يوم جعل حياتي جحيم

آلحلقه الثانيـه

# يوم جعل حياتي جحيم

« بقلم حنين الموسوي»
 
(( البارت-2 ))

﷽ أميراتي الحلوات مو بس تقرون يرويحتي تابعوا حسابي وخلوا لايك وتعليق حلو مثل عيونكم الحلوه ❤ واحبكم هووواي قوقعات گلبي

مها : يمه يجي ابويه ونسٸله والله كريم اذا الله قاسمنه نروح

زهراء: اذا الله قاسمنه نروح نروح ( اعيب ع مها لان ضوجتني )

ام علي : ان شاءلله يمه  يله طبن جوه سولنه غده ابوجن واخوجن عله جيهم

مها:  اي يمه تدللين من هاي العين گبل هاي العين

زهراء: هسه ديله علساس راح تسوين قوزي هنه بيذنجانات وطماطه تعودنه عله الطماطات گلي اكو غيرهة يوميه نفس الشي

مها : زوزه الحمد لله والشكر لا تتبطيرن عله نعمت الله اكو ناس بحسره اللگمه تاكلهة الحمد لله شبي البيذنجان والطماطه مادام ابويه طيب وضال خيمه عله روسنه وعدنه عافيه هايهة احمدي الله عله كل حال

زهراء : ديله سوينه لگمه  متنه جوع شتغلت الفلسفه

مهااا: مو تدللين ام السان

(طبعا مها عدهة ثلاث اخوان الجبير علي عمره ٢٥ وستشهد بالحشد بسنه ٢٠١٥ والوسط عادل عمره ٢٣ هاذه جان يشتغل يٸسس كهرباء فديوم طكت عليه الكهرباء وتوفه خطيه جان خاطب ويحضر بغرفته ويطلع يشتغل علمود يلمله كم فلس ويزوج بيهن والزغير أمير الي ازغر من مها عمره ١٧ يشتغل هوه وابوه حمال بالحصه يعني يشيلون جياس طحين وتمن يعني حالتهم حيل تعبانه يادوب مطلعين لگمت عيشتهم بس همه ناس مٶمنين وقنوعين  )

مها: كمت سويت الغده... حيل نقهرت مالكيت مسواك والثلاجه فارغه بس ثنين بذنجانات سويتهن واني كلت ما اشتهي بس خل همه يتغدون اني عادي
... كملت غده واجه أبويه وأمير

ابو مهاا : هااا سلام عليكم شلونج بويه

مها :هله يبعد العافيه وأهللهة وعليكم السلام شلونك بويه

..... الحمد لله بنيتي عله الله امج وينهة

مها : فوت بويه جوه أمي اتصلي ارتاح حته تتغدون

.... ان شاءلله بويه

أمير : مرحباا ياقوم كيف الحال

مها : ياهله وكل الهله اني منيحه انته شلونك هههههه

أمير: هجم بيتج يرگه خشمج جنه شنكه وينج وين الحجي اللبناني« وضحكت»

مها: أميرررررررررررر روح منا... بعصبيه...

أمير: وجعييرررر... صوتج...

مها : يارب تزوج واخلص منك ومن مغثتك  متكابل وياي ابو الكمل الوصخ

أمير : لا متخلصين لان انوبه اطبكجن سوه انتي ومرتي واظحك عليجن للصبح...  بضحكه خبيثه....

مها : ولله مو صاحي اووف منك.......
طبعا أمير بتسامت البيت هوه الي يسوي اجواء ظحك يحشش علينه ويظحك ف من يطب امير البيت يصير سينمه عدنه وننسه هموم الدنيا المهم تغدو اهلي وكملوو صاحولي كتلهم ما اشتهي اكلت قبل شويه طبعا جذب ماماكله بس تعرفون السبب 👆المهم جعدنه نشرب جاي وفتحت أمي الموضوع

ام مها : اكلك ابو مها اليوم رحت سيرت يم ام قصي جارتنه وكالت اخوهة ابو جعفر عنده كوستر باجر يلم نسوان المنطقه ويرحون البغداد يزورون
لبو الجوادين وكالت اسجلچن انتي والبنيات شدكول انت

ابومها: ولله يا ام مها بكيفج اخذيهن وروحي هم البنيات طاكه رواحهن لا طبه و لا طلعه مثل باقي البنات هنه عمرهن ماطابات البغداد و واصلاتهة روحن توكلن كلي للمره اسجلچن

ام مها : خوش ابو مها لعد راح اگل  للمره اتسجلنه اني والبنات

زهراء : كللللللللوووووش يس يس واخيرا راح اشوف بغداد واتونس همزين راح اطبهة
قبل ما اموت

مها: خبله ولله خبله لج واحد يروح علمود يزور
لامام الكاظم عليه السلام وانتي محتاره علمود تشوفين بغداد خبال اي ولله
.... بس كلت بكلبي ( حقهة ولله  اذا احنه عمرنه وحياتنه ماشيفين بغداد بس نسمع بيهة حلوو وولايه وبيهة مناطق راقيه....  بس اني فرحتي شكبرهة راح اروح واشم عطر الضريح الله واجعد ابجي واشبع ازياره الحمد لله ياربي ) قطعت سلسله افكاري امي

....  وينجن يمه حضرن رواحجن وغسلن عبيجن وغسلن عبيتي وياجن ييمه

مها : طبعاا اني ميته من الفرح كتلهة تددلين يمه هسه وزهراء عجوزيه كالت حبابه اغسلي عباتي وياج وشالي وجواريبي وراحت تركض للحوش
اني گلت ميخالف امري لله ورحت غسلتهن ومن طلعت من الحمام شايله العبي بيدي وسمعت ابويه يحاجي امي

ابومها : اكلج ام مها لا تشيلين هم للفلوس اني ادين من اخوتي هاي المره علمود بنياتي شفتي فرحتهن شكبرهة راح امد ايدي لخوتي وهاي اول مره تدرين بي

ام مها : لاحبيبي لاتشيل هم  اني عندي افلوس الحمدلله لا تمد ايدك لخوتك مانحتاجهم

..... وانتي المگروده منيلج يا عيني اني حتى  ما انطيج اله لمين تشتريلج ثويب شو اركض بس لهاي العيشه

ام مها: اني عندي يكفينه ولله من زمان لامتهن چا انت مو تنطيني اشتري بيهن ثويب بالعيد واني اشوف مايحتاج اشتري هسه احنه وين طالعين ف لميتهن وكلت فديوم اطلع بيهن البنات واونسهن وسبحان الله اجه اليوم وحده

.... الله يرضه عنج يا ام مها ويحفظج اليه....

كام وباس راسهة
.... اني واكفه واسمع والدموع غركن عيوني يعني هاي أمي حرمت روحهة حته ثوب مامشتريه مثل النسوان علمودنه ولله عدهة ثنين دشاديش يوميه اشوفهة لاضمه ابره وخيط وتخيط بيهن... جريت حسره شكبرهة....
( طبعا اني عندي ثنين عمام بس يموتون من عدنه يكرهونه لان نسوانهم تكرهنه عمي أحمد الجبير ورای أبويه وری عمي أمجد عمي احمد شرطي وحالته زينه مزوج وعنده ٣ بنات ولد واحد زغير بناته ابتهال ونرجس وايات يموتن مني ولان احنه حالتنه تعبانه دوم يفشلني وعمي امجد عنده محل انشائيه وحالته زينه هم مزوج وعنده ٤ بنات حلا ونور وساره ورغد هم مايحبنه يتعقدن من عدنه وتلعب رواحن منه طبعا احنه ريف يعني بيت بصف بيت عمامي كلهم بصفنه بس مثل الغربه لو نموت من الجوع محد يدك بابنه..... اذكر مره رحت يم حبوبتي جاعده وي عمي الجبير أحمد حبوبتي هم ماتحبنه بس تصيحلي علمود اغسل ملابسهة وتنطيني لو ربع لو خمسميه اكول يفيدني بس لا أمي ولا أبوي يدرون هيج اسوي عبالهم اروح اجعد يمهة بس مره جاعده يمهة العصر كملت اهدومهة اجت عمتي ام نرجس مرت عمي احمد كالت

ام نرجس : اكلج حبيبتي مهاوي اليوم هم مسوين عشه لو لا

مها : اني اعرفهة خبيثه كتلهة اي عمه الحمد لله چا ليش مانسوي

ام نرجس :هااا عود كلت انطيكم هاذه الزاد من الغده احسن من ما نذبه بالزباله تاكلهة البزازين كلت تتعشون بي

مها:اني من سمعتهة هيج فارت اعصابي صرت نار طفرت كتلهة

....  اني مو بحالج سمعتي ولا بحال غداج الحمدلله مستورين روحي نضفي بيتج الخايس وشوفي طبخج ليش محد اكله خاف مو نضيف احنه الحمدلله مامحتاجين صدقه من واحد سمعتي نضفي بيتج وبعدين تعاي انطي صدقات
« طبعاً متفاجاه من روحي اول مره هيج احجي بس شو مااحس اله ضربتني وسحلتني من ايدي وذبتني با الشارع وكالت

...... بت الفكر ديري بالج ادوسين عتبت بابي بعد.

... اني كمت نكثت ملابسي من التراب واسمع حبوبتي بس تضحك وادكللهة عاشت ايدج واني ذاك يوم وهاذه يوم ابد ماطبيتلهم لان اذكرهن شلون جانن يعذبن أمي هنه وحبوبتي صح جنت ازغيره بس افهم جانن قبل لازمات عليهة حجايه كل ماشافنهة وكالن
( بت الفكر لا تجيبوهة اتجيب الفكر من بيت ابوهة ) خطيه أمي جانت بس تبجي فقيره مو مثلهن ماتعرف تلاسن ولان جان ابوهة كلش فقير عايش عله الصدقات اسوء من حالنه واني من اسمعهن اشبع بجي ) ٠٠٠٠٠٠٠

صحيت من ذكرياتي وصفنتي رجعتني وين للماضي   وشفت الملابس بعدهن بأيدي

....... مسحت دموعي وطلعت شريت الملابس خطيه علمود أمي ماتحس بيه وتنقهر امير خطيه من شاف ماعدنه مسواگ راح اسوگ وسويت عشه وتعشينه وشربنه جاي بس اني هم ما اكلت ماتعشيت ضايجه حيل عله أمي سٸلوني كتلهم متعشيه قبلكم ما اشتهي واني جذب لاغده ولا عشه بس ما اشتهي احس نفسي نسدت كل ما اذكر حچي امي

أم مها :يله يمه كومن نامن باجر وراجن كعده كون
ب ٤ الفجر احنه جاهزين

مها: ان شاءلله يمه يله زهراء كومي تصبحون عله خير

الكل: وانتي من اهل الخير

مها : ما اعرف ليش ضليت اتگلب ما اكدر انام وكأنهو بعد ما اشوف هاذه البيت بعد ما اشوف ابتسامه أمي وحنانهة وحنيت أبوي و اموري وضحكته وتحشيشه و زوزو المشاكسه وعركاتهة ضليت بس ابجي كل اليل والدموع حاره تجويني.. كوه نمت...

ام مها : يبنات كومن يمه الساعه ب ٣ ونص بدلن عله مايجي الرجال كومن يله

مها : صباح الخير يمه يا اغله ام ب الدنيه

ام مها : صباح النور يابعد امج وحضنتني

مها:  ماعرف ليش حسيت للحظه راح انحرم من هاذه الحضن وبجيت ب حرگه

ام مها : يله يمه شبيج حبيبتي كومي يله  غسلي وبدلي وجعدي اخيتج وياج

مها : اي يمه ان شاءلله

....  ام الزوز يله  كومي راح الوكت راح يعوفونه ويرحون

زهراء : شنووووووو لا لا كلليلهم خل ينتضرونه جعدت ولله

مها :  صدك ضحكت عليهة جعدت مخروعه وكفشتهة شكبرهة وتصيح.. ولله ضحكتني...

زهراء : لج تضحكين عليه اني اعلمج يمممه.. وبرطمت.

مها : يله يله كومي اشاقه وياج كمنه غسلنه و بدلنه احنه ماعدنه هواي ملابس ونلبس بالشلات والاحذيه سوه يعني عدنه شالين وثلاث احذيه نطلع بيهن وطلعنه لكينه النسوان كلهة ملتمه اجه ابو الحمله صعدنه واني الفرحه ماشايلتني اجواء حلوه وجعدت يم الجامه اباوع للشارع توه طر الفجر والهوه حلوو ضليت اباوع لمين نمت وفزيت عله صوت أمي ادكعد بيه

ام مها : يله يمه كومي وصلنه ولج مها كومي يله

مها : اني فتحت عيوني كلت الله هاي بغداد تجنن ولامام قريب علينه نزلنه نتمشه الدنيا الصبح والجو حلو وشويه بي لسعت برد بس ماهتميت لان حلوه وفرحانه حيل

زهراء : مهاوي شوفي الله شكد حلوه شوفي بنات بغداد شوفي البس..... يااااا عزه شوفي ذيج لا بسه بنطرون ولابسه جادر ياا «بتفاجأ» مجبوره ماتستر روحهة عجيب بعد ماكو خوف من الله
مها شوفي هاي حته رجليهة طالعه هاي شلون اهلهن يقبلون هيج يطلعن عزه شوفي شعرهن طالع والبس مايعرفن الحرام ذني شوا احنه نلبس ثوب وشال وعباه وأبويه يوصي لمن عباتجن زين لعد ذني شلون هيج ابوهن وين امهن وين....

مها : زهراء حبيبتي معليج ب الناس لاتخذين عرضهم اني مثلج متفاجاه بس شنسوي الحرام عليهن احنه جاين نزور ليش نخرب زيارتنه هاي غيبه حرام..

زهراء : اي ولله صحيح
بس اني امشي واتلفت متفاجاه شلون هيج لبسهن مو حرام لعد عليمن جايات يزورن

مها : دخلنه لتفتيش وام التفتيش كالت كلمن  تفتح جنطتهة اني فتحت جنطتي وضلت دفعه تجيبني ودفعه تاخذني كلش ازدحام كتل صادفت ايام زياره هم....... أمي وزهراء جدامي واني وراهن نحصرت حيل وختنكت من لازدحام... بعدين وكعت جنطتي شالتهة مره وطتنايهة
كتلهة خاله شكرا بس حسيتهة ثجيله حاجتني المره كالت
... شسمج كتلهة مهاا كالت هاا الله يخليج كالتلي انتو منين جاين كتلهة من النجف كالت عله راسي وضلت هواي تسٸل اسمي واسم ابوي. وعمري اهواي سٸلت بس حبيتهة حيل شويه عاد التهيت  ع مايخلص السره بس ارتاحيت الهة عبالي هيج مره شعبيه مثلي واني بطبعي اجتماعيه كبل اخذ وانطي وي المقابيل المهم شويه وختفت المره بعد ماشفتهة بالتفتيش  شويه وصلت لم التفتيش بطلعان الروح وهنا جانت صدمت حياتي عمري ما انساهه.........

                                  « يـتبع »