مذاق الحرمان

الحلقة 46

باوعت علي نزع سترته وراح للحمام
شويه وطلع ينشف بايده ويباوعلي ويضحك
وترني كلش احس بي برود بگد اعصابه المو طبيعيه
شخص ممفهوم كل شويه يتحول شكل يختلف عن شكله السابق

تقرب مني لزم خصري وسحبني الحضنه
گبل ضغطت ع السلسله الما فارگت ايدي من اخذتها من اسر لحد هاي اللحظه

مازن.. شبيچ خايفه

خيال.. لا مخايفه
بس اريد اعرف ليش اجينه لهنا و وين راحوا اهلي

مازن.. اگعدي اني هسه راح افهمچ كل شي

بعدت نفسي عنه ورحت ع الچربايه
بقيت گاعده اباوع علي متوتر والقلق واضح على ملامحه شبيك مازن شنو يا ترى السر الموجود بشخصيتك وما گدرت اوصله لحد هذا اليوم
قاطع تفكيري صوته لمن گال

مازن.. قبل كل شي
انتي تعرفين اني شگد احبچ واموت عليچ ؟؟

خيال.. اي اعرف

مازن.. لا ما اتصور تعرفين
شگد بالخطوبه تغزلت بيچ شگد گتلچ احبچ وحاولت اعبر عن هذا الحب بس ما وصلت القطره وحده من بحر الحب الشايله بگلبي الچ

خيال.. اي وبعدين

مازن.. شبيچ شو بارده كلش

خيال.. مو قصة بارده
بس اريد اعرف شگاعد يصير هنا حتى ارتاح شويه

مازن.. اني اخير واحد بالدنيا يفكر يأذيچ خيال
يعني الحچي الراح احچي الچ اتمنى تستوعبي على انو حب مو انانيه وتملك

خيال.. تمام !! وبعدين

مازن.. اول ما تعرفت عليچ من بعيد قررت اخطبچ
ما اخفي عليچ هواي چانت عندي علاقات ببنات ونسوان اشكال الوان بس كلهن طلعن من حياتي بمجرد دخلتيها انتي وملكتي گلبي بدخولچ الها

خيال.. اي

مازن.. للأسف بنفس هاي الفتره تعرضت الحادث بشغلي سببلي مرض قوي خلاني اتراجع عن قرار الارتباط بيچ

اذا تسأليني شنو هذا المرض فـ مراح اجاوبچ حالياً
خليني اكمل القصه كلها وبعدين تعرفين مرضي حتى تفهميني وتعذرين تصرفاتي وياچ

المهم ما بلغت احد بهذا المرض وحاولت اشيلچ من راسي لذالك وصيت امي تخطبلي على معرفتها حتى انساچ وابطل التفكير بيچ ليل نهار

وفعلاً بدت امي تخطبلي
بس چنت كلما اگعد ويا العروس واشرحلها حالتي علمود لا اظلمها ويايه ثاني يوم يرجعون خبر لاهلي بالرفض لاسباب مجهوله

وصلت امي الحاله حرجه
يعني شبه تخبلت من الجاي يصير باعتبار اني ضابط وابن عائله متمكنه مادياً وما ناقصني اي شي فـ ليش وين منروح يرفضون بدون سبب مقنع

اخير شي لزمتني حچت ويايه
اعترفتلها بنص الحقيقه مو كلها يعني ما گلتلها مرضي الحقيقي بس اكيد تفهمت الرفض ومن يومها منعتها تخطبلي لحد ما گلتلها عليچ وهي ما صدگت