جذبني فمك البني

البارت الثالث والثلاثون

ألم يخبركِ مظهري

ونقصان وزني

وتلك الحدائق السوداء تحت عيني

بأني حقآ متعب

ادهم

_______________________

الحاضر

المكان ( الجامعة )

سيلين

يااللهي تايهة ضايعة الم يعصري كلبي ، اعرف اجه علمود يوصل رساله....

جانت رسالته مبطنه للجميع و واضحه الي لان صرت اعرفه اكثر من ما يعرفني هوو ، وصلت مرحله العب على اعصابه وهو ميحس بوقتها قبل لا نفترق كلي..

ادهم : تعرفين المرأة اكثر مكر من الرجل..

سيلين : ممممم شلون يعني ؟

ادهم : لان اكثر منه تكدر تسيطر على ملامحها وعلى حركاتها من تكذب، بعلم النفس نسميها الاكثر مكرآ بالسيطرة على لغة الجسد..

سيلين : يعني هسه ماعدت تعرف اذا اكذب عليك لو لا مثل قبل..

تقرب مني وجها صار قريب عليه بحيث تنفسنه نفس الهوة واطلقنه زفير واحد اختلطت بيه كل مشاعرنه واحاسيسنه ، جان عباره عن نفس مصحوب بحروف مبعثره مو مجرد نفس عادي..

ادهم : ماعدت اعرفج ولا احزرج يا سيلينتي...

اه ولا اني عدت احزرك يا ادهم ، اخذت جنطتي وطلعت من النادي بيد انشف دمعتي وبيد الثانيه اكتم انفاسي ....

طلعت من الكليه وعفت باقي المحاضرات وعفت الامتحان ، يا معلومه الضلت بعقلي من البارحه لليوم..

صعدت بالسيارة ورجعت للبيت اول ما وصلت دكيت على نسرين ورة مكالمتين يلا ردت..

نسرين : هلو حبيبتي شعجب تذكرتيني.

سيلين : مو وكتج ابد ، خابرتج اريد منج شغله.

نسرين : شنو كولي ؟

سيلين : اريد اشوف محمد ..

نسرين : يا محمد..

سيلين : كم محمد تعرفين انتي ؟

نسرين : ليش عصبيه على كيفج.

سيلين : ماضلت عندي اعصاب ما ضل عندي عقل احسكم كلكم تلعبون بيه كلكم متفقين عليه ، اليوم اذا مشفت محمد معناها انتي دازيج عليه

نسرين : شنو هالحجي انتي صدك تحجين وبعدين منو دازني عليج ليش انتي شمسويه.

سيلين : معليييييج مني معليييييج شمسويه وممسويه كليلي محمد منوووو وليش توسطلي بالتعين اني غبيه بوكتها مستفسرت عنه اكثر ليش تعينت واني ماعندي شهاده واكو كفائات غيري تستحق..

نسرين : حمدي الله من سخر الج هذا الانسان وخلاه بطريقج هيج اللي يسوي زين يحجون عليه.

سيلين: يا زين يازين اني اعرفه هذا الانسان مدلي ايده علمود يدمرني علمود يرجعني للصفر مثل ما بناني يريد يكلي شوفي هذا حالج بدوني ، هههههه غبيه اني غبيه هسه بدت تتوضح عندي الصوره هو اللي مرتب حياتي وكاعد يمشيني على هواه هوووو هووووووو.

نسرين : هو منو غير اعرفه ؟

سيلين: اريد اشوف محمد واليوم واذا مشفته معناها انتي تكذبين عليه ومتفقه وياهم علمود اذيتي.

نسرين : ماشي بس باجر ميخالف لان اليوم رامي يجي للبيت.

سيلين : تره ما راح انام اليوم والبارحه منايمه لتلعبين بأعصابي انتي هم..

نسرين : والله مكاعد افهم عليج المهم باجر مريلي ونروح سوه..

سيلين : لتحلفين لتحلفين و انطيني عنوان بيتكم الجديد ما اندله.

نسرين : ماشي ادزه الج باي..

سيلين : باي.

سديته وضليت كاعده على نار واطكطك بأصابعي ..
لزمت موبايلي ودزيتله رساله على الخط اعرف مغلق بس بلكت يفتحها ويقره..

(اعرفك انت نفسك محمد ونسرين انت دازهاااا وباجر كلشي يبين والله يعلم منو بعد وياك وكاعد تلعبون بإعصابي..
اعترف اني مو كدك بس ما استاهل كل هذا يا دكتور ...)

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ختمت الرساله بالنقاط حتى شوف شكد ضايجه منه..

لا اكلت ولا صليت ولا مارست حياتي الطبيعيه مجرد غسلت وغيرت ملابسي وضليت انتظر شوكت يجي باجر علمود اروح لنسرين....

مررر الليل ثكيل كوه خلص نمت ساعتين و اول ما طلع الصبح بدلت وطلعت تلاكيت ويه عمو ابو عبد باب العماره..

سيلين : صباح الخير عمو.

ابو عبد : صباح النور شلونج.

سيلين : عمو تعبانه..

ابوعبد : مريضه تحتاجين دكتور توديج ام عبد..

سيلين: ياريت عمو البيه يتعالج عد طبيب ياريته مرض واكدر اطيب منه المهم بلكت اليوم ينطونه الراتب واجيبلك الايجار..

ابو عبد : براحتج بنيتي تدرين بيه العماره مو الي وصاحبها يريد فلوسه.

سيلين : حقك عمو حقك شما تحجي اروح اني وادعيلي انت مثل ابويه.

ابوعبد : شاهد الله ادعيلج مثل ما ادعي لبناتي وام عبد هواي توصيني بيج وكالت مظلومه والزمن جار عليها.

سيلين : الحمدلله على كل حال تخلص متضل هيج.

ابوعبد : اكيد والنعم بالله.

سيلين : مع السلامه.

ابوعبد : محروسه بالله بنيتي.

صعدت سيارتي ورحت للدوام سلمت وكعدت لا حجيت ويه واحد ولا جاوبت اليحجي ويايه نفسيتي صفر والتوتر من بعيد يقروه بوجهي مشت نص ساعه متحملت رحت للمدير اريد اشوف ليش شهر ونص ماكو رواتب وبس قسمنه هيج رحت دكيت الباب جان عنده اجتماع رجعت لغرفتي وره ساعه رديت رحت دكيت الباب ودخلت.

سيلين : صباح الخير استاذ.

_ صباح النور

سيلين : ردت اسأل رواتبنه شوكت تنطلق.

_ ماعرف بعد

سيلين : شوكت استاذ عدنه اجارات ومصاريف واني هاي الشغله الوحيده اللي استرزق منها ..

_ شسوي يعني الاوامر هيج اجتي يعني شغله لا بيدي ولا بيدج..

سيلين : اريد اعرف شمعنى بس احنه ما مستلمين.

_ كتلج ماعرف ..

قريت وجها وعيونه مبين ديكذب عليه وكاعد يتحايل عليمن جايي.

سيلين : يعني شنو تريد تقنعني الرواتب مو يمك..

_ اي مو يمي.

سيلين: بس انتو على القطاع الخاص يعني المستثمر هو اللي يوزع الرواتب مو مثل الحكومي مرتبط مصيرهم ويه وزاره الماليه.

_ شو انتي جايه تتعاركين .

سيلين: ما اتعارك اريد حق تعبي وهذا هو .

_ كتلج انتضري شي مو بيدي.

سيلين : يعني شكد انتضر انطيني مده علمود ابلغ الناس التطلبني ..

_ ماعرف جوز شهر اسبوع .

سيلين : شنو نضل نشتغل بلاش...

_ اذا يعجبج اهلا وسهلا ميعجبج براحتج..

سيلين : الفهمته من كلامك استغناء عن خدماتي ..

_ بالضبط عنده اكثر من موظف على الحاسبه وانتو هواي لهذا راح نبلش من شهر الجاي نقلص العدد.

سيلين: خو من البدايه وكول هيج ليش تخلينه نشتغل ونتعب وهذا كله مجهود علينه.

_ كتلج مو بيدي.

سيلين : انطيني راتبي وابطل من اليوم.

_ منين اجيبلج.

سيلين : يعني مدير واله مكانتك ومنصبك جيبك فارغ عجيب..

_ وحتى لو عندي اصرفهن عليج.

سيلين : لعد اتعب وشايله شغل شركتك علمود سواد عيونك غير علمود الراتب.

_ تجاوزتي حدودج هواي.

سيلين: راح اطلع وفلوسي ذمه بركبتك ليوم الدين ..

ماعرف شنو حجه عفته وطلعت ارجف جسمي كله يختض لاكتني رشا اجتي تمشي سريع وكفت يمي وكالت..

رشا : خير شبيج ولج.

سيلين : مابيه بس راح ابطل واريد منج خدمه اذا كدرتي عليها كولي مكدرتي هذا هو..

رشا : كولي اذا كدرت عيوني الج ما اقصر.

سيلين : اريد منج ٥٠٠ وان شاءالله ما اتأخر وارجعها الج...

رشا : تعرفين بيه اني اخذ الراتب منا اصرفه على نفسي منا ميطول عندي اسبوع بس اسألج بابا واردلج خبر.

سيلين : كلش خجلانه منج ومنحرجه بس ماعندي احد امون عليه بكدج.

رشا : تدللي اليوم العصر اردلج خبر..

سيلين : راح ارجع للبيت وانتظرج ماشي..

رشا : اوك بس كليلي ليش راح تبطلين.

سيلين : اكو شغله ابالي اذا تأكدت منها يعني صح ماكدر افهمج هسه.

رشا : ماشي براحتج بس كليلي انتي زينه..

باوعتلها وبجيت متحملت .

سيلين : لا موزينه ابد ..

حجيتها وحضنتني حيل بستها وطلعت مكدرت اضل اكثر..

صعدت بالسياره وكبل اتصلت بنسرين ..

يدك يدك يدك بعدين انغلق.....

رجعت للبيت ورديت دكيت عليها هم مغلق..

طلعت رقم محمد ردت اتصل عليه يكلي الرقم غير داخل بالخدمه يعني شنو محروك الخط لو شنو عقلي راد يوكف...

كمت اعيط انهارت اعصابي بلشت اللعبه تنكشف..

بداية بتأخير الرواتب وبعدها تعطيل حساب البنك وطردي من الشركه بطريقه غير مباشره وياسبحان الله بنفس التوقيت اختفت نسرين واختفى وياها محمد.....

مددت وكلي هموم وتعب ورجعتتتتتت وين اني ودمعاتي لبيتك لمكانك .....

احاسيس

امتنان

شرط

رهن

ردت اكسر قرارك من ردت تحلم

‏وعلى تعبك خفت من تنخذل تندم

‏يگلبي وداعتك ملتهي الماتنساه

‏لاتطري على باله ولا مجرب الهم

‏حلاتك مو سهل ، كلما تشح تنهاب ‏

الماي البيه حياه وكت الغرگ ينذم

(ايهاب المالكي )

الماضي

ادهم : اريدج بشغله تكدرين لو نعسانه باجر نحجي..

سيلين : ماعندي شي وين تريد نحجي هنا لو وين..

ادهم : تعاي للمكتب منتأخر ..

سيلين : ماشي...

مشى ومشيت وراه دخلت للمكتب اول ما فتت لفت نظري مغير اللوحه الوراه ضحكت..

سيلين : هاي شنو عمو حلو التغير حبيت اللوحه وباثه حياة للمكان.

التفت على الصوره ورجع باوعلي.

ادهم : وصيت رسام رسمها بدقه حلوه مو ..

سيلين : كلشش.

ادهم : عجبتج..

سيلين : تستهويني الاشياء الغريبه..

ادهم : مممممم.

ضليت صافنه باللوحه وهو فتح مجر المكتب طلع كارتونه وبلش يفتح بيها..

اللوحه عباره عن فم وسط ورود وبنات بس خيال بدون ملامح والجهة الثانيه اكو فم لونه ماروني طوخ ، وملامح رجل متعبه واللوحه عباره عن لون بني قاتم...

سيلين : عمو اللوحه شنو تعني ؟؟

رفع راسه باوعلي ورجع دنك..

ادهم : انتي شنو افتهمتي منها ..

سيلين : ماعرف رجل متعب وخيال لعده نساء وحسيت اكو مشاعر هواي بهاي الصوره.

ادهم : صح بيها هواي مشاعر دافيه..

سيلين : مممم حبيت..

ادهم : هذا موبايل جبته الج

باوعت جان يخلي السيم كارت بالجهاز.

سيلين : شسوي بيه ؟

ادهم : تحتاجيه بالدوام..

سيلين : لشنو احتاجه والمن اخابر..

ادهم : راح تحتاجيه خصوصا هذا الاسبوع.

سيلين : شمعنى يعني هذا الاسبوع.

حجيتها وكعدت على الكرسي.

ادهم : اخذت اجازه اسبوع..

سيلين : حيييل هواي ليش هلكد.

ادهم : ماعرف صار ايام مانايم زين وفكري تعبان.

سيلين : زين شلون وانت حتى السبت عندك دوام بالجامعات الاهليه ، يعني كم محاضره راح تروح عليك..

ادهم : سيلين فكري تعبااااان يعني شلون اوصل المعلومه للطالب وانه مليان سلبيه..

سيلين : زين ليش غير افهم شنو بيك ، عمو تغيرت جنت كلك حياة شغيرك ..

صفن بوجهي وتنهد نزل عينه وضل يفر بالقلم بعدين كام يدك بيه على الميز مال مكتب بحركات خفيفه..

ادهم : اسبوع بس وراها ارجع اداوم ..

سيلين : بس اني اعرفك متحب كعده البيت وراحتك بالدوام والشغل.

ادهم : ماضلت قابليه ولا واهس.

سيلين : زين تكدر تحجيلي شبيك..

ادهم : مرات الحجي يأذي اكثر ومرات ما ينفهم صح لهذا السكوت افضل..

سيلين : بس اني تعودت عليك كلشي تحجيلي واني هم احجيلك شنو التغير هسه..

ادهم : كتلج ماكدر..

سيلين : شغله خاصه يعني؟

رفع عينه ورجع دنك يلعب بالقلم..

ادهم : تكدرين تكولين هيج.

سيلين : المهم اني موجوده بأي وقت تريد تحجي اسمعك..

هز راسه ساكت.

سيلين : اروح انام تصبح على خير وشكرا على الموبايل.

ادهم : عفوا هذا الاسبوع ايمن يوصلج.

سيلين : ماشي اروح انام قفلت..

جر نفس كلش عميق وهز راسه ب اي..

طلعت وسديت الباب رحت للمطبخ شربت مي باوعت على السنك الطاوه مال عشا والجدر ما مغسولات ، اوووف يا ايفين ابد متكمل الشغله لو تعوفلي مواعين لو تعوف الطباخ وكم مره انبه عليها ميفيد غسلتهن كملت رحت للحمام فرشت اسناني وطلعت وصلت لغرفتنه وسمعت صوت اغنيه كلت هاي منو عالك اغاني بليل مشيت الصوت جاي من المكتب وكفت ردت اسمع يا اغنيه من باب الفضول طلعت لكاظم الساهر.

الليله احساسي غريب

عاشك وانا مالي حبيب

حبيت كل الناس لاموني

حبيت كل احبابي باعوني..

عرفت عمو يحب او عنده هيج مشروع رحت للغرفه جانت ايفين كاعده تكلب بالموبايل كعدت وسألتها..

سيلين : ايفين سؤال.

ايفين : جواب

سيلين : عوفي موبايلج وباعيلي.

ايفين : هاي ذبيته احجي.

سيلين : شلون تعرفين واحد يحبج ؟

ايفين : من يهتم بيج من يسمعلج من يخاف على مشاعرج لا تنجرح من يدافعلج ويوكف بوجه الكل وياخذج.

سيلين : زين شنو تفسرين اهتمام عمو بينه وبالاخص بيه اني.

ايفين : من باب امتنان لعمه او رد جميل لبابا الف مره حجاها كدامنه ويعيد بكل موقف اني مثل اخوكم الكبير اني مثل ابوكم او صديق يعني اذا تفسرين تصرفات عمو وياج حب معناها يحبني الي هم لان نفس المعامله هم تعب عليه وركض بسالفه دراستي وكومه يكعد يحجي ويايه ويعلمني وينصحني اني ابد ما اشوف بتصرفاته اي شي من الخرابيط الخربطها فهد هو تقصد يزرع هيج فكره ابالج علمود تعادين عمو وتسهلين طلعتنه منا.

سيلين : زين ليش اخذ اجازه اسبوع وهسه كاعد يسمع اغاني مال واحد يحب ومحد حاس بيه.

ايفين : جوز تذكر عمه ياسه ومقهور تتذكرين اول ما اجينه مرات جان يسمع اغاني ويطلع عيونه وارمه من جنت اكلج عمو متخيلته يسمع اغاني انتي كلتي معلينه كلمن حر بنفسه.

سيلين : هم صح بس حجي فهد يحفر براسي كمت افسر الكلام عليه ومن يضوج عمو احسه ضايج مني.

ايفين : ضلي هيج لحد ما تصير فجوه بينكم بابه عمو ابد مو من هذا النوع تخيلي ياخذ بنت اخو زوجته شنو السالفه.

سيلين : هم صح صعبه اكيد ميكدر يتقبل مثل هيج فكره ..

ايفين : وانتي تتقبلين هيج شي لو فرضنه صارت صدك.

سيلين : لا اكيد لا والف مره لا لج كلام عمه يدك بكلبي من تكول شلون تجي وحده تاخذه وتحبه وتنام بحضنه وتاخذ بيتي وتربي بنتي يعني عمه ماتت ونفسها بيه ماتت مشبعانه من حب وحنان زوجها ماتت ملهوفه عليه.

ايفين : اي عمه انظلمت هوواي اموت قهر من اتذكر حنيتها علينه ..

سيلين : اي الله يرحمها يلا اني انام ورايه دوام تصبحين على خير .

ايفين : وانتي من اهله

سيلين : لتضلين سهرانه على الموبايل موزين..

ايفين : صار عمو ..

سيلين : شكد نذله ههههه.

ضحكنه ونمنه ثاني يوم كعدت على صوت المنبه رحت تريكت وبدلت اندك باب الهول طلعت ايمن.

سيلين : ها صباح الخير

حجيتها وضحكت..خله ايده على اطار الباب منا ومنا وكال..

ايمن : بشرفج متريكه.

سيلين : اي ليش ؟

ايمن: لعد متكولين اكو واحد حباب وخوش ولد راح يوصلني والطريق طويل اذكره بلفه كلاص جاي.

سيلين : ههههه انت حجيت ومسويتلك.

ايمن : يلا سويلي لعد هسه مو حجيت..

سيلين : تعال يلا..

دخلنه للمطبخ صبيتله جاي وطلعت جبن تريك وكال يلا..

سيلين : يلا

رحنه للدوام بالطريق طلعت الموبايل دخلت على الارقام لكيت عمو مسجل رقمه ورقم ايمن ..

سيلين : رقمي عندك؟

ايمن : اي انه جبتلج الموبايل وادهم دكلي منه البارحه وخزنته يمي..

سيلين : ها خوش لعد انتضرك انت تجيني بالرجعه.

ايمن : اي لترجعين وحدج.

سيلين : ماشي ..

وصلني سلمت عليه ونزلت رحت كبل للقسم اخذت محاضرتين وحسيت بالجوع ، رحت للنادي طلبت اكل وجاي ، لزمت موبايلي دزيتله رساله ....

عمو كله من وراك تعلمت اتريك مرتين بلبيت وبالدوام هههه المهم مكانك خاااااااالي والكليه ابد محلوه ولا تنراد عبالك شلتها وطلعت .

دزيتها وضليت اكلب بالموبايل لكيته منزلي برامج منها الفايبر والواتساب خليت بكل الدردشات اسمه ليفوك من خلال كلمه ربط هذه الدرشه بالاعلى وصار هو اول اسم فوك ...

كملت اكل وره ربع ساعه اجتني رساله منه كاتب .

بالعافية

كتبت

الله يعافيك شلون صرت احسن نمت زين البارحه ..

كتب..

ليضل بالج مابيه شي وصلج ايمن لباب الجامعه لو وين؟

كتبت

اي وصلني وراح .

كتب.
عاجبني اعلمج سياقه شتكولين ؟

كتبت
ماعرف كيفك..

كتب.
ادخلج دوره اسبوعين وتعلمي..

كتبت
خاف ولد يعلمني.

كتب.
لا اكو بنات شلون اخليج تصعدين ويه ولد !!!!!!

كتبت.
عود من ارجع نتفاهم الرصيد راح يخلص..

دزلي.
اوك..

رجعت للقسم كملت باقي محاضراتي وخابرت على ايمن كال جاي بالطريق انتضرته اتصل عليه وطلعت ضلينه نسولف بالطريق ورجعنه للبيت اول ما دخلت لكيت عمو كاعد بالحديقه من شفته لا اراديآ ضحكت لان شوفته راحه نفسيه بالنسبه اليه رحت عليه ..

سيلين : السلام عليكم .

حجيتها وضحكت..

ادهم : وعليكم السلام اليوم مرتاحه الحمدلله.

سيلين : لا بس من شفتك ارتاحيت..

باوعلي ودار وجها ..

كعدت يمه وكتله

سيلين : تدري يومي جان نحس هسه يلا استعدل ..

باوعلي وعكد حاجبه كال

ادهم : ليش صار شي وياج ؟؟؟

سيلين : لا بس تعلمت اصبح بضحكتك واليوم احس شي ناقصني وشي كلش جبير.

لعق شفته الفوك بلسانه ضيق عينه و سألني..

ادهم : شنو تعنيلج شوفتي ؟ او بالاحرى انه شنو اعنيلج..

سيلين : عمو انت عباره عن طاقه ايجابيه هاله من التفائل لهذا ارتاح نفسيآ مجرد اشوف ابتسامتك الصبح واذا تجي لشنو تعنيلي انت تعنيلي الحياه بأكملها انت عائلتي واهلي وريحه حبايبي الباقيلي من عمه ياسه اني ماعندي غيركم انت وايفين ومريم .

ادهم : اعرف بس شنو اعنيلج بحياتج...

سيلين : كتلك انت اهلي بعد اكثر من هيج معزه ماكو جان كتلك انت بمقام بابا بس بابا محد ياخذ مكانته لان هم جان مثلك حنين علينه ويحبنه..

ادهم : الله يرحمه .

سيلين : امين ، راح اكوم ابدل واسوي غده تريكت مو ؟

ادهم : اي

سيلين : يلا اروح اكمل بعد ما الحك.

ادهم : على كيفج لتنخبصين البنات قبل شويه اكلو ..

سيلين: وانت اكيد من الصبح ماكل.

ادهم : مو مشتهي جان كتلج.

سيلين : منا لحد مايصير الغده تلحك تجوع.

هز راسه ودنك مجاوبني اخذت جنطتي ودخلت للبيت بدلت ونسولف اني وايفين كملت وطلعت كبل للحمام توضيت ورجعت صليت ورحت سويت غده تغدينه غسلت المواعين ورحت نمت كعدت العصر دورت على عمو ردت اشوفه شلون صار ملكيته سألت مريم كالت نايم ، استغربت عمو ينام هيج وقت...

مرت اربع ايام وعمو من اسوء لأسوء من حيث المزاج وعصبي ميتحمل حجايه بس عصبيته على نفسه يعني يعتزل او يدخل غرفته ميأثر علينه بس احنه مقهورين ومتأثرين عليه ...

كعدت بحثت بالنت ملكيت شي ملم بحالته رحت للمكتب كمت اكلب بالكتب مالته لكيت كتاب يخص عوامل الضغط النفسي وكيفيه علاجها ....

اخذته ورجعت لغرفتي سهرت عليه وقريت المواضيع اللي احتاجها وتخص حالته ...

قررت ثاني يوم ما اداوم ، صارت ساعه خمسه الفجر رحت توضيت فرشت السجاده صليت وسجدت دعيت من كل كلبي يبرد قلب عمو ويريح باله لان داموت قهر عليه من اشوفه هيج وماعرف شنو السبب..

من بعد الصلاه قريت سورة القدر ١٠٠ مره هو علمني عليها تفيد لعلاج القلق والاضطراب ودعيت لعمو..

من ضمن علاجي النفسي عدا التمارين النفسيه نطاني عده اشياء استمريت عليها وشفت فرق كلش جبير بحالتي وبحياتي بشكل عام منها...

سورة القدر ١٠٠ مره

١٠٠١ لفظ اسم الجلاله ( يا واحد) لعلاج الامراض المستعصيه مو شرط مرض نفسي لا حتى جسدي ...

وقراءه سوره الانبياء بأشتياق يعني لازم نقراها متشوقين الها مو مجرد قراءه لا كأنما نحجي ويه شخص نحبه هيج علمني..

سألته شنو فائده سورة الانبياء اذا كل يوم اقراها .

كال

ادهم : التخلص من الامراض النفسيه وكذلك القلق والارق والاهم يكون الانسان اللي يداوم على قراءه السوره جليس جميع الانبياء بالجنه ويكون ذو هيبه بين الناس طيله حياته ، وسامع اذا تكتب السوره ويحملها الشخص مفيده لجميع الامراض النفسيه والعصبيه من قلق وارق وغيرها ...

كمت جبت ورقه وقلم وكتبت السوره طبكت الورقه وجبت قطعه قماش صغيره لفيتها بيها وخيطتها ، كمت شلت السجاده وضليت بأزار الصلاه رحت للهول وسمعت صوته يجود بتلاوه القران ، وكفت استمع الخشوع البصوته ياخذني لعالم ثاني غير هذا العالم ...سكت عرفته كمل دكيت الباب صاح تعاي عرفني اني لان عندي دوام والوحيده اكعد هيج وكت..

سيلين : صباح الخير وقبل الله.

وكف يسفط بالسجاده التفت عليه وكال

ادهم : صباح النور قبل الله اعمالج..

سيلين : جبتلك شغله اريدك تشيلها وياك دائما..

ادهم : شنو ؟

مديت ايدي باوعلها ورجع باوعلي..

سيلين : هاي سوره الانبياء كتبتها اريدك تشيلها وياك بكل مكان..

باوعلي ورجع باوع لايدي مجاوبني اخذها حتى شكرا مكال ماعرف حسيته اختنك ..

سيلين : عمو بيك شي..

جان مندار وناطيني ظهره اشرلي بيده لا ..

سديت الباب وطلعت ...

مداومت وسألني على الريوك.

ادهم : ليش غايبه

سيلين : ما اداوم اله تداوم انت ضجت وحدي.

ادهم : مفكر امدد الاجازه شلون بهيج حاله ترتبطين بيه.

سيلين : متكدر تمددها راح تبلش الامتحانات وانت الماده توقفت بيها.

ادهم : دكتور سامر اخذهم بدالي وكاعد يمشي بالماده..

سيلين : ياعمو تضل هيج انت؟

ادهم : شمسوي .

سيلين : كاعد احس بيك ممرتاح ومهموم ليش متحجيلي.

ادهم : من اكون مستعد راح احجيلج.

سيلين : واني انتظرك وراح اسمعك بكل ممنونيه ..

ابتسم وكال

ادهم : صايره تستخدمين مصطلحاتي هههه.

سيلين : بكلشي صرت اقلدك على فكره البارحه قريت موضوع كلش مهم واريد اطبقه عليك .

ادهم : ياستار شنو من موضع هذا.

سيلين :اي شي كلي شوكت عندك مجال.

ادهم : ماعندي شي اليوم ...

سيلين : وره الغده نشرب جاي ونكعد ندردش سوه..

ادهم : ماشي..

سولفنه شويه وكام راح لغرفته واني نظفت البيت وسويت غده خلص الغده تغدينه وشربنه جاي رحت لغرفه المكتب جان كاعد وبيده كتاب..

سيلين : ها عمو اجي..

ادهم : تعاي.

سيلين : من هسه الكلام حافظته على الغيب واذا غلطت لتضحك عليه.

ادهم : تدرين مو من طبعي الاستهزاء بالمقابل احجي اسمعج..

سيلين : اول شي تعال اكعد كبالي على هذا الكرسي.

ابتسم نص ابتسامه وكام كعد على الكرسي باوعلي مركز بكل تفاصيل وجهي ميل راسه وهمس..

ادهم : اسمعج..

سيلين : اول شي عرفت انت من شنو كاعد تعاني؟؟؟

تغيرت ملامح وجها كلها وعكد حاجبه لم شفته لداخل حلكه وانتضرني اكمل .

سيلين: جيد صاير تجاوبني بالملامح..

من حجيتها ضحك اني هم ضحكت خله عكس ايده على الميز وخله اصابعه على حلكه ومركز ويايه.

سيلين : عمو اللي استنتجته من خلال قرائتي لهذا الكتاب ..

جنت شايلته بيدي وهو باوع على الكتاب ورجع باوعلي ..

سيلين : انو انت كاعد تمر بضغط نفسي وهذا الضغط النفسي ياعمو ممكن يولد انفجار..

كتف ايده وكال .

ادهم : مممم شلون عرفتي امر بضغط نفسي..

سيلين : الضغط النفسي يولد العصبيه والتوتر ومشاكل بالنوم وانت كلهن كاعد تمر بيهن..

ادهم : صح..

سيلين : اللي عرفته من خلال عيشتي وياك ومرافقتي الك انت هووواي تنجز اعمال باليوم حتى مرات تفوق طاقتك الجسديه هذا يولد ضغط او ممكن فقدانك للسيطره على الوقت تحس الوقت ميكفي لانجازك المهمات اليوميه ..

ادهم : مممم كملي..

سيلين : وانت من متسيطر راح يصير عندك ضغط والضغط نوعين يا اما ضغط ظاهري وهو ضغط العمل والدراسه وهذا الضغط يكون طبيعي لكن اللي بيه انت هسه مو من النوع الاول الضغط اللي عندك من النوع المتسرب والمتراكم.

ادهم : ممممم حلو وهذا من شنو يجي ؟؟؟؟

سيلين: اني متاكده انت تعرف لان هاي دراستك بس من خلال قرائتي لهذا الكتاب ومقارنته ويه تصرفاتك ادركت انت تعاني من ضغط متراكم يعني شي يضغط على جهازك العصبي لكن ببطئ وتراكم وتولد عندك انفجار الانفجار يتخلل بالعصبيه وبالانعزال ومرات تعيش بحاله صراع بينك وبين نفسك او بينك وبين فد شخص معين او صراع فكري مو صح..

ادهم : صح يا دكتوره سيلين انه جاي اعاني من صراع نفسي بيني وبين نفسي...

سيلين : عمو بهيج حاله لازم ترتب حياتك وتعيد تخطيطها من جديد وتنظم وقتك واحتياجاتك بلش من الاولويه يعني ابدي بالضروري والاشياء التشوفها مو ضروريه تنازل عنها او اجلها راح تفرق عندك هواي..

ادهم : وبعد

سيلين : لازم تاخذ قرار بالشي اللي تفكر بيه وبأسرع ما يمكن..

ادهم : واذا ما كدرت شلون ؟

سيلين : اذا ماكدرت راح يزداد الضغط عليك لان الجهاز العصبي مالتك ما راح يتحمل ضغط اكثر.

ادهم : مو بس جهازي العصبي ميتحمل حتى ...

وسكت..

سييلين : عمو تره اني اعرف شبيك ؟

باوعلي مصدوم عكد حاجبه وهمس.

ادهم : شلون عرفتي..

سيلين : اني عرفت الشغله اللي مضوجتك كلام فهد وقريت بهذا الكتاب معلومه كلش عجبتني تساعد على تحسين الصحه النفسيه ، تكول اذا سمعت شغله تضوجك من شخص معين علمود لتكسب طاقه سلبيه تكول بينك وبين نفسك هو ميقصد او الكلام الكاله مو عليه اوميقصدني او ممكن حجاها بدون ادراك منه علمود عقلك الباطن ينطي مسلمات للدماغ انو انت كاعد تفكر بأيجابيه وبالتالي تتخلص من التوتر العصبي ..

تنفس الصعداء تنهد وكال...

ادهم : حلووووو عجبتني المحاضره عاشت ايدج..

سيلين : وايدك ضلت شغله..

ادهم : وهي.

سيلين : كاعد تسهر هواي صح.

ادهم : صح.

سيلين : اكو طريقه الي فتره استعملها وفادتني كلش ..

ادهم : انه علمتج عليها لو منو ؟

سيلين : لا مو سالفه سماع للموسيقى قبل النوم .

ادهم : لعد ؟

سيلين : اذا تريد تنام راح تفكر افكار سلبيه او ايجابيه او مشاكل تجيك على شكل وساوس.

ادهم : صح بهيج حاله ياست شسوي ؟؟؟؟

سيلين : شتسوي كول لنفسك اني اريد انام اني نعسان وكل الافكار اللي براسي راح اجمعها واخليها بصندوك واقفله وباجر من اكعد افتحه وافكر بفكره فكره واحاول احلها..

ادهم : سيلين تحاولين تعالجيني ..

جنت واكفه كعدت كباله.

سيلين : اتمنى ياعمو تدري من البارحه منايمه بس ادعي وماخليت شي ما قريته وهديته الك بنيه راحه البال.

ادهم : راحه بالي بشغله بسيطه بس هيه صعبه.

سيلين : شلون يعني مفهمت

ادهم : انه كاعد اعاني من القريب البعيد ..

سيلين : يعني شنو مستقبلك لو شنو وضح اكثر.

ادهم : عوفج هسه،،، راح انام ساعه واكعد كلش تعبت.

سيلين : عمو استفاديت من الشرح الله عليك اني ادري انت تعرف بكل هاي الاشياء بس ردت تحجي وتفرغ اللي بكلبك..

ادهم : اي عاشت ايدج.

حجاها وكام راح لغرفته..

بليل جنت اغسل مواعين العشا هو مرات يتعشى واغلب الاحيان ينام خفيف بس صار فتره مياكل ويانه ، واكفه على السنك واغسل مواعين حسيت بحركه ورايه انداريت لكيت عمو واكف وخال ايده بجيوبه وعيونه حمر دم غسلت ايدي سديت البوري ورحتله.

سيلين : عموووو شبيك خوفتني عليك..

ادهم : مادري مخنوك .

سيلين : بس فهمني بشنو تحس.

ادهم : محد كاعد يفهمني سيلين محد..

سيلين : انت مو تكول افهمك احجيلي جرب.

ادهم : تعبت ..

رحت جبتله مي اخذه مني شرب شويه وخلاه على الميز .

سيلين : عمو نروح نكعد بالهول نحجي.

بدون ميجاوبني مشى كدامي ومدد على القنفه بالهول طلع باكيت الجكاير هلكد شرب وحده وره الثانيه، تجرأت وسألته

سيلين : شبيك ؟

من بعد سكوت يقارب ساعه اكثر تنهد وهمس...

ادهم : احب وحده عنيدة مأذيتني حيل بحيث كل ما اسرع خطواتي الها ترجع ليورة وتتركني ارجع اخطو خطوة ليكدام وترجعني الف خطوه ليورة ، تراوغ ويايه تعبتني ...

سيلين : ليش متعترف الها وتنهي هذا العذاب منتبهة عليك صارلك فتره متعذب ...

باوعلي بنضره يتوسلني بيها بس مجنت افسرها هاي حب جان ممبين حبه الي ابد مجنت احس هذا الحب الي من كثر الاهتمام الشايفيه منه ...

تنهد واخذ نفس عميق بحيث صدره ارتفع ورجع هبط بصوره عشوائية..

همس بتعب ..

ادهم : اخاف اخسرها ، اخاف منها وعليها ، تدرين انه وياها علاقتنه مثل شنو.

سيلين : مثل شنو .

ادهم : علاقتنه عباره عن طريقين متوازيين كل طريق يودينه لجهة معينه يعني من سابع المستحيلات نلتقي بيوم سوه، هههه بس الحلو بالموضوع ، عاجبني اكون بصفها افضل من ما تلتقي طرقنه بمكان مشترك ونهايتنه كلمن بمكان واحد بعيد عن الثاني...

همست
سيلين : شحبيت منها ..

رفع عينه متلهف ، حجه بصوت عزف مسامعي هلكد ماجان رقيق ...

ادهم : حبيت كلشي بيها ، حبيتها لدرجه كمت اشوف سترها عورة ، وحجابها فتنه صوتها يخدرني لدرجه الثمالة ..

سيلين : اعرفها ..

باوعلي ودنك ورث جكاره وكام كعد عدل..

سيلين : من محيط الكليه.

ادهم : تقريبا.

سيلين : بسببها اخذت اجازه.

هز راسه اي..

هنا تأكدت مو اني المقصوده لان احنه بلبيت سوه شنو يمنع اذا داوم ويايه، فكرت بوقتها اخذ اجازه علمود يبتعد..

ادهم : تدرين اصعب شي بالحياه شنو ؟

سيلين : شنو؟

ادهم : من انت دكتور ومتعرف تعالج نفسك هنا يكمن مواطن الفشل بكل مراحله.

سيلين : عمو لتكول هيج حشاك زين كلي منو واني احجيلك وياها..

حجه بصوت بيه بحه .

ادهم : عوفيها .

سيلين : ليش؟

ادهم : كتلج عنيده

سيلين : نجرب مخسرانين شي..

ادهم : تتركني اعرف بيها واموت اذا سوتها اعرف نفسي ما اتحمل غيابها..

تقربت كعدت يمه وبينه شبر واحد همست ..

سيلين : عمو انت كاعد تمر بأزمه ومبينه جبيره مثل ما وكفت ويايه وعالجتني خليني اوكف وياك..

التفت عليه وجانت الدمعه واكفه بطرف رمشه متقبل تنزل ..

ادهم : ليش هيج دتسوين؟

سيلين : شسويت مفهمت .

ضيق عينه وعكد حاجبه دار راسه واخذ نفس من الجكاره وطفاها بالنفاضه حجه بصوت تعبان .

ادهم : ههههه جنت احسد نفسي شلون اكدر اسيطر على انفعالاتي بسهوله وشلون اقود حياتي وشوكت اعرف اتظاهر بعدم الاهتمام وشوكت انسحب وبعمري مجنت افكر يجي يوم واقدم تنازلات لأي كان ، جنت الغي اي قانون يمس كرامتي حتى لو جان قانون يخص حياتي ومشاعري صرت اكعد واتفرج على خساراتي منها ضعفي ورغباتي الدفينه وهزائم الحب اللي اجاني مدري منين هيج غفل حسيت نفسي حبيت شلون وليش ما ادري ...

سيلين : كلي منو وعد مني ما اكول ..

ادهم : بعدين اكلج واعرفج عليها..

سيلين : حلوة ؟

التفت عليه باوعلي همس.

ادهم : كلشششش.

سيلين : شكد عمرها.

ادهم: شويه اكبر منج..

سيلين : طالبه لو استاذه .

ادهم : استاذه.

سيلين : بقسمك لو وين؟

ادهم : لا مو بجامعته..

مسح وجها وكام وكف.

ادهم : تصبحين على خير.

سيلين : وانت من اهله.

مرت الايام وجدد الاجازه الاسبوع صار ٣ وخلصت اجازته وداومنه ، خلال اسبوع من الدوام بده يرجع طبيعي ورجعت سوالفنه مثل قبل وبيوم طلب مني اقدم محاضره ابداله.

سيلين : ههههه عمو صدك تحجي ؟

ابتسم وكال

ادهم : اي صدك احجي.

سيلين : زين ليش؟

ادهم : اريدج تصيرين قويه ..

سيلين : زين عن شنو المحاضره

ادهم : عن الضغط النفسي وكيفيه علاجه

سيلين : يعني نفس الموضوع الحجيته الك.

ادهم : مممم بعدج حافضته.

سيلين : اي ..

ادهم : يلا لعد.

حجاها وكام شال سترته والجنطه ..

سيلين : عمو صبر شو صارت صدك.

ادهم : يلا عندي محاضره وحاير اليوم شنو اشرح انتي شرحي بدالي..

سيلين : هههههه شحجي بعد...

طلع وطلعت وراه نزلنه ودخلنه لقاعه الرابع من بعد السلام قدمني الهم بهاي الصيغه....

ادهم : اليوم ست سيلين راح تشرح المحاضره بدلآ عني وانه راح اكون طالب واكعد يمكم وكلنه نستمع الها بآذان صاغيه.

رحبو بيه الطلاب وبلشت اول شي سلمت عليهم وعيني عليه اباوع واحجي لان نضرته تنطيني طاقه وثقه بالنفس وكلشي حلو بالدنيا..

جان كاعد اول سره ومكتف ايده ويباوعلي بأهتمام.

سيلين : اليوم درسنه عن الضغط النفسي وكيفيه علاجه.

وشرحت الموضوع كامل اباوع عليه عيونه دمعت مسحها وكام وكف صفكلي والطلاب هم وكفو صفكولي..

وبهاي الخطوه اجتازيت هوووواي مراحل من عدم الثقه بالنفس ..

ثقتي بنفسي كبرت وخف عندي الرهاب الاجتماعي صرت اكدر اتجاوب واحجي واناقش لان عندي خزين من المعلومات يأهلني اناقش اي شخص بخصوص هذا العلم ..

خلصت المحاضره وطلعنه نمشي اني وياه سألته.

سيلين : عمو ليش بجيت .

ادهم : فخوووور بيج وحسيت تعبي وياج ما راح هباء.

ضحكت وكتله.

سيلين : شكرا من القلب..

يتبع ..

صباح الخيرررات 🤎

حبايب روابط صفحتي الشخصيه فيس وانستا

ورابط كروب الفيس تلكوها بالوصف مال الحاله بصفحتي بالواتباد....

شنو رأييكم بالربط بين الحاضر والماضي ..
تحسون شي سهل لو يدل على اتقان الكتابه بشكل جيد..