غياهب الجهلِ والظلمِ

بارت الثالث _والثلاثون

    رواية ...غياهب الجهلِ والظلمِ  
 
     ...بقلمي ...نورس قاسم ...
      ----------------------------

مريم :- سمعنه ضربه وصوت ادم أن وصاح وكأنو انسحب الموبايل منه وواحد  كَال ...

... اذا تردوه عايش جيبو 90مليون وتعالو لمنطقة ال...... سلم واستلم ...

عاينت الولد تطافرو وگلمو يصيحون كل واحد يگول شكل. فراس يگول ...

...خلي اتصل عالشرطه وابلغهم ...

واركان يرده ... لالالتتصل ليرحون يعرفون ويأذون ادم ...

ضلو مخبوصين ويرحوه ويردون اتصلو على امين وعالعمام..انا عاينت الميرا شفتها حاطه ايدها على كلبها وصافنه ووجهه صار اصفر ...

رحت يمها حجيت ... ميوره لتخافين ان شاءالله يرجع سالم ... هي عاينت عليه بخوف ودموع وكامت جاي تمشي وجان توگع ...

صرخنه انا.ووسن كعدت حطيت.راسها بحضني عاينت وسن جابت مي واجتها.تركض اخذت مي باصابعها ورشتهن على وجهه ..ماگو ماگعدت ...

اجه فراس قاسلها السكر لگاه صاعد گال ... سگرها صاعد حيل ...عاين لوسن.وكال.. اخذيها للمستشفى انتي واركان....

وسن.هزت.راسها وكامت صعدت جابتلها عبايه لفتها بيها هي كعدت بس دايخه.وبس دموعها تنزل .. طلعت ميرا منا دخلت عمتي منا كالت ...

...شكو شنو صاير ..؟

حجيت ... ادم خطفوه ...

گالت بصياح ... شنوووووووو ... شمرت عباتها وگعدت بالكاع گام تدك وتلطم وتسوي ... اررريد ابنيييي جيبووووه ويييينك اميييين.ارييييد ابني جيبه الييييي ..

...فراس طلع.تلكاه.امين.وراحو يقدمون بلاغ بالمركز ...شويه.وانگلب البيت بالناس والشرطه...

          ----------------------
:- كلبي جان.ممرتاح وناغزني. رجعت من المستشفى بعد ماحطولي مغذيات نزلو سكري ..البيت مليان عمامي وشرطه ومخبوصين ...

تلكتني اسيل كالت .. هاحبيبتي شلون صرتي ..

اني حضنتها وبجيت مسحت دموعي وكالت .. لتبجين ميرا لتخافين شوفي حبيبتي گلمه و اخذيها مني العار ميموت فتأكدي ادم.ميصيرله شي لان.بصراحه هو.عار ...

دفعتها وحجيت بعصبيه ... وتالي وياج.انتي متبطلين سوالفج زوجي حيقتلو وانتي هنا تفلسفين براسي ..

هزت ايدها وكالت ... والله العتب مو عليج العتب عليه واكفه ومكلفه روحي و دا اواسي بيج ...

سكتت عفتها ورحت.كعدت بغرفتي واني ابجي وانحب حظي العاثر ...

         -----------------------

امين: - ادم.دائما تجيه تهديدات والتهديدات من.ولد عشائر لان بحكم منصبه يطلبون منه مساعده.والمساعده.تكون باطله يايطلع قاتل.يا يتستر على جريمة قتل هو ميقبل فالذالك يعادوه ...

اتصلنه عالشرطه اتفقنه ويه ضابط الشرطه ناخذ المبلغ الي طلبوه ونرح للمكان الگالو عليه ياخذه اركان واحنه والشرطه نتبعه ونسويلهم كمين ...

ركبنه السيارات اني مقبلت. اترك اركان وحده يروحلهم خاف يعرفون. بالكمين ويأذو فرحت وياه بسيارته ...

وصلنه للمكان المطلوب نزلنه باوعت ادم مربطين اديه وهو كاعد على ركبه ومجموعة ملثمين واكفين.يمه وواحد منهم حاط السلاح براسه ...

جريت نفس توكلت على الله وصلت قريب عليهم وگفنه.اني واركان حجيت ...

...  جبنا المبلغ المطلوب سلمونا اخونا ونسلمكم المبلغ ...

...همه.واحد باوع للثاني واشرو لبعض باوعت عيونهم مو غريبه وشايفهم قبل بس وين. ...

كومو ادم واجه يمشي بتجاهنه وهمه موجهين السلاح عليه اني اخذت الفلوس وتوجهنه عليهم. باوعت سيارت الشرطه اجت ورانا .. قلقت.خاف يضربون عليه..

اركان.راح يركض على ادم.واني شمرتلهم جنطة الفلوس عليهم. ...

باوعت واكفين.لتقربو من الجنطه.ولا شردو من الشرطه شنو الموضوع...؟

اركان دايحضن ادم. ادم ضربه على بطنه.وگله وخو يضحك ....وهاي انتقمت.منكم حتى بعد متعيدها وتكولي البيت اخترگ...

اني عقجت حاجبي شنو دايكول هذا. سمعت صوت ضحك باوعت عليهم وخرو الفاف من وجهم وهمه.يضحكون..

تفاجئت هذول مو الضباط اصدقاء ادم ..؟

حسيت دمي گام يغلي توجهت عليه وحجيت.بعصبيه ...صدگ تحجي ادمم فورت دمنه وخليتنه.نتلاطم عليگ مثل المخابيل وانته تگول انتقمت شنو جهال احنه ...؟

كال وهو يضحگ ... رديتلهم المقلب يخوي شبيك علمود يبطلون مقالبهم بيه ...

فرگت وجهي واستغفرت واني احاول اهدي نفسي ...

ضابط الشرطه گال بأنزعاج ... شنو سالفه فهمونه.الخاطفين وين ..؟

حجيت واني گوه مسيطر على قهري ... نعتذر حضرت الضابط مثل مدا تشوف الاخ مسوي مقلب بينه هو. وبقية الضباط  ..

گال بنزعاج.. هذا مو.كلام شنو.احنه دا نلعب تجون تبلغون اخونا مخطوف ومن نجي لحتى نقبض عالخاطفين يطلعون ضباط مسوين مقلب ...

امين .. ضليت اتعذر منه بس هو شكله حيل ضاج. گاله ادم ...

...نعتذر منك عزيزي بس ماكنت متوقع يبلغون الشرطه الخطف ...

الضابط سكت گاله ادم .. باجر معزومين عالغده يمي گلكم ...

امين... رجعنه والطريق كله ادم يضحك واني احرگ بروحي من قهره تالي گتله ...

انته دا تضحك وفرحان لان انتقمت منهم بس متدري بمرتك المسكينه سكنت المستشفى وسكرها صاعد كولش ...

اتفزع وگال بخوف .. لالا امين لتكذب عليه عود صدوك.كلامك ..؟

گاله اركان .. لي والله اني اخذتها للمستشفى ...

گال بتوتر ... اميين.سووق بسرعه خلي نوصل ..

اني بطئت السرعه وحجيت بخباثه .. ما اشتغل سايق عندك وبعدين شبيك.نفزعت يجوز هم تطلع مسويه مقلب بينه وياك ..

گال بنفي ... لالا اني ماگتلها لان.ادري بيها متضم عليكم عفيه امين سوق بسرعه ...

        ________________

ميرا
:- كاعده وحاطه ايدي على خدي منتضرين خبر من الولد بلكي واحد منهم يتصل ويكول ادم بخير ...

جسمي يرجف خايفه أسمع خبر محلو وراسي من التفكير موتني ...

عمتي ام امين گاعده وتنعي وتبچي على ادم الشي إلي خوفني اكثر ...
بهالاثناء انفتح الباب ...

دخل اول شي أمين ووراه دخلو ا اركان وادم ..

كلنا ركضنا بلهفه وبعيونا القلق على ادم
حضنته امه وضلت تبچي ...

كان شعره ووجهه مترب ولابس بدي أسود بس حييل مترب ...

رحت حضنته واني ابچي هو هم بقى يسأل على حالي ...
ام امين استلمته بالاسئله وهو حاضني
آخر شي گاللها

... تعبان اروح ارتاح شويه واركان هو الي راح يفهمچ

وأسمع اركان يدردم عليه ويگوله
.. الا اردها بالاقوى ان شاء الله

لزم ايدي ورحنا لغرفتنا ...
شاف ايدي بيها كانونه باسها وگال لتخافين ...

واني حضنته وگمت ابچي اخاف افقده حييل

نمنا ومحسينا على نفسنا إلا للمغرب
گعدت هو مموجود نزلت جوه ...

واني ع الدرج سمعت امه تدردم عليه وتگوله ...

ولك شوكت تجوز من هايه سوالفك مافكرت بيه زين مانجلطت

.. گال وهو يدخن ويحچي وياها

- يلا يمه مصار شي وخيرها بغيرها

-ولك ياخير انتوا مايجي منكم غير وجع الراس يگول جهال مو يگول زلم مشوربين كافي يمه شبيتوا راسي

...هو ضحك وباس ايدها وگال ... بعد متنعاد صدگيني رحت گعدت يمه گال..

ادم -ها يحلوه شلون صرتي 

ميرا - صرت احسن بعد ماشفتك

...ضحك وحك راسه

ام امين - ليش هي شبيها وشلون صارت ضتها نوم بنوم
خزرها وگال - حلال عليها النوم يمه  خليها ترتاح

هي تأفأفت وگامت من يمنا...

سألته عن الي خطفوه گال هاهيه انسدت السالفه وهو يضحك ...
يااا هذا شبيه
مر اليوم عادي جدا ...

ثاني يوم
گعدت الصبح آدم مموجود رايح للشغل ضربت راسي بإيدي  عود ردت اسويله ريوگ الصبح
گمت بدلت وسبحت وسويت شعري ضفيره فرنسيه وطلعت من  الغرفه
باوعت للساعه بـ 9:00 الصبح

نزلت من الدرج ... شفت وسن لازمه سلة الملابس صبحت عليها ونزلت ...

تلگتني عمتي ...
بكلمتها الدائمه
هااا يلمسعده ... نايمه للضهاري واحنا نخدم بيج وضلت تدردم

مرديت عليها ورحت سويت ريوگ وعدت اتريگ  ...
ورى شوي اجت مريم هم صبحت عليه وصبت جاي وگعدت تسولف ويايه

اجت عمتي ضلت تسولف وتضحك وياها

بگلبي گلت ... لعد مو هايه مريم گعدت متأخره لعد عمتي شبيها بس ويايه شاده حزامها

كملت غسلت المواعين ونضفت ورحت گعدت ع التلفزيون ...

سمعت الباب ندگ رحت دااشوف منو راحت قبلي عمتي فتحت الباب ..

طبت ام سيماف وهي تبتسم ..

بوستها عمتي واني هم بوستها .. گالت

... حبيبيتي ام امين انتي. والاهل عزيزه كثيغ علينا لهذا حبيت اقولكي ع عغس(عرس)  اختي جيهان باجر ان شاء الله وانتي والبنات تعالوا تشغفونا (تشرفونا)  كلنا.

.... وعمتي مثل عادتها اكلتها حاصل فاصل بالكلام الحلو والادعيه سألتها عمتي

-منو ابن الحلال الي حتتزوجه اختج ؟

ام سيماف - هو غجال (رجال) الو سمعتو الطيبه بين الناس عندو ولد ومطلق مغتو (مرته) وهو ابن حلال وهاي بعد صارت قسمتم

سلمت عليها وراحت ...
طبت عمتي للبيت وصاحت تمارا. ووسن ومريم وگالت حضرن رواحچن نروح للعرس ام سمياف صديقتي وماريد اتفشل وياها ....
هزيت ايدي وطبيت لغرفتي ضجت منها ..
ضلت تصيح حتى اطلع اسوي غده مطلعت ضليت گاعده ...
للعصر اجه ادم سويتله غده وگعدنا نتغده وكلتله عن كولشي صار اليوم گال

... لتهتمين المهم اني وياج

صدوك بليل كولهن راحن بقيت اني وادم وامين بلبيت

عدنا نشوف فيلم الى ان اجن وعمتي كلعاده بقت تمدح بسيماف يگول الله خلقها وكسر القالب

ضجت ورحت لغرفتي وكلعاده اجه ادم يخفف عني ويتغزل بيه ويكولي انتي احلا منها ...

صار الصبح گعدت قبل ادم سويتله ريوك هو تريك وراح ....

رحت نضفت غرفتي .. ونزلت

من نزلت تلگتني عمتي گالت تعالي عجني بسرعه
صفنت عليها احنا

بعائلتنا منخبز كله جاهز حتى هنه ميخبزن واني مااعرف لا لخبز ولا لعجين گلتلها

- عمه.  اني شمعرفني

گالت... راح تمارا تعجنلج وانتي اخبزي ...

باوعت. لتمارا وكالتلها ... تمارا گومي اعجني ماما وخلي ميرا تخبز ..

تمارا گالت ... يااااا واني شمعرفني اعجن عندج جنايين هنه خلي يعجنلج اني مدخلني ...

عمتي باوعتلي وگالت ... روحي انتي اعجني واخبزي يلا بسرعه

حجيت .. عمه والله مااعرف عمري كله معاجنه ولاخابزه ...

گالت-شنو شمعرفج روحي سوي ولتضلين تتنعوصين مو زين مني متحملتج علمود ابني ويلا اني مشتهيه خبز بيت حار يلا روحي سوي

- عمه والله مااعرف

- بلا تنعوص هذاك الطحين حطيله ملح وخميره وخبطي ويه المي وانتهى يلا سوي ...

مسعده بس المثلج حضها ماعد
حچت وهي تطلع من المطبخ ...

صفنت شلون اعجن والله مااعرف ..
سمعت وسن تحجي وياها وتعاتبها وتگولها

وسن - شجاج ويه البنيه بعدين احنا مو كله ناكل من المعمل شنو الي اختلف

ام امين - ادري شلون ما اكل خبز من بيتي اكلتيني حاصل فاصل وشبيها متعجن لو هاي ميرا الاديها محنايه

وسن ضلت تحجي ويه عمتي  مفاد  تركتها وراحت لغرفتها ...

اسمعها تدردم وتتحلف حيل نقهرت  رحت على وسن گلتلها ... اريد احجي ويه ادم اريد موبايلج ضروري

انطتنياه مقصرت ...

خابرت ادم اول مافتح ضليت ابجي
گلتله امك شاده ويايه وموتتني قهر وتاليتها يعني ...

حاول يفتهم شكو ... گال ...حبيبي شبيج ليش تبحين فهميني براحه ...

گتله... امك شاده ويايه وتعالي اله تعجنين وتخبزين اگولها ما اعرف ماكو متقبل ..هسه تجي اني بعد ما اتحمل هالوضع هذا

جاوب ... روحي اگعدي بغرفتج ولتطلعين بين ما اجي انتظريني مسافة الطريق

سديت التليفون وانطيته لوسن ورحت لغرفتي گعدت بيها ..

اجتي وگفت يم باب غرفتي وگامت تدردم و تصيح الا هسه تعجنين ...
نزلن دموعي بأسى وقهر نزلت من الغرفه
رحت داسوي العجينه گمت جبت المي وضفته ع الطحين باوعتلها
أشو  انلاصت صارت جنها مي ابيض

ضليت ابجي ... وهي واكفه على راسي وتسوي ... موووو هيج يالفاااهيه يالمسعده يالمحد مثلج محضوضه وگاعد بختها...

دخل ادم وشافني ابجي تخبل .. گال ... هاي شدا تسوين ..؟

عمتي گالت .. شدا تسوي شبيك اخترعت اشتهيت خبزة بيت وگتلها اخبزيلي ...

..هو اجه عليه گومني وگال ... وانتم من شوكت تخبزن بالبيت مو گله ةن المخبز ...

كالتله .. يبووو اشتهيت هسه ميصير اشتهي خبز بيت الله اكبر يربي ...

گال يعصبيه ... اشتهيتي خبز بيت عندج بنات يخبزلج مرتي مكاعده خدامه عد احد ...

هو گاللها هيج لو تخبلت كعدت على حيلها وگامت تدگ وتلطم وتگول ... بعتوووووني علمووود نسووااانكم يبوووو ريتكم بعد ربااي وسهر الليالي تالي علمود الميسون والمبخوتات باعني ...

إدم حجه بعصبيه ...اني هالشلاع الكلب ميصرفلي احسن شي اخذ مرتي واهج من البيت ...

باوعلي وگال ... گومي بدلي خلي نطلع وبعد مستحيل ارجع لهالبيت ...

..اني جريتها ركضه للغرفه طلعت ملابسي بدلت لبست عباتي وطلعت وياه وعمتي گلبت الدنيا تحجي وتسب بيه وتدردم ركبنه السياره وشخطها وهو مقهور ويسب ويلعن ...

           ----------------------

اسيل : - كملت السادس على خير وسلامه .. طلعن النتائج كان معدلي 81 بابا گال ...

..لتنقهرين بابا اوديج اهليه تحليلات ...

حجيت .. لابابا ممقهوره اني تعجبت اصلا لان مطلعه هذا المعدل ... وبعدين اني ما احب التحليلات لا اروح اقتلي واحد بسحب الدم ..

اني احب الانگليزي فحصير مدرسة انگليزي ان شاءالله ...

بابا هز راسه وگال .. هاهيه بنتي مثل متردين ...

قدمت على الكليه والان علمي الحمدالله انقبلت تربيه انگليزي ... 

بعد فتره رحنه نسجل اني وصديقاتي.  رحنه الصبح من وكت گولش بس انشلع گلبنه.گولش اتأخرنه بالتسجيل لل2ونص يلا رجعنه ...

باوعت للبنات وحجيت ..خلي نروح ع مطعم نتغده راسي ألمه بعد مينطاق ...

شهد گالت .. اي وربي حتى اني راسي موتني يلا خلي نروح ..

اسيل.. رحنه ع مطعم قريب وطلبنه الاكل تغدينه.وكملنه طلعنه ودانتمشى حتى نوصل للشارع ..

اجه واحد بالسياره باوعلنه وكام يذب كلام بذيئ ويتحارش وكله كلامه فشار ...

سكتت اني. بس اشو شويه وگام يتماده گال ... متجن ويايه للفندق يحلوات ..

انفعلت كتله ... واختك هم تجي ..؟

گال... لا اني ما. عندي اخوات ..

حجيت.. اهااا لهالسبب انته هيج ساقط ...

گام يغلط ويفشر شهد گالت ... عوفي اسيل خلي يولي ..

اسيل. مشينه وعفناه هم گام يمشي ورانه ويذب بهالكلام حجيت بتوعد ... بسيييييطه ...

جريت موبايلي حطيته بإيدي وطلعت الكاميرا ... عالاساس حذائي فلت.ونزلت اسويه هو مگدر بعد يوگف لان سيارات وراه ...

اول ماطلع صورت رقم السياره وحفظته بالموبايل ... وصلنه للجامعه ابو الخط لهسه مجاي. باوعت هو لحكنه للجامعه يلا هذا ناوي على موته ...

رحت للحارس وكتله .. اكو مركز هنا. اريد اشتكي ..

گال ..عليمن تشتكين ..

حجيت .. عن واحد لاحگني من طلعت من المطعم لهسه ويذب كلام محلو ...

گال .. اي اكو امشي اني اخذج ...صدوگ رحت وياه دخلت المركز قدمت بلاغ واشتكيت وقدمت رقم السياره ..

اني اله الحقير الله غاضب عليك من خلاگ بطريقي بسييييطه...

        --------------------------

شذر :-الي فتره احجي ويه عصام عن موضوع التعين واليوم كلمني وگال لگيتلج تعيين ...

گلتله وين حتعين.وبشنو گال بليل ارسلج التفاصيل.. صدوگ صار الليل وگاعده عالموبايل منتضرته يرسلي التفاصيل ...

ضليت احجي ويه اسيل شويه اجتني رساله من عصام عالماسنجر ..

دخلت عالمحادثه و فتحتها وريتني مافتحتها .. راسلي اصوري بأشكال البس ....يتبع 💔

قراءه ممتعه 🌺

اسفه عالتأخير حبايب

كل عام وانتم لرمضان بألف خير  يارب ينعاد عليكم بالصحه والعافيه والامن والامان ...

ارائكم للقصه .. ولتنسون التصويت ...💎🖤

دمتم بخير احبتي ❤️