أحببت أزعر بقلم مريم اليوسف

الجزء الثاني

#أحببت_ازعر
#الجزء_التاني

#بقلم_مريم_اليوسف

انفتح الباب ودخلت ضحى مع اهلها .. وكانت ندى ساندتها ..
ناصر :موبايلك وين
ضحى همست بادن ندى
ناصر :عم اسالك وين مووبايلك
ندى :بالغرفة جوا
ناصر : وماتنقبر هية تحكي .. ولا القط اكل لسانا
تركتن وكملت ع غرفتها .. بس سبقها ناصر .. دخل ع الغرفة وصار يدور بعيونو على الموبايل ..
قربت وقعدت ع تختها ورمتلو اياه .. كان التخت بس ما انتبهلو .. اخدو وطلع .. وهية رفعت ايدها وفكت الحجاب عن راسها ورمتو ع جنب .. وتمددت ع التخت وهية حزينة ..
دخلت ندى لعندا وسكرت الباب وراها... وقعدت ع تختها وبلشت تفك حجابها وتتطلع على ضحى
ندى :انتي منيحة
ضحى :شوبدي احسن من هيك
ندى :بس كان بدك اياها لتفيقي على حالك
ضحى :ومين قلك فقت .. انا بحبو لمجد وغيرو مارح حب حتى لو كان ارزل خلق الله
ندى :مابعرف شو قلك .. بس الله يهديكي احسن الشي
_______________________
بالمشفى
قاعدة ياسمين وعم تلعب بموبايلها .. اندق الباب
ياسمين :ادخل
انفتح الباب ودخل اخوها تحسين ومعو مجد .. طبعا هية مابتعرفو لمجد
ياسمين :اخي ؟ اهلا وسهلا
دخلو ومجد كان عم يتفحصا .. بعيونو
مجد :مرحبا
ياسمين :اهلا ..
اتطلعت عليه بتمعن بس سرعان مانقلت نظرها على اخوها وقال : انشالله خير ؟
تحسين :خير .. خير .. جيناكي بخدمة وبطلب من ابوكي
ياسمين :ابي ؟؟خير شوفي .. تفضلو ارتاحو
تحسين :مو جايين نقعد ... بعرفك رفيقي مجد
ياسمين :اهلين ..
مجد هز براسو مع ابتسامة صغيرةبدون مايحكي
تحسين : اختو للدكتور يحيى بتكون حبيبتو وبدو يتطمن عنها
اتطلعت فيه بصدمة وقالت واشرت عليه وقالت : انت 👉؟
مجد :اي .. عندك مانع
صفنت شوي وقالت بقلبا : يحيى قلي انو واحد ازعر وفلتان وبلا اخلاق وحرامي .. وهلأ ابي باعتو ليشوفا .. ياترى مين هاد .. وليش ابي عم يساعدو
تحسين :شو اختي الشغلة بدها صفنة يعني
ياسمين :اااه .. لا مووهيك بس البنت طلعت
مجد :ع وين طلعت
ياسمين :ع بيتا
مجد :طيب هية كيفها
ياسمين :منيحة اطمن ..
مجد :مزال مافيها شي ليش ليجيبوها ع المشفى
ياسمين :كانت غايبة عن الوعي مو اكتر .. هلا صح في شوية كدمات بجسما وبوجها بس مافي شي خطير اطمن ..وايدها شوي ملتوية ..
مجد : طمنتيني الله يطمن قلبك
ياسمين :والو هاد واجبنا .. تفضلو ارتاحو خلينا نضيفكن
مجد :لا شكرا .. انا بدي روح
تحسين :وانا جاي معك
مجد :شكرا مرة تانية
ياسمين :اهلا سهلا
طلعو وياسمين عم تتطلع عالباب باستغراب : لهل الدرجة بحبو بعض ؟
_______________________
اخر الليل
ندى نايمة وعم تشخر .. قامت ضحى شوي شوي .. وسحبتلا موبايلا من تحت المخدة .. وبسرعة رجعت ع مكانها .. فتحت ع الرسائل كتبت رسالة لمجد : حبيبي اهلي عرفو بكلشي .. وبهدلوني شوي بس لاتخاف علي انا منيحة .. موبايلي صادروه .. يعني لا تراسلني عليه .. انا وقت بصحلي بتصل فيك وبطمن عنك .. هلا قلي كيفك ياعمري .. بس ماتكون مقهور وزعلان
كتبت رقمو وعملت ارسال
________________________
ع اول الضيعة
كان قاعد بسيارتو على الطريق متل الزعران .. معو قنينة وسكي وعم يشرب .. وصلتو الرسالة .. فتحها وقراها ورما التلفون ع جنب .. مرق من جنبو تنين زلم .. شافوه كيف قاعد بسيارتو وعم يشرب .. الشباك كان مفتوح يعني شافوه بوضوح
: لاحول ولاقوة الا بلله العلي العظيم ..
: امشي شوبدك فيه .. هلأ بيأذينا .. بكون سكران
:والله هالضيعة ماناقصها هيك شكيلات
مجد :بدكن تنقبرو من هون ولا انزل طلع كل جناني عليكن
:احترم حالك نحنا قد ابوك
مجد :تضربو منكن لالو .. يلاا انقلعوو من هون .. لسه لاحقين سماي لهون .. شو الكن عند **** اااه .. هي الضيعة كلا عايفا وقاعد هون كافي الناس خيري شري .. بتلحقوني لهون بتطالعو جناني وبتقول عم يأذينا
: امشي .. امشي .. قلتلك هلأ بيأذينا
مجد :اي بأذي اذا ما انقلعتو من وجهي .. العما ولووو
تركوه ومشو
: والله لاشتكي عليه
:يا ابو محمود شوبدك فيه تركو
ابو محمود :والله ماني تاركو ياعمي هاد الزلمة عم يأذي اهل الضيعة يجو ويخلصونا منو .. العماا ولوو لايمت بدنا نضل عم نتحملو
: انا عندي رأي افضل
ابو محمود :شو هو
: نجتمع نحنا واهل الضيعة ونوقع ع ورقة انو بدنا هالمخلوق ينقلع برات هي الضيعة وبنقدمها للمخفر .. للبلدية للمحافظة ..اي حدا .. بركي بخلصونا منو
ابو محمود : اي والله جبتها .. امشي لقلك من بكرا بدي بلش بهل القصة .. انابفرجيك يا حرامي الجاج
___________________
ضحى ضلت ناطرة كتير على امل يرد عليها .. مارد
... حاولت تتصل كمان مارد .. سكرت التلفون ورجعتو لعند اختها طبعا بعد مامسحت الرسالة والسجل .. وارتمت ع تختها حزينة عم تفكر بحبيبها
________________________
بعد كم يوم
الصبح بكير .. طلعت ضحى من غرفتها وعم تدور بعيونا على اهلها ..راحت ع الغرفة المعتادين يقعدو فيها مافي حدا.. قربت من الباب سمعت صوتن برا .. اخدت الحجاب يلي معلق عند الباب حطتو ع راسها وفتحت الباب وطلعت .. لقتن قاعدين بفية العريشة عم يشربو قهوة ..
حكت بدون ما تصبح :اليوم عندي امتحان مهم
ناصر :العالم بتقول صباح الخير
ضحى :بدكن تخلوني روح ولا ارجع ع غرفتي
اتطلعو ببعض ومحدا حكي
بكر :فوتي البسي واخوكي بوصلك بتعملي الامتحان وبترجعي معو مفهوم
ضحى:😒😒 ماشي
_____________________
ببيت مجد ..
قاعد برا لحالو عم يشرب قهوة.. طلعت زينة من جوا وهية جاهزة للخروج
زينة :انا جاهزة
مجد :خلي مراد يوصلك
زينة :بس متعودة روح معك .. ليش بطلت توصلني
مجد : عندي شغل
زينة : ولا ماكنت تروح مشاني
مجد :مرررااااد
اجا مراد من جوا عم يلبس جاكيتو
مراد :شوفي
مجد :وصل زينة
مراد : بدي جيب علف للداوب
مجد :وصلا وبترجع بتجيبن
مراد :جيبن بطريقي من المدينة
مجد :لا جيبن من الضيعة
مراد : والله ماعم طيق جيب شي من هالضيعة كلن بعالموني بحقارة
مجد :يلي بيتحاقر معك بس قلي اسمو ..
مراد :هلأ هيك بتحل الامور
مجد :اي هيك بدي حلها .. وروح هلأ وصل زينة رح تتأخر
مراد :هات مفتاح البيكب مشان جيب فيه العلف بالرجعة
رمالو المفتاح واخد اختو وراحو
طلعت نجوى من جوا وقالت : مابدك تفطر .. الفطور بالارض
مجد :لا مالي نفس
حط فنجان يلي بأيدو على حرف سور المسطبة يلي هو من حجر .. وقام راح ليعمل طلة على الحيوانات يلي عندو .. اول مادخل المنطقة الخصصة للحيوانات .. اجا لبين رجليه كلب بني .. انبطح قدامو وصار يلعب بديلو
مجد :هههه بوبي ..كبران يا ازعر
نزل لعندو وصار يصفرلو تصفير خفيف .. والكلب صار يتمردغ قدامو .. وبدو مجد يلعبو
مجد :قوم تعا معي
وقف على حيلو والكلب وقف ولحقو ..
فات ع حظيرة البقرات .. كان في زلمة ومرتو شايلين سطول فيها حليب وطالعين من جوا
مجد :يعطكن العافية
:الله يعافيك
مجد.: شو كيف الوضع
:تمام كلو بخير
مجد :تمام
لف ضهرو وطلع من الحظيرة .. ومشي لورا الحظيرة .. بكون في الارض .. يلي بيزرعو فيها ... الجاج سارح بهل الارض ... ومن الجهة التانية في شب قاعد ع على صخرة وقدامو طرش غنم ..
مجد رفعلو بايدو وهداك رد عليه التحية من مكانو .. في طريق تراب مشي فيه مسافة منيحة ليطلع على قسم تاني من الارض .. كان في حقلة بندورة والعمال ماشيين فيها وعم يحوشو بندورة ويحطوها بصناديق من الفلين .. والحقلة المجاورة في زلمة راكب على تركتور (جرار) وعم يفلح الارض .. وصل التركتور لعندو ووقف ... وحكي يلي عم يسوقو
: يسعد صباحك
مجد :وصباحك .. شو كيف الوضع
:منيح .. شو رأيك بفلاحة الارض ؟
مجد :مابعرف بصراحة .. انت ادرى .
بنطة وحدة كان نازل عن التركتور ووقف جنب مجد
: تعا معي
قربو شوي لقدام .. لحتى الخطوط يلي انفلحت بالارض صارت مقابيلن بشكل عامودي
: بتطلع هيك .. اذا الخطو ع السوا ومافيها انحراف بتكون الفلاحة مظبوطة
مجد :خلص ياعمي مزال انت المعلم .. اتصرف متل مابدك
: بس قلي شو ناوي تزرعها
مجد :انت شو رأيك
: انا بقول نزرعها فول .. الفول بقوي الارض .. والارض تعبانة .. وبعد الفول بنزرع شي محصول وشوف الرزق كيف رح يكون
حط مجد ايدو عكتفو وقال :الارض ارضك واشتغل يلي بدك اياه
: عم اخد رايك وحطك بالصورة .. بركي لاسمح الله زرعنا شي شلغة وماكان الها سعر بالسوق وخسرت .. مشان ماتحط الحق علي
مجد :شو الدنيا بس فيها ربح .. الدنيا فيها ربح وخسارة .. واذا خسرت فداك .. تصرف يلي بدك اياه
: عراسي والله
مجد :يلا يعطيك العافية
:الله يعافيك
______________________
عباب الكلية
وقف ناصر بسيارتو .. كان لابس طقم رسمي بس بدون كرافة وعلى عيونو نضارات كان انيق كتير .. طبعا بدو يكون هيك لانو مهندس كبير بالدولة .. نسينا نقلكن انو هو مهندس مدني ...وجنبو ضحى لابسة بنطلون جنز وبفوقة قميص ابيض وفوق القميص جاكيت طويل شوي مفتوح .. ولابسة حجاب من لون التياب .. ولابسة نضارة لتخفي مكان الضربة يلي جنب عينا .. حملت جزدانا لتنزل .. بس بيمسكا ناصر
بيشلح النضارات ووبيطلع عليها وبقول :هاتي هويتك
ضحى :هه خايف لاهرب
ناصر :هاتي هويتك بلا علاك
فتحت الجزدان وطلعت الهوية وحطتا ع التابلو
ناصر :بعد ساعة بتكوني مزورعة هون
نزلت بدون ماترد عليه
.. واول مانزلت بتلاقي سيارة مجد وقفت قداما .. بتفرح كتير .. بتطلع ع الشوفير بكون مراد اخوه .. بتنرسم ع وجها تعابير خبية الامل وبتفوت لجوا .. وزينة بتنزل وبتلحقا ..
ناصر زورو لمراد ودور السيارة ومشي
_________________________
مجد لساتو عم يتمشى بالمرزعة
رن تلفونو
مجد :اي مراد
مراد :وصلت زينة وراجع .. بس رح مر جيب فول صويا مافي بالضيعة
مجد :اي
مراد :حبك اجت اليوم عالجامعة
مجد: مين جابها
مراد :اخوها ناصر
مجد : طيب لاتطول
مراد :وينك انت
مجد :عم اتمشى بالمزرعة .. ليش
مراد :بشرفك اذا شفت حمود عملو فركة ادن
مجد :ليكو قدامي عم يسقي شبو
مراد :لك نص مسكبة الدرة دبلانة .. ماعم يسقي منيح
مجد :ماشي هلأ بحكيه
مراد : سلم
سكر مجد وكمل مشيو لعند شب معو رفش ولابس جزمة ساق طويل .. والمي ماشية قدامو بجدول صغير
واول ماشافو حمود لمجد اجا بسرعة وقرب منو
:لك اهلين بالمعلم .. والله .. هلا والله .. حيالله
مجد :ولا بلا زناختك ..
:لك بتمون يامعلم
مجد :حمود مراد قلي رصك شوي .. قال مانك عم تسقي منيح
حمود :والله عم اسقي منيح .. بس مراد مابيعرف بالسقاية
مجد :طيب مامشكلة .. بس انتبه اكتر لشغلك
حمود :من عيوني
مجد : ااخ منك شو ملوفك ومسييح جوخ
حمود :بتمون والله .. ليك معلم بدي اطلب منك طلب
مجد :خير اللهم اجعلو خير
حمود : بدي اشتري كديش
مجد : انا بقول لأ
حمود :ليش
مجد : لانو كديش يربي كديش مو ظابطة 😂😂
حمود : مقبولة منك معلم
مجد :هههه عم نمزح ولو .. اي شتري شو اعملك .. ولا بدك مصاري
حمود :لا لا فضلك سابق .. بس بدي جيبو وحطو بالمزرعة هون اذا مابتمانع
صفن مجد شوي وقال :وين مافي مكان
حمود :بعمرلو تخشيبة صغيرة .. شو قلت
مجد :هلأ انت لأشلك بالكديش
حمود : ومن انا وصغير حابب ربي حصان
مجد :وشو جاب الكديش للحصان
حمود :ليش انا قدرتي جيب حصان .. قلت بجيب كديش وبتسلى فيه
مجد : بتعرف شو .. خطرت ببالي فكرة
حمود:فكرة شو
مجد : اشتري كم حصان وعمرلن اسطبل شو رأيك
حمود : والله فكرة بتجنن .. والحصان افصل صديق للأنسان ..
مجد :وبخليك انت تهتم فيهم
حمود: بشرفك 🤩
مجد : هههه اي وبتنقي حصان بتعتبرو الك
حمود :عم تمزح
مجد اتطلع فيه بطرف عينو وقال :ليش في بيني وبينك مزح
حمود :يسعدك الله ..
مجد :هههه بس بالاول اهتملي بالسقاية وبنحكي بموضوع الاحصنة
حمود :من عيووني
تركو مجد ومشي
_______________________
ببيت اهلها لضحى
طالع بكر من غرفتو متطقم .. ووصل لعند الباب فتح خزانة الاحذية وطلع صباطو وانحنى يلبسو .. اندق الباب .. رفع ضهرو وفتحو
كان المختار
بكر :اهلا اهلا بالمختار تفضل
المختار :لا لا مابدي عطلك بعرفك رايح ع المدرسة ..
بس جيت مشان توقعلي على هالورقة
(بكر بكون مدير مدرسة)
بكر :خير ورقة شو
عطاه اياها المختار وحكي : اجى لعندي ابو محمود وابو جواد واقترحو علي انو نعمل عريضة ونقدمها للمخفر او للبلدية اي حدا فوق .. مشان نطالع مجد واهلو من الضيعة .. لانو واحد ازعر وعم يأذي اهل الضيعة
بكر :والله فكرة حلوة .. ليش ماخطرتلنا من زمان
المختار :يعني بدك توقع
بكر :اكيد .. ما انا اكتر واحد متضرر من هالواطي
طلع قلم من جيبتو وسند الورقة على الحيط كتب اسمو ووقع تحتو .. وعطاها للمختار
بكر :تفضل لنشرب فنجان قهوة .. انا لسه معي وقت
المختار :لا لا غير مرة .. في لسه كم بيت بالضيعة بدي مر عليها لشوف اذا بوقعو وبعدا بدي اختما واطلع قدمها للمخفر خليه يرفعا لفوق
بكر :جزاك الله كل خير
راح المختار وبكر طلع وركب سيارتو وانطلق ع شغلو
____________________
بالجامعة
ضحى وزينة قاعدين جنب بعض على مقعد بالحديقة
ضحى :وهيك كذبت عليهن وقلتلن عندي امتحان .. جابني ناصر وقال بعد ساعة راجع ياخدني
زينة : والله مابتستاهلي كلشي عم يصير معك
ضحى :شيلك مني .. قوليل مجد كيفو
زينة : منيح
ضحى :عم راسلو مايرد علي .. ليش .. خبرك اذا زعلان مني
زينة : لا ماحكي شي
ضحى :طيب عطيني تلفونك اتصل فيه مشان الله
زينة : بدون ماتجوهي الله الموبايل عحسابك ..خدي ياقلبي
اخدت الموبايل من زينة واتصلت فيه
.....................
كان عم يركب سيارة اخوه يلي بالمزرعة .. لما رن تلفونو .. لما شاف رقم اختو فجاة حسو قلبو علت دقاتو وكأنوحس انو هية .. بس مانو متاكد فتح الخط وقال: الو
ضحى :مجد حبيبي
مجد : ......
ضحى :عم اتصل وابعتلك رسائل من موبايل اختي ليش ماعم ترد علي
مجد : كيفك
ضحى :انا مشتاقتلك كتير .. بترجاك تعال بدي شوفك .. قلبي ناطف ليشوفك
مجد :ربع ساعة وبكون عباب الكلية
ضحى :ناطرك بفارغ الصبر
مجد :بدك شي
ضحى : سلامتك
سكر الخط .. وسحب باب السيارة ودورها ومشي
____________________
عباب الكلية
بمكان محايد شوي وبعيد عن الانظار
واقف بالسيارة فجأة انفتح الباب وركبت جنبو ضحى
اتطلع عليها بدون اي ردة فعل .. اتطلعت فيه وبعيونو وقالت :اشتقتلك
نزل راسو ومارد
ضحى :ليش عم تتجاهلني وتتجاهل رسائلي
مجد : .....
ضحى :مجد ليش ساكت .. احكي اي شي .. ليش هيك عم تعاملني ...
مجد : .....
ضحى :بعرف مقهور من اهلي بسبب اخر مرة .. بس والله انا مادخلني .. وكمان قلتلك لاتجي .. انت تنحت وجيت .. وكمان ليك شو صار فيني .. اكلت قتلة غير شكل .... وحتى ماتنازلت تتطمن عني
مجد: اطمنت
ضحى :ايمت ؟
مجد :رحت ع المشفى وسألت عنك
ضحى : بس انا بدي تحسسني الي بالاهتمام مو تسأل علي العالم .. لك احكي ليش ساكت
مجد :ضحى .. الحصول عليكي صار من المستحيلات
ضحى :شو بفهم من كلامك
مجد :كل واحد من طريق
ضحى حست انكب عليها مي مسقعة : مجد عم تحكي جد .. مجد انا بحبك .. هيك بدك تتركني وتمشي ..
نزل راسو وماحكي
ضحى :لاتحلم انك تتركني عم تفهم .. مارح خليك عم تسمع مجد مارح خليكك .. انا بحبك وبموت فيك .. مارح خليك تتركني بهل السهولة ... لك وين مجد يلي كان يقلي مابتركك عجثتي .. وين رااح .. هيك كبيت كلشي ورا ضهرك وبدك تتركني وتمشي .. لك بتقدر تشوفني مع حدا تاني ... بتقدر ..
حكي مجد وهو عم يعيط :لك فهمييينيي .. انااا تعبتتت ... تعبتتت ... قدامي وماعم اقدر احصل عليكي .. ضحى انا بدي اياكي .. بدي اياكي بقلبي وبحضني وببيتي .. مابدي ضل عم شوفك بالسرقة واحكي معك بالسرقة .. بدي تكوني معي قداام الكل
ضحى :وانا رح كون الك .. بس انت اصبر
مجد :ايييمتتت ... ايمتتت ... اهلك مستحيل يعطوني ايااكي .. مستحيل .. ابوكي قلي بدبحا ومابعطيك اياها .. انا صرت خاف عليكي منن .. بدي ابعد مشان احميكي ..
ضحى :مافي تبعد .. عم تفهم .. مافي تبعد
مجد :ضحى اسمعيني .. لازم نبعد فترى ع الأقل خلينا نعيد حسابتنا .. نفكر برواق
صارت تبكي
ضحى : بنفكر مع بعض .. وبنعيد حسابتنا مع بعض .. انا بحبك .. مجد اذا بتتركني بمووت .. والله بموت
مجد ما استحمل يشوف دموعا وقال :ضحى لاتبكي
ضحى بعدها عم تبكي وتقول :كيف ما ابكي وانت عم تعذبني
مجد :ضحى لاااتبكي
ضحى :بدي ابكي .. بدي ابكي .. خلص شوبدك فيني مابدك تتركني وتفل .. معد دخلك فيني بدي ابكي وموت حالي كمان .. معد دخلك فينيي .. خلص رووح .. بدك تروح رووح
فتحت الباب لتنزل .. بس هو ماقدر يخليها تروح .. سحبا من ايدا وضما على صدور بقوة .. لما ضمها حست حالها ملكت الدنيا .. تماماً متل ماهو حس .. عم يشد عليها ويبكي
ضحى :بحبككك
مجد :بمووت فيكي .. بفديكي بروحي
ضحى :لا تتركني مجد لا تتركني
مجد : خلص مارح اتركك .. انتي روحي مستحيل اتركك .. انا كان بدي نبعد بس والله ماكنت رح اتركك ... بس خلص معد ابعد او اتركك
ضحى :الله يخليلي اياك
مجد :ويخليلي اياكي ياعمري انتي
فتحت عيونا لقت حالا بحضنو .. بسرعة رجعت عمكانا وصارت تمسح دموعا ... وهو بسرعة مسح دموعو مشان مايبنو
مجد :تروحي معي خطيفة
ضحى :قد ما كان بضلو اهلي يلي تعبو علي وربوني ووصلوني لهون .. ومابدي زلن اخر هالزمن
مجد :بدك نضل هيك
ضحى : اي .. بدنا نضل هيك.. خلص بس مهلني لخلص جامعة هي السنة .. وبعدا عنجد اذا اهلي معارضين رح اجي وقلك انا ملكك
انتهدت تنهيدة طويلة وبعدا ابتسم
ضحى :شو قلت
مجد :ليش بقدر قول ما عجبني
ضحى :اي هيك بدي اياك .. دخيلوو حبيبي الازعر انا
وقرصتو من خدو
ضحى :قال بدو يتركني 😒😒 والله القبر اقربلك
مجد :اااخ منك .. لك مافيني قاوم حالي وانا معك .. بتسيطري علي وعلى كل تصرفاتي
ضحى : لانو هيك بدك .. مابتجي غير الرص .. لك رح جن قال كان عم يفكر من كل عقلو انو بدو يتخلى عني
مجد : لك بدي دق بالصرماية انا
ضحى :ههههه اي هاه هاد مجودتي وهي حكياتو الحلوين .. لك اشتقتلك لما تقلي لاتتحيويني ههه
مجد :هههه ...بحبك يا بنت
ضحى :بعشقك يا كل دنيتي ..
مجد :اي هاتي حكيلي وجعك اخوكي المغضوب لما ضربك
قلبت شفتها وقالت :اي والله .. بس كرمالك يا عمري بتحمل كلشي
حط ايدا ع راسا وقال: لك يقبرني ربك انت .. هي هية بنتو لالبي .. بس خلص لاتعانديهن هالفترة .. لانو بعرفك لما تركبي السن الاعوج وتجحشي
ضحى بغنج :ليش عم تحكيني هيك
مجد :ما عاجبك حكيي
مسكت ايدو وضمتا باديها التنتين :مبلى عاجبني .. وكتير ..لك يقبروني حكياتك يلي مافيهن اي ذرة من الاحترام 😂😂😂
ضحى :ليك حبيبي صار لازم تروح .. اخي قلي ساعة وجاي ياخدني .. وقرب يجي روح مابدي يشوفنا مع بعض
مجد :كيف بدي اتواصل معك
ضحى :بحكيك من موبايل اختي
مجد :لا مابدي تحس عليكي ..
طلع مين جيبتو موبايل وقال : خلي هاد معك
ضحى :لمين هاد
مجد :الي بس مابستخدمو زيادة
ضحى :وفيه خط ؟
مجد :اي فيه خط
ضحى :هالموبايل اول مرة بشوفو معك .. شو شغلتو هاد
مجد :هاد بحكي في مع العالم يلي مابدي اياها تعرف رقمي وكمان الو شغل تاني
ضحى :شغل تاني متل شو
مجد :خلص خديه من دون كتر اسئلة .. واي رقم بيتصل عليكي غير رقمي لاتردي عليه مفهوم
سحبت الموبايل من ايدو ورفعتو بوجهو وقالت :لا مامفهوم ..وهلأ بدك تقلي هاد الموبايل مع مين بتحكي فيه
مجد :هاتي لهون معد اعطيكي شي .. ""مد ايدو لياخدو بس هية خبتو ورا ضهرا وقالت :هلأ بدك تقلي مع مين بتحكي فيه
مجد :ضحى هاتي الموبايل
ضحى :لا تحلم لسه ترجع تحملو .. وعفكرة كل رقم بدو يتصل عليه رح رد
مجد :لك كيف بعطيكي اياه انا .. ضحى هاتيه لهون
رفعت بحواجبا وقالت :هئ .. الموبايل صار الي .. ويا اما بتقلي مع مين بتحكي فيه يا اما كل الارقام يلي بتتصل عليه رح رد عليهن
مجد : اوووف... شو الله علقني مع وحدة جحشة متلك
ضحى :والله هاد الموجود ... بدك تقلي ولا انزل
مجد :بقلك بس هاتيه
ضحى : لا حبيبي هي الشغلات مابتمرق علي .. قلي بعطيك اياه .... عم تحكي مع بنات صح
مجد :اي صح هاتيه لهون
صارت تضربو ع كتفو وقالت :توقعت .. توقعت .. عم تحكي مع بنات يا مجد .. لك انا بشو منقصة عليك .. ليش لتحكي مع غيري وتخوني اااه ..
مجد : ماني عم خوونك ..والقصة مو متل ما انتي فهمتيها
ضحى :لكن شووبتسميها هي مو خيانة .. لك انت اذا بتعرف اني وقفت مع زميل الي بالجامعة بتقوم قيامتي .. كيف بتعمل معي هيك .. كييف
مجد : خلص عرفتي القصة انزلي والموبايل خليه معك .. لانو اخوكي رح يجي.. ببقا بحكيلك القصة بعدين
ضحى رمتلو الموبايل بوجهو ..بس هو مسكو قبل مايخبط بوجهو
ضحى :خود تضرب منك لموبايلك وللبنات يلي بتحكي معن .. خلص خليك عند قرارك انا معد بدي اياك .. يلا روح من هون ولاتخليني شوف وجهك مرة تانية ...خاين
مجد : ضحى لاتخبصي بالحكي .. مشان ماكمل يلي بلشو اخوكي
ضحى :اي روح ..روح .. لحق لنسوانك وبعدين تعال اضرب مراجل علي
مجد :ههههههه لك انتي بدك تضلي طول عمرك حيوانة
ضحى :اي والله حيوانة لانو حبيت واحد متلك
مجد : هلا معد نعجبك ضحى خانم
ضحى : كنت تعجبني ..بس هلأ وبعد ماعرفت انك صاحب بنات بطلت تعجبني
مجد : ههههه طيب اسمعي القصة وبعدين احكمي
ضحى :قصة شووو ... ليش عم تحكي مع بنات .. مافي اي مبرر بيسمحلك تحكي مع بنت مابتقربك
مجد :في مبررات كتير .. وكمان هنن تنتين ما اكتر
ضحى :ما قال جحا
مجد : والله مافي بيني وبنن شي ..بس بنات فلتانات وعم يخبوص وانا بدي علمن درس
ضحى : اهااا وبدك اياني صدقك
مجد :مشكلتك صدقتي او لأ
ضحى :ولنفترض صح .. انت شو دخلك فيهن يخبصو ليهلكو في رب بحاسبن .. انت مين وكلك تحاسبن
مجد :بتعرف هدول اذا بينفضحو شو بصير فيهن وبأهلن .. اول شغلة رح ينقتلو وتاني شي اهلن رح ينطمو بال**** مو بس بالطين فهمتي .. انا عم وعيهن مو اكتر
ضحى : اي هات التلفون لهون
مجد :بطلت .. خلص انتي رميته بوجهي
ضحى : ورجعت بدي اياه .. بدك تعطيني اياه ولا لأ
مجد :لا
ضحى :اي بالناقص
فتحت الباب لتنزل .. رجع مسكها وقال :شو بحبو لنكدك .. خدي ياقلبي هاد الموبايل .. بس الله يرضى عليكي لاتردي ع الارقام .. بس يومين لبين ماجبلك موبايل وخط جديد
اخدتو بغرور وقالت : لا مارح رد .. بس لاتفكر انو مرقتلك اياها .. بس لانو مابدي اكسرلك كلمتك
مجد :لك يا امة الله شو هالبنت هي ما احلاها
ضحكت ضحكة من كل قلبا وقالت :هههههه مجنوون
فتحت الباب ونزلت
مجد :يا رووح
رجعت لعندو وقالت :يا قلبي .. قلي
مجد :انتبهي ع حالك وخبي الموبايل منيح لاتخلي حدا يشوفو
ضحى :هههه يقبرني الي خايف علي
مجد :اي يلا روحي من وجهي ههههه
ضحى :بااي
تركتو ورجعت ع الكلية وهو دور السيارة ومشي
_______________________
عند الضهر
قدام بيت الشيخ .. صف مجد سيارتو ونزل .. وطلع بوجهو تحسين
تحسين :اهلا بالشريك
مجد : شو كيفك
تحسين : تمام .. تعال نقعد مع ابي
مجد : وينو ابوك ليش
تحسين :ورا البيت قاعد تحت شجرات الجوز
مشو لعند الشيخ .. كان قاعد عم يأركل وقدامو طاولة عليها جاط فواكه من اشهى الانواع وجنبو زوجتو وبنتو
وقف مجد لما شافن قاعدين قعدة عائلية
تحسين :شبك ليش وقفت
مجد :هلأ ابوك قاعد من امك واختك .. مابدنا ننزع عليهن القعدة ..
تحسين :لك تعا ولا .. مافيها شي
مجد :لا لا .. انا اصلا كنت جاي اخدك ونروح مشوار
تحسين :والله ابي بيزعل منك هلأ
مجد :طيب بسلم وبنمشي فورا
تحسين :اي تعا تعا .. والله مابعرفك خجول .. طول عمري بعرفك وقح ههههههه
مجد :الله يسامحك
قربو منن
مجد :السلام عليكم
الكل: وعليكم السلام
الشيخ : اهلين بالبطل
مجد : هههه شو بطل مابطل .. شو محرر الاندلس انا
الشيخ :ههههه تحسين جيب كراسي وتعالو اقعدو
مجد :لا لا شيخ مابدنا ننزع عليكن قعدتكن .. بس انا جيت اخد تحسين مشوار صغير وقلي ابي هون قلت لازم سلم عليك
الشيخ :صاحب واجب .. بس مافي تروح
مجد :بس والله
الشيخ :معقول ترفض طلب للشيخ نمر
مجد :ماعاش يلي بيرفضلك طلب
كان تحسين جايب كرسيين وقعدو معن
الشيخ : بتأركل ؟
مجد :لا شكرا
مجد متوتر من قعدة النسوان معن ومنزل راسو
ياسمين : شو صار معك ومع حبيبتك
اتطلع فيها بتعجب من جرئتها .. وحتى ماخجلت منو ولا من اهلها
تحسين : صحي ولو صار شي جديد
الشيخ :ابني احكي بحرية .. لاتخاف هون ام خالد متل امك وياسمين متل اختك ..يعني مافي حدا غريب والكل عرف بالقصة .. حابين نطمن عنك .. وبنتمى انو الامور ترجع لمجاريها
مجد :بنقول ان شاء الله 😅
تحسين : شو صار رجعتو لبعض
مجد : اي
ياسمين :ع الزمة مو هية يلي ماخلتك تتركا ... لانو حسب ماقالولي اهلي انك كنت ناهي القصة .. بس يلي شفتو بعيون البنت انها قوية ومارح تستسلم بهل السهولة وتترك تروح
مجد: اي صح .. هههه نظرتك ثاقبة
ياسمين :لغة العيون اختصاصي
مجد بقلبو : شو هالبنت هي .. بتملك كلشي .
مجد : وشوفي بعيوني
ياسمين : شب عاشق وهيمان .. وهلأ بهل اللحظة عم يغزلو فرح
ابتسم ابتسامة صغيرة .. وقال: تروح تحسين
الشيخ :ع وين
مجد :مشوار صغير من بعد اذنك
الشيخ :اي الله معكن .. تحسين لاتطول المسا بدك تكون هون
تحسين :حاضر ابي
مشو تحسين ومجد وحكي مجد :شوفي عنكن المسا ليش
تحسين :في جماعة جايين لعند ابي مشان يدخل واسطة خير بين جماعة تانيين ويعملو صلحة ..
مجد : اي
تحسين : شو اي .. ابي بحب نكون جنبو بهيك اجتماعات .. قال مشان نتعلم كيف بيتحدثو بالمجالس وكمان بشوف حالو فينا انو ولادو حواليه
مجد :ابوك عظيم
تحسين :هههه الله يطولنا بعمرو
مجد : امين .. وابوك طبعا رح يتتم هالصلحة ماهيك
تحسين :شو عم تحكي يازلمة .. ابي مستحيل يحط ايدو بشغلة وماتصير .. ابي طلباتو اوامر بالمنطقة كلا .. ويلي بيرفضلو طلب بحاربو طول العمر .. وعلى محاربة ابي الو الكل بيقطعوه ومابعودو يتعاطوه .. يعني يلي الله غضبان عليه بيرفض طلب لابي ..
مجد : اكيد بدو يكون الله غضبان عليه .. هاد شيخ عشيرة مو حيلا ..
ركبو السيارة وانطلقو
تحسين :ع وين صحي
مجد :مشتقلك 😂😂
تحسين :امممم .. فهمت عليك
طلع ع الطريق ومشو .. وع طرف الطريق في شب واقف وفاتح غطا المحرك لسيارتو وكأنو خربانة معو .. طبعا ضلو مكملين ..من جنبو بس مجد صار يتطلع عليه بالمراي..
تحسين :شبك ع شو عم تطلع وليش هديت
مجد : ااه لا ولاشي بس عم شوف بركي بدو مساعدة هالشب
تحسين :لو بدو كان ندهلنا .. امشي شوبدك فيه
ضلو مكملين وعيون مجد ضلت ع المراي لحتى بعدو والزلمة معد بين على المراي
اخد موبايلو كتب فيه شي ورجعو
تحسين :لمين بعتت رسالة
مجد :لمراد اسألو اذا جاب علف للدواب او لا.. رن تلفونو
رجع سحبو وكان مكتوب العقيد
فتح السيبكر وصار يحكي وعم يسوق
مجد : اهلا سيادة العقيد
العقيد :كيفك شريك
مجد :تمام ... قلي في شي
العقيد : اي في
مجد :شو في
العقيد :اهل الضيعة عم يحفرولك
مجد :شو يعني
العقيد :عم ينجرولك خازوق مبشم
مجد : المعنىىى
العقيد :مقدمين عريضة للمخفر التابع لمنطقتكن .. بدن اياك تطلع من الضيعة
دعس على الفرام .. وقال :شووو
العقيد :بس اطمن كلشي تحت السيطرة .. الطلب بالمخفر مع وقف التفيذ
مجد :تنفييذ شووو ..ليش بدو يتنفذ يعني
العقيد :ههههه قصدي تنفيذيك
مجد :انا بفرجيهن لهل الكلاب .. مابخلوني قاعدد وكانن الا يطالعو الازعر يلي جواتي
العقيد :لا تتهور وتعمل شي خارج عن سيطرتي
مجد :لا اطمن كلو تحت السيطرة .. بس بدي تعرفيلي مين هنن واحد واحد
العقيد : الطلب بالمخفر مر وخدو .. عليه اسماء الي موافقين على هالقرار وتوقيعاتن
مجد : مشكور .. مشكور سيادة العقيد
العقيد :الله معك
مجد لف الدركسيون ليرجع من الطريق يلي ماشي فيه
تحسين :شوفي .. وليش راجع
مجد :بدي رجعك ع بيتكن
تحسين :شوبدك تعمل
مجد :ماتتدخل ..
تحسين :رجلي ع رجلك
مجد :تحسين انت كل العالم بتعرفك وبتعرف ابوك .. مابدي دخلك بمشاكلي .. مشان هيك ارجاع عبيتكن وانا ببقا بخبرك شوصار
تحسين : اذا مابدك تاخدني معك وقف هون ..
مجد :ليش .. رح نوصل
تحسين مبين انو نعصب :نزلنيي هون وروح .. شوبدك فيني .. مزال مابدك اياني معك .. خلص نزلني هون
مجد مالو نفس يناقشو .. وقفلو السيارة
ونزل تحسين وهو معصب وطبش الباب وراه .. ومجد رجع غير طريقو ومشي
______________________
ضحى قاعدة بغرفتها وعلى تختها ومعها كتاب عم تقرأ فيه .. وعم تهز لقدام ولورا
انفتح الباب عليها ودخلت ندى
ندى :قومي كلي
ضحى صفنت شوي واتذكرت كلام مجد ... سكرت الكتاب وحطتو جنبها وقامت معها
راحو ع المطبخ .. المطبخ كان كبير وبالنص الفاضي مادين سجادة وكم فرشة وفراشين الاكل ع الارض .. قربو وقعدو جنب بعض
بكر :واخيرا ضحى تنازلت واجت تقعد معنا ع الاكل
ما ردت .. ربعت رجليها ومدت ايدها اخدت صحن وملعقة وصارت تسكب لحالها اكل
يحيى : اختي كيف كان امتحانك
ضحى :ايو امتحان ؟
ناصر :يلي اخدتك ع الجامعة اليوم مشانو
ضحى :اااه .. اي منيح
ناصر :شو نسيانة انو كان عندك امتحان ... ولا بالاصل ماكان في امتحان
ضحى :لأ اطمن كان فيه .. بس ماجاوبت منيح .. مشان هيك مدايقة شوي
امها :وماتدرسي .. شوفي وراكي
ندى:خلوها تاكل هاللقمة
ضحى حطت الصحن ع الارض بقهر وقامت
ناصر :ضحىى تعي لهوون
راحت ومعد ردت
ناصر :ضحىى والله اذا ماجيتي بتعرفي شو ممكن اعمل
بكر :خلصنا ناصر تركها
ناصر : يعني بكل عيلة لازم يكون شخص نيقة .. والله حط هالنيقة بهي ام راس كبير .. بس انابفرجيها .. والله لسه غليلي مافشيتو ... كل مابتذكر انها ململة ارزل خلق الله وجايبتو عريس ..
قاطع حديثن ضحى وهية جاي ومعا موبايل ابوها عم يرن
قربت وعطتو اياه .. وابوها فتح الخط وحكي .. لفت ضهرا لتمشي .. لتسمع صوت ابوها صرخ وقال :شووووو
الكل جمدو مكانن الظاهر هالمخابرة فيها شي مو طبيعية
بكر :طيب شوصاير هلأ .. جاي .. جاي
سكر الخط وقام
ناصر :شوفي ابي
بكر :قومي معي لنشوف هالكلب ابن الكلب لوين بدو يوصل
يحيى :مين قصدك
رمق ضحى بنظرة بتحرق وحكا :مين غيرو هالحيوااان
وقفوا ناصر ويحيى ومشو مع ابوهن والنسوان لحقتن
يحيى :شو عامل هالمرة
بكر :قصد مارضي يحكي قدام بنتو وقال :بتعرفو ع الطريق
________________________
بنص ساحة الضيعة
واقف مجد هو واخوه مراد ومعن حمود ومعن عصي ومو ناويين ع خيرر .. ومجد برز سلاااحو يلي عجنبو .. واغلب رجال الضيعةو شبابها واقفين حواليهن .. لحتى اجت سيارة بكر ومعو ولادو ونزلو منها
المختار : مجد عشووو ناووي
مجد تجاهلو وقال :اهلين بعمي وبولاد عمي
بكر :فشرت كون عمك يا واااطي
ناصر أجا بدو يهجم ويخلص ع مجد بس يحيى حط ايدو ع كتف اخوه ورجعو لورا يهديه
يحيى :مجد شوو عم تعمل وليش جامع هالعالم هيك .. وليش جايين ومسلحين ..
مجد :بحبك يا ابن عمي .. انت الوحيد المحترم بهل العيلة وبينحكا معو
ناصر :لك تركوني عليه خليني علمو الاحترام لقليل هالاحترام والتربية
مجد : اما انت يا ابن عمي ماحبيتك سبحان الله ماهضمتك ولا طقتك
ناصر بعصبية :ينعن ابوه يلي بحبك
مجد ضحك ضحكة كبيرة وقال:ههههههههه المشكلة المسبة رجعتلكن ... لانو بتعرف منيح مين بحبني وغمزو 😉
ناصر :ماتحمل اكتر وهجم عليه .. بس مجد بحركة سريعة وقبل مايلمسو ناصر لمجد كان ماسكو من خوانيقو وبطحو ع السيارة وصوب عليه المسدس
مجد : شو وين رح عصك الحامي .. مابتضل واقف مع هالعالم بكرامتك .. ضروري تصغر حالك
ناصر القهر رح يدبحو وهو عم ينفخ بين ادين مجد
بكر :مجدد ياويلك اذا بتأذيه
مجد :كلامك اوامر عمي .. معقول ائذي ابن عمي
رفعو عن السيارة ودفشو لبين العالم .. راح لجنب ابوه وهو عم يفرك رقبتو
العالم بعدها عم تجي وتتجمهر حواليهم
مجد :بما انو العدد اكتمل رح احكي والحاضر يعلم الغايب .. انا ماني جاي لخير والله وناوي دمركن كلكن .. متل ماعم تحاولو تدمروني ومن ورا ضهري
المختار :شوو عم تحكي انت
مجد :له له يا مختار ماحبيتا منك.. معقول ماعم تعرف انا شو عم احكي وانت راس الفتنة
المختار :تأدب يا ولد
مجد :ماعم تخلوني متأدب وقاعد بعيد عندكن كافيكن خيري شري .. بس مابتقدرو تقعدو عاقلين بتضلو تحركشو لتطالعو الازعر ابن الحرام يلي جواتي وبتقول ليكو الازعر
المختار : لهلأ محداا خبر الشرطة
مجد : هههههه لك صحي .. ليش ماخبرتو الشرطة
طلع موبايلو من جيبتو ووجهو ناح الجميع وقال:مين بحب يتصل فيهن .. تفضلو خدو
ساكتين
مجد : بتحبو اتصل انا
رجع ضب التلفون وقال :بكون شي فسفوس خبرن بعرفكن كفو .. المهم بنرجع لموضعنا
طلع الورقة من جيبتو وفتحها هي الورقة يلي وقع عليها اهل الضيعة مشان يطالعوه منها .. طبعا هنن ماعرفو لسه لشو هي الورقة لأنو بس شافو ضهرها الفاضي
مجد:يلي بقول اسمو يقول حاضر هه.. المختار
مارد
مجد :حاضر هي هو المختار
مجد :ابو منهل
رفع راسو واتطلع بين الموجودين وقال :هه حاضر
مجد :ابو محمد
كمان عمل نظرة وقال :هههه حاضر
مجد : بتعرفو حالكن مارح كمل الاسماء .. فتل الورقة لعندن وقال : ما هي هية الورقة يلي وقعتو عليها مشان تطفشوني من الضيعة
المختار :كيف وصلت لايدك هي .. وانا بايدي سلمتا لرئيس المخفر
مجد :لو تسلما لكوفي عنان رح جيبا .. انتو لسه مابتعرفو مع مين علقانين
بكر :وهي عرفت انو محدا طايقك .. ليش مابتخلي عندك شوية كرامة وبتنقلع من هالضيعة
مجد : هههه ليش خليتو فيها كراامة .. لك بس سؤال انا بشو عم أئذيكن .. حدا يقلي بشو اذيتكن
قرب من اول زلمة وقال: انا طول عمري اذيتك شي
تركو وقرب من شخص تاني وقال:انت انا اذيتك شي مرة .. قرب ع التالت شي مرة تعديت ع حرمة بيتك
شي مرة جيت وسرقت من عندك شي .. شي مرة قتلت حدا من ولادك
رجع لورا وهو فاتح ايده ع مصرعيه وقال :انا اذيت حدا منكن ؟؟..احكووو ؟؟؟
المختار : شوو نسيت سرقة الجاج
مجد بعصبية :انا عم اسألكن عن مجد الشب يلي واقف قداككن مو عن مجد يلي عمرو عشر سنين .. لك العما بقلبكن الله يبغفر وبسامح وانتو مابتسامحو ولابتنسو ..
بكر :انا عم تأذيني
مجد :لا عمي بعتذر منك بس انت غلطان .. الحقيقة هية يلي انت عم تأذيني مو انا يلي عم أئذيكن
سكاتين
مجد :طيب لييششش ساكتيين ..ما انا عم أئذيكن .. ماتحكووو... قولولي ع دنب مين دعست
المختار :احترم الفاظك يا ولد
مجد:لاا ماني محترم شي لانو انتو جماعة مابتستاهلو الاحترام .. انا اليوم جيت ائذيكن .. مزالو السيط طالع طالع .. خليه يكون ع المليان ... مرااد حموود
حملو عصين وتوجهو ع اول محل بالساحة وهو محل حلاقة .. اجو الزلم بدن يقربة يمنعوهن .. بس مجد وقف بوجهن وبضهر مراد وحمود ورفع بوجهن السلاح .. وقفو كلن وتراجعو
مجد :يلي بقرب والله مارح اتردد قوسو بنص راسو .. مراد حموود شوفو شغلكنن
مراد وحمود بالعصي يلي معن كسرو الواجهة والمرايا والكراسي الحلاقة والمغسلة والطاولة وكلشي.. المحل انقلب رأسا على عقب .. قرب الحلاق وقال :مجد مشاان الله المحل
مجد :مو انت موقع بدك تطلعني من الضيعة تحمل العواقب .. والله مارح ارحم حداا .. ورح فرجيكن كيف بتكون الزعرنة
خلصو من المحل وانتقلو ع المحل يلي جنبو وهو عبارة عن مطعم صغير فلافل وحمص وفول .. اول ضربة ضربها مراد على مقلي الزيت يلي عباب المحل وقلب ع الارض وسرح هالزيت ع الارض .. فاتو لجوا وبلشو تكسير كلشي بيطلع قدامن من طاولات وكراسي وبرادات .. والفول والحمص والفلافل صار بالارض
المختار :يا ويلك من الله ... ليك النعمة كيف صارت ع الارض
مجد :انتو يلي ماحافظتو عليها .. ويكون بعملكن لاتفكرو يلي ماعندو محل رح ينفد مني .. لك اذا عندو بقرة رح اقتلا .. عندو شقة ارض رح احراقا
المختار شاف الشر بين عيونو بالمواجهة وبالقوة مارح يقدرو عليه .. فقرر يجيه بالمسايرة
المختار :طيب وقف وخلينا نتفاوض
مجد :عشو بدنا نتفاوض .. ماعندكن شي تفاوضوني عليه
المختار : انت اطلب واتمنى
مجد :خطر عبالو ضحى
مراد وحمود كانو عم ينتقلو ع القهوة ليكسروها بس وقفن صوت مجد وقال :مرااد وقفو شووي
المختار :شووو
مجد :محل الحلاقة والمطعم برجعن متل اول واحسن وفوق منها تعويض ..ومن الضيعة مستعد اطلع .. بس بشرط واحد وكلكن بتعرفوه
اتطلع ببكر والكل اتطلعوا ببكر
اجا بدو يقلو فشرت بس شاف الترجي بعيون اهل الضيعة
مجد : شوو عمي .. الحل بأيدك
المختار قرب من بكر وقال :ابو ناصر مشان الله .. مانك شايفو كيف مجنون
بكر بصوت عالي :انت عم تقولاا مجنون .. كيف بدي امن ع بنتي معوو
مجد : بنتك اغلى من روحي وبعمري مارح أئذيها او ضيمها
حكي صاحب القهوة :مشاان الله يا ابو ناصر وافق .. رح يدمرنا
نزل راسو وماحكي
مجد :مراد كملو شغلكن .. مبينة عمي مارح يعطي
مشي مراد وحمود ع القهوة ليوقفن صوت بكر :وقفووو
ابتسم مجد ابتسامة نصر وفرح سوا
مجد :احكي عم اسمعك
يتبع...

#توقعاتكم