بيوت بلا جدران

بارت 17

اسعد الله اوقاتكم بكل خير احبتي ❤️
//// البارت السابع عشر /////
#بيوت_بلا_جدران
#شمس_السعدي 

أسألك ياحزن عندك قرابه أوياي ؟؟؟
أبد ماعرفك أني ولنته تعرفني
أشعجب لاطش عليه وصار هاي أسنين
وزماني بالنوايب دوم حاضرلي
بسك ياحزن خليني مره أرتاح
وأذا عندك خواطر خلي خاطر لي
أسولف وألسوالف حلم يقضه أوياي
لأن أعرف زماني ألحزن كاتبلي
أدور عالفرح ما أدري وين ألگاه
وأنادي أبصوت أريدن بلكي يسمعلي
مايسمع يعالم ...ليش هم تدرون ؟؟؟
لأن أطرش طلع وألفگر واگفلي !!
_____________________________

فزيت من نومي مرعوبة .. بسرعه باوعت الرحمة شلتها
وحضنتها حسيت شي خانگني ..
التفتت شفت موحان نايم يمي وفاتح عيونه ..

حسبالي گاعد ..
جانت الشمس طالعه وهو مو عوايدة يبقى نايم عدي الهيج وكت ..

حجيت وياه :
" عمي موحان تكعد اسويلك ريوك "

مايرد ولا يباوعلي مدري شبي .. خفت ...
احرك بي ما يتحرك .. جنه خشبة ..

گمت بسرعه اخذت رحمة وطلعت ..
شفت بلبل گبالي ..

" بلبل بلبل تعال شوف عمي موحان مدري شبي "

رد بلبل :
" شبي شبي "

جانت رضية گبالي ..
اجت بسرعة ..

" شنهي شكو "

ماحجيت وياها ..
دخل بلبل للمخزن .. يحرك بي ماكو..
رضية راحت وراه..

اني واكفه بمكاني بالباب وخايفه .. واحس گلبي المقبوض وراه بلية سودة وطاحت على راسي ..

دنگت رضية عليه تحرك بي .. ودور صاحت صوت رج البيت رج ..

ماضل واحد بغرفته من صوتها ..
" يبووووووو سودة بوجج برضية وينج يشيخة الفصلية كتلت وليدج "

طلعت تصيح وتردد نفس الكلام ..
واني احس جسمي كله يرجف من الخوف وحاضنه رحمة لأن كامت تبجي من الصياح خافت ..

اجه حطاب يركض ومنهل بملابسهم الداخليه ..
دخلوا ..
ودور الشيخة وراهم مالابسه لاعصابه ولا شيله وگصايبها البيض على جتافها نازلات ..

تركض وتضرب بعصتها الكاع ..
صاح حطاب ..
اطلعن لحد تدخل والجهال دخلنها للحجر ..

عيوني تباوع الموحان واتمنيت يكعد كلشي مابي اول مرة اتمناه يضل بحياتي .. لان اعرف وراه راح يعذبوني حسبالهم اني الكتلته ..

بس ماكعد شال حطاب الغطا وغطا راسه ..
ومنهل گام حضن امه الوكعت منها العصا ورادت تطيح
لزمها بسرعه وحضنها ..

البيت انگلب بالصريخ .. منيرة ملخت روحها هي واخواتها ..
دور صارت عيونهن عليه ..

صاحت منيرة .. انتي الجتلتيه ابوي كلشي مابي بالليل اجاني وحجة وياي ولعب وي بناتي ..
ابوي مابي شي انتي الجتلتيه .. 

اجت عليه هي وملكية.. 
حضنت بتي بسرعه وگعدت خاف يضربنها ..
سحلتني منيرة من شعري وخرمشت وجهي تخرمش ..

بنتي ماادري وينها بس اسمع بجيها ..
ورضية الذاك اليوم تدعي الموته لگتها فرصه تطلع قهرها بيه ..

شبعني كتل لين اجت الشيخة ..
" ميلن عنها .. خل ناخذه ونعرف شني سالفته وحسابها بعدين..  عبن وليدي لليل مابي شي ينام يمج يصبح ميت شلون "

جنت ابجي واحجي :
" شيخة ماادري والله ماادري لحد مانام كلشي مابي مااعرف شلون مات مااعرف "

ردت ودموعها ينزلن من غير ماتبجي حتى بهيج لحظة ماتريد تبين ضعيفه لو مقهورة دوم تريد تبين هي قوية

" انلصمي .. گلتلج حسابج بعدين بس مااريد شي يخرب فاتحة وليدي .. كلجن تسكتن لمن نخلص السابع وان حجت وحدة بيجن اگضيها گضيان "

هن يصيحن ويبجن واني عيني تدور بنيتي ..
جان رضوان مكعدها يم الحب ومغطي عيونها حتى ماتشوفهم يكتلوني ..

دخلت حورية تصيح .. " يبوووووو يبوووووو"

ردت الشيخة " شنهي جيتي تتشمتين بيه يحورية "

ردت " مو حورية التتشمت بالموته عبن اني سلمتج بيد الله هو اليطلع حبوتي والميت اخوي وشماسوالي حسابه عد الله مو عدي "

ردت الشيخة .. فرشن الحوش كله . مااريد شي ينگص فاتحته ..

بسرعه طش الخبر بالسلف.. 
شالوه واخذوه .. ورضية گدام النسوان تبجي وتلطم

اجت بثينة " افرشي الساحة كلها ولاتضلين بين الرجلين عبن رضية وبناتها يدوسنج لون شافنج "

طلعت الفراشات وجنت انحثل وحدي وافرش ودموعي تجري على حظي مو عليه ..
ماصدگت صار زين وياي ويمكن يرد وايدي لحضني تالي اخذه القدر مني وحرمني ..

اااااااه يمرمر وين راح يصفى بيج الدهر ..

بقيت بالمطبخ خليت الكتالي مال ماي والجاي ..
وعجنت معاجن عجين ..

كلهن گاعدات ويبجن ويلطمن .. واني حايرة مااعرف شسوي ..
ومنا رحمة لازمة بيه ماتهدني ..

رحت اشوف سمرة بلكي تساعدني بالخبز ..
جانت النسوان كلها تعاين عليه ..

ويتهامسن " هاي مرته الصغيرة الجابوها فصلية خطية مبين زين وياها شلون مخرمشة وجهها وشحالها "

رضية وبناتها يباوعلي يردن ياكلني ..
رحت حجيت وي سمرة ..
اشرتلي " اني مالي شغل شوفيلج كم مرة من الجايات يعاوننج "

سمعتها خاجية ..
ردت :
" انطري اني جاية وياج .. عبن جبناها عمر مناسبات الشيخة كلها تكوم بيها نسوان السلف مو نسوان حوشها عبنهن مو حمل الشغل ايدهن رخية "

ضاجت سمرة من حجي خاجيه ..
تحزمت النسوان ورى البيت .. ونص يخبزن ونص شغلن الحطب وحطن الگدور وركبن الاكل ..

بلبل اجه ..
بس الذبايح برة يطبوخهن جعمقة والزلم ..

الحوش انترس عالم .. وكلها راحت وي موحان ومحد بقى يجيب جوادر ..
لمن الفلاليح كلها گامت ونصبت جوادر ..

السلف كله يشتغل .. مدري حب بالشيخة وولدها لو خوف ماتنعرف ..

رحمة خبلتني بس تبجي ولازمه بذيال ثوبي ..
اسمع النسوان يتهامسن ..
" شجتهم بيت الشيخة بعد اربعين مرت فرج ماطالعه دور مات الشيخ موحان "

للظهر بدت الشيوخ من جميع القبائل تجي . وكلها تهوس وتسوي عراضة ..

بعد الغدة اجت الشيخة دخلت .. دفنوه ورجعوا..
من شافنها النسوان كلهن تلگنها يصيحن ويعزنها ..

وهي بيدها تلطم على راسها ..
خللها كرسي گعدت وبدن يعزنها وحدة وحدة مبين عليها التعب ..

اشرت البثينة وكامت ..
شوية واجتني بثينة .. حضري الحمام للشيخة تريد تسبح وحضريلها لگمة تاكلها من البارحة ماماكلة شي

دخلت تسبح واني رحت سويت غدة وخليته الها بغرفتها ..
اخذت رحمة ورضوان ورحت للمطبخ اغديهم محد وكلهم واني التهيت عنهم ..

اجت سمرة بيدها فيصل ..
" هاج هذا الفرخ سودني بس يبجي "

خلته وراحت ..
جان يبجي من الجوع .. خليته على صدري واوكل برحمة ورضوان..

رضوان رغم يعرف ياكل وحدة بس من شافني اوكل برحمة كالي وكليني اني هم ..

دخلت خاجيه جانت محزمة ..
" ها يمة الله يصبرج  مااكلتيلج لگمة تشد حيلج "

رديت :
" مااشتهي "

ردت :
" شلون ماتاكلين وهالفرخ هذا يتيم وترضعيه يرادلج حيل وگوة "

رديت " مو جوعانه "

اتنهدت " وهسا شراح يصير بيج تضلين هنا لو تردين لهلج "

عفت الاكل وباوعتلها :
" وين ارد ؟"

ردت :
" لهلج عبن رجلج مات شنهي ضلتج "

رديت " وجهالي "

سألت " شنهي جهالج هي بس هاي الفرخة "

اتلعثمت وماعرفت شرد ..
بقت تعاين الرضوان ورحمة وجنها تقارن بينهم ..

سألت " هالوليد الج ؟؟ شون ماعرفت عبن رضية جبيرة وكاطعه الخلفه منين جابت هالفرخ .. وحتى مايشبهها ولايشبه بناتها "

رديت " خالة لاتطلعيها للسالفه اني مدري شلون حجيتها بس الشيخة لو عرفت تموتني ماترضى احد يدري "

اتنهدت " وحتى الفرخ مايدري انتي امه "

اتنهدت وهزيت راسي ..

سألت :
" بس لا هذا الفرخ هم يطلع الج "

باوعت الفيصل ورديت :
" لا مو ابني هذا ابن رملة الله يرحمها "

اتنهدت " هاي البت هم راحت وهي طفله بعدهي والوليد تيتم جا شمالها منيرة ماترضعه موش ابن رجلها"

سكتت ..

دخلت منيرة شايلها بتها تبجي ..
شافتني تخبلت :
" گاعده هنا وتاكلين وابوي ندفن بالتراب .. خلي تخلص الفاتحة والا اهجج بالشوارع مات وعيونه مفتوحة بعده روحه بالدنيا وانتي الجتلتيه "

ردت خاجيه :
" يايمة شمالج وي البت هي اشعليها الله خذاه رجال جبير وارتفع عده الضغط وصارت بي جلطه جا هي شعليها روحه بالدنيا اليسمعها يگول نغيوه "

صاحت منيرة :
" انتي معليج ابوي جابها عمر ماشكى من ضغط وماتمرض شبساع مات شبساع "

هزت اديها خاجيه :
" اني هم شعليه اكوم احسنلي "

عافتنا وطلعت ..
صاحت بيه ..
" گومي شيلي هذا الفرخ ودي البيبيته مو لگتيهة حجة علمود ماتشتغلين .. الشيخة كالت مات بسكته مدري بجلطه بس اني اكول انتي موتيه وباجر ينعرف كلشي"

عفت رحمة وروضوان ياكلون وشلت فيصل اخذته
طلعت النسوان كلها واكفه تسمع حجينا عبن يشتغلن يم المطبخ وعينهن عليه ..

حسيت روحي صدگ كاتلته وماادري ..
نيمته وطلعت ..
دخلت مهجة تصيح وتبجي ..
جانت بطنها جبيرة ..

اشرت الشيخة ..
" اخذنها للحجرة بسرعه لاتخلنها تتعب "

گابلت امها " يمة اخوي راح شيخنا وجبيرنا راح "

هزت راسها امها وهي حاضنتها ..
" كافي يمة لاتبجين اخيج يتعذب .. وانتي حامل امشي ارتاحي "

اشرت البثينة وحورية .. تعالن اخذنها
دخلت وراها دنانير تهوس بنص وتدبج والنسوان يهوسن وياها هاي عادتهن بالفواتح ..

وتگفل الهن وهن يردن وراها ..
گامت الشيخة وياها ..
وتگابلن اثنينهن بالگولات واللطم ..

اول مرة اشوف هيج فاتحة .. برملة جانن يعزن ويرحن مو مثل موحان الماشفت ولا راح اشوف مثلها..

صارت عيني على رحمة ورضوان يلعبون وي علي وبنات منيرة وماحاسين بالدنيا ..
مايدرون المات ابوهم لو رحمة البقت بلا ابو ولا هوية تثبت هي بنته ..

كلما اكول هانت تجيني بلوة ثانية تحط على راسي
جانت عيوني تدور درع بين النسوان الاجن وي دنانير ومهجة ..
بس ماشفته يمكن خافن عليه من الصياح والهوسة ماجابنه ..

اشرتلي بثينة رحت ..
" سوي غدا المهجة مامتغدية وهي حامل "

رحت حميت الاكل وصبيت بصينية تمن وعليه مرگ ولحم واخذته الها ..

لگيت دنانير والشيخة يمها وهي متخربطة ..
" كلتلج لاتجين وانتي عنودية ماتسمعين الحجي هالتخربطتي والجاهل البطنج يصيرله شي "

ردت الشيخة " گلتلهم لحد يطرش المهجة عبن اعرفها لو درت تكتل روحها وتجي "

باوعتلي دنانير " يله گومي اكلي "

هزت راسها مهجة " مااريد مااريد اخوي مدفون تحت التراب واني اكل شمالي "

ردت دنانير " جا شني تموتين وراه هذا حد يومه .. فكري بالبطنج ماصدگتي صارلج فرخ بعد درع ترحين تطيحيه "

اشرتلها الشيخة ..
گامت تاكل وگابلتها دنانير تاكل وياها ..

ردت اطلع صاحت الشيخة ..
" زهبن اكل للازلام والناس الاجت من الغربية .. وخلي جعمقة يزهب العشا من هسا هم يله يلحگون "

رديت " ذبحوا ذبايح ثانية للعشا وبدوا يطبخون "

هزت راسها وسكتت ..
جان هدوء الشيخة مخوفني .. صح ماتحجي بس نظراتها الي تخوف ..

طلعت حجيت وي حورية كالت اني راح احجي وي بلبل وجعمقة انتي لاتطلعين..

رجعت للمطبخ وي النسوان ..
جانت سمرة فاتحة غرفتها وحمدية يمها متمدد لان حامل وهي تحجي للنسوان بعد ماسألنها ..
" وهسا دية منهو يصير شيخ ورى الشيخ موحان "

ردت :
" والله يمكنه حطاب لان منهل موش مال شيخة دووم ببغداد مانشوفه الا يوم لو يومين بالاسبوع وماكو غير حطاب بقى "

سمرة جانت فرحانة وهي تحجي وجن مصدگه الشيخة تخليها تصير شيخة ومرت شيخ ..

ماعشت وي الشيخة هواي .. هن كم سنه بس احس روحي اعرفها اكثر من العايشين وياها عمر ..

خلص اليوم تعب بتعب ..
الناس افواج افواج تجي .. من غير العراضات والهوسات ..
والبيت متروس نسوان..
رحت انوم رحمة اجه رضوان..
باوعتله ابتسمت " تعال تنام هنا يم رحمة "

رد " مرة مرة انتي كتلتي ابوي موحان "

بقيت صافنه مااعرف شحجي سؤاله صدمني ..
اشرتله :
" لا حبيبي مو اني هو مات وحده "

رد :
" ملكيه وحمدية ومنيرة گالن انتي كتلتيه وامي رضية هم گالتلي "

دموعي نزلن .. شلون اكتله انت ماتعرفني انت مو تحبني شلون تصدگ بيهن ..

سكت ..
اشرتله بيدي يجي يمي ..
اجاني على كيفه ..
سحبته وبست اديه واشم بيهن ..
" موحان ابوك وابو رحمة شلون اكتله "

رد " شلون يصير ابو رحمة .. موحان ابوي وامي رضيه شنهي هي هم امها رضيه "

رديت " لا امها اني بس ابوها موحان "

سأل " يعني هي اخيتي مثل منيرة وحمدية وملكية "

هزيت راسي ..
حسيته مااقتنع عافني وراح ..

بدن يغيرن بي ويحجن براسه .. وخايفه لا يخلنه يكرهني ..
بعده طفل وخاف يصدگهن ..

اجت سمرة جابت فيصل خلته يمي هو وزهرة ومشت
بقيت للفجر گاعدة مانمت انوم واحد يگعدلي واحد ..

نمت شوية وكعدت صليت وسوينا غدا للعالم ..
وبدت مثل البارحة ..
طبخ وشغل وجايات وماي ماارتاحينا ابد ولاگعدنا كل يوم الناس تزيد اكثر واكثر ..

ثالث يوم. الفاتحة رادوا ينصبون شيخ جديد..
وجانت سمرة فرحانه وتدعي ..
والنسوان كلهن يباركلها گلبن العزا الفرح ..

رضية وبثينة گامن يحجن عليهن ..
" شنهي جايات تعزن لو تباركن "

سكتن كلهن من حجن .. بس سمرة بقت ملامح الفرح بوجهها ..

جانت النسوان كلها ناطرة تسمع منو راح يتنصب ..
وحطاب بيومها كشخ ولبس عگاله ..
كلها متوقعه حطاب هو الياخذ الشيخة .. بس انصدموا وهو اولهم يوم الطلع منهل بعگال اخوه لابسه وعباته السودة على جتفه ..

طلع من باب الحوش والناس صارت تكفل اله ..
وبدت العراضة تصيح بأسم الشيخ منهل ..

اجه الخبر السمرة الطاحت من طولها اول ماسمعت
وحطاب جان بالگوة واگف على حيله بين الزلم ..

بالاساس هالفكرة خلتها براسه سمرة .. وكالتله منهل مو دوم هنا والناس تريد واحد منهم وبيهم ومااضن يختارون منهل للشيخة لان شايف روحه علئ الناس من يومه ولان هو دارس وواصل ويروح ويرد البغداد ..

دخلت الشيخة والنسوان كلهن راحن يباركلها ويباركن البثينة ..
حتى النسوان الجانن يباركن السمرة عافنها وراحن البثينة الي تحسها رفعت راسها بشموخ وجنها لبست الشيخة من اولها ..

لليل دخل حطاب ضايج خلكه وتلكته سمرة راحوا الغرفتهم ماطلعوا بعد ..

دخل منهل وراه ..
تلگته بثينة ورواحوا للغرفه ماطلعوا بعد ..
الشيخة حست على حطاب ..

وگفت تعاين عليهم .. ودخلت ..
مارادت تكسر بي خاف يتمرد عليها بيوم ..

من كملت الفاتحة وفضت الناس ..
اجتمعت بيهم كلهم ..

" اسمع يمنهل وانت يحطاب .. اثنينكم ولدي والله شاهد ما دريت العشيرة تنصب منهل الا لمن سمعت الهوسات وبعد مايصير اكسر حجايتهم واكسر ابني جدام الناس والشيوخ ..
وانت يحطاب .. منهل موش هنا دوم ببغداد .. عبن انت ايدي اليمين بعد موحان .. وانت الراح تبقى وياي وان جان منهل شيخ بالاسم .. انت وفرج مااستغنئ عنكم وتبقون ولدي وولد الشيخ مرداس كلكم وماافرگ بينكم"

بالحجي گدرت تقنع حطاب بعد ماسلمته الگيعان الجان يديرهن موحان ..
ورجعت كسبت ثقته من جديد ..

بعدها عاينت عليه ..
" اسمعي ولج لاحسبالج سكتت على دم ابني عبن ناس وفاتحة وماگدرت احجي .. يو تگليلي شجنتي تطيه لو اخليج تلحگيه "

رديت :
" والله مااطيه شي هو جان بجيبه دوة ياخذ منه اني ماادري شني "

باوعت المنهل وحجت ..
" شنهي الدوة يمنهل موش انتو اخذتوا غراضه "

رد منهل .. " شيخة مو وكتها هسا موحان مات وبجلطة يعني موش هي خليها تمشي "

اشرتلي " امشي وحسابج بعدين "

طلعت وطلعت النسوان وضل يحجي وي امه ..
تذكرت منهل مرة اطاه شي وهو خلاه بجيبه ودور من يجيني يطلعه يشرب منه .. معقوله هو الكتله بس لا تطيح براسي ..

بس ماعرفت السالفه الا لمن رضية وسمرة تعاركن وسمرة كالتلها لو بيج خير جان حويتي رجلج وماراح يدور دلال عد بت زعطوطة وياخذ دوة علمود يكدر يوصلها.. 

ردت رضية " وانتي شعرفج ياخذ دوة "

ردت سمرة " شنهي نسيتي شهور وهو يروح لبغداد علمود يطيب بعد ماخربتي انتي "

مااعرف يالعنة منهن بدت تتحقق لعنة ظلمهم الي لو لعنه رملة ودمها الراح هيج ..

تذكرت حلمها ..
معقولة موحان هو الحرگها لو قصدها حرگة الشيخة على ابنها ..
الشيخة جانت مكسورة بموتت موحان بس ماتبين ولاتخلي واحد يحس عليها لليل تگعد تذكره وتبجي
لو تحجي الرضوان عن ابوه حتى ماينساه ..

مرت الايام ..
والشيخة طلبت من عندنا نحد الموحان ..
ماجنت اعرف شني حد وشسوي ..
كالت ماتطلعين من باب حجرتج .. وان طلعتي تتبوشين ..
حطاب وولده دور مايجون لليل ..
انتي احسبي حسابج تكملين شغلج قبل الليل ..
وان اجو الزلم ماتطلعين ..

گمت اكعد بعد مايطلعون للشغل .. اكمل شغلي واسوي العشا من العصر اخذ اكل الي والرحمة وطاسه ماي وادخل للمخزن مااطلع بعد..

رضية جانت تتشمت بيه ..
" اييييه جانت تريد تلوي ذراعي بموحان وتگربه الها تالي راح وهي رجعت مثل اول يوم اجت بي لهنا .. ويمكنها الشيخة تردها منين مااجت "

بقت هالحجايه ببالي ..
معقولة الشيخة تردني وجهالي شلون ؟؟ مااگدر افارگهم .. جانت امنيتي اسمع هالحجاية بس هسا خايفه لاياخذون جهالي ويشمروني ..

كل خميس نسوي قراية .. وعشا الروحه .. وكل يوم خميس البيت ينترس نسوان ..
حورية يم جورية ماتخليها وحدها .. وبثينة صارت مرت شيخ هي بلاية كلشي ماتجيس الورد..  مو عاد هسا ..
رضية وبناتها كاعدات مايكومن لان الميت رجلها وابوهن .. وسمرة لو شايله فيصل وبتها لو تشمرهم عليه وتگعد تسولف وي النسوان ..

ومثل كل اسبوع تطيح براسي وراس خاجيه تجي تعاوني ..

منا لمن كمل الاربعين يله ارتاحينا من الناس ..
لمت رضية غراضه كلها وانطتها ..
وفرغت الغرفه الها .. ورجعت بيها بعد ماهجرها موحان وطلعت منها ..

حمدية جانت مقررة تسميه موحان لو جابت ولد ..
هاي اخر شهور حملها…
ورحيم لو تطلب لبن العصفور يجيبلها .. اما منيرة جانت تباوع لأختها وتتحسر ..
فرج من يوم الماتت رملة هو مايجي للبيت بس بالليل
وحتى ابنه مايشوفه ..

رادت منيرة شگد تتقرب اله .. ومن مات ابوها سلم عليها وهي شمرت روحها عليه وتبجي ..
بس هو هدأها وگعدها وطلع .. جانت بأي طريقه تريده يجي بس علمود تحبل بالولد ..

مرة من المرات گاعده بالمطبخ اشتغل وسمعت صياحهن ..

طلعت شفت منيرة متخبله وتصيح على سمرة :
" تردين تزوجيه مووو جا انه شني مافكرتي بيه يو بناته منهو الهن "

ردت سمرة ويمها حورية واكفه ;
" شني واكفه تسمعين حجينا "

ردت منيرة :
" لا مااسمع بس الله جابني وسمعت .. بحجة فيصل تزوجيه ومنهي الفصلية "

ردت سمرة :
" وشبيهة احسن منج مداريته وترضع جنه ابنها لو شايفتج بيج زود وتداريه هو وابوه جان ماازوجنه "

جنت اسمع ومامصدگة ..
رجعت للمطبخ بسرعه وگمت الطم على خدودي ..
" لا ياالهي لاتخليهن يعرسني بعد .. راضية اعيش خدامة الهن علمود جهالي ولااعرس . ومنو ؟؟ فرج !!
رجل رملة !!"

حسبة تاخذني وحسبة تجيبني .. الشيخة لو عرف ماترضى اي ماترضى ..
ردت اي شي اقنع روحي بي ..

اجت الشيخة وراحت منيرة تحجيلها .. واني لازمة گلبي ..
تالي طلعت منيرة ساكته ومرتاحة .. ارتاحيت اني هم
لان لو الشيخة موافقة على حجي سمرة ماجانت منيرة هيج طلعت
معناها الشيخة مارضت ..

مرت شهور الحد بين مد وجزر ..
كل يوم طلابه شكل وياي .. وكل يوم يكولن انتي الكتلتي ابوي ..

نايمة واسمع صياح..
طفرت بس مااگدر اطلع بعدني باخر ايام الحد.. 
سمعت الشيخة تصيح ..
" جيبو الحبوبة بساع "

معناتها حمدية راح تجيب ..
رضية طلعت وانكشفت على حطاب .. الشيخة گامت تحجي عليها لان طلعت . 
وگالتلها ..
" تعيدين الحد كله من جديد "

مارضت رضية :
" عليمن اعيد اربع شهور هن كم يوم اعيدهن "

الشيخة ردتها :
" مو بكيفج تعيديهن "

التهت رضية ببنتها ومااهتمت الحجي الشيخة ..
بس حمدية حالتها صعبه وبالگوة جابت .. ولمن عرفنه ولد ماصدگن ..
نست رضيه روحها وهلهلت من شافته ولد ..
والشيخةضربتها على راسها بالعصا ..

راحت سمرة تبشر حطاب ..
والشيخة شالته طفل وكبرت بأذنه وسمته موحان مثل مارادت حمدية ..

كلها فرحت بهالولد الا منيرة جانت ضايجة ومكدرة
اني ماگدرت امشيلها..
رجعت للمخزن .. والصبح من گعدت رحت اريد اباركلها جانت حاطة ابنها ترضع بي ..

شافتني عفست وجهها .. سلمت وباركت وطلعت ..
الشيخة كونت على رضية تعيد الحد ورضية تخبلت من سمعت ..

بينما اني كملت الحد وهي رجعت بدت بي بأوامر من الشيخة ..

رحت اشوف جورية جان بلبل يريگها ..
شافتني ابتسمت ..
يمكن عرفتني .. حالتها تحسنت شوية ..

رد بلبل ..
" مرة مرة ابقي يمها يمها هسا تجي حورية حورية "

خلاني يمها وراح ..
واني عدي شغل .. شوية وصارت تأشر وتعصبت
" هش هش "

وجنها تطرد واحد ..
درت وجهي اباوع ماكو احد…
رجعت اباوعلها ..
نفس الحالة .. دور تخبلت ماخلت شي ماشمرته مااعرف عليمن وشبيها ..

اجت حورية دخلت ..
جانت شايطة وراحت للشيخة ..

رحت اصيحها تشوفها شبيها ..

مشيت وراها واسمعها تهدد بالشيخة ..
" هاي المرة الثانية اليعتدي عليه بيها لو عادها احرگ للحوش عليه "

ردت " شسويلج عبن ماتنطيه حقه ياخذه غصب حلاله مابيدي اسوي شي وعيب ادخل بينكم "

ضحكت حورية " هيج شيخة موووووو وهاي حذرت والسواه جعمقه لو تكرر للمرة الثالثة هالمرة اكتله قبل لايوصلني "

ردت الشيخة " اكتليه وانسجني وعود خلي ابنج بلا ام يتلطط بالشوارع "

طلعت حورية غضبانه شافتني صاحت ..
" شعدج واگفه هنا وين جورية "

بعدني ردت احاجيها مشت الغرفه جورية ..
سكتت ورحت ..

لليل نايمين .. وسمعنا صياح بلبل ..
ركضوا للغرفه مالته ..
جان خاتل بالزوية ويبجي ..

ركضتله بثينة حضنته " شبيك بلبل منهو وياك "

جان خايف ويأشر ..
" جوري جوري خنكتني "

باوعنا الجوري نايمة ..
سألته الشيخة " شمالك وي بت شنهي تسودنت "

ردت بثينة " ماتشوفيه شلون خايف "

رجعت التفتت " بلبل تروح يمي بالغرفة اني وحدي ماكو يمي احد "

اخذته وراحت جان خايف ..
اشرتلي الشيخة " ضلي يمها لمن يصير الصبح "

جنت گاعده يمها ..
وبتي بحضني مانمت من الخوف خفت من حجي بلبل
ضليت بين نايمة وبين گاعدة ..

صار الصبح دزينا خبر الحورية اجت تشوف جوري
دخلت حورية لگتها تدگ براسها بالحايط ..

سحبتها بسرعه ورجعتها لفراشها وهاي تريد تكوم وتصيح .. لمن حورية ربطت اديها بالشباك يله هدأت

حجت حورية " جورية يمكنها تسودنت .. عبن التسويه مو سوايت واحد عاقل .. خل يجي حطاب واخذها للدختور يشوفها "

بس حطاب مارضا وكالها مابي شي هاي يمكنها نداست من شافت رملة محتركه اقريلها قران ..

صارت حورية كل يوم تقرالها قران وذيج تتسودن وتصم اذانتها ماتريد تسمع ..
وينگلب صوتها الصوت غريب مو صوتها وتضل تصيح

من سمعت صوتها حورية وشافتها طاحت وتخربطت بسرعه مااتحملت من شافتها ..

ودور كلها تخاف محد يوصلها .. وبلبل بعد ماطب غرفتهم ..

الشيخة كالت يمكنها ملبوسة .. زقفلوا الحجرة عليها بين مانشوفلها واحد يشوفها ..

بس يوم عن يوم زاد الوضع ودور كامت تضرب بالبيبان وتصيح ..
مانعرف شبيها ..
ثاني يوم جابتلها واحد يشوفها ..
اول مادخل وقرأ على راسها تخبلت عليه ورادت تخنكه بالگوة دخلوا جعمقة خلصه منها ..

والشيخة ضلت حابستها بالغرفة .. وحورية من تجي توكلها وتمشطلها غم مرات تريد تكتلها بس هي تتحمل
الخاطر اختها ..

جورية نسمة البيت صارت هسا وحدة ثانية والكل يخاف منها ..

بعد هالشهور المرت…
اتفاجأت بسمرة فاتحتني بموضوع ..
جنت كاعده اعجن واجتني ..
" اگلج اريد اخذ رايج گبل لااحجي وي الشيخة بالليل اني وحطاب .."

كملت العجين لفيته وكعدت اسمعها ..
كملت حجيها :
" هالتعرفين فيصل يتيم وماله احد وهو مايرضع الا منج ومايريد الا انتي .. وانتي بعد ترملتي وضلت بتج لاابو ولا هوية الها .. وانه گلت اكسب ثواب بيج وبفيصل وببتج .. "

رغم ادري شني وراها بس سألت :
" شنو السالفه ماافتهمت "

ردت " اريدج الفرج تصيرن ام لأبنه وهو يصير ابو لبتج يملج عليج عد السيد والدولة وتصيرين مرته وبتج تتسجل بأسمه واسمج .. هاااا شگلتي ؟"

سكتت وماعرفت شرد ..
بقيت صافنه وهي تحجي وتحاول تخليني ارضى ..

ماانكر اقتنعت بالسالفه وخاصه من سمعت بتي تتسجل بسمي ..

بس مارديت عليها وگلتلها مو بيدي لين اني هنا علمود جهالي مااريد اتزوج بعد ..

لليل دزت عليه الشيخة بغرفتها وفاجأتني بحجايتها جانت صدمة مامتوقعه الي ولغيري !!
#يتبع
( شمس السعدي )

حبايب تعرفون بوضع ايدي بالگوة كتبت علمودكم حتى لتنتظرون .. وسنة سعيدة عليكم ويارب تكون سنه خالية من الاوجاع ومليئة بالخير والمسرات ..
الفيديو اهداء الكم ..

وبطريقكم احبتي متابعة لرواية جسور بليدة ..
متأكدة حتعجبكم ..