نصفي العقيم ( مكتمله )

بارت(٣٩)

كالو ما تجي وكالو عليك بعيد
ودرب كلش طويل البينك وبيني
شح مني الدمع كد ما بجيت أعليك
وأعاتب بالكمر هلبت يواسيني
ظلم كلش ظلم تحيا وتموت بشوك
وجا شنهو العمر من تذبل رياحيني
تعب حتى الورق حبر ودمع مخبوط
وحسره وي القلم تأذيني وتبجيني
صفة رسمك حلم عذب حنايا الروح
مثل طيفك أبد ما شايف بعيني
نهر طولك عذب صافي ويرد الروح
وأنه الميت عطش وبكطره ترويني

_______________________

روايـة "نصفي العقيم"

البارت التاسع والثــ٣٩ـــلاثـون

-الجزء الثاني

للكاتبه : يُمنا نـآصر
_______________________
حبايب اعتذر عن عدم نشر البارت لكن حالتي الصحيه كانت متدهوره وعندي التهاب معده حاد ، ووضحت هالشي ع المنصه والناس الي متابعه حسابي وصلها التوضيح يعني مخليت بالوعد مثل مابعضكم گال 🙏🏻💕

قراءه ممتعه ..

. طلعت من الغرفه ودخلت للاستقبال اشوف منو اجه .. وگفت متصنمه بمكاني واباوع بتفاجئ لوجود حسان واُمه ..!

بقيت دقايق اني بس واكفه واباوع لحسان ، احس گلبي انتفض ونزال الغبار الجان تارسه رجعت فرعت بي اغصان خضره بعد ماجانت مندثره و تارسها الصفار ..

.. حسيته گلبي  راح يطلع من بين اضلاعي ، شعور خارج عن الوصف اباوع بعيونه الي اتسنرت على عيوني عيون ماليها الدمع والندم ، للحظات رجعت ذيج بغداد الي من تشوف محبوبها  تخجل وتطير الفراشات بمعدتها ، الي جانت بانيه امال واحلام وكلها انهدمت بسبب طغيان البشر وجبروته ..!

لحظات مرت بين اشتياق والم وعتاب وحُب ومراهقه وشيب ابيض كان تارس الراس .. ماصحيت غير على  امه الي اجتِ بوستني وعزتني بوالدي

ام حسان : البقيه بحياتج يمه ان شاء الله خاتمة الاحزان ..

بغداد: حياتج الباقيه خاله شكراً ، تفضلو گعدوا ..
اباوعله گعد ع القنفه واني گعدت گباله .. شگد ما المسافه قريبه بيناتنه بس هي بعيده كُلش

بينا سنين طويله شاب بيها شعر الراس والرمش والگلب هم شاب
باوعلي وگال بصوته الجوهري المُرتكز

حسان: البقيه بحياتج بويه بغداد ، شدي حيلج وان شاء الله تهون كُل مصيبه تبدي صغيره وبعدين تكبر الا جمره الموت تبدي جبيره وتبدي تصغر

بغداد: هزيت راسي واني امسح دموعي گتله بهدوء ، ونعم بالله ..

حسان : تنهد تنهيده طويله وگال ، انتِ شلونج اخبارج الزغار شلونهم

بغداد: ابستمت ابتسامه  كانت تخفي وراها هوايه امور
مدينه مهجوره ومنكوبه بمشية اهلها يا حسان وانت اهلها كلهم .. گتله الحمدلله كُله زينين

حسان: دومكم يبويه دومكم ..

بغداد: بقت امه تسئلني واني احجي وياها بس عيني على حسان ،ظلو ربع ساعه وگالو احنه نستأذن .. طلعت اوصلهم للباب ندار عليه حسان وگال ..

حسان : بغداد شتحتاجين انا موجود لا تترددين بيوم لو ضاگت بيج دنياج رقم اخيتي يمج وهيمتا ماعتازيتيني بس گولي برمشة عين  انا اجيج و شتحتاجين انا بالخدمه ..

بغداد: باوعتله  واريد اكُله اني محتاجتك الك ممحتاجه شي ثاني بالدنيا غيرك ، خنگتتي العبره بس گدت ادارك الموقف ، وگتله تسلم متقصر ..

حسان : يلا يمه امشينه ..

بغداد:  سلمت عليه اُمه ودعتم وسديت الباب راحو هما واني طبيت للبيت

بداخلي دموع ومشاعر جياشه منتظره اشاره حتى تثور ، ماعرف شلون تمالكت روحي بس علما دخلت للغرفه سديت الباب قفلته وارتاكيت علي خليت ايدي على حلگي احاول اكتم صرخاتي المجروحه  .. صارت دموعي تنزل بصمت وصوت الشهگات يعتلي المكان بخفوت

حسيت من شفته نعادت عليه كُل مئساة الفراك ورجعت نفتحت جروح قديمه ماطابت ضلت تلچم بيه طول هالسنين ..

ااخ ياربي ليش هيج ديصير ويايه كل عمري عشته اتحسر على شغلات من ابسط حقوقي

شصار لو تزوجته لحسان جان هسه هذا حالي ، جان عانيت كل هالمعاناة ياربي دخيلك  ساعدني يا الله .. احس بداخلي نيران مستعله
وماكو شي يطفيها غير الرحـمٰن وكتابه العظيم

مالگيت ملجئ غير باب ربي الي مراح ينسد ومن تضيق بيه الدنيا ينفك كربي وتحتويني رحمة الباري عز وجل ..

فرشت سجادتي وصليت ركعتين حاولت اركز بيها واشتت تفكيري بكلشي حواليه ..

طلعت القران وخليته ع ستاند القران .. بديت اقره بصوت مجهر واستشعر كُل ايه تنذكر بي وكل حرف احسه يوصل لاعماقي ..
وصلت لايه دگول ..

بسم الله الرحمن الرحيم

{وأيّوبَ إِذْ نَادَى رَبَّهُ أَنِّي مَسَّنِي الضُّرُّ وَأَنتَ أَرْحَمُ الرَّاحِمِينَ* فَاسْتَجَبْنَا لَهُ فَكَشَفْنَا مَا بِهِ مِن ضُرٍّ وَآتَيْنَاهُ أَهْلَهُ وَمِثْلَهُمْ مَّعَهُمْ رَحْمَةً مِّنْ عِندِنَا وَذِكْرَى لِلْعَابِدِينَ*}

توقفت واحسها اشاره حتى اصبر واكو خير ومفتاح. فرج ينتظرني قريب ، صرت اردد والدموع تتماطر على خدي

ربي مسني الضر وانت ارحم الراحمين
ربي مسني الضر وانت ارحم الراحمين
ربي مسني الضر وانت ارحم الراحمين

شويه وندك الباب عليه .. كمت فتحته لگيت محمد گال (افوله دتي)
رفوله جتي ..

مسحت دموعي و ابتسمت هو حيل يحبها لرفل ومن تجي بس يگابلها ويگعد فد واحد نسونچي  بس عليمن طالع غير  ابو هشام يموت ع البنات الحلوات ..

گمت طلعت عليها سلمت وهي بقت تسأل عن احوالي وگالت راح تطلع النتائج وخايفه كُلش  طمنتها وكتلها انشالله انت شاطره ومينخاف عليج .. حسيت عدها حجي تريد تحجي بس متردده

اجيت شايله صينيه الچاي وياها كيك خليتها ع الميز وباوعتلها لزمت ايدها وگتلها احجي حبيبتي محتاجه شي ..؟

رفل : لا لا الله يسلمكي كلشي ممحتاجه بس ..

بغداد: بس شنو حبيبتي احجي

رفل: خلص خلص انسي والله مو شي مهم

بغداد: دحجي يمعوده هسه بس ذبيتي القنبله ومفجرتيها

رفل : ههههه الله لايجيب قنابل دخيلكي لذكريني بايام الموصل والقنابل

بغداد: ياروحي انت انشالله تنذكر ومتنعاد لا والله اصلاً لا تنذكر ولا تنعاد ، ويلا هسه كوليلي شبيج ؟

رفل : والله يابغداد ماعرف شَقول .. اخوي الصغير ماشي ويا شلي (شله) بالمدرسي وكن الولاد ماخوش وع يعلموه ع سوالف محلوه وصايره اشتم بي ريحة دخان وانت تعرفين الولد بهكذ مرحله من العمر يريد رجال يسيطر علينو ( عليه) او ينصحو  وانا وحدي ما اطيق اسيطر ولان بنت كلامي ماكلش اله اهتمام عده

فاذا تطيقين ( تكدرين )  تحكين مع عهد اخوكِ بالكت الله يحكي معانو ويوعي شويه..

بغداد: يمعوده چنج ع الحجي تدللين والله بس يرجع عهد اخلي يحجي ويا ويفهمه لشلين هم ، من عيوني ..

رفل: تسلم عينكي يا اطيب قلب عرفتو والله بلاكي مكنت اعرف اش حعمل الله دزكِ الي هديه من السما ..

بغداد: لتحجين هيج حبيبتي الناس للناس وانت صرتي اختي مو غربيه .. وعيب هالكلام بين الخوات

رفل : ابستمت ، واكثر من اخت واكثر والله .. يلا حبيبتي انا استأذن اروح عندي شغل

بغداد: الله وياج ياروحي .. طلعت من البيت واني كمت على غرفة هشام دكيت الباب ماكو  ميرد

.. رجعت دگيته هم مارد تالي طبيت للغرفه ماكو مموجود طلعت سئلته لمحمد گال طالع من اجوي الخطار عليج ..

بقيت انتظره لليل وما اجه  ، ثاني يوم  وثالث يوم يلا اجه للبيت
الصبح گعدت لگيته متمدد ع القنفه نايم ع بطنه وشكله مبين جان سكران

.. رحت ليمه اريد اگعده وچان اسد خشمي من الريحه ، الله ياخذك ع هالريحه طخيته باصبعي واني اكوله ..

بغداد : هشااام ، هشااام كوم اريد احجي وياك حجيتها واني خاله ايدي على خشـمي .. فتح عيونه شافني وگال ..

هشام : شكووو شكوو مو جاي شوفيني منطمر شكو تنگين

بغداد : راح تتأخر ع دوامك وهم اريد احجي وياك بموضوع

هشام : شهالصباح الاكشر اصبح بوجهج لا ربحنه كلش معناتها اليوم راح يصير اسود .. شكو مگعدتني مثل الغراب فوگ راسي شتريدين ..

بغداد: بلعت كلامه الي مثل السم وگتله ، گوم اريد احجي وياك بموضوع .. صارلي يومين اركض وراك وانت ولا يمك

هشام : اعرف مواضيعج كلها تغث ومليانه سم مايوم جيتيني بشي بي خير .. سويلي زقتبوت خل اكوم اسبح واجي اتريك وتالي احجي عود وصدعي راسي

بغداد: هزيت راسي باسف واني اصبر روحي ، ماريد اتعارك واسوي خطوه اندم عليها بعدين .. خل انتظر بالكت اطلك وارتاح ..

رحت للمطبخ سويتله ريوگ بين ماهو طلع  من الحمام واجه گعد ع الميز رحت وگلبي يدگ سريع .. فتحت الباب اشوف غرفه الجهال اخاف احد بيهم گاعد طمنت نايمين واستجمعت قوتي كلها ، رحت گعدت مقابيله وهو گال ..

هشام : شكو صافنه بوجهي احجي عاد شتريدين ..

بغداد : هشام شوف احنه صارلنه ٧ سنوات مزوجين ، ولا انت تقبلتني ولا اني تقبلتك ومثل ما اني انجبرت انت هم انجبرت عليه ..

"اباوعله نزل استكان الجاي من ايده ورجع نفسه ع الكرسي اخذ وضعية الاستماع وباوعلي گال

هشام: ايي وشنو جاي ذكريني انو اكرهج مثلاً

بغداد: خل اكمل كلامي

"اباوعله گلب عيونه بانزعاج و گال كملي ..

بغداد : انت مو تحب وحده وجنت ناوي تاخذها وتسافر مو هذا كلامك لو اني غلطانه

هشام : ميخصج

بغداد: اخر همي اعرف ترى ، سواء زوجت سافرت زنيت متت حييت اني ميهمني .. الي يهمني ننفصل

هشام : حلوو و شلون يعني ننفصل ؟

بغداد: عادي مثل كل هاي الناس المتحظره ننفصل بهدوء وبدون مشاكل ، اعرف انت حترفض بس اني مصره ع قراري ماكو شي يجمعنا غير الاطفال وبالنسبه الهم يبقون يمي وانت هيمتا متحب تجي تشوفهم ..

هشام : وكل عقلج اني اعوف ولدي لحظرتج ؟؟

بغداد: ليش انت عايفهم بالشارع ترى اني امهم تعرف شنو يعني امهم ، وبعدين انت من يمتا اصلاً عرفت عندك ولد ..

اشو اني الاسوي كلشي ، اني الاربي واعلم واودي واجيب واطلع واشتري والبس واوكل ولو احد تمرض حضرتك متدري بي اني الاركض ع المستشفيات واني كلشي اسوي وماخذه دور الاب والام

يعني معقوله ممنتبه ترى انت وجودك وعدمه نفس الشي .. مامهتم الهم ابد ، اني اما انكر اعرف بيك تحبهم بس هذا مو كافي
المفروض تهتم الهم وتحسسهم عدهم اب
بعمري ماشفتك گاعد يمهم وتعلمهم على شي زين .. تحجي وياهم توعيهم ..

كلما اجي عليك يا تلعب بوبجي يا تحجي ويا بنات الشوارع وفوگاها انت وياهن تحجون حجي اني اذا سمعته استغفر الف مره وانت متهتم متگول هذول اطفال ممكن يلگطون اي كلمه نگولها، ولازم نكون حذرين بكلامنه وتصرفاتنه ..

انت اي واجب تجاهم ممسوي اذا طلگنه احسن صدگني الك والي روح العب براحتك وسوي الي تريده وانت بعيد عني .. خلي كل واحد يعيش حياته كافي الشفته وياك صار سنين شفت الماوحده شافته وذكت المر منك ومن اهلك اشكال والوان ..

هشام : انسي جهالي ماعوفلج ياهم لان ما امن بيج

بغداد: انت دتفهم شنو امهم يعني اذا يمي متأمنهم لعد ويا منو تأمن عليهم

هشام : وشنو يعني امهم بيش كيلو ؟ ، هاي انت لعد مو امج ذبتج وباعتج بمليونين يعني انتِ قيمتج كُلها مليونين .. اذا اعوف جهالي شنو اليضمن الي يعيشون بسلام ومتسوين بيهم نفس الي امج سوته بيج

بغداد: ليش دائماً تحاول توصل نقطة حوارنا لاُمي ، اني مو هي اني اختلف عنها وانت تعرف كُلش زين هي شنو واني شنو وتعرف هم شلون احب جهالي ومداريتهم فلويش هالكلام هذا لو هي بس مغثه وخلص

يا اخي افهمني ولو مره ، اني اريد اعيش حياتي بعيد عنك اريد اخلص من عبوديتك ومن ذلك الي .. طلگني وريح نفسك وريحني

هشام : بعيد عن كل هالخريط الگلتي بس للعلم ترى احنه هسه مو مزوجين ونعتبر مطلقين شرعاً

بغداد: فتحت عيوني وگتله ، شلووون يعني ممزوجين وانت يمتا طلگتني ..

هشام : مطلكتج قولاً ولا رميت عليج اليمين ، بس اني هاجرج صار قرب الـ تلث سنوات هاجرج بالفراش ومدا اتقرب منج .. وبالشرع احنه نعتبر مطلكين

بغداد: لعد شبقى وليش نضل سوه عفيه خلي من باجر نروح للمحكمه وكلمن يروح بدربه وننفصل ونخلص عاد

هشام : اني موافق

بغداد: فتحت عيني بفرحه ، صدك تحجي

هشام: اكيد صدك بس عندي شروط ..

بغداد: شنو شروطك ؟

هشام : البيت هذا تسجلي باسمي ، وتشتريلي سياره ولدكوليلي من وين اجيب لان هذي مو مشكلتي .. عندج ذهب كومه لو تبيعي تجيبين احسن سياره

.. واخير شي تتنازلين عن محمد واحسان وتركيهم الي ..

بغداد: شدتحجي انت گتلك مستحيل اترك اطفالي مستحيل ..!

هشام : واني هم مستحيل اتركهم ولدي يربون يمي وبيتي ..

بغداد: اجيت اجاوبه گام وعافني يااااربي شلون هسه شسوووي .. شويه هو بدل وطلع لدوامه ، بقيت الوب و مالكيت روحي غير متصله على منى ، حچيتلها كُل شي وهي گالت

منى : يمعوده د خلي يولي هذا يحجي بكيفه باعي ، اني صديقتي محاميه راح ادزلج رقمها تواصلي وياها وخلي من يجي اخوج تناقشي ويا حتى يكون وياج رجال ، و سويلها وكاله بالقضيه وهي محاميه شاطره ترفع علي دعوى وتسحله سحل .. وتخلي حضانة الاطفال الچ فنه اذا گدر يدنالج ..

بغداد : تمام دزيلي رقمها وخلي اشوف شدكول

منى : تمام

بغداد: شويه منى ودزت رقم المحاميه دكيت عليها وصوت دگات گلبي باذني اسمعه ، رن وماشالته رجعت دگيت مره ثانيه وهم مجاوبت طبيت كتبتلها رساله اني من طرف الدكتوره مُنى عقيل ..

تركت الموبايل وگمت اخلص شغلي بس كل شويه اجي اباوع للموبايل واشوف بالكت ردت .. للمغرب طبو يُسر وصگر وياهم جهالهم ..

سلمو وگعدو اباوع على يسر شلون كاعده ولا عبالك مسويه شي وجايه بكل عين صلفه بعد عملتها هي وامها وخواتها ومن ضربوني وطردوني  من العزاء  ماجتِ سلمت واني هم سكتت اريد اشوفها وين تريد توصل وصگر شكو جايبها وجاي ..

هم خابرت على هشام وگتله اجوي لتتأخر ..
هو ربع ساعه وطب .. سلم وگعد اجه صگر واني بالمطبخ گال بصوت عالي اريد اشرب ماي ..

بغداد: باوعت علي باستغراب وگتله ليش دصيح ..

" اباوعله رفع حاجبه وخله اصبعه ع ايده بمعنى اسكتِ اني هم سكتت ماگلت شي ..

اباوعله طلع بره عشر دقايق ورجع .. گتله اريد احجي بموضوع وياك عود هز راسه وطب .. رحت وراه اشوف الجهال وينهم واسمعه يگللها ، گومي ساعدي بغداد بالعشى

يسر : اني شكو اساعدها والله خوش ..

صگر : داگولج گومي مو خدامة الخلفونه هي وبعدين ليش لحد هسه مرحتي اعتذرتي اني مو گتلج ترحين تستسمحين منها ؟

يُسر: وانت شكو هالگد شايل همها خليها اشو بينته چانت تكرب كراب المطي ميصير بيها شي لتخاف عرج ميطگها

صگر: بخزره ، كلمة زايده يا يُسُر ميصير خير امشي للمطبخ گدامي تعتذرين منها يلا ..

بغداد : رجعت للمطبخ اكمل العشى وما اهتميت لكلامها خلي تولي ما بعازة اعتذارها اني هالحقيره ..  الموبايل يمي عيني عليه كل شويه اشوفه بالكت ردت المحاميه .. بين ماطلعت الدجاج من الفرن ..طبت يُسُر مهتميت لوجودها ..

اجتِ وگفت يمي گالت بغداد ، مرديتلها ..

يُسُر : مو داحجي وياج ..

بغداد: گلت خل اغثها ، جان اصيح ع هشام .. هشااام عفيه اكو بفباف مال حشرات بالبوفيه مجيبلي ياه اشو الذبان موتني بس يزن..

يُسُر : هاي عليمن ذبان

بغداد: نداريت عليها ، يااا هاي انت هنا يسر اشو مشفتج لعد يمكن لان واگفه يم الثلاجه وهي سوده وانت هم الله يحفظج مبدله جلد الظاهراااقصد لابسه اسود ومخاله مكياج فما فرقت

يُسُر : ادبسززز احترمي اني اختج الچبيره .. شنو تكولين مره ذبانه مره حيه

بغداد: هسه اني گلت شي فكيت حلگي حجيت انت منو يمج ،احد شمرلچ عظمه واجيتي تنبحين .. ياعيني تروح تطك مرارتح ويشيلولج ياها ذيج الساعه شيضل بيج لا رحم لامراره لا احساس لا شـ.. ردت اكمل وسكتت هي طلعت من المطبخ لاكاها هشام خزرته
.. باوع عليه وبايده الفليت گال هاج هذا ..

"درت وجهي عنه رجعت اكمل العشى وگتله لا ميحتاج الذبانه طلعت من المطبخ ..

راح هو واني كملت العشى خليته ع السفره وصحتلهم يتفضلون گعدو تعشو وهي جانت حيل ضايجه واني كل شويه اتحارش بيها واذبلي حجايه لو اكله لصگر .. هاك خويه اكل سوده عليه ضعفان والظاهر مدتاكل اكل طيب وبي فايده

واباوع عليها شيل روحها وترگعها بالگاع ، حيل مستاهله هذا وازود بعد .. بس كملت عشه گالتله لصگر اريد اروح وتعبت وبقت تلح الا ان اخذها وطلعو ..

هشام طب لغرفته واني هم رحت لغرفتي جبت الجهال يمي نومتهم وكعدت اقره قصص ع الواتباد

احس القصص تفصلني عن عالمي وتعيشني بجو ثاني اعيش ويا الابطال والاحداث كلها تصير گبالي انسى نفسي وكل همومي

بقيت اقره .. الى ما تعبت طفيت الموبايل ونمت ثاني يوم العصر اجه عهد وماصدكت من شفته بسرعه ركضت علي حظنته وبقيت اعاتب بي وهو خطيه چان شكله تعبان كلش ..

گال اريد انام تعبان حظرتله الغرفه ودخل نام لليل يلا گعد سولفتله انو اريد اطلك من هشام وهو أيد الفكره وكال اني وياج بالي يريحج شتريدين اني بظهرج ..

طلعت من يمه وگتلها لمنى احجي ويا المحاميه لان ماردت عليه وصدك حجت وياها وهي شويه ودگت عليه بقت تستفسر مني وتاخذ معلومات گتلها يضربني ويأذيني گالت اذا اكو دليل للتعنيف اخلي يخيس بالسجن ..

بغداد : ذكرت بسرعه وگتلها ، اي اي عندي دليل اني بمره ضربني واخذت صور للضربه لان بوكتها جانت كُلش قويه وحتى طلع دم من راسي واني صورتها ودزيتها لمنى لان چنت ماگدر اطلع وهي كالتلي شسوي حتى اوگف النزيف

جنان ( المحاميه) : كُلش ممتاز اذا الصور بعدها يمج ابعثيلي ياهـم

بغداد: تمام راح ادزها ، سديته منها ودزيتلها الصور هي بقت تحجي ويايه وتفهمني اذا رفعت علي قضيه وبدليل واثباتات

جنان : صدگيني راح ياخذ عقوبه قاسيه وجزاء على افعاله القذره ..

بغداد: ان شاء الله ست كُلي امل بيج مصدگين شگد اتمنى اطلك واخلص منه لان صدك تعبت ، وشفت الويل منه

جنان : انت قضيتج بسيطه بالنسبه للديصير وللقضايا الي نواجها شي فعلاً يشيب راس الطفل منه ، التعنيف والجرائم الي دتصير بحق المرأه وداخل نطاق العائله او بيـن الزوج والزوجه العقل ميصدگه

بغداد : اي والله فعلاً منكول غير حسبي الله ونعم الوكيل ، بقيت احجي وياها واخذتنا السوالف وهي تحجيلي ع القضايا والبنات الي ديجوها يعانون من التعنيف

نص ساعه وسديته منها رحت على عهد گتله شتريد اسويلك عشى گال اني اروح اجيب جاهز من بره .. اخذ السويج واخذ ويا محمد واحسان وراحو جابو عشى واجوي كل واحد شايله علاگه مال حلويات ومكيفين ..

" باوعت على عهد كتله ليش هيج مكلف نفسك ..

عهد : ماكو كلافه ولج ذول قطعه من گلبي احبهم على حبج واكثر

بغداد: ابتسمت وگتله ، الله يخليلي ياك حبيبي انتَ

عهد : يلا روحي جهزي الاكل ترى ميت جوع ..

بغداد: صار ، رحت بس فتحت الاكل الجايبه وخليته ع الميز وهما اجوي گعدو .. تذكرت سالفه رفل گتله اكولك عهد

عهد : كولي

بغداد : حبيبي هاي البنيه الي اسمها رفل .. بعدني ممكمله وقاطعني

گال

عهد: خير شبيها خما بيها شي ؟

بغداد: باوعتله مستغربه گتله لا مبيها شي ، بس هي رادت مني اكولك شغله وجانت متردده خطيه

" اباوعله ديشرب ببسي شرگ بي وطلع من خشمه گام يگح

بغداد : اسم الله اسم الله يمعوده شجاك

حجه بصعوبه ..

عهد: احم ، شگالتلج ؟

بغداد : گالت تريدك تحاجي اخوها الصغير لان ماشي ويا شله بالمدرسه مو خوش ومديسمع منها ومتعبها

عهد : بس هيج گالت

بغداد : اي لعد شدكول ؟

عهد : هاا لا بس اسئل

بغداد: هسه شگلت

عهد: شگلت؟

بغداد: عهد شجاك ، اقصد راح تحجي ويا اخوها للبنيه خطيه معدها احد تكسب بيهم اجر ترى

عهد : ايي ايي ان شاء الله باجر عود احجي ويا ..

بغداد : ابستمت فدوه لابو گلب الطيب اعرفك ماتردني ودوم مبيض وجه اختك ..

"اجه باس راسي وگال

عهد : ليش منو عندي غيرج ..

بغداد: ابتسمت اله بحنيه ورجعنه تعشينه كل التعليله يلعب بلي ويا محمد ، واحسان يمهم بس يصفك ميعرف شنو السالفه .. بيومها نمت مرتاحه وعلى امل تبقى حياتي حلوه واخلص من كُل الشفته ..

رفل ...........

" طلعت الصبح للمحلات اروح اجيب شغلات للريوگ واتسوق للبيت ، وصلت يم ابو الاسواق اخذت الغراض و انطيته فلوس وطلعت عَ امشي واسمع  صوت واحد ورايه يصفر هو وصديقه ويحجون عليه ..

"لك باع باع شلون طيره الا بشده

"اويلي شهالجمال هذا من الصبح ، مو يگولون حليب ماكو بالسوگ لعد هذا الگيمر منين ..

رفل : بقيت ساكته وامشي منزله راسي ما رديت الهم رجع حجه واحد

" لك هاي المهجره الساكنه بالهيكل

"خرررب ، لعد ادعي الله بالكت يسويني سلة مساعدات

" اوووف ياحلوه باعي علينه شهالثگل

"دتبيع شرف براسنه عود شوفوني اني محترمه

"اموووت ع المحترمين اني اسيح واطيح ..

رفل : متحملت حجيهم وبچيت ماعرفت شسوي لگيت نفسي بس امشي سريع وابچي وهما ما بطلو بس يلحكون ورايه ، وصلت قريب ع بيت بغداد من الدموع ماعاد اشوف طريقي عثرت بحجره ووگعت طشرت الغراض بالشارع سمعت واحد يكول لثاني لك باع باع الـ... وحجه كلمة بذيئه ، گمت اريد اردعم وتفاجئت بعهد واگف گبالي .. باوع عليه مستغرب گال شبيج ؟

رفل : دنگت الم بالغراض وابجي مارديتله هو باوع للجانو واگفين
وگال وهو يباوع الهم

عهد : انتو وياها ؟

واحد منهم جاوبه ، وانت شكو ، وحده وجاي نشوف بيش سعرها نريد نتونس وياها شحشرك انت

عهد : فتح عيونه اباوع علي صار اعصاب ، لا يا ابن الكلب هاي عليمن ولك

"ع هاي الـ.... الواكف تحاميلها الظاهر مشبعتك وهيج محترك عليها لـ...

رفل : بعده ما كمل جملته وماشوف الا عهد كمز علي نومه بالكاع ونزل بي دك بوكسيات الثاني اجه على عهد من ورى وضربه قوي ندار علي عهد وصار يضرب بي بس ماعاد يسيطر كلش لان هذول اثنبن وهو واحد اني هم ماعرفت شسوي بس شالتني الغيره و جان اكو بيت دينبني جديد گمت اشيل حجار من الگاع واشمر عليهم ..

رفل : يا حقييييرين يا كلبااااء عوووفو يا حقيرين يا كلبااااء ماخليت حجره الل ما رميتها عليهم

بغداد : واگفه دا اغسل مواعين بالمطبخ وفجأه سمعت صوت وحده ، تصرخ ، طلعت اشوف شكو اباوع بعد بيبتن رفل واگفه تشمر حصو على تلاثه ديتعاركون ، ركزت زين وفتحت عيوني ، ععززززه هذا عهد ..

ركضت عليهم وگفت يم رفل اريد افتهم السالفه شنو وهاي بس تصيح يا حقيرين يا كلباء  والحصو نصه وكع براس عهد وهو يصيح كافي شمرين خرب غيرتج طلعتي دمي وهي مستمره تشمر .. اجتني الضحكه عليها بنص العركه ههي باوعت عليه بقهر

رفل : اشبييكي  رووحي رووحي ارمي عليهم من هذا الحجار راح ياذون اخوكي ..

بغداد : شسـوووي شسوووي هسه ماعرف ، بقيت افتر واصيح عهد عوفهم خلي يولون .. ذكرت بسطال هشام ركضت للبيت جبته واجيت كلت هذا واحد اذا يضربهم بي ع راسهم يموتون وابتلي هسه شسوي ..

واگفه دافكر ورفل جرته من ايدي وراحت تهف ، باوعت عليها عبالي راح تضرب احد بي تالي انطته ياه لعهد ، هااك عهد هااك بهذا موتهم موتهم لهذول الحقيرين الكلباء ..

باوع عليها مستغرب واني متت من الضحك رغم جنت خايفه كلش ع عهد بس منظر رفل جان صدك كارثه

كلما عهد يضرب واحد بيهم هي تكوم تصفك وتشجع وتصيح عفيه عهد عفيييه ..

تالي ذولاك انهزمو وهو اجه بس خطيه متربن وشصاير بي ..

رفل : ويييي عهد هذا اشنو دم ؟

عهد : لا  ڤيمتو ..

بغداد : ههههههههههه

عهد : صوووووتج بغداد احنه بالشارع شهالضحك امشن يلا طبن للبيت ..

رفل : مشيت ويا بغداد وطبيت لبيتهم هي راحت جابت ثلج وخلته علي حتى يوگف الدم وهم خلتله لزگات مال جروح ..

گتله  ، والله اني اسفه كلش لو ما اني ماصار بيك كل هذا

عهد : على شنو تتأسفين ، هما ادبسزيه ومامربيين انت شلج علاقه

بغداد : ضحكت وكتلها ، اي والله هما حقيرين وكُلباء ..

رفل : اباوعله يضم بضحكته ، گتله  اضحك ليش ضامها وضال بحسرتها 

بس گتله هيج هو طگها بضحكه وهو بغداد يضحكون عليه اني هم ضحكت لان الموقف كان يضحك وحتى استحيت لان شبعت الولد خطيه حجار ..

" بقيت شويه وگتلهم اني لازم اروح تاخرت وهسه اخوانيي ينتظروني

عهد : انتظري اجي وياج اوصلج اخاف ذول بعدهم هنا ويضوجوج

رفل : سكتت ما گلت شي وهو گام ويايه .. ودعتها لبغداد وطلعنه لبينتنه .. كل الطريق هو ساكت ماگال شي ليما وصلنه للبيت شكرت منه مره ثانيه توي اريد اطب وطلع كرم اخويه اصغر مني عمره ١٤ سنه ..

باوع عليه وگال

كرم : منو هذا ..

رفل : هذا اخو بغداد وگعت توي وهو ساعدني خطيه  ..

حجه بنبرة امر

كرم : فوتي جوه بسرعه

رفل : باوعت علي بعدم رضى وطبيت ماعجبتني نبرة صوته .. شويه واجه كال عهد يريد يحجي ويايه هسه اجي..

هزيت راسي وهو راح .. نص ساعه وطب جنت الگط تمن اجه باس راسي وگعد يعتذر مني وگالي راح يترك هذول الشله وبعد ميضوجني ..
وحتى عاتبني كال

كرم :  ليش ما گعدتيني اليوم حتى اني اجيب المسواك

رفل : حبيبي والله كن مانطاني قلبي اكعدك وشفتك مرتاح بنومتك الصبح

كرم : لا من هون وجاي انا رجال هذا البيت وكلشي تريدي انا اعملو

رفل : ابتسمت وكتله فدوه للرجال اغوح ( اروح ) ، طب هو واني بقيت بالمطبخ گلت العصر اسوي قالب كيك واوديلهم ياه هم ع الفزعه وهم ع كلام عهد ويا كرم الي غيرو ١٨٠ درجه ..

صرت احكي مع نفسي والله هالعهد بينو  شي غريب ، عبالك سوبر مان بكل مكان ع يظهر ..

صفنت بي شويه واني اتخيل ضحكته ، كن عندو غمازات بالوجنه ( بالخد ) تشبه غمازات بغداد من يضحك ، وهو هم شكلو حلو ورجولي  شهالعائله كله كيك

يلا  الله يهني حبيبتو مدري مرتو بي .. صدك هسه انا اش معرفني هو مزوج الا لا  ادعي لمرتو  فوگاها

.. لا لا يمكن مو مزوج ايي لان ماكو حلقه بايدو ، بس يعني يمكن هو عندو حساسيه من الحلقه او مايطيق يلبسه  ، زين شلون اسئل بغداد ..

لا رفل انجبي عيب اش حتقول عليه ممربيه ، انتبهت لروحي ، اني شجاني رجعت احجي ويا روحي وارزل بنفسي اسكتي واثگلي اشجاكي اتخبلتي اول مره شوفين رجال ..

حاولت اشتت تفكيري عنو بس ماقدرت كل شويه ينط بافكاري .. تالي التهيت بالشغل وكعدت اراقب الكيكه بلفرن ..

بغداد .........

رجع عهد من بيت رفل وگال حجيت ويا اخوها وفهمته وان شاء الله ميعيدها ولا يضوج اخته .. هزيت راسي وگتله انشالله خطيه هي هم وحدها الله يساعدها .. اباوع علي صفن وگال ..

عهد : اكلج بغداد ..

بغداد: كولي حبيبي

عهد : شنو رأيج برفل

بغداد : خوش بنيه ، ليش تسأل

عهد : لا هيج انسي

بغداد : لا بلا ، احجي يلا ليش دتسأل ..

عهد : بعدين تعرفين وهو ماكو شي هيج مجرد سؤال

بغداد : باوعتله بشك وگتله اي نشوف

.. للعصر اندك الباب اجت رفل جايبه قالب كيك وضلت تتشكر من عدنه وراحت ... طلع عهد من الغرفه شاف القالب گال منو جان هنا سمعت توي صوت ؟

" اي هاي رفل خطيه اجت جابت هذا الكيك وشگد تشكرت من عدنه .. ومن عندك كلش هوايه .. اباوعله ابتسم وگال

عهد : لعد هذا القالب الي .. لان اني بطل اليوم رامبو مايلحكني

بغداد : هههههه بالعافيه عليك بس عاد انطينه شويه اني اخت البطل لازم يكون ليه قطعه

"ضحك وگعد ع الميز كص قطعه اكلها وگال

عهد : اويلي شلون كيك بحياتي مماكل مثله ، عمي خلي يعزل الخاصكي وتفتح هي بداله يبووويه شلون كيك من تاكله تردلك روحك ..

بغداد : بقيت اضحك علي وگعدت اكلت ويا وصبيت عصير فعلاً الكيكه جانت طيبه ..

مرت فتره واني بقيت على تواصل ويا المحاميه جنان وصگر هم صارله خبر بالموضوع وايدني بقراري كُلش

اخذني عهد على جنان للمكتب وخلصنه كل اجرائات القضيه وكالتلي شگول للقاضي وانو احجي كلشي وما اخاف ، و بقه بس نروح نرفع قضيه علي بالمحكمه حتى يدزون اله تبليغ رسمي

جنت خايفه من هالخطوه بس قويت روحي ولازم اواجه قدري حتى اعيش ولازم اصير قويه حتى اكدر اخلص من هشام ..

"عهد گال اني راح اروح اليوم لبيتنه اُمي دازه عليه ماعرف شتريد راح وبعدين خابر كال راح ابات هنا اليوم ..

.باجر موعد روحتنه للمحكمه وهشام جان ملتحق بعد يومين يلا يجي .. اني بقيت الليل كُله ادعي ربي يسهلها الي واخلص من كل شي ..للفجر بقيت كاعده ع السجاده ادعي واقرى قرآن تالي اذن صليت الفجر ونمت ..

مر عليه حلم ماعرف شگول علي هو خير لو شر بس الاكيد اكو رساله واضحه منه ..

شفت نفسي لابسه فستان ابيض واركض بردب اظلم مثل الغابه ،عبالك جنت دا انهزم من احد

.. وفجئه وگعت بحفره وبقيت اصيح .. اباوع اجه من بعيد هشام ضحك وگال .. هاي الحفره محد راح يگدر يطلعج منها راح ضلين كل عمرج طايحه بيها ..

صرخت بكل صوتي هشاااااااام تعال طلعني من هنا بس هو ما سمعلي وراح وهو يضحك .. بقيت ابچي بالحفره وچان تتنمد الي ايد واحد ماشفت وجها ، طلعني من هاي الحفره وخله بايدي مفتاح
باوعت علي مستغربه گتله انت منو ..؟

مارد عليه بس گال بصوت جوهري .. كلمه وحده < هااانت >

" فزيت من النوم على صوت المنبه .. گعدت گلبي يرگع ومستغربه هالحلم شنو معناته .. كمت غسلت وجهي مارتاحيت فتحت الدوش وطبيت جواه ، سبحت وشويه ارتاحيت .. طلعت من الحمام نشفت شعري وبدلت ملابسي لبست ستره بيضه طويله وعليه بنطرون جنز ، لبس رسمي ومستور بنفس الوقت ..

ريگت الجهل وجنت متفقهر ويا عهد وصگر راح يجون وصگر ياخذ الجهال يوديهم لبيته بحجة اني اريد اروح ازور گبر ابويه بالنجف

بدلت لجهالي وحضرت المستمسكات اللازمه والاوراق الي راح احتاجهن .. گعدت بالمطبخ ادعي الله يعديها على خير ..

احنه گاعدين ماحس الا هشام طب علينه من الصاله  ، گمت مصدومه گتله انت هيمتا جيت اشو ما شفتك ..؟

هشام : الله يحبني وخلاني اجي ، ارتكئ على الكاونتر ورفع حاجبه گال ، بغداد تريد ترفعين قضيه طلاق عليه مو ؟؟

بغداد: استجعمت قوتي وگتله اي وهسه هم رايحه ومتگدر تمنعني لو تسويلي شي لان عهد وصگر جايين بالطريق ..

هشام : حچه بخبث ، تؤ تؤ تؤ هاي بغداد البزونه المغمضه صايره تحجي هيج .. طالعلج مخالب وصايره تخمشين .. وبعدين يا حبيبتي منو الگال اني راح امنعج ..؟

اني ما منعج بس انت الي بلسانج راح تترجيني حتى ما طلگج

بغداد : هههههه تحلم بعد ماخاف منك لو شميصير افتهمت ؟

هشام : ماشاء الله الثقه عندحج مفوله شو بلا زحمه عليج تعالي شوي للصاله اريد اشوفج شغله بس مترهم هنا گدام الاطفال .. اخاف ليروحون يتأثرون باليشيوفوه تخرب اخلاقهم ميصير  ..

بغداد: عقدت حواجبي وگتله ، شتريد ماجي وياك

هشام : لتخافين ماسويلج شي ودا اكولج ما منعج بس امشي ويايه .. ولا اكولج غيرت رأيي خلص خلص اني راح اجيبها لهنا بس انتظري ..

بغداد: بلعت ريك واباوعله طب جاب الحاسبه واجه فتحه واندار عليه كال

هشام : تعالي بسدي وشوفي بعينج شكو ، وبعدها لچ حُرية الاختيار يا تختارين روحج وتشترين الهوى وتگعدين هنا ومتفتحين طاري المحمكه بحياتج ، يا امه راح صيرين بعداد الاموات

بغداد : تقتلني ؟

هشام : ابستم بلُئم وگال ، مو اني وداعتج .. تعالي يلا شوفي ..

بغداد : تقربت منه واحاول افك شفرات كلامه واشوف شديخربط هذا .. ضغط على دگمه بالابتوب بقيت اباوع ثواني من الصدمه ماعرف شصار بيه احس شراييني جمدت ، باوعتله وعيوني تشرح كُل جرح بيه وتشرح الصدمه الي اجتاحتني من هول الشي الشفته ..

مستحييييل انت مستحييييل. هشام ممعقوله تكون بهالنذاله وهال خسه مستحيييييل وگعت على رجليه مهدود حيلي  واني اصيح بصوت يخرج من كُل جوارحي مو بس من حنجرتي ..

لااااااااااااااااااا يااااااااارب دخيييييلك ..

Next........

البارت جداً جداً طويل ، تعويض عن الانقطاع اليومين الراحو
البارت من ٥٠٠٠ كلمه يعني بحساب بارتين ..!

احتمال يكون البارت الجاي هو الاخير او البارت الي بعده وتخلصون مني بعد 💔😞..

حساب الانستا لليحب يتابعني yumna_na19

لاتنسو التصويت للروايه بضغطكم على النجمه باللون البرتقالي .. وتفاعلكم ويا الروايه يشجعني اكثر  .. ابعثوها لاصدقائكم محبين القراءه والروايات الواقعيه..

تقبلو اطيب تحياتي..

الكاتبه : يُمنا نآصر

احبـ♥️ـكم

____________________