#جرائم_غامضة (المقدمه) او حلقه 1
من بعد سنين طويله من الحياه الهاديه وطقس الراحه والاجازه الي خديتها بعد قضية أهلي ورجعت خواتي وشوفتهم مرتاحين وبعد م تزوجت وحملت وجبت بيبي استنيت فتره ونا نحاول ننهي حبي لخدمتي وانه نستقيل ونهتم بعيلتي ونحس بشعور الأمومه وبس
بس مصارش زا م كنت نتصور او نتوقع حياتي....
اهو انا اليوم اطورت خدمتي وبديت نشتغل في اكبر القضايا
خدمتي مكانتش في المحاكم وبس ثقة القانون فيا وصلتني للمصحات النفسيه برغم كنت عارفه ح نتعب هلبا وح نكون في خطر بس من بين قضايا الجرائم الغامضه الي وصلتني خترت قضية البنت هادي الي كانت ف نضر الكل مريضة نفسيا...كيف ح تتعاملي ي رانيا مع مريضة عقليا ونفسيا وكيف ح تقدري توصلي للحقيقه ممكن هيا بس راس الخيط بس الراس هدا كان مشكوك فيه
حبيت اليوم نمشي نزورها ونا متأكده وواثقه انه الانسان مهما صار معاه مش ح يقدر ينسا الجرح والاوجاع الي كسراته وح يقعد يذكر فها بالتفصيل
خاصة انه بسبب الأوجاع هادي وصل للحاله الي هوا فها حاليا
واخيرا وصلت للمصحه لاحضت الممرضات والدكاتره كلهم يشوفولي بعيون شريره كأنه في شي قعد يصير مش عاجبهم ...يالا نا حاطه احتمالات هلباااا قدامي والمشتبه فيهم كلهم ح يجيهم الدور 🔥
••رانياأشهر محققه عرفتهم علاها في رواية رحم من النار••
رانيا(المحققه):السلام عليكم ي حلوه
السجينه:قامت عيونها فيا وعلامات الحزن باينه ع وجها بدون م تتكلم
راني:كيفك وشنو وضعك مع العلاج؟
السجينه:وجها شاحب...هزت براسها
رانيا:أوك .....المهم خلينا نبدو ف قصتنا لأنه بعد ألف محاوله باش قدرت نوصل فيك
السجينه:ليش؟
رانيا:صعب اي حد يوصل فيك او يسمحوله يحكي معاك
السجينه:هه وانتي كيف قدرتي توصلي فيا ؟
رانيا:فتحت الشنطه وطلعت المذكره وقلم...السبب الي خلاني نوصل فيك لأنه جربت نعيش بعيده ع اهلي زا مصاير فيك توا بس الفرق انك انتي ليك خمسة سنين ونا اكتر من15سنه
السجينه:هههههه انا حياتي م تتقارنش مع حياتك لأنه نا خلال خمسه سنين بس شفت المر
رانيا:اسمك لو سمحتي؟
السجينه:انا سجينه
رانيا:بعيد الشر عليك من قال انا ح نسجنك
السجينه:ومن قالك مش انا المجرمه
رانيا:اوك براحتك تغيرو اسمك لسجينه تمام....هي نتمنا انك تحكيلي الحقيقه كامله باش نقدر نساعدك لأنه لو كدبتي عليا تأكدي انك برا المصحه هادي مش ح تطلعي
السجينه:بلعت ريقها ....وبدت تقيم في شعرها بتوتر
رانيا:كأنك خايفه مني؟
السجينه:ههههه مسكينه؟
رانيا:هي شنو ؟
السجينه:كيف بتساعديني؟
رانيا:نا منقدرش نوعدك قبل م نسمع القصه كامله.
السجينه:تبي تعرفي قصتي ؟ وله جرايمي؟
رانيا:بصوت حاد....نبيك تحكيلي كل شي من نقطة البداية ونتمنا متكونيش ناسية شي
السجينه:ننسا؟؟ ههههه أكتر شي تمنيته يصيرلي هوا اني نفقد الذاكره
رانيا:لدرجه هادي؟
السجينه:بعيون مليانه حقد....واكتر مما انتي متخيله وربي
رانيا:هي احكيلي؟
السجينه:خدت نفس عميق وبدت تحكي ببرود
أنت تقرأ
جرائم غامضة ( روايات ليبية )
Horrorللكاتبة : ميلو حسسن . قصة تجمع بين البوليسية و الحب رواية من داخل المجتمع الليبي . سلسلة من رواية المشهورة ( جريمة في داخلي ) 🔥 MBC LIBYA 🇱🇾 تقدم لكم جميع حلقاتها
