اني اسمي وفاء..
اني بنيه عندي كل صفات الجمال يعني جسمي مفصل وطويله ورشيقه وبيضه وعيوني ملونه وعندي دلع وغنج مو طبيعي واكبر واحد ميكدر يقاوم كدامي
من كنت زغيره كنت اسكن بقريه من محافظات الجنوب وبنت شيوخ وابوي كان من شيوخ العشائر المحترمين وكان موقر جدا..
عندي خمس اخوان بس ماعندي ولا اخت لذلك ابوي كان حيل يدللني ويحبني وميخلي اي شي بنفسي وعمامي واخواني كانو دائما يلومون ابوي على دلالي ويكولوله انته غلطان لان دللتها اكثر من اللازم لان كان عدنا بالقريه محافظين حيل والبنيه تزوج ابن عمها متزوج غيره..
كانت حياتي طبيعيه جدا وحلوه بدايه قصتي كانت بعد السقوط لما دخل الموبايل للعراق واكو كم بنيه من القريه اشترن موبايل واني كمت اغار منهن ولحيت على ابوي يشتريلي موبايل وفعلا نزولا عند رغبتي اشترالي هذا الشيطان الي تعاونو هو والضروف القبليه والاعراف العشائريه بكتابه قصتي الي راح احجيها الكم....
بعد ما اشترالي الموبايل صرت اتكشخ بيه بين بنات القريه وطبعا ما استعمله ابد لان المن اخابر يعني ماعندي احد اني اصلا اشتريته حته اشبع الغيره الي بداخلي 😅
بدايه الموبايل بالعراق وقبل انتشار الانترنت جانت اكو حاله بالعراق الشاب يتصل على اي رقم لا على التعيين واذا يشوفه ولد يكوله غلطان بالرقم واذا يشوفه بنيه يبقى يتودد ويحجي بلكت تنطيه مجال..
واني صار وياي هالشي واتصل علي رقم غريب..
اني : الو... منو وياي؟
المتصل : ممكن اتعرف؟
اني اول مره اسمع بهالشي وجنت بنت قريه ومتقوقعه لذلك ماعرف هالاشياء لذلك جاوبته : يعني شنو تتعرف؟
المتصل : اني صراحه صوتج عجبني وحاب اعرفج اكثر واتعرف عليج يمكن يكون هالاعجاب بدايه حب مينتهي والاذن تعشق قبل العين احيانا...
اني : انته فعلا واحد متستحي واكول لابوي عليك يا ابن ال...
المتصل : اي عيني؟. وشتكولين لابوج؟؟ اتصل علي واحد غريب وبقيت احجي وياه؟؟ وخليته يكولي اني معجب بيج ويحجي هيج كلام؟؟
هنا اني سرح تفكيري وبقيت افكر بكلامه فعلا اذا اكول لابوي راح ياخذ مني الموبايل ويمكن يعاقبني لان حجيت ويه ولد غريب وطبعا جان تفكيري محدود مو مثل هسه يعني هسه لو يرجع الوقت اطلع الف سالفه وسالفه لابوي واقنعه اني الفتاة البريئه وميعاقبني وحته مياخذ مني الموبايل.. فعلا الانسان الفقير ميكدر يقنع الناس ان هو فقير بس الانسان الملعب يكدر بكل سهوله يقنع الناس ان هو فقير وعادي تمشي...
هنا قطع تفكيري المتصل واسترسل بكلامه
المتصل : ها شو صفنتي؟؟ طيب هاج اسمعي هالكلام..
بنت القن.... يا كح... انتي كذا... وانتي..... وانتي...
يلا اذا بيج خير روحي كولي لابوج هذا كالي هيج كلام واني سمعته حته يذبحج.
اني هنا راودتني هواي اشياء اول شي فعلا خفت من ابوي لان اعرفه ابن عشاير وشيخ وفعلا يذبحني.
ثاني شي اول مره اسمع بهيج كلمات بعض هالكلمات فهمتها وبعضها اصلا مافهمتها..
ثالث شي اكو هيج ناس تحجي بهيج طريقه وهيج جرأة؟؟
رابع شي والاهم... ماعرف ليش بالرغم من ضوجتي واحد يغلط علي واني ساكته ماجاوب ماعرف حسيت بعض الشي بلذه بداخلي واكو جزء مني يكوله كمل لتوكف اغلط بعد..
ماعرف هل هو فضول لان اكو كلمات ما سامعتها ولا اعرفها اريد اعرفها لو استلذيت لان اول مره رجال يغلط علي لو اكو طفله جريئه بداخلي جانت نايمه وبدت تصحى بسبب كلامه ماعرف بس نهيت هالتفكير كله وسديت التلفون بوجهه..
ثاني يوم رجعت لحياتي طبيعي بس بالي وتفكيري مشغول بالشخص الي اتصل البارحه..
طلعت ويه امي وعماتي للبستان وللمواشي الي عدنا ولشغلنا طبعا واني سرحاااانه وكل شويه امي تصيحلي وتكول وين صافنه ووين تفكيرج اليوم.. المهم بالعافيه يلا خلص يومي وبالليل خابرني نفس الرقم واني شفته كمت ارجف وماعرف بداخلي خوف منه لو خوف من نفسي لو فضول لو ماعرف شنو وبقه الجهاز يدك واني بداخلي حرب نفسيه الى ان قررت ماجاوب الى ان خلص الاتصال وبعدها بشويه رجع اتصل مره ثانيه وجاوبته بدون ما اشعر وكتله شتريد؟؟؟؟؟؟
المتصل فاجئني بصوت ناعم : اني اعتذر على الي صار البارحه ماعرف شلون هيج حجيت وياج بس صدكيني جانت عندي مشكله كبيره لان حبيبتي عافتني ومنهار نفسيا وحجيت وياج هيج حته افرغ ضوجتي وكام يبجي واني انقهرت عليه صراحه وكتله ماصار شي بس غلطك جان مو حلو
المتصل : الكلام الي كلته الج جنت اتمنه تجيني الجرأة حته اكوله الها لان عافتني بس ما كدرت وطحتي بيها انتي واعتذر منج هواي ورجع يبجي من جديد
اني تعاطفت وياه صراحه كتله لا تهتم.
كال خلي اسولفلج القصه وانتي احكمي..
اني احب بنيه صار سنين وبيناتنا حب وغزل ويوميا نتشاوف وما مقصر وياها ابد وبالاخير تتركني (ودموعه تجري طبعا)
كتله لا ميصير وهي من تركتك اكيد متستاهلك وخسرتك ..
بقينه نحجي طبيعي
وثاني يوم هم اتصل علي سلام وكلام وكتله اني احترمك بس بعد لتتصل علي لان اني ماكدر احجي وياك اني من قريه وعشاير وهو كالي ماكدر انتي الوحيده الي فضفضلها واني بداخلي اريد ابقى وياه واحاول ابعد عنه وبقيت بهالحيره الى ان اتصال وره اتصال راح هالشعور من يمي وبقيت اريد ابقى وياه...
الولد اسمه هاني ومن بغداد ولسانه مو طبيعي بحيث مرات يغلط ومرات يحسسك ان الغلط مالته من اهتمام ومحبه ويخليك ما تواخذه على كل كلمه يحجيها..
شايفين لما انسان يدخل كلبك وانته ماجنت حاسبله اي حساب؟
شايفين لما انسان يصير كولشي بتفكيرك وتحاول تبعده عن بالك ومتكدر؟؟
شايفين لمن انسان تحاول تكوله احبك واكو جزء منك بعده معارض وميخليك تكول؟؟
شايفين لما انسان يكون بكلبك وبتفكيرك وياكل ويشرب وينام ويكعد وياك؟؟
اي نعم اني هيج صار وياي بمرور الوقت وكثره المكالمات بيني وبين هاني هيج صرت احسه..
الى ان اجه اليوم الي كالي بيه هاني عن حبه وكالي اني احبج وماكدر استغني عنج ولا لحظه ومادري بدون اي وعي ابتسمت وكتله اني هم احبك...
هاني اخذ كل تفكيري بوقتها واخذ كل مشاعري وخلاني احبه وكان الحب الاول بحياتي..
تسألوني ليش كلت الحب الاول مو الحب الوحيد؟؟؟
اكيد كلكم صارت ببالكم صوره مثاليه عن هاني مثل ما صارت ببالي بوقتها بس بالجزء الجاي راح احجيلكم شصار وياي وشلون كان هاني..
