حبي الاول والاخير

البارت 1______2

القصة حقيقية في بعض ملامحها  وتفاصيلها.. وتم تغييرالاسماء لما اقتضت  الضروره لتركيب الاحداث .... لهذا وِجب التنبيه..  abbas hj

الجزء الاول///
ظلت تفتر بالغرفة وروحها لايبه ومخنوگه تتصل بيه لو متتصل ... تذكرت هوايه مواقف وشغلات صارت بينهم .... يوم  المناقشه للماستر مالتها باللغه الاسبانية.... وشلون جانت عيونه مليانه كلمات الها ... فرحته بيها .. عگدة حواجبه الي تموت عليها من شاف فستانها ... وشلون مجان راضي بس مابيّن الها حتى لا تنقهر ... يوم الخطوبه مالتهم ولبس النيشان وفرحة امه وامها وهي جانت فرحتها شي عادي عبالك الموضوع واقع حال لان هي انسانة عملية جداً وتحس العواطف شي ثانوي واصلاً ماكانت تؤمن بشي اسمه حب ..
بس هي هسه غييييييير 😢 ... هي تحبه هسه حب مو طبيعي .. يمكن اكثر من هو يحبها .. لان حست بأهتمامه وقربه منها بأكثر من موقف ومن حست راح تخسره ، عرفت گلبها وگع وندمانه لان مجانت تبادله شعوره بنفس القوة.. قررت تتصل ووين متوصل خلي توصل ...
محمد/ الووو
هدى / هلو
محمد / تعبان حييل واني بالمستشفى خفر صارلي اسبوع مانازل ..
هدى/ ادري ... بس انت مااتصلت بيه😟
محمد/ تعرفين السبب..
هدى/ هسه... مراح تنزل ...
محمد/ ليش اكو شي ؟؟
هدى / سلامتك بس اسال...مگلتلي مراح تنزل
محمد / المن انزل ؟؟؟
هدى / الي .............اني...... مشتاقيتلي😔....
محمد/ انتيييي .... اووووف هدى اووووف خليني ساكت...
هدى/ اني غرت عليك ومن حقي ...وهسه اني مشتاقتلك وتصورت انت اشتاقيتلي ... على العموم براحتك محمد طبني مرض زين ولاتنزل ولا اشوفك ولا تشوفني و...
محمد/ هددددددددى لا تبدين..
طبعاً عنده طبيعة من يصيح هددددددى بعصبيه هي تصير فاره وتخاف 😅
هدى/ خلص حمودي براحتك... وسدت الخط 😢
الدموع ملت عيونها وظلت تبجي وتشهگ حسته بعيد هالمره ومو يمها ...
هدى بنية من عائله متوسطة الدخل ابوها متوفي من هي صغيره ... اخر العنگود عايشه هي وامها وعدها اخوه  اثنين اكبر منها عايشين خارج العراق متزوجين وعدهم اولاد ...
محمد دكتور جراح بعده مااخذ البورد ... والدته اسمها صبيحة صديقة ام هدى من كانوا بنات وعلاقتهم كأنهم خوات وحدة تحب اللخ بشكل مو طبيعي بحيث اغلب الناس عبالهم خوات ... ام هدى  هادئه وفقيرة ... لكن صبحوه ( مثل منصيحها) وكحه ولسان وشقندحيه بس گلبها حيييل طيب وتحب هدى كولش وتعتبرها بنتها.. من كبرت هدى ودخلت كليه وهي تسمع محمد لهدى وهدى لمحمد . بس مجانت تعير اهمية للموضوع لان تفكر بس بدراستها ومستقبلها والي ساعدها تغض النظر انو محمد جان همين ملتهي بدراسته ... محمد يكبر هدى ٧ سنين ..
منامت هدى الليل كله تتگلب وتفز وتبجي وترجع تغفى شويه وتذكرت كل الي صار بذاك اليوم ... من عرفت محمد مريض ونايم بالفراش وره المناقشه مالتها باسبوع وشلون اخذت تكسي وراحت لبيتهم واستقبلتها صبحوه ومها ( اخت محمد ) وجانوا فرحانيين بجيتها وطلبت منها صبحوه انو تصعد لغرفته لان نايم ... صعدت هدى للغرفه ورجل تقدم ورجل تأخر وتجر نفس لان اول مره راح يكونون لوحدهم بمكان .... على طول كعدتها وياه او طلعتها ويه الاهل ... دگت باب الغرفه بشكل خفيف ماجاوبها... ظلت واگفه متردده ... وبعدين تجرأت وفتحت الباب ، شافته نايم على ظهره وساند راسه على مخده على ظهر الفراش وعلى بطنه موجود كتاب يخص اختصاصه(طبي) ظلت واگفه متمسمره بمكانها  وعيونها على وجهه ... حواجبه المرسومه وتخيلت من يرفع تك حاجب من يريد يبين الها انو هو مستغرب او متعجب ... خشمه المنحوت الحاد ... شواربه ولحيته
شعره الاسود الفحم ويگلبه لفوگ ... شفايفه ...... ااااااخ من شفايفه من باسها على خدودها من اخذت درجة امتياز بالماستر ... بوقتها هي ظلت صافنه من باسها ... لان بوسته هاي جانت بيها حراره مو بوسه عاديه ... عبالك جان ديگول اني فخور بيج ... هو جان يحبها ويميل الها من الاول من قبل الخطوبه بس هي جانت تعتبره واقع انفرض عليها وبما انو هي متآمن بالحب والعشق وهاي السوالف وتعتبره انسان ناجح واله مستقبل وافقت عليه .... بس هسه غييييييير تحس انو بدت تشعر بشعور غريب باتجاهه والدليل هاي الوگفه الي هسه واكفتها وصافنه عليه ... جر نفس قوي وصاح ااااخ هي فزت وصحت من صفنتها فتح عيونه لگاها گباله واگفه بطرف السرير ... ابتسمت وگلتله سلامتك من الاااخ 😊... ظل يباوع عليها  عيونه جانت تاكلها اكل ... هدى شوكت جيتي ؟؟ سألها
مصارلي هوايه .. بس اكيد قبل ال اااخ😉 وابتسمت ..
محمد/ تعالي گعدي يمي لو تخافين تنعدين ؟؟؟
هدى / لعد انت ليش موجود ... مو حتى من امرض انت تطيبني 😜 وگعدت على حافة السرير قريب منه ..
هدى / شلون صرت هسه محتاج شي اجيبلك ؟؟
محمد/ لا ممحتاج شي بس انتي تگعدين يمي ولزم ايدها ... هي صارت حمرة فوگ لونها الاصهب يعني قوس قزح😅 .. اذا تريد تنام ارجع نام..
محمد/ وانتي؟؟ وعينه على وجهها  عبالك راح ياكلها ..
هدى / ابقى كاعده يمك واذا تضوج انزل اكعد يم خاله ومها لحد ماتصحى ...
محمد/ لااا ابقي
هدى/ ابقى طبعاً .. وابتسمت
انتبهت على صدره .... شنو هاي 😨 ليش هيج خرررب .. صدره عريض وعضلاته 😰 داخت حست اذنها تطلع نار .. هو حس بارتباكها ابتسم ويااااريته ماابتسم  النوبه هي متعرف وين تودي عيونها .. مد ايده على شعرها وبهل الاثناء اندگ الباب ... وانفتح الباب راساً ودخلت روان🤦🏻‍♀️
روان بنت عمة محمد وطبيبه وياه واجى وياها سعيد صديق محمد ودكتور همين وياهم .. وصاحت بصوتها الي بيه رنه وونه... هاااااااا سلاماااات ميلوگلك عيني تنام هاي النومه ... هدى مااندارت جانت منطيتهم ظهرها من گاعده يم محمد ... طبعاً محمد راساً وخر ايده عن شعر هدى ... وسلم على سعيد ...
محمد/ هلو سعيد ... هلا روان
روان/ افتقدناك يمعود ( ماانطت مجال لسعيد يحجي)
محمد / بعدني تعبان ...
روان / هاااي منو هداوي يمك ...
هدى/ لا شبحها 😑
روان / مابيك شي خلي بالله اشوف عندك حراره ( خلت ايدها على گصته)
محمد/ طبعاً عندي حراره وباوع على هدى وحاجبه انرفع... هدى غمزت اله بخشمها☺️
سعيد/ جبتلك ابره هسه اضربكياها وترتاح ...
روان / احنا يمك اليوم منعوفك اذا متگوم وهسه اني انزل حرارتك بس خلي افتح الشباك ونغير جو الغرفه لان خنگه وتباوع على هدى ...
هدى اختنگت وباوعت على محمد شافته مارد عليها ...
هدى/ ايييي مو انتي تحميله واني ماادري😜
محمد/ هدددددى 😒
بس حسته رسم ابتسامه وضمها مابينها وسعيد اندار وانطاهم ظهره وحسته يضحك ..
روان/ لا حبي بس احنا دكاتره ونفهم بعض
هدى/ اهاااا ... ماطول هيج لعد اني انزل جوه يم خاله ومها وانتظرك محمد.. لان صار ازدحام بالغرفه ...
انتظرت يگول لا ابقي ... بس ماگالها .. باوعت عليه انتظرك جوه اوك ... مارد عليها مره ثانيه وجانت روان مخيمه عليه على اساس تفحصه بالسماعه..
طلعت هدى من الغرفه وهي تحس نار يطلع من راسها من الاول مجانت ترتاح لروان وتصرفاتها وهسه حيييل كرهتها ... نزلت اول ماشافتها مها  عاطت شگلتلج ماما 🤦🏻‍♀️
صبيحة/ ليش نزلتي ؟؟
هدى / احسن خاله ... هو بعدين ينزل انتظره يمكم ..
صبيحه/ لا حول ولا قوة الا بالله منگدر نحجي ابونا يگول انتوا شادين وياها لهاي اليتيمه ...
مها/ ميدري انو احنا كلنا بربطة المعلمة صبيحه يتيمات بصفها😂
ظلت تنتظره .... عبرت ساعه ونص وهو ماكو ... وبقت تلهي نفسها ويه مها بس داخلها يشتعل ...
صار العصر وبعدها روان يمه فوگ وسعيد نزل واستأذن وطلع ...
صبيحة / يارجال شوف بنت اختك مانزلت من يم محمد ...
ابو محمد/ وشنو يعني دكاتره وسوالفهم غير سوالفكم
صار  المغرب هدى بعد ماتتحمل وگامت لحيلها واستاذنت ورادت ترجع لبيتها وشافت محمد نازل من الدرج ولازمته من ساعد ايده روان وتضحك وتگول اجى العريس ... ( اسلوب دلاله مو دكتوره🤦🏻‍♀️)
محمد/ وين ؟؟
هدى / بعد وگت ... اريد ارجع للبيت ...
محمد/ ابقي اني اوصلج بعدين
هدى / لا بالله ... يعني شوكت بعدين  والتحميله بعدها بيك😏
محمد/ هددددى
هدى/ اسكت بالله بلا هدى بلا نيله ...
وطلعت تمشي سريع وصلت لباب الكراج جرها من ايدها ... اگولج ابقي اني اوصلج ... هي ناعمه وقصيره وقبضة ايده عصرت زندها ...
اگولك مااااااريد وطلعت بالشارع وصاحت بدون وعي خليك وطب جوه لاتموع التحميله بيك 😡
محمد / اگولج طبي للبيت لاتصير مو زينه
هدى/ ماادخل وشيريد يصير خلي يصير
ومشت سريع حتى توصل للشارع الرئيسي وتاخذ تكسي ... ودموووعها تنزل بدون متحس وتحجي ويه نفسها طبكم مرض انت ووياها ...
&&&&&&&&&&&&&&&&&&&&&&&&&&&&&