# الجزاء من جنس العمل
من الشغلّات الي اني مؤمن بيها مليون بالميه انو كل شي ينرد ، زين او شين كله يرجع ، يمكن مو بنفس الصورة بس يرجع ، تطلّع صدقة ترجعلك صحّة ، تساعد احد متعرفه اليوم ربنا يدزلك احد ميعرفك يساعدك باجر ، تجبُر خاطر احد بكلمة تلاكي كومة ستِر ضللت عليك بموقف جان الأقربلك بي إنك تصير فُرجة لكُل الناس!
وحتى بالأذية ، محد ياذي او يضلم إلا ويصير وياه نفس إللي سواه ويه غيره ، يصير اليوم او باجر أو بعده مو مهم بس راح يصير ..
الخير راجع والشر راجع ، الأمور مو ماشيه ولا الكون ماشي ع التساهيل ، ﴿وَلَا يَظْلِمُ رَبُّكَ أَحَدًا﴾ ويم رب العالمين حرفيًّا ماكو شي يضيع .
