جذبني فمك البني

البارت السابع والثلاثون

حرت والحيرتني انت ..
ضعت والضيعتني انت
فرح انت ..حزن انت
تعذبني واكول للناس مو انت
يسألوني وشكول اني واكلهم حبي بجاني

كلبي الي جرحته وياك ينسى جروحه علمته
اذا تجرحني شي عادي واموت لخاطرك عادي
نار البعد تحركني ..جروحك ما تفاركني
هواك الكي ..واشمك بيه
حبيبي اتمنى لو الكاك ..لكن انت وين انت

________

(مشهد بين الماضي الحاضر )

غرفه بيضاء بالكامل، ومضاءة بمصابيح بيضاء، وارتدي ملابسي البيضاء، طعامي أبيض اللون كالأرز الأبيض. ليس هذا فحسب، بل يجب أن يكون المكان صامتاً تماماً لا استطيع سماع شيئا سوى الأصوات التي تصدر مني

عزله تامه
بهذه العزلة لا اتحدث لاحد ولا احد يتحدث معي
بياض مع حرمان حسي + عزلة قادتني

الى

إزالة المحفزات من الحواس الخمسة

الضوء والصوت، والرائحة، واللمس، والتذوق، ومن ثم الهلوسة.

الهي لا اتذكر من انا والى من انتمي من هم عائلتي من هم احبابي شعور يعبر عن البؤس النفسي لدرجة فقدت التعرف على الاشخاص المعروفين لدي ......ولكن ....

عطتتتتتتتتتتت بعلو صوتي

سيلين : اه ه ه ه ه ه ه ه ه ه ه ه

دخلو ثنين للغرفه ماعرفهم منو بالاصح عقلي مكاعد يجمع حتى اعرف ذوله منو بس اللي سمعته ومتأكده سمعت صوت واخيرا...

_ الف الحمد لله حجتتتتتتتتت سيلين كعدت كعدت ....

_ شنو شبيج

_ ماريد ارجع بذيج الغرفه ماريد ماريد..

_ رجعتي تحلمين نفس الحلم ...

هزيت راسي اي...

_ عرفتيني اني منو ؟؟

باوعت عليهم ثنينهم..

_ اي عرفتكم ....

_______

الماضي

من اليوم بلشت حرب الكبرياء وما اصعبها من حرب...

من بعد ما مرت ايام على المشيه مالتي اجاني بيوم دكتور سامر للقسم طلعنه ورحنه كعدنه بالنادي جانت ساعه تسعه ونص ...

سامر : شلونج

سيلين : زينه الحمدلله..

سامر : الحمدلله صحتج لان اريد اتعرف عليج اكثر يعني ميصير نتزوج واني كلشي ماعرف عنج لو انتي شنو رأييج.

سيلين : اكيد حقك بس اني لان مامتعوده اكعد ويه ولد غريب ونسولف وحدنه لهذا جنت ارفض بكل مره تطلب بيها نلتقي.

سامر : بس اني ما اعتبر غريب اجيتج من الباب وطلبتج .

سيلين : صح بس هم ما اكدر ياريت اليوم نحجي كلشي وهاي الكعده متتكرر اله بشي رسمي...

سامر : شنو ادهم ميقبل لو انتي متردين..

سيلين : لا عمو شعليه بس كتلك اني مامتعوده.

سامر : ماعرف شبيه ويايه احسه متغير وكاعد يتحسس مني اقل كلمه احجيها وياه يتنرفز.

سيلين : شويه تعبان و عنده ضغوط بلبيت.

سامر : هاا الله يساعده اذا هيج بس عندي سؤال اذا مابيه احراج الج...

سيلين : لا عادي كول حقك تعرف عني كلشي..

سامر : شعجب عايشين يم ادهم اهلج وين عمامج خوالج ، ليش طلبتي اطلبج من ادهم..

جريت نفس قوي سكتت ودنكت عيني كمت اخوط بالجاي ...
سامر : اذا بيها احراج الج لتحجين .

سيلين : لا مو قصه احراج بس ما اريد اتذكر .

سامر : ياريت يكون بينه صراحه اكثر بخصوص حياتنه اني بالنسبه اليه واضح جدا ضلت يمج انتي شوكت تحجيلي.

باوعتله ودنكت وبديت احجي بدون ما اخلي عيوني بعيونه..

سيلين : ابويه توفى قبل كم سنه وامي تزوجت وره فتره ، عشنه يمها فتره معينه وبعدين رجعنه لبيت جدي لان مكدرنه نتعود على وجود زوج امي وبنفس الوقت اثرت بتفسيتنه علاقه ماما بزوجها.

سامر : من اي ناحيه اثرت بنفسيتكم.

سيلين : تعرف البنيه تكون حساسه زايد وعدها الاب فدشي مقدس خصوصا اذا جان حنين ويحبهم لهذا مكدرنه نتقبل فكره امنه تحب وتتزوج شخص غير بابا.

سامر : زين ليش رحتو بيت ادهم بعدين.

سيلين : رحنه بطلب من عمه لان تمرضت وضليت يمها اداريها لحد ما توفت الله يرحمها.

سامر : الله يرحمها يعني هذا السبب اللي اخرج على دراستج.

سيلين: اي هذا السبب

سامر : شعجب مرجعتو لبيت عمامكم وره ما توفت عمتج.

حرت هنا شنو اكله احس طاقتي خلصت.

سيلين : السبب مريم تعلقت بينه هواي وعمو نفسيته تعبت وتمرض والتهى عنها لهذا السبب طلب عمي نكعد يمهم.

سامر : بس ماكو هيج ماسامع عمام يسمحون بهذا الشي خصوصا عمامج عدهم هواي ولد حسب ما سمعت شعجب ما اخذوكم يمهم.

سيلين : دكتور اني حجيتلك التفاصيل المهمه بحياتي اذا تضل تسأل شعجب وليش وماعرف شنو اختصر كلشي وانهيه لان هاي حياتي عشتها بهذا الشكل والاهم مغلطت بشي وحافظت على نفسي واختي رغم غياب الام عن حياتنه وعمو ادهم جان ولازال اب النه ونعم الاب يعني اذا اكو شكوك ابالك حول هذا الموضوع ننهي كلشي من هسه ....

سامر : تغيييره المفاجئ ويايه بعد ما تقدمت الج صدمني وهذا اللي زرع بذره الشك بداخلي انتي هم راعي شعوري ...

سيلين : دكتور كتلك شعوره ابوي اتجاهنا ويخاف علينه هواي حتى اختي كم مره تقدمو الها مقبل ينطيها ..

سامر : شنو السبب؟

سيلين : يريدنا نكمل دراستنه.

سامر : ها اذا هيج تمام بكلامج رضيتي فضولي وبعدتي الشكوك الخيمت على عقلي.

سيلين : وارجع واعيدها اذا عندك شك بشي حول حياتنه الانسحاب هسه افضل من بعدين تصير مشاكل الها اول ما الها تالي.

سامر : لا لا ماعندي اي شكوك بالعكس اني حبيت اخلاقج واشوف تعاملج ويه ادهم بكل رقي واخلاق ومامتجاوزه الحدود بعلاقتكم ومبين مابينكم شي ، اهلي شويه استغربو الموضوع بدايتآ متقبلوه بس اني حجيت وياهم ووضحت بعض النقاط وانطرحت نقاط ثانيه رسمت شغلات مبهمه بعقلي وردت استفسارات منج واخذتها اليوم.

سيلين : حقكم والحمدلله من فهمت اذا ماعندك شي اروح ..

سامر : تصعدين يم ادهم لو ترجعين للقسم.

سؤاله خنكني ماعرف ليش ، يعني اذا اكله اي منتظرني نتريك سوه اشوفها صعبه وما راح يتقبل واذا كتله للقسم عمو راح يتصل منتضرني رغم منحجي هواي وشايل بكلبه عليه بس نجي للدوام سوه ونرجع سوه ونتريك بس ساكتين كله على الصامت ، بحيت ايقنت هذا هو تقبل الموضوع وبلعه..

سيلين : لا ارجع للقسم.

سامر : تريكتي ؟لو بعدج.

سيلين : لا بعدني

سامر : مممم لعد لو كايله من جبت الجاي اني شلون ماعرفت لان مشفتج صعدتي اليوم واكلتي، بس كلت جوز اكلت بالنادي ، شنو رأيج نتريك سوه ..

سيلين : هسه ..

سامر : اي اني هم ممتريك.

سيلين: بكيفك.

ابتسم وكام دكم سترته وراح يجيب ريوك.

طلعت موبايلي باوعت اكثر من عشر مكالمات ورساله كلهن من عمو ، جنت خالته صامت لان عندي محاضره ونسيت افتحه ...الرساله كاتب بيها

وينج طولت المحاضره شنو ماعدكم ريست اليوم؟

الرساله الثانيه كاتب.

سيلين مامتريك منتظرج ؟

جريت نفس قوي وزفرته ، خليت موبايلي على الميز وغطيت ايدي بوجهي ، شنو اسوي فهمني شنو اسوي ، هاي نفسيتي متتقبلك غير اب متتقبلك ...

سامر : هاا نعسانه..

حجاها وخله الاكل على الميز و كعد ...

وخرت ايدي من وجهي وباوعتله انتبه عليه ضايجه عكد حاجبه وكال..

سامر : ضجتي من كلامي اسف بس ردت اعرف مادري راح تضوجين.

سيلين : لا بس نعست منايمه زين.

ابتسم وكال.

سامر : يلا من ترجعين نامي ، اكلي مادام الجاي حار.

سيلين : عاشت ايدك.

مديت ايدي اكل بلعت اول لكمه وبيها الف غصه ، شلون راح اكمل حياتي وياه واني احس بنفسي ممتقبلته وبنفس الوقت اريد اخلص من شعور الاهانه اللي كاعد اعيشها كل يوم بيت ادهم من حجي وتسميعات سواء من امه او اخواته وفهد وحتى ابوه اخر فتره كام يسمعني ، بعد ما اتحمل ابد ، مجرد مرت هاي الاشياء على بالي نزلت دمعتي ، همس..

سامر : كتلج ضجتي من كلامي ليش تنكرين..

مسحت عيني وكتله

سيلين : ماكو شي تراكم مشاعر سيئه مرت على بالي مثل الطيف اللي يكون عباره عن كابوس وتكعد منه تقره ايات ترتاح وترجع تنام فلتهتم..

سامر : حبيت وصفج للحاله ، كل يوم يزيد اعجابي بيج اكثر ..

سيلين : هاي اثار الزرعها بيه دكتور ادهم ، شنو عندي من علم وثقافه وهدوء وركازه السبب الاول اله بفضله اني هيج صرت.

سامر : مممممم بس بديت اغار تره.

سيلين : اتمنى من كل كلبي تفصل بين الغيره والشك ، حقك تغار والرجل بدون غيره مايسوى يتسمى رجل ،
واني راح اتجنب اي شي يثير غيرتك عليه احترام لشخصك، بس بنفس الوقت عمو ادهم ما اريد اقاطعه الله يخليك..

سامر : بس اني مكلت هيج وانما اسلوبه وتغيير تصرفاته ويايه زرعت شك بكلبي وضجت يعني صار اسبوعين من تقدمت الج ، لا انتي الداومتي ولا هو حجه ويايه ويتجنبني ...

سيلين : كتلك عنده ظروف خاصه بلبيت ..

سامر : هاهيه مصدكج هذا رقمي سجليه يمج واتصلي عليه علمود اخزن رقمج ..

سيلين : ماشي..

اتصلت عليه وخزنه الارقام..

سيلين : اذا ماعندك شي بعد حتى اروح عندي محاضره..

سامر :لا ماعندي شي امشي اوصلج..

سيلين : براحتك..

كمت وهو هم كام طلعنه من النادي تمشينه وصلنه للقسم واشوف عمو واكف باب القاعه وبيده الموبايل عاكد حاجبه ويباوع بيه وصلنه يمه ...

سامر : ها دكتور عندك محاضره هنا

رفع راسه باوعلي خزرني ورجع باوع لسامر كال.

ادهم : اي عندي محاضره هنا .

سامر : هاا لعد اني راح اخذ الثالث بدالك.

ادهم : اخذتهم بمكان ابو اللغه غايب اليوم ...

سامر : لعد عندي شاغر اروح ارتاح.

هز راسه عمو بدون ميحجي التفت عليه سامر وكال

سامر : اروح اني محتاجه شي.

ردت اجاوب عمو جاوبه.

ادهم : ليش محسسني داخله لحرب تره محاضره عدها..

سامر ضيق عينه وكله.

سامر : ماكو داعي للتوتر دكتور ماكلت شي ..

ادهم : عندي محاضره بعدين نحجي لو شتكول نضل واكفين بالباب ونسولف..

سامر : لا اخذ راحتك رايح اني.

راح والتفتلي ..

ادهم : وين جنتو؟

سيلين : بالنادي ..

ادهم : وموبايلج متعرفين تجاوبيني شكد دكيت عليج.

سيلين : جان صامت

ادهم : هااا صامت لو ميعجبج اقطع حديثكم.

سيلين : ماكو شي مجرد كلام عادي

ادهم : اعرف عادي بس انتضرتج نتريك ليش مصعدتي.

سيلين : تريكت ليش انتضرتني..

ادهم : هيج صارت ؟؟؟

سيلين: عمو افهمني تره تعبت.

ادهم : دخلي عندج محاضره..

جريت نفس ودخلت كعدت ...

اول ما دخل سلم على طلابه كالعاده وبلشت التراحيب بدخوله كلش يحبوه ويحبون محضارته ينتظروها بشغف وهو كل اسبوع ياخذنه مره وحده بس بهذا الاسبوع تكررت محاضرته اليوم تعتبر ثاني محاضره خلال هذا الاسبوع ، من بعد التعريف والنبذه عن المحاضرات السابقه بلش بالموضوع اللي كسر كلبي وخلاه يصير الف قطعه مثل الزجاج من يتكسر وصعب يلتم واذا لميناه راح يجرحنه ويأذينه..

ادهم : اليوم محاضرتي راح تكون خاصه بجهاز من اجهزه الجسم اللي يسير الانسان بصوره غبيه جدا ، ودائما يشعل فتنه وحرب بينه وبين الجزء الاكبر والاهم والاذكى من باقي اجهزه الجسم وهو العقل البشري ..

كبشر دائما نعيش صراع فكري عاطفي والذكي اللي يكدر يفصل بينهم والربح الاكبر يخليه يخص العقل...

لكن مهما كان الانسان متقدم بمراحل عمريه او فكريه او علميه لابد عنده ثغره بحياته تكون عباره عن عثره او غلطه ..

هاي الغلطه ممكن تكلفك عمر كامل او ممكن تهدم شخص قوي ومحارب..

نبلش اليوم ب اقسى شعور يعيشه الانسان بهاي الدنيا

بدايتآ بتعلق ومن ثم موت ، التعلق من يتبعه موت هذا اكبر حطام للأنسان خصوصا اذا الخسرته انسان عزيز عليك وتحبه من اعماق قلبك لكن الاصعب والامر من تتعلق بشخص عايش ويبتعد عنك بأرادته..

يحجي والف غصه وغصه بصوته وعيونه اللي تلمع من بعيد متروسه دمع ومتقبل تنزل دمعتها لان كرامه صاحبها اهم ...
استرسل بالكلام ..

ادهم : تتصور انتهت حياتك هذا هو وصعب تعيش مره ثانيه و بهاي الفتره يلتم حواليك المحب والمنافق وكلمن ينطي رأيي ونصيحه ممكن تستفاد منها وممكن تهملها بذاكره المهملات العقليه..

بعد فتره يدخل انسان لحياتك هذا يبدي يزرع بذره حلوة بداخل نفسك ويسقيها كل يوم والبذره بدت تكبر شويه شويه الى ان صارت شجره وتجذرت بداخل اعماق نفسك وبدت تثمر وانت بديت تحصد هاي الثمره بس انت متدري او ما حاس بنفسك عندك هيج ثمره وقريبه من قبلك الى ان بيوم عصفت الرياح واقتطفت ثمره من هاي الثمار وانت اخذتها ولزمتها بيدك وتريد تاكلها او تقضم منها حتى تضوك طعمها بس بنفس الوقت هلكد ما حلوه هاي الثمره تخاف ومرعوب تضوكها لا يخرب شكلها ،

انت هنا تقرر تضل تتفرج عليها وكل يوم تجي تصقلها وتلمعها وتضل تزهي افضل من ما تشوه شكلها ، من بعد ما صارت نظيفه وتلمع وشهيه ، يجي انسان عابر ياخذها ويروح شنو شعوركم اريد تسولفون وانه استمع.

راح كعد حسيته تعب او راح يفقد توازنه لان حجه بحركه بحيث الطلاب كلها تعاطفت وياه خصوصا البنات واني من ضمنهم بحيث نزلت دموعي وارجع امسحها وترجع تنزل مره ثانيه..

الطلاب كل واحد حجه شكل وشرح وجها نظره عمو يسمع الهم وعينه عليه ماعرف يريد يكلي شلون افهمج اكثر من هيج ، اعترفتلج كدام الدنيا كلها شنو تريدين اكثر.

واني عقلي رافض يستمع وكلبي كاعد يناقضه بهواي امور فعلا شعل الحرب العقليه القلبيه بداخل نفسي...

نفسيآ غير مهيئه لكلامه ، لا اكدر انطي نفسي فرصه واضل كاعده وياه عسى ولعل راح اتقبله واضل اسمع كلام يحرك الروح حرك ويهين الكرامات ، ولا اكدر اتزوج واعوفه بعد السمعته اليوم ...

طالب من الطلاب كال..

_ استاذ اللي فهمته من كلامك تقصد الحب من طرف واحد.

ادهم : صح ، فكره الموضوع هذا ، والاهم نريد نعرف شلون نحسس المقابل احنه تحبه من طرف واحد اريد اسمع المايك الكم.

طالب رفع ايده ، هزله راسه بالقبول يعني احجي..

_ استاذ الاهتمام هو بالدرجه الاولى اذا جان الانسان مهتم بالمقابل المفروض يحس هذا الشخص يحبه.

ادهم : صح وبعد..

حجه طالب ثاني.

_ التواصل سواء بالحقيقه او بالتواصل الاجتماعي يبين الشخص حبه عن هذا الطريق...

ادهم : ممممم صح

حجاها وباوعلي دنكت بس شنو احس جبل صار على صدري لا هو كاعد يفهمني ولا اني كاعد اتقبل حبه الي وتغير مشاعره واهتمامه من حب ابوي لحب عاشق متيم ولا هو كاعد يستوعبني ...

طالب ثالث كال.

_ الاعتذار عن الخطأ اذا دائما الطرف يتنازل ويعتذر للطرف الثاني هذا معناها يحبه وميريد يخسره بكل الاحوال.

كل واحد حجه شي اخر شي هو كام وكف وكال.

ادهم : نسيتو اهم فقره وهي اختلاف الاولويات من نشوف الحبيب يخلي حبيبته على رأس اولوياته والعكس صحيح ، بمعنى ميأجل اي احتياج الها ميرفض مكالمتها لو بعز انشغالاته ، يضل متلهف لاستقبال رساله حتى لو كانت سمايل فقط ،

يفضل قضاء الوقت وياها ويفصل عن الاخرين يضل التواصل وياهم شي يدل على صله الرحم لا اكثر ،

لكن عندما تحسس المقابل هو بآخر القائمه بالنسبه لباقي الاشخاص الشاغلين حياته وبشكل متكرر ، يبدي انزعاجاته من اهتماماتك او يضع مبررات مختلفه لتجنب اللقاء بيك هذا يدل على حبك من طرف واحد..

جنت استمع اله بكل انصات الى ان اجتني رساله فتحتها قريت اول سطر وانسحب الموبايل من ايدي وحجه بنبره مليانه غضب بحيث احرجني كدام الطلاب.

ادهم : من عدنه محاضره وكاعد نحجي ممنوع اي شخص يستعمل موبايله بداخل القاعه هذا يدل على عدم الاحترام للمقابل لو شنو رأيج ست....

وجهي صار احمر قطره دم مضلت بيه حرك دمي جاوبته برد اقوه من تصرفه وحجيت بصوت عالي
ومسموع بحيث الكل سكت وضل ينصت لكلامي.

سيلين : نسيت اهم شغله دكتور مذكرتها بخصوص العلاقه بين شخصين ، اهم شي بنجاح كل علاقه لازم تكون مبينه على التشارك والتعاون لانجاحها ، منها اذا جان احد الاطراف شخصيته سلطويه ( متسلط ) وميترك للطرف الاخر فرصه التعبير عن البداخله ،

او يخليه يعبر بس ميفهمه يفهم اللي يريده بس ، والاهم يكوم يضيق عليه حياته بحيث يقلل علاقاته سواء مع العائله او الاصدقاء ، ويكوم يتحكم بيه سواء باللبس او بطريقه التصرف الى ان يخليه نسخه مستنسخه منه ،

بهيج راح يحس اكو توافق لهذا حب الارتباط ، وهذا دليل واضح على عدم وجود حب متبادل والاهم الانتباه على هذه التصرفات بأنها غير صحيحه ولا ينبغي لاي شخص ان يقبلها بدافع الحب يعني بين قوسين ( الشريك المتحكم ) وانت دكتور وافهم مني بعلم النفس ،

اذا كان الانسان ما متقبل اكله معينه يصير نجبره ياكلها ، او ميحب اختصاص معين هل من الممكن ان يبدع بيه ، اني هذا اللي تعلمته من حضرتك وهذا اللي زرعته بداخلي ، التقبل يعني التوافق بين الاطراف..

سكت بكل كلمه احجيها يسوي حركه شكل حسيت قسيت عليه بس اريد احسسه ما اريد اخسرك كافي لتحجيها لان راح اترك كلشي واعوفك بس شلون افهمه شلووون...

ادهم : اخذو راحتكم طلاب ..

اخذ جنطته وطلع واني ضليت بمكاني كاعده ورجلي تهتز اخذ موبايلي وياه وصعد طلعوا الطلاب واني كاعده بنفس مكاني وين اروح هسه وشلون راح اكمل الايام وياه...

فعلا صارت بينه حرب مشاعر

باوعت على الساعه صارت ١١ ونص خليت ايدي على الستول وغمضت عيني ، متت قهر يعني ليش هيج سوه وليش اخذ موبايلي مرجعه معقوله يكعد يفتش بيه واني اصلا محاجيه شي ويه سامر اول مره نتراسل هسه عباله كل يوم عندي اتصال بيه وهو شبيه موبايلي بس محادثاتنه اني وعمو جريت نفس طويل وتعبت من التفكير تالي غفيت مادري بروحي ،

حسيت بهوسه الطلاب وسوالفهم كمت لكيت الاستاذ توه داخل التفتت لسرى ...

سيلين : شوكت اجه الاستاذ صار هواي.

سرى : لا هسه دخل

سيلين : ها زين..

بلشت المحاضره واني بالي كله يمه اريد اصعد احجي وياه اريد افمه ما رايد اخسره ولا اخسر صداقته ولا اريده يكرهني ، ماعرف شكد مر وقت من المحاضره واندكت الباب انفتح سامر واكف مبتسم وسلم على الاستاذ وطلب منه اطلع وياه سمحلي الاستاذ اخذت غراضي وطلعت ..

سيلين : ليش طلعتني عندي محاضره..

سامر : مو ادهم تخربط وطلع للبيت وبلغني اوصلج ...

سيلين : عمو شبيه ..

حجيتها بضعف واحس كلبي كام ينبض بقوه بدل النبضه صارت الف...

سامر : مابيه شي قوي بس جان يحاضر واجاني طالب كال دكتور ادهم يريدك رحت كلي كمل بدالي راح اطلع للبيت وضعيتي مخربطه طلع بالممر جان اكو كرسي كعد عليه بس وضعه تعبان ، رحت جبت جهاز الضغط قسته اله جان صاعد بعد ماعرف وصل للبيت لا لان اتصل يدك ويفصل لهذا اجيت عليج علمود هم ارجعج وهم اشوفه.

سكتت ودموعي نزلت برهاوه من وحدهن كرهت نفسي وكرهت حياتي لان اذيته....

الطريق كله ساكته شكد حاول يحجي ويايه يفتح مواضيع بالي مو يمه بديت اختنك اكثر والنفس شح عليه وصلنه للبيت جانت سيارته طابكه بالباب حمدت ربي الف مره وشكرته واصل و مابيه شي ، نزلت دكيت الجرس طلعت امه ، سلمت عليها وبلغتها سامر يريد يشوف ادهم.

فردوس : وين يكدر راسه يموته وصعد نام.

سيلين: بس راسه لو بيه شي..

فردوس : ما ادري بس كال راسي واريد انام وصعد..

هزيت راسي ورجعت لسامر جان بالسياره فتح الجامه وحاجيته..

سيلين : والدته تكول نايم راسه يوجعه

سامر : مو مشكله اخابره واحاول امرله باجر.

سيلين : ماشي باي.

سامر : الله وياج..

حجاها وضحكلي..

رجعت طبيت للبيت جانوا بالمطبخ امه ونرمان سلمت ردت افوت سمعتها تكلها لنرمان..

فردوس : بله هاي وين صايره بنات غريبات يطبن ويطلعن بنص بيت مليان شباب هذا اخوج المتدين لو فهد مسويها جان شره على الحبل ..

نرمان : يمه لتندكين ب ادهم عوفيه تره تطخ براسه ياخذهن ويهج للخارج وبعد متشوفيه لاهو ولا بنته ستري علينه وخليه يمنه على الاقل يكدر يسيطر على فهد وخبالاته..

فردوس : فهد تغيير يايمه تغير وخايفه من هدوئه هذا.

نرمان : يمه السالفه فاتت والفات مات والولد حضر بعزه ياسه و وكف ويه ادهم بأعز ايامه بعد ليش شايله همهم.

فردوس: انه ابني واعرفه لو شكد متبات السالفه يطلع حقه يطلعه وخايفه على ادهم منه ليش اريد ابعد البنات لان بيهن راح ينتقم خصوصا سيلين لان اخوج يحبها انه حاسه لا عبالج وشفتي شنو سووه بوكت رجعته وشاف ياسه وعرف اخوج متزوج مو حتى احنه كلبنه عليها..

نرمان: بس السالفه صارلها هواي.

فردوس: خايفه خايفه اريد ارتاح ليلي مدانامه مثل البشر وابوج هم راح يصير بيه شي ولج ثنينهم عزاز على كلبي وكلبي محرووووك اذا صار بيهم شي اموت ..

نرمان : اسم الله الله ليكولها لتخافين حتى لو فهد تهور ادهم ثكيل وراكز راح يكدر يتصده افعال فهد بطريقه رزنه وعقلانه..

فردوس : لج يمه فهد ناوي نيه موزينه وكولي امي كالت اذكرج بوكتها..

نرمان : انتي سمعتي شي حجالج شي غير افهم.

فردوس : لا محجالي ولا سمعت بس كعدته الليل كله هاي تثبتلي فهد مناسي بعده.

نرمان : اخ اخ لو يرجع بينه الوكت جان منعنه هذا الشي..

فردوس : والخبله اكثر زواجها ديلوب عليها ديلوب...

نرمان : مو قسمته وهو لو مغلطان جان مصار بيه هيج..

فردوس : لج يمه حتى لو غلط بس عقاب اخوج جان قاسي عليه ...

نرمان : ادهم مغلطان من وجهة نضري..

فردوس : ثنينهم غلط جان حلوها بطريقه ثانيه مو هيج.

نرمان : سكتي لا احد يسمع والسالفه تتجدد والحقد يتجدد..

ضليت صافنه شنو هذا الشي الجبير بينهم اللي فهمته يخص بنيه بس منو وشنو الصار مفهمت انداريت اريد اصعد والكه ايفين هم واكفه تسمع جريتها وصعدنه لغرفتنه

سيلين : شنو سمعتيه جوه متحجيه لاحد ،،
هنا انتي خرسه طرشه عميه فهمتي.

ايفين : اي شعليه.

سيلين : اكيدددددد

ايفين : اكيدد

سيلين : عمو وين

ايفين : نايم بالغرفه سمعته خابر ايمن كاله جيبلي حبوب مال ضغط ..

سيلين : يبوووو

ايفين : صاير بينكم شي مو.

سيلين : ليش عود

ايفين : احجي اي لو لا

سيلين : لا بس ليش هيج فكرتي.

ايفين : لان من يوم اللي انخطبتي عمو مو هو تغير كلش هواي..

سيلين : ايفين لتدخلين ولتأولين الامور ماشي..

ايفين : ماشي..

بدلت ورحت للحمام غسلت وتوضيت فرشت سجادتي صليت وكعدت ادعي الله يبرد كلبه ويمسح حبي من داخله .

خلصت ورحت لغرفته فتحت الباب جان نايم وضوه خفيف داخل من البرده مبين شويه من وجها وباقي الغرفه ظلمه ، رحت وصلت يمه جان معكنش وجها مبين الالم ماخذ من حيله حيل ، مديت ايدي خليتها على راسه وقريت الدعاء العلمه اليه من تصير عندي الاَلام و وجع بجسمي او اي مكان جان يكلي سيلين خلي ايدج على موضع الالم واقري هذا الدعاء

(الله الله ربي حقآ لا اشرك به احدآ اللهم انت لها ولكل عظيمة ففرجها عني )

قريتها ٣ مرات وخليت ايدي اليمنه على موضع الألم ، بس اني بدل كلمه عني كلت عنه قصدت عمو بيها...

باوعت على ملامحه رخت ورجعت طبيعيه همس بصوت مقهور ومخنوك..

ادهم : اللي مرضتني هيه اجتي حتى تعالجني ...

سيلين : انت لو تعرف معزتك شكد جبيره بكلبي جان محجيت هيج اليوم ولا تصرفت هيج تصرفات اني ما اريد اخسرك هذا كل الموضوع..

فتح عينه واني سحبت ايدي و عدلت وكفتي ...

ادهم : ليش هيج دتسوين.

سيلين : شنو ؟

ادهم : انتي فاهمتني كلش زين بس كاعد تثوليها..

سيلين : اثولها صح لان ما اريد اخسرك ما اريد افقد نصائحك ولا ابوتك ولا حنانك ولا تقديمك النصيحه النه انت شي جبير بداخلي وكل يوم يكبر اكثر مثل ما شبهت حبك الي بشجره وتجذرت بداخلك انت بالنسبه اليه شي اكبر واعمق حبك يمشي ويه دمي ، بس حبي الك يختلف عن حبك الي لهذا مستحيل بيوم راح نتوافق ونعيش سوه ونكمل ..

ادهم : ليش ليش اريد افهم وين المشكله..

سيلين : المشكله الاكبر والاهم عمتي عايشه بيناتنه والشي الثاني اني وياك مابينه اي توافق اصلا نختلف اختلاف جذري وهذا الشي لا بصالحك ولا بصالحي..

كام كعد عدل وارتاج على الجربايه ، بده يحجي ويعكنش عيونه و دمرات كصته تدك لازمه صداع..

ادهم : بالنسه للأختلاف البينه انه اشوفه شي حلو وبهذا الاختلاف راح تكمل شخصيتنه...

سيلين : اني وياك نختلف بهواي امور اخذ وحده تشبهك صح اني مثل ميولك لكن افكاري تختلف عنك هواي..

ادهم : احنه انخلقنه عباره عن انصاف ، الاحلى والاجمل اذا اجتمعت هاي الانصاف سويه وكملت بعض انتي سامعه موجب يبحث عن الموجب لا لان راح ينفر منه لهذا دائما تشوفيه يميل للسالب حتى يكتمل ، وين المتعه اذا حبيتي شخص يشبهج بالعكس اذا اختاريتي شريك مختلف عنج راح تعيشون مغامره و كل يوم تكتشفين شي جديد عن الشخض المرتبطه بيه ...

سيلين : بس الصفات المتشابها اجمل واحلى بالنسبه اليه..

ادهم : الاختلاف اجمل ماكو متعه اذا جانو متفقين على كل شي ، ابسط شي من ندخل بنقاش انه و وياج ويصير بينه صراع فكري بين رأيي ورأييج انطيج براهين اقنعج بيها وانتي تنطيني امثله تقنعيني بالتالي واحد بينه يقنع ويعرف خطأة وين..

سيلين : عوفك من الحجي هسه شلون صرت..

ادهم : موزين والله موزين احس انعادت عليه ايام مرض ياسه وموتها كاعد اختنك ..

سيلين : خلص خلينه نتفق اشيل فكره الزواج من بالي وانت تشيل حبي من كلبك..

ادهم : يعني تكليلي ارضه بقدرك وخلص..

سيلين : عمو انت معيشني صراع وحرب نفسيه اني كاعد اموت لان كاعد تتأذه بسببي وبنفس الوقت كل يوم ابجي اخاف اخسرك افهمني والله ما اكدر ...

ادهم : الضاهر حضي محتاج لشي اكبر من امنيه ودعاء محتاج معجزه يا سيلي..

سيلين : عمو عيش حياتك مثل قبل شلون جنه عايشين ومرتاحين متكلي ليش تغيرت.

ادهم : اتعايش قصدج لان مستحيل اكدر اعيش طبيعي بعد..

سيلين : شلون لعد فهمني لا اني اكدر اقنع بهذا الحب ولا انت تقبل تتنازل ..

ادهم : صعب بعد ما ادمنت تفاصيلج الصغيره كلامج صوتج طريقه اكلج وكعدتج وحتى ميولنه بانتقاء الملابس وباقي الشغلات هوووواي نتشابه صدكيني هوواي.

سيلين: عمو اذا ضليت هيج تحجي اطلع من البيت.

سكت وضل صافن عليه دنك راسه وكال.

ادهم : روحي ارتاحي اريد انام.

سيلين : كوم تغده.

ادهم : ما مشتهي صدكي..

سيلين : لتزعل مني..

رفع عينه باوعلي ورجع دنك همس

ادهم : سدي الباب وراج.

طلعت ورجعت للغرفه شسوي حيره شلون راح اقنعه وشلون راح اكمل حياتي وشنو راح اكول لسامر ، اللي توها بلشت علاقتنه مددت ونمت كعدت العصر لكيت موبايلي يم راسي باوعت ايفين كاعده تتفرج على التلفزيون.

سيلين : منو جاب موبايلي هنا.

ايفين : ما ادري جنت اسبح.

سكتت كمت رتبت البيت ونظفته وكعدت اقره..

ايفين..

جانت سيلين بالدوام واني وحدي كاعده نزلت ردت اروح يم نرمان طكت روحي توني اريد افوت للمطبخ دخلت سيلين

واني دخلت بالغرفه اجتي رادت تصعد وبعدين وكفت يم باب المطبخ رحت وكفت وراها وثنينه سمعنه الحديث الدار بين نرمان وامها وفضولي اخ يافضولي ردت اعرف السالفه شنو ، من صعدت راحت يم عمو اني نزلت يم ايمن دكيت الباب كال تعاي ..

ايفين : نايم.

ايمن: لا كاعد اتغده مدي ايدج.

ايفين : بالعافيه فوك اتغده وياهم

ايمن : براحتج ، كعدي ليش واكفه

كعدت وره شويه سألته ..

ايفين : ايمن سؤال..

مدنك ياكل كال ..

ايمن : جواب.

ايفين: شنو سبب الخلاف بين ادهم وفهد ..

جان مدنك واللكمه بحلكه شمر الخاشوكه وكام وكف يمي مخنزر ..

ايمن : شمدريج منو حجالج.

ارتبكت حسيت نفسي جفصت للمره المليون ..

ايفين : محد كالي بس احس الجو متكهرب وتوتر بينهم..

ايمن: باعي اذا تردين تعيشين براحه بهذا البيت اي شي يخص ماضي فهد وحاضره ومستقبله متدخلين بيه ..

ايفين : زين ليش.

ايمن: انتي ليش فضوليه شعليج بالولد عرف ولف.

ايفين : وليش عصبي وتصيح.

ايمن: انتي متعرفين فهد شنو بعدج ، بس اكلج شغله اذا حس بيج تنبشين بالماضي لو يشك واحد حاجيلج متمر عليج سلامات .

ايفين : يعني شيسوي مثلا..

فرك وجها واستغفر رفع راسه ليفوك غمض عينه وبعدين باوعلي..

ايمن : الله ليشوفج وجه فهد الثاني مخبل رسمي معليج منه زين لو اعيد ايفين خليهم الله هاديهم علينه ومضل شي ونتزوج.

ايفين : اني بس سألت مسويت شي يعني لهذا ماكو داعي للأعصاب..

ايمن : سألي عن البيت كله اجاوبج اله فهد معليج منه.

ايفين: هذا هو ..

ايمن : اكيد ايفين

حجاها محذر..

ايفين : اي اكيدد

طلعت من الغرفه وضلت السالفه ابالي وفضولي كام يشتغل اكثر وكمت اريد اعرف اكثر ،

وبيوم عرفت بيه التحق نزلت لغرفته بليل من نامو كلهم دخلت وسديت الباب قفلتها علكت الضوه وضليت ادور بالمجارير وحتى الكنتور دورت بيه ،

ملكيت شي يروي فضولي طفيت الضوه وطلعت ، ثاني يوم جنت نايمه الصبح وسيلين بالدوام ،ما احس اله انشاليت من فراشي فتحت عيني اباوع فهد واكف وصاير نار بلعت ريكي من الخوف ، نزلني بالكاع ولزمني من متوني بكل قوته حسيت اصابعه نبتت بلحمي وعيونه وحده منهم غمضت ماعرف شلون اوصفها بس شي مخيف جان ، حجه من بين اسنانه.

فهد : شعندج بغرفتي البارحه..

فتحت عيني مصدومه وشهكت.

ايفين : اني مماااا
كمت امتمت حجايتين مطلعت مني من الخوف..

فهد : احجي ليش تدورين بغرفتي وين تردين توصلين.

ايفين : ما اريد اوصل بس هيج فتت والله ماعندي شي.

ضربني راشدي من قوته سمعت طنين بأذني..

فهد : احجي منو دازج عليه ..

ايفين : محد دازني والله

فهد : ادهم مو ؟

ايفين : لا لا اصلا ميدري والله هيج فضول.

تقرب عليه كلت راح يضربني كله براسه رجعت راسي ليوره وغطيت ايدي بوجهي.

فهد : بسيطه انه اعلمج فلا اعديها عليج ، مادامج اندكيتي بيه.

عافني وطلع انرعبت لابيه احجي لسيلين خايفه ولابيه احجي لعمو كلت اكيد ميسويلي شي وبس يهدد بس الصار !!!!!!!!!!!!!!!!!!!!

سيلين

من بعد ما حجينه اني وعمو حسيته تقبل الوضع بعد ما ادري ، رجعنه نروح ونرجع سوه وبيوم جنه كاعدين فوك اني وياه وفات سامر سلم وكعد كال

سامر : ليش متردين عليه من اتصل .

باوعتله ورجعت باوعت لعمو الي جان مدنك ويهز بالكرسي بهدوء ، مبين على ملامحه هادئ بس اعرف بيه لو بيده يكوم يكسره رجعت باوعت على سامر وكتله.

سيلين : اني ما احب هواي استعمل الموبايل وعلى طول تاركته لهذا ما اجاوب دائما بس اذا اتصال اسمعه المسجات ما اسمعها.

التفتت لعمو شفت ابتسامه خبيثه مرسومه على وجها الصراحه اني هم ابتسمت بداخلي، اني وياه مشتركين بهاي السالفه مال خباثه من نتفق على واحد.

سامر : المهم حبيت ابلغج البارحه اتفقت ويه ابو ادهم وحددنه موعد نكطع مهر وبعدين نسوي الحفله وره الموعد مال سنه عمتج لان انتي جنتي تماطلين بسبب هذا الشي حبيت ابلغج بالموبايل مرديتي عليه ..

عمو رأسن رفع عينه باوعلي وباوع لسامر ، ضليت ساكته شسوي وشنو احجي بعد ..

حجه وقرر سامر وطلع من الغرفه ، صار هدوء ، عمو شال سترته وطلع من الغرفه بدون ميحجي ويايه..

رجعت توترت العلاقه بينه رجعنه و الطريق كله على اعصابه يسوق واني هم نفس التوتر لان يأثر عليه اكثر انسان بالدنيا يأثر بيه هو ،

اذا ضحك اضحك واذا ضاج اضوج واذا تمرض اتمرض واذا تعب اتعب ومره سألته عن هذا الشي جان يكولي هذا سببه اكو ترابط روحي بينه ، مجنت ادري عنده مشاعر تجاها اله هو فضح نفسه او حب يعلن هذا الشي. يعني الصار بمزاجه..

تحدد موعد المهر والبيت متكهرب رحت لعمو حجيت وياها وصدمني من كال...

ادهم : وافقي ولتتراجعين هذا هو ...

سيلين : يعني متضوج.

ادهم : لا هذا اللي لازم يصير انتي صح وانه غلط..

سيلين : عمو الله عليك لتكرهني.

رفع عينه باوعلي وهمس.

ادهم : ليش انه اكدر..

عفته وطلعت بيومها هواي بجيت ماعرف شنو هالتضارب العندي بالمشاعر...

بيوم المهر لبست اي شي عندي حتى ما الي واهس اطلع واشتري ، وهمه كالو بيناتنه يعني لا حفله ولا هوسه ..

لبست ونزلت كعدت بالاستقبال ايفين يمي ونرمان وزمن وامه ملتهيه بالتحضيرات ، وكفتلي وكفه حلوه يعني سوت شغلات ترفع راسي كدامهم من حيث الترتيب او سوالف الكيك وباقي الامور ....

اجوي الرياجيل كعدو بالاستقبال واحنه بالهول حضرو ايمن وفهد وتصورت عمو موجود الى ان كالو الشيخ يكول وين وكيل العروس...

ابوهم كال ادهم ينوب عن ابوها

الشيخ كال صيحوه...

يتبع ..

🤎

متابعه ممتعه احبي الغاليين..