عرفتو م رديت عليهو طوالي مع اني مبسوطة بالغزل دا🙈 قمت مشيت المطبخ ولفيت في البيت براي كدا وتاني رديت ليهو"اهلين..منو!؟" طوالي رد لي كأنو منتظرني..انا جميل ولد خال رويدة قعدت مسافة حتى رديت ليهو "ايوا تمام"
وذكرني رويدة زاتو مشيت سلمت رسلت ليها لقيتها اونلاين قلت ليها عرستي نسيتنا🙄 قالت لي متوقعة شنو يعني.. "وقحة بشكل😂😂"اتونست معاها رسلت لي صور ليهم من زنجبار شهر العسل البت دي خشمها بقى عريض من الضحك والابتسامة بالجد م صدقت😭 م حكيت ليها بي ود اهلهاا دا طلعت من دردشتها لقيتو مرسل لي بحكي عن روحو ك تعريف وكلامو رايق روقة غايتو سمعت الريكورد مرتين🙈"اختكم جديدة في الحب هههه😆 حب من أول نظرة"
المهم بقيت بدردش معاهو وبسالني بجاوب بس انا لكن مستمعةةة انا ك بت الكلام اللطيف والاهتمام من الجنس التاني بفرحني يعني طبيعي
يومي بقيت بتكلم مع جميل.. حسام دا شغال ما واحد صحبو م بشوفو وعمتي م بتتكلم معاي يعني جميل ال كان مالي يومي.
يوم قلت لي عمي انتي ي أبوي ليه م حصلل وديتني لي ناس خالتي وخالتي القالت عايزة تسوقيني ديك مالها م بتجيني عمي سكت ساي قال لي امممم انتي نتيجتكم متين قلت ليهو عموو انا بتكلم في موضوع غير قال لي النتيجة مالا عرفتو بغير الموضوع قلت ليهو النتيجة قالو بعد شهر قال لي بالتوفيق ي رب ناوية تقدمي شنو قلت ليهو مختبراتت وإن شاء الله لو م جبت للدرجة ح اعيد م دايرة اقرا بقروش انا قال ليه ي بتي انا وضعي ميسور والله حمد لله بقريك م ضروري تعيدي قلت ليهو انت من انا صغيرة بتدفع لي وطلباتي اوامر هسي خلاص كفاية والله م قصرت معاي ي عمو لو خليتني إشتغل زاتو م قصرت عمي دا تقول في زول اداهو كف هاج ليك فيني كيف تقولي دايرة تشتغلي مالي مقصر معاك في شنو انا عشان تقولي كدا؟؟حصل قلت ليك مصاريفك زدات علي م بقدر ادفع حصل شكيت ليك؟ويكورك دي أول مرة عمي يكورك فيني كداا جريت من قدامو جري ابكي واشهق عمي م فهمني انا دايرة اشتغل عشان اعتمد علي روحي انا عايزة احس أني كبيرة وبقدر اعتمد علي روحي لو لا قدر الله وحصل شي واضطريت اطلع من بيت ناس عمي اقدر اعتمد علي نفسي وم اشحد دوا الظروف م معروفة بس عمي م فهمني..
رجعت غرفتي بكيت بكيت جميل كان برسل لي كلام م برد عليهو بقرا بس قال لي انتي زعلانة؟ولا مالك قلت ليهو اي طوالي ضرب لي م رديت أول مرة رسل لي "ردي علي الاتصال" وضرب طوالي قبل ارد رديت عليهو قال لي ها ها في زول اسمو دعاء بزعل؟في؟ومش اسمو دعاء ساي أحلى زول في السودان بزعل؟علي فكرة الزعل م شبهك ي دودو وأحكي لي معاك كأنو م صدقت قال لي احكي طوالي حكيت ليهو احكي وأبكي احكي وأبكي بعد خلصت قال لي عمك غلطان م سمع منك كويس بس ي ستي ولا تشيلي هم بكرة اعرسك واخليك تشتغلي ولااقول ليك م في شغل م برضى مرتي ان شاء الله تكون شغالة انتي تشتغلي طلبات تطلبي بس انا اجيبو ليك لحد عنك..🤍 الكلام دا خلاني ك زولة فاقدة حنان اتبسم لي أضاني والدموع دي عشرة عشرة واتبسم🙈
جميل اتكلم معاي كتير وفرق علي وغنا لي في الاخير هو جميل وصوتو جميل برضو والله احييي منو..
من البكا الكتير نمت بدون م اشعر صحيت مع العصر مشيت صليت ورجعت سريري تانيي عمي جاني دق لي قلت ليهو اتفضل جا قعد جمبي م كنت بعاين ليهو قال لي
المزيونة...حقك علي ي بتي والله قبيل انفعلت فيك ... لكن ي بتي كلامك زعلني زي البتقولي لي انتي م قادر علي..ي بتي ابوك دا أغلى زول عندي وصاني عليك شديد قبل م يموت الله يرحمو انا لو زول هبشك ساي م بسامح روحي كيف تقولي لي اشتغل وانتي لسه م وعيتي وفي سنة صغيرة زي دي..بكرة تقري جامعة تتخرجي تتشغلي لكن هسي اضمن ليك شغل من وين ي بتي وانتي م بتعرفي نفوس الناس وم حصل اعترفتي عن ناس كتار عشان تفهمي طبعهم انا م بقدر اكون مطمن عليك حتى لو شغل بالتلفون ساي م بقدر والله..قبيل سألتني من حالتك حقيقة ي بتي انا من شلتك من خالتك رحلت من بيتنا داك واشرريت دا ي بتي خالتك م كان م تخليك م كان ح تفكك لي كان ح تجي ووراي عشان ترجعك وانا والله م بقدر أديك ليها انتي الغالية بت الغالي الوصاني عليك عشان كدا رحلنا هنا وكلمنا اهل امك
قلت ليهو عمي انت غلطان مرتين مرة عشان فهمتني غلط ي عمو انا ضامنك طول العمر لمتين ح أقعد تحت رعايتك يعني؟انا بس كنت دايرة اعتمد علي نفسي عشان زي م يوم فقدت امي وأبوي بدون سابق انذار احتمال افقد الملجأ دا برضو بدون سابق انذار م معروف القدر يودينا وين..تاني شي ي عمي غلطت شديد عشان دستيني من اهلي ديل اهلي يعني رحمي برضو يعني م صح اقطع علاقتي بيهم عشان ابوي وصاك علي هسي لو امي وصلت خالتي علي وخالتي دستني منك بترضي؟اكيد لا صح زي م انت عمي وأبوي واي شي هي خالتي هسي شوف وصلت لي وين وخالتي م بتعرف عني شي ولا شكلي زاتو حرام والله لكن م مشكلة مقدرة خوفك والله عمي قال لي الانجاز العملتو اني ربيتك ولقيتك واعية حمد لله انا كدا مطمن عليك شديد لو براك لو معاك زول🤍 وحق خالتك علي بكرة دي اوديك ليهم تقعدي معاهم ونعتذر ليهم اتفقنا؟ لكن الشغل دا م معانا قلت ليهو م مشكلة نشوف ناس خالتي إن شاء الله سكتنا مسافة قال لي زعلانة مني؟بوستو علي راسوو قلت ليهو انت لو رميتني في النار م بزعل منك ي أبوي أنا عندي منو غيرك في الدنيا دي انت ياهو ابوي واخوي وعمي وصحبي واي شي والله ازعل منك بي ياتو قلب ي أبوي عمي دا اتاثر لمن ضماني قعد يبكي بكا...قال لي الله م اداني بت لكن اداني انتي انتي كفيتني من اي شي ♥️
حنية عمي دي م فيها زيها بنبكي كدا جا حسام داخل لقانا بنبكي قال لينا الله ؟؟مات منو بسم الله؟ م في زول رد قال لينا ايوا ايوا عرفتكم عرفتكم بتبكو عشان م اتخرجتو زي قولو كدا انتو عمي ضحك قال ليهو العوير دا دايرة ارد تلفوني دق كان جميل لحسن الحظ م مكنتة مسجلة رقمو قفلت الخط براحة وصمت التلفون ختيتو تحتي عمي قال لي جهزي روحك بكرة موعدنا وطلع هو حسام عاينت لي تلفوني لقيت جميل متصل علي رديت قال لي بلهفة كويسة انتي؟قلت ليهو اي بس عمي كان معاي قال لي حمد لله انك كويسة...تعرفي لو انا تعبان عايز اموت صوتك دا بزح مني اي تعب في الحياة دي🤍 انتي ي بت جاية ياتو كوكب فصلني فصلني😆😆 اتونست معاهو شوية وقمت ألملم حاجاتي عشان اشوف خالاتي بي وين عدا اليوم داك بطئ شديد
______________________
تاني يوم الصباح جيت شايلة لي عمي شنطة هدوم قال لي ماشة ليهم من أول مرة تبيتي قدر دا؟قلت ليهو اييي حمد لله لقيت ناس منهم ريحة امي والله ي عمي متشوقة شديد شديد اشوفهم ارح ارح عمي قال لي امري لله ارح طلعنا وانا متحمسسسةةةة حماسسس وصلنا الثورات عديل نزل قصاد بيت كدا عمي دق الباب طلعت ليهو البت الشغالة قال ليها دا سلام عليكم بيت نجود؟قالت ليهو لا لا دا بيت فاطمة قال ليها نعم؟فاطمة قاعدة طيب؟قالت ليهو لا لا في بتها قال ليها ناديها نادتها جاتنا بت كدا لابسة توب وشها صاري صرة عمي سلم عليها قال ليها دا كان ساكنين إيجار ولا ملك؟قالت ليهو ملك🙄قال ليها طيب الناس الكانو هنا من زمان وين قال ليهو م بعرف انا بس قالو لي راحلين شلت حاجاتي وجيت عمي فهم انها م ح تتعاون معاهو "انا متابعة دا كلو من العربية" عمو قال ليها طيب جيبي رقمك امك اسالها اتافأت ملتو الرقم قالت ليهو اي خدمة؟قاال ليها لا شكرا دخلت وعمي جا العربية قال لي البيت فيهو ناس تاني كدي دقيقة اتصل علي رقم فاطمة دي ردت بعد الجرس التالت
سلام عليكم ... عليكم السلام والرحمة...استاذة فاطمة...ي مرحب ايوا نعم...انا صراحة جيت بيتكم هنا في الثورة مربع..وبسال عن الكانو ساكنين هنا قبلكم نجود لو بتعرفيها...لا والله ي أستاذ معليش انا البيت اشتريتو من سمسار بعرفو م حصل اتعاملت مع نجود دي...طيب م مشكلة لو ممكن تديني رقم السمسار...طيب اوكي برسلو ليك في رسالة نفس الرقم داا؟...ايوا رسليهو في الرقم زاتو شكرا ي استاذة...العفو قفل منها رسلت ليهو رقم السمسار
عمي دخلو اتصل عليهو