أبي لم يكن إنسانًا

البارت 18

#أبي_لم_يكن_إنساناً
البارت الثامن عشر
للكاتبة لبنى الموسوي

باوعت على بتول ضايجة
- كلام الاء هو الصح ما چذبت عليك بشي ي يمة

ظليت صافنة عليها بصدمة
التفتت على بتول حتى لونها بهت خطية
توني أريد احچي
رفعت أيدها سكتتني وتقدمت على بيبيتها وگفت بينها وبين همام تعاتبها على الموقف

- ليش بيبي ليش
تچذبيني علمود هالحية الصفرة
على شنوووو دتدافعيلها الخاطر الله على شنووووووو

همام.. بتوووووول
حسچ ما أريدة يعلى على بيبيتچ تسمعيني لو لاااااااا

بس حچاها ركضت الاء باست أيد الحجية
- اسفة خالة
خاف رفعت صوتي عليچ بدون قصد ترى انتِ هم مثل أمي الله يشهد علية

بتول.. شوف الچذب شوف
منو الچان يضحك عليها لأن گالت اعتبريني مثل أمچ

التفتت على همام تبچي
عمو والله العظيم وداعتك عندي وتعرف شگد أعزك
الموضوع بالضبط مثل ما گتلك
بس بيبي دافعت الها علمود لتكبر المشكلة وإلا اني ليش اتعارك وياها بدون سبب قابل مخبلة

- يعني مُصرة ع الچذب ؟!!
- لا والله ما اچذب هي هاي الحقيقة بس شلون تصدگ اذا بيبي نكرت اكيد مراح تصدگني وتچذبها

الحجية.. لا وليدي بتول ما چذبت
تظل تربيتـي وتربيتـك واحنة ما ربيناها على الچذب

الموضوع وما بي
هي من دخلت للبيت سمعت الاء تحچي وياي بصوت عالي فـ فهمت السالفة غلط وظنتها دتتعارك

همام.. اثنيناتكم احسابكم وياية حساب عسير
انتِ الـ صوتچ العالي
وانتِ الثانية الـ أيدچ الجسرة
اني اعلمكم وروح أبوية إلا أعيد تربيتكم من جديد بس اصبرولي الظاهر ميفيد وياكم العيني واغاتي

حچاها وصعد الغرفتة
ظلت بتول تدردم وتعاتب الحجية
أما الاء واگفة بينهن عيونها تتنقل بين هاي وهاي مدري بشنو دتفكر الله يستر منها

بعدني صافنة عليهم تذكرت خديجة
التفتت عليها
چان انصدم بمنظر وجها كلة كدامات ووحدة من عيونها مطفية بس محد انتبه عليها من الهوسة الصارت

تركت الهوسة وراية ورحت الها ركض
- يااا عمة شصاير وياچ هذا شنو وجهچ بس لا واگعة

- لا حبيبتي مواگعة
- لعد ؟!!
- سالفة طويلة وحتى لو حچيتلچ مراح تفهمين علية

الحجية.. يمة خديجة شبيچ
لا تگولين سلام النگس سواها ومد أيدة التنكسر عليچ

بس حچتها نزلت دموعها وركضت الحضن الحجية
- يا ريت بس ع الضرب يمة چان گلت يهون
بس هو دمر گلبي
موتة يوم بحيث وصلت المرحلة ما أتحمل بعد طيشة وسوالفة المكسرة

- حسبي الله ونعم الوكيل بيك سلام
حسبي الله وهو حسبي ونعم الوكيل ولك وين تروح من ربك ع الدتسوي بـ هالمسكينة

- يلا يمة خيولي لتحرگين دمچ بسببة هو ورب العالمين
- منو جابچ لهنا ؟!!
- اتصلت بـ همام الصبح وانتظر سلام يجي وأخذني

- بس لا تعارك ويا وضربة ؟!!
- اكيد يمة تعاركوا
- صخام الصخمني وشسوة أخوچ خو ما كسرة
- جنزة يمعودة وگلة محتشوف خديجة حتى بأحلامك

الاء.. حلوووووو
حلو والله حلو چانت عايزة التمت
اخاف يعني السالفة ناقصة هوسة هسة كملت للأخير

خديجة.. شتقصدين بلا ؟!!

الاء.. لا عيني قابل شقصد
ليش هو اني هم الي حق أتنفس بـ هالبيت الأگشر

حچتها وصعدت فوگ
ظلت خديجة تباوع وراها بصدمة
باوعت للحجية تهز براسها وتستغفر گامت بتول نترت بكل صوتها

- شفتي بيبي كله من وراچ انتِ
طلعتيني چذابة گدام عمو ودافعتي عن هالعگربة
وهاي تالي النتيجة
شافت نفسها علينا وما تحملت حتى وجود عمة بيناتنا اليگول هالبيت بيت أبوها ومندري

خديجة.. يمة شنو السالفة ؟!!
يعني كلام بتول صح مدتدخل العقلي الاء تسوي هيچ

الحجية.. اي بنيتي مدري شجاها هالبنية
شدت راسها وياي من الصبح لسة
لا هي الودتني للمغاسل ولا قبلت تنطيني لگمة أكلها
وبس أفتـح حلگي تستلمني حچي ما أريـد حتى أذكرة

خديجة.. لعد ليش محچيتي هالكلام گدام همام يا يمة

الحجية.. صدگ چذب خديجة
عود هاي انتِ الچبيرة والعاقلة بعد ما اعتب ع الصغار
ما سمعتي أخوچ شگال قبل شوية
شنو تردين أخرب بيتة بـ أيدي وهو مصارلة كم شهر من تزوج مو حتى الله بعرشة هم ميرضاها

بتول.. لعد الله يرضى تعاملچ هيچ ونسكت الها ؟!!

الحجية.. ي بيبي البنية ما تزوجتنا تزوجت عمچ
وما طول هيچ فـ مسؤوليتها همام وبس
ممجبور تداريني وتشيل وتخلي من گدامي هذا الشي لازم يكون من ذاتها
لأن الدين ما فرضـة عليها شلـون تردين احنـة نفرضـة

اني لوما هذا العجز الـ الله كتبة علية
چان ثگلت على بشر
بس شسوي أمر رب العالمين والحمد لله على كل حال

طيبة.. شنو هالحچي بيبي
متدرين شگد نفرح من تطلبين من عدنا شي
ليش اكو عاقل بالدنيا يرفض حسنات مجانية اصلاً وين لاگيها غير ببركة وجودچ بـ هالبيت الله يحفظچ النة

الحجية.. الله يجبر بخاطرچ ي بيبي

خديجة.. يمة ياما تعبتي وسهرتي وربيتي لحد ما انهد حيلچ من حملنا الثگيل
هسة تردينة نتعب منچ لو نتضجور من خدمتچ وسفة والله لعد خيرنا المن اذا مو الچ 

الحجية.. أريد الله يخليكم الي ويبارك بعمركم ويرضى عليكم دينا وأخرة بجاه الحبيب محمد

حچتها وباوعت الـ بتول
- بيبي بتولة
سامحيني أدري اذيتچ بس شسوي هاي شوفت عينـچ

عمچ حلف يمين عظيم يطلگها اذا عرف بالحقيقة
واكيد انتِ ميهون عليچ نخرب بيتة على الأقل لخاطرة هو اذا مو لخاطرها وهي لساتها عروس

بتول.. لا بيبي عادي فدوة الچ صدگ چذب
بس وحق القرأن
مرت الثانية اذا بس أسمعها ترفع صوتها النگس عليچ
لو حتى تعاملچ بسوء إلا اسحلها هيچ من شعرها واني اطلعها من هالبيت بنفسي ما انتظر عمي يتصرف

الحجية.. دگولي يا الله ولچ شجاچ تخبلتي

بتول.. هي بس خل تتجرأ وتعيديها
وراح تشوفين ساعتها بعيونچ الخبال شلون يصير بيبي

بعدهم يتناقشون سمعنا صوت همام نزل ليجوة
ما فهمنا شيگول لأن الكلام مواضح
شوية ونزل بوجهة للباب
فتحها وطلع حتى مسلم علينة رغم الحجية شگد ظلت تصيح ورى بس ما رد بحرف واحد

الحجية.. ها شفتن
هاي صارتلة مشاكل ويا مرتة بسببنا ارتاحيتن هسة

بتول.. بيبي احنة شعلينة
اشو همَ من يوم يومهم مشاكل من أول ما تزوجوا
وياريتهم ما تزوجوا
مو چنا مرتاحين شجابنا على هالضيم وشدخل العگربة البيتنا شدعي عليك عمو الله يسامحك بس

خديجة.. اي يمة كلام بتول صح
لتلومين روحچ
سودة علية أخوية ما شاف الراحة من زواجة ولهاليوم

اشو خلصتها بس تنق براسة
يلا الحمد لله والشكر هي قسمة وصارت بعد
الظاهر حظة مثل حظ أختة مايل وراح يبقى مايل الله كاتب علينة وين الأعوج من سلام وشيلي أيدچ

طبية.. يا عمة شنو هاي يعني اني هم عوجة مثلهم

خديجة.. ههههههههههه
لا يا بعد عمتچ ما قصدتچ اني تعرفين قصدي كلش زين

طيبة.. ههههههههه
اي ادري بس حبيت اتشاقى وياچ شوية حتى الطف الجو

خديجة.. يلا دروحن غيرن ملابسچن بين ما أصب الغدة هاي اذا طلعت الخاتون طابخة شي

الحجية.. لا يمة طبخت اني شفتها دتشتغل بالمطبخ
خديجة.. بركة والله يحتاجلها هلهولة

ابتسمنا الكلامها ورحنا ع السريع بدلنا
طلعت اساعدها بالحجية لگيتها مكملة كل شي وواگفة بالمطبخ تصب بالأكل

شغلت التلفزيون ع المحاضرة الدينية ورحت وراها
نقلنا الأكل للصالة وگعدوا ياكلون
رحت جبتلهم الماي توني داگعد وگفني صوت خديجة

خديجة.. بطة بلا أمر عليچ صيحي الاء تتغدة ويانة

بتول.. لحظة شنو تصيحها ؟!!
اگعدي طيبة والله فـ لا تصيحيها ننطيها سم مو غدة

خديجة.. عيب عمة شنو السالفة
بعدين هاي تظل مرت عمچ ميصير تحچين عليها هيچ

بتول.. هو شطيح حظنا غير العيب والميصير
دروحي للمرايا باوعي على وجهچ بعدين گوليلي عيب

التفتت على خديجة نزلت راسها مقهورة
- بتول شجاچ اليوم ؟!!
شلون دتحاچين عمة بهالطريقة اعتذري منها ع السريع

بتول.. اسفة عمة والله مو قصدي
بس گلبي محروگ
ذيچ انتصرت واني طلعت چذابة حاچيني شسوي حتى ارتاح مو والله شوية واطگ من القهر

حچتها وگامت من الميز لزمتها من أيدها حيل
- وين رايحة بتول مو نريد نتغدة

بتول.. ما اشتهي اكلوا انتم صحة وعافية ان شاء الله

رخيت قبضتي منها ودرت وجهي ضايجة
منا الحجية وكسرت گلبها
ومنا بتول وهمام الما اعرف وين راح بدون غدة
ومنا خديجة الـ الله يعلم شصاير بينها وبين رجلها حتى تجينا بـ هالمنظر الصعب اووف يربي شلون تالي

ردت اگعد رجعت خديجة طلبت مني اصيح الـ الاء
صعدت دگت باب غرفتها أربع مرات مردت
عرفتها مراح تفتح خليت ونزلت تلگتني خديجة ها بطة شو وحدچ شگالت الاء

- كل شي مگالت عمة اصلاً مزحمت نفسها وجاوبتني

خديجة.. خليها على راحتها
المهم احنة سوينا العلينا حتى لا تصير الها حجة بعدين

طيبة.. اي صح
خديجة.. يلا تعالي أكلي حتى تنامين شوية

بس حچتها كعدت وياهم أكل لگمة واصفن عشرة
ما اشتهي شسوي
بالي بالمشاكل الصارت اليوم شلون راح تفض وهم راح ترجع الاء تتجاوز على الحجية وتأذيها ؟!!

شوية وگمت للمطبخ
صفيتة وجابت خديجة المواعين غسلتهن وشربت ماي

نعسانة بس ما اريد انام شلون ما ادري
طلعت من المطبخ
لگيت خديجة ماخذة الحجية الغرفتها وگاعدة وحدها مشغلة التلفزيون وصافنة علي رغم أعلان طالع

تمشيت بهدوء سحبت الريمونت وطفيتة
گبل التفتت علية
- ها عمة شنو يعني اليوم مراح تحچيلي شصاير وياچ

- بعد بطة متفهمين لأن هالسوالف أكبر من عمرچ

- ها هسة صارت أكبر من عمري
بس من نجيب سيرة أرشد تخبصيني كبرتي وكبرتي

- ههههههههههههه
صدگ على طاري أرشد شصار ما صار الچ يومين ماكو

- غير انتِ متسأليني
- وهاي هسة سألتچ يلا سولفيلي صار وياچ شي جديد

- لا عمة شيصير يعني
مثل كل مرة يصيح ويضرب وراها يطردني من الغرفة

- اي زين الحمد لله
- عمة سؤال
- جواب حبيبتي ولو يمكن عرفت شراح تسألين

- ما ادري اذا عرفتي أو لا
بس اموت وافهم ليش يصيح علية وهي الشغلة بايدة مو بـ ايدي هذا الراح يخبلني

- هسة راح افهمچ ما طول اعترفتي بديتي تكبرين
- صفنت عليها بتركيز
- اول شي جاوبيني حالياً تگدرين تميزيين بين البنيـة والمتزوجة لو احچي منا وتنسين منا

- اكيد عرفت عمة
- يعني انتِ هسة شتشوفين نفسچ بنية لو متزوجة

- شوفي هي السالفة الها أتجاهين
اذا على اساس الشي اليميز بين المتزوجة والبنية فأني لسه بنية أما الواقع يگول عني متزوجة

- ما عرفتچ تصدگين هههههههههه
اي هيچ اريدچ
عفية عليچ والله هنا ثبتيلي صدگ بطتنا بدت تكبر

- هههههه شلون لعد عمة خوما نظل صغار

- اي هم صح
ديلا هسة اسمعي شراح اگولچ كلش زين
بينچ وبين أرشد لحد الأن مصار شي
والسبب اكيد تدبير من رب العالمين لان يحبچ وبنفس الوقت راد يكسر خشم أرشد بعد كل شي سوا ببنات الناس 

- أعرف مصار شي بس ليش عمة هذا الما عرفتة لسة

بدت تشرحلي واني مركزة ويا كل حرف تحچي
واخيراً فهمت القصة وارتاح گلبي
عرفت أرشد صاير عندة ضعف لذلك مگدر ياخذني طول هالسنة الراحت رغم محاولاتة المتنهي وياية

وحسب كلام خديجة
أرشد متزوج قبلي هواي وأغلبهن چانن بنات
ورغم هذا گدر يكسرهن عادي وبعد فترة يمل ويشمرهن حتى يجدد ويا التجي على مزاجة

بس وياية انعكست الأمور كلها
ما اعرف بختي هذا لو بخت البنات الظلمهن ويا
المهم رب العالمين هدة بالأخير ووگفة عن هالظلم الما چان راح يوگف عنة لو ما أرادة الخالق

باوعت الخديجة صافنة علية دنگت خجلانة
- هاي شنو بعدچ تستحين

- أي والله عمة الكلام يفشل مدري اني استحي زيادة

- لا حبيبتي هالكلام ما بي خجل
انتِ بعد تعتبرين متزوجة يعني لازم تتعلمين كل شي

- اي هم صح
هسة شنو مراح تحچيلي شصاير وياچ
عاجبني اشاركچ همچ مثل متسوين انتِ وياية كل يوم

- اووووف يا طيبة شحچيلچ
اني تزوجت سلام وعمري 18 سنة يعني فتحت عيني علي وحبيتة حب ما صاير والله
رغم ابد مچنت اعرفة قبل الزواج بس هاي بعد من رب العالمين زرع حبة بگلبي بمجرد اجة دگ الباب وخطبني من أهلي حالي حال اغلب البنات

- أي وشصار بعدين

- همام چان رافض ما أعرف ليش
بس أرشد وافق
گال اني سألت علي وطلع خوش أدمي وأبن ناس
واذا تگولون لسة خديجة صغيرة شكو بيها خليها تربة على أيدة هيچ أحسن الها والة

بس بسبب همام مصارت القسمة بسرعة
ظلت سلام رايح جاي
ما خلة شي ما سوا حتى ياخذني
ألف مشية جاب وسبعين عمامة خلة وبـ 12 أمام حلف راح يصوني ويحافظ علية بس المهم يوافقون

ولأن أرشد هو چبيرنا مشت كلمتة على همام
وافق وتزوجنا
بـ أول شهرين عشت ويا ملكة الكلمة تطلع مني أمر وهو ينفذها حتى حسدت نفسي على هالسعادة

وليش ما احسدها واني حصلت كل هذا
بيت وحدي لأن أبو وأمة متوفين الله يرحمهم
وقريبة من أهلي يوميا اروح الهم حتى ما لحگت ابچي عليهم لو اشتاقلهم مثل باقي البنات
ورجال ميرفضلي طلب ويباوع على حلگي شطلب ينفذ

- زين وبعد هالشهرين شصار ؟!!

- بلش سلام يتغير
يوم بعد يوم صار يظهر على حقيقتة أكثر وأكثر
اكتشفت بي شخص ثاني
إنسان غير يختلف تماماً عن ذاك الإنسان الحبني وحارب حتى يوافقون علي أهلي ويزوجوني الة

- ياااا شطلع لعد بس لا مثل أرشد

- ههههههههه
الله ينطيچ العافية بطة ضحكتيني واني ضايجة

- هههههههه
لعد شنو والله بعدني ما اعرف بسوالف المتزوجين

- اتعس سوالفهم عد سلام وداعتچ
أول شي اكتشفت بي يشرب بس مو كلش هواي
وماكو شهرين وگطع الصلاة
تالي طلع لا يصوم ولا يصلي بس تظاهر بالأيمان گدامي لأن بعدنا ببداية زواجنا

هاي من غير السوالف المكسرة
حياتة كلها عباره عن نسوان بنسوان يوميا ويا وحدة شكل يتونس وياها فترة وراها يصادق غيرها

- يا عمة صدگ چذب
لعد ليش ما سألتوا زين قبل لتتزوجين شخص مثلة

- مو گتلچ أرشد گال سألت
وسوا ملاك خوش أدمي والناس كلها تحلف بـ أخلاقة

- أرشد ؟!!
وليش مو همام اليسأل شلون تأمنين بـ أرشد يا عمة

- شبيچ طيبة ركزي
مو گتلچ همام چان صغير وأرشد المسؤول عني وعنة

- اي صح گلتي
بس شسوي بسبب مصيبتچ ما ظل عقل براسي
يلا دكملي شلون صارت حياتكم بعدين وانتِ شسويتي

- شلون صارت يعني جحيم الله وكيلچ
حاولت ويا هواي وصبرت أكثر وجرعت المر علمودة

تحملت أنحرم من الأطفال وهو السبب
وتحملت أتبهذل بين بيت أهلي وبيتة واظل طول النهار أركض بس حتى أرضي وما أقصر علي بشي بس كل هذا شلتة وشمرتة بالشط لأن سلام هو هو ما تغير ابد

- يعني هو دائماً هيچ يضربچ
- لا ابد عمرة كلة ما ضاربني هاي أول مرة يمد أيدة

- لعد ليش ضربچ هالمرة اذا ممسويها من قبل

- لأن طلعت روحي واني ساكتتلة طيبة
لأول مرة اتمادى ويا واطلع من طوري بعد ما طلعها من ماعونها بسوالفة التعبانة

- عزة شلون يعني ضربتي

- ههههههههههه لا ولچ مو لـ هالدرجة بعد
- مو انتِ گلتي تماديت ويا

- بالكلام يعني
بس اسكتي لتقاطعيني حتى تفهمين كل السالفة

- اي يلا احچي سكتت

- مليت واني اشوفة هاملني طول اليوم
النهار يخلصة بالشغل
وبالليل يجي ياكل ويروح يگعد وحدة بغير غرفة على أساس يختنگ من غرفة النوم مالتنا

اكيد اني مو غشيمة وادري بي ديخابر بنات
فـ كل شوية ادخل علي
بس يشوفني يسد التلفون هاي قبل چان أرضي وهسة اجانة هذا غضب الله الموبايل

اسألة ويامن چنت تحچي
ويا صديقي
وهو اني چنت واگفة بالباب واسمعة شلون يتغزل بيها بكلام اني مرتة ما سامعتة من عندة

واجهتة كم مرة ينكر
ومرات ينلگف ويحلف بعد ميعيدها وراح يبطل سوالف البنات ويقطع كل علاقاتة واني اجاري مجبورة

لحد البارحة طگت روحي بعد
واگفة يم الباب اتسمع علي چان يگولها مرتي ما عدها **** مثلچ هنيال الياخذچ على هالجسم الشايلتة

هنا اني فقدت أعصابي
فتحت الباب ودخلت علي كالعادة بس الصدمني ولچ ظل فاتح الخط عينك عينك ما سدة منها

وهاي أول مرة يسويها
كل مرة يخاف ويحاول يطمطم السالفة بأي عذر
لا والأتعس من كل هذا ظل يتغزل بيها گدامي ويباوع لعيوني بصلافة حسيت گلبي راد يوگف 

- يا يمة الله يساعدچ شلون تحملتي هالموقف
باوعت عليها ضاجت
حاولت اغير الموضوع اي يلا كملي شسويتي والله هنا صدگ يستاهل الضرب لأنه مو رجال

- أخذت الموبايل منة ورگعتة بالگاع كل قوتي
وراها بديت اعد واصف علي وعليها
گتلة بيك خير أهتم بية گلبني گول عندي مرة تحتاجني بدل ما مخلصها حرام بحرام
بس شحچي وياك ليش انتَ رجال وتتعاتب حتى حرام هالشوارب ظالات على وجهك زينهن أحسن

ولتسأليني شسوة
هاي شوفت عينچ هذا السوا بية حسبي الله ونعم الوكيل

- والله عمة متستاهلين هيچ رجال مع الأسف تزوجتي

- الحمد لله على كل حال قسمتي بعد
- وهسة شنو راح ترجعيلة
- لا بعد ما اتحملة أكثر لهنا وكافي خلص صبري ويا

- يا يعني تردين تتطلگين منة

- والله ما ادري شگولچ
بس حتى لو ما ردت مستحيل همام يرجعني الة متدرين شسوة من اجة ياخذني راد يكتلة گوة خلصتة من أيدة

- يستاهل والله

ظلينا نحچي أكثر من ساعة حتى ما حسيت بالوقت
كلش انقهرت عليها
عبالي بس اني ما عندي حظ طلع كل الـ بالبيت هنا ما عدهم حظ مثلي ومكتوب عليهم التعب

بتول وحياتها بلا أم وأب
الحجية الطيبة المكسورة بسبب مرضها ورغم كل هذا متحچي شي ولا نسمع منها غير الكلمة الطيبة

وهمام ذاك الشخص الخلوق الحباب
صاحب الگلب الطيب
بالأخير صارت قسمتة وحدة مثل الاء متعرف بحياتها شي غير بس الحقد والغرور

وأخير نصيب من الحظ التعيس صار الخديجة
هاي اليتمناها أحسن رجال بالعالم على الجمال والأخلاق والحنية الشايلتهم
تالي وگعت بواحد مثل سلام وانحرمت حتى من نعمة الأطفال وهي عدها حنان يكفي الدنيا وما بيها

لليل وماكو أي خبر من همام
حرگنا الدنيا بالأتصالات علي ولا رد علينا
وهيچ الحجية تخبلت
حتى خطية ما اشتهت تاكل من خوفها علي رغم ظلينا نلح عليها تاكل علمود العلاج بس ماكو

أخر شي خديجة گالت الها يمة لتخافين
احنة متعودين علي كلما يضوج يختفي وميرد على أحد هسة لليل يجي وين يروح يعني

الكل راحوا الغرفهم ينامون
متمددة يم بتول وعيني ع الساعة وين صار مو عبرت الوحدة وحظر معقولة مراح يجي

بعدني احچي ويا روحي
سمعت الباب الخارجي انفتح طفرت من مكاني
ذبيت الحجاب شلون مچان وطلعت أركض للمطبخ
سويت روحي أشرب ماي
ما اعرف شنو السبب يمكن لأن اريد أعرف وين چان

همام.. المشكلة الصارت طيرتلي عقلي من راسي
عفتهم وصعدت فوگ التفكير ماكلني أكل المن اصدگ والمنو اچذب بـ هالموقف

المشكلة بتول تربيتي وأعرفها متچذب
وارجع واگول أمي هم متچذب لو على گص رگبتها ما معقول علمود تحمي الاء تسويها !!!!

زين لعد تعقلها همام
بتول تحچي كل هالكلام اذا ماكو شي حقيقي بالموضوع

هنا حسيت بنفسي تربطت صدگ
ما اگدر اتصرف بعد لا بية أطرد الاء لأهلها لأن ماكو شي يثبت سوايتها بعد ما أمي نكرت
ولا اگدر اسكت الـ بتول اذا هي غلطانة لأن راح يتكرر هالموقف وهنا الكارثة

التفتت ع الكنتور استغفر ربي بصوت عالي
داطلع الملابس دخلت الاء
هاي فوگاها همام تهدد بية بدل ما تلزم بتول وتعاقبها ع التجاوز البدر منها بحقي

- تدرين كلش زين منو المتجاوز
وتعرفين منو اليستحق العقاب لذالك اسكتي واسلمي على لسانچ الطويل أحسن الچ والي الاءءءء

- شنو قصدك ؟!!
- فهمتي قصدي كلش زين ميحتاج اوضح

- شنو انت همام الخاطر الله ؟!!
مشفت بعينك شلون چانت تضربني وتغلط علية وهي كلها بطول النعال
بعدين مو أمك گلتلك الاء تحچي الحق ليش مُصر على عنادك اريد افهم اني مرتك لو عدوتك حتى تعاملني هيچ راح اتخبل بسببك والله

- اوعدچ اني راح اظل ورى هالموضوع
لحد ما اتأكد من الحقيقه وساعتها اذا چان الچ حق راح تاخذي من بين عيوني

بس ثقي بالله
لوعرفت انتِ العايلة أو عرفت الكلام السمعتة من بتول حقيقي وانتِ متجاوزة على أمي
وصدگ مسوية بيها كل هالفصول الناقصة ساعتها هاي الـ الله كتبها عليچ الاء

- شبيك انتَ !!!
شو فوگاها دتهدد شنو تايهتلك اني ما عندي أهل قابل

- وانتِ ليش ضجتي واخذتي التهديد على نفسچ
لو فعلاً ممسويه شي فـ المفروض ميهزچ لا هالكلام ولا غيرة لأن الحق وياچ

- اي طبعاً ممسوية شي وهسة تشوف
بعدين تعال گولي شنو هاي خديجة جاية زعلانة هنا
وصدگ هذا السمعتة على اساس انتَ تريد تبقيها يمنا ومترجعها لرجلها بعد ؟!!

- بيت أبوها وأخوتها
تجي شوكت متحب وتروح شوكت متحب عندچ مانع

- والله بعد ولا أتحمل لهنا وبس
مو كافي أخوك ومرتة وبنتة هالنوب أختك وتعالي يا الاء خدميهم ما طلعت هاي شنو ابتليت عرست

- ااااااااسمعيني لچ
هذا البيت بيت أبويه يعني مثل ما هو بيتي فـ هو بيت أرشد وخديجة بنفس الوقت

يعني اليريد يجي هنا يجي وشوكت ميحب
ويروح هم شوكت ميحب
مو من حقچ لا انتِ ولا ألف وحدة مثلچ
تحاسبين أحد جاي البيتة وهاي أخر مرة اسمعچ تحچين بـ هالموضوع سواء گدامي أو وراية

- واني بعد ما اتحمل هالوضع ولا دقيقة
ممجبورة أعيش عيشة مرايدتها وأخدم ناس متربطني بيهم غير جنسيتك همام

- يطبچ ألف مرض
معاجبچ هذا الباب يفوت بدل الجمل ستين روحه بلا ردة واذا ما عاجبتچ العيشة وياية محد جابرچ تظلين وتتحملين من باچر اوديچ لبيت أهلچ

حچيتها وطلعت من البيت كلة
حتى ما رديت على أمي تعبت من المشاكل الدتزيد يوم بعد يوم بدل متقل يلعن ذاك اليوم التزوجت بي

رحت للگراج شغلت سيارتي حاير
مو كافيني مشاكل الشغل والتعب البي حتى تكمل علية بالبيت وين لعد الگة الراحة تعبت من هالوضعية

شغلت السيارة وتحركت
ماكو أحسن من الزيارة بمثل هالأوقات
توجهت الـ كربلاء زرت ورجعت للنجف ما حسيت شلون مر الوقت بحيث صارت رجعتي تالي الليل

صح اكو حظر بس اگدر أعبر السيطرات بسهولة
وصلت للبيت الكل نايمين
فتحت الباب ودخلت بوجهي للمطبخ عطشان داشرب ماي انصدمت بطيبة هناك شمگعدچ عمو الساعة عبرت الوحدة

- لا چنت نايمة بس گعدت عطشانة واجيت اشرب ماي

- صبيلي وياچ اني هم عطشان

طيبة.. اي تفضل
باوعت علي گعد ع الكرسي يشرب شكلة تعبان گحيت وسألتة بتردد وين چنت عمو ؟!!

- وليش دتسألين ؟!!

- ها لا مو علمود شي بس شسمة
اقصد بيبي خطية ظل بالها يمك لأن مچنت ترد علينة

- چنت محتاج ارتاح شوية لذلك ما گدرت اجاوبكم

- اكلت شي ؟!!
- لا
- يا ليش معقولة ظال على ريوگ الصبح مو زين عمو

- ما اشتهي

- بس والله ميصير تظل هالشكل
عمة خديجة سوتلنة سوب دجاج يموت خلي احميلك شوية والله يخليك لتردني بروح أبوك لازم تاكل

- ما اشتهي والله
- ميخالف أكل حتى لو قليل ها شگلت
- يلا حميها بس استعجلي شوية تعبان وأريد انام

- أي تتدلل

فرحت كلش لأن ما ردني
فتحت الثلاجة طلعت الشوربة حميتها وخليتها گدامة

- انتظر دقيقة بس احميلك الخبز لان بارد مينوكل هيچ
- ميحتاج اشربها خالي
- متشبع اذا خالي مو هواي نص گرصة بس يلا وافق

بعدني ممكملة كلامي دگ جهازة
رفضة وشمرة على وجهة سحب الخاشوگة وباوعلي يلا لعد وين الخبز لتعطليني استعجلي مو تعبان

بس حچاها ركضت ع السريع حميت الة گرصة
توني طفيت الطباخ ودرت انطيهيا
چان اشوف الاء واگفة بباب المطبخ عيونها تتنقل بيني وبين همام تعلچ وتهز رجلها بعصبية.....

يتبع...
ملتقانا بعد العيد ان شاء الله
وكل عام وانتم وأحبابكم بألف خير متابعيني الكرام

لتنسووون ⭐⭐⭐⭐⭐⭐
كل الحب ❤🥀