فتاة الهكرز

الجزء 4

حبس في اللحظة اللي جاتو تعليمات باش ميقتلهاش.. رتاح نفسيا حيث مغايديرش هاد الإثم العظيم وقال بصرامة:
_حمدي الله.. غادي تبقاي عايشة.. ولكن غير ترحمي على بنتك.. حيث دارت إثم كبير وكان عقابها هو الموت..
مليكة بؤبؤ عينيها خرج من الصدمة ووجهها ولا حمممر.. كيفاش دابا واش كبيدتها اللي 18 العام وهي تربي فيها باش تشوفها ناجحة في المستقبل هاهي دابا مشات هباءا منتورا.. ياله غادي تبدا تنوح وتغوت على كبيدتها وهو يحط ليها مخدر في زيف بيض على فمها حتى سخفت... وعاودو لبسو الخمارات وخرجو كيف دخلو وكأن شيءا لم يقع..


ركبت في الطائرة مع داك المجنون وهي عقلها كلو خدام مع ماماها وباباها.. معرفت كي غيكونو دابا وهوما معرفو بنتهم الوحيدة فين غابرة.. أكيد دابا كيقلبو عليها وقالبين دنيا عليها.. قاطع أفكارها إيدوارد اللي كالس في الجنب ديالها كيقول بابتسامتو المعهودة:
_بلا متبقاي تفكري في الأهل ديالك حيث هوما فراسهم غير بأنك متي دابا..
وسعت عينيها من الصدمة.. كيحساب ليها راسها بأنهم غيكونو فراسهم غير مخطوفة وماشي ميتة أكيد دابا مغادي يقلبو عليها موالو.. وغادي تبقا عند هاد المجانين إلى الأبد.. شافت فيه بكره وقالت وهي ضاغطة على سنانها ومقربة وجهها جيهة إيدوارد:
_عقل على هاد الكمارة مزيان.. أقسم لك يمينا حتى ندمك على هادشي اللي درتي فيا..
إيدوارد في اللول تصدم ولكن شوية تفرشخ ضحك وقال بسخرية وهو كيحاول يحبس الضحكة:
_أشنو غاديري.. نتي غير هاكر سخيفة.. غادي تختارقي النظام ديال جسمي مثلا..
 وكملها ضحك وهي كاثمة غضبها وكتحلف عليه في الداخل.. في الأخير دارت ابتسامة جانبية ودورت وجهها جهة الشرجم كاتشوف الطائرة كاتحلق غادا لمكان هي معارفاهش أشنو هو..
بعد مدة طويلة نزلت الطائرة في مدينة فوجيا ونزل منها إيدوارد وإيناس.. هاد الأخيرة اللي عرفت من خلال المسافة اللي ضربو بأنها خارج المغرب دابا ولكن فين متعرف.. من بعد وغادي تكتاشف.. مباشرة بعد مانزلو كانت السيارة ديال إيدوارد في الإنتظار.. ركب في مكان السائق وإيناس حداه كاتمة غضبها ودموعها ومبقاتش بغات تبين الضعف.. انطلق بالسيارة متوجه للمقر ومن وراه الكثيبة ديال لكارد..




گالسة وسط الدار اللي باقا مقلوبة على سفاها  على ركابيها.. والعيالات دايرين بيها ويبكيو ويصبرو فيها وهي غير كاتغوت وتبكي وكاتقول بحرقة على بنتها حبيبتها وعوينتها:
_اللللله.. ياااااربي على بنتييييي مسكييييينة.. مشااااااات باقاااا صغيرة ومشاافت وااالو..هييئ هيييئ.. بنتييي كبيدتي قتلووهاااا.. ولاااااد الحرام قتلوهااا.. واش داااارت ليهم غير درويشة
قالت ليها واحد المراة  منهم وهي كتصبر فيها:
_صبري ااخيتييي صبري.. مكتاب عليها هادشي  غير صبري.. دابا الله يفرجها وراه مكتاب عليهاا..

هوما باغينها تنقص على راسها وهي مسكينة اماكتزيد في البكا والنواح.. وحتى راجلها عزيز بات إيناس لايقل عنها عذاب.. قلبو محروق على بنتو الوحيدة اللي كان ديما كيتفتاخر بيها ومكبرة بيه مع الناس بقرايتها وذكاءها والنقط اللي كاتجيب غير من الأوائل.. هاهي دابا جاتو خبراها باللي ماتت المشكيلة حتى الجثة ديالها غابرة وجاري البحث عليها ولكن تواحد مقدر يفهم أشنو وقع وشكون هادوك الناس اللي هجمو عليهم ورونو الدار.. وقتلو بنتهم وهي مدايرة ليهم والو..  

مسافة قليلة ووصل إيدوارد للمقر ديال التجمع ديالهم واللي كان في انتظارهم الگروڤين.. بعد مجاتو أخبار أنهم جاو.. خرج من القصر وتوجه مباشرة لاستقبالهم.. نزل إيدوارد من السيارة ومن وراه إيناس هاد الأخيرة اللي كتاشفت من خلال اللافتات والخبرة ديالها في اللغة الإيطالية بأنها في إيطاليا وبالظبط في مدينة فوجيا.. 

دخل إيدوارد مباشرة للمكتب.. دق جوج دقات وقبل مايدخل دار عند إيناس وقال بحدة:
_بقاي هنا حتى نعيط ليك.. ومني دخلي ديري عقلك هذا راه الگوڤيرنور مغاديش يصبر عليك..
خنزرت فيه بلا متقول والو وبقات وافقة.. في حين هو دخل للمكتب وسد الباب.. وتم كان الگوڤيرنور كالس بكل رقي وشموخ فوق الكرسي ديالو.. وإيدوارد تمشى بخطوات ثابثة جيهتو وجلس في الفوطوي حداه وجبد الكارط من جيبو وعطا ليه وهو كايقول:
_تفضل امستر الگوڤيرنور.. الكارط..
خداها من عندو الگوڤيرنور وبدا كايقلب فيها كأنه كايتأكد واش هي.. من بعد خشاها في البيسي ومارتاح حتى لقا فيها الفيديو كامل.. ابتسم ابتسامة جانبية وقال بصوتو الرجولي:
_برافو ا إيدوارد.. المرة الجاية تبقا تنتابه كثر..!
حرك ليه إيدوارد راسو بتفهم وقال بتردد:
_امم وب باقا حاجة أخرى..
شاف فيه الگوڤيرنور باستغراب وقال:
_تفضل أشناهيا هاد الحاجة..؟
_في الحقيقة.. البنت اللي لقينا عندها الكارط.. لسوء الحظ شافتو كامل..
عقد الگوڤيرنور حواجبو باستغراب وقال:
_كيفاش شافتو.. وكيف دارت حتى شافت المحتوى ديالو.. هادشي راه ميمكنش..
جاوبو إيدوارد بالقليل من الخوف:
_في الحقيقة البنت صدقت هاكر.. عندها أجهزة محمية من الإختراق..