مكر رجل ودموع انثى(باللهجه العراقيه)

part-1

السلام عليكم
اعتذر عن التاخير اليوم الحمدلله انهيت اخر امتحان بهذه المرحله الدراسيه ونرجو من الله التوفيق لي ولجميع طلبتنه الاعزاء بالجامعات العراقيه ويارب تحقيق الاماني واعلى المعدلات ويحققون كلشي الي يتمنونه ويارب احفظ شعبنا العراقي من شر فايروس كورونا واللهم شافي مرضى العراق من كل داء قد يصيبهم ويضر بهم.

ملاحظة((((سوف اقوم بالتنزيل بشكل يومي ان شاء الله وسوف احاول ان اخصص وقتي بالكتابه لاجلكم فلقد اشتقت اليكم حقآ واشكر كل واحد سأل وافتقدني طول هذه المده..الي يحب الروايات العراقيه خلي يقرأ روايتي المكتمله رغم عذابك الي حبيتك..والي يحب الفصحى هسه حاليآ دا انزل رواية اعشق قلبك الاسود وتنزيلها يومي باذن الله))))

يله نبدء
بسم الله
-صلو على النبي-

(يقولون ان من يحب يفعل المستحيل لكنني لم اصدق ذالك الكلام طوال الوقت لكن خلال اسطر هذه الروايه ستتعرفون معنى الحب الحقيقي والى اي درجه يتمسك العاشق بمعشوقته خصوصآ ان كان الحب بين اشخاص مختلفين بالطباع وعنيدون للغايه وسوف يفعلون كل شيء للحصول على مايردون وسوف نرى تحقق عبارة ان الغايه تبرر الوسيله.... فروايتي تحتوي على عدة ابطال ولكل واحد منهم قصه وعبره وستتعرفون عليها بين طيئات روايتي مكر رجل ودموع انثى رواية حقيقه ستعيشونها بتفاصيلها وافراحها واحزانها)

☆☆☆☆☆☆☆☆

بيت عبد الرزاق

اسمع منبه تلفوني يدك ودا اطفي بيه وارجع انام تعبانه وماليه خلگ اگوم من الفراش......قطع نومتي صوت ماما وهي دگلي...

ماما"بنتي حبيبتي الخط راح يجيچ وانتي بعدچ نايمه تره الساعه صارت 7:15...فزيت وكمت وكلت
ماريا"ماما ليش ماكعدتيني هسه شلون راح الحك يربي..

ام ماريا"هسه اجهزلك ملابسچ روحي غسلي...
ماريا"عفيه ماما كويتيلي الخمار..

ام ماريا"اي بنتي بسرعه تجهزي.
رحت اركض غسلت كملت.....ولبست بنطال وتشيرت وفوكها الجبه. ولبست خماري وحطيت كحل خفيف لعيني فقط تعودت من اني وصغيره احط كحل خفيف....ماتريكت لان ماحب اكل بس اروح للدوام احس نفسي تلعب..

نزلت من درج مع بابا انتظر ابو الخط كدام العماره..

نسيت ماعرفتكم عن نفسي..

اسمي ماريا عبد الرزاق......عمري 23 سنه...طالبه مرحله ثانيه كلية العلوم...علوم فيزياء...جامعة المستنصريه بغداد..راح تستغربون سبب تاخيري بالدراسه صراحه بسبب ضروف اضطريت اترك كم سنه وبعدين اكللكم عنها صار سنه وهاي الثانيه احنه عايشين بغداد انتقلنه من البصره لبغداد لسببين الاول علمود قبولي الجامعي والثاتي.. نكون قريبين على اختي الي تزوجت ابن عمت ماما...خليني احچيلكم عن اهلي شويه..
ماما..ربة منزل...وبابا...ضابط متقاعد..وهسه يعمل اعمال حره كاسب....عندي اخ واحد اسمه اسماعيل..ثالث متوسط...اما اختي الكبيره مروه مزوجه ابن عمت ماما واسمه خليل....اما الي اصغر مني اسمها مها مزوجه من كرايبه اسمه ياسين
..عائلتنه قليله هسه متكونه من ثلاث اشخاص اني وبابا وماما واسماعيل عايشين بعماره (بوحده من الشقق تتكون من غرفتين وصاله وربعه(استقبال) ومطبخ) الحمدلله مرتاحين بيها حالتنه الماديه وسط المهم عايشين والحمدلله....احنه عائله متدينه وملتزمين بس مو معقدين....واحس الخمار صار مني وفيني حتى لحد الان اتذكر شلون صديقاتي يتعجبن بس اكل من تحت النقاب(الخمار)صرت اني وياه قطعه وحده ونسيت اكللكم تره شخصيتي خجوله كلش وجبانه ودا احاول اتشجع شويه.