أولا سلام عليكم ❤️
ثانيا وحشتوني يا بنات والله
والشباب( لو كان فيه) مرحبا بالعودة مجددا
دلوقتي بقى مساء الخير او صباح الخير حسب وقت قراءة البارت ( شوفتها في بوست وعجبتني الحركة دي هههه)
بادئ ذي بدأ كده هبدأ افكركم بالشخصيات ( مش الأساسية زي ادهم وأم فتحي) لا الشخصيات الفرعية اللي لو جه اسمها ممكن تكونوا نسيتوه وتهتوا
وبرضو احتياطي عشان انتوا ممكن تكونوا نسيتوا اسمي شخصيا
*الشخصيات الرئيسية *
ادهم /دكتور، حنين بارد، شديد، عصبي، طيب، بلطجي، دمه خفيف، بار بوالديه يعني بيحب ابوه وأمه ههههه بهزر هو مش بيطيق ابوه
كريم / مهندس كومبيوتر، هادي، مسالم، حنين، طيب
سليم / دكتور، سريع الغضب، جدع، عصبي، حنين
شادي / صايع ( محاسب في قهوة عوض عشان بيتقمص)، صايع، مشافش تربية، جدع، دمه خفيف
مريم / اخت سليم، هبلة، هبلة، هبلة وسع كده هبلة
شادية/ جده شادي، محترمه جدا، هادية، مسالمه، في حالها
عوض / ابو شادي، مُبتلى
شاكر / ابو كريم، اب حنين، وجار متعاون آوي، جدع
هاجر / ام كريم، لا دي مع نفسها
منه / عارضه ازياء اتعرفت على العيله والواد شادي هيوقعها، طيبه، طفولية، من بره تنكة، متكبرة بس مع اللي يجي عليها ياويله بتحرج بس بشياكة ومش بتسيب حقها الاسترونج اندبنت وومن كما يجب أن تكون
أشرقت / نيللي كريم الروايه تبقى حبيبة سليم من الطفوله، عانت كتير، واثقه دايما بالله، استرونج اندبدنت وومن
*الشخصيات اللي ممكن ننساها*
نبدأ بالبوص بتاع الرواية وبتاعنا كلنا
براءة / بنت عم عوض ( وتعتبر في مقام عمة شادي)
زين الهلالي /الحب الحب الشوق الشوق مش ليا ده لبراءة، عميل في المخابرات كده ربنا رزقه بأب حتة سكره
عزيز الهلالي / حتة السكره رجل أعمال ( ابو زين)
فرج / ابن عم شادية اللي هو العمده العيل اللي في البلد، يبقى عم براءة بالمناسبه ( بس عشان اللغبطة اعرفوا انه ابن عم شادية حاليا وحكايته مع براءة هتكون بعدين في نوفيلا براءة)
مؤنس /اللي عشمني فيه وغدر بيا اللي كنت مفكراه طيب وكيوت طلع ياما هنا وياما هناك (ابن عم ام فتحي الكبير)
شامل / حية الرواية الاكبر بعد مؤنس طبعا ( ابن عم ام فتحي الثاني)
فادي / الهفأ اللي ملوش كلمة وعايشها عربدة واكل ومرعة وقلة صنعة ( ابن عم هالي الثالث)
سارة / البت مكسورة الجناح اللي محدش معبرها في ام الرواية حتى انا بنسى انها معانا والمفروض اعملها بطل ومشاهد وكده (بنت عم ام فتحي)
سامي /ممرض بشوش مبتسم الوجه ضاحك دائما بتاع هههههههه ههههههه افتكرتوه
منال / الملخص قصدي الدكتورة اللي كانت بتعالج ادهم مابين قوسين الفخذه( كما تقول أم فتحي)
كرم / طبعا ممكن كتير ميفتكرش مين ده لانه ملوش ستين لازمه أساسا بس مش مشكله ( ابو أدهم برطمان الجدعنة)
وائل / واحد ملوش فايده (اخو ادهم من الاب)
ام علي / اللي قارفة كريم في عيشته كل شوية بمصيبه بسبب النت (بيل جيتس المستقبل)
ام احمد / ست طيبه على باب الله عندها ابن عاق اسمه احمد سافر وسابها لوحدها والشباب دايما بياخدوا بالهم منها
عبدالرحيم الزيني / ابو البت منه اللي هى حبيبة الواد شادي اللي هو حفيد شادية اللي هى أساسا ام عوض اللي هو يبقى جار الواد ادهم اللي هو اب.... كفاية كده أظن وصل هو مين ( ابو منه)
شاهي (شهيرة) / ام البت منه ومش هعرفها عشان مش بحبها الست دي
رأفت( ابن ام رأفت) / خطيب أشرقت السابق اللي معندوش دم
رحمة نبيل / دي عيلة غلبانه وعلى باب الله فمتنسوهاش في التفاعل عشان نفرح قلبها ( كاتبة الروايه دي)
*بعض الالقاب *
الثلاث شباب (كريم /سليم / شادي) :كاندي شوب
ادهم :جبنة قديمه (وفي رواية اخر) جلاش او حلويات شرقي
كريم / لولي بوب
سليم /جاتوه
شادي/ كاب كيك
شاكر (ابو كريم) / جلاكسي، حرنكش (زى ما بتقول شادية)
هاجر (ام كريم) / غزل بنات
هالي( البطلة) / ام فتحي، بجرة حلوب، ملاك، وقريبا لقب اخر.... (أصل معندناش غيرها في الرواية)
*ملخص سريع *
ادهم واحد ذليل عويل من بلاد تركيا لان امه تركية بس انضحك عليها يا حبة عيني وجات مصر وطفحت الكوته بسبب برطمان الجدعنه ( ابو أدهم) وفي الاخر جابت ادهم وماتت وبعد عذاب لادهم عند ابوه انفصل وعاش في الحاره لوحده مع صحابه طبعا وكان دايما بيتمنى يلاقي حد يشاركه حياته بس مكنش يتوقع ان الحد ده عفريته ( زى ما كان فاكر) وبعدين يكتشف ان هو بس إللي يقدر يلمسها او يسمعها او يشوفها وتحصل شوية بلاوي بينهم فيقعد ادهم مع صحابه قعده سمر( مش سمر بتاعة سراج هههه والله دمك عسل يا فواز)
ويفكروا في اسم ومن بين أسماء ربنا ملقوش أجمل ولا أرقى من ام فتحي(احترامي لام فتحي وفتحي) وتمر الايام وكل يوم ام فتحي تتغلل في حياه ادهم لحد ما بقت امر واقع واتعود عليها وهووب العفريته تختفي وبعد صياح وعياط وذكريات ومشاهد من( رد قلبي) يتفاجأ
ادهم انها في المستشفى معاه وانها واحده في غيبوبه وبعدين يبدأ البحث وراها ودي كانت مهمه اللولي بوب بتاعنا اللي كان يا حبة عيني البت مريم ( اخت سليم) مطلعه عينه ورغم كده داس على جراحه وبدأ يدور ورا ام فتحي لحد ما وصلوا لعنوان بس مطلعش هو وبعدين دور تاني وراها وهنا لقى مصايب هتوديهم لمغامرات وحقائق محدش يتوقعها
في نفس الوقت كان شادي ماشي ورا البت منه والبت منه بتزوغ من امها وتروح لشادي،،،، والواد سليم كان بيحاول يلم بلاوي البت نيلي كريم اللي بيحبها ( أشرقت) اللي ٢٥ ساعة حزينه ودمعتها على خدها،،، والواد كريم في نفس الوقت كان بيفكر مع براءة ازاى يطفشوا عريس الغفله بتاع الهبلة ( مريم)
وهنا ومع ظهور براءة نلاقي زين ظهر و كمان مؤنس ظهر ( على حقيقته) وتبدأ اللعبه تزيد تشويق لما الشباب يعرفوا أسرار كتير ابعد من الخيال
طبعا الكوميديا كانت طاغية على الحكاية مع رشة رومانسية من ادهم وأم فتحي تحت المطر وحتة رومانسي من شادي للبت منه ومحاولات شاديه انها تجمع بينهم وآخرها لما شادي لقى منه نايمه في سريره، ولحظات مريم وكريم المخطوفه وخصوصا لما مريم غنت لكريم قام المنيل على عينه انسحب من لسانه وقلها ( بحبك)، ولحظات سليم وهو بيكلم البت أشرقت ويقولها متخافيش يابت عند انا الحته دي وانا هخلصك من الواد رأفت ( السمج) وبيقوم ياخده على سطح الواد حماده وسايبه هناك لما يستوي، وكمان الرومانسية بتاعة زين باشا وبراءة
وأكيد لا ننسى منبع الرومانسية والحب ( شاكر وهاجر)
*اهم القفلات اللي هنوصلها بالبارت الجديد *
1/ احمد مطلعش عايش ده طلع ميت من فتره ومحدش يعرف كده غير ادهم بس وحاليا الشباب كمان
2/حد بعت جواب باسم أحمد انه عايز فلوس
3/ الواد كريم اكتشف حاجه مهمه آوي عن أهل ام فتحي
4/ زين بدأ يجهز لحاجه مش لطيفه
5/وأخيرا ختمنا لما الواد شامل دخل المكتب على مؤنس وقاله( لقيت هالي واخيرا)
ومن هنا سيداتي وسادتي نصل لذروة المتعة واقولكم اللي فات حمادة واللي جاى ابراهيم تآني خالص يعني كوميديا بالضعف رومانسيه واكشن وتشويق وصدمات مفاجأت بالضعف برضو
استنوا مني اول بارت بعد الغياب واللي هيكون بإذن الله بكره الساعه ٨ بتوقيت مصر 🇪🇬 وعايزة أضيف حاجه اني لسه مخلصتش امتحانات انا بس خلصت مواد التخصص وباقي ناده اخير يوم الخميس بس بلمها في يوم بإذن الله
أظن كده لميت كل حاجه عشان محدش يجي يقولي هو مين ده
وحتى ذلك الوقت اقول لكم
دمتم سالمين
رحمه نبيل