غياهب الجهلِ والظلمِ

بارت السادس -وثلاثون

رواية ...غياهب الجهل والظلم ..
...بقلمي ...نورس قاسم ...

--------------------------

ميرا : - عمتي گالت الادم ... لعد انته الي تتزوج سيماف اني اريد اشوف اطفالك قبل لا اموت ...

ميرا ... الي عجبني وصدمني سكوت ادم ليش سكت ليش متعارك نفس گول مره معقوله موافق ...؟

نزلت ارگض من الدرج للصاله باوعتلها وحجيت بصياح ...انتي ليش متخافين ربج ليش تردين تخربين بيتي حرام عليج ..

گالت بنفس نبرت صياحي ... والله اني گلت ابني كبر واريد اشوف اطفاله محجيت شي غلط و حرام...

حجيت بغصه وقهر مكتوم بگلبي ..ترا الرزق من الله لا مني ولا منج تقبليها على بنتج عمتها تخرب بيتها وتزوج رجلها ...

گالت وهي تحط ايد على ايد ... والله اذا بنتي ميصير عندها وبعد متخلف هذا حقه وخلي يتزوج ...

سكتت درت وجهي عليه وگلتله بدموع ... ادم ردها انته ليش ساكت شنو موافق ع الزواج ...؟

گام واجه عليه حضني وگال ... تعالي نصعد لغرفتنه ...

نزلت دموعي وحجيت بأسى ...گولي انته موافق ...

جرني من ايدي وصعدني الدرج و هو ساكت وصلنه للغرفه فتح الباب دخلنه گعدني ع السرير گعد يمي وگال ...

...لتهتمين للكلام حبيبي اني مستحيل ابدلج بأي وحده لتخافين ما اتزوجها ...

ميرا ...رگزت بعيونه گلامه مو نفس گول مره ومبين عليه مشوش ومحتار وهذا الي اذاني ...

...سكت گدامها ومگاللها اي شي عگس گول مره يتعارك و ميقبل .. سكتت ضل شويه يمي و نزل ...

نزلت وراه باوعت واگف بالمطبخ وعمتي يمه واگفه وترتب اكل بماعين سفري ...

باوعت عقجت حاجبي المن هالاكل حطتهن بعلاگه شالتهن انطتهن الادم وگالتله ...

... اخذهن للمستشفى يمه اگيد سيماف لسه مماكله شي خطيه اخذهن الها ...

هو اخذهن منها وطلع دا يروح لحگته لزمته من ايده وحجيت ...

ادم وين رايح ..

گال ...دا انروح للمستشفى اني وامين ليش ..

حجيت.. لتروح ادم خلي بس امين يروح

گال .. بطلي هالكلام ميرا الرجال مريض وما اله احد ولازم انقوم بواجبنه اتجاهه

حجيت ... زين خلي اروح وياكم ..

گال بنفي ... لاااا مترحين واني ما اتأخر شويه واجي ...

حجيت ..ادم اذا رحت وما اخذتني وياگ والله اروح الاهلي وما اضل يمك ...

گال بعصبيه ... اطلعي باب البيت وشوفي اذا ما اگسر رجليج واذا عبالج ما اسويها فجربي و شوفي ...

حجاها وطلع خلاني افور بمكاني دخلت للمطبخ بعصبيه باوعت لعمتي ...

السعدانه محترتاح اله تزوجهم ...صعدت بعدني ع الدرج گالت ...

... ها شو صاعده تعالي اشتغلي واصعدي ...

حجيت واني اصعد ع الدرج ... عندج بنتج وجناينج يشتغللج اني مخادمه الاحد ...

خليت وصعدت لو هي تخبلت گامت تعد وتصف وتسوي ...

مو صوجج صوج ابني الحوگ الي كبر راسج بس انتظري الى ما ازوجه تاج راسج شوفي ...

تركتها مرديت فتحت باب الغرفه دخلت ورگعتها حيل ورايه گعدت يم السرير جريت نفس بقهر ...

وتالي ويه عمتي وصماخ شلون اني اضل عايشه بهالرعب والقهر .. ولا اگدر هسه اطلع واروح الاهلي اخاف تلكاها فرصه وتقربه من صماخ ...

...اووووف ربي دخيلك ابعد شرهن عني...

---------------------

شذر : - بالي ابد ممرتاح ومشدوها وخايفه حيل ما اعرف اذا السالفه انحلت او لا ..

صفاء اتصل عليه. يرفضني واذا ضليت اتصل عليه يدزلي رساله ..

..ورح المالگي وداعت العبادي اذا اتصلتي بعد اجي اسحلج من شعرج بنص الشارع ...

شذر .. اعرفه مجنون ويسويها فأسكت احسن شي ...

واكفه و دا اساعد ماما بالمطبخ ... انفتح الباب باوعت دخلت اسيل اجت للمطبخ باوعتلي ابتسمت ...

گلتلها ... ها خبله اشو تبتسمين اليوم ...

گالت بأبتسامه ... فراس تقدملي وبابا وافق ...

ابتسمت .. صدوگ .. من يمتى هالكلام ..

گالت ... قبل يومين مكلم بابا والبارحه اجه لبابا وگاله اريد يتم العقد بهالايام ...

حجيت بفرح ...ايي وبابا شنو گال ..

ابتسمت وگالت ... بابا وافق والفضل يرجع الج...

عقجت حاجبي ... شنو الفضل يرجع الي اني شنو سويت ...

گالت ... اكيد لو ما انتي موجوده مكان بابا وافق ينطيني لان ع گولته اسيل ونيستنه وما انطيها هسه بس لان انتي هنا واكيد صفاء حيطلگج فحتعوضين مكاني ...

عقجت حاجبي ... فال الله ولا فالج بيش طالبتني ولج ويطلگني ...

گالت ... لا اني مطالبتج بشي بس صفاء من كلمته حلف بروح عاليه نصيف انو يطلگج اني شعليه غير هو.گال ...

حجيت بعصبيه ... يولي واني همين وروح لعبادي لو يموت ما ارجع اله ع الگتله الگلتها منه ...

هزت ايدها وگالت ... اني لو بمكانه جان اول مگتيلي رميت الطلاگ عليج .. اله اسمعي حبابه خاف يغير رئيه ويجي عليج لترجعين.

حجيت .. ليش عود..

گالت ... انتي مو حلفتي بروح العبادي مترجعين بعد شنو ليش ...

جريت نفس بقوه وزفرته ...

..........................

صار الليل وادم ما اجه ضليت گاعده بغرفتي والقهر ياگول بگلبي العصر عمتي همين راحت للمستشفى ....

...اووف ربي شنو اسوي هسه ... گمت دورت موبايله الثاني لگيته بالخانته الي بالكنتور فتحته طلعت رقمه واتصلت عليه ...

دگ شويه وفتح خط گال ..

الو ...

حاولت الزم اعصابي وگلتله ... ادم شوكت حتجي ...

جر نفس وگال .. الرجال حالته حرجه وما اگدر اتركه ...

حجيت بغصه ... گول الامين خلي يجيك يبات يمه وانته تعال ...

گال بنفاذ صبر .. امين عنده شغل ومفارغ يجيني ...

گلتله ... ادم لو هسه تجي لو تخابر امين يجي ياخذني يمكم ترا بعد ما اتحمل اكثر ...

گال بصياح ... انيي وييين وانتييب وين الخاطر الله ...

گلتله بدموع ... بگيفك لعد حا أروح. لبيت اهلي ...

گال بعصبيه وصياح ... تطلعي باب البيت وشوفي شنو اسوي بيج ...

گلتله ..والله اطلع واروح وفلا ارجعلك بعد وخلي سيماف وامك يفيدنك ....

سد الخط بوجهي ...گولش انقهرت گمت لبست عباتي وطلعت من الغرفه نزلت الدرج لاخر بايه تلگاني اركان گال ...

...وين رايحه ...؟

حجيت ... دا اروح الاهلي ...

گال .. ارجعي ميرا لغرفتج ادم اتصل بيه وگال ما اخليج اتطلعين ...

حجيت بعصبيه .. اركان مدخلك بيه واتركني اروح ...

هز راسه وگال ... ميرا ارجعي لغرفتج ومن يجي ادم تفاهمي انتي وياه وروحي الاهلج بس هسه مستحيل اخليج ترحين ...

ميرا ... رجعت الغرفتي والدمعه بعيني ضليت اروح وارجع بالغرفه والتفكير بيهم موتني حاولت اهدئ نفسي وما اهتم بس مو بيدي النار شاعلتني ودا تاكل بيه ع البطيئ ...

گعدت بزاوية الغرفه وگمت ابجي بصوت مخنوكه گولش واحس النفس ضاق بيه ...

لل 3 الفجر واني الوج وراسي حينفجر من الوجع متحملت اخذت الموبايل واتصلت عليه دگ فتح خط ...

حجيت بترجي ودموع... ادم مروتك تعال بعد ما اتحمل وحنفجر والله ...

جر نفس وگال ... ما اگدر والله اول ميطلع الصبح اجيج بس هسه ما اگدر ...

... ميرا سديت الخط بوجهه وگعدت ابجي حطيت راسي ع المخده ترجيت النوم يجيني بس مگدرت اغفي ...

ضليت گاعده و الدمعه بعيني حتى طلع ضوه الصباح سحبت الموبايل باوعت للساعه ب6 وربع ...

شلت راسي دا اگوم دخت حيل وحسيت انفجار صار براسي ... ارجعت انطرحت شويه وهم حاولت اگوم ونفس الالم ...

بالگوه نهضت نفسي وگمت امشي دايخه وجسمي ممستقيم يرجف بشكل مو طبيعي ...

وصلت الباب الغرفه فتحتها صار مقابيلي فراس دا يطلع من غرفته دا احجي وياه بس حسيت بضربه قويه براسي ...

مشفت شي بعد غير الغواش والسواد الحاوطني حاولت اتمسك بيدت الباب بس فلتت ايدي وحسيت بأصطدام جسمي بالارض ..

-----------------------

مريم ... گعدت من النوم اريد اروح للحمام عاينت لاركان نايم جريت نفس بحزن ...

گمت ورحت للحمام گملت طلعت جاي اغسل بالمغسله سمعت صوت يحجي بس كلام ممفهوم ...طلعت عاينت لانها ميرا واگعه وفراس يمها يحاول يصحيها ...

شهكت ورحت عليها حجيت بخوف ... فراس شبيها ميرا ليش هيج واكعه ...

گال ... يمكن صعد عندها السكر بس حاولي تگعديها خلي اخذها للمستشفى ..

هزيت راسي ورحت ارگض جبت عطر وانطيته اله رش على ايده وشممها ... انت بوجع فتحت عيونها عاينتلنه بتعب شفافها يابسه وعيونها حمر ...

گال فراس ... مريم جيبي عباتها ..

رحت طلعت العبايه من الكنتور رحت عليها گومتها وهي تأن ولازمه راسها لبيتها العباه عاينلها فراس وگال ...

... يلا امشي اخذج للمستشفى ..

انا حجيت ... انتظروني اجيب ابدل ملابسي واجي وياكم ...

گال .. لا مريومه ماكو داعي راح اخذها للمستشفى الموجودين ادم وامي بيها ...

هزيت راسي هو اخذها و نزل نزلت وراهم همه طلعو وانا عاينتلهم من شباگ الصاله ...

جريت نفس حزين ... اگيد الجاي يصير بيها من ورا عمتي حقها موهينه تريد تزوج رجلها عليها ...

جريت نفس وزفرته بقوه ... الله يحنن گلب عمتي عليها خطيه ميرا زغيره وما عدها أذيه على احد ...

--------------------

:- اخذني فراس ع المستشفى اخذوني للطوارئ قاسو الي السكر لگوه صاعد گولش ضربوني ابره وحطولي مغذي ...

باوعت فراس واگف قريب مني ويخابر واني نايمه ع السرير المستشفى ...

غمضت عيوني بألم واني اتذكر الليله المرت عليه بقهر وحزن وعبالك ليلة وفاتي ....

فتحت عيوني ع صوته وهو يگول ... ميراا حبيبتي ...

باوعتله بقهر ورجعت غمضت عيوني نزلت دمعه من عيني مسحها وگال بهمس ...

...اسف حبيبتي مو قصدي ااذيج والله ...

سكتت ضليت بين ما خلص المغذي ورجعنه للبيت عمتي وفراس ضلو يم سيماف لان العصر. حيطلعون خالها حالته تحسنت ...

اول مدخلت لبيت دخلت لغرفتي وقفلت الباب مخليته يدخل للغرفه ضل يدگ بالباب ويعتذر ويحاول يبرر موقفه بس للأسف اكو شي انگسر بداخلي ومبرره واعتذاره محيجبر كسري وألم گلبي ....

مر اليوم گبقية الايام انطويت على نفسي وسكنت غرفتي انزل اكمل شغلي وارجع للغرفه اگلي گولش قل وادم حاول بأي طريقه يراضيني بس اني مو نفس قبل وياه لسه مجروحه من تصرفه ويايه ...

بيوم گعدت الصبح وكعادتي غسلت و بدلت لبست تراگ ضفرت شعري ونزلت جوه ادم اليوم عنده عطله ...

دخلت المطبخ شفته گاعد يتريگ وتمارا واكفه يم الطباخ تصب حليب الها عمتي مموجوده اگيد يم سيماف گعادتها ...

هو شافني ابتسم وگال ... صباح الخير حبيبتي ...

...نزلت عيوني للارض وتوجهت للكاونتر حجيت من دون ما اباوع اله ... صباح النور ...

طلعت گلاص وصبيت حليب الي اخذته ودا اطلع من المطبخ گال ....

تعالي تگعدي وتريگي ويايه ...

..حجيت واني امشي ... مجوعانه .. صعدت لغرفتي طلعت مجله خاصه بالموضه وگعدت اباوع ع تصاميم الملابس ...

شربت حليبي وضليت گاعده فتره وبعدين گمت نزلت رحت للمطبخ لگيته مكمل ريوگ اخذت الماعين وغسلتهن هو جاب گرسي حطه بالطارمه وگعد يعدل بشعره ...

اني كملت الماعين دا اصعد شفت عمتي دخلت ضليت واكفه بمكاني هي اجت وگفت باوعتي ورجعت باوعت الادم وگالت ...

خطبتلگ سيماف وهي موافقه ...

ضليت صافنه ثواني واني اريد استوعب گلامها باوعت لادم شفته صافن عليها مثلي ...

من دون گلام جريتها ركضه لغرفتي فتحت الباب ودخلت رحت للكنتور جريت جنطه كبيره وگمت اطلع بملابسي واحط بيها ...

اجه هو جرها مني وگال ... شنو دسوين ميرا ...

حجيت ... امك مو تزيد تزوجك خلص خليها تزوجك واني تاركتلك البيت وورقة طلاگي توصلني ماشي ...

احجي بعصبيه وبالگوه گاتمه خنگتي وعبرتي عيوني احس بيهن نار مو دموع ...

جرني عليه وگال بترجي ... حبيبتي انتي خلينه نگعد ونتفاهم بهدوء ...

باوعتله نزلت دموعي وحجيت بغصه ... عرفتك موافق ع الزواج لأن سكوت علامة الرضا ...على شنو نگعد ونتفاهم من سابع المستحيلات اقبل وحده تشاركني بيك يا متتزوج يا تطلگني وبعدين اني شنو ناقصني وتتزوج عليه اذا ع الخلفه فهذا امر الله مو امري وياما ناس ضلو سنين بلا اطفال وبالنهايه الله رزقهم لان صبرو مو مثلك انته وامك الي ممر على زواجنه غير سنتين وگامت تخطبلك وانته من اول وگعه الي اتخليت عني ووافقت تتزوج ...

مسحت دموعي بألم ورجعت اطلع بالملابس واحطهن بالجنطه گال ..

... حبيبي افهميني الله يخليج هي يتيمه وما الها احد بيتهم اجار وين تروح. واني ابقى احبج الج واگوللها هالكلام انو اني احب ميرا ومراح اعدل بينجن ....

ميرا ... من سمعت گلامه اخر ذره بعقلي فقدتها گلت بصياح ... يتيمه وبيتهم اجار ليش انته دار ايتام علمود تتزوجها وتكفلها انته تحجي صدوگ عذر اقبح من الفعل ...

مستحيل ابقى يمك وتطگلني افضل الك متطلگ عمامي موجودين وهمه يتصرفون وياك ...

سديت الجنطه لبست عباتي ودا اطلع رگض وراي جرني من ايدي شمرني عالسرير ...

طلع وقفل الباب عليه رگضت وگفت يم.الباب وگمت اضرب بيها بگول قوتي وابجي واصيح ...

افتحولي الباب لا اكسرها وربي افتحوها الله لينطيكم الله يحرگ گلوبگم مثل محرگتو گلبي ...

ابجي وابجي وادگ بالباب وماكو محد يفتحها گعدت يم الباب وگمت ابجي بگلب محروگ ...

بهذيج الحضه تمنيت روحي تطلع ولا اسمع موافقته ع الزواج ...

حسيت بوغزات براسي وراسي بلش يخدر عيوني گامن يسبلن والدوخه لزمتني انيت بوجع ...

انفتح الباب دخل هو. واني احس جسمي خدر وما عاد اگدر اجر حتى النفس ...

گعد گبالي لزم ايدي وگال ... حبيبتي لتسوين هيج بنفسج تبقين انتي ميورتي حبيبتي ...

نتلت ايده من ايدي دفعته عني وگمت فتحت الباب وطلعت ارگض نزلت لگيت عمتي تدردم عليه ...

...واذا تزوج شنو ارل وحده اخر وحده موتي نفسج قابل مره تاكل مره ...

ما رديت عليها طلعت ارگض واسمعه يرگض وراي و يصيح يريدني اوگف ...

وصلت لبيتهم فتحت الباب من دون ما ادگها شفته دا تدخل للمطبخ رگضت عليها وجريتها من شعرها ...

هي گامت تصيح واني اصيح ... بواكة الزلم الحقيره تردين تاخذين رجلي مني اني الج اله اگسر راسج ...

وگف ادم بالباب ميگدر يدخل لانها ملابسه حجاب وگام يصيح عليه واني لازمته واجر بيها من شعرها ...

طلع خاله حاول يهديني بس وين نار وشابه بگلبي اجت السعدانه عمتي وجرتني عنها حيل وگامت تصيح ...

... ولج انتي غير وگحه ومتستحين امشي لا بارگ الله بيج مابيج خير بس الوگاحه ...

سيماف گامت تبجي گالت بدموع ...

...اني شنو ذنبي ام اميغ هي الخطبتني و موافقت بس هي گالت ميرا موافقه يلا اني وافقت ...

عمتي گالتلها ... وغصبن عليها تتزوجين ابني معاجبها تولي لاهلها هم متخلف وهم عينها صلفه ...

ميرا ... اني حسيت بركان نار وانفجر بداخلي ادم گام يصيح عليها واني درت وجهي ورجعت واني افور واغلي ...

..امشي طاير وعباتي طايره ورايه وگل شويه عاثره بيها وزين مأوگع ...

دا اروح لأهلي بس حسيت بجرت ادم وهو يجرني على بيتهم ردت افلت قبضة ايدي منه مگدرت لانه اضخم واقوى مني ...

دخلني للبيت واني اصيح واگوله ... اتركني اروح الاهلي مستحيل ابقى يمك دقيقه بعد.

گال ... انجبي وگافي اصعدي لغرفتج بسرعه ...

حجيت بعصبيه ... فوگ شينه گوت عينه تريد تتزوج عليه وتريدني ابقى ببيتك والله لو تموت ما ابقى واروح الاهلي وبابا وعمامي الي يتصرفون وياك...

اتعصب من كلامي هستوه دايجيني وقفه صوت امين وهو يگول ...

...خير خير شنو صاير ليش هيج اصواتكم واصله لراس الشارع ...

حجيت بدموع ... امين وديني الاهلي الله يخليك حموت اذا ابقى والله...

گال وهو يتقرب مني ... اهدي ميوره وتعوذي من الشيطان متـ ....

قطع گلامه الباب وهو يندفر باوعت اسيل رگعت باب الگراج بگول قوتها وگالتله بعياط ....

...شلون تريدها تتعوذ من الشيطان واصل الشيطان واگف يمها هااا ..

ادم گال ... لا هله ولا مرحبا اجت خرابت البيوت ولج من جابتج امج ورحت شفتج گلبي نغزني منج ومن يومها ما شفت راحه ...

گالت وهي تهز بيدها ... ترا الشيطان بعمره محيرتاح وان شاءالله مترتاح عمرك گوله تريد تتزوج على اختي مووو ...

شفتنه ساكتين عبالك ما وراها ظهر موو لا والله ماحزرت العب بيكم لعب بس اصبرولي ...

ميرا ... اجت. تمشي بإتجاهي امين عقج حاجبه وگال الادم ... عن اي زواج دا تحجي يا ادم ...

ادم جر نفس وزفره بقوه فرگ وجهه بإديه

حجت اسيل ... عن زواجه بسيماف واني لو ماكنت راجعه من صديقتي وشفت اختي هدت على سيماف وسمعت كلامها كان محد يدري بالموضوع الان حضرت الاستاذ گان ناوي يحبسها وميخليها تطلع من البيت ..

امين باوع الادم بعصبيه .... انته تخبلت تريد تكسرها وتتزوج عليها على اي اساس ومن شوكت قررت تتزوج اني مو الادري بيه انته محارب ويه امي بسبب هالموضوع ...

حجت عمتي وهي تدخل .. صفگت بإديها وگالت ... الله اكبر عليكم رجال مرته متخلف والعمر مشه بيه وراد يتزوج شنو اجرررم خوووو ما اجرم ...

اسيل تخصرت وردتها ... يعني اعترفتي ابنج كبير على اختي وبعدين يريد يتزوج خلي يتزوج منو لازمه اختي الف واحد يتمناها اشو صغيره وحلوه بس بالاول يطلگ ويروح يتزوج الله ومحمد وعلي وياه اشمر گوم حجار وراه علمود ميرجع يتوسل بأختي تتزوجه مثل الاول...

عمتي گالتلها ... يمه يمه الوگاحه والسان العليج ما على بشر ..

امين گال الادم .. ادم صدوگ وافقت تتزوج لو لاگول ...

ادم جر نفس وگال ... اتركوني من هالموضوع وخلوني افكر براحتي ...

هو گال هيج لو سگين ونغزها بگلبي باوعت الاسيل وحجيت ... امشي اسيل خلي نروح الاهلي وبويه الي يتصرف ...

هو گال ... متطلعين باب البيت اكسر رجلج والله...

اسيل دا تعيط بيه بس امين سبقها وگال ...لا اني الي اوديها الاهلها واشوفگ شتسوي شنو ولك انته تخبلت تريد تكسر بنت عمي لا والله فلا اسكتلك ...

طلع امين..وكال ..يلا امشن اوديجن ...

ادم سگت ما گال شي .. طلعنه الطريق گوله دموعي منشفت والقهر اكل گلبي أكل وصلنه للبيت امين وصلنه وراح مقبل يدخل ..

دخلت لامطبخ ماما وشذر واكفات من شافني تفاجئن اجت شذر وگالت ...

...ميوره شبيج حبيبتي ليش هيج وجهج احمر وعيونج حمر ...؟

حجت اسيل ... ابو بريص يريد يتزوج وهي تبجي عليه والله لو بمكانه جان ترست بغداد هلال لان حطلگ منه واخلص من تسلطه. بس هي عوبه گولشي متعرف ....

شذر شهكت وگالت ... شنو ادم يريد يتزوج ...

اني گعدت عالكرسي اجت ماما گالت .. شنوووو يريد يتزوج منطيته تاج راسه ويريد يتزوج لالا هذا صدوگ زودها والله فلا اسگتلهم اليوم ...

ماما جرت العبايه لبستها وطلعت لحگتها شذر وهي تسألها ... ماما لوين حترحين ...

گالتلها وهي تمشي ... اروح لعمامج خلي يشوفون صرفه ويه العار ع گولت اسيل ...

ماما طلعت اجت شذر گعدت يمي تريد تهديني اسيل گعدت حطت رجل ع رجل وگالت بضحكه ...

... شذر خلي اضحكج من رجعت من صديقتي فتت بطريق بيت عمي وجان اشوفلك وحده تركض وعبايتها تركض وراها ...

..الصراحه تفاجئت يعني معقوله باتمان اجه للعراق بعدين گلت لا شيجيبه قابل شنو مشتاق للعبادي واجه يشوفه ...

رگزت زين اشو تشبه ميرا اختي عاد رجليه اخذني الها هنه مو اخذني لان تشبه ميرا اختي لا اخذني لان اشتمن ريحت عركه ..

وصلت وجان اشوفلك ميرا واكفه ولازمه سيماف من شعفتها وتكولها ... بواكة الزلم ترديين تبوكييين رجلييييي ...

اني هزيت ايدي ... وعاد هو شلون رجل اني لو بمكانها اغم روحي على هيج رجل ...

سيماف طويله واختج قصيره فسيماف مدنكه ومطيه شعفتها لميرا علمود تگدر تلزمها زين ...

اله شنو من موقف اختي تبجي ومفرفخه دموع واني مفرفحه ضحك ...

ميرا ... حجيت بعصبيه ... لانج عار مفرفحه ضحك يعار ..

گالت بعصبيه ... عاذرتج هسه ادري بيج مقهوره على ابو بريص و اله جان گمت وخوش گتلتج گتله ...

..اني سكتت خفت منه الصراحه من تعصب تخوف ...شذر گامت ترزل بيها وتحجي عليها ...

-------------------

شذر: - اجت ماما تمشي وتحجي بعصبيه گلتلها ... ها ماما شنو سويتي ...

راحت نزعت عبايتها واجت گعدت يم ميرا اخذتها لحضنها وگالت الها ...

... لتنقهرين بنتي رحت گلت لعمامج عليه وتخبلو گالو نتبرى منه اذا اتزوج على بنتنه ...

وبس يجي ابوج هو الي يتصرف وياهم. لتقهرين نفسج ميسوه دمعه منج بنتي انتي ...

ميرا گامت تبجي بصوت عالي حضنتها ماما وگامت تهدي بيها ... بقينه للعصر على فد گعده ونواسي بيها بس هيه وين دموعها موگفن لحضه ...

للعصر اندگت الباب گمت اريد افتحها وگفت وراها وگلت مننو

اجاني صوته وهو يگول ... اني افتحي ...

ابتسمت يربي شكد مشتاقه اله والصوته فتحت الباب واني مبتسمه دخل هو باوعلي وبعد نضره بسرعه گال ...

... خالي موجود..

...حجيت بليل يجي تعال ادخل ...

گال وهو يدخل .. خير شنو صاير شفت خوالي رايحين لبيت خالي علاء صاير شي ...

حجيت بحزن ... ادم حيتزوج على ميرا و اكيد راحو يحجون وياه لان مقبلو على تصرفه ...

عقج حاجبه وگال ... معقوله مدا اصدگ انو ادم يتزوج على ميرا. هو بالموت يلا حصلها ...

ماما گالتله بعصبيه ... كثرة الدگ ع الحديد يفل يا ابني وزن امه. جاب نتيجه وياه يردن يحرگن گلب بنيتي لا والله فلا عاش الي يحرگ گلب بناتي العب بيهم الفلق ...

گال وهو يگعد ويحك براسه ... جا اني جاي اخذج تخطبيلي حنان الفتلاوي على عاليه نصيف على كلامج راح تنكلب الايه وتلعبين بيه فلق تطلعين حنان الفتلاوي من خشمي ...

ماما ابتسمت وگالتله ... ترا بناتي حبابات وحلوات حيل وهنه ما يخسرن لا ينخسرن و الف واحد يتمناهن ...

جر نفس وگال ... خوش بسمار خاله ...

اني ضحكت هو باوعلي خزرني ودار وجهه ...

يااا هذا شبيه عابت. رحت سويت جاي اجيت و گعدت يم ماما گال ...

... اني اجيت ارجع ميرا بس خاله گدامج راح اگولها شي ولازم تنفذه ...

ماما گالتله ... وهوه گول ..

جر نفس وگال ... ما اريد عدها لا فيس بوك و لا ماسنجر و لا اي برنامج تواصل ثاني. بالموبايل هذني ممنوعات منا ورايح ...

ماما جرت نفس وگالتله ... لا ابني ميصير هي غلطت وتعاقبت على غلطها بس مو هيج تحاسبها هم احنه نريد نحجي وياها ....

گال ... صح غلطت وغلطت الشاطر بألف متدرين شصار بينه اني وامين على ما لزمنا متنه ونهد حيلنه مو من شي بس من التفكير خاف ينشر صورها ساعتها اجرم بيها من صدوگ ...

واذا تردون تحاجوها عدها موبايل وبيه خط واتصلو ببعض وسولفو بس اني هايه البرامج ما اريدها بعد ولا اريد اي تواصل مع زملائها الشباب فقط البنات صديقاتها وتحجي وياهن مخابره بس ...

ماما هزت راسها وگالتله ... هاهيه ابني مثل متريد ...

باوعتلي وگالت ... وانتي ماما انسي سالفة التعيين ولتعيدين الصار بعد ولتثقين بأي الكان هايه المره الله ستر وعداها مره ثانيه منعرف شنو يصير وانتي الحمدلله يا امي زوجج ممقصر عليج بشي

هزيت راسي وسكتت نزلت اسيل باوعت لصفاء وگالت ...

... ها صفاوي اليوم هنا ...

..ابتسم وگال الها اجيت ارجع عاليه نصيف ...

...هي ضحكت وگالت ... انته مو حلفت بروح المالكي. العبادي حتطلكها وين اشو مطلكت ...

ضحك حك گصته وگال ... من يوم يومي احلف بيهم گذب تريدهم يموتون ماكو بالعكس گول مجالهم يعمرون بهالدنيا ...

منا ورايح احلف بروح ابويه كذب بلكي هم يعمر بالدنيا ويبني قصور مثل قصور المالكي والعبادي ...

اسيل ضحكت وگالتله ... لالا احلف بروحي گذب بلكي لاني متعينه رئيسة وزراء مثلهم اااااخ اله الزمهم واجرم بيهم شلون ما العار يجرم بالمجرمين ...

ابتسم هو يكوم گال الها ... الله ليوكع بشر بإيدج والله حتى حبيبي المالكي ما اتمناه يوكع بيدج...

شذر... ضحكت على سوالفهم هو ترخص وطلع كال بليل من يجي خالي اجي وارجعج ...

اني صعدت الغرفتي و الابتسامه ماليه وجهي دخلت للغرفه وسديت الباب وگفت گبال المرايه اباوع الشكلي ابتسمت جان وجهي اصفر هسه بشوفته فتح وصار وردي ..

ندكت باب غرفتي رحت واني مبتسمه فتحتها اول مشفتها شهكت واختفت ابتسامتي ...

ميرا مرتجيه ع الباب ووجهه مليان دم ...💔

---------------------
قراءه ممتعه حبيباتي 🍀

لتنسون التصويت والمتابعه ...

ارائكم تهمني وتوقعاتكم للبارت القادم ...♥🍀

احبكم ...♥

دمتم بخير احبتي ...♥