#أبي_لم_يكن_إنساناً
البارت العشرون
للكاتبة لبنى الموسوي
تهت والمستحـة بـ روحي
أدور ويـن ما بيـة بگايا إرمـاد
وأتوسـد على جروحـي
وأفزع چلمـة التنگـال
توگفلـي بوجـه نوحـي
واداري الآه
هلبـت
من عيـون الناس ادارينـي
والاگينـي وحيـدة هـم
واختـل بينـي وبينـي 💔💔
تقربت منة أكثر
فتحت عينة بـ أيدي ما انفتحت
سحبت أيده أريد أگعدة صعب شيگومة وهو نايم
باوعت علي خايفة رفعت أيدة ليفوگ وتركتها متعمدة چان توگع ع الچرباية عبالك مابي روح
نفرت منة مفزوعة
نزلت من الچرباية اركض منا ومنا مثل المخبلة
هسة شسوي يربي معقولة اغمى علي
زين شيگعدة أنزل اصيح الخديجة لو خطية وين تگدر تشوف أخوها بـ هالحالة وتظل ساكتة
لعد شسوي شنو الحل عقلي راح يوگف
اصيح الـ همام ؟!!
لا يمة شيخلصني من الاء هي بس شافتني ويا بالمطبخ تخبلت الدور تشوفني بغرفتها يمكن تذبحني
يلا طيبة يلا تحركي الرجال راح يموووت
باوعت علي حتى لونة تغير
بلا وعي طفرت من مكاني للباب فتحتها وطلعت أركض دگيت على غرفة همام بكل سرعتي
همام.. توني غافي فزيت على صوت الباب تكسرت
گمت مرعوب
هاي شصار باوعت الـ الاء صافنة بوجهي طفرت لبست البجامة وبالي كلة يم أمي بس لا صارلها شي
فتحتها على السريع
واشوفلك طيبة واگفة گدامي بذاك المنظر
الوجه اصفر لون الكركم والهدوم مشگگة وحتى حجاب ماكو على راسها
- ها طيبة خير شنو هذا حالچ أمي بيها شي
- لا لا
- احچي لعد شكو وگعتي گلبي
هو اني حچيت هيچ
لو ما اعرف دموعها منين صارت تطلع
گعدت بالگاع تبچي توني نزلت يمها صعدت خديجة ويا بتول اشرتلهن اسكتن
- عمو طيبة ارفعي راسچ واحچي شنو أرشد اذاچ
- هزيت براسي لا
- لعد منو مسوي بيچ هالشكل فهميني
- عمو هو وگع ما ادري ليش يعني...
هذا مديتحرك...
والله مسويتلة شي فجأة فقد الوعي تعال شوف شبي
- شوية شوية ترى مگاعد افهم عليچ منو الوگع ؟!!
- أرشد عمو أرشد...
بس حچتها طفرت للغرفة قبل لتكمل كلامها
لگيت حالتة حالة
نايم ع الچرباية بس بالشورت بلا حركة ومن گد الزراگ وجهة بعد مينشاف شكلة ابد ميبشر بخير
تقربت منة سحبت راسة خليتة بـ حضني
ضربتة أكثر من مرة على وجهة ما طلع منة الـ نفس
لزمت أطرافة باردة كلش
عرفت أخوية منتهي بس حاولت اتمالك نفسي علمودهم لا بنتة ولا أمي تتحمل هالخبر
بعدني گاعد يمة دخلن البنات للغرفة
ارتفع بچيهن
درت وجهي مضروب على راسي من الموقف كااافي ما اريد صوت اسكتوا خلوني أعرف اتصرف عدل
خديجة.. همام أخوية شبي شنو هذا وضعة
همام.. اخذي البنات واطلعن من الغرفة خديجة بسرعة
بتول.. عمو أبوية شصارلة
ليش هيچ نايم ومديتحرك حباب گول شي يريحنننني
همام.. اششششششش كافي بچي
لتنوحن براسي اطلعن برة بسرعة وخلن بس طيبة يمي
الاء.. وليش عود تريد طيبة تظل يمك ؟!!
بس حچتها طفرت دفعتها للباب
- اطلعي برة متشوفين حال الرجال شعندچ واگفة هنا
سحبتهن الخارج الغرفة ورگعت الباب بعصبية
باوعت الطيبة ترجف من البچي
صارت عيني على أيدها حتى ملابسها الداخلية طالعة بعدت نظري عنها افرك بوجهي حيل
- طيبة عمو احچيلي شصار بسرعة
- والله اني مسويتلة شي
هو مدري شبي على ساعة فقد الوعي مثل متشوف
حاولت اگعدة ماكو ميقبل يفتح عيونة
والله عمو گتلة انتَ مو بوعيك حباب عوفني هسة لأن راح تأذيني وتأذي نفسك بس ما سمع مني
- وهو منو گال انتِ مسويتلة شي
اني بس اريد أعرف الموضوع حتى من يسأل الدكتور بالمستشفى اگدر ارد علي فهمتيني
- هزيت براسي أي
- يلا لعد احچي ليش صار بي هالشكل الوقت ديفوت
- باوعتلة خجلانة ما ادري شحچي انتَ اسألني عمو
- چان طبيعي من دخلتي علي للغرفة
- لا مبين شارب
- شفتي تعاطى شغلة يعني بلع حباية أو أي شي غريب
- اي من دخلت للغرفة لگيتة ديبلع حب
- وبعد شصار
- هذا يعني راد يتقربلي بس اني ظليت....
- اششش كافي لتكملين
تعالي لبسي اذا تگدرين بين ما أغير ملابسي وارجعلچ
- حچاها وطلع يركض
باوعت الأرشد شلون والله اخاف اتقرب منة
سحبت ملابسة من الزاوية وگعدت يم رجلة كل جسمي يرجف حتى من چان صاحي مخفت هيچ
حاولت البسة البنطرون ع النص ما گدرت اصعدة
گمت يم راسة اباوع الوجهة بخوف
رفعت أيدة بـ هدوء ما احس الا همام سحـب القميص مني ولبسة ع السريع
رجعت ليورة وعيوني تتنتقل بي هذا وذاك
ليش ساكن ميتحرك
معقولـة مثل أمـي راح يموت بس لا أمـي رزاق ضربها أما أرشد محد تقرب منة حتى يموت
بعدني واگفة مذهولة من الموقف المرسوم گدامي
رفعة همام على ظهرة
التفت علية طيبةةةة امشي افتحي الباب بسرعةةةةة
بس حچاها ركضت فتحتلهيا
لگيت الكل بـ وجهي واگفين مقابيل الباب
بدون ميحچي وياهم شي نزل وأرشد على ظهرة ظلينا نباوع ورى شوية وشمرت بتول نفسها بحضني
بتول.. طيبة شبي بابا
شنو هو هم ناوي يروح ويعوفني مثل ما عافتني أمي
خديجة.. لا بنيتي اسم الله لتحچين هيچ
اتركي عنچ التشاؤم هسة وامشي نزلي يم بيبيتچ
خطية ظل بالها يمنة روحي طمنيها
ليصيبها شي لا سامح الله ونكون بوحدة نصير بـ أثنين
بتول.. اي عمة نازلة
حچتها وراحت بعدني اباوع وراها فززني صوت الاء
الاء.. ها ولچ بس لا مقهورة على صاحبتچ
تؤ الحنية الزايدة متفيد اتركيها واذا تنقهرين فـ أنقهري على روحچ تدرين ليش ي حلوة ؟!!
- ظليت صافنة بوجها ما اعرف شجاوب
- هههههههه يلا اني راح اگولچ ليش ميحتاج تفكرين
لأن ما ظل شي حبيبتي
كلها أيام بسيطة وراح ترجعين منين ما أجيتي بدا العد التنازلي الـ وجودچ بهذا البيت بطة
خديجة.. لچ شنو من بشر انتِ ؟!!
يعني عينك عينك گاعدة تتفاولين على أخوية بالموت
الاء.. أخوچ ميت عيني ما شفتي منظرة
تتقبلين متتقبلين هذا صار امر واقع وكلنا على هالطريق يعني اليوم هو باچر انتِ ان شاء الله
حچتها وراحت للغرفة دخلت وسدت الباب حيل
مچانت خديجة بوضع يسمح تجاوبها
اكتفت بـ حسبي الله ونعم الوكيـل وسحبتي من أيدي الغرفة أرشد ما ادري شتريد
- ها عمة شنو
- احچيلي طيبة أرشد شبي خو ما ضربتي على راسة
- لا عمة والله لا
- لعد شنـو هذا حالة فهميني ليش وجهة صايـر ازرگ
نزلت دموعي مسحتهن والتفتت للچرباية
- هنا چان يحاول يتقرب مني مثل كل مرة بس فجأة غمض وصار ميتحرك عمة
- احچيلي كل شي طيبة أريد اعرف أخوية شبي
سحبت الطبلة وگعدت رجلي متحملني بعد
بديت احچي الصار
كل شي سولفتلها من ساعة ما دخلت للغرفة لحد مغاب عن الوعي وصحت همام يساعدني
- ااااااااخ يربي دمر روحة بروحة هالرجال
ليش ولك أرشد ليش
علمود شغلـة عناد روحت نفسك مخفت ليصيرلك شي مثل ما صار صدگ بسبب هالسم الشربتة هسة
- ليش عمة شنو شرب حتى عمو همام سأل فهميني
- شفهمچ طيبة شفهمچ ولچ خليني ساكتة أحسن
حچتها وگامت تعدل بشعرها
- يلا امشي يم أمي هسة تلگيها متخبلة على بتول
- وبعدين شنسوي عمة والله خايفة كلش
- شنسوي يعني
نظل جوة ننتظر خبر من همام بلكي الله يباوع الحالنا ويرحمة الخاطر أمي وبنتة ع الأقل
نزلنا جوة وفعلاً لگينا الحجية تدگ وتلطم بمكانها
3 ساعات وماكو أي خبر منهم
احتارت خديجـة تسكت بتول لو تهدأ بالحجية لحد ما سمعنا الباب انفتح وصاح همام يا الله
همام.. طلعت للمستشفى والطريق كلة عيني على أرشد
دقيقة عن دقيقة لونة يتغير أكثر
وصلت للطوارئ بالمعجزات كل شوية واريد اسوي حادث لأن ما عندي تركيز بالسياقة
أول ما دخلت ركضوا من الباب استلموا مني
ظليت واگف مقابيلهم وعيوني ع الدكتور اتأمل حركة منة ولو بسيطة حتى اطمن بيها نفسي
بس باوع علي هز براسة وباوع للممرض
- لا حول ولا قوة إلا بالله العلي العظيم هذا شبي أبني
- ما اعرف والله توهم جابوا
درت وجهي عنهم لا يا ربي احفظة الخاطر أمي
ربع ساعة واني انتظر
سندت راسي ع الحايط اردد بالأستغفار حسيت واحد طبطب على ظهري باوعت هذا الدكتور
- بشر دكتور
- المريض أرشد شيقربلك
- أخوية
- البقاء لله الله يرحمة بواسع رحمته ويصبركم أبني
بس حچاها رجعت جسمي للحايط استند علي
- مات ؟!!!
زين ليش شنو السبب هو حتى ميعاني أمراض مزمنة
- والله ما ادري شگولك بس للأسف مات
هواي حاولنا حتى ننقذ حياتة
رغم اني چنت جازم على موتة من أول ما وصل وشفت حالتة بس مع ذلك حاولت والنتيجة وحدة
عموماً لازم ننتظر نتيجة التشريح حتى نعرف السبب
بس اگدر اجاوبك من خلال خبرتي
أخوك بالع جرعات كبيرة الـ سيلدينافيل (الفياگرا) وهو اساساً قلبة تعبان ميصير يتعاطى هالحبوب
واضافة للفياكرا الأخ چان سكران كلش
صدگ هم عندك علم اذا كان أخوك يتعاطى أي نوع من أنواع الحبوب المخدرة
لأن هاي هم تلعب دور كبير بحالتـة خصوصاً وهو بهذا العمر الحرج
- اي دكتور يتعاطى وأكثر من نوع
- لعد هاي النتيجة متوقعة للأسف
اجتمعت الأسباب وما تحمل گلبة فـ وگف فجأة
مرة ثانية العزاء لكم والرحمة الفقيدكم انا لله وانا اليه راجعون الله يصبركم
حچاها وراح ما قاومت أكثر گعدت بمكاني بالگاع
- ليش أرشد شلون تسوي بروحك هيچ ؟!!
لك كم مرة وگفت بوجهك
كم مرة توسلت بيك حتى تبطل من هالسم الدتشربة
كم مرة گتلك نهايتك بسببهن اسمع مني وعوفهن
وهاك شوف النتيجة ظليت على عنادك لحد ما خسرت الدنيا والأخرة وعفت كل نزواتك وراك
فركت وجهي حيل استغفر ربي بصوت عالي
رغم كل شي سوى بحياتة بس يظل أخوية الوحيد وما چنت متصور راح اخسرة بـ هالسهولة
حاولت استجمع طاقتي شوية
قويت نفسـي بعبارة كلنا على هذا الطريـق وميدوم إلا وجه الكريم ورحت وقعت على تشريحة
الأجرائات اخذت مني قريب الساعتين
كملت كل شي وظل أرشد يمهم بالمستشفى للصبح يلا يسلمون جثتة النة علمود ندفنة
طلعت من المستشفى حاير بزماني
رفعت راسي الجو مغيم انقبض گلبي أكثر ماهو مقبوض شلون راح ابلغ أهلي بالخبر
تمشيت للسيارة صعدت وسديت الباب
نزلت المرايا اباوع النفسي
يا رب اني ادري بـ أرشد ظلم وأذى هواي ناس بحياتة
بس قبل لا يأذي أي بشر هو أذى نفسة
وماكو اصعب من أذية النفس
الهي اغفرلة وسامحة وارحمة برحمتك الواسعة قويني وعينـي حتى اگدر أربـي بنتـة وما اقصر بحقها لحد متاخذ امانتك وارتاح من هالحمل
مسحت وجهي استغفر وشغلت السيارة
وصلت للبيت
الكل مجتمعين بالصالة
بس شافوني ركضوا علية وأولهم بتول ابتسمت بوجها ومسحت على راسها بهدوء
خديجة.. ها خوية بشر الله يبشرك بالخير ان شاء الله
بتول.. وين أبوية ليش ما اجة وياك احچي عمو لتظل ساكت فدوة اروحلك
همام.. تدرون الحياة الها قانون خاص
كلنا بـ هالدنيا خطار يجي يوم ويصير لازم نسلم الأمانة لرب العالمين ونودع أحبابنا
طيبة.. باوعتلة مصدومة
شنو يعني معقولة أرشد مات ليش وشلون راح اتخبل
خديجة.. شتقصد همام
شنو يعني أرشد مات؟!! حاااااچيني مااااااااات
لا الله يخليك لتگول أخوية عافنا ورااااااح بـ هالسرعة
همام.. البقاء لله خوية كلنا على هذا الطريق
- هو گالها لو مدري شصار بينة
خديجة صارت تدگ وتلطم على وجها حيل
بتول ملخت شعرها وماكو بحلگها غير ولكم اريد أبوية
الحجية شمرت نفسها من الكرسي تبچي
بس خطية محد انتبه عليها لأن كلمن ملتهي بضيمة
أخر شي نزلت الاء على اصواتنا تركض مسوية روحها متفاجأة وتصيح شكو شصاير
أما اني فـ حالتي من الصدمة مستحيل تنوصف
الموضوع نزل علية مثل الصاعقة
ظليت واگفة بمكاني ما احس غير بحرارة دموعي وكل جسمي ينفض مثل مصار بموت عمي بالضبط
فجأة فزيت على صوت همام ديصيح للحجية
التفتت عليهم لگيتها واگعـة على وجها وتبچي بصوت عالي هنا يلا گدرت اتحرك شوية
رفعتها ويا گعدناها ع الكرسي وباس أيدها حيل
التفت على بتول وخديجة كااااافي يمعودات كافي أمي راح تموت بسببچن گولن يا الله صدگ چذب
بس حچاها ركضت خديجة تبوس بالحجية
- الله يخليچ قوي نفسچ يوم لصيرلچ شي لاسامح الله
الحجية.. ولچ خديجة شلون اقوي نفسي
راح أخوچ
أرشد لحگ أبوچ وعافني وحدي الموت الي مو الك يمة
همام.. عمرچ اطول من عمري حجية لتحچين هيچ
هذا قضاء الله وحرام نعترض علي
انتِ مؤمنة قابل اجي اعلمچ استغفري وادعيلة الحچي والبچي ميفيدوا بشي
الحجية.. استغفر الله ربي واتوب اليه
بيومها للصبح ما اخذت عيني النوم
ظليت مگابلتهم وگاعدة ساعة اواسي بخديجة وساعة اصبر بتول على مصيبتها
وارجع للحجية استمد القوة منها لأنها فعلاً من أهل الله حتى بحزنها مميزة بحيث خلصت الليل تصليلة
موت أرشد صدمني كلش وبنفس الوقت خوفني
زين اني شلون؟!!
شراح يصير بية بعد هاليـوم اكيد ما اگدر اظل هنا ولا اني الأعرف شي عن بيت جدي حتى أرجع يمهم
وحتى اذا رجعت
ششوف مـن أبويـة اكثر من الشفتـة والمن راح يبيعني بعد موت أرشد حتى يستفاد براسي
صارت الفاتحة وانخبض البيت بالنسوان
3 أيام مرت بالهوسة
وراها صار البيت شبه ميت لياكلون ليحچون خصوصاً بتول حالتها صارت تصعب ع الكافر
لليل تعبت كلش
الي كم يوم منايمة بس خليت راسي ع المخدة غفيت
فزيت الصبح على صوت بتول دتبچي
باوعت للساعة بثمانية
بالگوة گدرت اوگف من الدوخة طلعت غسلت ورجعت حضنتها احاول اواسيها شوية
- كافي بتول الله عليچ صيري قوية
شوفي وجهچ شصاير بي شنو ما نمتي طول الليل ؟!!
- لا نمت بس شوية وفزيت مداگدر أنام زين
- الله يساعدچ حبيبتي
اني أكثر وحدة تحس بيچ لأن هم مثلچ
فقدت هواي اعزاز
منهم صاروا جوة التراب ومنهم النحرمت من شوفتهم وهم لسة يشتمون الهوى
بس مع ذلك ظليت قوية
لأن هذا حال الدنيا اليوم همَ باچر احنة وتمشي الحياة
- مو بـ أيدي طيبة
احس گلبي يملخني من الوجع البي
مخنوگـة كلش وبالگوة داسحب النفس اشتاقيت البابا حيل مداصدگ بعد ما اگدر اشوفة وانتهى كل شي
- والله أدري وحاسة بوجعچ
بس شبيدي عليچ غير ادعيلچ بالصبر والقوة ومن ربچ الأستجابة
- أبوية مات وراح
يعني انتِ هم راح ترحين لأن أهلـچ اذا عرفوا بـ الخبر مستحيل يخلوچ يمنة مو صح ؟!!
- باوعت عليها وسكتت
- الله يخليچ طيبة لتعوفيني انتِ هم...
بالأول أمي بعدين أبوية
ما ظـل عندي غيرچ انتِ وعمة وبيبي ما اتحمل أخسر أي واحد بيكـم
- هسة مو وكت هالحچي
هياتني گدامچ قابل رحت يلا شيلي هالأفكار من راسچ وگومي حتى نتريگ تلگين الكل گعد
- ما اريد يمعودة ما اشتهي والله
- ماكو متشتهين مو بكيفچ
صارلچ أيام بس ع العصير والماي مو زين هيچ
اروح اسوي الريوگ واجي الگاچ مغسلة وگاعدة بالصالة
حچيتها وطلعت من الغرفة
داروح للمطبخ لگيت الباب مفتوح ع الحجية
مديت راسي گاعدة ع الچرباية تبچي
تذكرت بيبي بموت جدي وعمو حامد هم انكسرت هيچ
مسحت دموعي ودخلت عليها
- صباح الخير بيبي
- هلا يمة
- رحتي للمغاسل لو تحبين اساعدچ
- لا رحم الله والديچ يبيبي خديجة ودتني قبل شوية
- لعد ليش رجعتي للغرفة تعالي للصالة اگعدي ويانة
- تعبانة يمة راسي مو حمل الهوسة
- هو منو اكو حتى هوسة
بعدين ميصير تظلين عازلـة روحچ تالي تصيرين نفس بيبيتي وهالشي غلط
كلنا هنا نتقوى بيچ
واذا تردين نرجع الحياتنا الطبيعية ساعدي نفسچ حتى تساعدينا وياچ خصوصاً بتول مو صح
- هزت راسها بدون جواب
عفتها وطلعت ادور على خديجة حتى تساعدها
بالصالة ماكو
بالمطبخ هم ماكو يربي وينها
رحت للحمام لگيتها واگفـة ع المغسلة وتبچي بـ خنگة
- عمة مو كافي
صارلچ 3 أيام موتني نفسچ من البچي حتى الله ميقبل باللي دتسوي بروحچ
- مو بـ ايدي والله
يظل أخويـة وراح مني فجأة گلبي مديهيد من الألـم
- أمر رب العالمين هذا
واذا ظليتي هيچ بتول وبيبي راح يتعبون أكثر
انتِ اللي لازم ترجعيهم الحياتهم الطبيعيـة مـو غيـرچ
- ان شاء الله عمة
- يلا راح اسويلكم الريوگ
وديري بالچ تگولين ما اشتهي لازم تاكلين علمود بيبي تاكل وياچ وتاخذ علاجها خطية تعبت
- لا اتريگ واني الراح اسوي خليچ مرتاحة
- لا عمة اني اسوي انتِ بس روحي طلعي بيبي للصالة
حچيتها ورحت للمطبخ
بديت اجهز بالريوگ وفكري كلة بوضعي من اليوم اني صرت غريبة عنهم شلون راح اتصرف
يا ترى وين صاروا بيت جدي
ورحمة شصار بحالها من بعدي معقولة راح ارجع التقي بيها بعد فترة بسيطة لو مراح يسألون عني
بلا وعي نزلت دموعي بصوت مسموع
اجاني صوت همام يسأل شبيچ
مسحت وجهي بالحجاب والتفتت علي لا ما بية همزين گعدت حتى تتريگ ويانة
همام.. خلصت الفاتحة واني مشايف النوم بعيني
ثالث يوم ذبيت نفسي
فزيت الصبح على صوت الاء دتگعدني للدوام باوعت عليها وچان انصدم بذاك المنظر العجيب
اللبس الوان صارخة والوجه متروس مكياج
حتى اظافرها مصبغة
گبل عدلت گعدتي هذا شنو حالچ عدنا حفلة وما ادري
- لا منين الحفلة
اذا قصدك ع اللبس عادي لبست اسود 3 أيام الفاتحـة كافي شبع خو ما شبع حتى لبس الأسود مكروه
- لچ انتِ شنو من ملة
ما يوگف بعينچ لا موت ولا غيرة عجيب امرچ عجيب
- هسة اني شسويت قابل
يعني شكو بيها اذا ذبيت الأسود ورى الفاتحة
بعدين اني عروس ما اگدر البس أسود فال مو زين على حياتنا حبيبي واذا ممصدگ اسأل امك
- عاد هسة حياتنا شلونها حتى فال مو زين
اسمعيني ولچ
متردين تلبسين أسود انتِ حرة ما اجبرچ على الأصول بس جوة ما اريد اشوفچ بـ هالمنظر
حچيتها ونزلت جوة كاره عيشتي وياها
وصلتني المرحلـة اتمنى احصل الفرصة المناسبة حتى أكسر خشمها واخليها تطلب الطلاگ بنفسها
ويا نزلتي سمعت صوت بچي بالمطبخ
باوعت هاي طيبة
سألتها شبيچ حاولت تغير الموضوع سحبت الكرسي من الميز وگعدت گبالها ها طيبة خير
- ها شنو
- هذا أرشد وخلصتي منة
وحياتچ ان شاء الله راح ترجع مثل قبل واحسن على شنو دتبچي بعد انتهى زمن الخوف عمو
- ابتسمت بحزن الكلامة
يا ريتك تعرف الخوف من القادم أكثر بهواي من الراح
- ليش تبتسمين فرحانة لأن خلصتي منة
- لا عمو والله لا
صح أرشد أذاني بس مچنت اتمنى الموت لا الة ولا لأي بشر ثاني هذا مو طبيعي ولا تربيتي بس الـ...
- بس شنو ؟!!
- الأبوية
- تتمنين الموت لأبوچ يعني !!!!
- أي وكل يوم مو بس اليوم وراح تظل امنيتي الوحيدة
- تعالي اگعدي هنا واحچيلي شبي أبوچ وياچ
- ما احب احچي عنة
- بس اني حاب اسمعچ طيبة
- ما اتصور راح تحب الشي الي لتسمعة مني عمو
- وأن ما حبيتة هم مُصر اسمعة احچي يلا
- گعدت يمة وحچيت كل شي بس حقيقة موت جدي وعمو حامد خفت احچي بيها كالعادة
- أبوچ هو الكتل عمچ وجدچ تدرين لو لا
- بس حچاها ارتبكت
لا عمو ما اتصور صعب ميسويها مو حب وأنما جبان
- لا طيبة هو الكتلهم اسمعي مني ولتنصدمين
- بچيت ونزلت نظري عنة
أريد اصيح
اريد اگول أي هو الـ كتلهم وبدم بارد بس ابد ما اگدر
- مسحي دموعچ ولتخافين
طول ما اني موجود محد يگدر يأذيچ طيبة ارتاحي
- صالح هم گال هيچ
بس ما گدر يسوي شي گدام أبوية ومكره متعرفة انتَ
- صالح صغير وأمرة مو بـ ايدة
بس اني غير اني وراچ وراح احميچ أوعدچ بـ هالشي
- تدري عمو
أريد ارجع لبيت جدي وارجع لحضن أختي وعمة نهاية
بس خايفة من أبوية اكيد مراح يرحمني اذا رجعت الة
- انسي شي اسمة بيت جدچ بعد تسمعين لو لاااا
- أختي هناك شلون انساها عمو ؟!!
- أختچ الكل يمها لتخافين عليها
بس ما اريد اسمع سيرتهم على لسانچ مرة ثانية شلون الچ نفس تذكريهم بعد كل شي سوا وياچ
- لا همَ طيبين لتحچي عليهم عفية
مو سولفتلك شلون ساعدوني ووگفوا وياية لحد أخير لحظة
- بس ما حموچ طيبة
ما حموچ وسلموچ لأبوچ بكل سهولة وهذا غلطهم الما ينغفر
- مو بـ ايدهم عمو خطية حاولوا ويا بس ما گدرولة
- لا كل شي بـ ايدهم
بس همَ اجبن من أن يواجهون شخص مثل رزاق الكلب
- بس عمو اني....
- اشششششش كافي لتجادلين
انسد الموضوع وبعد تنسين بيت جدچ ما أريـد اسمـع سيرتهم على لسانچ من اليوم ورايح
باوعتلة ونزلت دموعي
هاي شسويت بروحچ طيبة وشلون راح تخلصين مـن هالسالفة استلمي يلا منين تتلگيها حاچيني
اندگ الجرس بـ هالأثناء
راح همام يشوف منو طفيت النار وطلعت من المطبخ هذا منو جاينا من الصبح الله يستر
دخلت بالصالة خديجة والحجية صافنات بوجهي
يمكن سمعن صياح همام لأن صوتة عالي
رحت يمهن سحبتني خديجـة من أيدي شصار طيبـة شبي همام يگولچ انسي بيت جدچ وليش
- سولفتلة مثل ما سولفتلچ عمة وعصب
الحجية.. ليش شبيهم بيت جدها يمة خديجة
خدية.. قصة طويلة بعدين احچيلچ يوم مو وكتها
طية.. عمه منو اجة ما عرفتي
خديجة.. لا وشعرفني عمة
يجوز ناس من جماعة همام جاية تاخذ بخاطرة
بس المشكلة بعد وكت منو اليجي هيچ من الصبح على ريگة علمود يعزي
دتحچي دخل صاح من الباب
- خديجة اخذي أمي وروحي للغرفة ع السريع اجانـة خطار
- منو اجة خوية ؟!!
- يمعودة ناس متعرفيهم فضيني اخذي أمي وروحي
بس حچاها اخذت الحجية وراحت الغرفتها
درت وجهي اروح وراهم صاح بية وين ظلي لتروحين
- ليش ؟!!
- ظلي وهسة تعرفين
باوعتلة بخوف خلة وراح للباب
ظلت عيوني ع الممر شنو الديصير هنا راح اتخبل
شوية ورجع وحدة داحچي چان انصدم بـ أبوية دخل ورى بس باوعلي ابتسم....
يتبع
لتنسووون ⭐⭐⭐⭐⭐⭐
كل الحب ❤🥀