حبي الاول والاخير

الجزء الثاني///
لمّا تذكرت الي صار تندمت انو اتصلت لان جانت متوقعه هو الي راح يرجع يتصل بيها ..بس هو صاحب غرور وعنفوان ويحب يبيع ثكل ... يمكن يعاقبها على الايام الي جان هو يتصل بيها كل يوم وهي تجاوبه ببرود ... عفيه ده ادرس... اريد اسبح وانام باجر عندي امتحان... لا مااگدر اطلع لان تكومت عليه المواد ... هااااي جانت اجاباتها على تلفوناته وهسه شوفوا حالها ... رجعت گامت من الفراش ونزلت سوتلها جاي وتباوع على الساعة هسه بال ٤ الفجر ... اوووف هدى اوووف شوكت انتي هيج سهرانه 😭
تذكرت من رجعت من بيتهم وشلون مسحت دموعها وخافت على امها تحجي گدامها او تبجي لان مراح تفض وراح كل شويه تفتح الموضوع وتحجي على روان وتلوم صبيحة و... و... و... لهذا قررت تسكت وتحجيلها غير يوم ... وبالفعل نزلت من التكسي بباب البيت وفاتت مبتسمه وامها سألتها عجب ماوصلج محمد .. جاوبتها  مووو مريض خطيه ومردت اخليه يطلع ... وفاتتت ركض لغرفتها ... سمعت تلفون امها يدگ وامها تگول هلا صبوحه ايي وصلت ... شلون صار محمد ؟؟
فاتت سبحت وطلعت لگت امها كاعده على فراشها بالغرفه تنتظرها ...
ام هدى / نعيماً حبيبتي
هدى / شووووكراً .... وگعدت بصفها على الفراش ..
ام هدى / شنو الي صار ؟
هدى / ماكو شي ماما لا يظل بالج .. اشياء سخيفه تصير بين اي اثنين ..
ام هدى / حجتلي خالتج شويه بس جانت كولش مقهوره وتگول كل شي محطيتي بحلگج بس الجاي لهذا گومي اكلي ويايه لگمه لان اني همين مااشتهيت اكل لوحدي ...
هدى/ مااااااماااا والله مااشتهي .... وخلت راسها بحضن امها ...
ام هدى/ روان مو راحه وكلنا نعرف ... بس انتي ثوله ومجنتي تنتبهين ...
هدى / منتبهه ماما .. بس مااحب انطي انسان اكبر من حجمه ...
ام هدى / اذا تسكتين وتغاضين راح تصير غول وبساعتها متلحگين تسوين شي ... حاولي تحتويه انتي ...
هدى/ هو هذا الي جنت اخاف منه
ام هدى / شنو هو؟؟
هدى / انو راح تفتحين الموضوع ومراح ينسد
ام هدى/ خلص لعد گومي ناكل لا اظل احجي بيه ...
ضحكت هدى وونزلوا اكلوا ومرت الايام ومحمد لا اتصل ولا اجى وجانت كلما تخابر امه تحاول تبرر او تلزگ وتبين انو هي همين مدتشوفه وانو هو مدينزل للبيت ...
خلص كوب الجاي وهدى متقرنصه على القنفه بالهول وفاتحه التلفزيون وهي اصلاً مدتباوع عليه وانتبهت على الساعه صارت بال٥ ونص الصبح وراح تنزل امها حتى تصلي ... ركضت صعدت غرفتها  وسدت الباب حتى امها متعرف انو هي كاعده وميته بجي وحال الضيم حالها ... تخاف يرتفع ضغطها ...
بقت جوه اللحاف وتتذكر حجايته من خابرته ...انتييييييي اوووف ... ودموعها تنزل وگلبها نار ... منا فرحانه لان سمعت صوته ومنا ميتة لان اتصلت وهيج جاوبها ... صارت ساعة ٩ الصبح وجانت غافيه صارلها نص ساعة بس لان من البجي تعبت وغفت ...
بهل الاثناء امها كعدت وكالعاده بدت تسوي كم شغله بالبيت وطلعت الزبل بالحاويه البره وفاتحه فيروز بالراديو بحيث صوت فيروز دخل الحلم مالت هدى
ومتحس هدى غير امها تگعدها وتگوللها گومي يلا ماما غسلي وفرجي وانزلي حتى نتريگ سوه...
هدى/ ماما اريد انام مابيه حيل اگوم عوفيني
ام هدى / اگولج گومي وبسرعه وبليه كسل
هدى / ماما راسي راح ينفجر واحس عيوني راح تنقلع
ام هدى/ گوووومي ورفعت اللحاف وشافت كومة الكلينكس المستعمل جوه اللحاف ...
گومي بسرعة ولمي هاي الزباله ... شلون گدرتي تنامين ويه هلگد كلينكس 🤦🏻‍♀️
هدى/ خررررب خررررب گمت گمت ..
گامت غسلت وجهها وفرشت استانها وانتبهت انو اكو ملابس بالغساله ويراد تنشرها .
طلعت الملابس والمنشر محطوط بره الحمام بصف الدرج .. وسمعت امها مره ثانيه تصيح وينج !!!؟؟؟
من تريدني انزل غير انتي تشرين الملابس صاحت هدى .. ثم اگولج راسي ينفجر وعيني تنقلع منين اجيب تحميله مثل روان تنزل حرارتي ؟؟؟!!! لو روان بس تشتغل تحميله لمحمد !!!!
ام هدى/ لج اسكتي عيب وتضحك😂😂😂
هدى/ ليش اسكت لو تدرين البارحه خابرته .... هذا كله وهي تنشر الملابس وتحجي ويه امها ولابسه بجامه شورت قصير كوووولش والبدي مالته كيمونه وصدره مفتوح وهي بيضه حيييييل وناعمه ونازكه وشعرها مكفوش ونازل على زندها وصدرها ...
هدى/ تدرين يگولي انتييييييي🤨شبيه اني بالله عليج
جررررب اني بيه شحجيلج ...
ام هدى/ زين اسكتي هسه وانزلي ... كافي 🤭
هدى / نزلت ... نزلت.... لو الله خالقني تحميله ولا هل العيشه ... ونزلت وهي تحاول ترفع شعرها بقراصه لاستيك وعينها وارمه من البجي وقلة النوم ..
واول ٣ درجات وتشوف واحد واگف مبتسم  بنهاية الدرج ... رفعت راسها وتشوف محمد واگف مبتسم وگاللها صباح التحميله ويضحك 😂😂😂
هدى ارتبكت .... فرحت .... گلبها صار يدگ سريع .... وجمدت على الدرجه الثالثه وظلت واگفه .... گالتله انت شوكت جيت ... جاوبها من قبل ماتشرين الهدوم وضحك😂 انتبهت على ملابسها وعلى شعرها اندارت دتصعد مره لخ لغرفتها .... صاح محمد لاااا لا تصعدين ... تعالي ... نزلت اول درجتين مثل الخدرانه وبس تباوع عليه وراها نزلت بسرعة وكمزت وشكلت ايديها برگبته وحضنته قوي وهو همين والي ساعدها انو توصل لرگبته انو هي جانت على الدرجتين الاخيره لان هو طوله ١٨٥ متر وهي يمه عصفور🤭 ظلت حاضنته مثل الطفل وهو حاضنها وتشم بيه وهو يبوس بخدودها .... ويهمس بأذنها اشتااااااقيت هوايه لعطرج اشتاااقيت لنعومة خدج ... اشتااااقيت لكل شي بيج ... هي عينها نملت دموع فرح من سمعته هيج يهمس باذنها وحست بحرارة ايده على ظهرها لان البدي مالتها صعد من مجلبة برگبته ...
اني همين اشتاقيتلك بس انت لئيم و.... ومخلاها تكمل لان باسها من شفايفها وهي خلصصصصص راحت وياه بعالم ثاني وحست اول مره بطعم القبلة شنو ... اول مره محمد يبوسها هيج ... اول مرة بحياتها تضوگ البوسه وتحس بطعمها وخصوصاً من تكون اول مره ومن شخص تحبه .. شفايفه جانت حابسه انفاسها لكن الها طعم غريب متريد تعوفها وحست الدنيا من الفرح ماواسعتها...  شال شفايفه من شفايفها ... وگال اني جوعان حيييل گلتله نتريگ سوه... جاوبها جوعان لغير شي ابتسمت وباسته من عينه ... وگلتله خلي اشبع شوف منك اول ... وسحبته من ايده حتى يروحون المطبخ وهو يباوع عليها وعلى جسمها وبياضها وشعرها الاصهب 😍 ورجع جرها اله بالممر قبل ميوصلون المطبخ وحضنها قوي بحيث حست عظامها راح تطگطك بيه ايديه..
فاتت هي وياه للمطبخ شافت امها مبتسمه وگالت الله يسعدكم ..
هدى/ ماما ليش مگلتي؟؟
ام هدى/ محمد گال اريد اسويها مفاجئه واني سكتت
هدى/ وانت شوكت جيت ( وهي تصب اله الجاي)
محمد لزمها من خصرها وجاوب: من خالتي طلعت الزبل جنت واگف اريد ادگ الجرس وطلعت صدفه...
هدى/ يعني سمعت كل الحجي😯
محمد/ من اول تحميله وضحك😂😂😂
هدى / بعدين نحجي بالتحميله ... خلي اكل هسه واملي معدتي وبعدين استلمك😜
محمد/ حاضر اني😁
كملوا ريوگ وام هدى  گالت سوي گهوه وروحوا گعدوا بالهول شربوها ... واني راح اصعد اخلي وجبة ملابس بالغساله مره ثانيه...
سوت هدى الگهوه واخذ منها محمد الصينيه وراحوا گعدوا بالهول وگعدت بصفه وراسها على صدره وقميصه مفتوح اول دگمتين وصدره مبين 😍 وهو حاضنها من خصرها وجرها عليه اكثر  ... حست انو مراح تفض سلامات فغيرت راساً وصاحت ايييي نحجي؟؟؟
وگامت وگفت گباله  وگالت شوووف حمودي
محمد / هاي ثاني مره من انخطبنا لليوم تگولين حمودي بحيث حمودي الاولى هي الي جابتني اليوم
وحمودي الثانيه راح تخليني هسه اكلج اكل ...
هي ابتسمت وخجلت ☺️
گالتله خلي نحجي جديات اني هاي روان صرت مااطيقها وماتحملها ... ورجعت تحاول ترفع شعرها ويفلت من الگيتر ...
محمد/ لا ترفعيه ... عوفيه اني احبه هيج ..
هدى / لا ... ارفعه حتى اعرف احجي...
محمد / والله ياحبيتي هسه شراح تگوليلي  وشراح تحجين راح اگولج حاضر وموافق واني اسف مدام انتي واگفه گدامي بهاي البجامه وكلما ترفعين ايدج تطلع بطنج  😜واني اشتعل وانطفي ويه ايدج🥺
هدى/ خررررب ونزلت ايدها بسرعة وركضت طلعت من الهول وصعدت تبدل 😂😂😂😂
مرت ايام الاسبوع بعد متصالحوا بسرعة وهدى جانت يومية الصبح تتصل تگوله صباح الخير وتنتظرالظهر يجي عليها من ميكون خفر ياخذها من الدوام ويرجعها للبيت...
حتى لانا ولمى صديقات هدى من الاعداديه وكل وحدة بعدين اختارت تخصص حسوا بالتغيير الي صار على هدى وجانوا يتشاقون وياها ويگولولها اخيييراً وگعتي 😁 ..... لانا خريجة قانون وتشتغل بنفس الوزاره وية هدى ولمى خريجة محاسبه وبنفس الوزاره وطبعاً هذا التعيين مال ثلاثتهم صار بالواسطه وتدخلوا هوايه ناس عرف حتى يظلون سوه وميفترقون وكان من ضمن الواسطات ام روان🤦🏻‍♀️ الي جانت عدها علاقات بكومة نسوان بسبب الكعدات والقبولات الي تحضرها ..

الاسبوع الي بعده بدوا العائلتين يحضرون لعقد المحكمه وخصوصاً انو محمد عنده شقه ملك بعمارة من عمارات ابوه وباقي بس يأثثها ... ام هدى طلبت يجي قاضي للبيت ويعقد واتفقت ويه ام محمد انو يسوون گعده بعد العقد تكون بين الاهلية وام هدى كانت مقرره تسوي الاكل كله عند تجهيزات وهي بس تسوي الدولمه والبرياني لان صحتها على گدها وماعدها احد يساعدها والاخت الوحيده الها( خالة هدى) ميتة من قبل سنيين..
فرحة هدى جانت كولش جبيره والي زادها حب محمد الها وتعلقه بيها يوم وره يوم.. وكان كلما يگدر يطلع اول شي يفكر بيه انو يروح ينتظرها بالسيارة جوه شجرة النبكه الجبيره گبال باب الوزاره وياخذله غفوه من التعب الى ان تجي هدى ..
مر يوم العقد بكل حلاوة وسلاسه وبكل مودة جمعت العائلتين وصديقات هدى الاثنين ومن طرف محمد بس سعيد كان موجود ولاحظت هدى بيوم العقد ميول سعيد لصديقتها لانا وشلون جان يحاول يتقرب منها ويحاجيها ... روان بذاك اليوم ماخلت فعالية ماحاولت تسويها  اول شي حضرت بفستان قصير ولازك على جسمها المليان وشعرها الكاريه الاسود القصير وعيونها الزرگه   والمرسومه  وتاتو الحواجب والشفة المليانه ، بحيث حستها هدى احلى منها لان هدى جانت تكره المكياج الفول وتحب المكياج البسيط ويمكن لان بشرتها البرشة وشعرها الويڤي وبياضها جان ميساعد تحط مكياج طوخ ، لهذا محمد حاول بكل الطرق يبعدهم وحده عن الثانية وظل طول الوقت يباوع بعيون هدى العسلية وعبالك يگوللها اني حبيتج هيج وعلى بساطتج ...
لكن روان كانت تريد تخرب الفرحه بأي طريقة وخصوصاً من حاولت تدير العصير على الگلابيه البيضه الي لابستها هدى  واضطرت هدى تغير وتلبس فستان بنفسجي فاتح طوله شانيل ، وبعدها روان سوت نفسها احترگت ايدها من جانت تساعدهم بصب الاكل ... المهم كانت بس تريد تجذب انتباه لكن هل المرة جانت كل من صبحوه ومها وام هدى  الها بالمرصاد وهذا الي خلاها تفشل ...
خلص يوم العقد وصارت هدى لمحمد ومحمد لهدى رسمي .. واتفقوا انو يبدون يشترون اثاث ويجهزون الشقه على راحتهم.. لكن كان القدر او روان جانت اقوى منهم...
&&&&&&&&&&&&&&&&&&&&&&&&&&&&&
نهاية الجزء الثاني///