ماء مغلي

🖤♾🤍

تـحيـه حب ..
و مساء ميلاد سعيد  🌟

شخصكم المفضل بعث لكم برساله
.. محتواها ..

♣️♥️

Hello everybody

شلونكم ياب

مشتاقون

طبعا شغله انتو متعرفوهه عندي
اني كولش فرحانه اكو عندي فريندز يحبوني وكلهم كيوتات واعايدهم

كل عام وانتو احلى وكل عام وانتو اقوى
كل عام والحياه كلها امل ونشاط عدكم
يا ربي سنه سعيده  عليكم وتصير هاي سنه الحظ  والتغيير للكل

بشرفجن  بنات .. لا تصبحن باجر وترجعن لنفس طيحان الحظ الجنتن بي
طبعا هذا حجيي للي تدري بنفسهه عدها شغلات منا ومنا المفروض تشيلها وتشمرها بالزباله
اووكي مو للامورات الرقيقات 
اي فالي عدها حبشكلات صارت من زمن جدي خلي تسويلها چااااووو
اووكييي ميحتاج نحجي بالمشفر 

والي هي كتكوت اكوللها ان شاء الله هالسنه نشوفج دجاجه نافشه ريشج علينه وملمعه  ومصنعه و نشوفج قدوه لكل الدجاجات والكتاكيت يااابعد عوومررري ياحليوه
ياصغنونه يئشطه مئشطا ..
فرفشي كدا فرفشي وخلي الدنيا وسعالك

اييي ماحب اطول معايدات وشلونكم مالونكم
المهم .. ضلو عايشين ..
شلون ماتدبروهه دبروهه وعيشو
محد يموت قبل يومه
واني اكبر مثال كدامكم
( مره بسبع ارواح ) اوصل حافه الكبر ويرجعوني يكلولي مو وكتج حبابه اطبكي ع السره ويه جماعتج المتعلعلين تونسو شويه بين مانسويلكم مجال  

فعادي اوكي اخذو الموضوع برحابة صدر
كلنه ينطاح  حظنا وناكل  قنادر حشاكم ونتمرمر ونضل عايشين ..

ماكو حياة ورديه .. اصلا ماكو شي اسمه وردي بالدنيا  .. هي الالوان اساسها ٣ وهذني صنع انسان وكلشي يصنعه الانسان بلحظه يتحول رماد
فلا تصدكون انتو بايدكم حياه ورديه تره برمشه  عين  تتبخر ..

حبو الاحمر .. خلو حياتكم حمره ..
الاحمر لون واضح ميتغير ..
لون الدم والحب .. والحياه اما هنا او هنا
برأيي يعني هذا الانسب كوصف لواحد يريد يوصف الحياه حلوه .. خلي يكول
حياتي حمره .. اشجع وادق بالوصف

اني هنا انسانه واضحه رغم الالف وجه الي لبسته بحياتي حتى اعيش ..
بس هنا ويه عالم وناس ميعرفون شكلي
ولا بيوم يخلون عينهم بعيني .. اكدر اخذ راحتي واحجي الكلمه بحرورتهه ما غلفهه بفد تعبير ..

يمكن لو معاشريني جان شفتوني غير الي بالكم .. جان كل واحد بيكم وصفني شكل
يمكن واحد يشوفني جسره  .. واحد يشوفني
ممله .. او مكروهه ما انحب .. او شرانيه
و كلي اذيه و سم .. ويمكن واحد او اثنين يشوفون معشري حلو و  يتونس بي ..
مادري بعد ..

فالمهم يعني رباط سالفتنه .. اني احجي الصدك الموجود .. سوالف احلام مستغانمي مو عندي  ...

لا تصدكون بأي شي تشوفه عينكم
اعتبرو العين وحدها بيها عمى الالوان
تشوف دائمًا عكس الشي
لازم وياهه الاذن تعلمهه وتكللهه لاااا  هذا هيج و هيج ..
لا تعوفون عيونكم على عماهه .. صحوهه بالسمع وشغلو عقلكم ..

هسه اكو منكم يكول ما اله داعي هيج حجي بيوم حلو مثل هذا ودتخوفينا وتفتحين جروحنا ومدري شنو ..
.
هو صح .. بس شسوي مو بيدي اذا مااحجي واخلي النايم يصحى ..
تكدرون تكولون هذا كله  من وره
حركات الجمر المشيت عليه بعمري
هيج سوا بيه طبع مااحجي الا حار بحار

ايييي .. اخر شي اكوللكم ..
شكرًا.. تره اني عايشه اليوم بفضل الامل الي صنعتوه الي مو بفضل العلاج ..
جان العلاج من زمان موجود بس ماكو امل او غايه للحياه ..

وبصراحه يعني .. اني مادري ليش ردت اعيش من جديد ؟
من يوم الي حضرت بي جنطتي وخليت راسي على مخده حتى انام وثاني يوم اسافر لبنان .. واني اسأل نفسي ..
شعندي رايحه ! وين اريد اوصل بعد ! ما كفاني هذا العشته شكو اطمع بعد بعيشه جديده ! هو اني شبقيت ما عشت !
.
بعدني اسأل نفسي ليش رحت وتحملت تعب والاذى والبجي ووجع العمليه كله ليش ؟
من صدك مادري ليش !!!
.
صح فكرت بكووني وبهذوله المشيبين كلبي
وكلت كذا وكذا بس من صارت السالفه صدك
مادري .. ما لكيتهم بالي ...
لكيت هدفي فارغ ...
نمت بالعمليه  وكعدت واني ماشوف الي اريده واجيت هنا علموده كبال عيني
وللان هدفي فارغ ما سجلت بي اي نقطه

يمكن المسأله مسأله وكت وكلشي ينحل ..
صراحه ما بالي شي جبير ولا حياه العمالقه
والاساطير ..
كافي عليه اذا لكيت نفسي سمنانه وزايده فد خمس كيلوات و اكدر البس الفستان الي عاجبني واشوفه مقسم حلو على جسمي من جديد ..

يجوز هيج شغلات تبدأ تملي الفراغ وتبين شنو الجان دافعني لكل هذا الخبال السويته بنفسي ..

اكو بشر يروح ويرجع مرتين لنفس المكان والاجواء الي يريد يخلص منها !! وهو جان يكدر يطيييير بعيد ويروح لاحبابه !
خبال اني السويته  خبال ..
.
هذا رأيي حاليا بنفسيتي الزفته المزفته
بس يجوز منا لما جلبة كونيور تجيب
واشوف الجلوبات يعوعون بالبيت
اصير ريلاكس واشوف الموضوع بي ايجابية
شويه يعني ..

كفيلكم الله الهرمونات هي كارثة البشريه
احنه انطاح حظنا من وره الزقنبوت الاسمه هرمون

ديلا هسه بعد اكوللكم چاووو

♣️♥️

حسنا الان لتكونو معي قليلا ..
لأجيب بعض الاسئله لكم ..

جزء ثاني ؟ .... نعم

متى ؟ .... بعد حينٍ طويل

نهاية القصه ؟ ... لربما حياه

...

لنكتفي بهذا القدر  ..
وننتقل عبر هذا الباب لطريق اخر قد شُق من بين صلب الموضوع هنا ..
من شخوص متابعيه ومن متجانس افكاره

ان شئتم متابعة ( باب صريح آخر )
فانا قد انشئت لكم مبتغاكم ..

في قصه ( ضاد و عين ) تجدونِ ارحب بكم

✍🏽 Zoka