اسعد الله اوقاتكم بكل خير احبتي ❤
//// البارت الرابع والعشــرون /////
#بيوت_بلا_جدران
#شمس_السعدي
اسوء حالات الحب .. هو الخوف من الفقد !!
--------------------------------------------------
في بعض الاحيان الانسان عندما يفكر بفقدان شخص والخوف من فقدانه والهلوسة الدائمة بذات الشي ..
يجعل العقل يصدق حدوث ذلك الشيئ ..
امي جانت قبل لا عدنان يقتل راضي بالخطأ .. دوم لازمة گلبها وخايفة ..
" حاسة راح يصير شي ؟؟ .. بس لا عدنان يصيرلة شي بالجيش .. خاف مايرجع بعد .. شو گلبي يگلي مصيبة راح تصير وتوگع على راسنا .. احس روحي مخنوگة .. گلبي مقبوض !!"
الى ان صاحت بيها عمة ..
" كافي رحمة لأهلج .. حتى اذا ماكو شي انتي راح تخلين المصايب تجينا بوهواسج .."
ردت امي :
" مو بيدي گلبي يگلي "
ردت عمه :
" گلبج يگلج وعقلج يصدگ لمن تصير صدگ "
وفعلا بعد ايام سمعنا خبر عدنان ومن بعدها انقلبت حياتنا رأسا على عقب ..
هالذكرى خلتني اصدگ انه فعلا الشغلة الي نفكر بيها دائما راح تصير او تتحقق ..
وخاصة بعد ماشفت سمرة وهلوساتها وخوفها من فقدان اولادها..
جانت كل يوم تگول ..
" گلبي يوجعني خاف رحيم بي شي .. لو فرج تصوب .. خاف انكتلوا .. يو تأسروا "
لمن صاحت بيها رضية ..
" شمالج مولفتلهم .. راح تگميعهم اثنينهم بهذا نگج "
وصار الجانت خايفة منه ..
بعد مااجاها خبر تأسير فرج .. جانت تبجي وتصيح
" مو گلتلجن گلبي يگلي بيهم شي .. انه گلبي علمني وانتن ماصدگتني "
بذاك اليوم ..بسرعة صار گبالي فيصل ..
جان بلا ام وهسا صار بلا ام وابو ..
كم طفل بذاك الزمن تيتم وكم زوجه ترملت .. من غير النسوان الي تأسرت ازواجهن وضلن بلا خبر عنهم ..
جان البيت كله حزين ويبجي .. وبناته كبرن ويفتهمن وحدة حضنت الثانية وتبجي..
صاحت بيهن رضية ..
" كافي لاتبجن .. باجر عگبة تخلص الحرب ويردون ان شاء الله "
صاحت سمرة ..
" وان ماردوا .. ويو كتلوه . شسوي ووين اروح ادور اعليه "
ردت رضية ..
" هو انتي الگمعتيه بنگج والبجي مالتج "
ردت منيرة ..
" يمه كافي الخاطر الله كافي .. ماتشوفين حالنا .. الراح ابو بناتي ورجلي منو الي والبناتي بعده منو النا ماتگليلي "
سمرة " الايده بالماي موش مثل الايده بالنار .. الراح وليدي بجري موش وليدها .. ماخلصت الحرب لسنين ابني شيصير بي وشيسووله "
اتنهدت رضية ..
" الله يساعد گلبي موش واحد راح اثنين راحولي واتحملت .. يمكن حالج اهون من حالي ابنج تيسر مو مات ويجي يوم يردلج سالم "
صاحت منيرة ..
" كافي كافي تتحاسبن منهو الماتلها اكثر انه رجلي رجلي راح ومااضن يرد منهو البناتي فهمني منهو "
هزت رضية ايديها ..
" اليسمعج يگول جان معيشج بگمرة وربيع "
ردت منيرة ..
" ماعيشني الي بس جان سند البناتي وظهر الهن هسا ياهو الهن "
حطاب بيومها بدل وراح المنهل يسويله حل .. غرگان ومتعلگ بگشة ..
سمرة گالتله ماترد الا وفرج وياك .. وجن السالفه بيده
هو هز راسه وراح ..
راح يتوسل بمنهل يرد ابنه اله رغم هالشي مستحيل.. وراد يعفي ابنه الثاني لايخسره ..
من يوم بدأت هالحرب والبيت مابطل حزن .. وهن لابطلن بجي ونواح ..
سمرة ماتسكت مخليه الراديو تسمع وتسب وتغلط عليهم ماخلت واحد ماسبته لا الحكومة ولا ايران وجانت تدعي عليهم الله يحرمهم من الضنا مثل ماحرموها ..
عيني على رضوان ورحمة واركان .. من حبي الهم صرت اخاف بيوم افقدهم ..
اخذت رحمة الحضني بالليل ..
وخايفه عليها اشم بيها ريحة اخوتها المااگدر احضنهم
صرت ابعد الاوهام عني .. واردد
" ولدي مابيهم شي ..العمر كله يبقون وياي ويجي يوم يعرفون انه امهم ويلتم شملنا "
گمت تالي الليل وطلعت اشرب ماي ..
شفت فيصل مقرفص وگاعد يم المطبخ ..
اتقربت عليه ..
" فيصل هذا انت "
رد :
" اي يمة اني فيصل "
من يوم الگلتله انه رضعتك وصرت اخو رحمة لان رضعتوا سوية وهو يصيحلي يمه او يريد يحس بهالكلمة من يگولها الي ..
وجان مايحجيها گدام منيرة لان تضربه اذا سمعته .
اجيت يمه ..
" شبيك ليش هيج گاعد بالضلمة "
اتنهد :
" استاگيت لأبوي عبن راح ومحد الي بعده "
رديت ..
" ليش تحجي هيج .. انت بوسط اهلك وابوك ان شاء الله يرد سالم البيته "
رد :
" منهو اهلي .. امي منيرة تدرين بيها بس تصيح عليه واخواتي هم يصيحن ومايحترمني .. ولاعبالك انه زلمة .. بس ابوي جان ياخذني وياه ويعلمني حتى اخو ماعندي "
رديت :
" اعتبرني انه امك .. مو انه الرضعتك يعني امك .. امك گبل لاتموت وصتني عليك وانت وصيتها الي .. وعندك رضوان هم بحسبة اخوك .. ورحمة اخيتك وتدري بيها تحبك مو هي اكبر منك وتحترمك بعد ليش تضوج "
رد :
" صدگ اني وصتج عليه .. هي شلون شكلها تشبهني يو لا "
ابتسمت ..
" امك جانت تحب الدنيا كلش .. مملوحة بس حلوة وعيونها وساع مثل عيونك.. تحب ابوك وتحبك .. "
سأل :
" هي شلون احترگت "
اتنهدت وذكرت ذاك اليوم ..
" جانت تخبز واحترگت "
رد :
" لو ماميته ولو جايبتلي اخوه جان هسا انه ماضليت وحيد "
رديت :
" لو گلت وحيد ازعل منك .. انت موش وحيد عندك اني ورحمة ورضوان وجدك وبيبيتك يحبوك كل احنة يمك "
رد :
" رضوان يحب علي اكثر شي ويمشي وياه انه جيف اصغر منهم مايمشوني وياهم "
سحبته الحضني وبست راسه ..
" رضوان حباب ويحبك وانه احجي وياه بس لاتضوج"
گومته ينام .
وگف بباب الغرفة مارضى يدخل ..
" لا انه انام هنا بالهول "
رديت " روح نام يم عيد هو ينام وحده "
دخلت الغرفة عيد نايم ..
فرشتله ونيمته وطلعت ..
كسر گلبي هالولد ..
رجعت للمخزن نمت…
ثاني ..
سمعت عيد يصيح ..
" انت بعد لاتخش حجرتي والله اشبعك كتل لو نمت يمي "
ردت سمرة ..
" برد شمالك وي ابن اخوك هاي بدال ما تحنون اعليه "
رد عيد ..
" حجرتي محد يخشها ماصدگت صارت الي .. يجي هالزعطوط ينام وياي .. نيميه يمج لو تردين "
هزت اديها واخذت فيصل الحضنها ..
" مالك شغل بي .. بس انت ليش مانمت يم امك واخواتك .."
باوع المنيرة وسكت ..
رد بلبل ..
" فيصل فيصل نام يمي يمي انه وحيدي انام وهم اخاف وحيدي خاف تجيني جورية جورية بالليل "
رد فيصل. .
" انه هم اخاف "
صار گبالي رضوان گعد من النوم ..
شافني ابتسم ..
رحت اله ..
" صباح الخير الشيخة گعدت ؟"
هز راسه :
" گاعدة من زمان جنها ماهي بفراشها "
سألته :
" اسويلك ريوك "
رد :
" خاف اكلفج انه اسوي "
رديت :
" مادام الشيخة مو هنا ماتتريگ ويانا ؟"
هز راسه :
" اي ان شاء الله.. بس گليلي رحمة الكسولة نايمة "
رديت :
" اي نايمة "
ابتسم :
" اروح اگعدها "
رحت بسرعة للمطبخ وجني مامصدگة .. لگيت الجبن ع حطيته والبيض .. بس للجهال مسويات من خبر فرج محد اله شهية ياكل ..
سويت ريوگ واخذته ..
شفت رحمة تغسل ..
سألتها ..
" رضوان وين ؟"
ردت :
" بالغرفة "
اشرتلها :
" نسيت الخبز امشي جيبيه "
رحت للمخزن لگيته گاعد ..
شافني گام واخذ الصينية مني خلاها بالگاع ..
اجت رحمة جابت الخبز وگعدنا ناكل .. جنت اباوعلهم وفرحانة يوم الاشوف اركان مگابلني مثلهم بنفس الصينية ومنجمعين ..
فتحت موضوع وياهم ..
" يمه تدرون فيصل يتيم وبعد ماابوه اتأسر بعد ماله احد البارحة لگيته سهران ويبجي يم المطبخ گاعد ماله مكان يلمه .. ولا عنده اخو لو اخت يلعبون وياه "
سأل رضوان :
" واخواته وين عنه "
رديت ..
" انت تعرف نضال ونهال كبرن عود ومالهن غرض بي .. انتي يرحمة هو بحسبة اخوج لين اني رضعته وياج وانت يرضوان هم احسبه اخيك والعبوا وياه .."
هز راسه ..
" انه حاسبهم كلهم اخوتي واخياتي ماافرگ بينهم .. "
رديت :
" عفية وليدي هيج اريدك حنين مثل ماتحب علي وتحسبه اخيك اريدك وي فيصل هيج "
صفن بوجهي دور هز راسه وسكت ..
بقى ياكل وهو ساكت ..
طلع من المخزن ووراه رحمة وانه شايلة الصينية ..
شافتنا رضية تخبلت ..
" شتسوي بحجرة هاي ؟"
رد :
" تريگت يمهن "
صاحت بي :
" جم مرة گتلك ماعليك بيهن ولاتوصلهن .. دور تمشي تاكل عدهن .. "
رد :
" وليش مااكل موش اوادم هن .. انه حاسب البيت كلهن امهاتي واخياتي شنهي فرگهن عنجن "
ردت :
" الفرگ هاي فصلية وخدامه موش امك انه امك وذني اخياتك .. بعمرك ماگابلتني واكلت وياي دور تاكل وياها خل تجي الشيخة واگللها اشوفنها ترضى يو لا "
رد :
" انتي ماتگليلي تعالي يمي اكل .. ليش دوم هيج تسون وياها مو عايشه ويانا بنفس الحوش "
ردت عليه :
" لاتطول السانك عليه بعد يو اكلت وشفتك داخل حجرتها اوصل الحجي للشيخة وهي التحجي وياك موش انه "
باوعلي ودنگ ..
استحى مني .. غسل بسرعة وطلع برة البيت ..
ضجت وكتمت ضوجتي بداخلي ..
تحاسبه وجنه ابنها موش ابني ..
رحمة ضاجت ورجعت للمخزن ..
كملت شغلي واجيتها ..
" شبيج گاعده وحدج "
ردت :
" هيج احسن مااريدن اشوف رضية وهي تحاسب اخوي لأن ياكل ويانا "
اتنهدت ..
" گولي يالله يمه يجي يوم ربج يفرجها علينا "
عندي امل بربي جبير .. رغم مر على وجودي بهذا السجن .. من سنة 66 وهسا احنة بسنه 82 ..
يمكن 16 سنه صارلي هنا ..
وانه اشوف ولدي يكبرون گبال عيني ..
رضوان صار عمرة 15 سنه .. جسمه جسم شاب ..
ورحمة 12 سنه .. واركان صار 8 سنوات ..
اصرت بثينة تدخله مدرسه رغم الاوضاع .. جانت تگول اريد يصير شي جبير مثل ابوه .. موش فلاح مثل رضوان وعمامه ..
دوم تقارنه برضوان واحسها تغار منه لأن الشيخة تعزه اكثر واحد وبعمر صغير سلمته كلشي ..
حتى مفاتيح القاصه الجبيرة البحجرتها ..
ودفاتر الصادر والوارد ..
من كثر الشغل حتى مااشوفة بس من يجي بالليل ومن يطلع الصبح ..
بعكس اركان الجان مدلل حيل .. وان مسه واحد يبجي وبثينة تگلب البيت ..
بس رحمة يحبها لأن من صغره تتقربله ..
وبالفترة الاخيرة بثينة ماتخليها تتگرب دوم ..
احس السنين تركض وانه مامفتهمة شي من حياتي ..
اولادي يكبرون ومايعرفون انه امهم ..
ورضوان بدأت رضية تتحكم بي وطلع ضايج خلگه من البيت ..
رضوان ..
عمري صار 15 سنه .. كبرت بس امي رضية لسا ماتحسبني جبير دومها تصارخ عليه وتحجي .. تكره ام رحمة وماتريدني احجي وياها ..
حتى الشيخة رغم احبها حيل بس تضوجني من تگلي لاتثخن لبن وي الفصلية وبتها ..
بيومها طلعت من الحوش ومشيت للشيخة بالمضيف
شافتني ابتسمت ..
" هلا بزلمتي وشيخي الصغير "
رديت بثگل :
" هلا بيج شيخة "
سألت :
" شبيك مكدر موش عوايدك "
ماسكتت هالمرة ورديت ..
" شيخة دوم اريد احجي وياج واخاف تزعلين "
عاينت عليه ..
" شنهي تريد تحجي لاتخاف لو ماعجبني اعرفنك ماتحجيه "
رديت :
" يمكنج هالمرة تزعلين بس علمتيني من صغري اصير رجال وحجايتي وحدة وماارضى عن الغلط .. وانه اشوفكم تضلمون ام رحمة ومااگدر اسكت .. عبن جنت اسكت واگولن انه بعدني صغيري ومالي شغل لجن هسا كبرت وصرت اعرف الصح من الغلط "
ردت :
" ماضالميها بس هذا استحگاگها .. عبن تدري اخوها جتل اخوك "
رديت :
" اخوها الجتل هي شني "
سألت :
" جا شنهي تريدني اخليها تاج اعله راسي ؟"
رديت :
" مو هيج الحجي بس لاتعاملوها جنها خدامة لو مالها اسم .. مايوم سمعتكم صحتولها بسمها حتى مااعرفنه شني واستحي اسألها عليه ..
ولا حتى تصيحولها بسم بتها كلها فصلية شني موش حرام الله مايحاسبنا "
ضاج خلگها من سمعت الحجي ..
" رضوان موش لين اعزنك واحسبك وليدي وبمجان ابوك تطول السانك عليه .. انه الشيخة لاتنسى موش انت التعلمني شنهي اسوي ومااسوي .. ابوك كبر ومات ومايوم حجة وياي هيج وعمامك من بعده هالتشوفهم بس يمكن انه دللتك وتريد تشيخ عليه "
كمت من مكاني ..
" السموحة يشيخة مو گصدي اطول الساني بس مااحب اشوف الظلم واسكت .. وان الحجي مالتي ضوجج انه اعتذر "
عفتها ومشيت ..
هواي شغلات اشوفهن ماتعجبني بس مااحجي واسكت
لجن ام رحمة من صغري وانه اشوفها تنهان واسكت عبن هي طيبة وماتأذي احد ..
نظراتها وخوفها عليه اكثر من خوف امي .. تحس بيه يو جوعان اكثر من امي واخواتي المايوم سألن عليه ..
اخذتني رجلي ورحت البيت عمتي حورية ..
دگيت الباب ..
طلعتلي سمرة .. مسوية اثنين گصايب وتبتسم ..
سألتها :
" هااا ام گرون وين علي "
ضاجت ..
" شني تگلي ام گرون ماعندي اسم .. علي جوة يدرس عده امتحان "
سمعت صوت عمتي ..
" منهو دمعه "
" يمه هذا رضوان يريد علي "
طلع علي شافني ضحك ..
" هلا اخوي شلونك شعجب جايني هيج وكت "
رديت :
" ضايج خلگي وجابتني رجلي الك "
رد :
" خيرك .. ياهو المضوجك .. "
رديت :
" عدك امتحان مو وكتها من تكمل نتلاگة "
صاح :
" تعال وين رايح .. عدي وكت هواي وباجر امتحاني "
اخذ قمصلته لبسها واجه وياي ..
مشينا مثل عادتنا بوسط البساتين لين ماوصلنا الساگية گعدنا يمها ..
طول الطريق ساكتين ..
سألني ..
" شنهي البيك ماتحجي ؟"
اتنهدت :
" الشيخة ؟"
سأل :
" شبيها مو عوايدك تشكي منها ؟"
رديت :
" تعرفني شكثر احبنها احسها امي وابوي .. بس عدها سوالف ماتعجبني "
- " شني ؟"
- " كلهم بالبيت يظلمون ام رحمة وانه جنت صغير ماافهم ومااگدر احجي بس هسا كبرت واعرفنهم يظلموها شلون اسكت "
- " اااه يخوي حگك رحمة مرات احجي وياها وتشكيلي بس شنهي البيدنا "
- " علي المشكله لسا يحسبوني صغير ومن احجي تكلي اخوها جتل اخوك هي شلها غرض قابل هي الكتلت وبتها شلها ذنب وهي من دمنا اختنا "
- " رضوان لاتضيج خلگك انه هم حجيت وي امي مرة تگلي مالك دخل هاي عاداتهم وتقاليدهم تبقى فصلية واسمها فصلية لحد ماتموت "
ضحكت :
" يخوي وين احنه بيا زمن .. هسا الوكت تغير والحكم تغير .. "
رد " شتغير ماتگلي اذا عمك بالحكم وكلشي بيده لاتخليني احجي رحمة لأهلك "
رديت :
" لا احجي احجي لويش تستحي انه وياك من الصغر ومتعودين ع الصراحة .. "
رد ..
" امي تحجيلي عن اهلها جانوا اگطاعيين وانه تدري بيه لو صارت شغله ببالي لازم اعرفها ..
ووصيت اعله كتب وقريت هواي عنهم.. ذولة ناس تحب تملك كلشي وتحس روحها اسياد الناس كلها والباقي خدم وحاشية جواهم "
سألته :
" يعني شني ؟"
رد :
" يعني ظلام .. مو تزعل مني .. بس من اشوف الشيخة وافعالها مااستغرب هالحجي . يمكنك ماتحس بيها لأن تحبها .. ماشفت الناس شلون تتوسل الهم وولدهم كلها تأسرت والاستشهدت وهمة مامهتمين . جندوا العالم كلها .. "
رديت :
" همة شلهم غرض هاي الدولة هيج تكول والشيخة مو بيدها ولا عمي .. اسأل ابوك "
من گلتله اسأل ابوك اتنهد ..
" يخوي هو ابوي حاسبني ابنه حتى اسألنه .. لو ماامي جان بطلني من المدرسة من زمان وشغلني حارس وياه"
بقيت وياه للظهر ..
ورجعت .. مرات احسه يفهم الدنيا اكثر مني .. يمكنه لان كمل وانه لا ..
بس هو من صغره يحب يقرأ دوم عمتي جانت توصي فرج يجيبله كتب من الولاية من يمشي ..
لو يروح وي فرج يشتري اليريده ويجي ..
جانت امنيتي اكمل واصير طبيب بيطري احب اعالج الحيوانات من صغري ..
لان ربيت وعشت وياهن ..
بس علي مو مثلي يگول اريد اصير محامي علمود ادافع عن الفلاحين والناس الفقرة ..
اليخليني متمسك بي مايحسسني بفرق عنه .. ويفرغ روحه لو شافني محتاجه ..
مرمر ..
" للظهر رجعت الشيخة بس رضوان مو وياها .."
باوعتلي اشرتلي اجي وراها ..
مشيت وانه اعرف وراها سالفة ..
دخلت نزعت شيلتها واشرتلي ..
" زيحي جواريبي اريد اتوضأ "
نزلت الرجليها ونزعتها جواريبها ..
خلت عصتها على بلعومي ..
اسمعي ولج .. " مو كبرتي واگول فشله اطگها واهينها بس يمكنج تعودتي .. كهن النسوان وحيلهن بطليها .. ماتگدرين تگليله انه امك .. بس گدامه تتمسكنين وتسوين روحج فقيرة ومظلومة .. يو شفتيه كبر وتريدن تغسلين عقله "
رديت :
" شمسوية انه "
ردت :
" سوي روحج فقيرة سوي .. اسمعي ولج بعد لو شكيتي انتي لو بتج الصفيرة ذيج اثنينجن اذبحجن ومايصبح اعليجن صبح .. الا رضوان .. ان تمرد عليه مااخليجن عايشات .. ودور ان شفتيه منا تمشين منا حجاية ماتحجين وياه سمعتي يو لا ؟"
هزيت راسي ..
دفعتني بعصتها ..
" امشي يله منا "
گمت بساع ع حيلي وطلعت گبل للمخزن ..
شفته دخل درت وجهي وماعاينت عليه اخاف يحس عليه ..
دخلت المخزن وسديت الباب وگمت ابجي ..
اجت رحمة ..
" يمه شبيج ؟"
رديت بعصبية ..
" بعد لاتشكيله كم مرة گلتلج فوتي حال رضوان ساعة السودة الگلتلج ذولة اخوتج .. صرتي تحومين تردين تگليلهم .. لمن الشيخة تذبحنا كلنا يله ترتاحين "
ردت ..
" يمه شحاجيه والله ماحاجيه شي "
سديت حلگي ..
" كافي اسكتي لاتحجين بعد .. تردين تبقين وياي بهالمخزن وتتحملين ليما الله يفرجها ظلي .. ماتردين وتعبتي مني ومليتي امشي البثينة .. لبالج مااعرف تريدج تعوفيني وترحيلها "
من سمعتني نزلن دموعها ..
اجت حضنتني وتبجي . " يمه صح بعدني صغيرة بس افتهم كلشي .. شمالي اعوف حضنج وحنانج واروحلها شمالي .. ورضوان مااشكيله بعد والله ولا احجي "
هدأت شوية ..
" اسمعي يرحمة .. الشيخة هددتني بيج وبأخوج .. وخايفه تسويلكم شي .. ماادري رضوان شني محاجيها بس هي مالها صديق .. اليعارضها تموته "
ردت ..
" شني قابل مجرمة هي "
سكتت عنها ..
" شحجي وياها وافهمها . بعدها صغيرة وخاف تزل بالحجي يم واحد ونبتلي "
گامت .
" خليج يمه .. عيونج حمر من البجي وخاف يشوفج رضوان .. انه اصب الغدا واجيبه .."
رحمة :
طلعت من الغرفه .. ورحت للمطبخ ..
جانت حمدية تصب غدا ..
شافتني. .
" وين امج شني صارت شيخة وماتصب تجي "
رديت :
" امي مالها خلگ .. "
اخذت صينية وصبيت ..
للشيخة ورضوان واخذته الهم ..
لاگاني رضوان ..
" شلونج رحمة ."
" الحمد لله زينة "
" شبيج ووين امج ؟"
" امي تصلي بالغرفة "
" المن هذا الغدا "
" الك وللشيخة "
" انه مااشتهي اخذيه بس للشيخة "
جان حجي وياه ع گد السؤال والشيخة تعاين من الشباك علينا ..
اخذته الها ..
دگيت الباب وفتت ..
جبت الطبلة قربتها يمها وخليت الصينية ..
سألتني :
" رضيوي وين ليش مااجه "
رديت :
" يگول مااشتهي "
هزت راسها :
" عبن هيج يرضيوي تاخذ من خاطرك مني "
عاينت عليه ..
"امشي صيحيه .. ولو شفتج واگفه تحجين وياه احرمج من امج واخليج وحدج هنا "
من سمعت هيج خفت .. خاف صدگ تحرمني من امي ..
رديت ..
" لا مااحجي وياه بعد والله "
مشيت بسرعه صحتها جان يتوضأ
" الشيخة تريدك " گلتله
اشرلي ..
" ماگلتيلها ما يشتهي "
رديت :
" گلتلها وگالت خل يجي "
عفته ورحت للمطبخ صبيت الي ولأمي ومشيت الها ..
گعدنا ناكل واحنة ساكتين ..
لاهي سألت ولا انه حجيت ..
رضوان ..
مشيت للشيخة..
" شنهي يرضيوي تريد تلوي ذراعي "
رديت :
" ماعاش شيخة بس انه شبعان انتي تهني "
ردت :
" يا يوم انه اكلت دونك "
رديت :
"تعودي كبرت بعد .. حتى ردت اگلج تشوفيلنا الحجرة اليم حجرة عمي منهل انه وفيصل ننام بيها "
استغربت..
" تريد تعوفني وتنام بحجرة وحدك "
هزيت راسي ..
" اي عبن كبرت "
ردت :
" وانه تعودت عليك .. اذا على رحمة وامها بعد مالي شغل بيهن "
رديت :
" لا مو علمودهن انه اريد تصير الي حجرة وحدي مثل عيد "
ردت :
" اي انطيك حجرة واجهزها الك بس فيصل شني تخليه وياك لاتنسى انت الجبير وابن شيخ وبعد عمر طويل العمك انت من بعده .. لا تخلي الناس تركبك "
رديت :
" فيصل يتيم امه ميته وابو اسير .. ثواب الي لو حسبته اخوي .. شيخة اعرفج تردين مصلحتي بس انه ماعندي اخوه واريد الملي خوان اتنومس بيهم "
هزت راسها ..
" بكيفك يرضوان بس بعدين الي حجي وياك لاعبالك انه راضية اعله سوالفك هاي .. بس مااريدن اضيج خلگك .."
عفتها ومشيت نمت بالحجرة ..
مو قصدي الوي ذراعها بس اريد احسسها انه كبرت مو ذاك الجاهل التقرأ براسه ..
صحت فيصل وگلتله دور تنام يمي فرح وجاب هدومه كلها واجه وجن مامصدگ ..
بقت هدومي وغراضي بغرفة الشيخة ماگدرت اطلعهن
مااريد اضيج خلگها اكثر شما تسوي ماانكر انه احبنها واحترمها بس تصرفاتها مرات تضوجني ..
فرشت بالگاع وفيصل يمي .. حاير كلساع يدير فراشه بمكان .. مامصدگ وساعة يگلي هذا النص الك وهذا الي ضحكني ..
" شني ولك انت تريد تدور حصص وياي .. نام لا اطلعك "
رد :
" لا لا انه اتغشمر وياك ادريك تحبني ماتطلعني "
خليت ايدي على عيوني ونمت ..
كتمت ضحكتي عنه .. مشكلته يصدگ بسرعه بالحجي مايعرف شني شقة ..
حسيت بعصايتها تدگ بالگاع وصلت يمنا وگفت تعاين
صح مااشوفها بس حسيت بأنفاسها ..
من صغري وانه نايم يمها ماعرفت امي رضية جانت الشيخة هي امي وهي ابوي ويمكن هي عشيرتي كلها
بودي اسحب ايدي واعاين عليها ..
يو اگوم واستسمحها وارجعها انام بحجرتها واسمع سوالفها توالي الليل ..
حسيت بندم جيف عفتها ..
بس يمكن بعدي عنها يخليني افكر زين .. احسها مسيطرة عليه وعلى تفكيري ..
حتى علي دوم يگلي .. هاي الافكار البالك موش افكارك هاي افكار الشيخة الزرعتهن بعقلك من صغرك ..
ساعات اضوج من يحجي هيج .. لان احس عمتي هي التزرع هالحجي بداخله جيف ماتحب الشيخة ..
جان يگلي ..
أعزل نفسك وانت تعرف افكارك الحقيقية شنو ..
سألته ..
" اگلك انه ماافهم حجيك عبن انت الكتب غسلت عقلك"
يضحك ويجاوبني ..
الأشخاص الذين يختارون العزلة
لبعض الوقت .. هم من يفكرون بطريقة صحيحة ..
فلاشيء يرمم المرء
أو يعيده إلى نفسه .. إلا نفسه ..
ضجت منه وگمت ..
" شني تضحك عليه عبن انه موش دارس "
يضحك ..
" هو شفرقي عنك .. انه وانت نفس الافكار بس كل واحد يشوفها من منظور ثاني.. ابد لاتخلي الدراسه تكون عازل بيني وبينك .. انت تعلمني وانه اعلمك مابيها شي .. واذا تريد اطيك من كتبي واقراهن يفيدنك "
اتنهدت ..
" يخوي هو عدي وكت اقرأ . فهمني بحجينا الجلفي شنهي حجيت "
رد :
" معناها انت التگدر تعالج روحك بروحك .. اعزل روحك وفكر بعقلك وراح تشوف طريقك الصحيح "
سويت مثل ماگالي وعزلت روحي ..
بس ماگدرت افكر ..
احس جاي اظلمها للشيخة . احرمها مني ..
وانه الماارضى بالظلم شلون اظلمها هيج ..
سحبت ايدي عن وجهي ..
شفتها ماهي ماشية ..
بقيت اتگلب بمكاني الى نمت ..
مرمر ..
ورى الغدا كمت كفيت المطبخ .. عفت رحمة نايمة ..
البيت هادئ .. ردت اشتت عقلي وماافكر ..
سمعت طگطگة ..
طلعت لگيت اركان صاعد فوگ الطابوگه ويلعب بماي الحب ..
رحت اله ..
" لا يمه مو هيج حبيبي مايصير "
رد عليه ..
" ولي انتي مالج شغل "
انقهرت من سمعته هيج يگول ..
شلته .. من الحب وحضنته ..
شميته وهمست ..
" مايصير يعمري مايصير تلعب بالماي "
ماحسيت الا ضربني بوجهي ويصيح ..
" ولي عني ولي .. يمه يمه "
اجت بثينة تركض ..
" شسويتيلة ؟"
رديت بأستغراب ..
" ماسويتله .. جان يلعب بالحب وخرته "
ردت :
" كم مرة گلتلج مالج شغل بي "
قربته الها ..
" تعال يمه شسوتلك ضربتك ؟"
رد :
" لا انه بسطيتها "
ردت بضحك ..
" عفيه حبيبي "
بقيت واگفه مصدومة ..
" شلون تعلم الطفل وعليمن عليه .. انه امه .. اذا صغير هيج يسوي لو كبر شراح يسوي ؟"
رجلي بعد ماتشيلني ..
جنت دوم اعاين عليه من بعيد البعيد .. من يروح للمدرسة ويرجع افرح واضل انتضرة لمن يرجع واشوفه رجع سالم .. تالي يضربني وهي تشجعه ..
ماانقهرت ع الصارلي بكثر ماانقهرت على سوايت اركان بيه ..
طول اليوم انه شادة راسي من الوجع .. وكلما اشوفه اتذكر ضربته الي ..
لا بيه احجي ولابيه تشكي.. ضليت ساكته ..
منهل وحطاب ورحيم رجعوا للبيت ..
تلگتهم سمرة ..
" هااا بشرة مالگيتوا ابني "
رد منهل ..
" شني ابنج ضايع ونلگاه اخذوه الغير دولة وسجنوه هناك وين نلگاه "
اتهسترت سمرة من سمعت وضلت تدعي وتصيح ..
" الله لاينطيكم ضيعتوا ابني عسا اشوف بيكم يوم يربحة انتي وابنج .. "
صم حلگها حطاب ودخلها ..
والشيخة غضبت من سمعت دعاويها ..
صاحت حطاب ..
" مرتك عذرتها وگلت من حرگتها على ابنها بس احنه شلنا دخل بالصارله هاي الشباب كلها تيسرت شنهي بيدنا .. سمرة بعد مالها گعده بحوشي . ياتطلگها ياتمشي لأهلها .. "
رد حطاب ..
" وين تروح .. تدريها يتيمة ومالها احد واخواتها كلهن معرسات "
ردت :
" مالي شغل انه مااريدها بالحوش على طولت السانها "
رد :
" سامحيها شيخة هالمرة الخاطري وان ماگدرتي انه اخذها وامشي من الحوش كله "
من سمعت حجيه ترددت ..
وخافت يمشي العمامه ويتمرد عليها ..
ردت ..
" انت وليدي يحطاب وبحسبة منهل وموحان عندي وموش هين عليه تهد الحوش وتمشي .. والخاطرك راح اسامحنها بس خلها تكض السانها "
الشيخة مستحيل تخلي حطاب يعوفها .. لان شايل عنها هواي حمل .. ومنهل مو يمها دوم ..
وهو سبب گربها من عمامة والصلح بينهم لأنهم يعزون حطاب ويحترموه ..
سمرة بقت تبجي وتون يوم يومين اسبوع اسبوع شهر شهرين لمن انهد حيلها ونشفن دموعها ..
سكتت بس ضلت عينها على الباب كلما انفتحت وصاحت ..
" هذا فرج اجه "
وتالي تخيب امالها وتسكت ..
رحيم بعد الصار عمه غير مكانه خلاه يمه حتى مايصيرلة شي ويلوموه مثل مالاموه بفرج ..
بس هم كلما يروح سمرة تبجي وتتوسل بي يبقى ومايمشي ..
وحمدية جان كل همها تحبل حتى تجيب ولد وسند ثاني الها خاف رحيم يصيرله شي ..
هذا جان تفكيرها ..
من سمعتها تحجي وي امها ماصدگت .. معقولة تفكر بالجهال اكثر من رجلها ..
وجانت تريد من امها تجيبلها حبوبة تفحصها لو تاخذها للولاية الدكتورة تشوفها ليش صارلها كم سنة وماكو حمل ..
رغم رحيم يطول يله يجي بس من يجي ينام ويريد يرتاح وهي تتعارك وياه تكله ماتهتم بيه وماتريدني بعد خاف شايفلك وحدة هناك وتريدها ..
اخذ مخدته وطلع من غرفتها ..
" يم عقلين هو اني رايح اتونس ولج ذابين ارواحنا بنص الموت ولو ماعمي ماشفتي خلقتي .. ومن اجي ارتاح انتي تنكدين عليه .. دور مااجي اضل هناك احسن الي "
حمدية ماخلت واحد ماشكتله وفضحت رجلها .. اخر شي راحت السمرة وگالتلها ..
" ابنج موش رجال مايرضى يتگربلي "
وسمرة تخبلت كل ضنها مسويله سحر لو مريض ..
وصت على وحدة اجت تقرأ بالبيت وانطتها ماي گالتلها رشي .. وهذا الماي شربيه منه ..
بثينة من شافتهن راحت گالت للشيخة والشيخة گالت الرحيم مرتك وامك سون سحر الك ..
وهو تخبل عليها وحط حمدية شبعها ضرب .. وهي صارت تعيره بعجزه وهو يزيد عليها بالضرب لمن وگعت ساكته كل نفس مابيها ..
#يتبع…… ..
#شمس_السعدي