مكر رجل ودموع انثى(باللهجه العراقيه)

part-1

اجه ابو الخط....ورحت وياه....فرتنه بالخط على بيوت البنات طويله...ركبن البنات بالخط....اسمع سوالف البنات بالخط عن لبسهن ومكياجهن واني مو يمهن اصلآ...شايل ملزمتي ودا اقرأ محاضرتي لان دكتور يريد يسويلنه كوز(امتحان يومي)..

وصلنه الجامعه ودا امشي بتجاه القسم....اول محاضره عدنه ثرمودينمك نضري ياخذنه بيها دكتور كمال
حاولت اسرع بمشيء حتى اصل بالوقت المناسب.

رحت وكفت ويه البنات زينب وديما واستبرق....اني ماعندي صديقه مقربه احجي ويه الكل عادي بس اكثر شيء ويه ديما وعلى حدها استبرق..... .فتنه محاضره وامتحنه الدكتور وطلعنه واني دا اضحك لان مجاوبت كنت دا امشيء مع ديما لان زينب واستبرق راحن يشترن من الكافتريا..دا نمشيء بحديقة الجامعه واني عيوني بالكاع وكلما ارفع راسي احس الطلاب ماكليني اكل بعيونهم وارجع انزلها.....فات من يمنه طلاب اشكالهم مو راحه واحد منهم سمعته كالي يمه فديت هل عيون...اني جمدت مكاني....ومتت خوف مشيت بسرعه وكعدت على المسطبه.

ديما"صدك طلاب ميستحون حتى المخمره ماتخلص من عدهم والله ردت ارزلهم بس سكتت علمودچ.

ماريا"اش نصي صوتك همزين ماسويتها گان فضيحتنه صارت عمل شعبي.. عوفيهم الله يصلحهم.

ديما"مدام اني وياچ لاديرين بال شحده ليصل يمج واني موجوده.

ماريا"استقري شويه عيني اعرفچ جبانه اكثر مني لاتسوين بيها بطولات هسه.

ديما"هههههه شايفتني شنو قابل اني ذره حتى ما استقر.

ماريا"لا حيشاچ عيني اشاقيچ.

رفعت عيني شفت مجموعة شباب كاعدين گبالنه على المسطبه ويباوعون انزعجت حيل منهم وكلت.

ماريا"ارض الله واسعه قحط اماكن اله كبالنه.

ديما"تعودي تره هاي حديقه ولكل شخص الحق وين مايكعد لاتضايقين نفسچ ياعمري.

هزيت براسي واسمع كلامها بس ماعرف ليش صارلي فتره اشعر انو احنه مراقبين واحس واحد عيونه حاده يباوع بس من الخوف ماشوفه زين عيونه تخوفني ماعرف يمكن الاحساس بس يمي وكل هاي مصادفه لان ولا وحده من البنات جابتلي طاري تعوذت من الشيطان وقررت ماشغل عقلي بهيچ امور....اجتي زينب واستبرق يضحكن...

ماريا"خير ضحكونه وياكم شويه..

زينب"ههه هاي الذكيه استبرق بس ردنه نطلع من الكافتريا يم الباب شايله صينية الفنكر رادت تدعم دكتور عمار...وكفت باخر لحظة ولو شايفتها شلون كعدت تعتذر من عنده.