#كمين_الضراير
الحلقه :السادسه والسابعه
بقلم :فاطمه سالم الورفلي
..........................................
....
الا ام فيروز و فايزه وصلوها للحوش وروحو.. بس لما خشت فيروز لقت شي عصابه قدامها 😂.. سندس وامها وشاهين
فيروز :مش على اساس بتروح؟
سندس :ترا اسكتي وانتي كيف الغولة مش عارفه كيف يا شاهين تزوجتها هادي
فيروز :شنييي!.. تي شن تقولي انتي
زينب :خلاص خلاص عاد اسكتو
فيروز :شاهين شد مرتك هادي
سندس ايديها في وسطها :هدا الحق هيا شوشو نعست اني
شاهين :اركبي تو نجيك
فيروز بلعت ريقها بخوف:هاتي زينب المرايا نبي نشوف روحي
سندس في نص الدروج:ههههاي ما ننصحكش تتهوري واديريها يا فيروس اا سوري قصدي فيروز
زينب تبي تغير الموضوع :اا فيروز خشي لغرفتك امشي ارتاحي اكيد تاعبه وحتى انت شاهين امشي مع عروستك
فيروز :زينب هاتي المرايا لو سمحتي
زينب هزت كتفها :هي تصبحو على خير
-وطلعن ام شاهين وزينب.. وخلو فيروز حايسه في بعضها
سندس :يلا بيب نستنى فيك
ام سندس :تعرف يا شاهين نلقى بنتي تشكي من شي مش ح يصير خير وهاني قلتك هالمره روحت بيها ومانبيش نشنع المشكله ونوصلها لي خوتها وبوها
شاهين :لالا كوني مطمنه ان شاء الله
ام سندس:هي مالا تصبح على خير
-شاهين :وانتي من اهله عمتي
-اما فيروز سيبتهم هم الاثنين وركبت لدور الرابع.. لان مصورلها شاهين كل شي لما كانو مخطوبين والشقه تعرفها.. ركبت ولقتها مفتوحه .. طول خشت لدار النوم.. واول ما جت عينها على المرايا.. شافت روحها.. وصكتها عيطه قريب طاحت على طولها 😂.. لقت الضلال لونه اسود.. وروج موفي .. واحمر الخدود بني يعني شكلها اشبه بشكل الجوكر يخي احرف 😂.. جي يجري شاهين من دور الاول للرابع.. وسندس تجري فرحانه تحساب فيروز ماتت😂.. فتح عليها شاهين الباب و وراه سندس
شاهين :خيررك.. خيرك تعيطي يا مراه؟
فيروز حاطه ايديها على وجهها :اطلع برا شاهين اطللع
-ماصدقت سندس عاد 😂.. وشدت شاهين من يده.. وهو يحساب فيروز لزاته..
سندس :انت مش عارفه علاش تزوجتها.. يلا حبيبي فوتها ما دورهاش
..............................
...
اما فيروز فاتت عليها ليلة كلها دموع.. وتحساب شاهين لما قالت له اطلع.. تحسابه بلعكس ح يخش ويهديها ويطمن عليها ده كان زمان ياروحي 😂.. توا مع سندس انسيي خالصص.. اما سندس وشاهين.. تعالو نشوفوهم شن يديرو
سندس :شاهين اني تعبت.. انت كان تشوف ورده وعبير كيف ضربوني
شاهين تنهد وهز راسه :اها
سندس زعميتها تبكي :وكان تشوف زينب.. زينب اختك الموصونه خلت الشغالات يطلعن واني نغسل الماعين..
-شاهين.. طلع طرف دخان و ولعه وقعد يدخن بملل..
سندس :وحتى ست الحسن فيروس مش فيروز هدي.. خدت حصتها فيا ورافعه خشمها عليا كسري
شاهين نفخ الدخان :وشن تبيني ندير يعني😴
سندس فنصت عيونها :ها يعني راضي انت!.. لا شكلك راضي.. راجل بشناباته مرحرح هك كبره وهك طوله وعرضه.. ومخلي مرته مهزوبه.. للعلم كرامتي من كرامتك يا شاهين "وخدت المبرد من على الزيانه وقعدت تبرد في ضوافرها بسرعه من التوتر "
شاهين :دوه نسوان هدي.. المهم اني كويس معاك ولا
-سندس قلبت عيونها وهك قعد فيسها "🙄"
شاهين ابتسم وقرب منها:ولا ياسمحتي..
سندس تحشمت: ايي ❤
شاهين :ايوااه والباقي مش مهم.. وراجلك توا جيعااان ونبي ماكلة من يدياتك السمحه يا سمحتي
سندس مبتسمه :حااضر ادلل يا حبيبي ادلل "وناضت تجري المريوحه ما تحساباش يوزع فيها باش يتصل بعروسته😂".. ورن على فيروز ردت طول
فيروز:شن تببيي
شاهين :الناس تقول اهلين مساء الخير .. خيرك؟
فيروز :هدا اسلوبي شن لي تغير يعني!
-شاهين ما عجبش الوضع صكر عليها.. طبعا دار هك عشان خلاص ضامنها تحت طوعه😂.. مش زي زمان.. وفيروز شاطت فيها النار قعدت تتصل.. وهو تحسابوه دور!.. ابدداا طلع من الحوش يسلحب بسرعه عن نشوفه سندس.. ومشي عاد الشبوب لمطعم يونس في رويحته.. ودورا تجي القرسونه.. هداكا الطول والحشم.. والزين المعرم.. عمكم شاهين قعد غير مبحلق عيونه فيها
القرسونه :شن تبي تفضل يا استاد
-شاهين سارح فيها وخلاص 😂
القرسونه :احمم يا عمي
شاهين فطن لروحه وعجبتاش كلمه عمي 😝: احم احم " قعد يواسي في قرواطته وقال "..جيبيلي حاجه على ذوقك
-مشت القرسونه وعطاته بظهرها.. وهو شي ما واطاش عيونه منها 😂.. معاها بخطوة خطوه دبه بدبه.. وتمخطر يا عمي الشيفووني وامشي دبه دبه ايواااه😂.. خلاص هي خلي نكملو روايتنا.. شوي وجت القرسونه
شاهين :اسم الكريم شنو!
القرسونه فنصت وقتله: نعمم شني
شاهين تخزرط :اسمك الاسم شنو!
القرسونه :همم رويدا.. الاسم رويدا ارتحت!
شاهين :هه هه اي ايي عاشت الاسامي رويدا .. اني شاهين " ومد ايده بيسلم "
-تمشي رويدا ما بتش تسلم عليه.. وحطت مق القهوه في ايده وعدت.. وهو تحسابوه يأس!.. لااا ابدا بلعكس هدا وين بيعنكش فيها 😂بأيديه ورجليه ويخي سنونه😂😂.. ناض وخله حتى الفنجان .. ولحقها.. في جرتها.. وهي ولا كأنه
..........
عند رويدا :
صاحبتها :هدا شكله طاح فيك يا رويدا
رويدا :تي هادا نسونجي فكيني منه متزوج اربعه
صاحبتها :وكيف عرفتي!.
رويدا :ومنو ما يعرفاش يسكن اهو في اخر الشارع ليوم الزفه على الرابعه يخي
صاحبتها :شكله فلووس
رويدا :متزوج اربعه نقولك بايته ما عندي ما ندير
صاحبتها ضحكت:متزوج ويطلق وين المشكله 😂
رويدا :مش لهدرجه عاد
صاحبتها :اقعدي مع مرت بوك تو ينفعك العناد
رويدا :اخطيني ترا دوتك فاضيه
صاحبتها :المدير يشيرلك ره
رويدا :تبصرري اووف هدا لي عليه الكلام يجلطط.. استني مكياجي مساوي!
صاحبتها :ياودي ايي غر امشي
رويدا :غر طلعيلي روج الاحمر فيسع
-وقعدت رويدا تواسي في روحها وتبخبخ في الصنه.. وتعدل في مكياجها
صاحبتها :تي سادك امشيي
رويدا:بااهي بلا زنين
-ومشت رويدا.. ونصدمت.. لقت مديرها مع السي السيد شاهين 😂
المدير :خيرك ما ضيفتيش الافندي اخر ضيافه معقوله فنجان بس!.. هدا مايجي في حقه شي لو كان نفرشو له الارض ورد
شاهين :بشوي على البنت يا حاج.. معليشي ما صار شي
المدير :تي لا كيف هك كيف ما يصيرش هكي عاد
شاهين نفخ روحه :معليشي معليشي يقولو لي ما يعرفكش يجهلك
المدير:عن اذنك شوي بنشوف الراجل هدا ونجي
شاهين :تفضل تفضل خود راحتك
المدير :راجعلك ها
-وقعدت عمتك رويدا تنتفض كيف المروحه.. ترعش رعيش .. و شاهين استغل الفرصه عاد 😂
شاهين:عطيني رقمك
رويدا فنصت فيه :نعمم
شاهين بخبث: عطيني رقمك بالهدوء.. كا تعبينيش.. لان نبيش تصير معمعه.. وتخسري شغلك وانتي عارفه الباقي
-حست روحها رويدا ح تخسر.. فا ملت عليه الرقم غلط.. بس هو ازقط منها.. رن على الرقم ورد عليه ولد وتليفونها في ايدها 😂
شاهين :تجري بيا انتي!.. هاتي رقمك اخر مره نقولها
رويدا :.. يتبع
......................
الروايه معاش مزال عليها هلبا.. واسفه على التأخير حبايب ❤وتفاعلو وقولو رايكم وتوقعاتكم❤
#فاطمه_سالم_الورفلي