ဧကရာဇ်ဗျူဟာ

အခန်း - ၈၁ (အဆက်)

ထောင်လျဲန်တာက သုန်မှုန်ထိုင်းမှိုင်းနေသော မျက်နှာထားဖြင့် မုန့်ယူစားလိုက်သည်။

"ဟုတ်ပြီ၊ ဒီလိုမှပေါ့။ အရင်ဧကရာဇ် နတ်ရွာမစံခင်တုန်းက အရှင်မင်းမြတ်ကို အသင့်ဆီ အားကိုးတကြီး အပ်နှံခဲ့တယ်ဆိုတာ ကျွန်ုပ်တို့အားလုံး သိပါတယ်။ ဒါပေမယ့် အသင်ဖြစ်နေတာတွေက အစိုးရိမ်လွန်နေတာပဲမဟုတ်လား။ ဒီမှာ ကျွန်ုပ်ပြောတာ သေချာ နားထောင်လှည့်ဦး။ တစ်နေ့နေ့တစ်ချိန်ချိန်မှာများ အရှင်မင်းမြတ်က နယ်မြေအကုန်ကို တစ်သားတည်းဖြစ်အောင် စုစည်းချင်လို့ဆိုပြီး နန်ယန်ကို သိမ်းပိုက်ဖြစ်မယ်ဆိုရင်တောင် ဒီရက်ပိုင်းမှာ သိမ်းပိုက်ဖြစ်မှာမဟုတ်သေးဘူး။ ဒို့ရဲ့အရှင်မင်းမြတ်က အတော့်ကို အစွမ်းအစရှိတာ၊ ဘုန်းတန်ခိုးထက်မြက်တာ ။ တာ့ချူတိုင်းပြည်တစ်ခုလုံး သူ့လက်ထဲ အပိုင်ရသွားတာကိုသာ ကြည့်လေ။ ဒို့တတွေ အတော်လေး ဆက်ပြီး ပင်ပန်းရဦးမယ်ဆိုပေမယ့် အရှင်မင်းမြတ်ထီးနန်းရခဲ့တာလည်း တိုင်းသူပြည်သားတွေရဲ့ ကံကောင်းခြင်းတစ်ပါးပါပဲ "

ထောင်လျဲန်တာက အတော်ကြာ တိတ်ဆိတ်နေပြီးခါမှ လျိုတာ့ကျဲ့အား မျက်စောင်းထိုးလာကာ -

"မြေခွေးအိုကြီး!!!!!!!"

လျိုတာ့ကျုံ့ကတော့ တဟားဟား ရယ်နေ၏။

"ဟားဟား၊ အရင်တုန်းက ကျွန်ုပ်ကပဲ အသငင့်ကို ဒီလိုဆဲဆိုခဲ့တာ။ ဒီနေ့တော့ ကျွန်ုပ် လက်ခံလိုက်ပါ့မယ်။ ပြီးတော့ ပြန်ပြီး လှဲအိပ်မနေနဲ့ဦး၊ တည်းခိုဆောင်တို့ သေရည်ဆိုင်တို့သွားပြီး အစားလေးဘာလေး ထွက်စား။ မနက်ဖြန် လုပ်စရာရှိတာတွေလည်း ထလုပ်ချေ။ စိတ်အေးအေးထားပြီး အရှင်မင်းမြတ်ပြန်အလာကိုသာ စောင့်နေရစ်"

*****

ပေဟိုင်ဆိပ်ကမ်းမှာ တာ့ချူတောင်ပိုင်း၏ အကြီးဆုံး တပ်မတော်ဆိပ်ကမ်းဖြစ်သည်။ ချူယွမ် နန်းစတက်သည့်အချိန်မှစ၍ ယခုထက်ထိ တကယ့်တိုက်ပွဲအစစ်တွင် အသုံးချခွင့်မရခဲ့သေး။ သို့သော်လည်း တုန်းဟိုင်မှသည် နန်ဟိုင်တစ်လျှောက် စစ်တပ်အင်အားများကို တစ်နှစ်ထက်တစ်နှစ် စုစည်းပေးထားသောကြောင့် အတော်ပင် အင်အားကြီးမားလျက်ရှိသည်။ မဟူရာပမာ နက်မှောင်နေသော ဝေဟင်နောက်ခံတွင် မျက်စိတစ်ဆုံးထိ ရှည်လျားစွာ စီတန်းစိုက်ထူထားသော တာ့ချူရေကြောင်းတပ်မတော်၏အလံတော်မှာ ပင်လယ်လေပြေနှင့်အတူ တလူလူလွှင့်နေလျက်။ မနက်ခင်းတိုင်း ဗုံမောင်းတီး၍ လေ့ကျင့်ရေးလုပ်နေကြသည်မှာ သမုဒ္ဒရာတစ်ဘက်ခြမ်းသို့ပင် မြည်ဟီးတုန်ယင်စေတော့မတတ် ထင်မှတ်မှားစေလောက်အောင် အားမာန်ပါလှပေ၏။