#أبي_لم_يكن_إنساناً
البارت السادس عشر
للكاتبة لبنى الموسوي
صار وقت عرس همام والكل چان سعيد بهالمناسبة
جهزنا لـ هاليوم اني وبتول بكل لهفة
بحيث خططنا الة قبل أكثر من أسبوع بس صار شي قلب كل مخططاتنا
بيوم العرس گعدت الصبح على صوت الـ هوسة
توني رافعة راسي من الفراش لزمتني دوخة مو طبيعية
ما ادري شصارلي
حتى ريگي ما اگدر ابلعة لزمت گصتي غادية نار
رجعت راسي ع المخدة طبت بتول تركض يلا طيبة يلا شو لسة نايمة شنو سالفتچ
- مريضة
- شنووووو !!!
- مريضة بتول ما احس بجسمي من التعب
- يوووو هسة وكتچ لعد المن دنخطط من قبل أسبوع
- صارت بعد
- شنو يعني متجين ؟!!
دگومي تحركي بلكي يصير بيچ حيل لتظلين بالفراش
- ما اگدر والله
- شدتحسين احچي بسرعة
- عندي حرارة وبلاعيمي توجعني ويمكن بداية انفلونزا
- والله طار أبو واهسي بالعرس من وراچ
- روحي شعليچ بية
- اي وراح اصيح عمة خلي تشوفچ قبل ليجن النسوان
حچتها وطلعت من الغرفة
شوية ورجعت هي وخديجة ظلت بالساعة يمي وراها راحت ويا بتول لأن المعازيم بدوا يجون
للعصر واني ما ادري بالدنيا شديصير
حسيت البيت صار هدوء
گمت بالگوة طلعت للصالة الحجية وحدها تمددت يمها ع التخم خطية وحدها
- يا يمة شجابچ دفوتي ارتاحي بالغرفة لتبهذلين روحچ
- هنا أريح لأن جوة كلش خنگة بيبي
- وهسة شلون صرتي ؟!!
- أحسن ان شاء الله ليظل بالچ يمي
وأي شي تحتاجين بس گولي الله عليچ ترى اگدر اگوم
- الله يرضى عليچ ويشافيچ بنيتي
ابتسمت بوجها ورجعت نمت
ما حسيت إلا على صوت الهوسة رفعت راسي الزفة هنا
سحبت الحجاب ذبيتة شلون مچان وعدلت گعدتي
شوية ودخل همام ويا عروستة
حتى واني بـ هالحالة فضولي خلاني أركز وياهم لحد ما صعدوا للغرفة وراحن النسوان
بتول.. ها طيوب شلون صرتي ؟!!
- اسكتي غير ميتة تعب ما احس بشي والله العظيم
- الله يساعدچ
بس والله فاتتچ الزفة فد ونسة مو طبيعية
خو أصدقاء عمو همام خبصوا الشارع خبص همَ الحلوا العرس خصوصاً من نزلوا يرگص
هسة لو جاية چان تونستي ويانة
واذا مريضة والله تنسين أبو المرض ويا سوالف الزفة
- بالعافية حبيبتي
بس المريض مستحيل يحس بهيچ أجواء حقچ متدرين شصاير بية حالياً والله ليراويچ
دنحچي نزلت خديجة من غرفة همام
- ها بطة شلون صرتي
بالي يمچ والله بس مو خوش وقت تمرضتي بي شفتي الوضع بعينچ توها يلا فضت الهوسة
- لا عادي عمة
- شتحسين شنو اليوجعچ بالضبط
- تعبانة كلش وما احس بشي كل جسمي ديوجعني
رفعت أيدها على گصتي
- هاي شنووووو سودة علية غادية نار المسكينة
الحجية.. شوفيلها حل يمة خطية تظل للصبح هيچ
خديجة.. هسة اخلي أرشد يجيبلها علاج من الصيدلية
درت وجهي عنهم وغمضت بتعب
الحرارة تصعد متنزل بحيث ما اسيطر أفتح عيوني بعد
هناك واسمع أرشد يصيح
- شلي علاقة بيها عسى ما تموت واني يا هو مالتي
- حرام عليك أرشد
البنية شحالها حرارتها عالية وحسها مطبگ من بلاعيمها مدتشوف شصاير بيها شنو ما عندك أحساس
- لا ما عندي أرتاحي
راح أصعد الغرفتي ما اريد بشر يزعجني تسمعون لو لا
حچاها وصعد رجعت للصالة تفرك بـ أيديها
- يربي هسة اني شسوي بـ هالليل
لا بية اتصرف ولا بية اترك الطفلة على هالحال للصبح
الحجية.. يمة دسويلها مي وشكر يدفي معدتها
بلكي ترتاح علي شوية
وللصبح عود گولي لرجلچ يجيبلها الدوة هذا أحسن حل
خديجة.. هه رجلي !!!
مدي أيدچ لله يوم هذا ما ينطي من نفسة خلي ملتهي بس بالـ **** وينة وين خديجة وأهلها
بتول.. عمة شتگولين
أروح اني اجيبلها الدوة بعد وكت الناس بعدها بالشارع والصيدلية هاي وينها قريبة علينة
- لا يمة لا شتروحين غير أبوچ يذبحنا لو عرف طالعة
- لعد روحي انتِ
- عمة ميقبل رجلي تدرين بي
وإلا چان رحت بدون متطلبين مني ولا هالهوسة المالها داعي
طيبة.. يمعودين كافي
والله ما بية شي للصبح أصير زينة لتتعاركون بسببي
خديجة.. دگومي وياية خل اوديچ للغرفه حتى ترتاحين
حچتها وسندتني هي وبتول للغرفة
نومتني ع المندر شوية وحسيت عليها تگعدني فتحت لگيتها فوگ راسي وبـ أيدها گلاص شكبرة
- شنو هذا ؟!!
- حرگتلچ ماي وشكر
هاچ يمة اشربي بلكي يدفي جسمچ وبلاعيمچ شوية
- ما اگدر اشرب شي
- مو بكيفچ تشربي وكلة يلا خلي اشوف بسرعة
سندت راسي عدلت گعدتي بالگوة وابتسمت بوجهي
بدت تشربني وعيوني عليها
تذكرت بيها خوف عمة نهاية لمن چنت اتمرض بالضبط داشوفة بعيون خديجة حالياً
- سودة علية بطة شصاير بحالچ
- اسم الله عليچ عمة
لتخافين والله كل شي مبية هسة بس انام واگعد أصير أحسن كافي تاكلين بنفسچ هيچ تأذيني
- دخلي أسويلچ كمادات تنزل حرارتچ وترتاحين عليها
- لا عمة فدوة تعبانة كلش بس أريد أنام
- يلا نامي مو مشكلة
بس بروح أمچ اذا تعبتي بالليل خلي بتول تصيحني اني راح أبات يمكم اليوم شوكت متحتاجيني تلگيني
- ان شاء الله عمة
- ما عندچ غير العافية حبيبتي متشوفين ولا علة
حچتها وطلعت من الغرفة
بتول بسرعة نامت من التعب إلا اني ساعات أعالج ويا نفسي لحد ما اجاني الفرج وغفيت الحمد لله
حسيت الفجر على ألم قوي ياكل بعضامي أكل
صرت اتنفس سريع
حتى أنفاسي مضطربة والنفس يخنگني ميريحني من الحرارة التطلع من عندة
ردت اگوم اصيح خديجة ما گدرت
جسمي متكسر ما بية أرفع راسي من المخدة
باوعت البتول نايمة
حاولت اصحيها ماكو صوتي مخنوگ بشكل بحيث اني ما اسمعة لعد هي شلون
لا ارادياً تحولت أنفاسي الونين مرتفع
على صوتي گعدت بتول ها حبيبتي شبيچ شدتحسين ليش هذا حالچ
- جسمي بتول
- شبي
اريد اجاوبها ما اگدر من التعب
گبل عافتني وطلعت تركض ما حسيت إلا خديجة فوگ راسي تسمي وتنفخ علية بخوف
خديجة.. واخيراً صحيتي مو خوفتيني عليچ يمعودة
طيبة.. عمة كلش تعبانة
- شفتي حتى تعاندين زين
مو گتلچ خلي أسويلچ كمادات أول الليل ما قبلتي چان هسة نزلت حرارتچ وگدرتي تناميلچ شوية
بتول.. يلا عمة ما صار شي سويلها هسة
خديجة.. اي هو رايحة اجيبلها الماي خلي عينچ عليها
حچتها وطلعت
شوية وحسيت على برودة سرت بجسمي
فتحت لگيت الخاولي على راسي وبتول حاطة الثاني على رجلي شوية وارتاحيت گدرت أغفى
صحيت الصبح على صوت همام
باوعت بتعب واگف بصفي ويحچي ويا خديجة بعصبية
همام.. اليوم موعد زواجي من الاء
أشهر مرن على خطوبتي واني ما عشت يوم حلو وياها
هواي تأخرنا بالزواج بسببها
خلصتها بس تتنعوص بـ راسي وكل شوية بـ رأي شكل لو ما تدخلات أبوها فلا تفض هالزواجة
ما ارتاحيت وياها ابد
لا صار أنسجام بيناتنا ولا حسيت اكو توافق فكري
چنت بـ أستمرار احسها هي بـ وادي واني بـ وادي ثاني
من خلال معرفتي بـ هالإنسانة
مشفت بيها شي زين يجبرني أحبها مثل أي رجال يخطب بالجديد
اكتشفت بشخصيتها نقاط عليهن ألف علامة أستفهام
نقاط ما چنت احب اشوفهن بـ شريكة حياتي
أنانية مغرورة مدللة
عدها حب ذات بشكل فضيع وتزعل على ابسط الأشياء واتفهها
وصلت المرحلة اختنگت من وجودها يمي
صرت اتهرب منها بـ أستمرار
وحتى ما اتصل بيها إلا هي تتصل وهم اتحجج بالنوم لأن عندي دوام بس حتى أخلص من مشاكلها
أكثر شي زعجني بيها كلامها على أهلي
كلما نحچي تشكيلي منهم رغم هي لا شايفتهم ولا حتى مختلطة بيهم غير على گد المناسبات
هاي لا شيء يم غيرتها المالها مبرر اطلاقاً
تغار من كل شي على كل شي
خو طيبة وبتول خلت راسها وياهن احچي اريد يابة ذني عرضي ميصير تغارين منهم ميفيد
وشلون يفيد اذا حضرتها حتى من أمي وأختي تغار !!!
كم مرة ردت أنفصل عنها بس ما نجحت
كلما تصير بيناتنا مشكلة
يتدخل أبوها ويحل السالفة ع السريع بحيث يخجلني وميخليلي أي حجة عليها
المهم هي قسمة وصارت بعد
وهاي اني عايش احلى يوم بحياتي بدون أي مشاعر بحيث اصدقائي فرحانين أكثر مني ليش ما أدري
خلصت الزفة وخلص وياها اليوم الما ردتة يخلص
دخلنا للغرفة ظلن خديجة وأمها وياها
خمس دقايق وطلعن سديت الباب ورحت يمها أحاول انسى كل المشاكل وأبدي وياها من جديد
بعدني ما واگف گبالها بدت تتنعوض
- اگول حبيبي همام
- نعم
- شنو راح نبقى عايشين هنا طول العمر
- ها بدينا مو بعدنا بسم الله
- شنو والله هوسة راسي صار طبل شلون متحمل انتَ
- أي غير عرس
- لا همام الشغلة مو شغلة عرس ويعدي
أمك
أخوك
مرتة
بنتة
أختك رايحة جاية كل ساعة
مو بيت فندق الله وكيلك واني هالشي ميصرفلي هناك ببيتنا هدوء ما عدنا هيچ هرجة
- الاء اتصور حچينا بـ هالموضوع وأبوچ غلقة
گلت وراح ارجع أعيدها
طول ما أمي عايشة وتتنفس الهوى
اني من هالبيت مالي طلعة سمعتي لولا حتى لتدوخيني
- صدگ تحچي ؟!!
- اي قابل متشاقي وياچ من قبل
بس حچيتها گلبت وجها وراحت للچرباية
عاد اني شلون طايق تصرفاتها حتى تكملها بهالموضوع
هزيت أيدي ورحت نزعت ملابسي
تمددت بـ فراشي ورفعت الغطا توني اريد أنام حسيت عليها حضنتي من ظهري
- شنو حبيبي ضجت
- شتگولين انتِ
- اسفة والله ابد مو قصدي اضوجك بمثل هاليوم
بس حچتها عدلت گعدتي وباوعتلها بعصبية
- اسمعيني زين الاء
هذا الموضوع السمعتة منچ هسة أحذرچ ينفتح بعد
أهلي ذولة ويظلون أهلي اليوم وباچر ولحد ما اموت
- اي مو گتلك اسفة انسى الموضوع عاد
- مصار شي
- يعني تصافينا مووو
باوعتلها وسكتت
هي من كيفها تقربت مني خلصت الشغلة بيناتنا بلا أي مشاعر وهالشي حيل زعجني
ليش هيچ ديصير وياية
معقولة الخلل بية لو بعد كل الشفتة منها ماتت رغبتي أتجاها ولا كأن هاي أول مرة بعمري أتقرب بيها من مرة
واكيد هي حست اكو شي غريب بالسالفة
ومن سألتني تحججت بتعب العرس
وراها سبحت ونمت گبل ظلت هي گاعدة ما حسيت إلا على صوت الهلاهل عرفت أهلها اجو
درت وجهي بعدها نايمة
- الاء يلا اگعدي
- صباح الخير حبيبي
- صباح النور
اتصور أهلچ جوة گومي غسلي حتى ننزللهم فشلة
- شوكت گعدت
- توني
- ليش البارحة نمت وعفتني هاي هم تحسبها ليلة عرس
- مو گتلچ چنت تعبان
- شفتك وشفتني تعبان أدري شوكت ترتاح ممكن أفهم
- گومي عاد مو وكت نقتچ
- يلا راح نمشيها واريد اشوف وين توصل وياك بعد
عفتها وگمت بدلت
دانزل فاتت قبلي تفتح باب الغرفة بـ الروب الخارجي
- لحظة لحظة وين يمعودة
- ها شبيك
- شنو ان شاء الله هيچ ناوية تنزلين گدام العالم
- أي وشكو بيها قابل اني شلابسة حتى تعترض
- لتخبليني الاءءءء
انتِ تعرفين بـ أخوية عايش ويانة
بعدين تعالي فهميني عادي يعني هيچ تنزلين گدام أبوچ شنو ما عندچ أحترام الة
- شبيك همام ؟!!
مو هياتني لابسة الثوب مالت الروب قابل نازلة بالسيت الداخلي ليش دومك مكبر المواضيع
- لا هي بس هاي العايزة بعد
دفوتي لبسي شي طويل ونزلي حتى يومچ يعدي على خير من أولة
- ما عندي شي طويل
- شنو يعني ما عندچ ؟!!
لعد والفلوس الدزيتهن الچ شنو اشتريتي بيهن هوووى
- لا اشتريت ملابس بس مو طويلة ولا مالت حجاب
- لا اله إلاااااااااا الله
يبت الناس انتِ مو تدرين بروحچ عايشة ويا عيال واكو حمة وياچ تدرين لو لاااااااا حاچيني
- هاك شفت
ومن اگولك خل نعزل وحدنا تزعل حضرتك
- لتدوخيني من الصبح
رايح اجيبلچ صاية من خديجة تلبسيها وتنزلين بين ما اشتريلچ ملابس تنلبس ويا الحجاب
- لا اووووووع اني ما احب البس من أحد همام
- شوفي لتختبرين صبري وياچ
أختي هاي الدتگولين عنها اووع وايع انظف منچ ومن عشرة مثلچ لا تسوين روحچ براسي انتِ ولا غيرچ
وهسة راح انزل اجيبلچ الصاية
تلبسيها يعني تلبسيها رضيتي أو لا وإلا مالچ نزلة جوة ظلي بغرفتچ أحسن
- لا انتظر بس اسمعني شوية
- شكو
- راح البس العباية مالتي وانزل شتگول تمام هيچ
- براحتچ المهم شي تسترين روحچ بي
حچيتها ونزلت بسرعة
وفعلاً أهلها جايين ومحملين أشكال الريوگات وياهم
كلش خوش اوادم
ما أعرف الاء عليمن طالعة شايفة نفسها ع العالم يمكن هذا حظي بس الحمد لله على كل حال
شوية وسلموا يرحون
جهزت خديجة الريوگ واجتمعنا ناكل
الكل موجودين حتى أرشد بس طيبة مالها حس بالبيت
- اگول خديجة
- نعم خوية
- وين طيبة شنو متجي تاكل
- يا غير متدري شصار بالمسكينة البارحة
- شكو يا ستار
- خطية تمرضت وحرارتها ارتفعت للصبح وهي گاعدة
- وانطيتيها علاج لو لا
- لا
- صدگ تحچين ليش عود خطية شلون تاركها هيچ
- شسوي ما عندي دوة وگلت لأخوك ما قبل يجيبلها
- أرشد شبيك؟!!
صاحي انتَ لو شنو بالضبط
بس فهمني شتحس لمن تحط عقلك بعقل هـ الطفلة
أرشد.. لا تبدي من الصبح همام
بالنسبة الي لا اجيبلها علاج ولا اصرف فلس عليها
تريد روح انتَ جيبلها محد لازمك والباب ذاك وراك اذا متندل هاي اني دليتك
- اجيبلها ليش لا قابل حيوان مثلك وما احس
عفتة يغلط ورحت الغرفة بتول
فتحت الباب نايمة والوجه ماي مينسمع منها غير صوت ونينها منظرها هز گلبي من جوة
بعدني اباوع عليها دخلت خديجة وراية
- سودة علية عمة
متدري خوية شصار بيها البارحة الليل كلة اني وبتول گاعدات ننزل بحرارتها وللفجر يلا گدرت تنام
- من شوكت وهي هيچ ؟؟
- من البارحة صبحت الصبح مريضة
متشوفها ما اجت للزفة ويانة وظلت هنا يم أمي
بس مچانت هيچ
شو تالي الليل صارت فد نوب يمكن عدها التهاب حاد
- ادري ليش ما گلتيلي لعد
- يا خوية شگولك غير البارحة عرسك وين صايرة هاي
- لا بس صايرة تتركون الطفلة وهي بهالحالة
دروحي بسرعة شوفيلي حرارتها نزلت لو بعدها مرتفعة
بس حچيتها خلت أيدها على گصتها
- لا والله ما نزلت بعدها غادية مثل النار سودة علية
طلعت من الغرفة بوجهي ليفوگ
بدلت ورحت جبتلها العلاج رجعت خديجة بعدها يمها مديت أيدي هاچ خوية أخذي مني
- أي رحم الله والديك
- تلگين المواعيد مكتوبة ع الغلاف
مو تنسين تنطيهيا بأنتظام حتى تتحسن بأسرع وقت
- أكيد خوية لتوصي حريص
طلعت منها الغرفتي
چانت الاء تفتر رايحة راجعة بـ توتر بس فتحت الباب عاطت بصوت عالي صدگ تحچي همام ؟!!
- شكو يمعودة
- يعني بـ صباحية عرسنا
تركتني وگمت من الريوگ حتى تجيب دوة لمرت أخوك وبعدك تسأل شكو لا عيني ماكو شي سلامتك
- واذا يعني صباحية عرسنا قابل اعوفها تموت
- لا عوفني اني أموت
ليش تهمك الاء طبعاً لا طززز هي أخر شخص تفكر بي
- شبيچ انتِ من الصبحيات بدينا بسوالفچ التعبانة
- گول لنفسك انتَ شدتسوي من الصبح ؟!!
هي عدها رجال مسؤول عنها انتَ شكو حتى تهتم بيها والله عجيب أمرك همام
- رجلها التحچين عنة مو أدمي
من تزوجها ولـ هالساعة ما شافت يوم واحد حلو ويا واتصور حچيتلچ كل شي
مو معقولة يعني اذا هو حيوان احنة نتحيون مثلة
البنية مريضة
تردين اخليها هيچ ضميرچ يعني يقبل هاي اذا عندچ ضمير من الأساس
- اسمعني همام والله العظيم.....
- اشششششش
كافي لتدوخيني نازل يم أمي اشرف من الگعدة وياچ
- تعال وين هماااااام.....
خليت وطلعت من الغرفة قبل لتكمل كلامها
هاي من أول يوم وهيچ شلون راح تكمل الحياة وياها
نزلت جوة لگيت أمي وحدها بالصالة
- ها يمة خير شو نازل وعايف عروستك وحدها ؟!!!
- اشتاقيتلچ حجية
هالأيام ما شفتچ عدل من هوسة العرس
عاد گلت خلي انزل اروي عيوني من شوفتچ الحلوة
- واني مشتاقتلك يبعد گلبي
بس يمة ميصير
أصعد لمرتك ونتشاوف تالي شتگول عليك عايفها ونازل يمنة بأول يوم الكم سوة
- شوية واصعد
- لا الله يرضى عليك اصعد هسة يلا گوم وليدي
بتول.. يا عمو العريس شيسوي هنا
خديجة.. شنو هاي خوية شنزلك هنا صدگ تحچي
همام.. اهوووو الواحد حتى ميرتاح ببيتة شلون بيكم
حچيتها وصعدت فوگ
اروح اگابل الاء ولا اسئلتهم المتخلص
هو بالحالتين اني ممرتاح منا لما ارجع للدوام واخلص من هالسوالف التعبانة
طيبة.. 3 أيام يلا گدرت اگوم من الفراش
طول هاي الفترة خديجة وبتول ما عافوني ولا لحظة
اليوم صبحت أحسن الحمد لله
لبست الحجاب وطلعت
خديجة تمسح بالصالة والحجية تقرا قرأن مثل عادتها كل يوم الصبح
طيبة.. صباح الخير
الحجية.. هلا يمة هلا توة ما نور البيت
شلون صرتي حبيبتي ان شاء الله اليوم أحسن بشرينا
طيبة.. الحمد لله بيبي هواي أحسن
خديجة.. يلا يا بطة
روحي غسلي واگعدي بالصالة بين ما اجهزلكم الريوگ
- لا عمة اني اسوي انتِ دتشتغلين لتتعبين روحچ
خديجة.. لا ابد والله
وينچ وين الشغل توچ وگفتي على حيلچ ما صدگنا
بتول.. يلا لتتعاركون اني اسوي الريوگ وأمري لله
خديجة.. منچ من الشيطان بتولة
بتول.. هيچ صارت عمة ؟؟!
هاي لعد گعدت وأريد اشوف منو يسوي الريوگ بعد
خديجة.. ههههههه اني اسويلچن تتدللن صدگ چذب
حچتها ودخلت للمطبخ
رحنا نغسل تونة راجعين للصالة نزلوا همام والعروسة من غرفتهم ظليت اباوعلهم بـ أبتسامة
همام.. صباح الخير يمة
الحجية.. هلا وليدي صباح الأنوار عليك وعلى مريتك
باوسوا الحجية وگعدوا مقابيلنا
دتحچي الاء قلدت عليها بتول بحلگها گبل سحبتها من أيدها قبل لا ينتبه عليها همام
- ولچ عيب ليش تعيبين عليها بديتي بسوالفچ
- ما احبها والله ما احبها
صارلها بس 3 أيام هنا واحس تصرفاتها مسمومة كلش
- يمعودة بعدچ شعرفتي عنها
قاطعني همام ها عمو طيبة شلون صرتي أحسن مو
- الحمد لله عمو
أحسن ان شاء الله وشكراً على العلاج بتول سولفتلي
الاء.. لا عيني العفو
بس مبين عليچ عزيزة كلش على همام بحيث تركني بصباحية العرس حتى يجيبلچ الدوة
- باوعتلها حايرة ما اعرف شلون ارد عليها
همام.. أي طبعاً عزيزة علية
وعلى كل اللي بالبيت شعدنة غيرها هاي طيبة الحبابة
دارت وجها علي خزرتة وصارت تستغفر
طلعت خديجة بـ أيدها الصينية
بس شافتهم صاحت همزين گعدتوا حتى تتريگون ويا البنات ع الواهس
الاء.. يا خديجة ليش انتِ تسوين الريوگ ؟!!
لعد هن شبيهن مشلولات لو خالاتچ خدامة الهن تجيبن وتخلين گدامهن وين صايرة
همام.. الاءءءءءءء
خلي لسانچ بحلگچ وكرمينا بسكوتچ أحسن
ما عدنا هالسوالف التعبانة بهذا البيت
وبعدين انتِ هم راح تتريگين قابل خديجة خدامة الچ حتى تجيب الريوگ وتخلي گدامچ
الاء.. بس همام اني بعدني عروس يعني هالشي طبيعي
همام.. والعروس لازم تستحي
مو من أولها تسوي مشاكل وفتن بين أهل البيت صح
- اعتذر مو قصدي
حچتها وصعدت تبچي
ظليت صافنة علي عود ليش هالشكل خجلها
وشلون هيچ عاملها بطريقة محلوة
يعني همام هم طلع مثل أخو لا يقدر المرة ولا يحترمها گدام العالم
خديجة.. ليش ضوجتها هيچ خوية قابل شگالت هي
الحجية.. لا يمة ممقبوله منك تخجلها گدامنا وتصعدها وهي مكسورة الخاطر حرام عليك
همام.. الله يخليكم كافي
عوفوني اتسمم كل شي متعرفون بعدكم خلوني ساكت
حچاها وسحب الصينية ياكل
بعدنا صافنين علي
رفع عيونة خزرنا بعصبية شبيچن صافنات علية متجن تاكلن عاد
خفت من عصبيتة وگعدت أكل
كل شوية أرفع نظري علي أول مرة اشوفة بـ هالحالة حتى من ياكل گالب وجهة يمكن بس نحاچي يعيط
همام.. كملت الريوگ وصعدت الغرفتي
دخلت لگيتها نايمة على الچرباية وتبچي بصوت عالي والله حلوة هاي هم غلطانة وهم تزعل
رحت للكنتور بلا نقاش
غيرت ملابسي ومشطت شفتها عدلت نفسها داطلع ما تحملت أكثر وسألتني وين رايح همام ؟!!
- للشغل
- بس مو عندك أجازة أسبوع لو اني غلطانة
- أي عادي قطعتها
- وليش قطعتها غير ما صارلنا 3 أيام من تزوجنا ؟!!
- گولي لنفسچ هالحچي الاء
عفتها ونزلت
تلگتني أمي اخلص من وحدة تجيني الثانية
استغفر الله ربي شلون سالفة تعبانة عساني لا تزوجت
- ها يمة وين
- عندي شغل حجية
- يا شغل وليدي شجاك تسودنت ع البنية
خديجة.. خوية صدگ تحچي
يا شغل هذا غير ماخذ أجازة وبعدك عريس جديد
- لا صرت عتيگ بعد
- همام....
طلع حتى ما انتظرها تكمل كلامها
ظلوا مستغربين
من خطب همام ولليوم تغير والكل لاحظوا هالشي مو بس اني وشبي محد ديعرف
مر أسبوع على زواجهم
وبـ هالأسبوع أرشد مرتين صاحني للغرفة
وكالعادة حاول وياية أكثر من مرة أخر شي طردني من الغرفة بعد ما شبعني ضرب
حسيت نفسي بديت أكبر
صرت أقرف من أرشد أكثر ما أخاف والموت أهون علية من لحظة انجمع ويا ورى باب وحدة
أما همام بس 3 أيام ظل بالبيت
وراها صار يطلع طول النهار منشوفة إلا بالليل
وبس الحجية تفتح الموضوع ويا يخلي ويصعد فوگ مينطيهم مجال حتى يتناقشون بالسالفة
واكيد الاء بعدها عروس
لذلك منشوفها جوة إلا وقت الغدة تاكل وترجع تصعد
يوم السابع ضبط
چنة واگفين نشتغل بالمطبخ ويا خديجة دخلت الاء
الاء.. هلو خديجة شلونچ
خديجة.. هلا حبيبتي بخير اسأل عنچ
بتول.. عود شنو معنى تصرفچ هذا
ترى مو بس عمة خديجة واگفة هنا حتى تسلمين عليها وتتجاهلينا إلا اذا چنتِ عمية هنا نعذرچ والله
خديجة.. عيييبب بتول
بتول.. متشوفيها يا عمة
على شنو شايلة خشمها ترى بشر حالها حالنا مو جنية
خديجة.. ميخالف مرت عمچ مهما يكن عيب تتجاسرين
بتول.. وهي عيب عليها تطب ومتسلم احنة مو صغار
الاء.. ما شفتكم يعني شلون !!!
بتول.. يا عيني سودة علية
لعد گولي لعمو همام يوديچ للدكتور العصر
يسويلچ مناظر حتى مرة ثانية تشوفينا زين بعدچ لسة صغيرة وينچ وين ضعف البصر
خديجة.. بتووووول
بتول.. طالعة لتصيحين المكان هنا صار يخنگ كلش
حچتها وعافت المطبخ
التفتت خديجة على الاء أسفة خية حسبيها علية بعدها طفلة متعرف شتحچي لتاخذين على كلامها
الاء.. مصار شي خديجة
تعودت اذا مو همام يغثني أنزل هنا واحد منكم يغثني
خديجة.. لا ما عاش اليغثچ احچيلي شبيچ ضايجة ؟!!
الاء.. أخوچ طلع روحي يمعودة
صارلي يومين أتوسل بي حتى اسوي حفلة السبعة وهو معاند ميقبل ما ادري ليش
وفوگ كل هذا
لا أشوف وجهة مثل العالم والناس
ولا ينطيني حقوقي مثل أي عرسان جدد هاي واحنا بعدنا بأولها لعد لو يمر على زواجنا سنتين شيسوي
صفنت عليها بتعجب
شدتحچي هاي مينطيني حقوقي شنو ؟!!
يعني فلوس لو ميشتريلها طلباتها يااااااا بس لا يطلع همام بخيل مو خوش سالفة هاي
دتحچي صار خيال بطرف عيني يم باب المطبخ
درت وجهي عبالي بتول
چان اشوف همام واگف متچتف ويباوع عليها بعصبية من يمي بلعت طن هوى من الخوف.....
يتبع
لتنسووون ⭐⭐⭐⭐⭐⭐
كل الحب ❤🥀