مكر رجل ودموع انثى(باللهجه العراقيه)

part-13

قاطع افكاري صوت ماريا.

ماريا"أستبرق بيچ شيء شو شگلچ تعبان ومخطوف لونچ.

أستبرق"اشعر بدوخه ولعبان نفس عندي يحتاج شويه اغمض عيوني واصير احسن.

ماخلصت كلامي حسيت روحي اريد اتقي...اشرتلها راح اطلع رادن يلحكني اشرتلهن ميحتاج......طلعت بسرعه ورحت للحمامات...كعدت احاول اتقي بس ماكو بس اشعر بلعبان نفس وراسي يدگ طبل. غسلت وكملت وطلعت من الحمام باوعت على ساعه شفتها 28دقيقه محاضرتنه راح تبدي رحت بسرعه للقسم وصلت للقاعه لكيت الباب مسدود وتوها 30دقيقه فتحت الباب وشفت دكتور عمار واكف بالقاعه يشرح...

أستبرق"العفو دكتور تسمحلي ادخل.

د.عمار"لا اطلعي بره وسدي الباب.

أستبرق"العفو دكتور توها الساعه ب 12:30.

د.عمار"بس ينسد الباب مدخل احد ورايه وباوعي صارت 31دقيقه سدي الباب واطلعي بره.

أستبرق"دكتور كان عندي ضرف وماتخرت غير دقيقه خليني ادخل.

د.عمار"فتت من يمچ بس طلعتي من القاعه لو كايلتي كان فكرت بالموضوع وهسه سدي الباب واطلعي اريد اشرح للطلاب.

اني عبالگ واحد صفكني راشدي ايمت فات من يمي وشويه وابچي على هايه الفشله لعد ليش اني ماداومه اذا مايفوتني محاضره لو يدري بابا مافتت محاضره ومداومه يطيح حضي.

گلت اخر مره بلگت يحن گلبه ويفوتني"دكتور فوتني حتى لو بدون حضور اهم شيء ماتفوتني محاضره.

د.عمار"اطلعي بره وسدي الباب وراج دا ضيعين وقتي.

طلعت بره والجو وبارد والدنيا تمطر والدمعه بطرف عيني واشعر بالاهانه من الي صار يادنيا ارحميني والله تعبت لا حد فاهم ولا احد حاس بيه احس بتعب مو طبيعي وعيوني بدت تغوش....رحت امشي لاستعلامات وطلعت تلفوني واتصلت بمراد.

أستبرق"الو هلا مراد شلونك.

مراد"الحمدلله هلا استبرق صاير شيء داكه عليه بهل وقت.

أستبرق"اگلك مراد عفيه تعال اخذني من الجامعه تعبانه حيل بس عفيه لاتجيب طاري كدام بابا.

مراد"ليش خما صاير شيء استبرق خما بيچ شيء خوفتيني عليچ.

أستبرق"راسي يوجعني ولعبانه نفسي واشعر بروحي دايخه وراح انتظرك بالستعلامات بس تجي رمشلي واني اطلعلك.

مراد"تمام مسافة الطريق واكون عندچ ماطول..

وصلت الاستعلامات وگعدت اهناكه انتظر مراد يجي ياخذني وهاي اول مره يصير بيه هيچ تعب.

☆☆☆☆☆☆☆☆☆
ديما
اباوع على دكتور شلون طرد أستبرق وماخلها اتفوت واني انقهرت باوعت على ماريا تشرلي احچي وياه اريد فرصه حتى احچي ماكو طلعت أستبرق وسدت الباب وگعد دكتور عمار يشرح ومبين معصب حتى الكوز نسه مامتحنه بقى بالي على استبرق خاف يصير بيها شيء وتعبانه خليني احچي وياه والي يصير خلي يصير.