أحببت أزعر بقلم مريم اليوسف

الجزء السادس

#أحببت_ازعر
#الجزء_السادس

#بقلم_مريم_اليوسف

الشيخ : تحسين احكي لاخوك مجد شو صاير .. مجد مانو غريب
تحسين :طيب
مجد :عم اسمعك
تحسين : اختي
مجد :الدكتورة ؟؟؟
تحسين :اي
مجد :شبهااا
تحسين : مخطوفة
مجد :شوووووو
تحسين :متل ماقلتلك
مجد :كيف هيك .. طيب ليش هيك واقفين ماتتحركو .. معقول برودكن .. عرفتو مين خطفها
الشيخ :مجددد ... اهدى .. اي عرفنا مين خطفها
مجد :ولساتكن واقفين
الشيخ :لانو ماطالع بالايد شي
مجد :كيف يعني ماطلع بالايد شي.. مزالو بتعرفو غريمكن
الشيخ ساكت وماعرفان من وين بدو يبلش
مجد :طيب ليش خطفها
الشيخ : لانو تقدملا ورفضناه
مجد.: وشو ناويين تعملو
الشيخ :مابعرف
مجد رجع عصب :كيف يعني مابتعرفو مين يلي بيعرف .. انا مارح اسكت ورح اتصرف
الشيخ :مجددد ... تصرفك مابدنا اياه
مجد :مابدكن مساعدتي ؟؟؟؟!!!
الشيخ :مو هيك .. بس بنعرف شوبدك تعمل تدخل الشرطة بالنص
مجد.:مزال بتعرفوه لازم نخبر الشرطة
الشيخ :هي بنتي ومابدي اياها تنفضح .. اخر هالعمر يطلع حكي عبيت الشيخ
مجد : طيب بدون الشرطة خليني اتصرف ..قلي مين يلي خطفها
الشيخ :واذا قلتلك شو رح تعمل .. الشب برات البلد هو حكانا وقلنا البنت عندي ... ومابرجعا غير لترضو تعطوني اياها ... والبنت طبعا بالبلد .. كيف بدك تحلها
مجد :بندور على اتباعو هون
الشيخ :لو تدور مية سنة مارح نلاقي حدا هون
مجد :طيب هو مين بكون
الشيخ : تاجر معروف والو اسمو بالبلد .. شافها بالمشفى وسأل عنها واجا طلبها ونحنا رفضناه ....
مجد :الكلب الحقيير... وشو ناوين تعملو
الشيخ :مابعرف
مجد :طيب وافق وخلي البنت تجي وبعد ماتجي يروح يخ****
الشيخ :متوقع هالامور بهل البساطة ... واحد حقير مارح تمرق عليه هيك شغلة .. واي حركة البنت رح تدفع تمنها
مجد :يعني هيك بهل البساطة بدك تسلم البنت لهيك واحد
الشيخ :مافشر يلمسها
مجد: طيب خليني اتصرف انا
الشيخ :بدون مساعدة الشرطة؟؟
مجد :والله ومحدا بيخبر .. الدكتورة اختي
الشيخ :كيف
مجد :خلونا نحاول اكيد الخاطفين تاركين وراهن دليل
تحسين :دورنا بكلشي ومافي اي دليل
مجد :طيب من وين انخطفت
تحسين :من المشفى
مجد.: ايمت
تحسين :مبارح المسا
مجد : لاحول ولاقوة الا بلله ... انا رايح ع المشفى
الشيخ :ليش
مجد :بدي شوف كاميرات المراقبة بركي بنلاحظ فيهن شي
الشيخ :الكاميرات محذوفة بالوقت يلي انخطفت فيه
مجد :طيب من قبل
الشيخ :شفناهن ومافيهن شي ملفت
مجد :بدي شوفن انا
الشيخ :التسجيلات عنا
مجد :اي منيح كتير .. خلونا نشوفن
راحو وقعدو تحت الشمسية .. وتحسين جاب اللابتوب وعطاه لمجد
شغلو الفيديو ع التشغيل السريع .. وبلشت تظهرا ع الكاميرات عالم طالعة فايتة وسيارات رايحة وجاي .. ومافي اي شي ملفت للنظر
نقلو الفيديو لقبل بيوم وصارو يتفرجو .. تقريبا نفس المشاهد بس غير اشخاص
تحسين :شو لقيت شي
مجد :لكم يوم التسجيلات
تحسين :اخر سبعة ايام
مجد : خلينا نشوف اليوم يلي قبل هاد
نقر نقرة وقال :تفضل .. مع انو متأكد مارح يكون في شي
مجد قاعد وحاطط ايدو تحت دقنو وعم يتابع الشاشة
تحسين :ابي هي الكاميرات شغلتا فاضية .. لازم نلاقي حل.. شو لازم نتصرف ياسمين مالازم تضل اكتر من هيك برات البيت
مجد سحب اللابتوب ونقر نقرة رجع ليوم قبل هاد اليوم
الشيخ :ناطرين منو اتصال .. بركي بنوصل لحل
رفع نظرو مجد لتحسين وقال :شو قلت
تحسين :عم قول انو هي التسجيلات شغلتها فاضية
مجد :ابدا مانها فاضية
تحسين :لقيت شي
مجد فتل اللابتوب لعندن وصار يكبس ..
مجد :لاحظو هي السيارة الرمادية
تحسين :شبها
مجد.:بكل يوم موجودة ..
تحسين :يعني مفكر حالك لاقي شي شغلة .. بسيطة بتكون لشي دكتور
مجد :مافي دكتور بالعالم بداوم كل يوم بالمشفى .. وهي اختك اكبر دليل .. اوقات بنتام هنيك .. اوقات بتروح الصبح وبترجع المسا .. صح ؟
تحسين :يعنيي ؟؟
مجد :ممكن .. بس هي السيارة انا شايفها
تحسين :متأكد
مجد :اي متأكد .. اصلا من اول فيديو لفتت انتباهي .. بس ماعم اتذكر وين
الشيخ :معقول هون بالضيعة اذا فعلا كان عم يراقب ياسمين
مجد :ايي .. صح تذكرت
تحسين :شوو
مجد :بتتذكر من فترة لما طلعنا انا واياك من بيتكن من هون .. واول ماطلعنا ع الطريق شفنا سيارة عطلانة
تحسين :لا مابتذكر
مجد :بس انا متذكر يوم يلي رحت تهجمت وكسرت محلات ضيعتنا لما رجعتك من نص الطريق .. واصلا هالسيارة لفتت انتباهي وصاحبها كان عم يحوص بنظرو يمين وشمال .. وهاد الشي خلاني شك فيه .. لانو ماشكلو مقطوع
الشيخ :طيب بركي ماهو
مجد :هلا رح بنتأكد
الشيخ :كيف
مجد :انا بوقتا اخدت رقم سيارتو .. اصلا كل واحد شكلو مابيعجبني باخد رقم سيارتو
تحسين :جد اخدت الرقم
مجد.:اي .. وليكو حافظو بالموبايل
طلع الموبايل .. وفتح ع المذكرة .. وفتح ع الرقم .. وباللابتوب كبر الشاشة ع السيارة وطلع نفس الرقم
تحسين :نفسوو
مجد :كنت متوقع
تحسين :طيب شو رح نعمل
مجد :اتطلع بالشيخ وقال من بعد اذنك بدي استعين بالشرطة
الشيخ :ماشي
دخل ع السجل وطلب رقم العقيد
مجد :احترامي
العقيد :اهلا بالشريك
مجد :في رقم سيارة بدي باقل من نص ساعة اسمو وعنوانو وكلشي عنو
العقيد :مجد هي اسرار .
مجد :صدقني شغلة حياة او موت
العقيد :طيب سلمنا الشغلة النا خلينا نتصرف
مجد : صعب .. وصدقني رح كون بالسليم
العقيد :طيب .. هات الرقم
مجد :سجل عندك *********
____________________________
ببيت مجد
حطت زينة هية وامها الفطور ع الارض
زينة :رح انده لاخواتي يجو ياكلو
طلعت لبرا وراحت لورا البيت بركي بتشوف حدا منن ..
شافت مراد قاعد تحت شجرة الجوز وعم يحكي ع الموبايل .. صارت تقرب شوي شوي لتسمعو
مراد : هههههه طيب متل مابدك ... والله ناوي شو شايفتيني بلا شرف .. والله بحبك وبدي اتزوجك .. خلص بكرا ان شاء الله رح ابعت خالتي .. اليوم بدي شوف اخي شو رح يصير معو ...... اي اي نفسا بنت ابو ناصر بس ماعم تظبط معو ..... بس مايطلعو اهلك متل اهلها .... طيب بنقول انشاء الله
زينة :احمم .. احمم
التفت على اختو بسرعة وحكي ع الموبايل :لكي ببقا بحكي معك .. باي
سكر وهو مقهور وقال :مابتعرفي انو التنصت حرام
زينة :مع مين عم تحكي
مراد :مادخلك .. من ايمت انتي هون
زينة :من عند شو انا بلا شرف
مراد : ينعن شرفك .. انقبري من وجهي
زينة :قلي مين هي
مراد :مادخلك
زينة :اكيد من الضيعة .. هيك حسيت
مراد :اي من الضيغة وغيرو
زينة :تعال لنفطر
مراد :جاهز ؟
زينة :اي
مراد :جاي
زينة :وينو مجد
مراد :راح لعند الشيخ
زينة :كان يفطر بالاول
مراد : ماهو فايق متحمس .. ورايح لعندو بركي بيجي بيخطبلو ضحى
زينة :ياحبيب قلبي يامجد .. الله يفرجها عليك ويجبر بخاطرك
مراد :آمين
زينة :لكن لروح اتغالظ على ضحى لشوفها بتعرف
مراد :وبركي مجد ماخبرها
زينة :هههه اي انا بخبرها
وركضت
مراد: لك زيينة ..يا زينةةة .. ياربي انا ليش حكيتلا
_________________________
قاعدين وناطرين الاتصال ..
مجد شرد شوي وصار يقول بقلبو.. شو القصة المشاكل ماعم تخلص ...لسه مابنطلع من مشكل بيجي التاني اكبر منو ... اوووف ... الله يجيب العواقب سليمة وترجع هالبنت لعند اهلها سالمة ... عأساس جاي مبسوط مشان قلو للشيخ يروح يطلبلي اياكي ياضحى .. ليش هيك عم يصير معنا .. اوووف
رن الموبايل .. اخدو بسرعة ورد
مجد :اي ... اي ...اي ..طيب مشكور .. سلام
وقف وقال لتحسين :قوم قوم
تحسين :شو
مجد :عرفت اسمو وعنوانو يلا خلينا نروح لعندو
تحسين :في لزوم ناخد رجال معنا
مجد :اي بكون احسن
اتطلع مجد بالشيخ وقال :لا تخاف بأذن الله رح ترجع
الشيخ :الله ياخد بيدكن
_____________________________
ضحى كانت بعدها نايمة .. لانها اتأخرت بالسهرة مع يحيى .. صوت عم يرج تحت المخدة
فاقت واتطلعت حواليها مالقت حدا .. سحبتو وردت
ضحى :اهلين بالمزعجة ... شبك من عند هالصبح دق دق .. شو صاير
زينة: بتعرفي مجد وينو هلأ
ضحى :لا وينو
زينة :يعني ماحكي معك لسه
ضحى :لا والله .. اصلا من مبارح ماحكيت معو
زينة :اي راح لعند شيخ عشيرة الورد ابو خالد يطلب منو يجي معو ليخطبك
ضحى انرسمت ابتسامة على وجها بفرح وقالت :بشرفكك
زينة :والله .. وهو هلأ عند الشيخ
ضحى :يا حبيبي يامجودة .. خلص روحي انقلعي انتي هلأ لاتصل فيه وحكيه
زينة: بس ليكي شو رح قلك
ضحى :شو
زينة :لاتقوليلو انو انا خبرتك عملي حالك مامعك خبر
ضحى :ماشي ماشي
......................................
بالمطبخ
العيلة كلها موجودة .. ناصر ويحيى قاعدين ناطرين الفطور يلي عم تجهزو ندى وامها
ام ناصر :ندى روحي فيقي اختك
يحيى :ليش لهلأ مافاقت
ناصر :انشالله مابتفيق
يحيى :دخيلك انت .. سايرها شوف ما احلاها ..ليش عم تعاندوها .. وكمان البنت بتحبو للشب
امو:بلله شووو .. اخر هالعمر مجد يصير صهري .. اي مافشر هو واياها
ناصر :والله الموت اقربلا
يحيى :والله الشب منيح .. وشفتو شو عمل مع ابن عمكن
ناصر :مادخلنا ..المهم مالو فضل علينا ولايحلم انو تصير الو
بكر :البنت معمي على قلبها .. لازم نسايرها متل ماقال يحيى
ناصر :وبدك تزوجن لبعض
بكر :انا ماقلت هيك .. قلت بنسايرها بركي بتقتنع انو مانو من توبنا .. ومابناسبها ..
ام ناصر :والله معك حق يا ابو ناصر .. لازم نسايرها لانو هالبنت تنحى
ناصر :انا قايم فيقها ..
ام ناصر :برضاي الله عليك بالهدوء
ناصر :هههه والله بالهدوء اصلا اناقايم سايرها هههههههه
الكل ضحك معو
مشي لعند الغرفتها .. وقبل ما يفتح سمع صوتها
ضحى :لك رد وينك .. ليش ماعم ترد علي اوووف
فتح الباب بسرعة .. وشافها واقفة وحاطة الموبايل ع ادنها .. جمد الدم بعروقا .. والموبايل وقع من ايدها
ناصر :لمين هاد الموبايل
ضحى :ا .. ا ... ال.. الي
ناصر :موبايلك معي ... عم قلك لمين هاد
ضحى عم ترجف .. ومعد طلع معها الحكي
قرب ومسكها من شعرا .. وقال :لمييين هااد
ضحى صارت تبكي :الي ..
ناصر :مين جبلك اياااه
ضحى عم تبكي
ناصر :هوووي؟؟؟
ضحى هزت راسا
ناصر كان ناوي يطالع كل غضبو .. بس اتذكر اهلو انو لازم نسايرها .. وماعم تعرف شو عم تعمل
تركها ونزل ع الارض اخد الموبايل وقال :حسابك بعدين
وطلع .. هية صدمتها كانت كبيرة كتير .. ماتوقعت تضل بين اديه عايشة ... قعدت على تختا وضمت وجها باديها وصارت تبكي
.............................
وهو رجع لعند اهلو
امو :شو مافيقتا
ناصر :مارضت تفيق ..قال اتركوها مانها جوعانة
يحيى :انا قايم شوفها
ناصر :تركها بعدين بتفيق
يحيى :طيب ماشي
ناصر (بقلبو ): انابفرجيك يا واطي
______________________________
وصلو ع العنوان المطلوب .. وشاف نفس السيارة واقفة عباب بيت ..
مجد لتحسين :خبر رجالك يضلو بعاد مابدنا حدا ينتبه علينا
رفع موبايلو وقربو من ادنو وحكي :خليكن بعاد ..
نزل هو ومراد وتقدمو لعند الباب .. طرقوه ورجعو خطوتين لورا ... البيت كان بحارة عشوائية
انفتح الباب وطلع زلمة قدامن .. ولما شافن ويمكن عرف تحسين ..بسرعة فات واجا بدو يسكر بس مجد وتحسين كانو اسرع منو فتحو الباب ودفشوه لجوا .. وسكرو وراهن
طلعت مرى من جوا ...والظاهر زوجتو للزلمة
:شوفي مين انتو
مجد :فوتي لجوا ومابدي اسمع حسك
ومسك راس الزلمة وخلاه تحت باطو .. ورفع المسدس ع راسو
صرخت مرتو للزلمة ..ركض عليها تحسين وحط ايدو ع تما وبالايد التانية المسدس ع راسا
:تركو مرتي مادخلا
مجد :وين البنت ولااا
:والله مادخلني
مجد :ويناااااا...
:مابعرففف ..
مجد :مين بتحب يموت بالاول انت ولا المدام
مرتو عم تحاول تصرخ بس ايد تحسين كابسة عم تما وماعم يطلع منها غير :اممممممم .. وتبكي
مجد : وييناا
قوس ع الحيط ورجع المسدس عراسو
: رح احكي .. رح احكي
برمو اتجاه الباب
مجد :قداااامي يلااا
وتحسين ترك المرى وطلع .. والمرى صارت تصرخ وتبكي .. طبعا طلعو وراحو والجيران تجمعو عليها .
المهم مابتهمنا لا هية ولاجوزا 😅😅😅
ركبو بالسيارة وركب جنبو بالخلف وتحسين طلع وساق السيارة
مجد :من وين الطريق
:من .. من .. هوون ..
_________________________________
عند بيت مجد
صفت سيارة ناصر ونزل منها
ناصر (بصوت عالي) :مجدددد ... مجدددد.... طلااااع وواجهني ياكلب
تجمعو الشغيلة وطلع مراد ..بوجهو
ناصر :مجددد وينوووو..
مراد :شوفي ..
ناصر :بدي مجد
مراد :مانو هون
ناصر :نفد هالواطي .. بتخبرو انو لاتخلي ناصر يشوفك .. مشان ما اطلع بروحو
مراد : فهمني يارجال شوفي
ناصر : مالي حكي معكن مافي غير الحرب بينا وخبر اخوك هالشي ..
رجع عسيارتو وركبها ومشي بسرعة
طلعت زينة وامها من جوا خايفين
زينة :شوفي
مراد :والله مابعرف .. فوتو ..فوتو .. حتى يجي مجد بنسألو ..
_________________________
وصلو ع مكان مهجور وحواليهن مافي غير الشجر
مجد :ع وين جايبنا ولاااه
اخد نفس وقال :هون .. والله هون بس خلينا اشرحلكن
تحسين :شوبدك تشرحلنا جايبنا على بستان وبتقول هون
: هو مخبأ تحت الارض ..
مجد :وينو
اشر ع شجرة وقال :تحت هديك الشجرة بتلاقيها باب ظاهر
نزلو من السيارة والرجال تجمعو حوليهن ..
مجد دفشو لواحد من الرجال وقلو انتبهلو منيح
تحسين :في داعي تجي الرجال معنا
مجد :لا
مشو لعند الشجرة المطلوبة وبالفعل لقو باب حديد .. رفعوه وكان تحتو درج .. نزلو ع الدرج .. ولقو قدامن سرداب طويل .. مشوا فيه لأخرو ..بس قبل مايوصلو سمعو صوت شباب عم يحكو
مد راسو مجد لقاهن تنين
مجد بهمس :انا الي السمين وانت الضعيف
تحسين :بدك نقتلن
مجد.:لا بس نعطبن
قربو وقوسو عليهن بأجريهن .. طبعا هدوك كانو مصدومين ومالحقو يدافعو عن حالن .. قرب مجد وشلحن اسحلتن .. ووجه سلاحو عليهن
مجد :البنت وينا
:مين انتو ..وشو بدكن
تحسين ضربو ع بطنو خلاه يصيح من الوجع وقال :نحنا اهلا يا كلااااب .. وينا
صوت انوثي طلع بصوت تعبان :تحسسسين
التفتو ع مكان الصوت لقو باب .. ركضو لعند الباب وبرصاصة وحدة فتحوه ودخلو ..
كانت ياسمين مرمية ع الارض وتيابها ممزقة واثار جروح على وجها ومن المناطق المبينة من جسمها وشعرها منكوش .. ورافعة ايدها عم تطلب النجدة
تحسين لما شاف هالمنظر .. مااستحملو عقلو .. وسحب عليها المسدس
مجد فورا راح وقف بوجهو
مجد :مجنون انت
تحسين : بدك اياني رجعها لابي بهاد المنظر
مجد :انت مابتفهم .. انقبر طلااع لبرا
تحسين :مجدد بعد عن وجهي خليني اغسل عاري
ضربو بوكس خلاه يوقع على الارض وسلاحو وقع منو
قرب واخد سلاحو وقال اذا بتقول هيك تاني مرة اقسم بلله الرصاصة رح تكون براسك ما براسها ..
شلح سترتو وراح لعند ياسمين .. وجلسها ولبسها سترتو
ياسمين عم تهمس بكلمات مو مفهومة
مجد :شو عم تقولي
ياسمين :مح.... محدا ...لمسني ..
تقريبا كانت نص غايبة عن الوعي
مجد :سمعت يا كديش .. سمعت يا توور .. عم تقول محدا لمسها .. تعال خود اختك ..
قام تحسين عن الارض وراح ضمها وصار يبكي
تحسين :سامحيني يا اختي .. سامحيني
ياسمين عم تمتم :محدا لمسني .. محد لمسني
حملها وطلعو
_______________________________
المسا
دخل مجد ع البيت وكمل ع غرفتو طلع منشفة .. ومشي اتجاه الحمام
زينة :اخي ايمت جيت
مجد :هلأ
زينة :وين كنت
مجد :مابمحل .. حطيلي عشا بدي خلص حمام واتعشى وناااام
زينة :شو متعبك يا قلبي
مجد :مشاغل هالحياة
زينة :الله يعطيك العافية
مجد :ويعافيكي
زينة : كنت بدي قلك
مجد :شو
زينة :خلص لبعد الحمام
مجد :احكي شوفي
زينة : بعد الحمام
مجد :والله ماني رايق احكي مشان ماضل مشوش
زينة :اجا ناصر اليوم لعنا
مجد :لهون ؟؟
زينة :اي
مجد :شوبدو
زينة :كان عم يهدد ويعيط ويقول بدو يطلع بروحك ولا تفرجيه وجهك لسلامتك ومن هالحكي تبع التهديد
مجد: شغلتو فاضية لاتفكري بالموضوع
زينة :يعني عرفت شوبدو
مجد :لا .. بس مابينخاف منو ...جبان
زينة: وضحى
مجد.:لك ضحى .. ذكرتيني
بعدها من قدامو ورجع عغرفتو طلع الموبايل وشافها متصلة اكتر من المرة بس هالشي من الصبح .. اتصل فيها طلع مغلق
لاحظ بالاشعارات في رسالة
فتحها وكانت من رقم اختها هو كان مسجلو عندو : مجد الموبايل انمسك .. اطمن انابخير
مجد(بعصبية) : مشااكل .. مشاااكل .. ايمت بدو يرتاااح راسي انا اييمت ...
دخلت زينة لعندو وقالت : شبك اخي
مجد: وين مابرووح بلااقي المصايب قدامي .. وحلها يامجد اذا بتقدر تحلها
زينة :روق شوفي هلأ
مجد :حيوانةة.. حمارة .. مابتفهم ..شفقة موبايل ماعرفت تخبيه ... لشو عيشتها هي ..لشووو ...
زينة :طيب روق .. مابدها كل هالعصبية
مجد :انا مليييت ... اقسم بلله ملييت ... بحل مشاكل العالم الا مشكلتي ماعم اقدر حلها ... لييشش... مابعرف ...اوووف ياااه
قام واخد المنشفة وراح ع الحمام وطبش الباب عليه ومن اثر الطبشة .. وقعت كل عبوات الشامبو يلي ع الرف يلي جوا الحمام
بعد شوي طلع من الحمام ودخل ع غرفتو وصار يبدل تيابو
دقت عليه زينة من برا :اخي العشا جاهز
مجد :مابدي اتزهرم شي .. حلو عني
_____________________________________
ببيت ضحى
قاعدين عم يتفرجو ع التلفزيون والوضع هادي ..
ضحى قاعدة حد اختها وراسها بكاسة الشاي يلي بايدها .. وكل ماترفع نظرها تلاقي ناصر عم يزورها
ويحيى ملتهي بموبايلو وباين على وجهو الديق .. يمكن بنعرف السبب ..لانو ياسمين مسكرة موبايلا ومختفيه
_______________________________
ببيت الشيخ
كلن متجمعين حوالي ياسمين يلي نايمة بتختها وعم تعن
خالد : مالازم نجبلها الدكتور
الشيخ :لا .. هية قالت انها مابحاجة وكتبت ع شوية ادوية لحالها وتحسين راح يجيبن هلا حتى يجي بتاخد الدوا وبترتاح
خالد :متأكد انو محدا لمسها
الشيخ بعصبية :هاد يلي هاامك .. اختك عم تنازع وانت وين تفكيرك .. انقلع لبرا
خالد :والله ماقصدي
الشيخ :عم قلك لبرااااا
طلع خالد وهو منزل راسو
امها قاعدة جنبها وعم تمسح ع شعرها وتقرالها قراءن .. خلصت ونفثت عليها .. وحكت :ماما ياسمين عم تسمعيني ... يا روحي انتي منيحة
ياسمين :اممممم ...
دخل تحسين :هي الدوا
امو :هات انا بسقيها
______________________________
تاني يوم
فتحت عيونا ياسمين .. وكانت متحسنة شوي .. لانها شربت دوا .. تجلست مالقت حدا حدها .. صارت تتذكر شو صار معها .. وكأنها كانت بكابوس وصحيت ... صارت تمرق قدام عيونا متل الصور .. كيف خطفوها من باب المشفى .. وكيف يحاولو يتحرشو فيها وكيف تترجاهن انو ما يأذوها .. وكيف يضحكو عليها وعلى خوفها ... وحكين لما قالو لولا مابتخص المعلم كانو تمزمزو فيها ... وكيف لما سمعت صوت تحسين ومجد انردتلا الروح .. وصرخت بكل قوتها ليسمعوها ويجو يأنقذوها ... ولما انفتح الباب واتأكدت انن حقيقة .. بس ماكنت قدرانة توقف او تحكيهن شي .. بعد ما امنت انن صارو موجودين استسلمت لانو معد فيها تقاوم اكتر .. بس بتنصدم بأخوها لما رفع المسدس عليها .. ومجد كيف وقف بوجهو .. وقرب لعندا ولبساها سترتو .. كيف كان بدو يطمنها وبنفس الوقت مابدو يلمسها ... هالمشهد شو تكرر بذاكرتها ..
رفعت الغطا عنها وقامت .. جسمها كان شوي عم يوجعها .. ضمت ايدها على حالها ووقفت قدام المراية .. وعم تسأل حالها ليش صار هيك ..شو الشي يلي وصلها لهون .... حتى مين بكون مابتعرف .. ولابتعرف اذا تقدملا او لأ .. هية شكت بواحد بس مو متأكدة اذا كان هو او لأ .. واحد دخل ع المشفى مع اخوه وصار يحاول يحكي معا وهية تتجاهلو
حكت :واي منيح يلي رفضوه واحد مريض .. بس كيف بيعرفني .. معقول شايفني بالمشفى .. معقول نفسو يلي ببالي
وهية عم تطلع بالمراية .. شافت شي اسود ع الكرسي .. التفتت لتشوف شو هاد .. قربت منو وهية لسه ماعرفت شو هاد .. مدت ايدا وخدتو ..وطلعت سترة مجد .. رجعت تذكرت كيف كان عم يلبسا اياها .. قربت من انفها وشمت ريحتها .. وابتسمت
ياسمين :ومزوق كمان بريحة العطرهههه ... هلأ عرفت ليش بابا مهتم فيك مع انو كل العالم ضددك وبتشهد عليك ... طلع رجال ولا كل الرجال .. الله يحميك لشبابك يامجد .. والله ينولك مرادك
رمت السترة ع التخت وطلعت
لقت اهلها قاعدين بالصالون عم يفطرو
امها :اهلين ياروحي .. انتي فقتي .. تعي فطري معنا
ياسمين :صباح الخير
الكل :صباح النور
الشيخ :تعي بابا .. تعي قعدي حدي
__________________________________
ببيت مجد
طالع ع الدرج السطح وحامل بأيدو قفص فيه عصفورين .. علقهن بمكان بالشمس وقعد ع سور السطح وسرح .. كان ضايع كتير .. حالتو بتدل على هالشي
نطق وحكي :ضايع بهل الدنيا ومن مجاريها.... جيت معها قلت اجاريها ... أجتني بتيار معاكس تبيني اعاديها ..وانا والله اريد الصلح والسلام ... لكن هالدنيا غدارة وتتعبنا بمساريها ... اطلب الراحة من ربي ولا من غيره اريديها .. لان الطلب من غير ربي مزلة وانا المزلة ما ابيها
صفن وحكي بقلبو :انا هلأ عبيت تحسين معد الي عين روح .. اكيد بكون هو خجلان مني وانا مابدي حسسو بالخجل .. يلي صار معن مانو قليل .. الله يكون بعونن على هالمصيبة .. بس منيح انو البنت محدا لمسها .. بس الحق عليهن شوبدنا بالحكي .. يعني حدا عندو بنت بهيك جمال والله بخبيها ومابخلي حدا يشوفها .. بس بأذن الله انا هالموضوع رح انساه ومافكر فيه .. هالعيلة بتعزني كتير ... وبالنسبة لمجنونتي .. شو بدي اعمل .. ياربي اوووف .. كنو في احيون من هالبنت ..يعني موبايل معك بالسر خبيه منيح ... والشيخ اذا بدي روح اطلب منو يجي معي لعند اهلها بفكر انو انا بدي مقابل يلي عملتو معن ... لك يضرب حظي .. العما ولووو بنجيها يمين بتجي شمال .. وهلأ شوبدي اعمل .. احسن الشي انزل وشوف هالعمال
_______________________________
عند الشيخ
الشيخ : تحسين وينو مجد ماشفتو اليوم؟؟
تحسين :لا .. ولاحتى حكي معي بالعادة بيحكي
الشيخ :شو اصيل هالشب .. عم يحاول يبعد مشان مايحرجنا
تحسين :اي والله .. لولاه ماكنا قدرنا نوصل لياسمين
ياسمين :يعني مجد هو يلي لقاني
تحسين :اي يعني لولا الله ثم هو لهلأ ماكنا بنعرف عنك شي ... هالشب حربوق مابيمرق عليه شي ..
الشيخ :هاد هالولد داهية
تحسين :اي والله جبتها
امو :طيب مالازم نشكرو
الشيخ :ياريت قدملو شي وكافيه عن الشي يلي عملو معنا
تحسين :بصراحة في شي ممكن تقدمو
الشيخ : شو هو
تحسين : تروح لعند اهل البنت يلي بحبها وتخطبلو اياها
سكت الشيخ وماحكي ... وكأنو ماعجبو هالشي
الشيخ :اذا هالشي بيسعدو رح روح
ياسمين بقلبا :ان شاء الله تمشي امورو لمجد .. لانو اذا مشي الحال اكيد ابي رح يوافق على يحيى
فيقها من شرودها صوت ابوها وهو عم يحكيها
الشيخ : ياسمين بتتصلي بالمشفى بتقدمي استقالتك .. شغل الك مافي بعد اليوم ..
ياسمين مافعلت تجادل ابوها لانو بتعرف انو كلامو مابيتكرر ولابيتغير..... بس ماقررت تقدم الاستقالة فورا .. بركي بصير شي بعدل مجرى حياتها: حاضر ... هلأ بتصل فيهن
_____________________________
بالمشفى
ماشي يحيى بمريولو الابيض لعند الرسبشن .. وقف وحكا الممرضة
يحيى :الدكتورة ياسمين ما اجت اليوم
الممرضة :لا
يحيى :طيب ماحكت
الممرضة :مبلى حكت وقال بدا تاخد اجازة طويلة ..
يحيى :ليش .. ماعرفتي السبب
الممرضة :لا .. انا اصلا بعدها حولت المكالمة لمدير المشفى .. والمدير حكاها وقال رح يعطيها اجازة لمدة شهر .. وبعد الشهر رح تنفصل اذا ما اجت
_______________________________
بمزرعة مجد
قاعد مجد تحت شجرة .. وجنبو حمود وعن يشربو شاي
مجد :حمود بشرفك خراس
حمود : طيب اخر سؤال
مجد :اخر سؤال ها
حمود :ماشي .. شو صار معك بالاحصنة
مجد :ماصار شي ويمكن ماجيب شي .. مابدي اعمل شي .. كرهان هالدنيا كلها
حمود :يعني جيب كديش
مجد : مابعرف
حمود :شبك معلم .. قلي شو زاعجك
مجد :مافي شي ..
حمود :طيب ليش مابتعرف .. يعني بأثر شي اذا جبتو
مجد :عم فكر بيع المزرعة
حمود :عنجد
مجد :والله .. بدي بيعها واخد اهلي واطفش
حمود :بشرفك لاتحكي هيك
مجد : لك شوبدك تضل عم تعمل بين عالم لابتحبك ولابتطيقك وبسبوك بوجهك وبقفاك .. محدا بفوت لعنا ولا بنروح لعند حدا .. تقول قاتلن ابوهن يا زلمة
حمود :لانو مابيعرفوك صدقني
مجد :الناس مابتنسى ... لهلأ بيحكمو علي من خلال تصرفاتي لما كان عمري عشر سنين .. ولسه بحملوني ذنب ابي .. صح ابي كان .. مابدي احكي .. بس ماكان يقرب صوبن .. بس هيك بس يكرهو واحد كرهوه .. البني ادم ظالم يا حمود
حمود :اي والله نحنا ظالمين ع بعض .. وبس يغلط الواحد كلن بوقفولو عندها ... بس بترجاك لاتروح خليك شوكة بحلقن ... ولا تنسى الك قلب عم ينبض بهل الضيعة ..حتى لو رحت روحك رح تضل هون .. الا اذا نويت تروح وهية معك
مجد :هه هالقلب يا حمود نبضاتو بلشت تخف
حمود :انت عم تقول هيك لانك زعلان ومقهور
مجد :لا عم حكيك الجد .. هالقلب بلش يمل .. سمعت حدا مل من الحب .. بظن ما سمعت .. بس انا ليكني قدامك مليت من الحب .. بدي بعّد .. بدي ريحو لقلبي .. بدي خليه عايش هيك عصفور طيار .. ويلعني اذا بدي علقو بحدا تاني مرة
حمود :روق معلم والله ما وصلت لهل الدرجة تفائل يا رجل
مجد :ههه طيب مشانك هالمرة
حمود :اي هاه دخيل هالضحكة
اجا مراد منن وقعد حدن
مراد : العوافي
مجد وحمود :اهلين .. الله يعافيك
مراد :في شاي
حمود :في بس مافي كاسات تشرب بكاستي
مراد :مابتفرق .. صبلي
رفع كاسة الشاي وشرب يلي بقلبها .. وقام ع ساقية المي السارحة غسلها بالمي الصافية .. ورجع صبلو شاي
مراد :يسلمن حمود
حمود :صحة
مراد لمجد :اي شو عم تعمل هون .. برمت عليك لحتى لقيتك هون
مجد :قاعد بهل الجنة .. هون الوحد بيرتاح نفسيا
مراد :اي والله .. هالقعدة من العمر
مجد :شوبدك مني ليش عم تبرم علي
مراد :هلأ الدقاقة بدك تضل موقفا هيك
(الدقاقة: آلة كبيرة حديثة لحفر الآبار الأرتوازية)
مجد :ليش شوبدك فيها
مراد :نرجع نشغلها
مجد :بدك تشتغل عليها خدها واشتغل عليها .. بس انا مالي نفس
مراد :ماشي انا بشتغل عليها وباخد كم رجال نشتغل عليها احسن مانها واقفة .. اصلا هي حرام تضل واقفة هيك
مجد :وليش خطرت عبالك هلأ
مراد :ابو حمد طلب مني نحفرلو بير
مجد : ابو احمد يلي بضيعتنا ؟
مراد :اي
مجد :ومن ايمت اهل ضيعتنا الجربانين بيحفرو .. طول عمرن عم يسقو ع مية السرح
(مية السرح : جدول بمر بالضيع والعالم بتسقي منو بس هاد الجدول الدولة بتتحكم فيه طبعا مجانا العالم بتسقي ... والفلاحين وصاحبين الاراضي عاملين دور وكل يوم بيعطوه لعدة اشخاص يسقو اراضيهن )
مراد :ليش ماخبرت شو عم يصير
مجد :لا
مراد : اهل ضيعة الحريقة عم ياخدو المي عطول وماعم يعطو لضيعتنا .. وبتعرف انت اهل ضيعة الحريقة مشرانية ومحدا بيسترجي يمنعن .. وشايفلك كل اهل الضيعة بدا تحفر
مجد : ونحنا مارح نحف لحدا
مراد :ليش .. هلأ قلتلي خدها
مجد :وغيرت رأيي .. لانو مابيستاهلو .. بيسقو ولا عمرن مايسقو ما مشكلتي
مراد :لك شو خسران .. مزال رح ناخد اجارنا
مجد :لا بأجرانا ولا بغير اجارنا .. مارح نحفر لحدا .. اول ماجبت الدقاقة صرنا نقولن حفرو .. مية السرح مانها دايمة محدا يرد ... وانا هلأ مارح احفر لحدا
مراد :اي بيجيبو دقاقة تانية
مجد :يجيبو .. المهم انا دقاقتي مابتحفر بأرض حدا منهن
مراد :طيب خلينا نبيعها
مجد :بشو مدايقتك
مراد :بولا شي
مجد :اي لكن ماني بايعها
مراد :طيب شو قلو لابو احمد
مجد: قلو مجد مابدو يحفر لحدا
مراد :الله يصبرنا عليك وعلى عقلك
مجد.:اي الله يصبرك وقوم من خلقتي ماني طايق حدا
وقف مراد وكان رح يمشي بس اتذكر شي
مراد :اي صحي تحسين مانو شريكك بالدقاقة .. بركي هو بدو يشغلا
مجد :روح انقبر من خلقتي لا انت ولا تحسين الو عندي شي ..
مراد :هههه اعصابك ابو الفضل ..
وقف مجد ومعو حجرة .. ومراد هرب .. صوبها عليه ليضربو .. بس مراد صار بعيد .. ضحك مجد .. ورما الحجرة بالساقية ومشي
________________________________
وقف بمتورو عجنب بساحة الضيعة .. نزل وصار يتأمل هالعالم .. حاسس حالو صرلو زمان بعيد عن ضيعتو ... مع انو ماطلع منها بس حس حالو كان بعيد .. التهى بشغلو وبعد عن اهل ضيعتو .. وبالنهاية شغلو طعنوا واتطر يرجع لضيعتو .. مشي لعند الحلاق
وفات
منهل :كيفك عمي ابو سامر
ابو سامر :اهلا .. اهلا منهل نور المحل
منهل :منور بصحابو .. شو فاضي تحلقلي
ابو سامر :احلقلك لأ .. بس احلقلك راسك اي فاضي
منهل :ههههههه
قعد على كرسي الحلاقة .. وابو سامر لف عرقبتو الملاية
منهل صار يتطلع حوليه بتعجب
منهل :معقول انا صرلي زمان مافتت لعندك
ابو سامر :لا من فترة بتذكر انك جيت
منهل :حاسس في شي متغير .. بالمحل
ابو سامر : هههه مارح قلك اكتشف لحالك
منهل :لك الكرسي .. اي صح الكرسي كان مايل غيرتو ؟
ابو سامر :مابس الكرسي ... المحل كلو تغير
منهل :ههه وكيف سخيت .. لك هالكرسي اكل من جنابنا .. كيف اجا من قلبك تغيرو ههههه
ابو سامر :هلأ جاي تتمسخر علينا
منهل :ههههههههه .. والله مو مسخرة بس مو مصدق انك مغير ديكور المحل ..
ابو سامر :لك مو انا يلي غيرتو
منهل :لكن مين .. ولادك ؟؟
ابو سامر بلش يبخبخ مي على راسو وقال :شو ولادي يازلمة .. هاد مجد
منهل عم يتطلع عليه من خلال المراية وقال :مجد مجد ؟؟
ابو سامر :اي ماخبرت بالمشكلة يلي عملها هون
منهل :لك كأنو سمعت هيك شي بس ما اخدت وعطيت بالموضوع .. حكيلي لشوف
ابو سامر : القصة هية ....
______________________________
ببيت ضحى
رايحة جاي بالبيت محتارة .. ومتأكدة انو مجد مقهور منها ومابدو يحكيها... بس لازم تحكي معو .. اشتاقتلو ... وبدا تعرف اخبارو
راحت ع غرفتها لقت موبايل اختها ع التسريحة .. اخدتو وحاولت تتصل فيه بس هو ماكان يرد
ضحى :تضرب انت وهالراس الترس .. مليت كل مرة بيزعل متل الولاد وبدي اقعد اترضى خواطرو
طلعت تشوف امها وين ..لقتها عم تطبخ .. راحت عغرفتها لقت موبايلا سرقتو وراحت عغرفتها .. واتصلت على مجد .. وما اول رنة رد
مجد :الو .. مين
ضحى :عرقم غريب فورا بترد
مجد :لانو ماني طايق احكي معك
ضحى :انت شو بصير معك فجأة بتصير لئيم
مجد : لأ هل المرة غير ...
ضحى :كيف غير
مجد.:وصلت لمرحلة قرفتك وقرفت عيلتك وقرفت الحب .. لك قرفت من حالي
ضحى :لهل الدرجة
مجد :واكتر .. ضحى في شي لازم تفهميه نحنا مو لبعض
حست غصة علقت بنص صدرا معد عرفت تطالعا ولا تبلعا .. هي تاني مرة بأكد عليها الانفصال .. يمكن مل منها متل ماحكي ومعد يحبها
ضحى :وشوبدك هلأ
مجد :كل واحد بطريق
ضحى :طيب متل مابدك مارح اجبرك تضل معي .. بس في شي لازم تفهمو انو انا بحبك كتير .. سلااام
وسكرت الخط ..
رمت حالها ع التخت وضمت مخدتها وصارت تبكي وتشهق ... حست انو محدا بدو اياها كلن صارو يبكرهوها ... وهية ماطالع بأيدا شي .. كلن عليها .. كلن بحملوها الذنب الها ..
ضحى :لك شو طالع بأيدي اعمل .. شووو ... بكرهكن كلكن
انفتح الباب وكانت امها .. وعم تحكي قبل ماتفتح
ام ناصر :ضحى وين موبايلي
تفاجئت فيها عم تبكي
قربت لعندها وقعدت جنبها :شبك يا امي ليش عم تبكي
ضحى :حلوو عني مابدي حدا .. تركوني .. كلكن بتكرهوني .. كلكن مابتطيقوني ... ليكي هاد موبايلك
امي :قوليلي شو صاير معك
ضحى :اذا قلتلك رح تسمعيني متل حيلا ام ولا رح توقفي بوجهي وتبهدلني هي اذا ماضربتيني ... خدي موبايلك ما اكلتو
____________________________
مجد كان قاعد ع الصوفاية يلي موجودة على المسطبة .. وعم يبرم الموبايل بين اصابيعو .. ومبين عليه الديق ... معقول هي تكون النهاية .. ليش هيك عم يصير... هديك المرة قلها بدنا نترك وهية وقفت وبوجهو ومنعتو وكان كتير مبسوط من تصرفا ... هل المرة قالتلو متل مابدك ... خيبت ظنونو ... بس ياريت يفهم انو هية كمان تعبت .... بس هو هلأ رما الحمل كلو عليها
مجد.: لو بتحبني عنجد لازم تدعم هالحب .. انا تعبت وانا اسندو من جهة وحدة وهية مافي منها اي مبادرة .. كلشي علي كلشي انا ... لازم تترك الدنيا وتجي معي لو بتحبني عنجد ... هاد يلي بفهمو ... زواج متل الخلق والبشر مارح يصرلنا يا اما بتجي معي خطيفة يا اما مارح نكون لبعض.. رح اتركها تفكر وهية لحالها بتقرر

يتبع .......