أبي لم يكن إنسانًا

البارت 15

#أبي_لم_يكن_إنساناً
البارت الخامس عشر
للكاتبة لبنى الموسوي

همام.. خلصنا العشى وبس شفت أرشد صعد
رحت ورى
دگيت الباب صاح تفضل طبيت چان ديجهز بـ النرگيلة

- ها أرشد هسة فارغ نحچي شوية

- أي خوية تفضل

- على شنو ناوي ويا هالطفلة خوية

- يا طفلة
- طيبة يا طفلة يعني اكو غيرها

- ما فهمت شناوي على شنو بالضبط وضح كلامك ؟!!

- يعني شنو تريد تبقيها مرتك
لو حالها حال غيرها فترة وتمل كالعادة وتبدلها بثانية

- وانتَ شكو حتى تسأل !!!

- اترجاك جاوب على گد سؤالي
مگاعد اتعارك وياك كل الموضوع دنتناقش بكل أحترام

- تعرفني كلش زين همام
ما احب استقر على مرة ولا احب النسوان وطلايبهن

- لعد ليش جبتها وكسرت رگبتها اذا فترة وتعوفها

- اني ما أجبر وحدة علية همام
كل اللي أجن لهنا أجن برضاتهن سحبتهن ريحة الفلوس

- بس طيبة غير
- لا مو غير حالها حال غيرها وافقت

- وانتَ سمعت موافقتها بـ أذنك
- أي طبعاً

- چذبت أرشد
- احترم نفسكككككككك همااااااااااااااام

- أحلف بروح أبوك سمعت موافقتها
- اني ممجبور احلفلك بس وروح أبوية سمعت

- زين شفتها بعينك من عقدت عليها
- لا أبوها خلاها تحچي من ورى الباب و وافقت

- وضحت السالفة
يعني صديقك العار ورى السالفة وانتَ بكل غباء صدگتة

- شرايد هسة لتدوخني

- زين عوفك من كل شي أرشد
بس اريدك تجاوبني على هالسؤال بالتحديد
انتَ تشوف طيبة راضيه بيك وسحبتها ريحـة فلوسك مثلها مثل غيرها ؟!!

- حتى لو مراضية
المهم بالأخير أبوها قبل وانطالياها وهو الممنون

- هه لا بيك الخير والله
يعني انتَ وأبوها بعتوا واشتريتوا بطفلة مالها اي ذنب

- انتَ وين تريد توصل فهمني ؟!!
ترى راسي مسطووور ومالي خلگ الأسطوانة كل يوم

- سلامتك خوية سلامتك
- الله يسلمك

- تريد اجيبلك علاج خاف ضغطك صاعد
- لا ما بي شي بس قلة نوم
- متشوف شر
- رحم الله والديك

باوعتلة هدأ
استغليت الفرصة حتى احچي بالموضوع
- خوية اريد اتناقش وياك بس ياريت متصير عصبي

- خير ان شاء الله

- خير خير
اني اگول ما دامك تريد ترجعها لأهلها بعد فترة
شنو رأيك يعني لو تخليها بهالمدة التظل بيها هنا تكمل دراستها

- بس حچيتها گمز من مكانة بعصبية
- يا درااااااسة هاي همااااااام شبيك تخببببببلت
- بس اسمعني
- سد هالموضوع احسنلك ترى وصلت حدها وياك هااا

- ليش بس فهمني ؟!!
شنو السبب متريدها تكمل اذا ع المصاريف اني اتكفلها

- لا مو ع المصاريف
وماكو سبب محدد بس هيچ ما احبها تدرس وانتهت

- أرشد احچي بالمعقول
انتَ حتى مدتتواجد بالبيت طول النهار
واصلاً هي تنام بغرفة وانتَ بغرفة يعني حتى زواجكم مو طبيعي ظلت ع الدراسة

- گلت لا يعني لا لتلح زايد همام ترى دوختني

- خوية اني مو علمود طيبة
بس صدگ خايف على بتول وداحچي هيچ لمصلحتها

- ليش بتول شعليها ؟!!

- بنتك كبرت أرشد وبدت عيونها تتفتح ع الدنيا
اخاف ليروح واحد يضحك عليها لو تصادق بنات يأثرن بعقلها ويسحبنها للطريق الغلط

- شتحچي انت يمعود
بنتي مرباية احسن تربية يعني مستحيل تسوي الغلط

- وانتَ شمدريك قابل تستأذن منك قبل لتغلط
بعدين لا تنسى خوية قرين السوء يأثر وجماعتك أكبر مثال

- ها بدينا نشمر بالكلام
وثانياً اني لسة ما فهمت طيبة شدخلها بكل هالمعمعة

- اريدها تروح وتجي ويا بتول للمدرسة
هيچ راح يظلن سوة طول الدوام وبنتك متلگة فرصـة تصادق غيرها وتتأثر بيهن

- والى متى وانتَ تعرف طيبة متظل هنا أكثر من سنة

- ميخالف خلينا نمشي هالسنة هيچ
والله كريم للسنة التجي
عود بوقتها نشوفلنا حل غيرة ندير بالنا بي على بتول

باوعلي بنظرة شك ودار وجهة
- لا ما اقتنعت بـ هالحچي كافي همام سد الموضوع

- يعني إلا تجبرني اگولك بتول هي الـ حچتلي هالشي

- شنو حچت وضح بسرعة ؟!!

- اجت قبل يومين تشكيلي
عمو صديقاتي بالمدرسة كلهن يحچن حچي محلو
واني ما احب امشي وياهن

گلتلها اتركيهن لتحاچيهن بعد
ردت واني شلون اخلص الدوام مو اضوج اظل وحدي

أخر شي وصلنا الحل يرضي جميع الأطراف
طيبة تداوم وياها
هم هي تكمل دراستها وهم بتول تلتهي وياها ومتتأثر بصديقات السوء

بعدين گالت شلون بابا اخاف ميوافق
عاد گلتلها خلي أبوچ علية واني متأكد مراح يرفض لأن يحبچ ويريد مصلحتچ قبل الكل

- يعني هي طلبت منك متأكد ؟!!

- قابل اچذب عليك خوية شتعرف بية مچذب فد يوم

- لعد ليش ما اجت گالتلي هالحچي بنفسها

- بشرفك ليش هي وين تشوفك حتى تگولك ؟!!
بعدين انتَ تعرف بتول
تخجل منك كلش وعلاقتها بية اقوى من علاقتها بيك لأن تشوفني أكثر ما تشوف حضرتك

باوعلي وسكت
- ها شنو
- ها يمعود شتريد مو خبلتني اليوم

- شكلك لسة مگاعد تصدگ بكلامي
احسن شي اروح اصيحها حتى تتأكد هي الطلبت مني احچي وياك بـ هالموضوع

- ميحتاج
- لا يحتاج لأن ما احب اشوف نظرات الشك بعيونك

حچيتها وطلعت من الغرفة
صحت بتول چانت دتغسل أجتني تركض نعم عمو

- حبيبتي بتولة اسمعيني زين
هسة راح اخذچ ونصعد فوگ يم أبوچ اذا سألچ انتِ تردين طيبة تداوم ؟!!
جاوبي أي لأن صديقاتي الـ بالصف مو حبابات واريدها تصير صديقتي حتى أبتعد عنهن

- وليش داحچي هيچ عمو ؟!!

- بدون ليش نفذي كلامي مو تردين طيبة تداوم وياچ

- اي أريد
- لعد لازم تحچين هالحچي بالحرف الواحد گدام أبوچ

- صار عمو
- يلا نصعد ومو ترتبكين وتنسين الكلام بتول
- لا سهل حفظتة

اخذتها ورجعت الأرشد
دگيت الباب بس شافها گدامة سألها نفس السؤال چنت خايف لترتبك بس طلعت سباعية وحفظت الدرس بسرعة ما تعبتني

- لعد ليش ما گلتيلي يا بابا
- خوية مو گتلك البنية تستحي منك يعني إلا تحرجها

- يلا ميخالف
راح اخليها تداوم بس بشرط انتَ توديهم وتجيبهم

- اكيد ليش يوميا منو ديودي بنتك ويرجعها غيري

- يلا اتركوني هسة
- ونقلها شلون انطيني عنوان مدرستها حتى انقلها الك

- لا اني انقلها معليك انتَ

- صايرين مثل متحب خوية على راحتك
بس ياريت باچر لأن البنية هواي فاتتها دروس يا دوب تلحگ عليهم الأمتحانات جاية

- اشوف الله كريم

- لعد باچر راح اوصلهم سوة حتى اجيبلك ورقة قبول من الأدارة وانتَ تكمل الباقي

- لا اني اجيبها بس ماكو اشكال وصلهم انتَ
- على راحتك

بس حچيتها طلعنا وسدينا الباب
ضحكت بتول عمو شنو رأيك ننصب على طيبة شوية

- خطية ولچ لتصيرين خبيثة
- شوية والله بس نشوف ردة فعلها لتعارض حباااااب
- يلا ميخالف بس لتدوسين بيها خوش
- أي تتدلل

وفعلاً نصبنا عليها
بس من شفتها بچت ما تحملت أكثر وبشرتها بالبشارة

همام.. يلا عمو گومي اليوم لازم تنامين من وقت

- ليش ؟!!
- علمود الصبح أخذچ ويا بتول من طريقي
- شنو تاخذني وين
- للمدرسة غير حتى تداومون سوة لو مناوية تداومين

طيبة.. باوعتلة بتعجب ما اريد حتى أأمل نفسي بسراب
- لحظة يا دوام هذا ما فهمتك

- مو وكت صدمتچ
صحصحي يلا الأمتحانات راح تبدي يا دوب تلحگين

هو حچاها لو اني تخبلت ما اعرف بعد شسوي
ساعة اگمز
ساعة اصيح بكل صوتي
ساعة افتر على نفسي واحلفة يحچي صدگ لو يتشاقى

أخر شي صاح وروح أبوية وافق تداومين
بس حچاها ركضت على بتول حضنتها بكل قوتي على گد الفرحة الترست روحي ساعتها من هالخبر

شوية وحسيت على نفسي هاي اني شداسوي
باوعتلة بخجل
شكراً عمو شكراً هواي انتَ أحسن إنسان شفتة بحياتي

- اممممم متأكدة ؟!!
- أي طبعاً متأكدة مية بالمية

- وصالح لعد
- هم أحسن إنسان بالدنيا لأن مثلك حباب

- لا ميصير هيچ
لازم تختارين واحد من عدنا يا اني يا هو يلا أختاري

- والله عمو صعب أختار اثنينكم أحبكم شلون !!!

- هههههههههه
اتشاقى وياچ عمو حچيت هيچ علمود تضحكين
يلا روحي ويا بتول ناموا حتى تگعدين تسويلنا ريوگ لو بطلتي بعد

- لا شنو بطلت !!
اصلاً يوميا بعد اسويلكم ريوگ مو بس باچر تتدللون

- رشوة يعني لو شنو بالضبط

- لا مو رشوة
بس صدگ ميصير تطلعون بلا ريوگ
عمة نهاية چانت تگول أهم شي وجبة الريوگ للإنسان بس يعوفها جسمة يتعب

- منو هاي عمة نهاية
- أم صالح
- ياااااا طلابة صالح الما تخلص

- ههههههههه غير هي أمه قابل اچذب عليك

- هههههههههههه يلا روحن نامن
درت وجهي داصعد رجعت باوعتلها طيبة جايبـة وياچ ملابس المدرسة لو لا

- أي عمو ملابسي وكتبي وكل شي لتشيل هم
- عفية بالشاطرة

حچيتها وصعدت للغرفة
نمت على وجهي ما حسيت إلا بتول دتگعدني عمو يلا عاد گوم يا دوب تلحگ تسبح ونتريگ

- ليش شگد الساعة هسة
- بالسبعة
- نزلي عمو هاي گمت بس اسبح واجيكم ما اتأخر

طيبة.. واگفة اسوي بالريوگ والفرحة ما سايعتني
دخل همام للمطبخ صباح النشاط يابة
باوعتلة وضحكت صباح النور عمو تفضل الريوگ جاهز

همام.. انسة بتوووول
بلا فهميني لشوكت رجلچ تظل محناية تگعدين وطيبة تسوي الحضرتچ الريوگ

بتول.. عمو شنو انتَ تغار ؟!!
اني وصديقتي نتصافى معليك لتتدخل بيناتنا سوالف كبار

گبل جرها من أذنها
- ولچ هاي عليمن لتتدخل هااااا

- اااااي عمو شبيك مو عليك والله على طيبة

- ها عبالي اجيت املص أذاناتچ
- لا لتفهم غلط ليش اني اتجرأ واحچي عليك ميصير

اسمعهم شلون يتناگرون وخربانة ضحك عليهم
بس كملنا الريوگ طلعنا
وصلنا همام للمدرسة وقبل لا ننزل من السيارة انطانة مصرف وظل يوصي بتول علية

- عمو بعد ما اوصيچ
ديري بالچ على طيبة لا تخليها تمشي إلا وياچ وانتِ هم لا تمشين ويا غيرها ظلن سوية أحسن

- صار عمو تتدلل
- وانتبهن على دراستچن زين انتن جايات هنا تدرسن
- اي اكيد لتخاف ترى احنة شاطرات

عفتهم يحچون ونزلت
شوية واجت بتول وراية دخلنا للمدرسة
الحمد لله مشى اليوم حلو حتى هالمدرسة أحسن بهواي من مدرستي القديمة من كل النواحي

بنهاية الدوام أجتي بتول الصفي
طلعنا للشارع
عشر دقايق ننتظر وهمام ماكو الشمس صگعتنا صگع

بتول.. اهووو عمو يعني متبطل تأخير مو والله ذبحتني

- شنو هاي الشمس كلش قوية بتول

- هي بس قوية
غير تسمط سمط وجهي ما أحس بي بعد الله وكيلچ

- وشلون هسة ؟!!
- شنو شلون ننتظر وننچب قابل عدنا حل غير الأنتظار

دتحچي وگفت سيارة همام گدامنا
- هاچ استلمي شرف الافندي

همام.. أسف تأخرت عليكم

بتول.. وشتفيد الأسف مالتك
واحنة انسمطنا بالشمس أكثر من عشر دقايق

- ولچ شو دتصيحين علية سايق الخلفوچ اني وما ادري

طيبة.. ممكن يعني لو سمحتوا
تأجلون عركتكم للسيارة لأن ما اتحمل هـ الشمس بعد ولا نص دقيقة

همام.. صعدن عيني انسات
فوگاها وحدتهن لسانها شطولة بس مو صوچچن والله

بس حچاها صعدت بتول يمة واني گعدت بالخلف
- نعتذر عمو لأن رفعنا صوتنا بس والله الشمس مترحم

- واني چان عندي شغل جبرني اتأخر عليكم
- ما صار شي
- اي احچيلي شلون چان أول يوم بمدرستچ الجديدة

- كلش حلو والله
بس هواي فايتتني دروس لأن متقدمين على مدرستي وحتى باچر عندي أمتحان

- تلحگين تقرين لتخافين انتِ گدها طيبة
- شكراً عمو

وصلنا للبيت هلكانين تعب
لگيت خديجة تشتغل بالمطبخ بس سمعت صوتنا أجت تركض

خديجة.. ولچ طيبة شدعي عليچ
لو تدرين شسويتي بية من الصبح الله يسامحچ بس

- ليش عمة والله ما سويت شي

- غير تنطيني خبر بدوامچ
اجيت الصبح الكم ما لگيت احد بالبيت
سألت امي گالت همام وبتول بالدوام وطيبة لسة نايمة

ظليت ادور عليچ لما گلبي وگع
عبالي شردتي لو شو شصارلچ بغيابي تالي عود اتصلت بهمام وگلي داومت ويا بتول

- هههههههه اسفة عمة والله ما أعرف بهالسوالف

- ولا يهمچ فرحتي بيچ نستني كل خوفي

- أي والله اني هم كلش فرحانة والفضل العمو همام

همام.. مو وحدي بتول هم ساعدتني بهالشي

- الله يجازيك بكل خير على فعلتك هاي خوية
- رحم الله والديچ خيتي

عفتهم يحچون ورحت الغرفة بتول بدلت
دخلت للمطبخ خديجة تصب بالغدة
ردت أساعدها دفعت أيدي حيل باوعتلها متعجبة ليش عمة مو أريد اصب وياچ

- لا حبيبتي روحي ارتاحي وينچ وين الشغل
انتِ جاية تعبانة
واصلاً ما عندي شي هن ماعونين اصبهن ويخلص الغدة

- اگول عمة انتِ شنو ما عندچ جهال ؟!!

سؤالي هذا طفى الضحكة من وجها ودنگت مقهورة
- لا عمة ما عندي للأسف

- الله يرزقچ بطفل حلو وحباب مثلچ بالضبط
- يسمع منچ رب العالمين

ظليت يمها لحد ما صبت الأكل
أول ما خلصنا الغدة رحت بوجهي للنوم
متعودة حتى ببيت جدي أنام الظهر لأن الدوام يسطرني وميخليني ارگز بشي اذا منمت ساعة

گعدت العصر على صوت الحجية
ناوشتها الماي ومباشرتاً بديت بالدراسة ويا بتول
راسي افتر من التفكير
ما اعرف ادرس حتى الحگ بيهم لو اقرا امتحاني الكل شي ممضبطة بي

شوية وسمعت همام ديصيح لبتول
- طيبة روحي شوفي عمو شيريد عندي أمتحان باچر

- اي تتدللين
حچيتها وگمت كتاب الأنگليزي بـ ايدي
طلعت لگيتة مبدل و واگف يم الدرج يتصفح بموبايلة

- نعم عمو
- بتول وين لعد مو صحتها

- دتقرا عدها أمتحان ودزتني بمكانها بشنو أساعدك

- شلون بـ هالاستغلالية يربي
هي اجت طيبة للبيت وشالت أيديها من كل شي

- لا عمو خطية دتدرس والله قابل گاعدة وما اجتك

- وانتِ ما عندچ دراسة
- لا اكيد عندي
- شنو هذا بـ ايدچ انگليزي مو ؟!!

- أي انگليزي
باچر عندي أمتحان وما اعرف شلون اقرا هواي فايتني شرح حتى كل شي مدافهم من المادة

- تردين ادرسچ
- لا مو اخاف ازحمك وانتَ تريد تطلع

- ميخالف مو مهمة الطلعة هاي تتأجل عادي

- والله ياريت تقريني أحسن من هالحيرة الأني بيها

- تعالي لعد ساعديني اودي أمي للمغاسل وراها ندرس

- اي يلا نوديها

حچيتها وركضت قبلة بفرحة
ودينا الحجية للمغاسل ورحنا سوة الغرفة بتول أول ما دخلنا صاح بيها همام

- بتول هالسنة راح ترسبين انتِ

- اسم الله عمو ليش !!!

- لأن حالچ حال أبوچ
متخافون الله ومستغلين هالطفلة المسكينة

- وگعت گلبي عمو حسبالي شي مهم وصدگتك

- ليش برأيچ هذا شي مو مهم يعني ؟!!

- شوف من الأخير
اني عاذرتك تدري ليش عمو ؟!!
اني اگولك ليش لأن ادري بيك تغار لذلك تحچي هيچ

- هههههههههه
يلا عمو طيبة ناوشيني دفتر وقلم وجيبي هالانگليزي من أيدچ

بتول.. شنو عمو راح تقريها انتَ ؟!!

همام.. أي خطية عدها أمتحان والمادة فايتتها متگدر تسيطر عليها وحدها

- واني هم عندي أمتحان قريني وياها لعد

- ها بتول بدينا بعدنا بسم الله

- ليش عمو لعد هي وحد حتى تقريها ومتقريني

- شعندچ أمتحان بلا ست بتول
- علوم

- تگعدين تدرسين لا اضربچ بالعلوم على راسچ
هيچ راح تدخل المعلومات مباشرتاً للعقل وترحميني من دلالچ الزايد

- ما احبك بعد يلاااا

- ههههههههه ميخالف المهم اني احبچ

باوعلي وأشر اگعدي
بدا يدرسني ما تعبتة ساعة خلصت اليونت رفع راسة يضحك شاطرة وذكية ما شاء الله

- هههههههه شكراً عمو
بس انتَ هم خوش تشرح وكلش قوي بالانگليزي

- رحم الله والديچ
يلا هسة فهمتي كل شي لو عندچ شي بعد ما فاهمتة

- لا عمو كل شي فهمت شكراً جزيلاً
- تتدللين

حچاها وگام يم بتول
قراها شوية حتى لتزعل وراها عافنا ندرس وطلع يم الحجية

مر أكثر من شهر على وجودي ببيت أرشد
والحمد لله
ارتاحيت نوعاً ما بأستثناء شغلتين چانن ينغصن علية راحتي

أول شغلة شوقي لرحمة والعمة نهاية
وخوفي على أختي من أبوية وكل الموجودين بالبيت ليأذيها أحد واني مو يمها
وتفكيري المستمر بالسبب اللي خلة بيت جدي ينسوني وميسألون عني أبد طول هالفترة الراحت

والشغلة الثانية أرشد
ما عجز ولا مل من محاولاتة المتتالية وياية
كل يومين والثالث يصيحني للغرفة ويكرر نفس السالفة وبعد ما ابچي واتوسل بي يضربني ويطردني

ولمن تسألني خديجة وتعرف بي طاردني
تبتسم وتحمد الله وتشكرة وراها تظل توصيني اتشدد ويا أكثر وما انطي مجال يسيطر علية

وبعد مرور شهر ضبط
صارت حفلة المهر مالت همام وعرفت من خديجة أسم العروس الاء

خديجة هي اللي تولت كافة الترتيبات
حتى اني وبتول طلبت من أرشد فلوس وجهزتنا للعقد

للعصر البيت انترس بالنسوان
وكلما وحدة من أقاربهم تسأل هاي البنية منين
أحس خديجة تضوج وحتى مرات تسوي روحها متسمع حتى لتجاوبهم

ساعة تقريباً ورحنا البيت العروس
أول ما دخلنا انخبصت الدنيا بالهلاهل والهوسات
گبل باوعت للعروسة من باب الفضول چانت كلش حلوة مثل ذني اليطلعن بالتلفزيون

شوية وگومها عقدلها الشيخ
ربع ساعة رجعت توها گاعدة صاحوا اجة العريس سون طريق

همام.. مرت الايام وصار موضوع خطوبتي رسمي
اتفقت ويا العقيد وحدننا موعد المشية
طلب مني أشوفها ما قبلت يعني اذا معجبتني شسوي قابل أرفض علمود شكلها

اكتفيت بكلام أبوها عنها
اسمها الاء وأصغر مني بسنة عمرها 24 وخريجة ادارة واقتصاد

انتهى العقد على خير ودخلت البسها الذهب
ما گدرت ارفع راسي من هوسة النسوان گعدت بصفها مدنگ لحد ما اجت خديجة

- يلا خوية لبس مرتك الذهب
- انتِ لبسيها
- هههههههههه لا شلون يصير لازم انتَ التلبسها همام

رفعت راسي گومتها صارت البنية بوجهي
لا الحمد لله حلوة ما بيها شي عبالي شو شكو ومشاها أبوها براسي

بس لبستها طلعت ما اتحمل هالدوخة
رجعت للبيت
أمي وحدها خطية صعبة عليها تروح وياهم بست راسها وظلت تسألني عن العروس والمهر

اقل الساعة طبن البنات ويا خديجة للبيت
بعدها بالباب رگعت الهلاهل
باوعتلها وضحكت كافي ما شبعتي هلاهل مو حسچ طبگ على گد ما هلهلتي اليوم

- چان گتلك الله ينطيك فرحتي بس لا عيني أريدها

- ههههههه دائماً ان شاء الله هالفرحة يبعد أخوچ

- دشوف هاي شنووووو ؟!!
حچتها ورفعت الورقة بوجهي رديت بـ أستغراب شنو

- رقم البنية گول أختي متفيد

- هههههههههه لا نحچي الحق احياناً تفيدين

- مع الاسف عليك
أكال نكار اني دوم افيد بس شسوي للعالم ميغزر بيهم

- ههههههههه
لا يابة اتشاقى وين اكو منچ خيتي يلا ناوشيني الرقم

- تفضل حلال عليك خوية

طيبة.. مرت الأيام وشوقي البيت جدي يذبحني
شلون هيچ صار !!!
وينهم وليش اختفوا المشكلة ما اتجرأ اسأل أرشد عنهم هو اني گوة اتهرب من أي حديث يجمعني بي

وهيچ مشت الأيام
لا شهر ولا أثنين 8 أشهر مرت واني ما اعرف عن أختي وبيت عمي أي خبر حتى أبوية مختفي مثلهم

خلصت هالسنة على خير ويمكن دراستي هي الچانت تهون علية باقي مشاكلي
أما همام انشغل هالفترة كلش بتحضيرات عرسة
لدرجة صرنا منشوفة بالبيت إلا بتالي الليل يگعد يمنا شوية وراها يصعد ينام وهكذا

بحياتي مصار شي جديد
وضعي ويا أرشد مثل ما هو وعلاقتي بأهل هذا البيت طيبة بحيث حسيتهم الي أهل وأكثر

كم مرة شفت رجل خديجة هنا
يجي عليها بالليل بين فترة والثانية يگعد شوية وياهم وراها ياخذها ويرحون

ما ادري ليش ما ارتاحيت الة ابد
نظراته الية من اصير گبالة غريبة بشكل
لذلك صرت بس اشوفة بالبيت اشرد للغرفة وما اطلع منها إلا لمن يروح

صار وقت عرس همام والكل چان سعيد بهالمناسبة
جهزنا لـ هاليوم اني وبتول بكل لهفة
بحيث خططنا الة قبل أكثر من أسبوع بس صار شي قلب كل مخططاتنا
بيوم العرس گعدت الصبح على صوت الـ هوسة توني رافعة راسي من الفراش....

يتبع

لتنسووون ⭐⭐⭐⭐⭐⭐
كل الحب ❤🥀