حبي الاول والاخير

البارت17

#حبي_الاول_والاخير

الجزء السابع عشر///

محمد كان يدور فرصة بس حتى يندگ بهدى ، ويحجي وياها وجكارة هدى انطته هاي الفرصه ، بدون متدري ، والصوت الي خلاها يفّزون ويندارون اثنينهم سوه على المصدر ، ويوگفون جدالهم هو ضرغام اخو هدى....
هدى شافت ضرغام ومصدگت عيونها وگمزت وهي تصيح ضرغومه وحضنته وتبوس بيه وهو يبوسها ويحضنها اقوى ، ومحمد جامد بمكانه ، والدهشه والمشاعر المتضاربه مشوشه تفكيره.
ضرغام// شلونج
هدى// شلون وشوكت وليش؟ وهي تحضن بيه
ضرغام// هههههههههه ردت اسويها مفاجئه
محمد// الحمد لله على سلامتك ابو تاله الورده. مشتااااقين .
هدى ابتعدت عن اخوها وصفنت بأي وجه محمد يسلم على ضرغام بعد الي صار .
حضن محمد ضرغام وباسه ، لكن ضرغام جان جداً جاف على رد السلام .واندار ضرغام على هدى ولبس محمد .
ضرغام // وين امي؟
هدى// موجوده هنا ، بس ماحجتلي شلون وشوكت جيت؟
محمد بهل الاثناء وگف بعيد ، خجول ، من ردة فعل ضرغام ، لان جانت علاقتهم اقرب الى الاخوة ، وحز بگلبه شلون صارت هسه ، وظل ساكت ويباوع عليهم اثنينهم.
ضرغام عمره نفس عمر محمد اشگر ، ابيض ، لحيه وشوارب لكن مو طويل مثل محمد ، طوله ١٧٠ سم ، عيونه زرگا مثل البحر وكان كل واحد يشوفه يشبهه بالممثل خالد ارغنش التركي والي كان بطل مسلسل حريم السلطان ، حتى ذبته بالكلام واسلوبه نفس الشي ، وصوته الاجش .
ضرغام//  قلقت حييل عليكم وعلى وضع ماما الصحي واني اسمعج تگوليلي يوميه يم الدكتور وحبيت اسويها مفاجئه واجي بلكت هي هم تتغير نفسيتها.
هدى// زين شمدريك احنا هنا؟ وتضحك. وورثت جكاره لخ ، حتى تتحدى محمد وتفوت بعينه وخصوصاً انتبهت بعده واگف بعيد ويباوع عليهم
ضرغام // لو تدرين الفيلم، ملگيتكم دگيت على ام ابراهيم الباب لان اعرف امج كولشي تحجيلها ، گالت معزومين مهر صديقة هدى ، زين وين ؟ ، نسيت والله وگعدت تشكي ربع ساعة شلون صايرة تنسى😂 ، گومي خابري ام حسن لان تگول احسن منها😂 وام حسن سألت بنتها بصفها وگالولي هنا ، اخذت تكسي وجيت ( شاورها وهو عينه صفح على محمد) صدگ لج شنو موضوع الجگاره؟
هدى من شاورها طگتها ضحكه // بشرفك ضرغومه لا تفشلني وظل لابس الدور لخاطري .
ضرغام // هااي شنو مو تدللين ، (وجر جكاره من باكيتها وورثها وبدا يدخن وياها). لو ادري جان جبتلج من الحره😂
هدى تحضنه وتضحك ومحمد بعد مااتحمل وانسحب دخل القاعة.
ضرغام // خلص الفيلم ( طفى الجكاره) امشي اريد اشوف امي.
هدى// يلا يلا
دخلوا للقاعة ومحمد يراقبهم من طاولته، وانتبه  شلون الفرحه ماسايعتها وتگمز مثل الطفله الي شافت ابوها بعد غياب طويل ، وشلون گامت تبجي من ضرغام حضن امه وتمسح بدموعها وشلون رجعت تحضنه وتشم بيه ، وگعد وهو لازم ايد امه وهدى واگفه وهي تحجي وتكمز وتضحك .
علي// وين صافن؟( واندار على الجهه الي ديباوع عليه محمد) لك هذا مو ضرغام !!! شجابه !!!؟؟
محمد// هسه وصل.
علي// شمدريك!؟ حجيت وياه لو شنو!!؟
محمد// جنت احجي ويه هدى وأجى .
علي// حجيت ويه هدى!! هاي شگد فاتني ؟ وين جنت اني؟
محمد// علي تسكت لو اهفك بالكلاص ، تره واصله لخشمي.
علي// اهووووو ، غير يگعد راحة فريد شوقي ، سكتنا
هدى گامت وراحت هي وضرغام وسلم ضرغام على لانا وباركلها وسلم على سعيد ورجعوا گعدوا:
ضرغام// محمد شجابه هنا؟
هدى// العريس صديقه كولش وتعرف على لانا من جنا سوه.
ضرغام // هااااا، هسه فهمت .
علي// شلونك ابو الشباب ، ضرغام حبيبي.
اندار ضرغام:
ضرغام// هاي شنو لك هاي انت همين هنا 😅
وگام حضنه وباسه وعلي جره من ايده :
علي// لك مشتاقلك ، خرب غيرتك ،تعال نگعد هناك بعيد عن النسوان.
ضرغام // تعال تعال
علي جان متقصد يخلي ضرغام يگعد وياهم على نفس الطاوله حتى يقلل من الجو المشحون .
علي// جبتلكياه ابو جاسم مو گلت مشتاق اسولف وياه.
محمد ارتبك// هو اكو احد يعرف ضرغام وميشتاقله.
ضرغام // والله اني همين مشتاق لذيج الايام .
علي//  تتذكر محمد من جنت تگول لضرغام الا اخذ اختك واذلك ويومية تخابرني وينك اگولك بصف اختك😂😂😂😂😂
ضرغام اندار على محمد// لك هذا بعده زمال وميعرف يحجي 🤦🏻‍♀️
محمد// يروح فدوه للزمال😂😂
ظلوا يسولفون ويضحكون وهدى عينها عليهم وجتها لمى :
لمى// لج اشو  مدافتهم الي ديصير .
هدى// انلاصت ورب الكعبة وبس لايدري ضرغام  بموضوع بتول لان علي هوايه يجفص وتعلگ بينهم .
لمى// هو صح يخرط هوايه بس مااعتقد بهيج غباء ، ولا اعتقد محمد راح يفتح الموضوع بهيج وقت وهيج مكان.
هدى// ماادري ، بس اهم شي عندي ماتتخربط حفلة لانا ولا اكون اني السبب بهوسة هنا.
هدى نظراتها قلق وارتباك وانتبه عليها محمد تباوع عليهم وقلقة ، وصارت عيونها بعيونه اول مرة من فترة طويلة ، وقراها ، وهز راسه الها بما معناه اطمئني وفهمته وجرت نفس .
جانت السوالف الي بين محمد وضرغام وعلي كلها على ايام زمان وعلى بعض الشباب الي جانوا يعرفوهم وشوية انكسر الجليد الي بين محمد وضرغام وهذا كله بفضل علي اخوه . وگام ضرغام واترخص منهم حتى برجع يگعد ويه امه واخته:
ضرغام// اترخص شباب ، تدرون الوالده هسه گلبها نار.
محمد وگف لحيله// ضرغام لازم نسوي گعده ثانيه ضروري ، اريد احجي وياك.
ضرغام // الحجي بعد ميفيد محمد لهذا خلينا اصدقاء احسن من نكون اعداء .
محمد// لا .. اكو تطورات هوايه صارت ، ولازم نلتقي ونحجي .
ضرغام// الي شفته اليوم خلاني احس انو هدى مطلعتك من كل حساباتها. على شنو ياصديقي نحجي بعد.
محمد// مااريد افتح الموضوع لان مثل متشوف لا الزمان ولا المكان مناسب ، بس اريدك تعرف انو اني بعدني محمد الي شاريها ومراح ابيع طول عمري.
ضرغام// الله كريم ( صافحهم ورجع على طاوله اهله)
ضرغام // نروح ياجماعة؟ اني حييل تعبان .
هدى// مااگدر اعوف واطلع واني صديقتها المقربه، عيب وكولش واگفه.
ام هدى// صح لان حتى بعدها ماگصت الكيكه.
ضرغام // انطيني امي مفاتيح البيت لان حتى عفت الجنطه بالگراج، خلي اني اروح .
ام هدى // اجي وياك لعد .
ضرغام // ونعوف هدى ؟ والتفت على طاولة محمد.
هدى// اطمئن ضرغومه ، مراح يصير شي ، لا اني ولا هو نفكر نخرب فرحة اقرب اصدقاءنا اكييد.
هدى انطت مفاتيح سيارتها لضرغام يرجعون بيها وگالتلهم هي تخلي احد من جماعتها يرجعها ، ضرغام  گاللها ميعرف ياهو سيارتها وام هدى گالت هي تدليه.
طلعوا وبقت هدى ومراسيم الحفلة مستمره ، وهدى ولمى ماگعدوا ، وظلوا قريبات من لانا ووياهم اخت لانا .
ورجعت هدى طلعت اثناء ماحطوا العشا ، حتى تدخن جكاره وتصفي دماغها ، وتفكر اخوها اذا عرف بموضوع بتول شنو راح يكون ردة فعله .
محمد انتهز الفرصه مره ثانية ولحگها لان عيونه مفارگت تحركاتها طول فترة الحفله.
محمد// انطيني وحده وياج ادخن .
اندارت على الصوت :
هدى// انت ماتدخن .
محمد// بديت قبلج .
هدى// لعد ليش انحمقت من شفتني ادخن ، لو هي ابراز عضلات!؟
محمد سحب الباكيت واللايتر من ايدها وطلع جكاره ، هدى راساً طفت جگارتها .
هدى// خلي الباكيت الك لان تحتاجه اكثر مني . ومشت حتى تدخل القاعه، ولزمها محمد وجرها رجعها :
محمد// اني محتاجج الج . مااگدر اعيش بدونج ، افهمي يابنت الناس .
هدى// انتهينا من زمان احنا ، وانت راح تعيش واني همين راح اعيش والضربة الي ماتموت ، تقوي  وضربتك قوتني .
محمد// مراح تسامحيني رغم اني متأكد عرفتي منو وشنو بتول ؟ .
هدى// ههههههههههه والله يالله ، وهذا مايغير شي بموضوعنا محمد ، والي يضعف مره ويستغبي بمزاجه، راح يضعف ويستغبي الف مره . هااا والراشدي الي اكلته منك ، انت تستحقه اكثر مني ورفعت ايدها بكل قوتها وضربته راشدي. محمد غمض عينه ، وسكت .
هدى// هذا حتى تبطل تلحگني وتفكر عندك امل ارجعلك ، وللعلم لو اگطع من لحمك مايبرد گلبي .
محمد// لعد اضربيني الى ان ترتاحين ، لان مدام مابرد گلبج فهذا يعني انتي بعدج تحبيني مثل مااني اموت بحبج.
هدى عصبت وارتبكت // خليك هيج ولا تعتقد راح تشوفني بعد اليوم غير باحلامك.
وعافته ودخلت وهو صاح بصوت عالي : همين راضي بس بالاحلام.
خلصت الحفلة .. وهدى بقت هي ولمى ويه لانا للاخير لمّا طلعوا كل المعازيم ومحمد بعد الي صار بينه وبين هدى راساً بارك لسعيد ولانا وغادر الحفلة.
ورجعت هدى للبيت وظلت تسولف ويه ضرغام لحد ماطردها حتى ينام 🛏 وامهم جانت الفرحة تطفر من عيونها .
ثاني يوم عطلة وهدى وضرغام وامهم گضوها سوالف وضحك وضرغام يتصل كاميرا ويه مرته وبنته تاله ويخليهم يحاجوهم وام هدى اشرت لضرغام حتى يگعد يحجي ويه هدى . ضرغام طلب من هدى تسويلهم گهوه وراحوا گعدوا بالمرجوحه :
ضرغام// ايييي هداوي احجيلي .
هدى// عن ؟؟؟ كل شي تعرف.
ضرغام// شنو التطورات الي صارت واني ماادري؟
هدى// بخصوص شنو تقصد ؟ مافهمتك!!
ضرغام // موضوعج ويه محمد.
هدى// منو گالك؟ علي؟
ضرغام // لا ، بس احب اسمع منج .
هدى// ماكو شي اخويه تدري انت خلعته وخلص .
ضرغام// هدى شنو الي خلاج بعد متريديه ومتريدين تباعين بوجهه ولا تحتكين بيه؟ شوفي .... البارحة اني انتبهت انتي ابداً مجنتي مهتمه اله وبالعكس جنتي تداهريه ، زين ليش؟ اني اعرف انتوا انفصلتوا بس واحد يحب الثاني ، بس الي شفته البارحه منج انتي بالذات جان غير شي.
هدى// مو مفروض انتهى كل شي ولازم ابتعد عنه ، ويبتعد هو همين ، وكل واحد يشوف حياته ، ليش بعد انطيه مجال ؟
ضرغام // علينا هدى!!؟؟ على ضرغومه هذا الحجي؟؟
هدى ورثت جكاره ...
ضرغام// وموضوع الجكاير شنو هذا همين؟
هدى// ارتاح صرت عليها.
ضرغام// بس تره مو حل هذا للي بداخلج. مراح اگولج تركيها او عيب او ميصير ، تعرفيني انتي وتعرفين تفكيري بهل الامور ، لكن مو حل هاذي.
هدى// حل لشنو ضرغام ؟ اني شي ارتاح عليه شلا علاقة بالي بداخلي مدافهم لوين تريد توصل.
ضرغام// شصار بينج وبينه وخلاج تكرهييه ، او خلي اكون اوضح ، خلاج حاقده عليه وتعاقبيه ، لان عيونج الى هسه تگول تحبيه، واني مو ابن البارحه وماافتهم.
هدى علا صوتها// غلطان انت ضرغام اني اكرررررهه اكرررهه واريد حتى اكل من لحمه ، لو هسه املخ لحمه باظافري مايبرد گلبي (ودموعها نزلت)
ضرغام حضنها وگام يضحك// اخاف قنعتيني هسه احجيلي بالله .
وبدت تحجيله هدى من خابرها وهجته ورزلته لحد يوم عيد ميلاده والي شافته ، وهي تبجي وكل شويه تورث جكاره وتحجي ، وحجتله منو هي بتول وشلون روان دزتها.
هدى// هذا الي صار ، هسه عرفت كل شي انت.
ضرغام غمض عيونه // يعني هو ضحيه مثله مثلج
هدى// لااااا هو مو ضحية ضرغام ، هو الجاني ، هو تاليتها قتلني مو روان.
ضرغام// كلنا عدنا لحظه ضعف نمر بيها ، بس هاي اللحظه متعّبر عن شخصيتنا ولا مفروض نحكم على شخص من خلالها، اني مدا ابررلج تصرفه ، ولا دا ادافع عنه ، بس اني اعرفه اكثر منكم كلكم ، محمد انسان اذا يحب ، يفني نفسه للي يحبه ، الدنيا واهله وحتى احنا ضغطنا عليه وهو انسان متعلم على هذا اسود هذا ابيض ميعرف شنو رمادي او احمر ، من جان مراهق لليوم ، طبعه هيج ، غلط صح وياج ، وبقت يمج تسامحيه او لا ، شوفي گلبج شيگول .
هدى// گلبي ميريده بعد .
ضرغام // كذابه هههههههههه ، على فكره ، هو راد نگعد نحجي ، واني ماانطيته مجال ، گال اكو شي لازم نحجي بيه .
هدى// خلي يوليييي ، لا تحاجيه لخاطري ضرغام ، اذيه مثل مااذاني .
ضرغام // تمام تمام ، يصير خير ( حضنها وباسها)
@@@@@@@@@@@@@@@@@@@@@@@
مر اسبوع وضرغام وياهم ، وام هدى عبالك احتيت وحتى هدى نفسيتها تغيرت ، وصارت تضحك وتتشاقى مثل قبل ، وجود ضرغام حسسها بالامان ، قربه منها خلاها ترتاح ، وحتى دماغها صفى ، لان جان الها اخ واب وصديق .
محمد كان الاسبوع عليه اصعب وكان بس يريد فرصه يگعد ويه ضرغام وبالفعل اتصل عليه بنهاية الاسبوع وعزمه محمد على العشا ، وضرغام مگال گدامهم بالبيت انو راح يلتقي ويه محمد .
گعدوا سولفوا وجان علي وياهم وضحكوا ، وفتح محمد موضوعه ، وگاله انو الوالد يريد يجي يعتذر منهم ويستسمحهم ، ومدام ضرغام موجود هاي احسن فرصه .
ضرغام// الامور هسه تغيرت وصار موضوعنا مو ابوك محمد. وانت واني نعرف هالشي .
محمد// تقصد الي سوته روان.
ضرغام // اقصد الي سويته انت ، هدى هسه ابوك ، روان ، عشيرتك كلها مو ببالها ، الي ذبحها تصرفك انت ، غلطتك انت.
محمد// اعترفت اني غلطان ، واني طامس بالخره ، وردت تسامحني وقبل مااعرف روان هي السبب همين ، وحاولت وياها ومسامحتني.
علي// انطيها الحق .
محمد// انت ويايه ، عليه.
علي//اني وياك ووياها ، بس الحق يقال، البنية تحملت هوايه واخر ضربه جانت قويه، لهذا مفروض انت تحفى وتتعب اكثر حتى ترجعها ، او تحترم قرارها وتعوفها.
ضرغام // بالضبط ، اول مرة اشوف علي الزمال يحجي صح😂😂.
علي// خرب غيرتكم اذا اكو واحد بيكم يستاهل بس اني اسوي بأصلي ، عن الشقى ، تدري لو اني منك  ، اتركها ، شهر ، شهرين ، عسى شهور ، اذا بعدها تحبك وتريدك راح تحس مكانك خالي ، وهي راح تدور عليك.
ضرغام// خووش منطق ، بشرفي صاير ثور انت ومفروض نطلعك من خانة الزمايل😂 هاا محمد شتگول ؟ مو صحيح.
محمد// هو اصلاً اني وين دا  أحتك بيها ، تره ضرغام معليك بحجي هذا الزمال ، بس تره عرضك هو عرضي وشرفك هو شرفي ، وتدري اني مستحيل الحگها او اتصرف تصرفات مراهقيين وياها ، اني من يوم انفصلنا ماشفتها ولا حاجيتها الا يوم حفلة سعيد .
ضرغام // ادري بدون متگولي وواثق منك والا مجان انطيتك اختي بيوم من الايام. وهسه من راح اروح راح اخلي الوالده وهدى امانة برگبتك  انت وعلي ، انتوا بمكاني هنا ، عينكم عليهم ، اما بالنسبه لموضوع والدك فأعتقد اجله هسه ، لحد ماتصفى اموركم سويه ، صفت نحجي ، ماصفت فكل واحد بدربه .
محمد// كون مطمئن ضرغام ، حتى اذا مرجعنا سوه ، راح تبقى هي عندي الاولى والاخيره ، وراح اكون بمكانك بكل شي وان شاء الله مايخيب ظنك.
&&&&&&&&&&&&&&&&&&&&&&&&&&&&&
ورجع سافر ضرغام ، ورجعت هدى لروتينها اليوم ومحمد كذلك ، ولا واحد بيهم بعد التقى او حاجى الثاني ومرت اشهر موو شهر ، ومحمد اخذ البورد ، وروان اخذت بورد النسائية وتوليد ، وجاها عريس من اصدقاء ابو محمد ، وتدخل ابو محمد وقنعها بيه ، خصوصاً جان صاحب معارض سيارات وكردي من الشمال ، يعني فرصة حتى تبتعد بعد الزواج ، وجانت فرحانه بيه وتتباهى كالعاده ، وهو من النوع الي يگدر يلبي كل طلباتها ، والتهت بيه ووياه ونست محمد .
ومرت شهور ومحمد فتح عيادة ، وصار رئيس قسم الجراحة بالمستشفى ، شعبيته واسمه كبر ، وصار الكل يمدح بيه ، والبنات كلها تتمناه ، بس هو خلص قافل باب گلبه على اسم واحد ، هو هدى .
وصار دوامه العصر بالعياده والصبح بالمستشفى ، غير العمليات ، يعني مشغول ٢٤ ساعة ، بس كلما يغمض عينه او ياخذ راحه محد يجي على باله غيرها ويطلع صورها ويگلب بيهن .
هدى حالها من حاله ، الدوام ، الطلاب ، المحاضرات وملتهيه ، وكلما يحاول استاذ يتقرب منها ، تبعده عنها وتصير جلفه وياه حتى ينفر منها ، واستمرت تلتقي بلانا ولمى كل يوم سبت ، واغلب اللقاءات جانت حتى يجهزون لانا ، والجمعه تتفرغ للبيت والتنظيف ، حتى مره من المرات كانت تعزل الدواليب والكنتور ولگت قميص محمد ، الي لبسهياه من احترگت ، واخذته شمته ، وحست شگد هي مشتاقه لريحته وصوته وهمسه، وظلت حاضنه القميص وتحجي ويه نفسها ، يعني مگدرت اكرهك ، ومگدرت اسامحك ، بس بعدني اشتاقلك ، مراح اگدر اخلص من حبك ، بس مااگدر اسامحك، واخذت القميص  وخلته جوه مخدتها ..
$$$$$$$$$$$$$$$$$$$$$$$$$$$$$$$$
الى ان اجى يوم جمعه وهدى كالعاده طلعت تجيب الاغراض الي امها محتاجتها ، واثناء طريق الرجعه يجيها اتصال من اخوها عرفان ، تعجبت لان عرفان مايتصل بيها هيج وقت ومتعوده تحجي وياه بالليل قبل متنام ، فتحت التلفون واجاها صوت اخوها بسرعة رجعي للبيت، داحجي ويه ماما ، وصارت متجاوبني وحسيت شي وگع هدى ، بسرعة .
هدى تخبلت وطلعت تركض للسيارة وساقت مثل المخبله الى ان وصلت البيت ، وبالفعل فاتت وشافت امها متمدده بالگاع وخشمها ينزف دم ، واتصلت بعرفان وگلتله  وركضت للجيران يجون يشيلوها وياها ، اتصلت بطبيبها الخاص والي متابع حالتها مجاوبها لان يوم جمعه ، تخبلت ، معرفت تتصرف ، طلبت من الجوارين يساعدوها تخليها بالسيارة وتاخذها للمستشفى الخاص الي طبيبيها يتواجد بيها ، واخذتها وطارت بالطريق واجاها تلفون من ضرغام ، وگاللها ترجع تاخذها لمستشفى محمد ، وهو أصلاً اتصل بيه، مقبلت وگالت ماوديها مستشفى حكومي ، وعاط بيها صوت ضرغام وامرها توديها هناك لان محمد راح يعتني بيها احسن من اي مستشفى خاص ، واذا تطلب الامر ينقلها هو لمستشفى خاص ، ولافت السيارة ومرادت تعارض ضرغام لا يصير بأمها شي والذنب يصير ذنبها ، ووصلت المستشفى وشافت سعيد واگف ينتظرها هو ويوسف وعرفت انو محمد صار عنده علم ، وجابوا سديه وركضوا بأمها ، وركضت وراهم .
محمد جان گاعد بالبيت يشرب الجاي ويسولف ويه علي ، يوم جمعه وماعنده عياده ، ولا مستشفى ، ودگ تلفونه وشاف الاسم ضرغام اخو هدى ، وتعجب ، وجاوب وشاف ضرغام مرتبك وخايف ويعيط وحاول يهديه ويفتهم منه ، وعلي گام وگف عباله محمد مسوي شي ميعرفه بهدى ، وضرغام عرف وديتعارك ويه محمد ، وسمع بس محمد يگول اطمئن راح هسه اتصل بجماعتي وهمه يتصرفون واني رايح بالطريق ، وسد التلفون واتصل بسعيد وحجاله وگاله اني جاي وهو يحجي ويه سعيد ويغير ملابسه ، وسد التلفون:
علي// ام هدى؟
محمد// اي ، اركض خلي امي تبدل اخذها ويايه .
علي // اوك .
وطلع يركض للسيارة ويدگ هورن لامه يستعجلها ، وعلي ركض صعد السيارة وياهم .
ساق السيارة مثل المجنون ، وامه تقره ايات وتصيح على كيفك ، لا تسوي قدر ، على كيفك. ووصلوا المستشفى وگمز محمد وگاله لعلي هو يطبگ السياره ودخلت امه تركض وراه وين ميروح، واتصل بسعيد ورجع سد التلفون وهو يمشي ووصل للردهه الي بيها ام هدى ، وشاف هدى واگفه تبجي واول ماشافته:
هدى// ماما محمد ماما .
دفعها محمد عن الباب :
محمد// يمه هاي يمج ودفع هدى لامه، ودخل ، هدى انقهرت منه ، لان دفعها حيل ، وظلت تبجي على امها بحضن صبيحة، وصبيحة تبجي وياها وتدعي وتصيح ياالله ، يامشافي ، يامعافي ، لخاطر هاي البنية ، باوع على حالها ، گوّم خلوده لخاطرها ، وهدى تگهد وتبجي ، واجى علي واخذهم گعدهم بالانتظار وجابلهم مي .
طلع محمد وره نص ساعة ..
محمد// وين ادويتها الي تاخذها ؟
هدى// مجبتها ( تبجي) مااجى على بالي لان على اساس اخذها لمستشفى الدكتور مالتها .
محمد// ماعندج صور للادويه بالتلفون ؟
هدى// بس صورة واحد منهم لان جنت اريد اشتريلهياه؟
محمد ببرود // اشوفه .
طلعت هدى الصورة وشوفته، رجع اندار على علي :
اخذها انت وروحوا للبيت وصورلي ادويتها اول متوصلون ودزلياها .
هدى( تبجي) // ماكو داعي ،  اني اروح على السريع واصورها  وادزها .
محمد بحزم // علي سوي الي داگولك عليه ورجع دخل .
اخذها علي وراحوا بسيارة محمد والطريق كله هدى تگول لعلي ، اذا ماما صار بيها شي اني اموت علي ، علي ماما متموت مووو؟ ، علي عليك الله سوق اسرع ، وعلي يهدي بيها . وصلوا ودخلت هدى تركض وراها علي وصور علي الادويه ودزها لمحمد .
علي// اهدي هدى ان شاء الله ماكو شي ، يلا قفلي خلي نرجع . هدى هزت راسها بالموافقه ومسحت دموعها وقفلت البيت ورجعوا .
وصلوا المستشفى وسألوا ام محمد ، گالت من طلعتوا طب ماطلع .
وهدى ميگدرون يلزموها ويگعدوها على كرسي :
هدى// مخنوگه اني خاله وگلبي ممرتاح
ام محمد // ماكو شي ان شاء الله ، الله ومحمد وعلي يوگفولها ان شاء الله .
وره نص ساعة طلع محمد ، وجان يحجي بالتلفون وعرفت هدى ديحجي ويه ضرغام . وعاطت
هدى// امي بيها شي ، گولي ، ليش تحجي ويه ضرغام ومتحاجيني ؟
اشرلها بيده يعني اسكتي وكمل تلفونه وسده.
هدى // محمد گولي ماما شبيها .
محمد// خالة صار عدها جلطه بالدماغ .
هدى// ................. وتحس رجلها مدتشيلها
محمد// حالياً مايبين عدنا شنو ضربت لان مو بوعيها
هدى تقربت منه // شنو تقصد مو بوعيها ؟ دخلت كومه يعني؟
محمد// ان شاء الله مو طويله وتصحى منها( يحجي ببرود مو طبيعي) حالياً دخلناها العناية المركزه ونراقبها .
هدى// تمام خلي انقلها لمستشفى خاص ، دكتورها يكمل وياها .
محمد بعصبيه// دكتورها ومستشفى مالته مراح يسوي وتسوي اكثر من الي سويناه ، خلي يكون بعلمج اذا خاله تحتاج  شي ماموجود هنا ، او منگدر نوفره ، راح اجيبه على حسابي الخاص ، واصلاً نقلها هسه لاي مكان وهي بهاي الحاله مو بصالحها ، كوني على ثقة انو اني مراح اقصر ولا الستاف الي هنا راح يقصر.
هدى // بس هاذي ماما محمد، ماما .
محمد// افهم قصدج ، بس ان شاء الله تعدي على خير .
تركها ورجع دخل ، وهي تبجي ومرت ساعات وماكو خبر وهو همين مااجى ، وام محمد تهدي بيها وهي ملخت نفسها من البجي وكل شويه يتصل بيها ضرغام وعرفان ، وهي ماوگفت بجي .
وصارت ساعة ٩ بالليل ، واجتهم ممرضه وگالت دكتور محمد طلب مني اوديكم بغرفه تستراحون بيها .
وراحوا وياها وعلي راح جابلهم جاي وبسكت وهدى متقبل تحط شي بحلگها ، وام محمد تهدي بيها وتطمئنها ، وطلعت ام محمد تحجي ويه زوجها بالتلفون ، ودخل الغرفه محمد وشافها گاعده على الكرسي وتبجي ، وگف كبالها ، وعلي طلع من الغرفه :
هدى// صار شي موو ؟ صار شي؟
محمد// لا ، بعدنا نحاول نسيطر على الجلطه ، ونخليها تعدي ، بس انتي هيج مراح تأذين غير نفسج .
هدى // مو بيدي ، هاذي ماما ( ودموعها تنزل) وتضم وجهها عنه .
محمد // اطمئني ، مراح نعوفها ، تگوم وتصير سوالف .
هدى// انت ليش هيج بارد ( عصبت وگامت وگفت بوجهه)
محمد// ترتاحين يعني اذا هسه گعدت كبالج واملخ شعر راسي وابجي مثلج؟ اذا ترتاحين اسويها.
هدى// لا ماارتاح بس انت تعاملني كأنو انت دكتور .
محمد// لعد اني شنو ، ابو مخضر !؟؟
هدى// انت متفهم قصدي .
جر نفس محمد وراد يحضنها ولزم نفسه .
محمد// اني دكتور هدى ، وانتي جيتي على محمد الدكتور . مو محمد الي تعرفيه.
هدى// اهااا وصلت الفكره ، تمام ، اعتذر منك دكتور ، اخذ راحتك
&&&&&&&&&&&&&&&&&&&&&&&&&&&&&
نهاية الجزء السابع عشر☺️