فتاة الهكرز

الجزء 6

  

                              وصول الليل

في السفرة ديال العشاء.. كانت جالسة إيناس مع سوزن وكيتسناو صاحب المنزل يلحق بالمائدة باش يبداو العشاء.. حتى كاتسمع صوت خطواتو وشمت ريحتو الرجولية اللي تغلغت في أنفها على بعد أميال.. وصل حداهم وكيف العادة خاصو يسلم على الأم ديالو بطريقتها كيف ديما وهي كيلقي عليها غير التحية وكتردها عليه.. بداو كاياكلو في جو مشحون غير بالسكات.. حتى كسراتو الأم وقالت بابتسامة:
_ولدي فهد.. كيف دوزتي نهارك في الخدمة..
رد عليها بلطافة وقال:
_كيف العادة نتي عارفة الخدمة كثيرة..
ميقت فيه إيناس باستغراب وكملت ماكلتها.. علاه هو فاش خدام گاع حتى عندو الخدمة كثيرة.. اللي فراسها هي أنه رجل عصابة كايدير أعمال إجرامية والسلام.. لكن مهتماتش للأمر لأنه واخا رجل إجرامي كايبقى هو اللي حاميها ومقدم ليها الأمان..
كملو عشاهم وكل واحد توجه للغرفة ديالو باش يستعد لليوم جديد.. بالنسبة لإيناس مخشية في غطاها وطالقة للعنان لدموعها اللي كايطيحو فوق المخدة.. مبغاش يزورها النعاس لذلك ناضت خرجت من البيت ونزلت لتحت غادة متوجها للجردة تشم  الهواء النقي باش ترتاح.. وصلت عند الجلسة ديال لفوطوي اللي برا وتفطحت تما وعاودت هاد المرة سمحت لدموعها ينزلو بهدوء.. قلبها باقي كيتقطع على والديها كيفاش غايكون حالهم دابا أكيد قلبهم كايتقطع عليها.. في حين الگوڤيرنور كان گالس في البيت ديالو فوق الناموسية ولابس ملابس ديال المنزل.. وفي ايديه البيسي منغامس في الخدمة ديال الشركات ديالو اللي عاد هملها مؤقتا بسباب المشكل ديالو مع الكارط اللي أسبوع وهوما كيبحثو عليها..
مني حس راسو بدا كيعيا.. حط البيسي.. وناض توجه مباشرة لبالكون وفي اليد ديالو سيجارتو الغالية.. اللي كتطفي القليل من النار اللي شاعلة في قلبو تجاه الماضي المحزن ديالو.. دور راسو جيهة واحد البلورة بانت ليه وسط ديك الظلمة.. وكانت گالسة في البرد بدون ماتزعزع من مكانها.. تأفأف من الوضع اللي دايرا لراسها ويقدر يدربها البرد وغادي تمرض في أي لحظة.. توجه لماريو ديالو.. فتحو وجبد منو إيزار خفيف.. ثم خرج متوجه لتحت..

كانت إيناس باقا گالسة بنفس الطريقة ومخليا مجرى دموعها كيسيل مع تنهيدات من الأعماق وهي كتفكر بأن والديها أكيد غيكون دارو عليها العشا ديال الموتة دابا.. ومها غتكون كتبكي عليها وحتى باها أكيد.. حتى حست بشي حاجة تحطت على كتافها سخونة دفاتها.. التفت باش تشوف شكون.. حتى كتجي عينيها في بحر عيونو الزرقاء حست بثوثر وقلبها صارع في وثيرة الخفقان.. دار الگوڤيرن من الجهة الأخرى وجلس بالجنب ديالها شاف فيها مطولة.. ثم هز ايدو جيهة كتفها محاول يحطها لكن متردد.. حتى كيقربها وكيعاود يجمعها.. أما هي كانت مدورة وجهها لجهة الأخرى حتى حست بايدو تحطت على كتفها.. حست برعشة قوية على إثرها دورت وجهها جيهتو لقاتو كيرمقها بنظرات حنينة.. بينما هو أول يحس بهاد الشعور مني حط ايدو عليها.. حس برعشة قوية طلعات معاه من صبعو الصغير.. وحتى قلبو سارع في دقاتو.. قال وهو كيحاول يكتم ثوثرو:
_ا إيناس واش نتي بيخير؟
على إثر سؤالو طلقت لعنان لدموعها وشهقاتها وقالت ببكاء:
_لااا.. ماشي بيخير.. م ماما وبابا كيحساب ليهم ميتة دابا.. هيئ هئ  أ أكيد قلبهم كيتقطع على بنتهم الوحيدة.. هئ هئ..
هو الوحيد اللي يقدر يحس باش كتحس ويقدر يحس حتى بأهلها باش كيحسو دابا.. لأنه هو اللي عاش هاد الشعور.. هو اللي كان كيحساب بأن الأم ديالو ميتة بينما هي كانت باقا على قيد الحياة.. كتعذب ومحتاجة ليه وهو مقدر يدير والو لأنه مكانش على دراية بأنها عايشة..
ملقا باش يدير باش يخفف عليها.. جبدها من كتفها وخشاها في حضنو مزير عليها فين تبكي.. وحط ايدو على شعرها الحريري اللي أول يقيسو كيدوز عليه بحنية وكيخشي أناملو وسط خصلات شعرها.. بينما هي استغلت الفرصة وزادت تخشات في حضنو أكثر كتستشق من ريحتو اللي محمقاها.. وحاطة يدها على كتفو مزيرة عليه.. كتبكي في صمت ودموعها الكريسطالية كيتساقطو على الملابس ديالو.. قال وهو كيحاول يساندها:
_ششش.. صافي.. كنواعدك غادي نرجعك عندهم في أقرب وقت..
ابتسمت على إثر كلامو وزادت تمخششت فيه كأنها كتقوليه شكرا.. وحتى هو معنقها ليه أكثر كيستشق من عبير شعرها الحريري.. دازت مدة وهي باقا في حضنو.. استغرب من حسها اللي تقطع ومبقا لاصوت أنينها ديال لبكا لاوالو.. هبط راسو وهز ليها وجهها.. فلقاها دخلت في سابع نومة ومغمضة عينيها بحال شي ملاك نازل من السماء.. بقا كيتأمل في وجهها الزوين واللي حمقو من أول مرة شافو.. رموشها وعينيها البنية وخدودها الحمرين بالخجل والبكا.. وشفايفها الوردية اللي ولاو بالنسبة ليه قطعة كرز مكرهش يدوقهم في أي لحظة.. هز ايدو ومسح ليها باصبعو الكبير بعض بقايا الدمع من جنب شفايفها الرطبين وهو مستمتع بلمسهم نظرا لأنهم ناعمين.. بزز باش لعن الشيطان على بعض الأفكار المنحرفة اللي جاتو وناض وهو حاملها في ايدو بحال شي ريشة..