا

- سيدي كل شي ما صار
اني بريء وحتى مصدوم من هالتهمة الشمروها براسي

بـ هالأثناء اندگ الباب ودخل رفيق عمري وطفولتي
- هههههههههه مخلد العشق
لك هلا والله بعضيدي صدگ چذب شو صاير بذات كلش

حچيتها وگمت حضنتة
- مشتاقلك همام
- اني الاشوق يمعود وينك من زواجي مختفي خو حتى الهدية كنسلت عليها يصير هيچ

- جيتي الك أحلى هدية طالب ربك بطلابة البطر حرام

- ههههههههه الثقة مشكلة عندك بس فعلاً جيتك كافية

- هههههههه لا والله حقك وتطلبني هدية
اگول صدگ هذا السمعتة على اساس أخوك أرشد توفى

- للأسف

- البقية بحياتك حبيبي
اعتذر منك والله صارلي كم شهر طالع واجب للأنبار وما ادري بالدنيا شديصير
البارحة يلا سمعت بالخبر من حسين وهاي اجيتك الله يرحمة برحمتة الواسعة ويغفر ذنبة

- البقاء لله يرحمنا ويرحم أمواتكم ان شاء الله
معذور حبيبي متقصر
بس سولفلي شعجب شرفتنا بـ هالزيارة مشتاقلك يول

- لا يخوي هاي مو زيارة هاي اقامة دائمية نايم يمك

- شلون يعني ؟!!
- ترقيت وعمي دبرلي نقل يعني صرت زميلك بالمكان مثل ما خلصنا الدراسة سوة

- هههههههههههه سبع والله ودبرتها
ألف مبروك خوية
تستاهل واحلى خبـر سمعتة مكتوب علينا ما نتفارگ

- يمعود الحمد لله
لو ما عمي والفائض هناك متصير تدمرت دوام لو انتقام

- الله يساعدك ضلعي وكل الهلا نورت المقر بنقلك والله

- منور بـ أصحابة
خاف عطلتك مبين عندك شغل خليني اروح ونحچي

- لا بس عندي تحقيق
اذا ممشغول خليك عندي استراح وتفرج حتى تاخذ ع الشغل وراك مصايب لا عبالك خلصت

- لا مو بالحيف نخلص
يلا ما عندي شي اگعد واساعدك ادري متگدر بدوني

ضحك وضربني على إيدي
التفتت على المتهم مبتسم يلا ناصر كمل وين وصلنا

- سيدي سألتني وجاوبتك
التهمة هاي اني بريء منها حتى ما أعرف شلون اشرح

- ناصر السيد أحمد مقدم بلاغ عليك
هاي شوف الشكوى گدامك يوم الثلاثاء وبتمام الساعة الحادية عشر ليلاً قمت بعملية سطو مسلح باوع وين على بيتة وتعرف البيت وين
وحاولت تسرقهم بس المشتكي حس عليك وكنت راح تقتلة لو ما صراخ والدتة

- سيدي چذب ماكو هيچ شي وداعة بنتي
- اجي وياك احچيلي وين كنت بهذاك الوقت بالضبط

- بالبيت سيدي
- عندك شهود على هالكلام ؟!!
- لا لأن اني ساكن وحدي ومرتي چانت يم أهلها بيومها

- اخذتلي صفنة علي لحد ما صحاني صوت مخلد
- ها شتگول همام

- مخلد الرجال مقدم علي بلاغ بالأسم
يگول اني من تلاويت ويا گدرت اتعرف علي من خلال الوشم اللي بـ إيده
واصلاً همَّ يعرفون بعض لأن جيران وأمة همْ شهدت

مخلد.. شو راويني إيدك

ناصر.. أي سيدي صح هذا عندي وشم
بس مو معناها يتهموني
شنو قابل بس اني الواشم بالدنيا هذا ميعتبر دليل علية

همام.. احنة اللي نحدد اذا چان دليل أو لا متجي تعلمنا شغلنا تسمع لو لا.... علييييي

علي.. نعم سيدي

همام.. اخذ المتهم للحجز وهاك هذا السجل مالتة
طلع منة رقم المشتكي
أتصل وبلغة باچر يحضر الساعة بالتسعة
حتى يدلي بـ افادتة ومن طريقك جيبلي أحد المتهمين بالسرقة

- صار سيدي... حچاها وطلع ويا المتهم

مخلد.. شنو هسة هذا ماكو دليل ضدة غير الوشم مثلاً بصمات أصابع كاميرا اي شي

همام.. ما اتصور لأن ماكو كاميرات عدهم
وهو هم چان لابس قفاز
مع ذلك خل يجي المشتكي يقدم افادتة واذا اقتنعت بأدانتة احولة على المحكمة مباشرتاً

- والله شكلة شكل أجرام

- وفقير گاعد بالجهة المقابل بيت المشتكي
يعني بالتجاوز وتدري مرات الحاجـة تساعد الشيطان

- يلا دعوفك منة
قبل ليجي المتهم احچيلي شخبارك مشتاقلك وعلي

- اني أكثر وحق الزاد والملح الجمعنا
دومك على بالي بس هـ الفترة كلش مشغول ما الحگ احك راسي من مشاكل الدوام والبيت

- يا ستار يا رب
ولك هستوك تزوجت لحگت تخاوي المشاكل شنو هاي

- هههههههه هو اني ما عرفت المشاكل إلا لمن تزوجت

- ههههههه السالفة يمك طين سولف شمسوي بزواجك

- يا هو منهم الأول لو الثاني

- چذذذذب يربك
الله عليك تحچي صدگ لو تتشاقى
يعني تزوجت مرة ثانية شوكت لحگت يمصخم فوگاها يحچي ع الزواج المتزوجين متبطلون سوالفكم

- ههههههههه مو هيچ يول
السالفة طويلة عود نگعد على فراغنا ونحچي
هسة عوفك مني احچيلي انتَ شمسوي مناوي تتزوج

- لا خوية اني ضد الزواج
ما شفت واحد تزوج وگال مرتاح فـ عليش بعد أورط روحي خليني هيچ عايش حر وراسي بارد

- والله تفتهم احسن مني ااااخ بس لو يرجع بية الزمن

- هههههههه يا هيَّ منهم مجزعتك الأولى لو الثانية
- الأولى طبعاً
- اذا هيچ ممرتاح وياها انفصل واخلص مو أحسن الك

- يا أخي ما اگدر أبوها واگف بعيني
كلما انويها تگول أريدة وهو يگول ما طول تريدك ليش تطلگ قابلة بيك حتى لو متزوج عليها

- هاي شلون شغلة
- المشكلة اني أعزة تدري شلون إنسان ذهب مينخسر

- أي والله الشهادة لله
هواي ساعدنا و وگف ويانا بالتحديد انتَ لأن اشتغلت ويا

- وهذا الواگف بعيني مخلد لذلك منچب وساكت
- لا حشاك يمعود بلكي اذا صـار عدكم طفل تستقرون

- الله ليگولها شنو تريد تورطني بالزايد
- أول وتالي يصير قابل تظل عمرك كلة بلا أطفال !!!

- طبعاً اظل ولا اجيب جهال للدنيا أمهم وأبوهم واحد ما مستوعب الثاني
يا أخي والله لو خلفت جرم بحق الأطفال الراح يكونون ضحية الـ زواج مصيرة بالنهاية الفشل
بعدين اني متفق وياها ما اريد جهال وهي موافقة لأن متتحمل المسؤولية حتى فرحت تصدگ

- لا بربك أول مرة اشوف...
بعدة ديحچي اندگت الباب صحت تفضل دخل علي

- سيدي المتهم الثاني واگف بالباب

- دهاك هاي السجلات
خلي الرائد باسم يوقع عليهن ورجعهن الي نهاية الدوام ضروري مو تنساهن علي دير بالك
لأن لازم اغلقهن هـ اليوم وخلي المتهم يتفضل بسرعة

- صار سيدي ان شاء الله ما انساهن
حچاها وطلع
عدلت گعدتي دخل المتهم شكلة كلش صغير وينة وين السرقة هذا وين أهلة عنة !!!

- يلا ابني أسمك الثلاثي وعنوان سكنك

- سمير محمود دحام - بغداد سيدي.......

يتبع

لتنسوون ⭐⭐⭐⭐⭐⭐
كل الحب ❤🥀