اغصان تتحرى البليل

٢٧

مساء الخير

اغصان تتحرى البليل
الجزء السابع والعشرون

شفت سعد اخو احمد ومرته كاعدين..بادن رجليه
كلت دخيلك يارب همام بامانك..
امي كاعدة يمهم وهمام كاعد بحضنها..
سلمت عليهم وكعدت..اجاني همام شبكني وحط
راسه ع جتفي..
احسه خابف منهم مدري مستغرب..بقيت امسح
ع ظهره واحجي وياهم..

مرت سعد حجت وتباوع لهمام..شوف شلون
اجه شبكج واحنا نتوسل بي ومايقبل يوصل
يمنا..
اي هو مامتعود يشوف غربا..شلونهم اطفالج؟؟
زينين هاي الصغيرة شالعة كلبي اسنان ومريضة
كلش..مو مثل همام اسنانه حلوة وهواي..

اللهم صل على محمد وال محمد..حجيت وانا
اخزرها..
رجلها جان كاعد ويتفرج..عدل قميصه وحجه..
لهفة انت متأكدة تكدرين تتحملين مسؤولية همام؟؟
باوعتله بشك..طبعا ماحاجة اتناقش بهذا الشي..همام
ابني وانا امه..

زين منين تصرفين عليه وانت طالبة وابوج
وضعه ماينعرفله..
ماكو خبر بالمنطقة ينظم..يعني ماتدرون انا
جاي اشتغل؟
ندري بس شتحصلين يعين يعيشنكم هالجم
فلس؟
الحمدلله بيهن بركة وعايشين احسن عيشة..لا فد يوم
طلبت منكم ولا من غيركم..

قبل لا يحجي ردت مرته..بعد خية تعرفين العيشة
تلهي وكلشي صاير غالي نركض ومانلحك
ع هالجهال وطلباتهم ..وهاي احنا لمينا الكدامنا
والورانا وبعنا كلشي وراح نطلع لتركيا..
اويلي من حجت هيج اجيت انجلط..توقعت جايين
ياخذون همام وياهم..جاوبتها بنتر..هو منو طلع
لتركيا وتوفق اشو كلها رجعت..

كال سعد..مو كتلها بس هي ماتقنع وشلون اخوك
طلع وعايش احسن عيشة مو مثل عيشة العراق
وماكو شغل ماكو امان وهالحطتها براسها الا
تطلع..
جاوبت امي وهي تخزرني..لا يمه طلعو طلعو
شعدكم هنا شو هناك امان وحتى ثلوج اكو
روحو الله يوفقكم..

بقيت اباوع لامي واخزر وهي منطلقة..كمل حجيه
سعد..بعد احنا صفينا امورنا هنا كلها
ونتوكل على الله ونروح..همام بامانتج انت
ربيتي ومثل امه..ابوه حاله بعد مايفيد..
ضارب عنده عصب براسه ويمكن مايعيش..
يعني هالولد يتيم ام واب ..تكسبون بي ثواب
من تربونه..

لا امه ماماتت وهو ابني ..واربي وانا الممونة
مامتفضلة عليه..وانتو الله يوفقكم ويخليكم
لجهالكم ..
مشكورة رحم الله والديج..ولو هم انت بنية وحقج
تتزوجين عود خ..قبل لا يكمل حجايته سكتته
مرته..سعدد احنا معلينا مانتدخل بحياة البنية..
يلا مابقى شي ورانا روحه لاهلي..

حجت وكامت وهو سكت وكام..اجت بوستني..يلا
ابرونا الذمة محد يدري يمكن مانلتقي بعد للابد..
اي احسنلكم ..حجيت وانا واكفة وشايلة همام..
رادت تبوسه ضم راسه بركبتي ماقبل يحاجيهم..
عمه حاول ويا ماقبل يروحله..
سلمو علينا وطلعو..وطلعنا انا وامي وراهم..

راحو واحنا دخلنا..بس فتت للهول لزمت همام
وكمت اركص ويا..وهو كام يكركر..يمكن لاول
مرة ورا وفاة هالة تصير عندي هيج فرحة واحساس
براحة..
مكابلة همام وكاعدة ع ركباتي واهز ويا واغني..
روحة بلااا ردة ماريد ترجعلي..لا عاد انفعلك ولا
عاد تنفعلي..واهز ركبة ومندمجة بالاغنية نسيت
روحي..

وكفت من حاجتني امي..ولج كافي خبلتي
الولد هههه...
يمه فرحااانة..خلصنا منهم..ماا مصدكة عود
بعد مايرجعون ولا يطالبون بي..
لا يمه مايرجعون ..ماتشوفين مرته بس فكر يلعب
بذيله خذته وسافرت..المهم خلصنا منهم ..

سكتي يمه غير من كال نريد نسافر فلت وجهي..
اي انوب اباوعلج اريدج تنتبهين ماكو ..
شمدريني عبالي ياخذو وياهم..
لا ماياخذو محد يتحمل مسؤولية..حجت بحسرة..
ماردتها تضوج لو تفكر..جريت ايدها وخليتها
بيد همام..يلاا ركصو وانا رايحة اسوي عشاا..
اليوم اشرب جاي جديد اممم...

رحت سويت العشا وكعدنا تعشينا..قررت باجر
من ارجع من الدوام اروح اتسوك لان بداية
اسبوع وماروح لريمة ..
طلعت الفلوس حسبتها..اوف منك صفوان مخلي
مبلغ قوي شكد جاي يخجلني ..
حمدت ربي ع وجوده بطريقي..وقسمت الفلوس
وعزلت منها اتسوك بي باجر ..
ونمت بيومها وماريد افكر بأي شي..الحظ الاكبر
عندي هو ضمانة همام..

يوم ثاني رحت للدوام ..اول مادخلت لاكيت
حسنين توه جاي..تقرب يمي مبتسم..
هلا باخوي لهفان شلونك..
لهفان ياظالم..ههه ع العموم هلا بيك..اليوم
هنا شعجب؟
عندي شغل وجاي اشوف ا.. شسمة..
اي شبيك تمتمت يااخي ..روح بفالك روح..

تعاي اوكفي ..شوي احاجيج..
شنو؟
انت مشتكية ع ياسر؟؟
لا عدمن اشتكي..
بس هو ع مودج ماخذي..سمعت من الولد انا..
هم عبالهم ع مودي بس هو مبتز بنية..
باوعلي بشك بس ما لح وياي..كال المهم خلصتي
منه وخل يحصل كرصة اذن بلكي يتوب..
سلم وراح..

وانا بيني وبين نفسي مايهمني منو وشنو
المهم ارتاحيت من ياسر وحتى جماعته والي
جانو مثله..بعد الصار انلصمو ومحد قلل ادبه
وياي حتى بنظره..

كملت محاضراتي وطلعت..وكفت انتظر سيارة..
منو تعبر عليه فارغة..اخر وحدة عبرت بيها كم نفر..
وكفت وصعدت..كعدت بالسرا الثاني..جان ولد ع جهة
الجامة وبنية كاعدة يمه..بس امبين يعرفون بعض..
كعدت يمهم وحطيت جنطتي بحضني..البنية باوعتلي
ورجعت دارت..

جانت تسولف وي الولدبصوت هامس..مافهم
شنو يحجون ولا حطيت بالي وياهم..
بس لفت نظري البنية تحوس ماتستقر..وانا صافنة
ليكدام وبكل هدوء..درت نظري الهم..مو طبعي
الفضول بس حوسة البنية قلقتني..شوي شوي
باوعت..نطيت عيوني ودرت بسرعة..

شبيه صابتني رجفة مادري..توترت واحس
جسمي احتر ..عبالك صايرة وياي مو وياها..
وهي هي بكل ثقة وبنص السيارة تسوي هيج
عزا..الاعظم من هذا الكراسي الكدام بيها
ولد كاعدين..اكيد شافوها او حسو بيها..

باوعت للطريق بعد هواي للبيت شلون انزل هنا؟
هي ماخذها الواهس وياه ولا كأني انا
كعدت يمهم..مدري تونسو لان انا غطيت عليهم..
واريد امنع عيوني ماتباوع ماكدر ..اباوع
واغمض بتوتر..
جانت كعدتهم واحد لاطش بالثاني كلش..ومدنكين
ويهمسون..وهو ماد ايده جوا تنورتها..
وهي رايحة بغير عالم..

تحركت طلعت صوت هم ولا يمهم..
اخر شي صحت نازل..ماهمني مو طريقي
بس ماتحملت ابقى بعد..لا اليشوفني عباله
كاعدة وياهم انوب..
نزلت ووكفت ع الشارع..انتظرت اجت سيارة
ثانية وصعدت..همزين عندي فلوس واكدر
ادفع كروتين..لو ع فلوس ابوي جان
دكيتها مشي..

وصلت للبيت لكيت امي منتظرتني لان كتلها
حتى نروح نتسوك..
شلت همام وطلعنا ..لاكانا ابن ام دعاء بالباب..
وماقبل الا هو يوصلنا للسوك..
اخذنا حاجات البيت الضرورية واشتريت لهمام
كم قطعة ملابس ..وبطلعتنا اخذتله لفة كباب حبيبي
كلش يحبه..

رجعنا قريب الغروب..امي كعدت تعزل المسواك
بالمطبخ..وانا كعدت اوكل همام اللفة مالته..شوية
وصاحت امي..لهفة راح اذب الدجاج ع النار يمه..
ايي يمه حبوبة كون تشريب والفخذ ذاايب ومالحة
وحامضة جوعاانة..
بعد كلبي تدللين..

كملت همام اللفة وكمت جاي اغسله ..اسم صوت
امي تحاجي احد..
رحت امشي وهمام يركض وراي..قبل لا اوصل للمطبخ.،
عزاا!!!اسمع صوت ابوي..!!
يحجي ويعارك امي منين متسوكة
وشنو مركبة ع الطباخ..

رجعت همام للهول ورحت دخلت للمطبخ..شافني
باوعلي بخزرة..
ها ولج شفتيني طلعت كمت تطشرين بالفلوووس؟؟
تتعشن دجاااج ..فخذذ تتعشين بفخذ ولج وانا
ماضايكة..
اي ماندري بيك تجي جان حسبنا حسابك..حجيت
باستهزاء..

لا ماريد دجاج انا..روحي جيبيلي الفلوس كلهاا..
شكد انطوج كلهن تنطينياهن..يلا كدامي
امشي..دفعني كدامه وهو يمشي وراي..
يلاا بسرعة لازم اطلع كبل لا انلزم..سمييية..
طلعيلي جوازي بسرعة مستعجل مالحك يلاا..
حجه ودفعني لغرفتي..

وكفت يم الكنتور..مانطيك ولا فلس..انت راح
تروح ومافكرت منين نعيشش؟؟
عود تشتغلين والناس منا ومنا تنطيج وتعيشين
يلااااا بسرعة استعجلييي...
مانطيهن..هذا تعبي ومانطي..وراي علاج همام
وراي علاج امي والاكل الشرب انت ماتفكر
حرام عليك يعني هم شردت وعفتنا وهسه راجع
تاخذ العدنا..

اي كملي كملي وبعد حتى مااتحسف ع الطلقة
من احطها بيج..
بلعت ريك ونطيت عيوني..كلشي اتوقع منه يسوي
وخصوصا لخاطر الفلوس..
دخلت امي بيدها جوازه..انطته اله اخذه وكلها طلعي..
سد الباب ودخل بداخل الغرفة..

عدج خمس دقايق طلعي الفلوس بارادتج لا اخذهن
على جنازتج ..بسررررررعة الناس اتانيني....
اكتلني يلا بس مانطيك..حجيت بعيطة..جرني
من ايدي ولواها..صرخت من الوجع واريد
افلتها منه ماكدر..كمت اعيط حيل عافها ودفعني
حيل..
صوتج بت الجلب لا يسمعج احددد...

تطلعيهن لو لااا؟؟؟
ماطلعهن...
ايي بسيييطة..حجه وطلع من الغرفة..ركضت
للمخدة حطيت عليها مخدة ثانية وغطيتهن
بالبطانية..
واسمع صوته وراي..طلعييهن بسرعة جلببببة..
اريد اكوم دفرني طحت ع الفراش..اباوعله لازم المسدس
بيده..وموجهه عليه..طلعيهن وين ضميتيهن؟؟

باوعت للسلاح برعب..رجعت باوعت لابوي وانا
ناطة عيوني..ماتكدر تكتلني..تدخل السجننن وتخسر
كلشييي..
لااا مااخسرر..اكلهم غسلل عااار ..اكلهم لكيت واحد
فوكها ومن كضيتهم شردد..وهي كتلتها..ساعتها
بدل مايكولون الله يرحمها يسبونج بكبرج..يلا طلعيهن
يلااا..حجه وقرب السلاح عليه..

هنا واشوف همام دخل للغرفة واجاني يركض..
صارت روحي بي خفت ابوي ياذي..حطيته
بحضني وشبكته بيديه ثنينهن..
وابوي سحب اقسام..اختاري اكتله لو اكتللج...
جسمي باد من هالحجاية..شلته وكمت بسرعة..

ضامته لصدري برعب واحجي..اخذهن كلهن
اخذذدهن بالمخدة بالمخدة اخذهن..احجي وارجف
وكلبي يطكطك وهمام كام يبجي..
ذب البطانية وطلع المخدة يدور..
نفضها نفض واخذهن كلهن..شمر المخدة عليه
وطلع ..

كعدت وحاطة همام بحضني وانحب..لحظات مرت
عليه بالويل..
اجت ببالي امي!ليش عافت همام يجيني
بس لا تخربطت..!
سكتت همام وكمت اركض..رحت لغرفتها
لكيتها طايحة بالكاع..
تقربت يمها وجهها شاحب..بلاا لووون..
تحسست نبضها ضعييف حيل..

كمت اركض ادور تلفونها..اخذته رمشت
لصفوان وانا البس..
ثواني وخابرني..جاوبته واحجي ببجي..
صصصفوان عفية امي امي تخربطت تعااال..
جايج جايج تحضررري..

حضرت لامي عبايتها ولبست وحاطة همام
بحضني وابجي..
عشر دقايق وخابر صفوان..ركضت فتحتله الباب..
دخل باسل ويباوعلي بقلق..خو مابيج شي؟؟
لا لا امي ..
دفعه صفوان ودخل..ولك خل نلحك المرة هسه..

دخلو ثنينهم شالو امي وحطوها بالسيارة
وهي متخشبة..
باسل شاف نبضها كله استعجل..وانا زاد نحيبي..
كاعدة يمها ورا وهمام بحضني ومخترع
سودة عليه..
اعصرها واعصر براسها وهي فاقدة..

لحد ماوصلنا للمستشفى واخذوها جوا..
باسل راح وياها وصفوان بقى يمي..
يحاول يفهم مني شي بس انا خوفي ع همام
من ابوي سوا بيه رجفة مااكدر اسيطر
عليها..

دموعي تنزل وحدها رغم احاول اسكتها..
حاول صفوان ياخذ همام عنده..حاجاه شوية
شوية قبل..اخذه وطلع..
وانا كعدت وانتجيت وبيه تعب الدنيا كلها..
بقيت انتظر وراسي موتني وجعه..غمضت
وبقيت اتنفس ..اريد اسيطر ع اعصابي..
ع رجفتي..

مابيها شي لا تقلقين نوبة سكر..فزيت وكمت وكفت
وي وكفتي دخت ولزمت الكرسي..
تقرب راد يلزمني ابتعدت..هزيت راسي..مابيه
شي ..امي شلونها..

لا تخافين ماعليها شر..تعاي فحصي وحللي
وضعج مو طبيعي..همام عد صفوان؟؟
ايي اخذه صفوان وطلع..
عاشت ايده..امشي وياي تعاي..
ماريد مابيه شي..حجيت وانا لهسه ماحاطة عيني
بعينه..
شلون مابيج انت جاي ترجفين لهفة لا ينهار
جسمج امشيي..

رجعت كعدت ودنكت..مابيه شي من الهبطة..
دار كعد يمي وقرب راسه مني ابتعدت بسرعة..
شبيج كلساع نازة ومنززتني وياج..ولا تندكين
هيج يهبط ضغطج ..
رفعت راسي وكعدت عدل..

فكرتي بموضوعنا؟؟
اممم..
يعني قررتي؟؟
مادري..يعنييي...مادري ..
ممتاز..حجه وهو يهز راسه..
ترى ماكتلك وافقت..حجيت ودرت عليه..
صارت عينه بعيني..خضار لونها متوسط
البياض المصطبغ بحمرة..لعب بعقلي..درت
نظري عنه بسرعة..

حجه بكل هدوء..فكري عدل وانت حرة طبعاً..
انا بصراحة..بعد الموقف الصار اخر مرة ببيتي
قررت انسحب من حياتج..وشفت ارتباطنا
غير مثمر..بس حالياً الوضع استثنائي..وانا موجود
واتمنى تقبلين ارتباطج بيه مو لخاطري..او
طلب بي مشاعر..لكن لخاطر همام..اريد
اعوض كلشي ماشفته بهمام..

ولا تفكرين خاف عبالج الناس تعيرج بيه..
ترى محد يعرف انا مو ابنهم..اليعرفون بس
الاقارب والكبار الي نصهم هسه بالفتحة
الرابعة..وذول بعد ماعدهم وكت ينافقون هه..حجه
بسخرية وكام..راد يمشي جاوبته..

مايهمني هذا الموضوع ابد..
ومثل ماكلت لخاطر همام..
رفعت راسي وحجيت..بالمناسبة..موضوع
همام تقريباً انحسم..
عمامه سافرو لتركيا..وابوه وضعه مو معروف..احتمال
يموت..

من شوكت هالحجي؟يعني جان همام حجة واهية؟؟
حجة شنو؟عمه امس اجه وكال صفينا امورنا
ونريد نسافر ..يعني مايكدرون ياخذوه..
وعمه شكو جاي لبيت مابي رجال؟؟وشنو جاي
يودع حضرته؟؟؟

كمت وكفت وحجيت بحدة..بعد البيت مابي
رجال شسوي؟ارسمله رجال ع ورقه واكعده يمي !!
وماجاي يودعني يودع ابن اخوو..او بالاحرى
يبري ذمته منه..
جاوب ببرود..حاولي لا تنترين من تحجين..
ماناترة...
همم حجه وهو يهز راسه..

عفته ومشيت..دخلت يم امي بعدها نايمة..
تقربت يمها فتحت عيونها..دنكت لايدها بستها..سلامتج
بعد عمري..
الله يسلمج يمه..حجت بلسان ثكيل..وليدج
وينه..
برا موجود لا تفكرين انت ارتاحي..
هزت راسها بتعب..عيونها كوة فاتحتهن..

ورا ساعة سمحولنا نطلعها..وكفتها اسندها..
دخل باسل وتقرب يمها..سلامات حجية..
الله يسلمك يمه..باوعتله وباوعتلي..
عم الطالبة الادرسها..حجيت بتوتر..

الله يحفظك يمه..سندها وياي طلعناها..
هي سالته..انا شايفتك يمه انت شسمك؟؟
باسل ..حجه بهدوء..طريقته بالكلام هادئة كلش..
ومن يتعصب يحجي ببرود..
الله يحفظك مدري وين شايفتك..
الارواح تتلاكى ..
ع كولك يمه..

سكتت وهو اشرلي عوفيها..ماقبلت..
مد ايده ورا ظهرها طخت بيدي ابتعدت بسرعة..
سندها ع جتفة ووصلها للسيارة..جان صفوان
منتظرنا بالسيارة لان همام نايم وخلاه بالسيارة
وبقى يمه..

فتحت الباب الورا لامي وكعدتها..باوعت لهمام
وهي تبتسم..سديتلها الباب ودرت من جهة الثانية
شلت همام ع كيفي نيمته بحضني وكعدت...
امي ماجانت منتبهة لصفوان اصلا ولا شايفته..
رفعت راسها وسلمت..اعذرني يمه ما اوچد ماسلمت
عليك..

معذورة يمه..جنج ناسيتني ..حجه واندار علينا..
استغربت امي وبقت صافنة لحظات..تالي حجت..
بعد امك وكلبها شلونك ..
نعمة نعمة ..اهم شي انت شلون صرتي؟
الحمدلله يمه..بس انا مدري دايخة مدري شبيه..
انت وعم البنية عرف؟؟

هسه نوصل ونحجي حجية..الموضوع طويل
ويراداه كعدة وحجي..وماراح تسمعين
الا اليرضيج..
بيها الخير..هزت راسها وباوعتلي..وانا احتاريت
شنو احجي ..
بقيت ساكتة لحد ماوصلنا..

فتحلها باسل الباب ونزلها..وانا شلت همام
ونزلت..
دخلنا جوا وصلها باسل للهول ..كعدها
وحط وراها مخدة..وكعد بصفها..
انا وديت همام للغرفة ورجعت..لعد صفوان
وين؟
وي حجايتي دخل..اجه صفوان..جيبيلنا ماي
وتعاي كعدي خل نحجي ..

رحت للمطبخ جاي اطلع الصينية وانتبهت
للجدر مالت الدجاج ع الطباخ ومكشوف..
همزي مطفي جان احترك البيت من طلعنا وماندري..
تقربت يمه اريد اغطي اشوفه فارغ!!معقولة
داخلة بزونة!بس باب المطبخ مسدود من اجينا!
مدري يمكن امي شالته مادري ..

اخذت الماي ودخلت ..صفوان كاعد يم
امي من الجهة الثانية..الظاهر حاجيلها
عن فيض..لان مصفنة وتهز راسها بأسف..
حطيت الصينية وكعدت..اخذ صفوان الماي
شربه كله وحطه بالصينية..يرويج من الكوثر
ان شاء الله..

عافية..حجيت واجت عيني بعين باسل
درت بسرعة..
امي باوعتلي وغمضت ..اريد انام مابيه
حيل اكعد..
كمت يمها ساعدتها تمددت وغطيتها..
رادت تحجي..كلها صفوان ارتاحيي..الدنيا
ليل وماترهم نبقى يمكم والحجي يرادله
كعدة وانت مريضة..

باجر نجي ونتفاهم. لهفة دربالج
عليها وشنو تحتاجين خابريني..
سلم ع امي وهي تعذرت منهم وماقبلت يروحون..
وهو كلها باجر نجي..
طلعو وطلعت وراهم..باسل جاي يمشي وكف واندار
عليه..
قفلي الباب ورانا والتلفون حطي يمج شيصير
خابري..مد ايده بجيبه طلع رصيد..

هاج عبي وشككي وذبي دربالج لا تذبي
بأي مكان..
طبعا اذبه قايل اذبه بالهول..
بالزبااالة لا تذبي الا تشككي..
ليش يعني ..؟
افضل..يلا مع السلامة..

دار وانضرب بصفوان ..شبيك يمعود كسرتني جنك
صبة..
جاوبه صفوان وهو لازم ضحكته..امشي
خوية امشي..مد راسه الي وحجه..دربالج ع امج
بابا انت كدها وكفو ماينخاف عليج..
ان شاء الله ..حجيت بابتسامة..

سوالي باي بيده وطلع..باسل التفت
باوعلي ونظراته اختلفت..
جر نفس وميل ركبته وحجه همس..
صيري حذرة..
هزيت راسي وسديت الباب..قفلته ودخلت
قفلت البقية..

رحت يم امي بالهول..تقربت منها مغمضة..
خليتها براحتها ماحجيت وياها..
رحت بدلت وفتحت باب غرفتي حتى اسمع
همام من يكعد..وتمددت يم امي ..
غمضت عيوني بتعب..
بشنو افكر وشلون افكر مادري..يلا كلها
تهون مادامها بيد ربي..
هدأت نفسي وغفيت..

اسمع صوت نغمة ..مدري حلم او صدك..
حاولت اركز بنومتي..ماكدرت..فزيت..
كعدت لكيت تلفون امي يدك..باوعت صفوان..
فتحت خط وجاوبت بنعس..ها ترى مابينا
شي ونايمييين..حجيت واجر حجايتي..

ممتاز..طمنتيني..
يعني مخابر نص الليييل حتى تتطمن..احجي
وشبه غافية..
اييه اريد اتطمن وكلبي يرتاح..رجعي نامي
حبيبي..
ماجاوبته وغمضت ..لان جنت اصلا بين
وعي ولا وعي.

فزيت الفجر..امي ماكو بفراشها بس همام
جاي مدحوس بحضني..
بعدته ع كيف وكمت..شفت باب الحمام مسدود..
دكيته ..يمه خو مابيج شي؟؟
لا يمه كعدت اريد اصلي..
شلونج اليوم؟؟
نعمة الحمدلله..

ارتاحيت من سمعت صوتها مابيها شي..
رحت للمطبخ خدرت جاي وطلعت بيضتين
اريد اكليهم..دخلت امي..
درت عليها وابتسمت..تعاي كعدي خل نتريك
انا جوعانة..
يلا اصلي واجيج..

حضرت البيض وكملته وصبيت جاي واخذت
الصينية ورحت الهول..
لكيتها كاعدة ع سجادتها تسبح..
لفتها وكامت ..
احت كعدت يمي واخذت استكان الجاي شربت
شوية وحطته..عاشت ايدج يمه..

بالعافية..صدك الدجاج يمكن ماخذته بزونة..
دنكت وحجت..لا ابوج تلكينه لفهن وخذاهن
ويا مايفوت هيج شي..
استغفر الله..حجيت بتنهيدة..
والنعم بالله..كله اختبار وننجح بي ان شاء الله..
ماكتيلي شلون انجمعو عم الطالبة وصاحب
اخوج؟

للحكاية بقية
بقلم شقراء(قمر كانون)

عاش ذوقج حلووو

من يمي لعبت روحي شايف مرأة لو باجة🤣🤣