#بقلمي:جوهرةNerenAlobeidy
*******
طلعت ورى العشا اريد اروح لبيت تمارة توني صعدت السيارة دك موبايلي
_هلو حبيبي توني اريد اجي عليج
_لااا حبيبي لا تجي اليوم لأن اخوية نزل مجاز من يلتحق اخابرك وتعال
_ يلة لعد ولو جنت مشتاقلج بس اريد تعويض
_هههه ادلل حبيبي شعندي غيرك
سديته من تمارة ونزلت من سيارتي رحت لبيت اهلي بقيت اتعلل يمهم اتصلت علينا عمتي ام رعد كالت ابو رعد متخربط والولد مخبوصين بي راح يطلعون بي للمستشفى
وتريد غانم يجي وياهم
غانم رأسا طلع لبيت عمتي واحنا رحنا وراهم بقينا يم عمتي الي جانت حيل متأثرة
ورى ساعتين رجعو وياهم ابو رعد جان حيل تعبان بقينا لما شوية ارتاح ورجعنا جانت الساعة وحدة دكيت الباب جان مقفول من الداخل رجعت اتصلت على دنيا طلعت فتحتلي الباب
_شبيج يمعودة صارلي ربع ساعة ادم وماكو
_والله نمت وانت تاخرت كل هذا يم اهلك
_لا يا اهلي جنا يم عمتي خطية ابو رعد تخربط
_خطية وهسة شلونه
_شوية احسن الحمدلله ميت من النعاس بس اريد انام
قفلت الباب ورحت للغرفة يادوب نزعت دشداشتي وكبل نمت
ثاني يوم خابرت بيت عمتي سألت على عمي ابو رعد كالت عمتي الحمدلله يبين احسن
_وسام عيني توديني للسوك محتاجه غراض
دحكت عليها ..ذاك الشهر وديتج شعندج
_هسة توديني لا
دحكت بالساعة بعد وكت يادوب العشرة الصبح .. يلة تحضري وحصري الجهال تأخذهم ويانة
من سمعني احجي وية امهم كانو يكمزون فرحانين يدرون راح يتونسون ويقطوني خوش قطه
هم زين ما اعترض وسام من كتله اريد اروح سوك جنت محتاجه عطورات وملابس المهم تسوكنا واشترينا للجهال ملابس وملاعيب
نظوري راد مطعم وسام ما اعترض خطية رغم نص الراتب طار تغدينا بالمطعم ورجعنا البيت الساعة وحدة ونص الجو حار نار كبل فتت الجهال للحمام سبحتهم وراها حضرت الحمام لوسام سبح واني ورى ما لملمت البيت دخلت سبحت صارت الساعه اربعه رحت صليت وسرحت شعري فتت مددت بالهول يمهم الجهال ملتهين بالملاعيب وسام مبين غافي اني هم جريت الكوشة ومددت عالكاشي عالبرودة
مدري بروحي نمت فزيت على صباح الجهال متعاركين والوهم رزلهم يمكن لان فز من النوم
حسوني يبجي وآية تبجي
_شكووو ليش تتباجون
رفع أيده حسوني.. اضتني قصده عضته آية
وانوب آية تبجي حسوني عاشها من بطنها يبوو ولا تخلص سوالفهم
جربته بحظني بوسته من أيده سكت رجعت جريت أيوته بيتها بخدها سكتت خطية يمة فدوة للبنات شكد هادئة حبيبتي
صراحه وسام .. تعال حسوني هنا
راح على ابوه خلاه بحظنه ورجع مدد بقى يسولف وياه
كمت اني رحت للمطبخ خدرت جاي وعندي كيك قبل يوم مسويته طلعت كم قطعه وخليتها بماعون بالصينية خدر الجاي صبيت بكوبين واخذتهن للهول وسام مموجود يمكن راح يصلي
شوي ودخل
_اي والله هسة وكته الجاي عاشت ايدج
_الف عافية
كعدت بصفه نشرب جاي بس أشوفه باله مو يمي .. شبيك وسام
_ها لا ماكو شي بس اجى على بالي صاحبي من فترة مارحت شفته ولا سألت على ابوه جان مريض
_اي شكو بيها واجب هذا
_اي صح احتمال بالليل اروحله عزيز علية هذا
_الله يديم صحبتكم
