نصفي العقيم ( مكتمله )

مشهد _اعلان

بغداد الساعه 11:55الحادية عشر وخمس وخمسون دقيقه ليلاً

لامه نفسي وحاظنتها بخوف .. مستقبل مجهول
خوف من الوحده ..وصدمه باقرب الناس اليه !!
هاي تاليتي اني( نگسه)

وبسبب شنو بسبب مذهبي ينكالي هالحجايه

والذابحني اكثر من اقرب الناس اليه لو جايني غريب وكايل هالحجايه يمكن ما تأثر ..ولا انهار

بس الي طعني طلعت من حلكها.. ومن بين شفاها الي بيوم من الايام جانت تلوليلي وتغنيلي التهويده بحنان حتى انام ..
وتغفى عيني بأطمئنان..هي زرعت  بايدها داخلي سنادين ورد وكل ورده تمثل شغله ..اطمئنان _وراحه _وامان..بس للأسف انتزعتهن كُلهن بايدها الي زرعت هالبذور وربتها واقتلعت جذورها بقسوه

مسحت وجهي بتوتر جبير وخوف ورهبه عظيمه ..
ليش يربي ليش هيج ديصير .. بين ليله وضحاها نكلبت حياتي رأساً على عقب..

شنو ذنب السويته حتى انترك هيج .. مثل غرض سيء الاستخدام انتهت صلايحته ونشمر ..وشنو الخطيئه الي رتكبتها خلت حياتي تتهدم ..

دفنت وجهي بالمخده بسبب خوفي الجبير.. لاول مره اكون  وحدي 

ليش محد سأل عليه صار يومين  تاركيني واني طفله!!

.. باوعت لارجاء المنزل الي منوره بقوه .. اخاف من الظلام واني لوحدي..

النور الي يشرق من كل جها يختلف تماماً عن الظلام الدامس الي طامسه روحي بي ..

شمعه ضاويه .. نطفت.. بسبب عصف واعصار .. هب عليها من ناس جانت محتله جزء كُلش جبير باركان گلبي..

تاكدت انو اني ماراح ارجع مثل قبل ولا راح ارجع ذيج الي تضحك للهوى..

سمعت صوت بطني تقرقر بسبب الجوع.. نتبهت لروحي ..صارلي اكثر من ثمانيه وعشرين ساعه ابدون اكل ولا ماي  تغذيت على دموع الالم والخذلان ..

مهتميت ابد اكتفيت بالبكاء بصمت ..  وافز كل ما اسمع صوت من برى .. دموع تتهاطل مثل المطر .. احاول الهي نفسي وماكدر  احس روحي متقيده وشي مجنز كل اطرافي بسلاسل قويه ..  جربت بس داخلي متاذي متاذي بشكل .. وماداتروح كلمتها الي كل شويه تتردد الى مسامع اذني ..

نگسه ..

نگسه..

نگسه..

رفعت راسي لخالق السماء ببراءه  ودعيت من كلب طفله مجروح ..ياربي اني خايفه حيل .. لان كاعده وحدي ابعد عني كل الاشياء الشريره .. والله احبك يا ربي واعرف انت فوك وتشوفني هم .. 

رجعت ابجي بخوف محتل اضلاعي وينهش داخلي بالم

.. احس الحيطان تبجي على حالي .. اناشغ واعاتب روحي لان حنيت الها ..واحجي ويا نفسي مثل المجانين

..اني غبيه وحيوانه اشتاق الها شنو ..رجعت جاوبت روحي بتردد .. بس اريديها ياربي خايفه حيييل..اريد حظنها

مسحت دموعي بردان التراك  الي كُل ثانيه تنزل ..حتى عيوني كامت توجعني واحسها تنغزني مثل الدنبوس من جوه وارمات حيل

فزيت من سمعت صوت الباب ..كمت برعب شديد واني امشي اقدم خطوه وارجع خطوه..الا ان اخذتني رجليه للباب الي داينطرق بهدوء..كلت

بصوت خافت ومرعوب.. مْـ  مْـ ـنـ نـوووو

..اني افتحي الباب

.. من سمعت صوته حسيت اجاني الفرج واخيراً راح اتحرر من هالمكان..للحظه نمحى بداخلي الخوف ودخلت السكينه باعماقي..اجيت فتحت الباب بلهفه وعلى وجهي ابتسامه محتلها اليأس والحزن.. اول ماشفته نطقت كلمه

وحده .. بصوت مخنوك من العبره

آآآآآه ..نبعت من داخل كلبي

وكعت على رجليه لان نهد حيلي بجد وتعبت .. هو اجه رفع راسي وباوع بعيوني البريئه.. 
الي تعكس  صورة وجها الخائف عليه  بسبب وسعها ولمعتها البراقه نفس اللمعه قبل يومين بالظبط  عكست صوره بشعه لجنازه ..اتشيعت بيها توابيت لناس مشو عني بارادتهم ..وكعت من طولي ونزل عليه غشاء اسود مثل الستاره الي تنسد بنهاية كل فلم عربي ..
اما تكون النهايه حزينه و اما تكون مفرحه..

Next...

رواية.. (نصفي العقيم )

مثل مشفتو الروايه بيها غموض واسرار بس ماكو شي يبقى مخبه وكل شي بالنهايه حيكون مكشوف قصه خلت الصدمه تسيطر عليه من روتلي ياها البطله .. ظلم ..قلوب قاسيه..انعدام ظمير.. عدم اهتمام تعنيف ظرب .. اهانه فراق..
كلهن اجتمعن وصارن قوه شريره تجي بكوابيس البطله باحلامها وواقعها ..

تابعو ويايه هالقصه وكُل شي توقعو بيها..كُل شي!!!

مختلفه عن رواياتي السابقات كُلها ..متاكده كل الكلام الكلته ماكدرت اوصف الروايه واوصل لمضمونها ..حتقرون انتو وشوفون بعينكم..
حرب نفسيه!!

هذا غلاف الروايه وبي هواي شغلات من احداثها

كولولي رائيكم بالتصميم اني عن نفسي هواي حابته..

من تصميم المبدعه والانسانه الطيبه (ياقوت قتاده)

yaqut_55
هذا حسابها للي يريد يصمم عدها
احب اكولج عاشت ايدج ياعمري الغلاف كلش عجبني ..استمري وان شاء الله من تقدم لتقدم ..

تقبلو اطيب تحياتي..🌸

الكاتبه :يُمنا نآصر

احبكم♥️