مساء الخير
اغصان تتحرى البليل
الجزء الثامن
لبست حجاب وطلعت اركض..
امي واكفة بالباب وتتراجف..وصلت يمها
واباوع ابوي صعدو بسيارة الشرطة ..
الناس واكفة تباوع..اخذت امي دخلتها جوا..
ترجف ولازمة ايدي..ابووج ابوج خذته الشرطة..
ميخالف سمي بالرحمن يمه لا تطيحين عليه
وين اوديج منو الي حبوبة..
هسه اروح لبيت ام دعاء اخابر عمي واكله..
كعدت بالكاع وايدها حاطتها ع راسها وتون..
ياعمج يمه ياعم هذا..عمامج تبرت من ابوج
من سمعو بسالفة فيض..
يعني شنو شلون؟
مو خابرتني مرت عمج وسولفت الها كلشي..
درو عمامج بسالفة ومخابرين ابوج..
كايللهم لا يوصلي احد ولا يتدخل ...
ابني وكيفي احركه اسجنه معليكم..
مخابره عمج الجبير وحاجي ويا كايله اجيك
للبيت اليوم العصر..
كايم ومتعارك ويا وكايله لا تجي انا مو بالبيت..
ومن يومها وعمامج كالبين عليه وكلوله
ماعدنا اخو اسمه ثابت بعد..
احنا متبرين منك للموت..حتى بجنازتك
لا نجي ولا نوصل..
ااه استغفر الله ربي..طبعا حقهم يمه
حقهم..
بس مع هذا نخابرهم ونشوف شيكولون
اكيد مايتركوه..
روحي وانا اتانيج يمه لا تتاخرين كلبي نار..
صار يمه صار ..
رحت لبيت عباية امي وشحاطتها وطلعت
لبيت ام دعاء..
دكيت الباب ..محد طلع..دكيت هواي
يلا طلعت ام دعاء وامبينة نايمة..
استقبلتني المرة ورحبت بيه..
ومن كتلها جابت الفون وانطتنياه..
طلعت رقم مرت عمي من تلفون امي..
خابرتها وسلمت عليها..
حجيتلها كلشي..تنهدت وحجت بخجل..
هذا عمج يمه وحاجي والله يعينكم..
اخذ الفون عمي وحاجيته..جان جوابه
مختصر..شوفي شمسوي ومنو يطلبه
فلوس وماناطي وهالاخذوه الشرطة..
لا تخافين عليه عمي باجر يطلع وان مايطلع
بعد احسن..شلكم بأذيته وضيمه..
من سمعت جوابه ماطولت بالحجي..
سلمت عليه وسديت الفون..
تشكرت ام دعاء وطلعت..
رجعت لكيت امي عامية عيونها من البجي
ولازمة ظهرها وواكفة..امي عدها فقرات
وبس تنقهر يهيجن عليها ..
والايام الفاتت جانت كلش متأذية..
بس دخلت باوعتلي وامبينة تعرف الجواب..
ها شكال عمج !
مثل ماكلتي..كالو مصيره يطلع ويعني
مالهم علاقة..
كعدت وهي لازمة ظهرها..ابوج ضيعنا
ضيع روحه..
بقيت صافنة عليها دموعها تصب وتسولف
وي روحها وتلوم..
رحت للغرفة لبست صدريتي مالت المدرسة
وتشيرتي الاسود وحذاء الجوزي الجابته
سجى..
لفيت شالي وطلعت ..باوعتلي ومسحت عيونها..
وين يمه وين رايحة؟
يمه رايحة للمركز اشوف ليش ماخذين ابوي..
وين تندلين يمه شلون ترحين..
اندله قريب على مدرستي ..وراح اروح
مشي ..حجيت بحسرة..
بقت مصفنة عليه كلشي ماحجت..
طلعت من البيت والدنيا ظهر ساعة ثنتين
ونص تقريبا او تلاثة..
امشي وافكاري تتلاطم براسي..وين راح
يوصلنا هالأب ماادري..
من تفكير لتفكير وحجاية تجر حجاية..
لكيت روحي كدام المركز..
قويت نفسي وسلمت امري لله ودخلت..
اتذكر مكان غرفة المقدم صفوان..رحت امشي
ووكفني شرطي جبير ..
وين رايحة بوية المن رايدة؟؟
لمكتب المقدم صفوان..
باوعلي بتركيز ..انت من اهله؟؟
لا مو من اهله..حجيتها ومشيت..
صاح عليه ماجاوبته..
امشي واباوع للابواب وشنو مكتوب
عليها خاف اتيه المكتب..
لحد ماوصلت اله..جانو ثلث شرطة
واكفين بالباب يتناقشون..
وكفت وسلمت...السلام عليكم..المقدم
صفوان موجود؟
التفتو الي وبين النظرات الجريئة
ونظرات الاستغراب ..جاوبني واحد منهم..
اي منو انت؟
يعرفني هو قضيتي يمه ..حجيت هالشي
حتى لا اسبب بحجاية عليه او ياخذون نظرة
عنه وهو خطية انسان ماضرني ماريد
اضره حتى لو بدون قصد..
فتح الباب الشرطي..هو جان كاعد بمكتبه
ومدنك ع لابتوب مامنتبه..
الولد طلع وسد الباب وانا وكفت بمكاني
وسلمت..السلام عليكم ..
باوعلي ..كام وكف..عليكم السلام شلونج
لهفة..حجه وهو يطلع من ورا مكتبه..
الحمدلله شكرا..
اجه وكف كدامي واشرلي..تفضلي هنا..
كعدت وكعد كدامي..
شنو وضعج ان شاء الله زينة ..
تنهدت ونظراتي حايرة..ابد مو زينة..ابوي
يمكم مو؟
جر جكارة وورثها..باوعلي بنظرات مامفهومة..
ليش اجيتي للمركز وانت بنية؟
لان محد النا ..محد يسأل عن ابوي لو راح
يبقى سنة..ومن ايده خله الناس تكرهه..
دنك نظراته لايديه ورجع باوعلي..شبيها ايديج؟؟
هو حركني ..مو مهم الاهم هسه وينه وشنو
قضيته.؟
بس بالاول اريد اعرف انت ساعدت فيض؟
هز راسه ونفخ الدخان..اي انا ..ليش ماخابرتي
من اول ماصارت مشكلته وي ابوج؟
ماعندي فون ..حجيت وانا ابعد نظراتي..
ماتوقع ابوي يشتكي هنا بعد ما انت طردته..
اي هو ماشتكى يمنا صح..اشتكى بغير مركز
بس حولوها النا لان مركزنا يخص سكنة
منطقتكم..
زين شنو صار يعني شلون طلع فيض..
ماسجلت قضية وخابرت النقيب الي بذاك
المركز يسد السالفة ..
طلعت اخوج كتله ابوك اعرفه وبيني وبينه
حساب اريد اصفي وادري بي جذاب
لا انت ضاربه ولا مهدده بسلاح..
فتحت عيوني متفاجئة..اذا هيج انتو
متأكدين ليش اجيتو فتشتو البيت؟
ابتسم نصف ابتسامة..هيج اجراء
روتيني حتى ابوج مايشك ..هو عباله
اخوج انسجن..
هو متعود يضربج ويعاقبج؟
اي هو اصلا اليوم الي مايعاقبني بي يتحسف..
بعد مايأذيج ارتاحي منه..
لا ماريده ينسجن..هسه شنو تهمته بضبط؟
من اجه للسجن جاب سلاح..كال هجم عليه
ابني بي..سالنا وحققنا السلاح المن
يكول لابني مو الي ..واخوج كال اله ..
بعد اخوج طلع وفهمته يسافر هالفترة..
واخذنا ابوج بتهمة حيازة سلاح..
يعني شنو وضعه هسه؟
ينرفع محكمة..وياخذ حكم بالثلث سنوات وغرامة..
سجنننن!!حجيت بأنفعال..
ايي سجن..خل ينسجن ارتاحو منه شنو
فايدته..
لا عفية..هو السلاح مالته ترى يعني الاعرفه
هو مرخص..ليش مايعترف ؟
لان تهم بي اخوج..
بس هذا مو حل ..يعني هو رجال جبير مايصير
يتبهذل بالسجن ماتررهم..
يابه هنياله..فوك المسوي بيكم كله..اخوج يوصي
عليه وانت مقهورة عليه..هنياله ع هيج خلفة ..
ميخالف شما يسوي هو اب وحرام علينا..خصوصا
ماعنده احد يوكفله..
الله بخليك انت انيان نزيه ووكفت وياي من اول لحظة
شفتني بيها..
لا تخلي يتبهذل وهو بهالعمر ومحد اله..وماكو غيري
تدور وراه وتشوفه ..يعني تقبلها ابقى اركض من مركز
لمحكمة لسجن..
وليش تجين اصلا؟؟انت بنية وهالاماكن مو الج ولا
يصير تدخليلها..
لاا مدام ابوي هنا واجب ادخلها..لازم ادخل واحاول
اساعده بالاكدر اله..
ماتساعدينه..خلي ياخذ جزاءه..وانا شايل
ايدي من موضوعه كلش..
كمت وكفت وسالته باصرار..يعني ماناوي تساعده؟
يجووز اساعده حتى اثكل عليه الحكم لو ادبرله
سالفة تودي اعداام..
هذا هو مشكور ماقصرت..مع السلامة..
فتحت الباب بسرعة وطلعت..
محتارة وين اروح والدنيا ضيكة بعيني..
صح هو مأذينا ومتعبنا ومعيشنا اسود عيشة..
بس يبقى اب وحرام نعوفه بشدته..
رجعت مشي للبيت..اول مادخلت ..امي كاعدة
بالحديقة وتنتظرني..
بس شافتني كامت وهي لازمة ظهرها..
هاا يمه بشري؟؟
اخذتها دخلتها جوا وحجيتلها قضيته..بقت تلوم وتنعي
وزاد حزنها من سمعت حكم وغرامة..
كابلتها وبقيت محتارة شسوي وشنو الحل..
راسي احسه صار شكده وانا افكر بالمصيبة ..
ملتوصلت لحل غير اتركها لباجر ونشوف شيصير..
رحت لغرفتي تمددت تعبانة وجسمي مكسر من المشي..
خليت كتابي يمي وكعدت اقرا..
خلصت وطلعت لامي..ع نفس كعدتها بالهول وساعة
تلوم ساعة تحجي ساعة تسب بعمامي لان عافوه..
وع هالوضع خلص اليوم..
يوم ثاني رحت للدوام وكملت دروسي وطلعت..
وصلت قريب بيت هالة ورجل تقدم رجل تأخر..
اريد ادك الباب واشوفها شوية اسولف وياها..
بس ماريد اختلط بهذا التافه..
من بعد تفكير مستمر..وكفت يم الباب ودكيته..
شوية واجاني صوتها تصيح منو..
انا لهفة..قربت حلكي للباب وحجيت بهدوء..
انفتح الباب بسرعة..جرتني من ايدي فرحانة ودخلتني..
شنوو هالمفاجئة التجنن ..ولج مامصدكة شكد
مشتاقتلج...
اخذتني للمطبخ كعدت يمها جانت تطبخ وصبتلي
ماي وانطتنني وهي تسولف..
حجيتلها كلشي وهي بس عيونها نغوركة ومبرطمة..
طول عمرها ماتعرف تجذب بحزنها..
باوعتلها بخزرة..شنو راح تبربرين هم؟اكوم اهج
احسن..
لزمت ايدي وضحكت..ولج مقهورة من وضعنا..
لا تخافين تنحل..
رجلج شلونه وياج.؟
هه ..هو انا شايفته اصلا..
عود هاليومين يروح يشتغل..بس يرجع ياخذ الحباية
وبعد ماشوفه..ولو حاجيته يشبعني دك ..
عمتي تتدخل وتفكنا..
الله يعينج..عمتج وين صدك..
نايمة هم..تنتظر الغدا وغفت بمكانها ..
وهذا الشفية هنا يعيني؟
لا اليوم طالع للسغل ..
الحمدله الله يهدي..لعد اروح هسه انا ودربالج
ع روحج..بوستها واريد اطلع..
سمعنا الباب البرا انفتح..
للحكاية بقية
كلش اعتذر منكم لان بقيتو تنتظرون..بس هذا الكدرت
عليه نص بارت وباجر هم انزل ان شاء الله..
بس طول اليوم ع وكفة وحدة وعندي خطار قبل شوية
يلا راح قيم وقسم باتو عدنا..وانتو قيسو من يصير الاحتفال
ببيت واحد 🥳