مساء الورد احبتي ❤
//// البارت إحدى وعشــرون /////
#بيوت_بلا_جدران
#شمس_السعدي
الى اين الرحيل !!
كم مرة ستأخذنا الحياة الى الانين ..
مازال صوت العندليب في اذني يشدو الحنين ..
ومازالت الذكريات تسليني وتنسيني الم السنين ..
فإلى اين الرحيل ..
لاتتركوني وحيدة في عالم لايعرف سوى كـسر الخواطر !!
_____________________________________
تايهــة وحايرة مااعرف شسوي ..
اول مرة اشوف منهل هيج .. حسيت كلامه مايدل على خير ..
خفت يكتل عدنان لو لگاه ..
اتمنيت تاخذه امي وتروح .. الشيخة جانت نظراتها الي غريبة ..
جنت بس ابجي مابيدي شي اسويه غير ادعي ..
رضية كامت تدعي وتحجي عليه لان الشيخة خربت الحنة وطلعت الوادم ..
" شني يطرگاعة مانخلص من سوالفج كل يوم طالعتلنا بسالفة "
ردت منيرة :
" بلوة وطاحت اعلة راسنا انه ادري الشيخة المن مخليتها هنا لو طاردتها ورى امها ومخلصتنا منها "
ردت بثينة :
" وين تطردها وهي حبلة بفرخ منهل عودن خلي تجيب وتولي انه هم مااريدها بالحوش بعد "
گامت على حيلها ..
" امشي اشوفن منهل شناوي بلكن يخلصنا منها ومن اهلها "
اجت سمرة كملتها ..
" يمة يمة من السكوتي موتي ومن المطگطگ فوتي "
عبنج طلعتي داهية شوكت فكرتي شوكت قررتي تجيبين امج "
رديت :
" انتن كلجن امهات تعرف شنو ام ماشايفة بنتها سنين تعرفن ام محروگ گلبها على بنتها وماتگدر توصلها "
سألت رضية :
" جا تجي بالبوگات "
سألتها :
" لو اجت ودگت الباب تخلوها ؟؟"
سكتن ماحجن ..
گمت اخذت رحمة وفتت للمخزن ..
صار وكت الغروب وبالي يمهم .. خايفة حيل لا يسوولهم شي ..
صليت ودعيت كون راحوا..
طول الليل مانمت افكر بيهم .. عشيت رحمة ونيمتها بس اني لا اكلت ولانمت .. احس هالليل مو الي ولا مقسوملي ارتاح بي ..
صار الفجر واجه ببالي عدنان .. مااظن يجي وبهذا الوضع..
بس مااعرف ليش گومتني رجليه اشوف مكانه ..
فتحت الباب وصرت اباوع منا ومنا ..
خفت لايگعدون ..
مشيت توضيت واخذتني رجلي الورى البيت .. المكان الي لاگيت بي مهران اخر مرة ..
مشيت وجنت متأملة اشوفه.. رغم خوفي عليه ومااريد يجيه بس روحي تتمنى شوفته ..
وصلت مالگيت احد .. بقيت واگفه الحد مابردت ومشيت .
سمعت صوت يهمس من ورى الحايط ..
" مرمر مرمر اني عدنان "
غمضت عيني وصارت تبجي ..
هذا صوته اي صوته ..
ابو گلب الحنين صوته ..
ادري بي لو وعد مايعوف وعده لو للموت ..
مادام گلت خلي يجي معناتها يجي ..
التفتت بشهگة واشرتله يطفر لايشوفوه ..
طفر ..
جان كبران والتعب مبين بوجهة..
ماحجينا بس بجينا ..
ركضت ذبيت روحي بحضنه وذبيت كل حملي وتعبي وقهر ذيج السنين ..
هو يبجي واني ابجي ..
رد ..
" ااااااااه يمرمر ماجنت مصدگ راح اشوفنج بعد "
رديت :
" اااااه يعدنان جن شفت بيك اخوي وابوي وكل هلي وين رحتوا عني وضيعتوني "
رد :
" افه عليج يبنت امي وابوي انه اضيعج بس ذولة مو خوش ناس مو اوادم لو تدرين شسوو بيه وبأهلي حرمونا حتى من وضايفنا دمرونا .. لو ودهم يگطعون النفس عنا "
هو يحجي واني اتلمس وجهة واريد احفظ ملامحه
" بعد امي وابوية انت .. ديروا بالكم على روحكم منهل ناوي ع الشر اخذ امي وروح بسرعه لأخواتي مالهن غيركم "
اتنهد " همة البارحة اجو البيت خاجية يدورون هي عرفتهم اول مااجت امي ومن الركض متخربطة وطاحت عليه .. گالت خاجية اطلعوا منا الشيخة راح تعرف انه الجبيتكم وتلزمكم .. وصدك دزتنا عند گرايبها"
اتنهدت :
" الله يطيها خاجية سوت المحد يسويه منهم .. جنت حاسة الشيخة شكت بخاجية بس رادت توهمنا وكالت لا مو هي "
ابتسم ورجعي حضني حيل .
" صايرة بطة شني حامل.. هذا ياطفل والمن تحبلين الذولة المايخافون الله . امي گالت عندج بنت جيبيها وخلينا نمشي وخليهم يدورون لمن يملون "
رديت بحسرة :
" خوية شاخذ وشعوف . ولدي مو بسمي ولو هجيت يوم يومين سنة سنتين يلگوني ماتعرف منهل سمعت يشتغل بالدولة ويضيعنا كلنا لو رحت .. خليني بقسمتي وحظي بلكي الله يحلها بيوم من يمه "
رد " اول مرة احس روحي عاجز.. كسروني تكسر وماعفتج وجنت اعاند واجي واعرف اخبارج اني ومهران "
من سمعت اسم مهران اتنهدت ..
" مهران صدگ سافر ؟"
هز راسه :
" مهران مااتحمل تمرض عاف اخوه وامه وهج بليلة ويوم .. وعمتي تريد تموت عليه "
بجيت :
" عود گلتله انساني ليش مانساني "
رد :
" شينسى ماتگليلي اذا هو بكل يوم يموت الف موته ويگول احنة مو زلم انگطعت زهرة من وسطنا وماحجينا ولا رجعناها "
رديت :
" شتحجون يخوي شتحجون هي هاي الناس يفيد وياها الحجي اذا جنت قبل الوم ابوي حتى ابوي هسا ماالومه هاي قسمتي وحظي من الدنيا "
لزم وجهي بأثنين اديه ..
" شوكت كبرتي مرمر .. جانت امنيتي اشوف جهالج اكيد انت هسا احلى واحن ام "
هزيت راسي وابتسمت وكتمت حسرتي بداخلي ..
" لو تشوف رضوان عبالك انت وگاعد كلما يكبر يشبهك حتى بحنيته عليه "
ضحك :
" الله يعوضج بي ويخلي عزوة الج "
رديت بحسرة ..
" يارب "
استغرب :
" شنو شو بيها حسرة ؟"
رديت :
" لاتشيل همي خوية انه بخير وتعودت عليهم المهم انت وامي امشوا لأخواتي لاتخلوهن بوحدهن .. الشمس بدأت تطلع وهاي وكت گعدتهم مااريدهم يشوفوك ويأذوك "
رجع حضني وباسني حضنته بأثنين اديه وماردت اعوفه اول مرة احس بهيج امان من زمان ..
تذكرت حجي منهل وسألته :
" هم راح اشوفك بعد .. هم يجي واشوف اخواتي واخوي الصغير "
رد :
" ان شاء الله يجي يوم وننجمع مثل قبل "
ابتسمت :
" ان شاء الله بس دير بالك على روحك البارحة حجي منهل مايطمن "
رد " لاتخافين علينا ديري بالج على روحج وكلشي يصير خبري خاجيه اني راح اتواصل وياها بين فترة وفترة "
ودعته الاخر مرة وراح .. كلما يريد يعبر الحايط ..
يرجع يحضني ويبوسني ويمشي ..
هو راح واني گعدت ذبيت روحي بالگاع وابجي گمت اشهگ وابجي بصوت مااگدر احجي بس احس البجي يريحني ..
سمعت صوت رجلين تمشي ..
رحت بسرعة للمطبخ ..
سويت روحي اترس الكتلي ..
دخلت سمرة لابسة نعال حطاب وتجر بي وهو اضخم منها هي قصيرة ..
شافتني ..
" شني لسا مامسوية جاي "
رديت " هسا جاي اسوي "
اتقربت مني " شني تبجين بدال ماتكولين ياالله دوم تولولين جايبتلنا الفگر "
خليتها تحجي ..
حملت الريوگ .. اخذتها وصلت للباب دارت وجهها ..
" اعجني علمود اخبز بعد شوية "
سويت ريوگ للشيخة واخذته ..
سمعت منهل يمها يريد يطلع ..
" يله شيخة اني رايح احتمال اتأخر للظهر لازم افضها الهاي السالفة "
لزمت گلبي بيدي .. بس لايقصد اهلي خاف شو شيسويلهم ؟؟
ردت عليه " لا تتاخر يمه عبن اليوم عرس بت اخوك وانت عمها وابوها وشيخها اللزوم تسلمها بيدك "
رد " ان شاء الله يمه ان شاء الله "
طلع شافني گباله ..
خنزر وراح .. لو بيده يموتني بس يمكن البطني شفعلي
دخلت للشيخة خليت الصينية ..
وردت احجي وياها ..
باوعتلي ..
" شمالج تنرحنتي شني تردين تتريگين وياي "
رديت :
" شيخة ادري بيج ماتحبيني ولا ترديني بس انه راضية شتسويلي سويلي اهلي مالهم ذنب امي اشتاقتلي واجت تشوفني .. انتي ماتشتاقين المهجة ؟؟"
صاحت بيه :
" شنهي تگارنين روحج بمهجة ؟؟ وهسا انه شايفتها لبنيتي ؟؟ مو هاي جدامج صار عدها اثنين بنات فوگ الوليد وماشفتها ولارحت "
رديت :
" بس لو تردين رحتي محد يمنعج .. امي ماتجي من خوفها وشفتوا شسويتوا من عرفتوا "
ردت :
" سوينا لان اجت مثل الحرامية تتختل موش مثل الاوادم "
سألتها :
" لو اجت بعلمكم ترضون ؟"
ردت :
" شني انتي جنة بيت وتجي تشوفج .. خاف نسيتي انتي فصلية ومن جابج ابوج وشمرج علينا شرطنا اعليه مالهم دخل بيج ولايجون يشوفوج وجن متي .. وهو رضا بعد شني ؟"
رديت :
" الشرطتوا عليه مات وراح الدار حقه بعد امي شذنبها"
ردت بعصبية :
" اكلج لجن هواي طولت خلگ وياج حتى الجاي برد لابيض الله وجج امشي عني كافي وبعد لاتطولين هاللسان "
عفتها ودرت وجهي وطلعت ادري الحجي وياها ضايع
صاحت وراي :
التفتت :
" شوفي لو تردين اخليج تشوفين امج ادور اخليها تجي بس هي وشوكت ماتريد تشوفج بس كون تگليلي شغلة "
صح مااصدگها بس ماانكر فرحت من سمعت حجايتها
سألتها :
" شنو الشغلة ؟"
ردت " تگليلي منهو ساعدها تدخل حوشي ؟"
اتذكرت عدنان من گال فتشت بيت خاجية ..
وبعدين منهل ماادري شناوي عليهم فمستحيل يخلوها تجي وشوكت ماتريد تشوفني ..
رديت " ماادري من شفت امي گبالي نسيت حتى روحي وماهمني منو الدخلها المهم شفتها "
هزت براسها وبيديها ..
" بكيفج بعد انه سهلتلج الوضع وخاف تگولين ظالميني ومايخلون امي تجيني عبن انتي جزحتي نعمتج بيدج"
عفتها وطلعت ..
ادري بيها تجذب عليه علمود اگلها منو بس مااخليها تأذي خاجية ولا راح اجيب اسمها بيوم ..
عجنت وكملت ورحت اخذت ساعه نمت يم رحمة حتى صلاة الفجر نسيتها من شفت عدنان ..
نايمة انفتحت الباب ..
دخلت بثينة…
" گومي يمسعدة .."
گمت ..
" شني شو نايمة الفرخ بي شي "
رديت :
" لا بس بالليل مانمت زين ونعسانه "
ردت :
" وليش نايمة عيني السهر موش زين للطفل شني ترديه يجي مريض .. يله كافي گومي تريگي واشربي حليب "
صفنت بوجهها ..
" معقولة هاي من عقلها هيج تخاف على ابني البطني وعبالك ابنها "
گمت عنها ورحمة كامت وياي من الصوت ..
اخذتها نتريگ ..
جانت اكو نسوان ورى البيت جايبيهن يطبخن ..
جانت سمرة توها مخلصه خبز دخلت تعبانه ..
" هاج لمي الخبز موش يبيس "
ردت رضية ..
" سمعت بثينة تريد تجيب وحدة تخدمها تكول بعد يومين عندي طفل ويرادلة رعاية "
ضحكت سمرة :
" هاي هم مصدگة بروحها عايشة الدور وجن هي الحبلة لو بيدها تشيل الفرخ من بطن هاي وتخليه ببطنها "
ردت رضية :
" غير الشيخة خلت براسها حجي وهي منهل وكبروا راسها وجن الفرخ الها ويصيرلها عزوة وسند "
ردت سمرة :
" الا انت ماعرفتي تحوين رضيوي وتخليه عزوة وسند الج "
ردت رضية :
" برة برة شمالي اربي ابن الفصلية هو كل يوم يجيني ويبوسني ويريد يتگربلي بس انه تجز روحي منه "
اباوعلهن يحجن على ابني واموت قهر ..
بيا ملة وبيا دين هيج يصير .. امه تنحرم من ضناها وهو يروح يستجدي الحنان من وحدة مو امه ولاتريده
ردت رضية :
" يوووو هسا انتي وين اخذتينا بالحجي .. راح الوكت وانه مامكملة صرر ملكية عبن يجون بتلاثة ياخذوها "
ردت سمرة :
" حگج والله نسينا اليوم عرسها المگرودة ولا تهنت بحنتها امس .."
گامت رضية بعد ماهدرت التمن :
" خلي عينج على الجدور خلي اشوفن شوكت تجي المرة تصنعها وتحمرها .. "
كلهن التهن بالعرس والتهن يبدلن ويعدلن ..
اجت المرة تسوي ملكية وتعدلها ..
حتى الغدا نسنه .. اجه بلبل ..
التهينا انه والنسوان الجايبيهن يطبخن نصب الاكل .. صبينا صواني تمن وفوكهن مرگ ولحم وعليهن خبز اخذهن للمضيف للزلم ..
النسوان كلهن التمن بالبيت ..
دور صبيت الهن وانه گاعده والنسوان يعاونني ومن شافني حامل ماخلني اگوم شكو شغل اگضيه وانه كاعدة ..
صبيت الرحمة اوكلها وهي فرحانه وتصيح " نعم نعم " عود تقصد لحم .. تحب اللحم وبالعزايم والمناسبات فرصتي اوكلها لان بالايام العادية يصبن الاكل كله يادوب يخللي تمن وشويه مركة اوكلها ..
جانت الشيخة تفتر بالبيت واحسها تراقبني وبثينة هم كل شوية تجي تشوفني .. انه ضليت بالمطبخ اصب شربت وهن ياخذن ..
ورحمة ساعة تروح يمهن وفرحانة وساعه تجي يمي ..
سمعت صوت الجهال وهن يصيحن ..
" اجو اجو "
الشيخة ضاجت لان منهل اتاخر ومااجه..
دخلن نسوان يرگصن بالوسط ..
وحدة منهن گالوا مرته استغربت .. مرته وترگص بعرسه
دخلن بناته وجانن كبار حتى اكبر من ملكية ..
اخذنها وراحن ..
الشيخة طلعت وراها ورضية وسمرة راحن وياها لهناك
صفا البيت علينا جانن منيرة وحمدية يبجن على فراگ اختهن اليشوفهن يگول بعد مايتشاوفن ..
وبثينة راحت الغرفتها ..
العشا ماسوينا زاد اكل هواي من الغدا ولحم ..
رحمة من تنعس تضل تبجي ومااريدها تنام المغرب ضليت ملهيتها والاعبها ورضوان وياها يلعب لين صار الليل ..
كملت صلاة عشيتها ونيمتها ..
طلعت شفت منهل اجه ..
تلگته بثينة ..
" اتأخرت وين صرت الشيخة گامت تحجي "
رد " جا هي بغداد ورى الحوش قابل "
طلعت الشيخة " هيج يمنهل هذا اعتمادي اعليك "
رد " السموحة يشيخة تدرين الدرب بعيد وبغداد موش گريبة "
هزت راسها بعدم رضا :
" وشسويت ؟"
رد " هاهي اعتبريهم راحوا وهم وشكو واحد مثلهم مايجي من الاكراد بس الهم "
گلبي وجعني من حجة هيج ..
" وي راحوا وشسوالهم ؟"
لابية اطلع واسأل ولابية اسكت واگعد وجن ماسمعت
مااتحملت ضلين الوب وحدي كون اعرف شبيهم بس منين اعرف ومنو اليورجني على سرهم ..
مدري شلون نمت وغمضت عيني تعب النهار ومانايمة الليلة الفاتت .. خلتني انام ..
حلمت بأمي تودعني وانطتني ولد بحضني وراحت .. واني اصيح وراها دارت وجههة وراحت ماالتفتت بعد عليه ..
گعدت وي الاذان الفجر مرعوبة ..
وين راحت امي ؟؟ وليش ودعتني ؟؟
معقولة بعد مااشوفها حتى ماحضنتها وشبعت منها ..
ااااه يربي لاتحرمني من هلي ولايصيبهم شي ابعد عنهم كل مكروه واذية بني ادم واولهم منهل ..
گاعدة اصلي وادعي ..
صليت مافاتني البارحة ..
ورديت نمت .. كلما اتقدم بشهوري اتعب اكثر ..
اتلمست بطني كام يدفر يمكنه جاع .. احساسي جان بيه ولد وبعد حلم امي اتأكدت هو ولد ..
بس معقولة الطفل الخلته امي بحضني هو نفسه البطني لو تقصد واحد ثاني ..
نمت ماگعدت للصبح على صوت بثينة مثل عادتها ..
فزيت عبالي تگعدني ..
لگيت المخزن فارغ ..
لفيت راسي بالعصابه وطلعت ..
جانت بثينة ووياها وحدة تسولف وهاي الوحدة عدها طفل شايلته ..
" اسمعي انه عفت السلف كله ومااخذت منهن وحدة ترهملي واهم شي مو تسولف هواي وتطلع اسرارنا ..
انت راح تشتغلين عندي ليما اجيب .. ومن اجيب انت ترضعيه اني ماارضع .."
المرة جانت تباوع البطنها ومستغربة ..
رضية وسمرة واكفات ماعجبهن الوضع .. لان هي عدها وحدة تشتغل عدها وهن لا ..
طلعت الشيخة…
" بثينة جبتها حتى تشوفيها موش من هسا تشتغل .. خليها لمن تجيبين يله تجي "
ردت بثينة :
" اريدنها تتعود اعله طبعي موش بعدين اظل اعلم والفرخ بحضني "
ردت رضية :
" اي يشيخة شنهي بثينة فوگ راسها ريشة وعدها من يخدمها واحنه نخدم ونطبخلها "
ردت الشيخة :
" تدرن بيه مااخشش بعد وحدة الحوشي وتسوي بيه مثل ماسوت فهيمة .. جبتها بعدها عروس الحوشي وامنت بيها وتالي غدرت بيه هي وبتها .. من باجر اترس الحوش وصايف بس تدرن بيه مااحب احد يتجسس اعله بيتي .. وانتن مامكلفتجن بشي ثجيل عبن بعزايمنا وافراحنا واحزانا اجيب اليخدمجن وانتن مرتاحات بعد شتردن .. هالمرة هاي للفرخ الجاي عليها موش البثينة .. وهم وياجن تعاونجن هي وذيج "
وتأشر عليه ..
مدري اضحك مدري ابجي على سخرية القدر ..
ابني ووبطني وهن يجيبله وحدة ترضعه وهالوحدة خلتلها غرفة هي وابنها احسن من المخزن العايشة بي .. وبصف غرفة بثينة ..
لو بثينة التگلها من اجيب .. شتجيب وابن منو ؟؟
جنت ماراضية على رضية طلعت ارحم بهواي منها ..
عفتهن ومشيت للمطبخ ..
سويت ريوگ ..
اجت وراي وشايله ابنها ..
" شني انت هم تشتغلين هنا ؟"
سكتت ..
سألت " لا جنج مرت واحد من ولد الشيوخ عبن حبلة "
سألتها " انت منا من السلف ؟"
ردت " لا انه موش منا من قرية…… جابتني الشيخة ابوي من زمان جان يشتغل عد ابوها من هو صغير لحد ماكبر وهي گالتله اريد وحدة امينة وهو طرشلي "
سالتها :
" وشلون تعوفين اهلج ورجلج وتجين "
ردت :
" شسوي العيشة تريد والشيخة گالتلي تجيب رجلي هنا حارس تخليه عدها وهيج مانفترگ "
عرفتها مو منا لو منا جان عرفت انه فصلية لان ماضل احد مااعرف ..
باوعت الابنها مالابس هدوم وكاتلة البرد وشحاله ..
" هذا ولد ؟"
هزت راسها ..
رديت :
" باردة عليه ليش هيج مالابس "
ردت :
" متعود من صغره ماالبسنه هواي "
جان بودي اكلها انت راح ترضعين ابني اني .. وراح يصير اخو ابنج .. وكم اخو واخو لأولادي راح يصيرون ؟؟
ماعندنا هيج واحد يرضع من الثاني .. ولمن عرفت من فهيمة اليرضعون سوة يصيرون اخوه تخبلت ..
لان رضعت درع وي رحمة وفيصل هم .. ومعناتها صاروا اخوة ..
كلها هاي برگبة الشيخة لان هي البهذلتني وبهذلت ولدي
مااتحملت هالضيم كله ..
عفتها ومشيت للشيخة .. جانت بثينة يمها ..
فتحت الباب صفنن عليه ..
" شني شعدج جاية "
رديت " شيخة خليني اني ارضعه من اجيبه لاتحرمني منه اخوانه كلهم رضعتهم ليش هو ماارضعه "
ردت بثينة " عبن مااريد ياخذ حليبج الزفر .. ابني وبكيفي ارضعه "
تخبلت من سمعتها هيج تحاجيني .. مدري منين اجتني القوة :
" هذا ابني ابني اني مو ابنج .. حتى لو مارضعته يبقى ابني ويجي يوم ويعرف يكبرون ويعرفون "
تخبلت بثينة " سمعتي مو گلتلج من تجيب خلي نشمرها مانريدها .. من هسا تخطط تكلهم هي امهم وشمدرينا ماتقرأ براس رضوان من هسا "
گامت الشيخة ..
" لاتخافين ماتحجي .. عبن لو حجت تدري شيصير بيها يو تسكت وتشتغل خدامة .. يو ترد لأهلها وتترحل وياهم وماتشوفهم عمرها كله "
استغربت :
" وين يرحون اهلي "
ضحكت بثينة :
" اهلج موش اكراد ؟"
هزيت راسي ..
ردت :
" عبن الاكراد سوو حرب على الدولة والدولة راح ترحلهم لان تبعية ومن ضمنهم اهلج "
تخبلت من سمعت ..
" اهلي مو تبعية اهلي عراقيين ابا عن جد واصلنا من الشمال وعشيرتنا وناسنا كلهم هناك هاي لعبة منكم انتو تهمتوهم "
ابتسمت بثينة " حتى تعرفين المن تهددين .. عگلج الصغير هذا خليه يفكر زين گبل لايحجي "
رديت " لا شيخة لا كلشي ولااهلي اهلي مالهم ذنب وين يرحون مايعرفون احد هناك شلون يعيشون خارج العراق .. ملكهم وحياتهم كلها بجلولاء وين يروحون ابوس اديج ورجليج شيخة لاتوديهم اهلي مالهم ذنب "
توسلت وبجيت ومافاد .
ردت ..
" گومي امشي بعد القرار صدر مو بكيفنا الدولة هي تقرر شمدرينا بعد وشني البدينا "
اعرف همة السبب ومنهل الاشتكى عليهم بس وين يرحون من الله هو الياخذ حقي وحق اهلي منهم ..
طلعت منهن والدنيا تفتر بيه ..
عرفت هسا حلم امي شنو .. جاية تودعني ..
يعني هاهي بعد مااشوفهم ان جان عندي امل اشوفهم كل كم سنه هسا انگطع خلص ..
لو عدنان .. هاي اخر مرة احضنها واشمه .. جنت اصبر روحي من اكعد من الفجر واشم نسمة هوى عذبة واگولن هاي انفاس اهلي الاجتني ..
ذكروني وي طرة الفجر وصلولي سلامهم وي خيوط الفجر .. هسا بعد شلون اصبر روحي وهمة راح يتسفرون .. شسويت بيهم اني وشنهي هالنقمة الحلت علينا وماترضى تعوفنا ..
عسا راضي لاانكتل ولا صار بينا هيج .. اذا هو مات وارتاح احنة جاي نموت الف موته باليوم ونعيش ..
همة اخذوا حگهم منا ثالث ومثلث ..
احنة منين ناخذ حگنا .. وشوكت ناخذه ..
ابوي المات بتانيب الضمير وبحسرته عليه ..
لو بعد امي عني وحرگة گلبها ..
لو عمتي الانحرمت من ابنها العاف العراق كله وهج ..
لو گلوبنا الافتركت اني ومهران ومن يومها لاهو الارتاح ولا اني ..
بعد اكو اكثر من هذا عقاب ..
لو حرماني من ولدي وهم گبال عيني وعذابي وياهم طول هالسنين ..
بقيت اكل بروحي اكل .. حسيت بطني وجعتني ..
لفلفت روحي ونمت من الوجع ..
ضليت بفراشي ابجي .. ورحمة يمي ماتفارگني جوعانه سودة عليه ..
وماطلعت اجيبلها اكل .
الوجع كتلني ..
خفت عليه خاف شو شصارله حتى وهو مو الي واني خايفه عليه ..
وصيت رحمة ..
" روحي يمة روحي صيحي بلبل "
اجه بلبل يركض ..
" ها مرة ما مرة شبيج رحمة نهدتلي "
رديت بالگوة " روح گول للشيخة الجاهل راح يوگع "
كام يدگ على راسه وركض ..
شوية واجت الشيخة وبثينة يركضن ..
" شبي الفرخ شسويتيلة ؟"
رديت " ماسويت شي بس مدري شبيه بطني توجعني راح اموت "
صاحت الشيخة ..
" بلبل جيب الحبوبة بساع "
راح بلبل جابها واجه ..
جانن بثينة والشيخة اثنينهن واگفات على راسي ..
ضلت تفحصني والشيخة تدگ بعصاتها بالگاع من التوتر
صاحت " فضيني الفرخ عايش يو لا "
ردت " اي عايش بس جنه نازل .. يرادلها راحة ماتكوم ابد كون توصل للسابع .. لان هسا يو جابت مايعيش "
ردت بثينة " ادري بيها هي شو شسوت تريد تطيحه "
ردت الحبوبة " ماعليه شي ان شاء الله بس كون ترتاح وماتضوج يو تبجي وتعصر بروحها مو زين .. راح اطيها هاي اعشاب تخليه فوكاه ماي حار ويدفا وتشربه زين الها ومايخليها تجيب من وكت وانه اجيها اشوفها كل اسبوع "
طلعن ..
التفتت الشيخة ..
" نامي لاتتحركين "
ضليت نايمة…
ورحمة فوگ راسي تمص بأصبعها من الجوع ..
اجت بثينة ..
" راح اخلي نعيمة تجيبلج اكلج لهنا وشتريدين گليلها "
شوية واجت نعيمة ..
ضلت تعاين للمخزن ..
" جنت اضن انتي وحدة من نسوانهم من شفتج حبلة بس هسا گاللي انتي فصلية عودن صدگ "
هزيت راسي ..
ردت :
" اي عبن مبين لو من نسوانهم موشي خلوج بهاي الحجرة لجن حجرهن كلهن حلوة "
سألت :
" يعني عمتي بثينة تگصد البطنج ابنها ؟"
هزيت راسي :
شهكت ..
" يمة شني هاي وانه اگول شو بطن ماعدها شلون تگول من اجيب .. "
رديت :
" لاتسألين ولاتحجين بهذا البيت هاي نصحيتي الج تضرين روحج لو حجيتي خليج هيج ماتعرفين شي ولاتسمعين احسن .. "
سألت :
" انتي موش منا ؟؟ عبن حجيج موش مثلنا "
رديت :
" اني من جلولاء "
عقجت حاجبها ..
" وين هاي تصير ؟"
رديت :
" بديالى "
ردت :
" خن اعرف الاولى يلة اعرف هاي انه لاتسأليني بس على قريتنا هاي الاعرفها بس عبن ماطلعت منها ابد الا لمن اجيت لهنا "
گامت ..
" تردين شي ؟"
رديت :
" مااريد بس اكل البتي جوعانه "
ردت :
" اي هسا اجيبن الج والها "
راحت ورجعت ورى شوية ..
جايبة اكل الي والرحمة .. اكلت شوية ..
وشربت ماي ..
ورحمة كعدت اكلته كله من جوعها ..
شوية واجت نعيمة جايبة كلاص بي ماي والاعشاب الي اطتها الحبوبة ..
" اشربي هاي ودته الج عمتي بثينة "
گمت شربته ونعيمة فوگ راسي لمن كملته يله ..
اخذته مني باوعت عليه ..
واخذته وراحت .. يمكن هي موصيتها توگف على راسي لمن اكمله ..
ضليت نايمة واتلوع بمكاني .. بالي يم اهلي ومااعرف شصارلهم ولاخاجية تجي واوصيها تعرفلي اخبارهم ..
الشيخة گامت تتحذر منها ومادخلتها من يوم الصار ..
نعيمة مااشوفها بس وكت ماتجيبلي اكل صبح وظهر وعشا ..
جانت ماتحجي وياي مثل الاول وتتسأل يمكن بثينة محذرتها لو موصيتها ..
مر شهرين ..
وبعد مااتحملت .. من القهر والبجي .. صبحت ناگعة الصبح ..
حسبالي ماملحگة اعلة روحي ..
بس بعدين تذكرت ابني وخفت ..
گمت على حيلي .. فتحت الباب وطلعت ..
صارت گبالي نعيمة ..
صحتها وطحت مااتحملت ..
گامت تصيح لمت البيت عليه ..
جابوا الحبوبة ..
گالتلهم الطفل هذا راسه راح تجيب ..
ماطولت بسرعة جبت ..
بسرعة طلعته ومسحته ولفته بگطن ..
باوعتلهن ..
" كون غرفة دافية مو باردنه تخلنه وكل يوم تغيرن الگطن .. دبرولهم من الولاية من المستشفيات ..
حتى من ترضعنه كون بگطنه ماتوخرنه .."
جان صغير كلشي وصوته بالگوة يطلع ..
لفته وانطته البثينة ..
اخذته وراحت ووراها نعيمة ..
واني عيني وگلبي وراه ..
حجت الحبوبة وي الشيخة ..
" يرادلها وكت يله تحبل بعد لان رحمها نازل وماتتحمل يمكن "
هزت راسها الشيخة وجنها ضاجت ..
عافني وطلعن ..
گمت بالگوة حيلي مهدود…
لميت الفراش ورحمة جانت تفرفح اسمعها لان طلعنها مني من جبت ..
گمت للحمام شغلت الجولة وحميت ماي ..
غسلت الجراجف وسبحت وطلعت ..
اخذت رحمة واتلفلفت ونمت من الوجع والتعب ماحسيت بروحي ..
فزيت ارعش من البرد واحس روحي مسخنة ..
بالي يم ابني مااعرف حتى شمسوه ..
گمت بالگوة .. طلعت نعيمة وجانت ضايجة…
شافتني اجت ..
" ها شلون صرتي "
هزيت راسي ..
" گليلي ابني شلونه "
ردت :
" تحت رحمة الله هو زين يرضع وجنه قوي لاتخافين امي جابت اخواني اثنينهم سبعية وعاشوا .. "
رديت :
" من شفتج ضايجة خفت بي شي "
ردت :
" ضايجة من عمتي بثينة منعتني ارضع ابني تگلي عمره سنتين افطميه بعد مااريد ابني يرضع وياه من نفس الصدر وتريدني كل يوم اسبح بهالبرد هو اني كل اسبوع وزين مني اسبح دور كل يوم "
هزت اديها ومشت ..
ضليت احوم رايحة ورادة بلكي اشوفة وماشفته ..
منهل رجع من بغداد ..
ومن سمع اجاه ولد دخل فرحان وهو يصيح ..
" بثينة .. شيخة .. اجه سائد اجه "
طلعت الشيخة تضحك ..
" اجاك اركان موش سائد "
رد " مايهم الاسم المهم اجه بصحة بس مو بعد وكته "
ردت " اي سبيعي اجه "
جان فرحان وراح يشارك فرحته وي بثينة وجن هي الجابته ..
جايبلها بتوت ذهب هدية الطفل وهي جانت تراوينهن الهن وفرحانة وهن يتهامسن عليها ..
جانت بثينة عايشة الدور ومنهل منطيها على هواها علمود الطفل ..
مامصدگ بروحه صار ابو ..
ضاجت من الشيخة سمته اركان رادته مثل اسم رضوان وموحان ..
ومن بثينة مارضت كالتلها ..
" ولج شني سايد مدري صاعد بالاسلام كلها ماكو هيج اسم وين عايشة انتي ببغداد لو منهل كثر ماخذاج البغداد حسبالج صرتي مثلهم "
الشيخة وبثينة جانن بصراع بينهن .. الشيخة تريده على هواها . وبثينة تكول هذا ابني واني بس الاربيه واتصرف بي .
واني كل همي شوكت يطيب ويكمل ويشيلون الگطن منه ..
الحبوية جانت تجي كل يوم تشوفه وتلفلفه بيدها ومدفيات الغرفة اله ..
منهل وصاله على صوبة وجابها اله من هاي الزينات ..
وحار شنو جاب علموده ..
جان كلما يجي من بغداد محمل اشكال .. يمكن راح يكون محظوظ اكثر من اخوانه لان منهل مو مثل موحان ماربى رضوان ولاقربه اله ..
بس يبقى گلبي متلوع عليه وعلى شوفته واتمنى اشوفه واحفظ ملامحه ببالي .. بثينة ماتخليني ادخله ابد ..
حتى صدري يوجعني ويدر حليب گام وماعندي منو يشربه ..
حتى رحمة نفرته من زمان وبطلت تريده ..
جنت گاعدة بالغرفة ..
اجه رضوان ..
" ها مرة وين رحمة "
رديت " راحت للحمام هسا تجي "
اجه گعد يمي ..
" شفتي اركان حلو "
ابتسمت ..
" شلون شكله "
رد " ابيض وعيونه كبار .. هيج من يتنوع يفتحهن حيل"
جان يوصفلياه واني صافنه وارسم ملامحه ببالي واتخيله يشبهني .. لو يشبه رحمة…
من سالته " يشبهك؟"
رد " لا هو حلو "
ضحكت وحضنته " انت هم تخبل وحلو "
ضحك وگام ..
جانت بثينة مانعه حتى رضية وسمرة وغيرهن يدخلن تخاف عليه ..
اهلي شهور وماكو خبر عنهم وماعرفت هالخبر صدگ جان لو يردن يلوعن روحي عليهم ..
اجت حورية للبيت ..
صرنا نستغرب دخلتها لان ماتدخل بس اذا اكو شي ..
وبغياب الشيخة ..
شافتني صاحتني ..
" سمعت جبتي گبل شهر وكلما اريد اجي ابطل "
اتنهدت " اي جبت وماشفته لسا هاي راح يطلع اربعينه"
ردت " اي جا شعبالج هاي بثينة موش رضية "
دور همست ..
" جبتلج الاعشاب الوعدتج بيهن "
اشرتلي ورحنا للمخزن ..
دخلت وراي .. طلعته من جيبها ..
هاج هذا فوريه لو خلي بماي حار وشربيه ..
صفنت عليه .. وقررت اخذه ..
شني الفايدة اتعب ورحمي تعب واجيب وتالي مو الي وخاصة البثينة بعد ماحرمتني من شوفته وريحته مستحيل احبل واجيب واخلي بحضنها بعد ..
سألتها " انت ليش تساعديني "
سألت " ليش سالتي ؟"
رديت " مامتعوده واحد يساعدني منكم "
ردت " انه موش منهم .. ومااجذب عليج اريد اگطع نسل ربحة مااريدها تتهنى وانت هم لازم هيج تسوين شمحصله منهم شو ياخذونهم ويخلوهم بسمهم وبحضنهم .. صيري قويه ولاتحبلين بعد "
اخذته منها وتشكرتها ..
ردت ..
" لاتشكريني شوكت ماتردين طرشيلي رضوان بحجة خلي يكلي تسلم عليج مرة وانه اعرف هو دوم يجي يلعب وي علي .. هالولد حبيته عود جنت مااريده يلعب وي ابني عبن موحان بس جنه هذا موش مثلهم "
ابتسمت ..
" اي رضوان مثل خاله "
ابتسمت " على طاري خاله .. امج تشبهج !!"
استغربت :
" وين شفتيها ؟"
ردت " گبل شهور بعرس ملكية .. سمعت صياح وطلعت حسبالي صار شي .. شفت مرة تركض مبينة غريبة وهي اصلا ماتعرفني ..
گالتلي خاله ختليني عدج راح يلزموني .. دخلتها بيتي وسديت الباب "
رديت " واني اگول شلون مالزموها "
ردت " جانت ترجف وخايفه كالت اجيت اشوف بتي وكضوني ومن سألتها مني بتج ماردت جنها خافت .
بس من الشبه البينجن عرفتها .. ولمن شفت جعمقة وازلامه يدورون افتهمت .. خليتها لمن هدوا يله طلعتها"
رديت وبودي احضنها " يطيج العافية فظلج هذا ماانساه ابد "
گامت .. " اروح اني مناك عفت الجهال وحدهم وگبل لايشوفني امشي السمرة بحجة جايه اشوف حطاب "
راحت وخلت امل صغير بداخلي انه اكو واحد بيهم عده رحمة اذا مو عليه على جهالي بالمستقبل ..
#يتبع…..
#شمس_السعدي