نصفي العقيم ( مكتمله )

بارت(٢٧)

مخنوگـــه السوالف تطلع مـن الروح ..
مـاأدري شعجــب ؟ وشصــار ؟ وشذنــبي؟
يـلـومونـي لِأن رَبـيت حزنــي ويــاي..
المفارگـ محّــب متگلي شيربي ؟
صـح تعبنـي كلـش صح سهرت وياه ..
بَـس والـلّٰـه اصيل ومـانكر تعبـي

الشعر اهداء من احد المتابعات ، عشتي يگلبي♥️

_______________________

روايـة "نصفي العقيم"

البارت السابع و العشـ٢٧ـرون

-الجزء الثاني

للكاتبه : يُمنا نـآصر
_______________________
البارت من ٢٩٢٨ كلمه

قراءه ممتعه ..

يگولون .. الماحصل اعلى النصيب يسمي ابنه اعلى الحبيب ..

بغداد : انعقج وجهي من اذكرت الصار قبل فتره .. بهت لوني وحسيت اطرافي بردت ياربي معقوله معقوله اني حامل ..
لالا لا يربي انشالله مو حامل ايي ايي اكيد مو حامل ماريد شي ثاني يربطني بي مااريييد

بس ليش اكيد مو حامل اذا هذا النذل تقربلي واني ماخذت شي يمنع الحمل رايح عن بالي اصلاً هالموضوع وماتوقعت يصير ويايه هيج شي مره ثانيه ولاتوقعت هاليحوان يعيدها .. انتبهت على روحي اني صارلي مده مجايتني ..

يارب دخيلك ماريد اوكع بنفس المشكله مرتين شنو ذنبه يجي ع الدنيا وينظلم ماكافي واحد الله اليعلم شراح يشوف ..

بقيت كاعده واني مو يمهم اصلاً فاصله عن الدنيا .. شويه وانتشر الخبر بغداد حامل .. اجت عمتي تبوس وتحظن بيه وتباركلي ..

كتلها واني ابلع ريك ناشف ..

"عمه بعد متأكدت يجوز مو حامل ..

نجود : اني متاكده انت حامل واعرف وليدي نچر

فرحه : خايبه بغداد صارلها شكثر من فاتتج العاده ..

بغداد:حسيت غصيت بهدومي كتلها .. هااا مادري من زمان ..

فرحه: اي يمه اذا هيج الحجي ثبت بطنج فرخ .. جانت تحجي وتباوع على رحاب الي اكلتني بعيونها .. هي لحد هسه ماصار عدها جاهل ومن تسمع وحده حامل تتخبل ..

جتي باركتلي بس من ورى خشمها .. كالتلها جده فرحه ..

"عين الحاره الحمزه يطفيها وعين البارده كل الهلا بيها .. ياستار من عين بني ادم من تحرك يا ستار ..

"هي باوعتلنه وعرفت الحجي عليها نسحبت من الهول وراحت للمطبخ كل شويه تجي وحده تباركلي  اجت مروه اخت صگر هم صار شگد مشايفتها كعدنه اني وياها سولفنه والتهيت وياها حبابه حيل والكعده وياها مريحه ..

"رواء جانت كاعده هي والتوأم بصفحه ماتقربت منه وبس يخوزرن .. كامت هدى دك تلفونها وطلعت تحجي بره رجعت وسئلتها رواء ..

"منو الدك عليج ..

"هذا عيسى(زوجها)

"شيريد من عندج ؟

"نبت بيها بصوت عالي .. انت شعليج ليش تريد تعرفين اني وياه هذي خصوصياتنه ..

بغداد : اباوع على وجه مرة ابويه  صار اصفر وتبلعم ماعاد تگدر ترد باوعتلها جده فرحه وكالتلها بنبره كلها حكمه ..
اييه يرواء اليزرع العاگول مايحصد ورد جوري !

هي تلافت كلام جده فرحه سوت نفسها مسمعت ورجعت تسولف بس وجها مايگصه السيف .. شويه وصارو ينگلون بالاكل..

سمج مسكوف ودجاج شوي وكباب وتكه .. كعدنه كلنه بس ماكدرت اكل بس شويه من الخوف لا اطلع حامل واصلاً تلعب نفسي ماعرف شبيه التهيت اوكل بحمودي ..

كملنه الغده وكمت اشيل بالمواعين وياهم طبيت للمطبخ وكالتلي عمتي .. روحي اكعدي لا تشتغلين انت

"تفاجئت منها وكتلها لا عادي عمه خل اساعد البنات ..

"لا ماساعديهم انت حامل ويروح يصير للولد شي روحي كعدي وهما كومه هسه يخلصوه ..

ردتلها رحاب بغيض ، وشنو يعني حامل خما لازكته بعلج تجي تشتغل حالنا حالها شنو احنه خدم الخلفوها ..

نجود : انت صوتج ماسمعه تنجبين ولضلين سوين مشاكل كلما تجين..

رحاب:خلف الله عليج يمه هاي اني اسوي مشاكل .. هيج ترزليني على مود مرت ابنج بنت الداعشيه

دارت وجها تغسل بالمواعين واني رجعت كعدت جوه شويه وخابرت زوجها كالتله تعال اخذني من بيت اهلي طلعت من البيت زعلانه والاء تركض وراها ترضي بيها ..

كالتلي الجده فرجه "يمه ماتروحين تحللين حتى نتأكد اكثر ..

بغداد: اي هسه ادز على تحليل من الصيدليه ..

نجود : تحليل من الصيدليه شنو ، هذا مو مظبوط روحي حللي عد مختبر احسن .. اني هسه اخذج ونروح ..

"ردتلها جده فرحه ، شوف شوف عاد بس تريد سفافه وتروح تطربك بالسواكه بحجة الدختور..

جاوبتها نجود بعدم رضى " ادري شبيج ياعمه غير اني عمتها ام رجلها ولازم اروح وياها ..

"انا راح اروحن لان بطني مدري شبيها اشو نفخت مدري شحاطات بالاكل يكماعات اروحن للدختور بالجي ينطيني علاج .. جرت نفس وكالت ااخ يايمه بطني اهجسها صخره  ..

ردلها ؤيد : والله من كثر ما اكلتي انت شفتي نفسج سبحتي بالاكل سبح طبيتي زروك بالسمچه ..

"عوذه وانت شنهي كاعد على حلكي تعدلي لكم

"شعدلج حجيه غير انتي كاعده تشكين هسه طكينه بهوائيه تخلينا هنا كلنه ننجطل ..

"شوف الچلب جا غير قاليوني (قالوني) منتفخ ..

"فروحه لكيتلج لقب مناسب لوضعج لان انت كل مره تاكلين وقولونج ينفخ تشبعينا مسبه عبالك احنه النفخناج ، والله لقب فرحه انتفاخ لايك لهالوجه ..

"وروح جدي اذا ماتسكت هسه اكوم انعنع ضلوعك .. ندارت عليه وانت يمه يلا كومي خل نروح .. كمت وياها وهي لبست صايتها واحت نداريت ليُسُر كتلها تعالي ويايه ..

ردت بنتر ، لا ما اجي نريد نروح للبيتنا ..

"ماعرف ليش هيج ردت وكتلها براحتج طلعنه وجده فرحه اجرت النه تكسي صعدنه وياه وهو يمشي سريع بالطريق خابرت على صديقتي دكتوره منى وكتلها راح اجي عليج اريد افحص

منى :ليش خما بيج شي

"لالا انشالله ماكو شي اجي وافهمج .. نهيته وياها ومسافة الطريق

نزلنا من التكسي وهي انطت الكروه كالتله بقهر هاك هذي الكروه  عبالي انطيك اكراميه فوكاها بس والله دينار مازود عليها سويتنه شچوة لبن كل طسه تضربها الا نلعب بيها جوبي لو راكبه على مطي اخيرلي ..

طبينه للعياده انتظرت السره اجاني وطبيت لمنى سلمت عليها وكعدت كتلها الصار ويايه بالتفصيل وهي كالت انت المفروض من صار وياج هيج بسرعه جايتني حتى نمنع حدوث الحمل قبل فوات الاوان ..

"تنهدت بحزن وكتلها  مو بيدي الصار والله بس بعد حسبي الله ونعم الوكيل .. ماكدرت اظبط نفسي ونهمرت دموعي .. هي اجت عليه حظنتني وبقت تصبر بيه كالت ..

منى : بغداد ليش ماتطلكين منه وتعوفي شلون خما تبقين هيج ..

"ماكدر منى ماكدر يهددني ياخذ محمد مني ..

منى : زين وابوج ليش ماتحجين وياه تكوليله شلون عايشه ..

"ابتسمت من بين دموعي وكتلها الله وكيلج كلشي يعرف ويعرف بهشام صگط وعار بس عنده البنيه اذا طلكت عيب والف مره اني حاجيه وياه بخصوص هالموضوع بس هو مايقبل وماعرف شسوي ..

منى: ارفعي قضيه عليه اشتكي بالمحمكه واذا عندج دليل ع العنف الي يسوي بيج يكون افضل ترى ..

"اي عندي اني جنت من يضربني اخذ صورت للضرب مالته وعندي هواي صور من تعذيبه الي ..

منى : ايي عفيه لعد شنو اليمنعج تروحين تشتكين وباعي اني اكدر اسويلج تقرير طبي اثبت بي الضرب التعرضتيله وكلشي صارلج بسببه .. واكيد المحكمه تنصفج وحمودي يكون من وصايتج

"منى الحجي سهل بس الفعل صعب .. اني ماكدر اصرف هيج واخاف من ابويه ومنه ماستبعد يحرموني من ابني واني ما الي احد هنا وماعرف احد هما معدودين ع الاصابع الاعرفهم ..

منى : اوووف والله ماعرف شنو اكولج بس يعني انت عندج شهاده بايدج تكدرين تشتغلين وتعينين نفسج والبيت الكاعده بيج هو باسمج مو صح؟

"ايي صح بس اني اخاف من اليصير رواء ونجود ماراح يسكتون وراح يحرضون ابويه ضدي اني متأكده ، وسند  البيت اخذه هشام مني ماعرف وين وداه يعني ماعندي شي يثبت انو هو ملكي ..

منى: حبيبتي هاي سهله تكدرين تروحين للطابو وتكوليلهم ضايع السند ويطلعولج واحد جديد .. بس هي المشكله تبقى يم ابوج لازم تقنعي اذا صار وياج اعتبري شغلتج منتهيه وتطلكين منه بكل سهوله ..

"حطيت ايدي على راسي حايره بزماني وشنو اسوي ..

منى : تنهدت وكالت ، كومي افحصج هسه وروحي سوي التحليل حتى نتأكد من حملج

بغداد : كمت فحصتني ورحت سويت التحاليل وطلعت فعلاً حامل ماعرف شصار بهالحظه بيه انهاريت وماكدرت اسيطر على دموعي جده فرحه جانت ويايه بس ماحجت شي لان تعرف بهشام وكلهم يعرفون دروبه العوج .. رجعنه وكتلها اني اريد اروح للبيت .. كالت بحزن وهي تباوعلي ..

"انزلي يمه على بيت عيالج الاء خابرتني من انت يم الدكتوره كالت هشام يكول خل ترجع لبيت اهلو باقي يمهم يتعشى ويرجعج وياه ..

"نزلت وياها لان صدك مالي خلك نقاش ومجادله .. طبيت للبيت ونهمرت الاسئله عليه كالتلهم جده فرحه حامل ورجعو يباركون
الي

.. كالتلي عمتي طبي جوه هسه يجي هشام راح يوصلها ليسر لبيتها لان صكر خطيه خفر .. وترى احنه ماكنالو انت حامل وصيتهم مايحجون ولا يجيبون طاري انت بشريه ..

طبيت للصاله واني ماعرف شبيها احس طالعه روحي بقيت انتظر هشام فوك الساعتين يلا اجه وكال جنت يم اصدقائي وتاخرت عليج .. كتله مامشكله تتعشى لو نروح للبيت ..

"شبيج ليش هيج وجهج اصفر .. اخاف لان حامل

" تفاجئت وكتله ، منين عرفت عمتي كالت مكناله وموصيه البنات محد تجيب طاري يُسُر كالتلك ؟

"هاا لالا بس اني سمعتهم يحجون وغلست ع الموضوع ، بس هسه انت شبيج وضعج مو طبيعي

"رديتله بتعب ماعرف شبيه بس دايخه شويه خلينا نروح للبيت وارتاح ..

"اي يلا امشي ..

"اخذنه وطلع وكف يم المطعم جاب عشاء ورجعنه .. ما اكلت وياهم اني بس هو ومحمد اكلو طبيت جوه بالغرفه بدلت ملابسي ونلكحت ع السرير شبعت بجي ونواح ..

ماريد شي ثاني يربطني بي ابد بس بنفس الوقت ماريد اخسر ضنايه قطعه من روحي هاي ماريد اخسر الطفل بس المشكله هشام ابوه .. احتظنت بطني واني احجي وي الطفل كانما يسمعني ..

"ليش تريد تبقى ليش صرت ، شنو ذنبك انت تجي للدنيا وعندك هيج اب مثل هشام ، حجيت بغصه ودمعه رذيله طاحت من عيني ..

اقداري اني وياك واخوك متشابها كلنه قبل ما نجي للدنيا ابتلينا وانظلمنا باهالينه.. نمت والدمع مثل كل مره معلك على رموشي ..

مرت الايام والشهور ومحمد كبر وصار عمره ٤ سنوات ونص بطني كبرت  وجسمي كله انتفخ .. اني هسه بنهاية شهر الثامن سويت سونار طلع بيه ولد ..

..الايام العدت كلها جانت طبيعيه .. واليوم احنه متحظرين حتى نروح نجيب خالو علي من المطار .. كلش فرحانه بجيته وماخليت شي ماسويته .. طلعنه من البيت اخذنه هشام بالسياره ورحنه للمطار ..

مسافة الطريق وصلنه ونزلنه ننتظره ذاعو انو طيارة تركيا  الي هو جاي بيها انو هبطت

.. ماعرف شصار بيه بوقتها خفقات قلبي زادت وحسيت راح تردلي روحي .. شفته اجه من بعيد وهو يدفع بعربانة الجنط .. ركضت عليه مثل الطفل الصغير الي شاف امه ..

حظنته واني ابوس واشم بريحة ريحة امي بيه بسته من راسه ومن خده وحظنته واني ابچي واشهك ومعلكه برگبته هو بعد عني وابتسملي بعيونه الي مليانه دموع حنينه ..

"لا تبكي ياحبيبتي لا تبكي وتخلي هالعيون الحلوه تتعب من الدموع ..

مسح دموعي وهو حاظني كال كتير مشتائلك ياروح خالك انت مشتائ لصوتك ووشك الحلو ..

سلم عليه هشام وباسه لمحمد وطلعنه للبيت كل الطريق اني احس نفسي طايره بالجو .. وصلنه للبيت صعد هشام الجنط مالته فوك وكتله طب اسبح وارتاح على ما اني احظر الغده ..

"باس ايذي بحنان وكالي لاتعبي حالك حبيبتي انت ..

"ياروحي ماكو تعب بجيتك هسه كل التعب راح .. ابتسم بحنان وصعد فوك رحت اني احظر الغده واجا يمي هشام ..

"شدعوه هالمحبه الزايده والتحظن يعني ماكو داعي وبالمطار كلهم يباعون عليج ..

"رفعت حاجبي وكتله ، ترى هذا خالي

"وشنو يعني خالج الناس تاخذ غير نظره وبعدين شفتي مكتوب ع كصته اني خالها والناس ما تعرف هذا خالج الناس الها الظاهر وتفكر غير شي ..

"مو كل النس تفكيرها مثلك وبعدين لعد انت من بعيد ميلاد محمد بستني بالشارع كدام العالم كلها مكلت ياخذون عليه غير نظره شمعرفهم هما اني مرتك لو مكتوب على كصتك اني زوج بغداد؟
بس هو كل من يشوف الناس بعين طبعه !

"ها بغداد كويان عصج هذا عبن خالو اخو الماما الدعوشيه شرف ..

"حجيت بقلة صبر واني اغمض عيوني ، هشام هسه شتريد ..

"مااريد منج شي هي ترى كلها سنه اخذ حبيبتي واسافر واتركج لا عبالج ميت عليج ..

"حبيبتك هاي العجوز ؟ وليش متاخذها هسه وتروح .. شكو تنتظر سنه لو بهالسنه مقرر تموتني ..

"ضحك باستهزاء وكال ، عجوز وفضلتها عليج لج شي عندي ؟
وبعدين هي اهلها مايقبلون بيه لان مزوج .. مزوجج يعني مع الاسف

"ههههههه عشتو هم اهلها رايديها عود ومتعزين بيها  ، لازم تحفه اثريه قديمه وهيج محتفظين بيها ..

"عجوز ماعجوز المهم فضلتها عليج !

"عادي هوه الرخيص مايهوه الا الرخيص بعمرك شفت واحد فگر ويدور الشي الغالي والزين .. كتله هيج ودرت وجهي اكمل صب الاكل خالي طلع من الحمام واجه كعد تغدينه كلنه وجان يتناقش هو وهشام وهشام مسوي نفسه محترم حيل ..

لليل كعدنه نتعلل كعدت اشكيله كلشي وفضفضت ليما ارتاحيت .. 
كتله مانوي تزوج لان هو عمره بالثلاثينات

" كال جاي يدور على عروس يريد يزوج .. وشايف بنيه وعاجبته .. واذا توافق يجيبها يسوون العرس بالعراق كله لخاطري ..

مرت فتره وهو بعده عدنه واني طبيت بشهري .. حددتلي الدكتوره باچر موعد العمليه لان ولاده قيصيريه .. جنت كلش خايفه رغم مو اول مره اولد بيها بس وجود فكرة العمليه والولاده كلش صعبه بالنسبه الي واخاف من عدها لان بكل بساطه هي انتزاع روح من روح هالشي اكيد صعب ومؤلم ..

طلعنا ثاني يوم من الصبح للمستشفى وصلنا هناك واجت ويايه الاء وعمتي نجود وهشام جان ملتحق وكال اجيج انشالله قبل متولدين بس الظاهر مالحك 

خالي  هم جان ويايه لازم ايدي ويقوي بيه ويشاقيني .. ومحمد يحوص مامرتاح ماعرف شبي ..

اجت الدكتوره وكالت صار موعد العمليه .. اخذتني وططبتني للصاله خلتلي بنج واخذت عيوني طريق النوم شويه شويه لحد مغفيت وسرت بروده بجسمي .. جنت اتمنى امي تكون ويايه وتقويني واطمن لوجودها  هاي ثاني مره اولد وهي مو ويايه ، بس للاسف مو كلشي نتمناه يتحقق ..

ماوعيت الا على نغزة ابره وعيت على اثرها فتحت عيوني بثقل شفت نفسي مطلعيني من الصاله ومنيميني بغرفة معزوله ومشكليلي المغذي .. شويه وطبت الاء كالت ببتسامه

"الف الحمدلله ع السلامه الولد يجنن ماشاء الله ومندفش طالع عليج .. ضحكت بتعب وكتلها الله يسلمج وينه اريد اشوفه ..

الاء: يم امي هسه طببلج ياه .. شويه وطبت عمتي شايله الولد بايدها وفرحانه ومحمد اجه يمشي وراها خلته بحظني وكالت ..

"الحمدلله ع سلامتج يمه ..

"الله يسلمج ، لزمت الطفل بايدي واني اتمعن بملامحه  الحلوه بسته بخده النام وداعبت بشرته باطراف اصابعي .. كتلها هشام كال راح انزل وينه ليش مموجود ؟

"ابتسمت ابتسامه صفره وكالت ، هااا ااااي هو يمكن بعده منزل .. شناويه تسمي لو تنتظرين ابوه يسمي ..

"باوعتلها بعيون دامعه وكتلها اسمي احسان ..

"اي يمه بعد هو ولديج وبكيفج ..

اجه محمد يباوعله بنظرات مذهوله وكال هذا وين جان ..

"ابستمت وكتله بطني ..

"شهك وخله ايده على حلكه كال ببرائه .. بلعتي .. ماما انت تاكلين الجهال ..

"ههههههه لا حبيبي مو يعني والله ماعرف هسه شكله هذا منين جاه ، نقذتني الاء من الموقف اخذته وراحت للكافتريا الموجوده بالمستشفى تشتريله ..

شويه وطب ابويه للغرفه هو وعهد هم تحمدولي بالسلامه وابويه كال ..

"لعد رجلج وينه ..

"عمتي تكول بعده منزل ..

"عقد حواجبه باستغراب وكال شلون منزل ، هو البارحه بالليل اجا للمكتب اخذ مني اذن لولادتج ومن البارحه هو نازل .. اخاف صايرله شي بالطريق ؟

ردت عمتي بتعلثم : للا ابو الو عهد مابي شي قبل شويه حاجيته بس صايره وياه شغله ومعطلته شويه ..

"هز راسه ابويه بس شكله ماراضي .. للمغرب كتبولنه ترخيص بالخروج من المستشفى وطلعنه وصلنه للبيت وهشام ماكو الى ثاني يوم يلا اجانه

.. شافه للولد واخذه لحظنه شمه وكتله سميته احسان وهو معارض كال حلو .. نتبهت وهو كاعد رگبته بيها زراك عرفت جان يم وحده وامه ظمله السالفه  ..

مر شهر وعمتي بالبيت ويايه داري الطفل خالو علي رجع لتركيا وكال انشالله ارجع عن قريب .. عمتي هم استئذنت وراحت لبيتها واني راجعت الدكتوره وشلت الخيط .. رجعت طبيعي وتعافيت الحمدلله

بعد تقريباً ٤ اشهر جنا طالعين اني وهشام دانسوك وويانه محمد واحسان .. بعدنه بالسوك ودك موبايل هشام .. شفته نخبص ماعرف شبي .. رجع عليه وكال بعجله ..

"بغداد اني راح اروح صديقي متخربط ودكو عليه انت اخذي تكسي وارجعي ..

"هزيت راسي باي وهو راح وعافنه .. كملت مسواك ووكفت تكسي صعد محمد ليكدام واني واحسان صعدنه ورى جنت خالته بحظني ..
كتله لصاحب التكسي للـ....... ومن نوصل اني ادليك ع اللبيت ..

دنكت دا ادور بالجنطه على فلوس رفعت راسي مذهوله من الشخص الصعدت وياه وهو يگول .. بغداد هاي انتِ ؟؟

Next.......

كلش اشكركم على كلامكم وتشجيعكم انو استمر بالقصه بعد الكلام الي وصلني البارحه .. صدك فرحتوني وحسيت شكد عندي متابعين راقين ويحبوني  كلمة احبكم قليله بحقكم ♥️

وراح نستمر بالروايه على عناد المظغوطيين 😉

توقعاتكم منو الشخص الصعدت وياه بغداد 🤔 اليوم القفله تحمسكم حمس 😂
تحمسكم شنو خايبين متابعين لو طماطه انتو 🤣

وهم حبيت اوضح نقطه .. ابن بغداد الجابته سمته إحسان يعني مو حسان اكو فرق بالالف وتكول سميته هيج لان خفت من مرة ابويه تسويلي مشكله اذا سميته حسان .. يعني اكو اختلاف بالاف .. تلافي للمشاكل حسب قول بغداد ..

اذا باجر لحكت انشرلكم بارت تعويض لان غبت عنكم يوم الثلاثاء 😅

ومن بعدها حيكون النشر كل يومين بارت 😥 واذا كدرت انشر اسرع واكثر ماراح اقصر ابد وياكم ...

ها وصدك تريدون قبل البارت الاخير انطيكم خبر لو افاجئكم بي 🌚

لاتنسون التصويت للروايه بظغطكم على النجمه باللون البرتقالي .. وتفاعلكم ويا الروايه يشجعني اكثر  .. ابعثوها لاصدقائكم محبين القراءه والروايات الواقعيه..

تقبلو اطيب تحياتي..

الكاتبه : يُمنا نآصر

احبـ♥️ـكم

________________________

وقد يهدينا القدر صدفه فتمنحنا الحياة من جديد ..