أنشودة كارمن (مكتملة)

باستيت

أنا كارمن , هقولك عنى 5 أسرار  محدش يعرفها ...

الاول ... بسمع افكار اللى قدامى .وهعلمك أزاى تسمعها زىى

التانى .... قتلت امى وأنا عندى 11 سنه ,ومحدش يعرف.

التالت .... بسكن جسم قطى وبشوف بعينه وبسمع  بودانه .

الرابع .... قررت أقتل كل خاين فى حياتى

الخامس .... بيقولوا عليا مجنونه!!!
Lina Basyouni

أنا " كارمن ياسين عوده " عندى  21 سنة ,البنت الوحيده  لياسين عوده صاحب أكبر مصانع رخام وجرانيت , ومن أغنى رجال الاعمال فى مصر , بابا مش زى أى راجل أعمال تعرفه , بابا محدش فى مصر كلها يعرف شكله!!

تشوف أسمه فى كل الجرايد  بس عمرك ماهتلاقى صوره ليه , تعرف ليه !!؟ هقولك ليه بس مش دلوقتى ....

وانا عندى 11 سنه بدأت أسمع الكلام اللى بيدور فى مخ أى بنى آدم واقف قدامى,  من غير ما يقوله على لسانه , هتقول عليا مجنونه , هقولك أنى بدرس لغة الجسد من وأنا صغيره علشان أتأكد من اللى بسمعه .... مش بس كده هعلمك أزاى تسمع أفكار اللى قدامك ...

هعلمك تكشف خداعهم وكدبهم ...

الانسان بيكدب بلسانه .... بس جسمه لأ .... مابيعرفش يكدب ...

بينوكيو أنفه بتطول لما بيكدب ,  ده بالظبط اللى بيحصل للى قدامى لما بيكدب , الكدب بيعلى ضغط الدم , وضغط الدم بينفخ ألانف وبيهيجها وبيخلى اللى قدامى عايز يهرش أو يحك ايده فيها , لما بلاقى حد بيحك فى أنفه وهو بيتكلم بعرف أنه بيكدب .

الخدود والودان برده بتحمر من ضغط الدم ,لما ألاقى اللى قدامى خدوده أو ودانه حمرا وهو بيتكلم بعرف أنه بيكدب عليا .
Lina Basyouni
الشفايف , لو اللى قدامى عض شفايفه وهو بيتكلم , أو لو شفايفه نشفت وأضطر يرطبها بلسانه  بعرف أنه بيكدب .

الحواجب واللى بتترفع لفوق  , فرك الصوابع فى بعضها ,العين اللى رموشها بترفرف كتير ولما بؤ بؤ العين بيروح ناحية اليمين , بعرف أن اللى قدامى بيتخيل  الحاجه مش بيفتكرها . عينه بتحود يمين  تلقائى, علشان بيستدعى المعلومات من نص مخه اليمين واللى مسئول عن الخيال , مش الحقيقه ....

بسمعهم وهما بيكدبوا فى سرهم وبشوف علامات كدبهم على وشهم .

قتلت أمى وانا عندى 11 سنه ...
Lina Basyouni
بابا ياسين عوده أبن أصول أبا عن جد , جدى كان باشا أيام الملك فاروق كان عنده من الاطيان اللى لو مشيت فيها على رجلك هتحتاج شهور علشان توصل لاخر حدودها .

بابا درس  فى كليه سياسه وأقتصاد  جامعه القاهره وحب " هند" زميلته فى الكليه ...أمى  واللى من عيله واطيه وعره من قاع المجتمع , كانت عايشه فى منطقه شعبيه جمب الجامعه , وعمرها ماكانت تحلم تتجوز شاب مثقف ومتعلم وأبن أصول وثرى وفوق ده كله بيحبها , وأتجوزها وهما فى تانيه جامعه بعد ما أتحدى عيلته كلها علشانها !!