نصفي العقيم ( مكتمله )

بارت (٢٨)

تلاگينه وكلت لعيوني شبعن شوف ..
اخاف انچن تعيلن بيه تالي الليل ..

_______________________

روايـة "نصفي العقيم"

البارت الثامن و العشـ٢٨ـرون

-الجزء الثاني

للكاتبه : يُمنا نـآصر
_______________________
البارت من ٢٥٦٠ كلمه ..

قراءه ممتعه ..

الصدفه كلمه عظيمه وشكد كلوب جمعتها صدف وشكد كلوب فرقها الزمن رغم الزمن هو اليولد النه احلى الصدف ..

من نلتقي ويا الاشخاص النحبهم بعد مافرقهم عنه القدر بصدفه تحيي كل شعور ميت بينه تنبض قلوبنه من جديد وتخلي الارواح تطوف بين غيوم العشق والهيام ...
وهذا الي اليوم صارلي من التقيت ويا اجمل صفحه صارت بحياتي من كتاب قصتي الي خيم عليها السواد  ..

كملت مسواك ووكفت تكسي صعد محمد ليكدام واني واحسان صعدنه ورى جنت خالته بحظني ..
كتله لصاحب التكسي للـ....... ومن نوصل اني ادليك ع اللبيت ..

دنكت دا ادور بالجنطه على فلوس رفعت راسي مذهوله من صوت الشخص الصعدت وياه وهو يگول

حسان .. بغداد هاي انتِ ؟؟

"حسيت ارتعشت من سمعت صوته وحروف اسمي بين شفاها داعبت نغمات اذني .. باوعت عليه واحس كلبي يريد يطلع من مكانه كتله .. حـ حـحسسااان اششلوونك ..

كتله هيج وجنت انتظر منه كلماته المليانه شوك وحب بس صدمني برده واول كلمة نطقها هي ..

حسان : بغداد وين حجابج بويه ليش هيج

"طاحت دمعه خاينه من عيني واني اشوفه شلون لحد هسه محافظ عليه وبعمره ماباوعلي بالنظره العيب ولا رادني جسد ولا شمل حسان جان رايدني بحب بدئ وعذري ..

.. بلعت ريك بصعوبه واني اباوع لملامح وجها الي جانت تعتليها تجاعيد القهر والشيب الي منتثر على راسه وزايد من شكله هيبه ووقار بس الزمن ماخذ حيفه منه حيل .. ومبين التعب على وجهه ..

كتله بصوت يرجف وكلمات كوه تطلع مني .. ئـ اااازووججت؟

"ابتسم بتعب وعيونه مليانه بدموع مانعها كبريائه توكع وطيح .. كال ، بويه اني رجال وعد كلمي و كلتها حجايه  لج غيرج ماتصيرلي مره ولو صرتي لغيري وماخنت عهدج يبغداد وغيرج ما تحلى بعيني وحده ماتحلى والله ..

"رفعت عيوني فوك واني امنع الدمع ينزل بس ماكدر اسيطر على مشاعري الجياشه احس اعضائي وجوارحي وروحي وكلشي بيه اقامن ثوره بداخلي وبلش الرصاص يتوجه على غريمهم الي هو قلبي ..

حسيت نفسي خنته وهو ماخاني حتى لو غصب عني بس اني خاينته .. اكتفيت بالسكوت وطول الطريق دموعي ماسكتن هو يسئل عن احوالي بس احس روحي مختنكه واكتفيت بس اهز براسي ..

شكله شلون حالي من بعدك ، مذلوله طحت برجال مايخاف الله بيه مسويني خدامه ويجي يفرغ غضبه بيه لو احجيله شلون اذوني الناس وطعنو بعرضي وخونوني وسووني حراميه وذلوني مذله وحجو عليه حجي وطغو وكفرو الا اهتز عرش السماء من افعالهم .. اكول وصلت للموت مرات وارد منه منتهيه اكله مانسيتك يوم ورغم موتوك من حياتي بس دفنوك بكلبي .. شكول حتى اكول وشنو احجي حتى احجي ..

مرينه من يم محل يبيع العاب اطفال وحجه ، حمودي كالي ماما شوفي شوفي هاي الالعاب الكتلج عليهن ذاك اليوم مو كلتي راح اشتري الك ولاحسان ليش ماجبتيلنه ..

رفع عيوني بلحظتها وتلاكت عيونه گال ، احساااان !!!
مسميه ابنج احسااان

ابتسمت بوجع ووكتله .. اييي سميته باسم كلبي .. رجع يسوق بس نزع مناظره ويباوعلي كل شويه ويجر حسرات تشك الروح ..

احس الطريق صار قصير وتمنيت لو بيتي يبعد من هنا سنين وليالي بكد العشتهن بعيده عنه بس للاسف مو كلشي نتمناه يصير .. وصلني للبيت ونزلت من السياره بعد ماودعني بكلمة ..

حسان : محفوظه بعين الرحمن يابنت كلبي ..

"نزلت والدموع ماسكتن طبيت للبيت واني احس جاي اودع بالدنيا محمد يباوعلي ومستغرب وضعي .. اجه عليه يمسح بدموعي ويضحكلي .. مسحت دموعي وبسته بخده خليته يم اخوه وكمت اعزل بالغراض داشيل المنظفات الجايبتهم بس عيوني مابطلن بجي كلما امسحهن ترجع توكع ..

وكع من ايدي بطل الزاهي .. نكب ع الكاع جبت وصله ونشفته بس بعدها الكاع تتمزلك ..

طلعت كفر شتريته لموبايلي داريد اسوي بس مادايرهم ماعرف اني ماسيطر على اعصابي شويه واحس صوت قريب يهمس يم اذني شبيج متعاركه ويا الكفر ..

نداريت لكيت هشام جر الكفر من ايدي بس اني فزيت من قربه لاطش بيه دفعته وهو زحلك من ورى الكاع ووكع على ظهره ..

اني شفته هيج ركضت لغرفتي وهو شويه واجه يعرج .. فتح الباب عليه وكال ليش هيج سويتي اني اريد اساعدج اجه يمي باتجاهي واني ارجع ليوره هو بقه مبتسم ويباوعلي ماعرف شبي

.. تقرب الي حيل وهمس يم اذني .. ليش ضعفين بقربي .. وخرت عنه وهو كال ليش جنتي تبچين ..

نداريت عليه وسئلته باستغراب منو كلك جنت ابجي .. لان هو من اجه اني جنت ساكته يعني ..

"محمد يكول من صعدتي بالتكسي صرتي تبجين شبيج ؟

"هااا لالا مما مابيه ششي بس شفت وحده تش تشبه امي وشتاقيتلها

" بعدج تحنين للداعشيه لج بابا انسيها وحده ساقـ.. وعافتج مثل الجلب مهتمتزالج شكو انت ميته عليها صدك ماعندج كرامه ..

.. بلعت ريكي وهو طلع من الغرفه .. حسيت كلبي اجه ديوگع ..

مر اسبوع وحسان مافارك مخيلتي ولاراح من بالي ولا ثانيه
.. جنت طالعه داشتري اشياء من الاسواق وشفت بنيه اجت يطلع عمرها ١٨ او ١٩ سنه .. شترت وطلعتله الف دينار بس تكول مضروب برشاش هالكد ممهرمس كاللها ابو الاسواق هذا ميمشي حجت هي ومبينه خجلانه حيل ..

رفل ، فدوه خويه والله ماعندي غيره مشيلي ياه ..

ردلها الولد الواكف ، شنو جايه جدين مني شو دجيبي الغراض جيبيها .. اخذ منها العلاكه وهي طلعت تمشي كتله للولد نطيني الغراض الماخذتهم اني ادفع .. اخذتهم منه ولحكتها ركضت وراها وصحت

"يااابنت ياابنت ..

"ندارت عليه وكالت بخجل رموشها مبلله وخشمها احمر جانت تبچيء .. تقدمت الها بخطوات وكتلها .. تفضلي حبيبتي هاي الاغراض الي انت اخذتيها من المحل ..

"مسحت عيونها وكالت .. لااا شكراً ما اخذ صدقه من احد واني مو شاحوذه ( متسوله)

"لا حبيبتي مو قصدي بس اعتبريني مثل اختج واخذيها من ايدي طلعتلها ٢٥ من الدزدان وكتلها تفضلي عمري هاي شغله بسيطه انت وين بيتكم ..

"ماقبلت تاخذ الغراض وكالت ، هذاك الهيكل كاعدين بيه ..

"شنو رايج اعزمج عندي على فنجان كهوه تجين ونتعرف اني اريد اصير صديقتج ..

"ابتسمت بتعب وكالت لا حبيبتي اني مو من مستواج ..

رديتلها " شنو هالحجي هذا عمري احنه كلنه بشر ماكو احد احسن من احد يلا تعالي .. اخذتها من ايدها وطببتها للبيت طبت خطيه مستحيه وتمشي على كيف ..

نداريت عليها وكتلها ، لا تستحين كلبي اني زوجي مو هنا اخذي راحتج ، اجت كعدت ع القنفه وتفرك بايدها .. اني رحت جبتلها عصير وكيك ضيفتها وكعدت احجي وياها .. كتلها

"انتو من هنا يعني من بغداد ؟

"لا احنه من الموصل بس متهجرين هوني ( هنا ) ..

"اهاا وعندج احد يعيلكم ..

"دنكت راسها وحجت بقهر للاسف لا اني المعيله الوحيده لعائلتي ابويه من زمان ميت وامي واخويه الجبير ماتو بالقصف مابقى النه احد غير انا واخواتي الاثنين واخويه عمره ١٠ سنوات ..

"زين وليش وحدج يعني ماعندج عمام او خوال اي اقد من اقاربج تروحين عليه ..

"عدنه بس ميردونه يقولون العيشه صعبه واحنه ماانطيق ( مانكدر) نعيشكم معانا رغم كلهم حالتهم زينه ..

"وانت شنو تشتغلين لو شنو شلون معيشه اخوتج ؟

"جرت نفس بحسره وكالت ، مرات اطلع ابيع كلكنس ع التقاطع ومن اجينه بالمنطقه الجيران لمت النه فراش وطباخ عتيق وكم غرض خليناهم بالبيت .. وهم اهل الرحمه كثيرين مرات يدزولنه اكل او بواقي طعامهم .. دنكت راسها وصارت تبچي بحركه .. كمت يمها حظنتها خطيه مردته لكلبي مرد ..

"وخرت مني ومسحت دموعها كالت .. اسفه حبيبتي وجعتو راسكي بمشاكلنه ، بس والله انا ابكي على هاكذ زمن مايرحم اشون كنت مدللي قبل واشون هسا صارت الناس تصدق علينا ..

بغداد : حبيبتي لا تشيلين هم اني منا ورايح صرت اختج تجين اليه كل يوم بوقت الغده وبوقت العشه تاخذين المقسوم واخليلج قبل ما اخلي النه .. ولا تخافين كل شهر اني اخلي بايدج المصروف الي يكفيج لا تشلين هم ابد ..

"يكثر خيركي بس انت ممجبوره تتحملين عبئنا

"حبيتي انت ياروحي مابيها شي اذا ساعدنه الناس للناس .. انت تدرسين ؟

"هزت راسها وكالت .. كنتو ادرس وصلت للخامس اعدادي وتركت الدراسه حتى اعيش اخواني ..

"ترجعين للمدرسه وتبذلين كل جهدج حتى تحصلين ع الشهاده ..

"ابتسمت بالم وكالت ، انت ع تحكين من جد ولا تضحكين عليه

"لاا حبيبتي والله من جد احجي ارتاحي اني وياج اختج من اليوم ورايح لشيلين هم لشي والتحتاجي كليلي عليه .. ومايردج الا لسانج ..

"ضحكت وكالت .. والله معرف اشون اشكركي او شنو اقول بس شكرا يمكن الله دزكي النه من السماء لحتى تنقذينه ..

"ططبت على ايدها وكتلها يلا اشربي عصيرج راح يصير حار .. اخذت الكلاص شربت منه شويه وكالت اني لازم اروح للبيت تاخرت ع اخواني كمت وصلتها وخليت بايدها فلوس وشيلتها هالمقسوم الها ولاخوتها

.. طلعت من البيت بعدني توي ودعتها وطبيت وندك الجرس طلعت فتحت الباب طلعت يُسُر طبت هي وبناتها كالت نبقى نتعشى هنا لان صگر ملتحق ماينزل هسه 

.. كمت سويت عشاء وهي تساعدني اجه هشام وكعدنه كلنه نتعلل ونباوع تلفزيون هنا جانت نهايه ٢٠١٩ والعالم كلها تحجي بفايروس يكولون يموت العالم ومنتشر بالصين اسمه كورونا ..

لليل كامت تريد تروح يسر كالت اطلبولي تكسي ..

هشام : ياتكسي هذا بالليل وانت وحدج ماكو زلمه وياج

يُسُر : عادي ابو محمد ماعليه شي

هشام : لا يابه شنو باطلين غيره ونخلي نسوانه تروح تالي الليل بتكسي امشي اني اوصلج لو شدكولين بغداد

بغداد : حجيت واني الم بالمواعين .. ايي يسر صح ميصير تروحين بتكسي وحدج الوقت تأخر اصلاً خلي يوصلج هشام ..

محمد كاله بابا اجي وياكم ..

ردله وهو يمسح على راسه .. لا وليدي اني راح اوصل خالتك واروح لصاحبي وين تجي ويايه  ندار على يُسُر وكاللها يلا مشينه ..

طلعو هو ويُسُر ومحمد كام يبجي وراهم رايضته بنستلايه وسكت كملت تعزيل المواعين وطبيت نومت الجهال واني هم نمت ..

الصبح كعدت لكيت هشام نايم ع القنفه وبعده بملابس البارحه ممبدلهم .. اجيت كعدته كتله كوم راح تتأخر على دوامك هو كام راح يبدل وشمر ملابسه بالحمام .. اني هم التهيت ويا الجهال وسويت غده للعصر دك عليه خالي علي بس شكله ضايج سئلته بالبدايه مقبل يحجي وبعدين كال ..

"البنت يلي ائلتلك عنا بذي اتئدمله واعرض عليه الزواج سافرت ع امريكا ومابدها تتجوز هلاء ..

"حبيبي وانت على هذي ضايج الا ضوج ابد ولا تهتم خلص ان شاء الله اني ازوجك تاج راسها اصلاً اني ضامتلك عروس بس انت سبقتني ..

"هههههههه ومن هي العروس

"شبيك تضحك والله داحجي من صدك مدا اشاقه العروس اسمها منى صديقتي الدكتوره .. كلش حبابه وحلوه ..

"ومعئول تئبل تتجوز واحد من غير بلد ..

"اييي اصلاً هي قبل فتره شافتك يمنه وسئلتني هذا شيصيرلج واني كتلها هذا خالي .. هسه خل اسده منك وادك عليها واشوف شتكول ..

"ويييين بدك تتصلي انا لسه ماشفتها للبنت بجوز ما تعجبني ..

"من تجي تشوفها وتصدك انو كلامي صحيح ..

"هلاء غالقين المطارات ولازم اذا بجي عن طريق البر وبتعب الطريق ..

"يلا فدوه خالو تعالي تحمل التعب كم يوم وتعيش متهني كل حياتك ويا منى ..

"انا اصلاً عندي شغل ببغداد خليني شوف شو بيصير معي وبخبرك ...

" سديته منه وكمت توجهت للحمام دخلت اخذت الملابس ورحت داغسلهن بعدني توي اريد ادخل قميص هشام واشوف على الياخه حمره ورديه فاتحه مطبوعه  .. لعبت نفسي حيل وخليته للقميص بسرعه بالغساله ..

مرت ٣ ايام وبيوم جنت العصر دا اتمكيج والهي روحي ماشوف الا هشام طب علي سحبني من ايدي ووداني بزاويه مابيل الكنتور .. حصرني وصار يبوس بيه بكل مكان .. صرت اصطر بي وادفع مثل المجنونه واباوعله هو صاحي مو سكران حتى هيح يسوي .. تقرب عليه حيل دفن وجها برگبتي احس شوهتني انفاسه .. رفعته وركضت بسرعه اريد اطلع من الباب وهو رجع عليه جرني من شعري بقوه ورجعني لنفس الزاويه .. شك ثوبي عليه من الطول للطول .. بس الغريب انو جان ساكت وماطلعله صوت ابد .. باوع عليه كانه ديكولي هو هذا الجنت رايده .. ايتعد عني من وحده بعد ما ملخ عليه كل ملابسي طلع من الغرفه وكانه ممسوي شي .. كمت واني ابجي والطم على روحي شلووون ياربي شسوي وين اولي منه والله تعبت تعبت واحس كل صبر بيه مابقه ..

مرت فتره وهو ابتعد عني طول هالفتره تجيني رفت تاخذ غدا وعشا الها ولاخوتها الحمدلله فرحت من كالت رجعت للمدرسه ونطيتها فلوس زايده تروح تشتري بيهم المحتاجته .. اني الفلوس الي ينطيني ياهم ابويه ماسوي بيهم شي فاكول خلي انطيها لرفل اني ممحتاجتهم بس هي محتاجه حيل .. وبيوم دخل عليه خالي وكال اجيت اشوف العروس .. فتحت الموضوع ويا منى وهي حيل رحبت بالفكره وكالت خايبه منو الحاصللها تاخذ تركي وتكول لا ..

وهو خالي كلش حلو شكله يعني طويل وابيض بس شعره بني غامق وعيونه حلوه هو واني يتشابهون كلش ..

تمت الخطوبه على خير بعد ماشافها خالي وكلش عجبته .. وصار تجهيز عرس منى تزوجت بالعراق وكله على مودي لان هشام افندي يخاف اروح لتركيا ..  يخاف لا اروح واتركه

بيبي ام امي كلش تعبانه ومكدرت تجي ع العرس ولا توصل .. بعد العرس بفتره خالي علي اخذ منى وسافرو لتركيا ..

رجعت اني لوحدتي حتى يُسُر ماعاد تجيني مثل قبل ولا تشوفني ابد .. ماعرف شنو السبب تغيب فتره طويله وتالي اجي اشوفها ربع ساعه وتروح ..

وبيوم رفعت الموبايل واجاني صوت رواء تبجي .. وهي تكول حلليني بغداد حلليني واوهبيني اني على فراش الموت !!

Next......

بنات اعتذر لات منزلت الاسبوع هذا بس اول شي نزلت ع الرسائل المعلنه وثاني شي النت جان منتهي الاشتراك وجديد فعلته ..

فيعني اني انشر ع حسابي اذا انتو ممتابعيني اكيد محيوصلكم  شي وهذا صوجكم مو صوجي فرجاءً ارتقو شويه بتعليقاتكم لان عيب !

القصه بعدلها يجوز ٥ بارتات او اقل واختمها وعيني الي ممتخمل شلون انزل وتكول عليه مملتزمه تطلع من الروايه تنتظر اخلصها وترجع تقراها..

لاتنسون التصويت للروايه بظغطكم على النجمه باللون البرتقالي .. وتفاعلكم ويا الروايه يشجعني اكثر .. ابعثوها لاصدقائكم محبين القراءه والروايات الواقعيه..

تقبلو اطيب تحياتي..

الكاتبه : يُمنا نآصر

احبـ♥️ـكم