قصر التركماني بقلم ضحي حامد .

البارت الحادي وعشرون

نزلت على الدرج فى كامل زينتها وكأن شىء لم يكن
تبحث عنه بعينيها لكنها لم تجده
_اتأخرتى ليه يا هانم بصى بقى الحفله مليانه شباب زى الفل ركزى على اى واحد من البهوات الموجودين في الحفله وسيبك من مراد انتى كده بتلعبى على الحصان الخسران
وجهت دولت حديثها لإبنتها التى لم تسمع ولا كلمه منه واردفت :هما فين؟
_هما مين
=مراد ونوران مش شيفاهم
_انا بكلمك فى ايه وانتى فى ايه
=خلاص انا هدور عليهم

زفرت دولت بضيق من تصرفات ابنتها الحمقاء
ثواني وإبتسمت بمجامله لإحدي الضيوف ورفعت كأسهاً كتحيها لها وردت الاُخري بالمثل .
................
قبل قليل
..
خرجت نوران الى الحديقه الخلفيه للقصر هربا من الحفله تستنشق بعض الهواء فقد ضاق صدرها من هذه الأجواء والتى لم تعتاد عليها
_انتِ ازاى تسمحيله يقرب منك بالشكل ده؟

التفتت على صوت مراد بتفاجئ ليكمل هو حديثه :لاء وواضح انك مبسوطه كمان

_ايه الكلام اللى حضرتك بتقوله ده؟
=اللى سمعتيه ،تقصدي إيه بتصرفاتك دي

_حضرتك بتتهمنى بحاجه انا معملتهاش ،هو انا غلطت فِ حاجه؟
=وانتِ مش حاسه انك غلطانه
_ممكن توضح لي انا غلط فى ايه!
=كلك غموض وعندك اهداف وبتنسى نفسك
_لاء انا ماعملتش اي حاجه حضرتك اللى حابب تفهم تصرفاتى غلط لو كنت ركزت شويه كنت هتفهم انى بصده وببعد عنه وهو دايما بيضايقنى
ولو انا كنت حابه اعمل خطط وأهداف زى ما حضرتك بتقول كنت وافقت عليه لما ناريمان هانم كلمتنى
ولو حضرتك تقصد انى نسيت نفسى بسبب الفستان والطقم الالماس دى حاجة ناريمان هانم هيا اللى ...

قاطعها مراد مردفً :لاء مش قصدى اللبس قصدى ...
صمت قليلاً ثم اكمل بعد تنهيده طويله : ياريت تحطى حدود للمعامله بينك وبين نبيل..
وقبل أن يكمل تحدثت نوران :ممكن اعرف حضرتك ليه مهتم اوى كده ؟؟
_هقولك بس بعدين، المهم دلوقتى اوعدينى إنك تبعدي عن نبيل خالص،هو لما قرب منك وكلمك انا كنت فاكر إنه بمزاجك و كان لازم أتأكد منك،ولو حاول يضايقك تاني تعالي قوليلي من غير تردد

تحولت ملامحها سريعاً إلي الفرح وابتسمت إبتسامة صغيره وكادت تذهب إلي أنه أوقفها مردفاً: كنتي زي الاميره ،وخطفتي أنظار الجميع ليكي واولهم انا

تعالت دقات قلبها وشعرت أنها تُحلق بالسماء من كلماته البسيطه وتركته وعلي ثغرها إبتسامة جميله أظهرت غمزاتها لم تدم طويلاً

ما أن دلفت إلي الداخل ورأتها مُرجان التي أثقلت في الشرب كثيراً تقدمت منها عدة خطوات وعلي حين غفله ألقت محتويات الكأس علي وجهها وملابسها أمام الجميع الذين شعروا بالشفقه علي هذه الفتاه ومنهم من كان مُستمتع وكأنه يشاهد فيلماً ما أما عن نوران المسكينه فشهت بتفجئ وذهول من حركتها تلك وكادت أن تتحدث
لكن اردفت ناريمان بدلاً عنها بصوت حاد : مُرجان إنتِ إتجننتي
نفت مُرجان برأسها عدة مرات وتحدثت وهي تترنح بسبب ذلك المشروب: اوعي تكوني فاكره إنك علشان لبستي الفستان والطقم الي إنتِ شحتاهم من anna بقيتي مننا ،لاء فوقي لنفسك ،إنتِ مجرد خدامه...

قاطعها مراد بتحذير وصوت عالي : مُرجان إخرسي

لم تهتم له هو الآخر واكملت : مفيش حد من القصر هيبص ليكي ،حتي نبيل مش بيحبك ده بس هيتمتع بيكي ويرميكي رمية الكلاب ،يحرام صعبتي عليا ،سوري ياجماعه بوظت عليكم الحفله ،بس كان لازم اعرف حتت الخدامه دي مقامها ،سوري يا سيرين إنبسطي يا روحي بالحفل..

قاطعها نبيل هذه المره واتجه لنوران وامسك يدها واردف : انا مش هسمح لحد يجيب سيرة نوران علي لسانه ،نوران هتبقي مراتي

شعرت نوران بقلبها إنشطر لنصفين بعد حديث مُرجان المُهين هذا خصوصاً بوجود كل هذه الأشخاص، ولم تشعر بنبيل الذي جذبها له إلا عندما رأت نظرات مراد وهو مُقبل عليهم وهو مكور يده ويبدو أنه سيبدأ بشجار حاد مع نبيل

تحدثت سيرين هذه المره وهي تشعر بالضيق : في إيه كل ده علشان الخدامه دي ،الحفله بتاعتي باظت وكان منظرنا زي الزفت بسببك ،وعاملة نفسك زينا وقاعده معانا
قاطعها مراد : سيرين ملهوش لازمه الكلام ده ،والحفله بتاعتك باظت علشان الغبيه الي واقفه جنبك ،وللمره الالف بفكرك إنك ضيفه هنا ومش مسموح لك تهيني حد من هنا بالشكل ده .

تركتهم نوران وهرولت إلي الاعلي ودموعها لا تتوقف عن النزول حاولت زُمرد اللحاق بها والتي كانت تُشاهد ما يحدث بعيون باكيه مشفقتاً علي حال صديقتها لكن نوران أغلقت خلفها الباب بالمفتاح

خلعت الفستان وشدت طقم الألماس ورمتهم جانباً لا تريد رؤيتهم حتي لا تتذكر ما حدث ،لكنها حتي لو لم تراهم ألم قلبها كفيل أن يُذكرها

إبتعدت عن الباب وأرتمت علي السرير وظلت تبكي وتشهق وجسدها يرتجف .

..
أما بالاسفل

بعد أن إنتهت مُرجان من حديثها أُغشي عليها من كثرة الشُرب واخذتها والدتها إلي جناحها

وطلب مراد من عثمان أن يُصرف الضيوف ويعتذر لهم عما حدث

واخذ كمال والدته إلي جناحها و وضعها علي فراشها واردف قبل أن يخرج : ماما وجود نوران هنا بقي وراه مشاكل كتير البنت دي لازم تمشي انا مش هستني لما الولاد يخسروا بعض علشانها ،ده احسن ليها ولينا .
...........
_هتخرجي إمتي يا فيروز يا بنتي؟
تسألت والدة فيروز وهي تطمئن علي حالها
=مش عارفه يا ماما لما الدكتور يجي إسأليه
ردت فيروز بإقتضاب
_طب انا هطلع أسأل الدكتور ،وخدي الاكل الي أنا جبته اهو كُليه
....
_لو سمحت يا دكتور فيروز بنتي الي ف الأوضه رقم ٧ هتخرج إمتي
=مش انا الي متابع معها ،تقريباً الحاله دي تبع دكتور احمد
_ألاقيه فين دكتور احمد
=في المكتب بتاعه اخر الطرقه
_شكراً يا ابني
=العفو
.....
إتجهت إلي مكتبه ودلفت إلي الداخل وطلب منها احمد تجلس حتي يستطيع التحدث معها قليلاً

_دكتور احمد فيروز بنتي هتخرج إمتي؟
=هي دلوقتي بقت كويسه ومش محتاجه للمستشفي ،ممكن تكمل باقي علاجها في البيت ،انا هكتب لها علي خروج النهارده بإذن الله ،احم.. هو انا مش عارف من حقي أتكلم ولا لاء بس...
_بس إيه اتكلم يا دكتور متقلقنيش
=بنت حضرتك كانت عاوزة تنتحر وهي الي رمت نفسها مش العربيه الي خبطتها

وضعت السيده يدها علي صدرها واردفت : يا مصيبتي ،بنتي كانت عاوز تنتحر
_بس الحمد لله عدت علي خير ،يا ريت حضرتك تخلي بالك منها ومتسيبوهاش لوحدها كتير ،ولو ممكن تخليها مع دكتور نفسي يتابع حالتها
=شكرا يا دكتور علي إهتمامك ،وانا إن شاء الله هعمل كده
_تمام ،إتفضلي ده إمضاء علي خروجها
=شكرا مره تانيه
_العفو

لملم متعلقاته وكاد أن يخرج لتسبقه فتاه في منتصف العقد الثاني من عمرها بالدخول إلي الغرفه وتحدثت : دكتور احمد في بنت اتصلت علي حضرتك وكانت عوزاك فِ موضوع ضروري وشخصي
تسأل هو بإستغراب : مين دي؟! وإسمها إيه؟
_نوران
=قولتي مين؟
_نوران
=إمتي الكلام ده وإزاي متعرفنيش
_هي رنت امبارح ،وحضرتك مكنتش فاضي خالص خصوصاًإن كان فيه كذا حاله امبارح..
=خلاص خلاص هاتي الرقم الي رنت عليا منه
_مش معايا
=نعم!
_وانا هحتفظ بالرقم ليه يعني ،كل شويه ناس بترن علينا هنحفظ انهي
=إنتِ ضيعتي خيط مُهم جداً كان ممكن يفيدنا ،طب حتي مش فاكره الرقم كان بدأ برقم كام علي الاقل نعرف المحافظه الي رنت منها
_اه تقريباً ***
=تمام جدا شكرا يا..
_سعاد
=شكرا يا انسه سعاد
..............
_هاله بابا وماما فين؟
أردف احمد بلهفه وهو يجول بعينيه عنهم
=ماما في المطبخ وبابا في الأوضه
ردت هاله وهي تتثاقب ثم تسألت بفضول هو في إيه
_حاجه تخص نوران

خرج صابر ما إن سمع إسمها وتحدث بسرعه : إيه الي يخص نوران قولي يا ابني
_نوران إتصلت عليا بس انا كنت بعمل عمليه والي ردت عليها نسيت تقولي إنها رنت ولسه قيلالي من شويه
تحدثت هاله بسُخريه : ومين قالك إنها نوران دي
_انا معرفش غير نوران واحده بس ،بعدين هي قالت لسعاد الي ردت عليها أن الموضوع شخصي ومهم
أردف صابر بتعجل:سيبك منها يا ابني ورد عليا اخدت الرقم الي رنت عليك منه
=للأسف لاء بس سعاد كانت فاكره اول رقمين والرقمين دول بتوع محافظة الوادي الجديد ،احنا كده يا بابا كنا بندور في الطريق الغلط

تحدثت انعام بنبره متلعثمه وقد أتت لتعرف ما حدث : ونوران ..إيه الي هيوديها الوادي الجديد ،اكيد في حاجه غلط
_مش مهم يا ماما ايه الي وداها المهم نلاقيها
_صح يا ماما احمد عنده حق

تحدث صابر مره أُخري بحيره : بس هنلاقيها إزاي يا ابني دي محافظه بحالها وبعدين أنا معرفش أي حاجه هناك غير القصر بتاع عيلة التركمان ...بس لقيتها ده كده الموضوع بقي سهل اوي ،انا معايا رقم الست ناريمان صاحبة القصر انا هرن عليهم علشان يجو ياخدو صورة نوران ويدور عليها ده هي فِ نفس المحافظه الي هما عايشين فيها

اكمل احمد : طب الحمد لله ،وانا هنبه علي اي حد بيقعد عند الإستقبال إن لو حد أتصل عليا يعرفوني فوراً .

مسحت انعام جبينها بيد مرتعشه وقد شعرت ببعض قطرات العرق الساقطه عليها وجلست علي أقرب كرسي وهي تتنفس بإضراب محدثةً نفسها بأن الحقيقه اقتربت واقترب معها كشف خُدعتها

تحدث احمد وهو يربت علي يدها : ماما إنتِ كويسه
اومئت رأسها غير قادره علي الحديث
..............
بقلمي ضحي حامد