THE BANDIT'S EYES Lord of the Hearts Series Book 1

Chapter 8: When Love Creates Magic

Napapangiti sa sarili si Nathan sa kabila ng matinding traffic sa daan. Pabalik-balik kasi sa kanyang isipan ang pagbanggit ni Larina sa kanyang pangalan.

Tila ba musika iyon sa kanyang pandinig habang paulit-ulit na naglalaro sa kanyang isipan. Kahit pa sinambit nito ng may galit at pagkamuhi ay napakasarap pa rin sa kanyang pandinig.

Hindi niya inaasahang ganun kaganda ang kanyang pangalan kapag si Larina na ang sumasambit.

Hindi rin niya maipaliwanag kung anong magneto ang humihigop sa kanya upang tuklasin ang misteryo nito na kung tutuusin ay dapat na niyang iwaglit at magpatuloy sa dating nakasanayang pamumuhay.

Ni hindi nga niya maintindihan ang lumukob sa kanya upang puntahan ito kaninang umaga dahil maaari naman niyang iutos sa tauhan ang pagsosoli ng gamit nito at sasakyan ngunit iprinisinta niya ang kanyang sarili na personal na gawin iyon.

Women pass him by without his notice. Pero ibang klase si Larina dahil nagkaroon na ito kaagad ng malalim na impact sa kanyang dibdib.

Ni kahit ang kababatang si Paloma na kanyang pinakahuling naging nobya ng halos tatlong buwan lamang ay hindi nagkaroon ng ganoon kabigat na impact sa kanya.

Ni hindi nga siya nalungkot ng sinabi nitong kailangan na nilang magkalayo upang tanggapin ang international offer ng isang malaking modelling agency sa Europe at walang pagdadalawang-isip na iwanan siya.

Marahil dahil abala din siya sa pagmamaniobra ng kanilang business kung kaya’t hindi man lang niya naramdaman ang pagkawala nito.

Marahil din ay nasanay na rin siyang mawala at sumulpot sa kanyang buhay si Paloma kung kailangan siya nito at kaya lamang siya nahikayat na maging nobya ito ay dahil na rin sa kanyang mga magulang dahil kilala na nila ito mula’t sapul sa pagkamusmos.

Ni hindi nga niya maituturing na nobya ito sa pormal na salita dahil kapwa naman nila alam na wala silang mabigat na commitment sa bawat isa.

Ni wala nga siyang maramdamang malalim na pagtatangi dito maliban sa isang apeksyon ng isang kaibigan na matagal ng magkakilala.

They go together when Paloma is around or when he is around. Ngunit wala ni isa man sa kanila ang nagtatali sa bawat isa na may serious bond sila sa isa’t isa o bumabanggit ng mga bagay na may kinalaman sa damdamin.

Kaya nga napakadali nitong magpasyang tumungo sa Europe at natitiyak niyang naputol na rin ang lahat sa kanila dahil alam niya kung gaano kahalaga ang career nito sa kanya kesa sa pag-ibig.

Ngunit ang masagwang paghihiwalay nila ni Larina kagabi ay tila dumurog sa kanyang puso ng umalis itong galit na galit sa kanya dahil sa kapangahasan niya na sa tanang buhay niya ay hindi pa niya nagagawa sa kaninumang babae.

Sa panandaliang pagkakakilala pa lamang niya dito ay tila naging obsesyon na niya ito at sa tuwing nakikita ito ay nagbibigay ng ibayong kaligayahan sa kanyang dibdib na hindi niya kayang pangalanan o maipaliwanag.

Kahit pa sin-lamig ng matigas na yelo sa north pole ang pakita nito sa kanya ay hindi siya natitinag dahil habang inilalayo nito ang sarili sa kanya ay mas lalo lamang siyang nagiging agresibo na tunawin ang nagyeyelo nitong damdamin at palambutin ang bakal nitong puso.

Alam niyang nasaktan niya ito kanina ngunit hindi niya sinasadyang mabuksan ang anumang itinatago nito at hindi siya titigil na tuklasin ang misteryo ng pagkatao nito.

Dahil gusto niyang siya ang magprotekta at magtanggol dito. Gusto niya itong alagaan, sambahin at mahalin. Ipalimot at pahilumin ang anumang dinadalang sugat nito.

Gusto niyang tanggalin ang maskara nito at makita ang tunay na anyo nito. At kapag nagawa niya iyon siya na ang pinakamaligayang lalaki sa mundo.

Natuturol niyang matindi ang pagiging man hater nito. She must have a painful experience with a man? Ngunit sino? Hindi naman maaaring namolestiya ito o napagsamantalahan dahil sigurado siyang hindi dahil nabubuking niya ang kainosentehan nito sa bawat pagtugon nito sa kanyang mga halik dito.