صباح الگاردينيا أحبتي ❤
/// البارت اثنا وستـون /////
#بيوت_بلا_جدران
#شمس_السعدي
----------------------------------------------
أين نضع كل هذا الحُزن ؟
تخلّعت أكتافنا .. !!
-----------------------------------------------
خابرت ..
گالولي مرتك اجت .. جانت تبجي وطلبت نخابرك بس ماعرفنا شبيها .
سديت التلفون بسرعه سألني درع ..
" شنو صار ؟"
رديت ..
" رحمة جايتهم تبجي .. معناتها اكو شي قوي رحمة ماتجيني الشغلي او ماتخابرني الا اذا اكو شي يستوجب "
صعدت بساع اخذت غراضي .. هو لم غراضه هم وياي ..
سلمت عليه ردت انزل ..
صاحني .. " اوگف رايح وياك مااعوفك وحدك "
حاسبت الفندق وطلعنا بسرعه لاهلي والف حسبة وحسبة ببالي ..
طول الطريق احجي واتخيل اشياء صارت ..
ودرع يهدي بيه ..
" يول شبيك ماكو شي لا توالف بالشر "
رديت ..
" رحمة مستحيل تجي للشغل اذا مو شي جبير "
احس الطريق شطوله صار امي .. حسون .. دمعة .. ماسة .. الف سالفه اجت ببالي ..
اول ماوصلت صرت اركض مثل المسودن .. دگيت الباب حيل ..
فتحتها دمعة…
عاينت بوجهها ..
" شكو شبيكم احجي "
اتنهدت ..
" اخذوا ماسة من رحمة "
انصدمت ..
شني اخذوا ماسه .. دفعتها ودخلت شفت رحمة شحالها وملخة روحها تملخ وتبجي ..
شافتني طفرت الي ..
" علي اروحلك فدوة رجعلي بتي .. علي اخذوها مني اموت والله اموت "
صحت ..
" شنو ياخذوها بكيفهم وانتي شلون تنطيها هي بحضانتج اليوم انعل ابهاتهم "
زادت بالبجي واللطم ..
" لان اني غبية غبية اني سلمتهم بنتي بيدي اني اتنازلت عنها بسهولة .. "
صفنت بوجهها ..
" شتقصدين "
" مو گتلك عمي بصمني اوراق علمود اتنازل عن حصتي ومااطالب بورث .. طلعت بيهن تنازل عن ماسه "
استغربت ..
" شوكت گلتي مااتذكر وانت شلون هيج تسوين غير تتأكدين شلون "
ردت ..
" لاتلومني ردت بس اخلص منهم جنت مستعدة كلشي اسوي واطلع من سجنهم تالي بقت روحي بين اديهم وتلگين عمي سوة هيج لان حجيت عن درع كله من عمتي مهجة "
صحت بيها ..
" شوكت تبطلين تتصرفين وحدج .. اني رايح "
لزمتني ..
" اخذني وياك لاتعوفني "
التفتت ..
" وين اخذج اني ودرع نروح . وين درع "
سالت دمعة ..
" ليش درع اجه وياك ماادري سديت الباب حسبالي وحيدك "
رحمة ..
جنا گاعدين بالبيت اندگت الباب ودخلت عمتي سمرة ورحيم وياها جاي بقى برة ..
استغربت من شفتهم ..
گامت عمتي حورية الهم ..
" خيركم وشعرفكم بمكانه "
رد رحيم ..
" ماكو شي يصعب علينا "
ردت عمتي سمرة ..
" اجيت اخذ بنت عيد .. ليلي ماانامه من يوم الاخذتيها منا وحرمتينا وحتى عيد يجيني بالحلم يوصيني عليها ويگلي اخذيها يمج "
ضحكت بأستهزاء ..
" هو عيد من عايش مايعرفها وين صايرة من مات اتذكرها خل يوصيج بولده ذولاك ماله علاقه ببنتي "
ردت ..
" مو بكيفج هي بنتنا مثل ماهي بنتج "
اتعصبت ..
لزمتني عمتي حورية ..
" سمرة كفي شرج عنا وولي .. البنية صارلها سنين بحضن امها توج ذكرتيها .. وبعدين جنا مرتاحين منكم شجابكم علينا "
ردت ..
" الجابني هاي .. "
استغربت ..
" شني هاي ؟"
ردت ..
" انتي متنازلة عن بنتج النا واني بيبيتها ومن حقي اخذها واربيها بحضني "
صحت بيها ..
" اني مامتنازلة ومستحيل اتنازل كافي جذب "
طلعتلي ورقة مدري شمكتوب بيها مافهمتها بس بيها اسمي واسم ماسة .. تسودنت من شفتها ..
دخل رحيم سحبها غصب مني ..
ضلت تبجي وتصيح " يمة لاتخليهم ياخذوني يمة "
جنت لازمتها ورحيم يجر بيها ..
خرمشته من وجهة " عوف بنتي وين ماخذها "
دفرني ببطني وطلع .. عمتي تتعارك وي عمتي سمرة وامي تبجي وتدعي عليهم ..
ركضت دمعة وراه بلا حجاب للشارع .. بالگوة فكت روحها عمتي سمرة وشردت وراه ..
سحلت روحي وگمت ..
اجت دمعة ..
صحت بيها .. " وينها ليش خلتيه ياخذها "
حضنتني وتبجي..
" وياهم حماية خالي منهل جايين "
گعدت بالگاع ابجي .. معناتها عمي بظهرهم والا عمتي سمرة ادريها ماالها خلگ مسؤولية ماسة ..
حجيت العلي من اجه تسودن ..
وگام يحجي عليه ويلومني .. حقه بس شبيدي اني وشعرفني راح يصير هيج ..
دار وجهة ..
" اني رايح لهناك وانعل شيب اهلهم اذا مارجعوها "
لزمت بي ..
" اخذني وياك اريد بتي اشوفها "
رد ..
" وين ترحين مانعرف شيصير هناك وحسون منو اله "
اتهسترت..
" شبي حسون عمتي وامي ودمعة هنا يمة قابل هو اغلى من بنتي .. اني ماافرق بين ولدي "
اتعصب ..
" شبيج انت منو مفرق بينهم .. ماسة هم بنتي نسيتي ربت يمي وكبرت وتصيحلي بابا "
بجيت ..
" علي لا تزعل مني بس گلبي محروگ على بنتي "
اشرلي ..
" خلي عبابة على راسج وامشي "
طلع بسرعة لبست عباية ورحت وراه .. وعمتي حورية توصي وخايفه عليه ..
طلعت اتفاجأت بدرع واگف بالباب يحجي وي علي ..
شافني صفن ..
" شلونج رحمة "
رديت ..
" شلوني بعد "
سأل ..
" وين رايحيين هسا انتو فهمني شكو "
رد علي ..
" اخذو ماسة من امها "
استغرب ..
" منو الاخذها وليش "
رد علي ..
" منهل بدأ يخطط حتى ينتقم من رحمة جيف كشفت سرهم "
ضاج ..
" اني رايح وياكم "
رديت ..
" لا انت خليك البيك مكفيك "
اتعصب ..
" اشنو قصدج اني ماسند الج مااا .. عجل هيج ماخذة مني موقف "
رديت..
" مو وكت هالحجي هسا بالي يم بنتي .. "
هز راسه ..
" هين عجل كلشي بوكتو حلو "
عرفته ضاج بس خليه يضوج..
امي تمرضت وشحالها وعينها على الباب وهو ماكلف نفسه يدخل يسلم عليها.. بقى واكف بالباب مثل الغرب
اصر يمشي ويانا رغم علي ماقبل بس درع گالة ..
" اجه الوكت الاحاسبهم على السووه بيه وبالجابتني وباخواني "
لزمه علي ..
" درع دير بالك لاتتهور "
هز راسه ورحنا .. طلعت عمتي ورانا ..
سألها علي ..
" وين رايحة ؟"
ردت ..
" گلبي لعب ماامن تروح وحدك خايفة يسوولكم شي "
رد ..
" وانت تحامينا مثلا "
ردت ..
" مالك شغل "
اصرت تروح واخذناها وبانا .. طول الطريق ابجي ..
وعمتي تدعي مدري تسبح وجنها خايفه منهم لو تعرف اهلها شنو ..
دور خلتني اوهوس .. رجلي واخوي اثنينهم خايفه يتعصبون ويسوولهم شي ..
نزلنا هناك بالسلف ..
وجنت متمنية ماادخله بعد.. بس لو مابنتي جابتني ..
نمشي وعمتي توصي بيهم ..
" يمه بهيده لاتتهورون .. اذا عاندتوا يعاندون .. "
مارحنا للمضيف مشينا گبل للبيت ..
كسرتها تكسر مثل المسودنة ..
لزمتني عمتي ..
" اوگفي شمالج هجرتي الباب "
فتح موسى الباب دفعته وفتت اصيح ماسه وين ماسه اريد بنتي جيبوها "
طلعن من غرفهن على صوتي ..
عمتي سمرة قفلت الغرفة وطلعت ..
اتقربت للغرفة دفعتني ..
" اوگفي وين مولية .. "
صحت بيها ..
" حرام عليج حابستها شتسوين بيها انتي اصلا ماتحبيها ياظلام خلصتوا عمركم حابسيني اني واني ماكفاكم .."
صاحت عليه ..
" امشي ولي مو تنازلتي عنها شعدج جايه "
منيرة ردتها ..
" حرام عليج البت من جبتوها لسا مابطلت بجي اطوها الامها شني من گلب عليجن "
ردت عليها ..
" مالج شغل انتي لاتتدخلين "
عمتي حوريه ردتها ..
" شتردون منا بعد .. عفنالكم السلف وكلشي الكم واخذت ويلادي ورحت منا علمود ارتاح واعيش .. لحگتونا لهناك ليش "
سمعت صوت طلع من غرفة الشيخة ..
التفتت بسرعة ..
طلعت عمتي مهجة ..
" اييييه الدنيا دوارة .. مثل ماحرمتني احرمج .. انتن الاثنين سبب خراب حياتي .. حطمتني واخذتن كلشي مني .. حسبالجن اسكت واعديها .. راح اخذ كلشي منجن مثل مااخذتن بيتي ورجلي وحياتي "
صاحت بيها عمتي..
" مو احنه الاخذنا انتي الدمرتي روحج .. اخذتي شي مو الج وجذبتي عليهم وهاي النتيجة .. بعد لاتلومينا "
صاحت عمتي مهجة ..
" اسكتي انتي لاتتدخلين .. اما ذيج بنت الفصلية .. اموت منها الا مااخليها ترتاح .. حسبالها لو گالت اخوي راح يعترف بيها .. من كل عقلج درع يعوف العز والدلال ويگعد بحضنجن الفگر انتي وامج الفصلية .. لاتحلمين يرجعلجن .. مااخليجن تتهنن بي ابد .. وراح احرمج من بنتج مثل ماحرمتيني من بنتي "
دخلوا علي ودرع ..
شافت درع انصدمت ..
" درع شجابك ؟"
ضحك ..
" عجل حسبالي متندمة .. للحظة كسرتي خاطري وگلت الصار مالها ذنب بي وكله ذنب الشيخة .. مصدوم بيج اني ومااعرف شحجي "
ردت ..
" اني الربيتك اني امك حتى لو ماجبتك بس انت مسجل بأسمي.. ابني انت .. لاتحرمني منك ومن اخواتك .. الصار مالي ذنب بي "
رد ..
" السمعته يكفيني .. عجل هسا صحيت وعرفت اني جنت مخدوع بيج .. وان كان على الربا .. فالربا الجدتي هي الربتني .. انت ماحطمتيني اني بس .. حطمتي بناتج هم .. لا عبالج ولد عمهن راح يسعدوهن بعد السوتيه راح يبقون يعيروهن بيج "
اتهسترت ومااتحملت وبقت تدعي عليه وعلى عمتي حورية وامي .. وهددتني ماترجع ماسة الحضني ابد ..
موسى رايح گايل العمي حطاب اجه هو ورحيم يركضون ..
" شعندكم هنا وشلون تدخلون بيتي ماكو حرمه للبيت"
صحت بي ..
" ياظلام انتو تعرفون حرمة رجعولي بنتي "
راد يضربني ..
سحبني درع من ايدي بسرعة خلاني ورى ظهره ..
ولزم ايده ..
" دحك بيه زين .. الحرمة التحجي عنها انتو الدستوها يوم الدخلتوا البيت واخذتوا طفلة من امها غصب ..
اشنو انتو ماكو واحد يگف بوجهكم .. ان كان قبل مالهن سند فاليوم اني سندنهن .. واني درع الكل واحد يوصلهن .. ولو ترجع الاصلي وان مااريد اعترف بي .. بس اني ابن شيخ وابن هذا البيت .. واذا انفتحت الدفاتر القديمة كلكم تتضررون فخلوني ساكت ورجعوا الطفلة الامها "
دمعت عيني واني اسمع كلامه ..
اعاين الطوله واحجي ..
" من اروح فدوة الطولك خوية .. مليت مكان رضوان بوجودكم "
علي جان يحجي ويدافع ويجادل خاله ويحجي بالقانون وگاله يتعبر نصب واحتيال .. هي ماتعرف تقرأ وتكتب وانتو بصمتوها بالنصب .. فر عقلهم فر ..
بس كل هذا مافرحني بكثر فرحتي بحجي درع وكلامه ..
جان عمي حطاب مايعرف يحجي كلمتين على بعضهن
گدامهم .. وعلي درع واحد يصد وواحد يرد بالحجي ..
سكتهم كلهم ..
رحيم تعصب وگام يهوس ويطرد بيهم ..
لزمه درع من ايديه ..
" لا ترفع ايدك اكسرها الك .. لا تشوفني كاضب روحي .. والا اكضب على خوانيگك وادبك .. لكن المرجلة مو بالصوت والغلط .. ولا بالذراع .. المرجلة هنا .. (ويأشر على عقله) ..
بس انت ماعندك عقل عجل خلصتوا عمركم بأمر الشيخة وهساع منهل .. عبيد مو شيوخ "
هالكلام سودن عمي ..
وصار يهوس ..
خل يجي منهل واني اعلمكم بيكم حظ ابقوا لمن يجي الا اخليه يوديكم ورى الشمس ..
ضحك علي ..
" حقك مو انتو ماتعرفون غير هاي الطريقه وانت عدوك وياهم .. اليوگف بوجهكم تكتلوه لو تخلصون منه بغير طرق "
رد درع ..
" عجل اني ماعندي شي اخسرو .. هي روح وحدة اشو تسوون سوو .. العبرة بالنهايات "
جنت واگفة بوسطهم ومفتخرة ..
احس روحي بنص اسود ..
دفر علي الباب ..
واخذ ماسة .. حضنتها جانت بس تشاهك وتبجي وبالگوة تجر نفس ..
اشرلهم ..
" الورقة العندكم اشربوا ميها .. ماتوكل خبز عندي لو اعرف اموت مااخليكم تاخذوها ."
ردت عمتي حورية ..
" مهجة اسمعي انتي حسبالي الگي منهل ومالگيته .. واني اعرف كلش زين .. انتي ورى هاي السالفه علمود تنتقمين من رحمة .. بس وحق القران والنزله .. اذا انمست شعره من ويلادي وماسه وياهم .. لافضحكم كلكم .. واطلع خياساتكم الدافنيها لو اعرف على موتي .. كفوا شركم عنا ويزي عاد .. وصل حدها لهنا وبعد مااسكت.. والتهددني جنتن بي .. انعرف وابني هالتشوفيه بحضني.. وضلن انتن بصخام الوجه.. "
التفتت العمتي بثينة ..
" وانتي هم يجيج الدور لو ماكفيتي رجلج من عندنا عفنالكم السلف كله بعد شتردون "
رجعت التفتت العمي حطاب ..
" وانت حسافه اسمك اخو .. اخذت تربات الشيخة وطبعها تف على هيج اخوه .. اتعلم من هالفرخ ( تأشر على درع ) .. ذاك اليوم عرفها اخته وشلون وگف بظهرها وانت خلصت عمرك عبد للشيخة وولدها .. لا حاميتنا ولا صرت اخو النا .. حتى من ماتت اختك ماسألت شلون ماتت وليش .. عبن انت عندك اهمشي روحك وولدك وهاهي "
اشر علي..
" يلة يمة كافي امشينا .. الحجي مايجيب نتيجة وياهم "
شال ماسة مني .. وطلعنا ..
بقيت اتلفت اشوف درع وين ..
اشرلي ..
" اني هين جاي وراكم لاتدحكين مااعوفج "
ابتسمت ..
احس الفرحة ماسايعتني ..
جانت عمتي خايفة من غدرهم .. صارت تستعجلنا ..
" يله بسرعة امشوا لا يطرشون ازلامهم ورانا '"
رد درع ..
" هي بكيفهم .. والله لأكصبهم گصب .. "
رد علي ..
" مايسوون شي بس حجي وخاصة خالي .. ماشفتيه بس يهوس هو وابنه . كل شوية يرامشون حسبالهم درع راح يبسطهم لان شافوه تعصب "
رجعنا طول الطريق نضحك عليهم ..
وصلنا للبيت ..
همس علي الدرع ..
" انزل ويانا ؟"
اتنهد درع وعاين عليه ..
رديت :
" كافي بعد .. مو عيونها تعبت من البجي والمناطر .. خليها تفرح بيك .. عوضها عن كل السنين الراحت "
غمض عينه واخذ نفس ونزل ويانا ..
ابتسمت ودخلت للبيت اركض ..
تلگتني دمعة ..
" ها بشري "
رديت ..
" رجعتها لو اموت مااخليهم ياخذوها "
ضحكت امي جانت مخليه حسون بحضنها وگاعدة بالهول ..
" رحمتك ربي ماضيع دعائي وتوسلاتي "
اتقربت منها وحضنتها ..
" گرت عينج يمه برجعة اول ولد الحضنج "
دمعت عيني وعينها سوة ..
" منو منهم " سألت ..
دخل ..
" اني يما "
شافته شهگت ..
سحبت حسون من حضنها انطيته الدمعة ..
فتحت ايديها ..
" واخيرا حنيت ع الجابتك والرضعتك .. خفت اموت وماكو واحد بيكم يگلي يمه "
اتقرب الها حضنها ويبجي وهي تبجي .. يشم بيها بكل جهة ويگلها ..
" اكفي خليني اشم بيج ريحة الجنة "
جان يشم بيها ويگلها ..
" افيييش طلعت هيج ريحة الام الانحرمت منها .. "
خنگتهم العبرة اثنينهم والكلام توقف بينهم ..
بقى واحد يحجي وي الثاني بعيونه ..
هو يمسح بدموعها وهي تمسح بدموعها .. كلما يطيحن واحد يمسح للاخر ..
همس ..
" الله لاينطي الحرمني من حضنج وحنانج "
اتقربت منهم ..
" نورت يابعد اختك "
عاين عليه ..
" اااااخ رحمة .. ماعرفت الحنية الا منجن انتن الاثنين .. جنت احسد فيصل عليجن وهو بوسطجن مدلل.. اتمنيت اصير بمكانو .. ماكنت اعرف اني مكاني اكبر من هيج وانحرمت منو .. "
حضنا اثنينا ويبجي واحنه نبجي .. فصلنا ثلاثتنا عن العالم ..
اخذ اديها يبوس بيهن ويشمهن .. وهي بس تبجي ماتحجي ..
" جنت حاسه بيك ابني .. من الله بس اشوفنك اتلهف وروحي ترف عليك .. اثاريك ابن بطني وماادري "
رديت ..
" اثاريه توأمي واخوي وسندي ودرعي وماادري "
همس ..
" دوم درعج ان شاء الله منا وجاي مااعوفجن حتى لو اشوفلي مكان قريب يمجن واگعد .. "
صاح بي علي ..
" عيب عليك البيت بيتك وان ماشالتك الگاع اخليك على راسي "
رد ..
" يسلم راسك ابو حسون "
اعاين على عمتي ودمعة يبجن على بجينا اثنينهن ..
ردت عمتي ..
" الله لاينطيج ربحة وانت بگبرج عبن حرمتي الولد من امه والام من ابنها وخلطتي الانساب .. الله يحرمج من الجنة مثل ماحرمتينا من اعزازنا .."
عاينت عليها دمعه .. اخذت حسون ودخلت للغرفة ..
بعد اكو فتور بينهن .. بس ان شاء الله ينزال كل هذا وترجع سعادتنا تملي هالبيت ..
خليت درع وي امي گاعدين وگمت الدمعة ..
دخلت جانت تبجي ..
" لشوكت تبقين ماتحجين وي عمتي "
ردت ..
" مو مااحجي وياها .. بس اني تعبانه احس روحي ضايعه .. جنت دوم اشوفه احن انسان الي .. وتالي انصدم بي مجرم .. وهي السبب جابتني من مجرم .. جانت تگدر توگعني ماتجيبني الهيج دنيا .. لو تزوجت بيوم واولادي سالوني عن جدهم شكلهم شحجيلهم ..
وفوگ كل هذا .. بعمرها ماحبتني لان اني بنت جعمقة الكتل ابو ابنها وحبييبها .. راح تبقى تشوف بوجهي المها ووجعها .. وعلي يشوف بوجهي الانسان الحرمه من ابوه واهله .. "
رديت ..
" علي ماعنده هيج عقليه تعرفيه .. مايحاسب احد على اخطاء غيره .. وانتي اخته وتعرفين كلش زين معزتج عنده .. وحتى عمتي تحبج .. انطيها فرصة احجن اثنينجن ام وبنتها فرغن البگلبجن وارتاحن ..
شفتي فرحة امي بدرع .. وفرحتي بأخوي .. هاي الفرحة ماتتعوض بكنوز الدنيا كلها "
انتبهت العمتي واگفة وتسمعنا ..
اخذت حسوني وگمت ..
سديت الباب عليهن وخليتهن يتعاتبن ووحدة تفتح گلبها للثانية .. عمتي لازم تسمعها وتحتويها لان دمعة جانت مكسورة خاطر وتعبانة نفسيتها ..
طلعت شفت امي ودرع نايم بحضنها ومغمض ..
كحيت اشرتلي ..
" اششششش خليه نايم يگول صار كم يوم ماضايگ النوم ولا مرتاح "
اتقربت بستها براسها وگمت .. الفرحة طالعه من وجهها مثل النور ..
رحت للغرفه جان علي حاضن ماسه ويسولفون ..
وهي تگلة ..
" اني صح خفت وبجيت بس اعرف انت وماما ماتعوفوني .. اني مااحب ذولاك مااريد اروحلهم بعد "
وهو يواسي بيها ويطمنها انه محد ياخذها من عندنا ..
نومت حسون واجيت خليت راسي على كتفه .. هالكتف اماني وملاذي ..
اتنهد ..
" كلنا تعبنا اليوم .. راح اطلع اجيب اكل من برة لاتطبخن ولاتعبن .. وهم فرحة عمتي بدرع .. "
بسته بخده ..
" ربي مايحرمني منك .. شمااحجي مااوصفك "
رد ..
" كلشي يهون الخاطر رحمتي وريحانتي وام وليداتي "
ضلوا يتداهرون هو وماسة يريد ينسيها خوفها وهي تضحك وحاضنته ..
اخذها وطلعوا يجيبون اكل ..
طلعت شفت منظرهم .. اتخيلت رضوان على الرجل الثانية واركان بالوسط .. هيج يربي وتكمل فرحتنا من صدگ ..
جاب علي الاكل فرشنا السفرة وكعدنا كلنا سوة طلعت عمتي ودمعة يضحكن .. شافهن علي وعاين عليه وابتسم وهاي رجعت دمعة الحضن عمتي وتصافن ..
امي گالت الدرع يجيب مرته وابنه ويجون يمنا يگعدون..
جرها حسرة وگالها " ان شاء الله "
بيومها جان كلشي حلو .. لو ماالصار بماسة ..
بس علي خوفني وگال لازم نبعدها عن هنا .. خاف كلشي يصير ويرجعون ياخذوها ..
رديت ..
" علي ليش تخوفني "
رد ..
" باجر اشوفلي محامي وارفع دعوة على عمج حطاب واتهمهم بالتزوير وانتي ابد لاتگولين اعرف اقرأ واكتب وانتي صدك ماداخله مدرسة گليلهم امية .. ومنا الذاك الوكت ماسة مانريدها بالحوش .."
ردت امي ..
" جا ماكو الا اخذها وامشي الخاجية هناك محد يوصلنا"
رد علي ..
" خوش فكرة واصلا محد يتوقع انتي قريبة منهم هيج"
رد درع ..
" لا ماامن على امي هناك كلشي يصير "
ابتسمت امي ..
" من تروحلك فدوة امك .. شو كولها بعد "
ضحك ..
" صار يمة .. امي انتي امي وجنتي "
امي بس تضحك وفرحانة..
رديت عليهم ..
" ترى اغار اني شني هاي "
رد درع ..
" اشنو طفلة وتغارين ام وعندج اثنين اولاد .. عجل انتي العمر كله وياها اني ماشبعان منها "
ابتسمت ..
" يبعد اختك اشاقة .. ريت الله يخليك النا ومايحرمنا من وجودك يمنا "
حضني وباس راسي ..
علي كح ..
" اشو اگلكم اني هم غرت "
ضحكنا كلنا ..
اعاين عليهم وفرحانة ..
بس درع جان ماقابل امي تروح لهناك والمشكلة ماعندنا احد يگعدن عنده ..
جان ضايج وهو يگول ..
" ماصدگت انجمعنا معناتها راح نفترق عجل مااگدر اروح لهناك اشوفها "
ردت امي ..
" اسم الله يمه ليش نفترق كلها كم يوم بين ماتنحل السالفة ونرجع .. وانت ضل هنا يم علي واخيتك وعود كلش فيصل يجيني يتطمن عليه ويطمنكم "
علي جان خايف عمي منهل يسوي شي لان اذا رجع وعرف علي ودرع دخلوا للبيت واخذوا ماسة بالگوة مايسكت ..
لان الصار كله بتوجيهاته .. لو ماهو ماگدروا عمتي ورحيم يجون ياخذوها والدليل حمايته الوياهم ..
هالليلة اول ليلة يبات بيها درع بحضن امي ..
نومت حسون وماسة تنام اغلب الاحيان يم دمعة ..
طلعت سحب ايدي علي ..
" مشتااااق حيل "
اتقربت بسته ..
" هسا اجيك حبيبي "
طلعت من الغرفة واخذتني رجلي الغرفة امي ..
فتحتها جانوا نايمين ويسولفون البعض عن حياتهم
يشكيلها بعد براء وخذلانها اله ..
وهي تواسي بي وتهون عليه ..
كل واحد بيهم يحتاج مواساة بس امي متعودة تواسي الكل ومحد يواسيها ..
جنت اسمعلهم وابجي .. مفتقدة الوجود الاخ بحياتي ..
اوووووف يرضوان لو موجود .. جان اكتلمت فرحة امـي ..
نسيت نفسي واني اسمعهم ..
انتبه الوجودي ضحك .. " يول لاتبقين مثل البزونة تدحكين بينا حدري هين "
فتحت الباب ابتسمت ..
" ماردت اقطع عنكم هاللحظة الحلوة "
رد ..
" ليش هاللحظة تكتمل بدونج ؟؟"
ماصدگت اشرلي ..
نمت بحضن امي من الجهة اليسرى وهو من اليمنى حضناها ونمنا وايدينا بدين بعض .. توأمي اليوم اتحدنا بعد كل هالسنين ..
ضحك ..
" عجل ربي خلقنا توام ليش انتي عيونج ملونة واني لا"
ردت امي ..
" عيونك وساع ويخبلن شناقصهن "
رديت ..
" احم احم القرد بعين امه غزال "
ضربني على ايدي ..
" يول مو گلنا حلوة تنغرين علينا "
بقينا نتناگر ونضحك ..
حجت امي ..
" هسا تأكدت انتو توم .. من مناگركم "
ضحكنا اثنينا .. غفيت بحضن امي وايدي بيد اخوي ..
لأول مرة احس بهيج احساس ..
من وكت رضوان ماحسيته بعد ..
فزيت بنص الليل .. شفتة دافن راسه بحضن امي وهي تعاين عليه ..
شافتني همست ..
" اشششش لا يگعد "
ابتسمت ..
" مانمتي موووو "
ابتسمت ..
" شلون انام وانجمعت بواحد منهم بعد كل هالسنين "
خليتها تتأمل بي وگمت .. رحت للغرفة جان حسوني بحضن علي نايم ..
شلته على كيف لفراشه فز علي .. شافني همس ..
" گعد يبجي ونيمته بحضني "
رديت ..
" لعد ليش ماصحتني "
ابتسم ..
" اجيت شفتكم شلون نايمين ماهان عليه اگعدج جان منضركم حلو كلش "
ابتسمت ..
" يروحي انت .. عفتك ورحت وانت بقيت منتظرني موووو "
رد ..
" اليوم سماح جيف درع اول يوم اله هنا .. بس دور ماكو عذر "
بدلت واجيت نمت يمه .. وكملنا نومتنا بلهفة واشتياق للصبح ..
ثاني يوم امي اخذها علي للكراج ووياها ماسة ..
ودعناهن .. وحملهن مسواگ ..
ومناك فيصل يتلگاهن ياخذهن .. وجان علي بس يوصي بفيصل ويحذره محد يكشفه ..
ومناك راحوا هو ودرع للمحامي يرفعون دعوة على عمي حطاب وعمتي سمرة .. لان مايگدر يقدم على منهل وهو بمنصب حساس واكيد تنگلب الشغلة عليه واصلا اني مسجلة بأسمه يعني اتسمى مشتكية على ابوي وتصير بلبلة ..
صار درع يشتغل وي علي .. جان دايما يخابر بيت اهل براء متأمل تطلعله ويحجي وياها يتطمن على ابنه بس تطلع لو امها لو واحد من اخوتها ..
بس جان اكثر تواصله وي بيبي دنانير واخواته .. دوم يخابر ويسأل عليهم .. ويحجيلها عن امي وشلون خلص الليل بحضنها .. وبيبي دنانير جانت تبجي وتدعي على الشيخة الفرقتهم ..
درع جان دايما يحب يفضفض وياي ..
من شفت لهفته على براء گلتله اخابرها اني ..
علي سحبلنا تلفون للبيت علمود خاف يصير شي وهو بالشغل نخابره بسرعه ..
اول ماخطرت ببالي براء .. خابرتها طلعت امها .. گلتلها اريد براء اني صديقتها ..
مااعرف صدگتني او لا ..
شوية واجت براء ..
" الو مرحبا منو حضرتك "
رديت ..
" اني رحمة عرفتيني "
سكتت ثواني وردت ..
" خير ليش خابرتي درع بي شي ؟!"
رديت ..
" لا مابي شي .. بس درع تعبان بدونكم انتي وابنه حرام عليج تعوفيه هيج معلگ بيكم وتخذليه "
ضاجت ..
" رحمة لاتحكمين عليه بشي ماتعرفيه .. اني متشتت وتعبانه اكثر منو .. بس مابيدي شي ... "
بعدها جاي تحجي انگطع الاتصال ..
" اتصلت بعد ماحصلت "
خابرت العلي الشغله ..
طلعلي درع ..
" سألته على علي .. "
رد ..
" علي عندو شغل من يرجع اخليه يخابرج .. امي شلونها ؟"
رديت ..
" زينة مادام انت زين "
اتنهد ..
" الله يطيها الصحة والعافية "
ماگدرت اگله على رد براء وشلون طبكته بوجهي ..
حجيت الامي گامت تلوم بيه لان تدخلت بينهم .. وضاجت من حجيتلها على ردة فعلها ..
علي ..
" من حجتلي امي عن اهل ابوي واني بداخلي اتمنى اروح واشوفهم حتى لو من بعيد .. تراكمت الشغلات علينا .. فرغت روحي شلون ماكان ورحت من الصبح ..
وگلت هم مناك اروح اشوف ماسه وعمتي ..
سحبت الحجي من امي من غير مااحسسها وعرفت وين ..
سألت عرفت هم نفسهم ..
انتظرت واحد يطلع منهم ماكو ..
اخذتني رجلي للباب ..
دگيتها ..
طلعلي ولد صغير ..
" منو انت شتريد "
سألته ..
" بيبيتك موجودة .. هز راسه "
فتح الباب جانت فارشليها بالطارمة .. هي صبة صغيرة مو جبيرة ..
شالت راسها عاينت عليه .. بقت تبعد نظرها وتقربه وجنها مامصدگ يو مصدومة ..
شهگت ..
" يا يمة علي هذا انت "
گالتلي امي اشبهة حيل بس مااتوقعت هيج لدرجة بيبيتي ماتفرق بيني وبينه ..
فتحت ايديها اثنينهن ..
تعال يمة تعال فدوة اروحلك يبعد طولي وين رحت وعفتني كل هاي السنين ..
مااعرف شلون اخذتني رجلي الها وماصدگت ..
مشيت شمرت روحي بحضنها .. وجن حضن ابوي الانحرمت منه ..
وهي تبوس وتشم بيه .. يمة فدوة اروح الريحتك وطولك ..
الولد راح دخل بسرعة ..
طلع رجال جبير وياه ..
" انت ياهو وشدخلك وماتستحي حاضن امي "
شلت راسي صفن عليه ..
" انت ياهو ؟"
رديت والعبرة حاصرتني ..
" اني علي ابن اخوك علي !!"
بينما نحن في امس الحاجة لان نلتقي بأحبتنا وان نزيل الستارة عن ماضينا .. هناك من يكيد بينا ليحطم ماتبقى من ذلك الماضي وتلك الاحلام !!
#يتبع ..
( شمس السعدي )
احبتي اعرف البارت اتأخر .. واكو ناس ماعندها صبر وتتهجم بسرعه .. اضطريت اكتب بسرعه بعد ماانحذف البارت وتحملت التعب مرتين واني صايمة وتعبانه بس علمود انزللكم .. ردت انزللكم بارت طويل بس هذا الگدرت اكتبه بعد ماانحذف البارت .. لان وصلي خبر عن تهجمات البعض بالواتباد .. ومايسعني القول الا انه المرء يعكس اخلاقه من خلال تعليقاته .. واي تهجم محسوب ع اخلاق الفرد .. ولاخر مرة اگول هذا شهر عبادة مو قصص الماتتحمل وماتصبر تتركها للقصة وشكرا لكل متابعيني الراقيين ربي مايحرمني منكم احبكم ❤️