🧜‍♀️🐚حلم حورية البحر🐚🧜‍♀️|مكتملة✨️

1

🐚🧜‍♀حلم حورية البحر🧜‍♀🐚
للكاتبة✒️: Victoria kaelin
💜📖الجزء 1💜📖
فجزيرة بوراكاي الفيليبينية المعروفة بجزيرة الرمل الأبيض و لي تتمتاز بواحد من بين اجمل الشواطئ فالعالم رغم صغر حجمها الا انها ذات شعبية كبيرة فالفيليبين كونها معروفة بالليالي الصاخبة لي تتجذب السياح و المحليين باش يستمتعو بوقتهوم...و في الشاطئ الأبيض كانو الناس مشتتين بشكل كبيير و كثاافة ملحووظة كون اننا في فصل الصيف..الشمس ساطعة و الحرارة عالية كلشي لابس البيكيني ديالو، البنات فمختلف الأعمار و الأشكال كل وحدة ضاربة دوبياس مبيينة بيه تضاريس جسمها المنحوتة ولا العادية و الشبان غير معلقين عينيهوم فلي غادية و لي جاية و من بين هاد الشبان كانو واحد الرباعة متكونين من 4 ديال المغاربة جالسين فوق الرملة لبارح حطاتهوم طيارتهوم فهاد الدولة باش يقضيو فيها عطلتهوم الصيفية و كانت هاد الجزيرة هي اختيار واحد فيهوم لهاد العطلة هادشي عادي و مولفينو هاد أولاد الطبقة الغنية لي تزادو بملعقة ذهب و لقاو كلشي موجود فحياتهوم..و من بين هاد اولاد الطبقة الغنية كان واحد الشاب عشريني لابس شورط السباحة فالكحل و معري على عضلاتو البارزة بفضل ممارسة الرياضة...
زياد:واش ماعييتوش من التحنزيز؟؟
اسامة متبع عينيه لواحد المترمة:خليني اصاحبي هادشي HD هنا
رضوان:وا صاحبي شوف ليك ديك الزعرة(ناض)غنمشي عندها
شدو شكيب:فين غادي مالك زربان؟؟
رضوان:وا طلق مني اصاحبي غتمشي الزعرة
شكيب ناض:وا صبر نمشي معاك كالاك عجباتني السميمرة لي حداها
بتاسم ليه رضوان و تسالمو سلام العشران و مشاو لعندهوم فرحانين...
زياد شد وجهو:واش هاد مول اليخت مزال ماصونا عليك؟؟
اسامة ساهي فواحد الطرف تتلبق ليه مولاتو واقي الشمس...
زياد:وااا اسامة
اسامة فاق من عالمو:اش كاين؟؟
زياد:اش قال ليك مول اليخت؟؟
اسامة ممفاكش تيشوف بنص عين فمولات الطرف:امم قال ليا غنصوني عليك
زياد ناض:انا نمشي نتمشا شوية بينما جا
اسامة مامديهاش فيه:واخا غير سير
مشا زياد تيتمشا غادي وسط الناس حتى بقا غادي مع الشاطئ لي كانت رمالو بيضااء ساهي فالمياه الزرقاااء النقيييية بزاااف بحال زروقية و صفاء السماء شافوه شي دريات و بتاسمو تيوشوشو لبعضياتهوم ولكن هو اخر همو هادشي باغي غير يدوز عطلتو و ينسا ضغوطات الدراسة ديالو عكس صحابو لي جايين خصيصا باش يشوفو التيتيز الفيليبيني و سياحو لي تيجيو سنويا من مختلف بقاع العالم..كمل طريقو سارح فجمال المياه حتى فييقو صوت أسامة ليجاي تيجري و تيلهث...
اسامة وقف تيرد انفاسو:مول اليخت جااا
زياد وقف مطلع راسو:فين كاين؟؟
اسامة تينعت ليه:تما راه عاد جابو حتال الكشكوشة سربي
مشا معاه زياد حتى وقفو قدام يخت متوسط الحجم(و كبييير مقارنة ب بنادم) اما رضوان و شكيب سبقو لداخل مطلعين معاهوم دوك البنات...

🐚🧜‍♀حلم حورية البحر🧜‍♀🐚
للكاتبة✒️: Victoria kaelin
💜📖الجزء 2💜📖
طلعو بجوج حتى هوما و بدا القبطان تيوجد باش يتحرك بيه...مشا زياد حتى جبد من الصاكادو ديالو واحد القاميجة فالبيج مايل لسومو بارد لبسها حيت فاش تيتحرك اليخت تيبدا البرد و الريح رغم انه الجو سخون...ديمارا من تما بعدما تأكد من جلوس الركاب كاملين ليهوما زياد و صحابو و دوك جوج بنات....
بعد وقت ماشي طويل هاهوما فعمق البحر و بعدو على اليابسة بزااف حتى مبقاش تيبان ليهوم الشاطئ الأبيض ولا ناسو...
اسامة جالس حدا صحابو و داوي بالإنجليزية: شنو سميتكوم؟
السميمرة:انا كايسي و هادي صاحبتي نيكوليتا
اسامة:متشرفين و زعمة معندكومش شي صاحبتكوم ليا حتى انا؟
ضحكو بجوجات و قالو ليه لا اما لخرين مضورين عليهوم يديهوم و حتى هوما جاتهوم عاادي و نيت باينة فهاد الولاد لباس عليهوم علاش لا ميستمتعوش معاهوم...اما زياد مشا ناض وقف بوحدو قدام الحديد لي تيكون فاليخت لي بحال الگرياج باش متطيحش..تما فين وقف ساهي و سارح بعينيه فجمالية هاد البحر الزوييين ذو المياااه الصااافية حتى حس باليخت وقف و هادشي تيدل على ان القبطان حدد المنطقة زائد انه هاد المسافة كافية حيت راه وصلو لإرتفاع غاارق...
رضوان:شفت هدا وقف!
شكيب تيشوف حولو:شوفو شوفو بعدنا بزاااف
اسامة:حتى لابلاج مبقاش تيبان من هنا
رضوان:فين زياد تاني؟
شكيب:معرفتش غيكون يمكن فلداخل ولا فالطواليت
ناضو بجوج شي مشا لداخل لي كان عبارة على صالون كبير بأثاث فاخر و البقية مشاو لعند القبطان...
اسامة بالإنجليزية:واش صافي هنا فين غنوقفو؟؟
القبطان:اه هدا هو الحد لي تقدرو تعومو فيه الى زدت كتر ممكن نصادفو كائنات بحرية
اسامة:اوكي شكرا
فنفس الوقت فاش رسا اليخت تما كلشي معتاقد انهم بوحدهوم لي فداك العمق ولكن لا كانو عيون مزيج بين خضورية طحالب البحر و زروقية مياه المحيط مراقبة المكان أو بالأحرى مراقبة الشبان...
خرج اسامة من عندو تيجري و مشا تيقلب على لخرين لي لقاهوم مع زياد...
أسامة:قال ليا هنا حدنا وا العشراان ماكاين غير العوماان
رضوان جر معاه الزعرة:اجي نعومو بجوج ههه
مشات معاه مبتسمة و نفس الشيء مع شكيب و السميمرة..حييد ليهوم القبطان داك الحديد لي كان محاصرهوم و هوما يطيحو فالما...
اسامة تيدير التسخينات باش يتلاح حتى هو يعوم و لخرين فالتحت ضاحكين تيلعبو بالما في حين انه زياد واقف تيتفرج فيهوم أو بالأحرى تيتفرج فالماء حتى طلع اسامة فيه راسو باستغراب...
اسامة:واهيا علاش تتفرج فيهوم اجي تعوم معانا
زياد: دابا غنتبعكوم
اسامة: واخا زيد نتلاحو دقة وحدة ههه
زياد:صبر غير شوية تيبان ليا الما بارد
اسامة:امم واخا
اسامة بتاسم بشر و زياد عاطيه بالضهر تيتفرج..غمز اسامة شكيب و رضوان و فهمو اش بغا يدير بعدو من تما جارين البنات تيعومو..اما زياد مادا ماجاب ماحس غير بدفعة جاتو من اللور فضهرو حتى طاح طراااخ فالما...بقا تيحاول يطلع و يديه غير تيتخبطوو فوق الماا اما اسامة تفرشخ بالضحك من الفوق فاليخت:وانااري بحال شي دجاجة ههههه
زياد عاد فاتو الدهشة د الما بارد:مافعااايل ما والوووو
اسامة:ههههههه بقا تحضي ديما ضهرك
زياد تيعوم و قاميجتو فزگات بالما:زيد تلاح صدعتيني
اسامة تلاح حتى هو مخلي الما تيطاير:هاني جيت
زياد تيعوم و يحرك فيديه و يخبط برجليه:شفت هادوك دغيا تصاحبو
اسامة تيطل على شكيب و رضوان لي تيرشو الما فدوك البنات:كييتنا انا وياك
زياد:نتا عارف بلي القراية اهم حاجة باش نتوضف فالضومين لي تنحلم بيه
اسامة:وا نتا كاين باك يوضفك فينما بغيتي اش بغيتي بشي قراية دير غير بحالي تندوز على ديك الشركة مرور الكرام و عايش مهني ههه
زياد خنزر فيه: برهوش بحالك مغيفهمش كلامي
بعد منو و مشا تيخبط فرجليه و يعوم بعيد عليه...
اسامة:وا صبر وا صاافي واش مانضحكووش