نصفي العقيم ( مكتمله )

مشهد من المستقبل ..

.. رفعت راسي لخالق السماء ودعيت من گلب يتيمه ملچوم بموتة اعزازها ..

كون البالي يطلع غلط وموصحيح .. لان احس هاي الضربه القاضيه الراح تمحيني من الوجود وتدمرني دمار .. كل السنين الراحت والجرى عليه متوگف مقابيل هول المصيبه هاي وعظمتها..

ياربي كافي والله گلبي احسه محروك وملچم من گد الضيم ..
ظهري نقجم نصين من گد الطعنات وثيابي غرگت بالدم وصارت حمر ما تحمل طعنه ثانيه ابد والله ..

رجعت سجدت والدموع تنهمر على وجناتي .. وتتسابق حتى تملئ السجاده وتبللها ، حجيت من بين دعائي وكلامي مع الله

.. يارب دخيلك انتَ المستعان وانتَ المعول في الشّدة والرخاء ساعدني وعيني يارب امتحانك صعب حيل واني مو گده ..

ضربتين ع للراس توجع .. منا موتت اعز ناسي وروحي من الدنيا وخلاصي الجان على ايده ..ومنا شكي الماكلني اكل واتمنى تطلع مو هي .. يارب تطلع مو هي .. يااارب ..

نفتح الباب واني ساجده ، طب هو بجبروته وظلمه .. صعد ع الجربايه وراح بجهة التقسيم اخذ الشاحنه وگال بس لسانه مبين ثگيل ..

"متبطلين خشوع ع اساس بس انتِ تعرفين الله ..  شگد تنوحين اليشوفج يگول علويه ..

"كمت كملت صلاتي واني ابچي .. هو من شافني هيج دفعني وكعت يم حافة الجربايه رجع باوعلي وگال

"كافي صلاة كافي عباده ..

"تقرب مني ووخر الحجاب من راسي .. ولزم شعري بايده قوي .. صار يخربط بالكلام واشياء مافهمها

واخر شي ضربني راشدي قوي نشك حنچي بمحبسه .. طلع هو وطلعت وراه اني غسلت ورحت بغرفته ..

طبيت شفته نايم على بطنه والتلفون يدگ يمه .. تقربت بخطوات ناعمه وبدون صوت حتى مايسمع الي

.. شلت التلفون وايدي ترجف .. فتحت السماعه حتى اكذب شكوكي الي للاسف استيقنت وصار مثل الخناجر تطعن بروحي طعن

خليت الموبايل  على اذني بدون ماحجي كلشي .. واجاني صوتها وهي تگله ..

"الوو حبيبي وينك ..

"احس گلبي زادت خفقاته .. وحاولت اركز بالصوت اكثر ... هي والله هي هذا صوتها
لااا يربي مستحيل ماتوصل بيهم النذاله لهنا لااا ..

بقيت فاتحه التلفون وهي تحجي بس مارد الها .. بس دموعي توگع واباوعله شلون نايم ولا يمه .. سديته منها ماگدرت بعد اسمع صوتها وتتمثل صورتهم القذره بمخيلتي ..

خليت ايدي على گلبي .. طلعت بره اتنفس واخذ هوه لان احسه نقطع عندي واذا ابقى اكثر احتمال اموته ومايشفى غليلي

..
طلعت واني ابچي والزم بالحايط واتوكئ عليه حتى يسندني لان بكل بساطه ماضل الي اي احد استند علي ..

ماجنت منتبها للعيون الصغار الي تراقبني من بعيد .. والخوف ساكن اعماقها ..

طلعت بره واسمع صوت الصفير  العالي اباوع على اوراق الشجر الي تتراقص على اوتار نسمات الهواء ..

رحت ورى البيت واني ناويه خلص انو اخلص نفسي وارتاح .. رحت جبت جلكان نفط ورجعت للبيت

.. فتحت التلفون وكتبت للانسانه الوحيده الهونت عليه جروحي ووگفت ويايه بشداتي ..

..  اهات وحسرات ودموع جانت تنذرف ويا كل حرف ابعثه الها بوصيتي وانو تنفذها كامله ..

شلت جلكان النفط وبلشت اديره على جسدي المتهالك .. الي محد رحمه و حتى اني ماراح ارحمه ...

____________________

😎😎😎

بشرفكم شلون مشهد كلشي مفتهمتو موو 😂

هسه الفضول يقره الف عدكم .. موو

هسه راح اترزل مووو😂

صدك بنات اريد استشيركم بشغله ..

طبعاً القصه مدالحك اكتب بيها هواي وصارتلي ظروف ووقتي ضيق كلش واني اكتبها .. واخاف اذا استمريت هيج مانطيها حقها وانتو هم راح تملون اذا ابقى انزل بين يوم ويوم ..

فَـ اقتراحي انو اتوقف هسه عن النشر واكتب بارتات بس مانشرها يعني راح اكتبها على راحتي

.. ومن اخلص القصه كلها ابلش انشرها الكم احسن مما اكتب اليوم بيومه .. ومن ارجع انشر كل يوم بارت يعني مو بين يوم ويوم او يومين انشر ويوم استراحه .. لا انشر كل يوم واحتمال افاجئكم وانشرلكم بارتين باليوم ..

اني اشوف هيج احسن شي انقطع عنكم فتره وارجع انزللكم ياها بالتزام كامل ..

وهسه خل نصوت ..

تريدون ؟

متريدون ؟

الخيار الي يحصل اكثر تصويتات هو النمشي علي ..
بس اذا بقيت انزل ومنقطعت يعني لازم تتحملوني شويه واني راح احاول قدر الامكان اكتبلكم بارتات طويله وبكثره

وبالمناسبه .. الكاتبه المتميزه ايلين الطائي سوت ويايه مقابله وسئلتني هواي اسئله حلوه والمقابله كلش ممتعه .. للي يحب يتعرف عليه اكثر فـَ

هذا حسابها .. user96766123

و هذا الكتاب ..

والرابط راح انزله بالمحادثات المعلنه على حسابي ..

تقبلو اطيب تحياتي..

الكاتبه : يُمنا نآصر

احبـ♥️ـكم